໗. ຠທ຺ທກາປິລານີເຖຣີອປທານໍ

໒໔໔. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ [ສພ຺ພຘມ຺ເມສຸ ຈກ຺ຂຸມາ (ສີ. ປີ.)];

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໒໔໕. ‘‘ຕທາຫຸ ຫໍສວຕິຍໍ, ວິເທໂຫ ນາມ ນາມໂຕ [ນາມໂກ (ສ຺ຍາ. ປີ.)];

ເສຏ຺ຐີ ປຫູຕຣຕໂນ, ຕສ຺ສ ຊາຍາ ອໂຫສຫໍ.

໒໔໖. ‘‘ກທາຈິ ໂສ ນຣາທິຈ຺ຈໍ, ອຸເປຈ຺ຈ ສປຣິຊ຺ຊໂນ;

ຘມ຺ມມສ຺ໂສສິ ພຸທ຺ຘສ຺ສ, ສພ຺ພທຸກ຺ຂຠຍປ຺ປຫໍ [ທຸກ຺ຂກ຺ຂຍາວຫໍ (ສ຺ຍາ.)].

໒໔໗. ‘‘ສາວກໍ ຘຸຕວາທານໍ, ອຄ຺ຄໍ ກິຕ຺ເຕສິ ນາຍໂກ;

ສຸຕ຺ວາ ສຕ຺ຕາຫິກໍ ທານໍ, ທຕ຺ວາ ພຸທ຺ຘສ຺ສ ຕາທິໂນ.

໒໔໘. ‘‘ນິປຈ຺ຈ ສິຣສາ ປາເທ, ຕໍ ຐານມຠິປຕ຺ຖຍິໍ;

ສ ຫາສຍນ຺ໂຕ ປຣິສໍ, ຕທາ ຫິ ນຣປຸງ຺ຄໂວ.

໒໔໙. ‘‘ເສຏ຺ຐິໂນ ອນຸກມ຺ປາຍ, ອິມາ ຄາຖາ ອຠາສຖ;

‘ລຈ຺ຉເສ ປຕ຺ຖິຕໍ ຐານໍ, ນິພ຺ພຸໂຕ ໂຫຫິ ປຸຕ຺ຕກ.

໒໕໐. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໒໕໑. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ກສ຺ສໂປ ນາມ ໂຄຕ຺ເຕນ, ເຫສ຺ສຕິ ສຕ຺ຖຸ ສາວໂກ’.

໒໕໒. ‘‘ຕໍ ສຸຕ຺ວາ ມຸທິໂຕ ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ໂຕ ປຣິຈຣິ, ປຈ຺ຈເຍຫິ ວິນາຍກໍ.

໒໕໓. ‘‘ສາສນໍ ໂຊຕຍິຕ຺ວານ, ໂສ ມທ຺ທິຕ຺ວາ ກຸຕິຕ຺ຖິເຍ;

ເວເນຍ຺ຍໍ ວິນຍິຕ຺ວາ ຈ, ນິພ຺ພຸໂຕ ໂສ ສສາວໂກ.

໒໕໔. ‘‘ນິພ຺ພຸເຕ ຕມ຺ຫິ ໂລກຄ຺ເຄ, ປູຊນຕ຺ຖາຍ ສຕ຺ຖຸໂນ;

ຎາຕິມິຕ຺ເຕ ສມາເນຕ຺ວາ, ສຫ ເຕຫິ ອກາຣຍິ.

໒໕໕. ‘‘ສຕ຺ຕໂຍຊນິກໍ ຖູປໍ, ອຸພ຺ພິທ຺ຘໍ ຣຕນາມຍໍ;

ຊລນ຺ຕໍ ສຕຣໍສິໍວ, ສາລຣາຊໍວ ຜຸລ຺ລິຕໍ.

໒໕໖. ‘‘ສຕ຺ຕສຕສຫສ຺ສານິ, ປາຕິໂຍ [ຈາຕິໂຍ (ສ຺ຍາ.)] ຕຕ຺ຖ ກາຣຍິ;

ນຬຄ຺ຄີ ວິຍ ໂຊຕນ຺ຕີ [ໂຊຕນ຺ເຕ (ສ຺ຍາ. ປີ.)], ຣຕເນເຫວ ສຕ຺ຕຫິ.

