໙. ອຸປ຺ປລວຓ຺ຓາເຖຣີອປທານໍ

໓໘໔. ‘‘ຠິກ຺ຂຸນີ ອຸປ຺ປລວຓ຺ຓາ, ອິທ຺ຘິຍາ ປາຣມິໍ ຄຕາ;

ວນ຺ທິຕ຺ວາ ສຕ຺ຖຸໂນ ປາເທ, ອິທໍ ວຈນມພ຺ຣວິ.

໓໘໕. ‘‘‘ນິຕ຺ຖິຓ຺ຓາ ຊາຕິສໍສາຣໍ [ຊາຕິສໍສາຣາ (ປີ.)], ປຕ຺ຕາຫໍ ອຈລໍ ປທໍ;

ສພ຺ພທຸກ຺ຂໍ ມຍາ ຂີຓໍ, ອາໂຣເຈມິ ມຫາມຸນິ.

໓໘໖. ‘‘‘ຍາວຕາ ປຣິສາ ອຕ຺ຖິ, ປສນ຺ນາ ຊິນສາສເນ;

ຍສ຺ສາ ຈ ເມປຣາໂຘຕ຺ຖິ, ຂມນ຺ຕຸ ຊິນສມ຺ມຸຂາ.

໓໘໗. ‘‘‘ສໍສາເຣ ສໍສຣນ຺ຕິຍາ [ສໍສຣນ຺ຕາ ເມ (ສ຺ຍາ.)], ຂລິຕໍ ເມ ສເຈ ຠເວ;

ອາໂຣເຈມິ ມຫາວີຣ, ອປຣາຘໍ ຂມສ຺ສຸ ຕໍ [ເມ (ສ຺ຍາ.)].

໓໘໘. ‘‘‘ອິທ຺ຘິຎ຺ຈາປິ ນິທສ຺ເສຫິ, ມມ ສາສນກາຣິເກ;

ຈຕສ຺ໂສ ປຣິສາ ອຊ຺ຊ, ກງ຺ຂໍ ຉິນ຺ທາຫິ ຍາວຕາ.

໓໘໙. ‘‘‘ຘີຕາ ຕຸຍ຺ຫໍ ມຫາວີຣ, ປຎ຺ຎວນ຺ຕ ຊຸຕິນ຺ຘຣ;

ພຫຸຎ຺ຈ ທຸກ຺ກຣໍ ກມ຺ມໍ, ກຕໍ ເມ ອຕິທຸກ຺ກຣໍ.

໓໙໐. ‘‘‘ອຸປ຺ປລສ຺ເສວ ເມ ວຓ຺ໂຓ, ນາເມນຸປ຺ປລນາມິກາ;

ສາວິກາ ເຕ ມຫາວີຣ, ປາເທ ວນ຺ທາມິ ຈກ຺ຂຸມ.

໓໙໑. ‘‘‘ຣາຫຸໂລ ຈ ອຫຎ຺ເຈວ, ເນກຊາຕິສເຕ ພຫູ;

ເອກສ຺ມິໍ ສມ຺ຠເວ ຊາຕາ, ສມານຉນ຺ທມານສາ.

໓໙໒. ‘‘‘ນິພ຺ພຕ຺ຕິ ເອກໂຕ ໂຫຕິ, ຊາຕິຍາປິ ຈ ເອກໂຕ [ຊາຕີສຸ ພຫຸໂສ ມມ (ສີ.)];

ປຈ຺ຉິເມ ຠເວ ສມ຺ປຕ຺ເຕ, ອຸໂຠປິ ນານາສມ຺ຠວາ.

໓໙໓. ‘‘‘ປຸຕ຺ໂຕ ຈ ຣາຫຸໂລ ນາມ, ຘີຕາ ອຸປ຺ປລສວ຺ຫຍາ;

ປສ຺ສ ວີຣ ມມໍ ອິທ຺ຘິໍ, ພລໍ ທສ຺ເສມິ ສຕ຺ຖຸໂນ.

