໑໐. ປຏາຈາຣາເຖຣີອປທານໍ

໔໖໘. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໔໖໙. ‘‘ຕທາຫໍ ຫໍສວຕິຍໍ, ຊາຕາ ເສຏ຺ຐິກຸເລ ອຫຸໍ;

ນານາຣຕນປຊ຺ໂຊເຕ, ມຫາສຸຂສມປ຺ປິຕາ.

໔໗໐. ‘‘ອຸເປຕ຺ວາ ຕໍ ມຫາວີຣໍ, ອສ຺ໂສສິໍ ຘມ຺ມເທສນໍ;

ຕໂຕ ຊາຕປສາທາຫໍ, ອຸເປສິໍ ສຣຓໍ ຊິນໍ.

໔໗໑. ‘‘ຕໂຕ ວິນຍຘາຣີນໍ, ອຄ຺ຄໍ ວຓ຺ເຓສິ ນາຍໂກ;

ຠິກ຺ຂຸນິໍ ລຊ຺ຊິນິໍ ຕາທິໍ, ກປ຺ປາກປ຺ປວິສາຣທໍ.

໔໗໒. ‘‘ຕທາ ມຸທິຕຈິຕ຺ຕາຫໍ, ຕໍ ຐານມຠິກງ຺ຂິນີ;

ນິມນ຺ເຕຕ຺ວາ ທສພລໍ, ສສງ຺ຆໍ ໂລກນາຍກໍ.

໔໗໓. ‘‘ໂຠຊຍິຕ຺ວານ ສຕ຺ຕາຫໍ, ທທິຕ຺ວາວ ຕິຈີວຣໍ [ທທິຕ຺ວາ ປຕ຺ຕຈີວຣໍ (ສ຺ຍາ.)];

ນິປຈ຺ຈ ສິຣສາ ປາເທ, ອິທໍ ວຈນມພ຺ຣວິໍ.

໔໗໔. ‘‘‘ຍາ ຕຍາ ວຓ຺ຓິຕາ ວີຣ, ອິໂຕ ອຏ຺ຐມເກ ມຸນິ;

ຕາທິສາຫໍ ຠວິສ຺ສາມິ, ຍທິ ສິຊ຺ຌຕິ ນາຍກ’.

໔໗໕. ‘‘ຕທາ ອໂວຈ ມໍ ສຕ຺ຖາ, ‘ຠທ຺ເທ ມາ ຠາຍິ ອສ຺ສສ;

ອນາຄຕມ຺ຫິ ອທ຺ຘາເນ, ລຈ຺ຉເສ ຕໍ ມໂນຣຖໍ.

໔໗໖. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໔໗໗. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ປຏາຈາຣາຕິ ນາເມນ, ເຫສ຺ສຕິ ສຕ຺ຖຸ ສາວິກາ’.

໔໗໘. ‘‘ຕທາຫໍ ມຸທິຕາ [ປມຸທີ (ກ.)] ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ຕາ ປຣິຈຣິໍ, ສສງ຺ຆໍ ໂລກນາຍກໍ.

໔໗໙. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໔໘໐. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໔໘໑. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໔໘໒. ‘‘ຕສ຺ສາສິໍ ຕຕິຍາ ຘີຕາ, ຠິກ຺ຂຸນີ ອິຕິ ວິສ຺ສຸຕາ;

ຘມ຺ມໍ ສຸຕ຺ວາ ຊິນຄ຺ຄສ຺ສ, ປພ຺ພຊ຺ຊໍ ສມໂຣຈຍິໍ.

໔໘໓. ‘‘ອນຸຊານິ ນ ໂນ ຕາໂຕ, ອຄາເຣວ ຕທາ ມຍໍ;

ວີສວສ຺ສສຫສ຺ສານິ, ວິຈຣິມ຺ຫ ອຕນ຺ທິຕາ.

໔໘໔. ‘‘ໂກມາຣິພ຺ຣຫ຺ມຈຣິຍໍ, ຣາຊກຎ຺ຎາ ສຸເຂຘິຕາ;

ພຸທ຺ໂຘປຏ຺ຐານນິຣຕາ, ມຸທິຕາ ສຕ຺ຕຘີຕໂຣ.