໒໕໗. ‘‘ຄນ຺ຘເຕເລນ ປູເຣຕ຺ວາ, ທີປານຸຊ຺ຊລຍີ ຕຫິໍ;

ປູຊນຕ຺ຖາຍ [ປູຊຕ຺ຖາຍ (ສີ. ກ.)] ມເຫສິສ຺ສ, ສພ຺ພຠູຕານຸກມ຺ປິໂນ.

໒໕໘. ‘‘ສຕ຺ຕສຕສຫສ຺ສານິ, ປຸຓ຺ຓກຸມ຺ຠານິ ກາຣຍິ;

ຣຕເນເຫວ ປຸຓ຺ຓານິ, ປູຊນຕ຺ຖາຍ ມເຫສິໂນ.

໒໕໙. ‘‘ມຊ຺ເຌ ອຏ຺ຐຏ຺ຐກຸມ຺ຠີນໍ, ອຸສ຺ສິຕາ ກຎ຺ຈນຄ຺ຆິໂຍ;

ອຕິໂຣຈນ຺ຕິ ວຓ຺ເຓນ, ສຣເທວ ທິວາກໂຣ.

໒໖໐. ‘‘ຈຕຸທ຺ວາເຣສຸ ໂສຠນ຺ຕິ, ໂຕຣຓາ ຣຕນາມຍາ;

ອຸສ຺ສິຕາ ຜລກາ ຣມ຺ມາ, ໂສຠນ຺ຕິ ຣຕນາມຍາ.

໒໖໑. ‘‘ວິໂຣຈນ຺ຕິ ປຣິກ຺ຂິຕ຺ຕາ [ປຣິກ຺ຂາໂຍ (ສ຺ຍາ.)], ອວຏໍສາ ສຸນິມ຺ມິຕາ;

ອຸສ຺ສິຕານິ ປຏາການິ, ຣຕນານິ ວິໂຣຈເຣ.

໒໖໒. ‘‘ສຸຣຕ຺ຕໍ ສຸກຕໍ ຈິຕ຺ຕໍ, ເຈຕິຍໍ ຣຕນາມຍໍ;

ອຕິໂຣຈຕິ ວຓ຺ເຓນ, ສສຎ຺ໂຌວ [ສສຊ຺ຌາວ (ສ຺ຍາ. ກ.), ສສຎ຺ຊາວ (ປີ.)] ທິວາກໂຣ.

໒໖໓. ‘‘ຖູປສ຺ສ ເວທິໂຍ ຕິສ຺ໂສ, ຫຣິຕາເລນ ປູຣຍິ;

ເອກໍ ມໂນສິລາເຍກໍ, ອຎ຺ຊເນນ ຈ ເອກິກໍ.

໒໖໔. ‘‘ປູຊໍ ເອຕາທິສໍ ຣມ຺ມໍ, ກາເຣຕ຺ວາ ວຣວາທິໂນ;

ອທາສິ ທານໍ ສງ຺ຆສ຺ສ, ຍາວຊີວໍ ຍຖາພລໍ.

໒໖໕. ‘‘ສຫາວ ເສຏ຺ຐິນາ ເຕນ, ຕານິ ປຸຎ຺ຎານິ ສພ຺ພໂສ;

ຍາວຊີວໍ ກຣິຕ຺ວານ, ສຫາວ ສຸຄຕິໍ ຄຕາ.

໒໖໖. ‘‘ສມ຺ປຕ຺ຕິໂຍນຸໂຠຕ຺ວານ, ເທວຕ຺ເຕ ອຖ ມານຸເສ;

ຉາຍາ ວິຍ ສຣີເຣນ, ສຫ ເຕເນວ ສໍສຣິໍ.

໒໖໗. ‘‘ເອກນວຸຕິໂຕ ກປ຺ເປ, ວິປສ຺ສີ ນາມ ນາຍໂກ;

ອຸປ຺ປຊ຺ຊິ ຈາຣຸທສ຺ສໂນ, ສພ຺ພຘມ຺ມວິປສ຺ສໂກ.