໓໙໔. ‘‘‘ມຫາສມຸທ຺ເທ ຈຕຸໂຣ, ປກ຺ຂິປິ ຫຕ຺ຖປາຕິຍໍ;

ເຕລໍ ຫຕ຺ຖຄຕຎ຺ເຈວ, ຂິຑ຺ໂຑ [ເວຊ຺ໂຊ (ສີ. ປີ.)] ໂກມາຣໂກ ຍຖາ.

໓໙໕. ‘‘‘ອຸພ຺ພຕ຺ຕຍິຕ຺ວາ ປຖວິໍ, ປກ຺ຂິປິ ຫຕ຺ຖປາຕິຍໍ;

ຈິຕ຺ຕໍ ມຸຎ຺ຊໍ ຍຖາ ນາມ, ລຸຎ຺ຈິ ໂກມາຣໂກ ຍຸວາ.

໓໙໖. ‘‘‘ຈກ຺ກວາຬສມໍ ປາຓິໍ, ຉາທຍິຕ຺ວານ ມຕ຺ຖເກ;

ວສ຺ສາເປຕ຺ວານ ຜຸສິຕໍ, ນານາວຓ຺ຓໍ ປຸນປ຺ປຸນໍ.

໓໙໗. ‘‘‘ຠູມິໍ ອຸທຸກ຺ຂລໍ ກຕ຺ວາ, ຘຎ຺ຎໍ ກຕ຺ວານ ສກ຺ຂຣໍ;

ສິເນຣຸໍ ມຸສລໍ ກຕ຺ວາ, ມທ຺ທິ ໂກມາຣິກາ ຍຖາ.

໓໙໘. ‘‘‘ຘີຕາຫໍ ພຸທ຺ຘເສຏ຺ຐສ຺ສ, ນາເມນຸປ຺ປລສວ຺ຫຍາ;

ອຠິຎ຺ຎາສຸ ວສີຠູຕາ, ຕວ ສາສນກາຣິກາ.

໓໙໙. ‘‘‘ນານາວິກຸພ຺ພນໍ ກຕ຺ວາ, ທສ຺ເສຕ຺ວາ ໂລກນາຍກໍ;

ນາມໂຄຕ຺ຕຎ຺ຈ ສາເວຕ຺ວາ [ປກາເສຕ຺ວາ (ສ຺ຍາ.)], ປາເທ ວນ຺ທາມິ ຈກ຺ຂຸມ.

໔໐໐. ‘‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ເຈໂຕປຣິຍຎາຓສ຺ສ, ວສີ ໂຫມິ ມຫາມຸເນ.

໔໐໑. ‘‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໔໐໒. ‘‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ເມ ວິມລໍ [ວິປຸລໍ (ສ຺ຍາ.)] ສຸທ຺ຘໍ, ສຠາເວນ ມເຫສິໂນ.

໔໐໓. ‘‘‘ປຸຣິມານໍ ຊິນຄ຺ຄານໍ, ສງ຺ຄມໍ ເຕ ນິທສ຺ສິຕໍ [ສມ຺ມຸຂາ ຈ ປຣມ຺ມຸຂາ (ສີ.)];

ອຘິກາຣໍ ພຫຸໍ ມຍ຺ຫໍ, ຕຸຍ຺ຫຕ຺ຖາຍ ມຫາມຸນິ.

໔໐໔. ‘‘‘ຍໍ ມຍາ ປູຣິຕໍ ກມ຺ມໍ, ກຸສລໍ ສຣ ເມ ມຸນິ;

ຕວຕ຺ຖາຍ ມຫາວີຣ, ປຸຎ຺ຎໍ ອຸປຈິຕໍ ມຍາ.

໔໐໕. ‘‘‘ອຠພ຺ພຏ຺ຐາເນ ວຊ຺ເຊຕ຺ວາ, ວາຣຍນ຺ຕີ [ປຣິວຊ຺ຊນ຺ຕິ (ສີ.), ປຣິປາເຈນ຺ໂຕ (ສ຺ຍາ.)] ອນາຈຣໍ;

ຕວຕ຺ຖາຍ ມຫາວີຣ, ຈຕ຺ຕໍ ເມ ຊີວິຕຸຕ຺ຕມໍ.