໔໘໕. ‘‘ສມຓີ ສມຓຄຸຕ຺ຕາ ຈ, ຠິກ຺ຂຸນີ ຠິກ຺ຂຸທາຍິກາ;

ຘມ຺ມາ ເຈວ ສຸຘມ຺ມາ ຈ, ສຕ຺ຕມີ ສງ຺ຆທາຍິກາ.

໔໘໖. ‘‘ອຫໍ ອຸປ຺ປລວຓ຺ຓາ ຈ, ເຂມາ ຠທ຺ທາ ຈ ຠິກ຺ຂຸນີ;

ກິສາໂຄຕມີ ຘມ຺ມທິນ຺ນາ, ວິສາຂາ ໂຫຕິ ສຕ຺ຕມີ.

໔໘໗. ‘‘ເຕຫິ ກມ຺ເມຫິ ສຸກເຕຫິ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໔໘໘. ‘‘ປຈ຺ຉິເມ ຈ ຠເວ ທານິ, ຊາຕາ ເສຏ຺ຐິກຸເລ ອຫໍ;

ສາວຕ຺ຖິຍໍ ປຸຣວເຣ, ອິທ຺ເຘ ຜີເຕ ມຫທ຺ຘເນ.

໔໘໙. ‘‘ຍທາ ຈ ໂຍພ຺ພນູເປຕາ, ວິຕກ຺ກວສຄາ ອຫໍ;

ນຣໍ ຊາຣປຕິໍ ທິສ຺ວາ, ເຕນ ສທ຺ຘິໍ ອຄຈ຺ຉຫໍ.

໔໙໐. ‘‘ເອກປຸຕ຺ຕປສູຕາຫໍ, ທຸຕິໂຍ ກຸຈ຺ຉິຍາ ມມໍ;

ຕທາຫໍ ມາຕາປິຕໂຣ, ໂອກ຺ຂາມີຕິ [ອິກ຺ຂາມີຕິ (ສ຺ຍາ.), ທກ຺ຂາມີຕິ (ສີ.)] ສຸນິຈ຺ຉິຕາ.

໔໙໑. ‘‘ນາໂຣເຈສິໍ ປຕິໍ ມຍ຺ຫໍ, ຕທາ ຕມ຺ຫິ ປວາສິເຕ;

ເອກິກາ ນິຄ຺ຄຕາ ເຄຫາ, ຄນ຺ຕຸໍ ສາວຕ຺ຖິມຸຕ຺ຕມໍ.

໔໙໒. ‘‘ຕໂຕ ເມ ສາມິ ອາຄນ຺ຕ຺ວາ, ສມ຺ຠາເວສິ ປເຖ ມມໍ;

ຕທາ ເມ ກມ຺ມຊາ ວາຕາ, ອຸປ຺ປນ຺ນາ ອຕິທາຣຸຓາ.

໔໙໓. ‘‘ອຸຏ຺ຐິໂຕ ຈ ມຫາເມໂຆ, ປສູຕິສມເຍ ມມ;

ທພ຺ພຕ຺ຖາຍ ຕທາ ຄນ຺ຕ຺ວາ, ສາມິ ສປ຺ເປນ ມາຣິໂຕ.

໔໙໔. ‘‘ຕທາ ວິຊາຕທຸກ຺ເຂນ, ອນາຖາ ກປຓາ ອຫໍ;

ກຸນ຺ນທິໍ ປູຣິຕໍ ທິສ຺ວາ, ຄຈ຺ຉນ຺ຕີ ສກຸລາລຍໍ.

໔໙໕. ‘‘ພາລໍ ອາທາຍ ອຕຣິໍ, ປາຣກູເລ ຈ ເອກກໍ;

ສາເຍຕ຺ວາ [ປາເຍຕ຺ວາ (ສ຺ຍາ.), ປາເຕຕ຺ວາ (ກ.)] ພາລກໍ ປຸຕ຺ຕໍ, ອິຕຣໍ ຕຣຓາຍຫໍ.