໒໖໘. ‘‘ຕທາຍໍ ພນ຺ຘຸມຕິຍໍ, ພ຺ຣາຫ຺ມໂຓ ສາຘຸສມ຺ມໂຕ;

ອຑ຺ໂຒ ສນ຺ໂຕ ຄຸເຓນາປິ [ສຕ຺ຖາຄເມນາສິ (ສີ.)], ຘເນນ ຈ ສຸທຸຄ຺ຄໂຕ.

໒໖໙. ‘‘ຕທາປິ ຕສ຺ສາຫໍ ອາສິໍ, ພ຺ຣາຫ຺ມຓີ ສມເຈຕສາ;

ກທາຈິ ໂສ ທິຊວໂຣ, ສງ຺ຄເມສິ ມຫາມຸນິໍ.

໒໗໐. ‘‘ນິສິນ຺ນໍ ຊນກາຍມ຺ຫິ, ເທເສນ຺ຕໍ ອມຕໍ ປທໍ;

ສຸຕ຺ວາ ຘມ຺ມໍ ປມຸທິໂຕ, ອທາສິ ເອກສາຏກໍ.

໒໗໑. ‘‘ຆຣເມເກນ ວຕ຺ເຖນ, ຄນ຺ຕ຺ວາເນຕໍ ສ ມພ຺ຣວິ [ມມພ຺ຣວິ (ສີ. ສ຺ຍາ. ປີ.)];

‘ອນຸໂມທ ມຫາປຸຎ຺ຎໍ [ມຫາປຎ຺ເຎ (ສີ.), ມຫາປຸຎ຺ເຎ (ສ຺ຍາ. ກ.)], ທິນ຺ນໍ ພຸທ຺ຘສ຺ສ ສາຏກໍ’.

໒໗໒. ‘‘ຕທາຫໍ ອຎ຺ຊລິໍ ກຕ຺ວາ, ອນຸໂມທິໍ ສຸປີຓິຕາ [ສຸວິທິຕາ (ສ຺ຍາ.), ສຸປີຕິຍາ (ກ.)];

‘ສຸທິນ຺ໂນ ສາຏໂກ ສາມິ, ພຸທ຺ຘເສຏ຺ຐສ຺ສ ຕາທິໂນ’.

໒໗໓. ‘‘ສຸຂິໂຕ ສຊ຺ຊິໂຕ ຫຸຕ຺ວາ, ສໍສຣນ຺ໂຕ ຠວາຠເວ;

ພາຣາຓສິປຸເຣ ຣມ຺ເມ, ຣາຊາ ອາສິ ມຫີປຕິ.

໒໗໔. ‘‘ຕທາ ຕສ຺ສ ມເຫສີຫໍ, ອິຕ຺ຖິຄຸມ຺ພສ຺ສ ອຸຕ຺ຕມາ;

ຕສ຺ສາຕິ ທຍິຕາ [ຕສ຺ສາວິ ທຸຕິຍິກາ (ສ຺ຍາ.)] ອາສິໍ, ປຸພ຺ພສ຺ເນເຫນ ຠຕ຺ຕຸໂນ [ຈຸຕ຺ຕຣິ (ສ຺ຍາ. ປີ. ກ.)].

໒໗໕. ‘‘ປິຓ຺ຑາຍ ວິຈຣນ຺ເຕ ເຕ [ໂສ (ສີ. ສ຺ຍາ. ປີ.)], ອຏ຺ຐ ປຈ຺ເຈກນາຍເກ;

ທິສ຺ວາ ປມຸທິໂຕ ຫຸຕ຺ວາ, ທຕ຺ວາ ປິຓ຺ຑໍ ມຫາຣຫໍ.

໒໗໖. ‘‘ປຸໂນ ນິມນ຺ຕຍິຕ຺ວານ, ກຕ຺ວາ ຣຕນມຓ຺ຑປໍ;

ກມ຺ມາເຣຫິ ກຕໍ ປຕ຺ຕໍ [ກຕໍ ຉຕ຺ຕໍ (ສີ.), ກຕມຏ຺ຐໍ (ສ຺ຍາ.)], ໂສວຓ຺ຓໍ ວຕ ຕຕ຺ຕກໍ.

໒໗໗. ‘‘ສມາເນຕ຺ວານ ເຕ ສພ຺ເພ, ເຕສໍ ທານມທາສິ ໂສ;

ໂສຓ຺ຓາສເນ ປວິຏ຺ຐານໍ, ປສນ຺ໂນ ເສຫິ ປາຓິຠິ.