໔໐໖. ‘‘‘ທສໂກຏິສຫສ຺ສານິ, ອທາສິໍ ມມ ຊີວິຕໍ;

ປຣິຈ຺ຈຕ຺ຕາ ຈ ເມ ໂຫມິ, ຕວຕ຺ຖາຍ ມຫາມຸນິ.

໔໐໗. ‘‘‘ຕທາຕິວິມ຺ຫິຕາ ສພ຺ພາ, ສິຣສາວ ກຕຎ຺ຊລີ;

ອໂວຈຍ຺ເຍ ກຖໍ ອາສິ, ອຕຸລິທ຺ຘິປຣກ຺ກມາ’.

໔໐໘. ‘‘ສຕສຫສ຺ສິໂຕ ກປ຺ເປ, ນາຄກຎ຺ຎາ ອຫໍ ຕທາ;

ວິມລາ ນາມ ນາເມນ, ກຎ຺ຎານໍ ສາຘຸສມ຺ມຕາ.

໔໐໙. ‘‘ມໂຫຣໂຄ ມຫານາໂຄ, ປສນ຺ໂນ ຊິນສາສເນ;

ປທຸມຸຕ຺ຕຣໍ ມຫາເຕຊໍ, ນິມນ຺ເຕສິ ສສາວກໍ.

໔໑໐. ‘‘ຣຕນມຍໍ ມຓ຺ຑປໍ, ປລ຺ລງ຺ກໍ ຣຕນາມຍໍ;

ຣຕນໍ ວາລຸກາກິຓ຺ຓໍ, ອຸປໂຠຄໍ ຣຕນາມຍໍ.

໔໑໑. ‘‘ມຄ຺ຄຎ຺ຈ ປຏິຍາເທສິ, ຣຕນທ຺ຘຊຠູສິຕໍ;

ປຈ຺ຈຸຄ຺ຄນ຺ຕ຺ວານ ສມ຺ພຸທ຺ຘໍ, ວຊ຺ຊນ຺ໂຕ ຕູຣິເຍຫິ ໂສ.

໔໑໒. ‘‘ປຣິສາຫິ ຈ ຈຕູຫິ [ປຣິສາຫິ ຈຕູຫິ ໂສ (ສີ.), ປຣິສາຫິ ຈຕສ຺ໂສ ຫິ (ປີ.)], ປຣິວຸໂຕ [ສຫິໂຕ (ສີ.), ຜຣເຕ (ສ຺ຍາ.), ປເຣໂຕ (ປີ.)] ໂລກນາຍໂກ;

ມໂຫຣຄສ຺ສ ຠວເນ, ນິສີທິ ປຣມາສເນ.

໔໑໓. ‘‘ອນ຺ນໍ ປານໍ ຂາທນີຍໍ, ໂຠຊນຎ຺ຈ ມຫາຣຫໍ;

ວຣໍ ວຣຎ຺ຈ ປາທາສິ, ນາຄຣາຊາ ມຫາຍສໍ.

໔໑໔. ‘‘ຠຸຎ຺ຊິຕ຺ວານ ສມ຺ພຸທ຺ໂຘ, ປຕ຺ຕໍ ໂຘວິຕ຺ວາ ໂຍນິໂສ;

ອນຸໂມທນີຍໍກາສິ, ນາຄກຎ຺ຎາ ມຫິທ຺ຘິກາ.

໔໑໕. ‘‘ສພ຺ພຎ຺ຎຸໍ ຜຸລ຺ລິຕໍ ທິສ຺ວາ, ນາຄກຎ຺ຎາ ມຫາຍສໍ;

ປສນ຺ນໍ ສຕ຺ຖຸໂນ ຈິຕ຺ຕໍ, ສຸນິພນ຺ຘຎ຺ຈ ມານສໍ.