໔໙໖. ‘‘ນິວຕ຺ຕາ ອຸກ຺ກຸໂສ ຫາສິ, ຕຣຸຓໍ ວິລປນ຺ຕກໍ;

ອິຕຣຎ຺ຈ ວຫີ ໂສໂຕ, ສາຫໍ ໂສກສມປ຺ປິຕາ.

໔໙໗. ‘‘ສາວຕ຺ຖິນຄຣໍ ຄນ຺ຕ຺ວາ, ອສ຺ໂສສິໍ ສຊເນ ມເຕ;

ຕທາ ອໂວຈໍ ໂສກຏ຺ຏາ, ມຫາໂສກສມປ຺ປິຕາ.

໔໙໘. ‘‘ອຸໂຠ ປຸຕ຺ຕາ ກາລງ຺ກຕາ, ປນ຺ເຖ ມຍ຺ຫໍ ປຕີ ມໂຕ;

ມາຕາ ປິຕາ ຈ ຠາຕາ ຈ, ເອກຈິຕມ຺ຫິ ຑຍ຺ຫເຣ.

໔໙໙. ‘‘ຕທາ ກິສາ ຈ ປຓ຺ຑຸ ຈ, ອນາຖາ ທີນມານສາ;

ອິໂຕ ຕໂຕ ຠມນ຺ຕີຫໍ [ຄຈ຺ຉນ຺ຕີຫໍ (ສ຺ຍາ.), ຄເມນ຺ຕີຫໍ (ກ.)], ອທ຺ທສໍ ນຣສາຣຖິໍ.

໕໐໐. ‘‘ຕໂຕ ອໂວຈ ມໍ ສຕ຺ຖາ, ‘ປຸຕ຺ເຕ ມາ ໂສຈິ ອສ຺ສສ;

ອຕ຺ຕານໍ ເຕ ຄເວສສ຺ສຸ, ກິໍ ນິຣຕ຺ຖໍ ວິຫຎ຺ຎສິ.

໕໐໑. ‘‘‘ນ ສນ຺ຕິ ປຸຕ຺ຕາ ຕາຓາຍ, ນ ຎາຕີ ນປິ ພນ຺ຘວາ;

ອນ຺ຕເກນາຘິປນ຺ນສ຺ສ, ນຕ຺ຖິ ຎາຕີສຸ ຕາຓຕາ’.

໕໐໒. ‘‘ຕໍ ສຸຕ຺ວາ ມຸນິໂນ ວາກ຺ຍໍ, ປຐມໍ ຜລມຊ຺ຌຄໍ;

ປພ຺ພຊິຕ຺ວານ ນຈິຣໍ, ອຣຫຕ຺ຕມປາປຸຓິໍ.

໕໐໓. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ປຣຈິຕ຺ຕານິ ຊານາມິ, ສຕ຺ຖຸສາສນກາຣິກາ.

໕໐໔. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ເຂເປຕ຺ວາ ອາສເວ ສພ຺ເພ, ວິສຸທ຺ຘາສິໍ ສຸນິມ຺ມລາ.

໕໐໕. ‘‘ຕໂຕຫໍ ວິນຍໍ ສພ຺ພໍ, ສນ຺ຕິເກ ສພ຺ພທສ຺ສິໂນ;

ອຸຄ຺ຄຫິໍ ສພ຺ພວິຕ຺ຖາຣໍ, ພ຺ຍາຫຣິຎ຺ຈ ຍຖາຕຖໍ.

໕໐໖. ‘‘ຊິໂນ ຕສ຺ມິໍ ຄຸເຓ ຕຸຏ຺ໂຐ, ເອຕທຄ຺ເຄ ຐເປສິ ມໍ;

ອຄ຺ຄາ ວິນຍຘາຣີນໍ, ປຏາຈາຣາວ ເອກິກາ.

໕໐໗. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໕໐໘. ‘‘ຍສ຺ສຕ຺ຖາຍ ປພ຺ພຊິຕາ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໕໐໙. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໕໑໐. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໕໑໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ປຏາຈາຣາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ປຏາຈາຣາເຖຣິຍາປທານໍ ທສມໍ.

ເອກູໂປສຖິກວຄ຺ໂຄ ທຸຕິໂຍ.