໒໗໘. ‘‘ຕມ຺ປິ ທານໍ ສຫາທາສິໍ, ກາສິຣາເຊນຫໍ ຕທາ;

ປຸນາຫໍ ພາຣາຓສິຍໍ, ຊາຕາ ກາສິກຄາມເກ.

໒໗໙. ‘‘ກຸຏຸມ຺ພິກກຸເລ ຜີເຕ, ສຸຂິໂຕ ໂສ ສຠາຕຸໂກ;

ເຊຏ຺ຐສ຺ສ ຠາຕຸໂນ ຊາຍາ, ອໂຫສິໍ ສຸປຕິພ຺ພຕາ.

໒໘໐. ‘‘ປຈ຺ເຈກພຸທ຺ຘໍ ທິສ຺ວານ, ກນິຍສ຺ສ ມມ ຠຕ຺ຕຸໂນ [ຠຕ຺ຕຸກນິຍໂສ (ສ຺ຍາ.)];

ຠາຄນ຺ນໍ ຕສ຺ສ ທຕ຺ວານ, ອາຄເຕ ຕມ຺ຫິ ປາວທິໍ.

໒໘໑. ‘‘ນາຠິນນ຺ທິຕ຺ຖ ໂສ ທານໍ, ຕໂຕ ຕສ຺ສ ອທາສຫໍ;

ອຸຂາ [ພຸທ຺ຘາ (ສ຺ຍາ.)] ອານິຍ ຕໍ ອນ຺ນໍ, ປຸໂນ ຕສ຺ເສວ ໂສ ອທາ.

໒໘໒. ‘‘ຕທນ຺ນໍ ຉຑ຺ຑຍິຕ຺ວານ, ທຸຏ຺ຐາ ພຸທ຺ຘສ຺ສຫໍ ຕທາ;

ປຕ຺ຕໍ ກລລປຸຓ຺ຓໍ ຕໍ, ອທາສິໍ ຕສ຺ສ ຕາທິໂນ.

໒໘໓. ‘‘ທາເນ ຈ ຄຫເຓ ເຈວ, ອປເຈ ປທຸເສປິ ຈ;

ສມຈິຕ຺ຕມຸຂໍ ທິສ຺ວາ, ຕທາຫໍ ສໍວິຊິໍ ຠຸສໍ.

໒໘໔. ‘‘ປຸໂນ ປຕ຺ຕໍ ຄເຫຕ຺ວານ, ໂສຘຍິຕ຺ວາ ສຸຄນ຺ຘິນາ;

ປສນ຺ນຈິຕ຺ຕາ ປູເຣຕ຺ວາ, ສຆຕໍ ສກ຺ກຣໍ ອທໍ.

໒໘໕. ‘‘ຍຕ຺ຖ ຍຕ຺ຖູປປຊ຺ຊາມິ, ສຸຣູປາ ໂຫມິ ທານໂຕ;

ພຸທ຺ຘສ຺ສ ອປກາເຣນ, ທຸຄ຺ຄນ຺ຘາ ວທເນນ ຈ.

໒໘໖. ‘‘ປຸນ ກສ຺ສປວີຣສ຺ສ, ນິຘາຍນ຺ຕມ຺ຫິ ເຈຕິເຍ;

ໂສວຓ຺ຓໍ ອິຏ຺ຐກໍ ວຣໍ, ອທາສິໍ ມຸທິຕາ ອຫໍ.

໒໘໗. ‘‘ຈຕຸຊ຺ຊາເຕນ ຄນ຺ເຘນ, ນິຈຍິຕ຺ວາ ຕມິຏ຺ຐກໍ;

ມຸຕ຺ຕາ ທຸຄ຺ຄນ຺ຘໂທສມ຺ຫາ, ສພ຺ພງ຺ຄສຸສມາຄຕາ.

໒໘໘. ‘‘ສຕ຺ຕປາຕິສຫສ຺ສານິ, ຣຕເນເຫວ ສຕ຺ຕຫິ;

ກາເຣຕ຺ວາ ຆຕປູຣານິ, ວຏ຺ຏີນິ [ວຏ຺ຏີໂຍ (ສີ.)] ຈ ສຫສ຺ສໂສ.