໔໑໖. ‘‘ມມຎ຺ຈ ຈິຕ຺ຕມຎ຺ຎາຍ, ຊລຊຸຕ຺ຕມນາມໂກ;

ຕສ຺ມິໍ ຂເຓ ມຫາວີໂຣ, ຠິກ຺ຂຸນິໍ ທສ຺ສຍິທ຺ຘິຍາ.

໔໑໗. ‘‘ອິທ຺ຘີ ອເນກາ ທສ຺ເສສິ, ຠິກ຺ຂຸນີ ສາ ວິສາຣທາ;

ປໂມທິຕາ ເວທຊາຕາ, ສຕ຺ຖາຣໍ ອິທມພ຺ຣວິ [ເອຕທພ຺ຣວິໍ (ສ຺ຍາ. ປີ.)].

໔໑໘. ‘‘‘ອທ຺ທສາຫໍ ອິມໍ ອິທ຺ຘິໍ, ສຸມນໍ ອິຕຣາຍປິ;

ກຖໍ ອໂຫສິ ສາ ວີຣ, ອິທ຺ຘິຍາ ສຸວິສາຣທາ’.

໔໑໙. ‘‘‘ໂອຣສາ ມຸຂໂຕ ຊາຕາ, ຘີຕາ ມມ ມຫິທ຺ຘິກາ;

ມມານຸສາສນິກຣາ, ອິທ຺ຘິຍາ ສຸວິສາຣທາ’.

໔໒໐. ‘‘ພຸທ຺ຘສ຺ສ ວຈນໍ ສຸຕ຺ວາ, ເອວໍ ປຕ຺ເຖສຫໍ ຕທາ [ຕຸຏ຺ຐາ ເອວໍ ອໂວຈຫໍ (ສ຺ຍາ.), ເອວມໂຫສຫໍ ຕທາ (ກ.)];

ອຫມ຺ປິ ຕາທິສາ ໂຫມິ, ອິທ຺ຘິຍາ ສຸວິສາຣທາ.

໔໒໑. ‘‘ປໂມທິຕາຫໍ ສຸມນາ, ປຕ຺ເຖ ອຸຕ຺ຕມມານສາ [ປຕ຺ຕອຸຕ຺ຕມມານສາ (ສີ. ສ຺ຍາ. ປີ.)];

ອນາຄຕມ຺ຫິ ອທ຺ຘາເນ, ອີທິສາ ໂຫມິ ນາຍກ.

໔໒໒. ‘‘ມຓິມຍມ຺ຫິ ປລ຺ລງ຺ເກ, ມຓ຺ຑປມ຺ຫິ ປຠສ຺ສເຣ;

ອນ຺ນປາເນນ ຕປ຺ເປຕ຺ວາ, ສສງ຺ຆໍ ໂລກນາຍກໍ.

໔໒໓. ‘‘ນາຄານໍ ປວຣໍ ປຸປ຺ຜໍ, ອຣຸຓໍ ນາມ ອຸປ຺ປລໍ;

ວຓ຺ຓໍ ເມ ອີທິສໍ ໂຫຕຸ, ປູເຊສິໍ ໂລກນາຍກໍ.

໔໒໔. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໔໒໕. ‘‘ຕໂຕ ຈຸຕາຫໍ ມນຸເຊ, ອຸປປນ຺ນາ ສຍມ຺ຠຸໂນ;

ອຸປ຺ປເລຫິ ປຏິຈ຺ຉນ຺ນໍ, ປິຓ຺ຑປາຕມທາສຫໍ.

໔໒໖. ‘‘ເອກນວຸຕິໂຕ ກປ຺ເປ, ວິປສ຺ສີ ນາມ ນາຍໂກ;

ອຸປ຺ປຊ຺ຊິ ຈາຣຸທສ຺ສໂນ, ສພ຺ພຘມ຺ເມສຸ ຈກ຺ຂຸມາ.

໔໒໗. ‘‘ເສຏ຺ຐິຘີຕາ ຕທາ ຫຸຕ຺ວາ, ພາຣາຓສິປຸຣຸຕ຺ຕເມ;

ນິມນ຺ເຕຕ຺ວານ ສມ຺ພຸທ຺ຘໍ, ສສງ຺ຆໍ ໂລກນາຍກໍ.

໔໒໘. ‘‘ມຫາທານໍ ທທິຕ຺ວານ, ອຸປ຺ປເລຫິ ວິນາຍກໍ;

ປູຊຍິຕ຺ວາ ເຈຕສາວ [ຈ ເຕເຫວ (ສ຺ຍາ. ປີ.)], ວຓ຺ຓໂສຠໍ ອປຕ຺ຖຍິໍ.

໔໒໙. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໔໓໐. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໔໓໑. ‘‘ຕສ຺ສາສິໍ ທຸຕິຍາ ຘີຕາ, ສມຓຄຸຕ຺ຕສວ຺ຫຍາ;

ຘມ຺ມໍ ສຸຕ຺ວາ ຊິນຄ຺ຄສ຺ສ, ປພ຺ພຊ຺ຊໍ ສມໂຣຈຍິໍ.

໔໓໒. ‘‘ອນຸຊານິ ນ ໂນ ຕາໂຕ, ອຄາເຣວ ຕທາ ມຍໍ;

ວີສວສ຺ສສຫສ຺ສານິ, ວິຈຣິມ຺ຫ ອຕນ຺ທິຕາ.

໔໓໓. ‘‘ໂກມາຣິພ຺ຣຫ຺ມຈຣິຍໍ, ຣາຊກຎ຺ຎາ ສຸເຂຘິຕາ;

ພຸທ຺ໂຘປຏ຺ຐານນິຣຕາ, ມຸທິຕາ ສຕ຺ຕຘີຕໂຣ.

໔໓໔. ‘‘ສມຓີ ສມຓຄຸຕ຺ຕາ ຈ, ຠິກ຺ຂຸນີ ຠິກ຺ຂຸທາຍິກາ [ຠິກ຺ຂຸທາສິກາ (ສີ. ສ຺ຍາ.)];

ຘມ຺ມາ ເຈວ ສຸຘມ຺ມາ ຈ, ສຕ຺ຕມີ ສງ຺ຆທາຍິກາ [ສໍຆທາສິກາ (ສີ. ສ຺ຍາ.)].

໔໓໕. ‘‘ອຫໍ ເຂມາ ຈ ສປ຺ປຎ຺ຎາ, ປຏາຈາຣາ ຈ ກຸຓ຺ຑລາ;

ກິສາໂຄຕມີ ຘມ຺ມທິນ຺ນາ, ວິສາຂາ ໂຫຕິ ສຕ຺ຕມີ.

໔໓໖. ‘‘ເຕຫິ ກມ຺ເມຫິ ສຸກເຕຫິ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໔໓໗. ‘‘ຕໂຕ ຈຸຕາ ມນຸສ຺ເສສຸ, ອຸປປນ຺ນາ ມຫາກຸເລ;

ປີຕໍ ມຏ຺ຐໍ ວຣໍ ທຸສ຺ສໍ, ອທໍ ອຣຫໂຕ ອຫໍ.

໔໓໘. ‘‘ຕໂຕ ຈຸຕາຣິຏ຺ຐປຸເຣ, ຊາຕາ ວິປ຺ປກຸເລ ອຫໍ;

ຘີຕາ ຕິຣິຏິວຈ຺ຉສ຺ສ, ອຸມ຺ມາທນ຺ຕີ ມໂນຫຣາ.

໔໓໙. ‘‘ຕໂຕ ຈຸຕາ ຊນປເທ, ກຸເລ ອຎ຺ຎຕເຣ ອຫໍ;

ປສູຕາ ນາຕິຜີຕມ຺ຫິ, ສາລິໍ ໂຄເປມຫໍ ຕທາ.