໒໘໙. ‘‘ປກ຺ຂິປິຕ຺ວາ ປທີເປຕ຺ວາ, ຐປຍິໍ ສຕ຺ຕປນ຺ຕິໂຍ;

ປູຊນຕ຺ຖໍ ໂລກນາຖສ຺ສ, ວິປ຺ປສນ຺ເນນ ເຈຕສາ.

໒໙໐. ‘‘ຕທາປິ ຕມ຺ຫິ ປຸຎ຺ຎມ຺ຫິ, ຠາຄິນີຍິ ວິເສສໂຕ;

ປຸນ ກາສີສຸ ສຎ຺ຊາໂຕ, ສຸມິຕ຺ຕາ ອິຕິ ວິສ຺ສຸໂຕ.

໒໙໑. ‘‘ຕສ຺ສາຫໍ ຠຣິຍາ ອາສິໍ, ສຸຂິຕາ ສຊ຺ຊິຕາ ປິຍາ;

ຕທາ ປຈ຺ເຈກມຸນິໂນ, ອທາສິໍ ຆນເວຐນໍ.

໒໙໒. ‘‘ຕສ຺ສາປິ ຠາຄິນີ ອາສິໍ, ໂມທິຕ຺ວາ ທານມຸຕ຺ຕມໍ;

ປຸນາປິ ກາສິຣຏ຺ຐມ຺ຫິ, ຊາໂຕ ໂກລິຍຊາຕິຍາ.

໒໙໓. ‘‘ຕທາ ໂກລິຍປຸຕ຺ຕານໍ, ສເຕຫິ ສຫ ປຎ຺ຈຫິ;

ປຎ຺ຈປຈ຺ເຈກພຸທ຺ຘານໍ, ສຕານິ ສມຸປຏ຺ຐຫິ.

໒໙໔. ‘‘ເຕມາສໍ ຕປ຺ປຍິຕ຺ວານ [ວາສຍິຕ຺ວານ (ສ຺ຍາ. ປີ.)], ອທາສິ ຈ ຕິຈີວເຣ [ຕິຈີວຣໍ (ສ຺ຍາ.)];

ຊາຍາ ຕສ຺ສ ຕທາ ອາສິໍ, ປຸຎ຺ຎກມ຺ມປຖານຸຄາ.

໒໙໕. ‘‘ຕໂຕ ຈຸໂຕ ອຫຸ ຣາຊາ, ນນ຺ໂທ ນາມ ມຫາຍໂສ;

ຕສ຺ສາປິ ມເຫສີ ອາສິໍ, ສພ຺ພກາມສມິທ຺ຘິນີ.

໒໙໖. ‘‘ຕທາ ຣາຊາ ຠວິຕ຺ວານ, ພ຺ຣຫ຺ມທຕ຺ໂຕ ມຫີປຕິ;

ປທຸມວຕີປຸຕ຺ຕານໍ, ປຈ຺ເຈກມຸນິນໍ ຕທາ.

໒໙໗. ‘‘ສຕານິ ປຎ຺ຈນູນານິ, ຍາວຊີວໍ ອຸປຏ຺ຐຫິໍ;

ຣາຊຸຍ຺ຍາເນ ນິວາເສຕ຺ວາ, ນິພ຺ພຸຕານິ ຈ ປູຊຍິໍ.

໒໙໘. ‘‘ເຈຕິຍານິ ຈ ກາເຣຕ຺ວາ, ປພ຺ພຊິຕ຺ວາ ອຸໂຠ ມຍໍ;

ຠາເວຕ຺ວາ ອປ຺ປມຎ຺ຎາໂຍ, ພ຺ຣຫ຺ມໂລກໍ ອຄມ຺ຫເສ.

໒໙໙. ‘‘ຕໂຕ ຈຸໂຕ ມຫາຕິຕ຺ເຖ, ສຸຊາໂຕ ປິປ຺ຜລາຍໂນ;

ມາຕາ ສຸມນເທວີຕິ, ໂກສິໂຄຕ຺ໂຕ ທິໂຊ ປິຕາ.

໓໐໐. ‘‘ອຫໍ ມທ຺ເທ ຊນປເທ, ສາກລາຍ ປຸຣຸຕ຺ຕເມ;

ກປ຺ປິລສ຺ສ ທິຊສ຺ສາສິໍ, ຘີຕາ ມາຕາ ສຸຈີມຕິ.

໓໐໑. ‘‘ຆນກຎ຺ຈນພິມ຺ເພນ, ນິມ຺ມິນິຕ຺ວານ ມໍ ປິຕາ;

ອທາ ກສ຺ສປຘີຣສ຺ສ, ກາເມຫິ ວຊ຺ຊິຕສ຺ສມໍ.

໓໐໒. ‘‘ກທາຈິ ໂສ ກາຣຸຓິໂກ, ຄນ຺ຕ຺ວາ ກມ຺ມນ຺ຕເປກ຺ຂໂກ;

ກາກາທິເກຫິ ຂຊ຺ຊນ຺ເຕ, ປາເຓ ທິສ຺ວານ ສໍວິຊິ.

໓໐໓. ‘‘ຆເຣວາຫໍ ຕິເລ ຊາເຕ, ທິສ຺ວານາຕປຕາປເນ;

ກິມິ ກາເກຫິ ຂຊ຺ຊນ຺ເຕ, ສໍເວຄມລຠິໍ ຕທາ.

໓໐໔. ‘‘ຕທາ ໂສ ປພ຺ພຊີ ຘີໂຣ, ອຫໍ ຕມນຸປພ຺ພຊິໍ;

ປຎ຺ຈວສ຺ສານິ ນິວສິໍ, ປຣິພ຺ພາຊວເຕ [ປຣິພ຺ພາຊປເຖ (ສ຺ຍາ. ປີ.)] ອຫໍ.

໓໐໕. ‘‘ຍທາ ປພ຺ພຊິຕາ ອາສິ, ໂຄຕມີ ຊິນໂປສິກາ;

ຕທາຫໍ ຕມຸປຄນ຺ຕ຺ວາ, ພຸທ຺ເຘນ ອນຸສາສິຕາ.

໓໐໖. ‘‘ນ ຈິເຣເນວ ກາເລນ, ອຣຫຕ຺ຕມປາປຸຓິໍ;

ອໂຫ ກລ຺ຍາຓມິຕ຺ຕຕ຺ຕໍ, ກສ຺ສປສ຺ສ ສິຣີມໂຕ.

໓໐໗. ‘‘ສຸໂຕ ພຸທ຺ຘສ຺ສ ທາຍາໂທ, ກສ຺ສໂປ ສຸສມາຫິໂຕ;

ປຸພ຺ເພນິວາສໍ ໂຍ ເວທິ, ສຄ຺ຄາປາຍຎ຺ຈ ປສ຺ສຕິ.

໓໐໘. ‘‘ອໂຖ ຊາຕິກ຺ຂຍໍ ປຕ຺ໂຕ, ອຠິຎ຺ຎາໂວສິໂຕ ມຸນິ;

ເອຕາຫິ ຕີຫິ ວິຊ຺ຊາຫິ, ເຕວິຊ຺ໂຊ ໂຫຕິ ພ຺ຣາຫ຺ມໂຓ.

໓໐໙. ‘‘ຕເຖວ ຠທ຺ທກາປິລານີ [ຠທ຺ທາກາປິລານີ (ສີ. ປີ.)], ເຕວິຊ຺ຊາ ມຈ຺ຈຸຫາຍິນີ;

ຘາເຣຕິ ອນ຺ຕິມໍ ເທຫໍ, ຊິຕ຺ວາ ມາຣໍ ສວາຫນໍ.

໓໑໐. ‘‘ທິສ຺ວາ ອາທີນວໍ ໂລເກ, ອຸໂຠ ປພ຺ພຊິຕາ ມຍໍ;

ຕ຺ຍມ຺ຫ ຂີຓາສວາ ທນ຺ຕາ, ສີຕິຠູຕາມ຺ຫ ນິພ຺ພຸຕາ.

໓໑໑. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໓໑໒. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໑໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ຠທ຺ທກາປິລານີ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ຠທ຺ທກາປິລານີເຖຣິຍາປທານໍ ສຕ຺ຕມໍ.