໔໔໐. ‘‘ທິສ຺ວາ ປຈ຺ເຈກສມ຺ພຸທ຺ຘໍ, ປຎ຺ຈລາຊາສຕານິຫໍ;

ທຕ຺ວາ ປທຸມຈ຺ຉນ຺ນານິ, ປຎ຺ຈ ປຸຕ຺ຕສຕານິຫໍ.

໔໔໑. ‘‘ປຕ຺ຖຍິໍ ເຕປິ ປຕ຺ເຖສຸໍ, ມຘຸໍ ທຕ຺ວາ ສຍມ຺ຠຸໂນ;

ຕໂຕ ຈຸຕາ ອຣຎ຺ເຎຫໍ, ອຊາຍິໍ ປທຸໂມທເຣ.

໔໔໒. ‘‘ກາສິຣຎ຺ໂຎ ມເຫສີຫໍ, ຫຸຕ຺ວາ ສກ຺ກຕປູຊິຕາ;

ອຊນິໍ ຣາຊປຸຕ຺ຕານໍ, ອນູນໍ ສຕປຎ຺ຈກໍ.

໔໔໓. ‘‘ຍທາ ເຕ ໂຍພ຺ພນປ຺ປຕ຺ຕາ, ກີຬນ຺ຕາ ຊລກີຬິຕໍ;

ທິສ຺ວາ ໂອປຕ຺ຕປທຸມໍ, ອາສຸໍ ປຈ຺ເຈກນາຍກາ.

໔໔໔. ‘‘ສາຫໍ ເຕຫິ ວິນາຠູຕາ, ສຸຕວີເຣຫິ ໂສກິນີ [ສຸຕວເຣຫິ ໂສກິນີ (ສີ. ສ຺ຍາ.)];

ຈຸຕາ ອິສິຄິລິປສ຺ເສ, ຄາມກມ຺ຫິ ອຊາຍິຫໍ.

໔໔໕. ‘‘ຍທາ ພຸທ຺ຘາ ສຸຕມຕີ, ສຸຕານໍ ຠຕ຺ຕຸໂນປິ ຈ [ກສຕໍ ຕທາ (ສີ.), ອຕ຺ຕໂນປິ ຈ (ສ຺ຍາ.)];

ຍາຄຸໍ ອາທາຍ ຄຈ຺ຉນ຺ຕີ, ອຏ຺ຐ ປຈ຺ເຈກນາຍເກ.

໔໔໖. ‘‘ຠິກ຺ຂາຍ ຄາມໍ ຄຈ຺ຉນ຺ເຕ, ທິສ຺ວາ ປຸຕ຺ເຕ ອນຸສ຺ສຣິໍ;

ຂີຣຘາຣາ ວິນິຄ຺ຄຈ຺ຉິ, ຕທາ ເມ ປຸຕ຺ຕເປມສາ.

໔໔໗. ‘‘ຕໂຕ ເຕສໍ ອທໍ ຍາຄຸໍ, ປສນ຺ນາ ເສຫິ ປາຓິຠິ;

ຕໂຕ ຈຸຕາຫໍ ຕິທສໍ, ນນ຺ທນໍ ອຸປປຊ຺ຊຫໍ.

໔໔໘. ‘‘ອນຸໂຠຕ຺ວາ ສຸຂໍ ທຸກ຺ຂໍ, ສໍສຣິຕ຺ວາ ຠວາຠເວ;

ຕວຕ຺ຖາຍ ມຫາວີຣ, ປຣິຈ຺ຈຕ຺ຕຎ຺ຈ ຊີວິຕໍ.

໔໔໙. ‘‘ເອວໍ ພຫຸວິຘໍ ທຸກ຺ຂໍ, ສມ຺ປຕ຺ຕີ ຈ ພຫຸພ຺ພິຘາ;

ປຈ຺ຉິເມ ຠເວ ສມ຺ປຕ຺ເຕ, ຊາຕາ ສາວຕ຺ຖິຍໍ ປຸເຣ.

໔໕໐. ‘‘ມຫາຘນເສຏ຺ຐິກຸເລ, ສຸຂິເຕ ສຊ຺ຊິເຕ ຕຖາ;

ນານາຣຕນປຊ຺ໂຊເຕ, ສພ຺ພກາມສມິທ຺ຘິເນ.

໔໕໑. ‘‘ສກ຺ກຕາ ປູຊິຕາ ເຈວ, ມານິຕາປຈິຕາ ຕຖາ;

ຣູປສີຣິມນຸປ຺ປຕ຺ຕາ [ຣູປໂສຠຄ຺ຄສມ຺ປນ຺ນາ (ສີ.)], ກຸເລສຸ ອຕິສກ຺ກຕາ [ອຠິສມ຺ມຕາ (ສີ.)].

໔໕໒. ‘‘ອຕີວ ປຕ຺ຖິຕາ ຈາສິໍ, ຣູປໂຠຄສິຣີຫິ ຈ;

ປຕ຺ຖິຕາ ເສຏ຺ຐິປຸຕ຺ເຕຫິ, ອເນເກຫິ ສເຕຫິປິ.

໔໕໓. ‘‘ອຄາຣໍ ປຊຫິຕ຺ວານ, ປພ຺ພຊິໍ ອນຄາຣິຍໍ;

ອຑ຺ຒມາເສ ອສມ຺ປຕ຺ເຕ, ຈຕຸສຈ຺ຈມປາປຸຓິໍ.

໔໕໔. ‘‘ອິທ຺ຘິຍາ ອຠິນິມ຺ມິຕ຺ວາ, ຈຕຸຣສ຺ສໍ ຣຖໍ ອຫໍ;

ພຸທ຺ຘສ຺ສ ປາເທ ວນ຺ທິສ຺ສໍ, ໂລກນາຖສ຺ສ ຕາທິໂນ.

໔໕໕. ‘‘‘ສຸປຸປ຺ຜິຕຄ຺ຄໍ ອຸປຄມ຺ມ ປາທປໍ [ຠິກ຺ຂຸນີ (ສີ. ປີ. ກ.) ເຖຣີຄາ. ໒໓໐], ເອກາ ຕຸວໍ ຕິຏ຺ຐສິ ສາລມູເລ;

ນ ຈາປິ ເຕ ທຸຕິໂຍ ອຕ຺ຖິ ໂກຈິ [ນ ຈຕ຺ຖິ ເຕ ທຸຕິຍາ ວຓ຺ຓຘາຕຸ (ສີ. ປີ. ກ.)], ພາເລ ນ ຕ຺ວໍ ຠາຍສິ ຘຸຕ຺ຕການໍ’.

໔໕໖. ‘‘‘ສຕໍ ສຫສ຺ສານິປິ ຘຸຕ຺ຕການໍ [ສຫສ຺ສານມ຺ປິ ຘຸຕ຺ຕການໍ (ປີ.) ເຖຣີຄາ. ໒໓໑], ສມາຄຕາ ເອທິສກາ ຠເວຍ຺ຍຸໍ;

ໂລມໍ ນ ອິຎ຺ເຊ ນ ສມ຺ປເວເຘ, ກິໍ ເມ ຕຸວໍ ມາຣ ກຣິສ຺ສເສໂກ [ນ ມາຣ ຠາຍາມິ ຕເວກິກາປິ (ສີ. ກ.) … ຕເມກິກາສິໍ (ປີ.)].

໔໕໗. ‘‘‘ເອສາ ອນ຺ຕຣຘາຍາມິ, ກຸຈ຺ຉິໍ ວາ ປວິສາມິ ເຕ;

ຠມຸກນ຺ຕຣິກາຍມ຺ປິ, ຕິຏ຺ຐນ຺ຕິໍ ມໍ ນ ທກ຺ຂສິ.

໔໕໘. ‘‘‘ຈິຕ຺ຕສ຺ມິໍ ວສີຠູຕາມ຺ຫິ, ອິທ຺ຘິປາທາ ສຸຠາວິຕາ;