໘. ເຂມາເຖຣີອປທານໍ

໒໘໙. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ເມສຸ ຈກ຺ຂຸມາ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໒໙໐. ‘‘ຕທາຫໍ ຫໍສວຕິຍໍ, ຊາຕາ ເສຏ຺ຐິກຸເລ ອຫຸໍ [ອຫຸ (ສ຺ຍາ.)];

ນານາຣຕນປຊ຺ໂຊເຕ, ມຫາສຸຂສມປ຺ປິຕາ.

໒໙໑. ‘‘ອຸເປຕ຺ວາ ຕໍ ມຫາວີຣໍ, ອສ຺ໂສສິໍ ຘມ຺ມເທສນໍ;

ຕໂຕ ຊາຕປ຺ປສາທາຫໍ, ອຸເປມິ ສຣຓໍ ຊິນໍ.

໒໙໒. ‘‘ມາຕຣໍ ປິຕຣໍ ຈາຫໍ, ອາຍາຈິຕ຺ວາ ວິນາຍກໍ;

ນິມນ຺ຕຍິຕ຺ວາ ສຕ຺ຕາຫໍ, ໂຠຊຍິໍ ສຫສາວກໍ.

໒໙໓. ‘‘ອຕິກ຺ກນ຺ເຕ ຈ ສຕ຺ຕາເຫ, ມຫາປຎ຺ຎານມຸຕ຺ຕມໍ;

ຠິກ຺ຂຸນິໍ ເອຕທຄ຺ຄມ຺ຫິ, ຐເປສິ ນຣສາຣຖິ.

໒໙໔. ‘‘ຕໍ ສຸຕ຺ວາ ມຸທິຕາ ຫຸຕ຺ວາ, ປຸໂນ ຕສ຺ສ ມເຫສິໂນ;

ກາຣໍ ກຕ຺ວານ ຕໍ ຐານໍ, ປຓິປຈ຺ຈ ປຓີທຫິໍ.

໒໙໕. ‘‘ຕໂຕ ມມ ຊິໂນ [ມໍ ສ ຊິໂນ (ສ຺ຍາ.)] ອາຫ, ‘ສິຊ຺ຌຕໍ ປຓິຘີ ຕວ;

ສສງ຺ເຆ ເມ ກຕໍ ກາຣໍ, ອປ຺ປເມຍ຺ຍຜລໍ ຕຍາ.

໒໙໖. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໒໙໗. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ເອຕທຄ຺ຄມນຸປ຺ປຕ຺ຕາ, ເຂມາ ນາມ ຠວິສ຺ສຕິ’.

໒໙໘. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສູປຄາ ອຫໍ.

໒໙໙. ‘‘ຕໂຕ ຈຸຕາ ຍາມມຄໍ, ຕໂຕຫໍ ຕຸສິຕໍ ຄຕາ;

ຕໂຕ ຈ ນິມ຺ມານຣຕິໍ, ວສວຕ຺ຕິປຸຣໍ ຕໂຕ.

໓໐໐. ‘‘ຍຕ຺ຖ ຍຕ຺ຖູປປຊ຺ຊາມິ, ຕສ຺ສ ກມ຺ມສ຺ສ ວາຫສາ;

ຕຕ຺ຖ ຕຕ຺ເຖວ ຣາຊູນໍ, ມເຫສິຕ຺ຕມກາຣຍິໍ.

໓໐໑. ‘‘ຕໂຕ ຈຸຕາ ມນຸສ຺ສຕ຺ເຕ, ຣາຊູນໍ ຈກ຺ກວຕ຺ຕິນໍ;

ມຓ຺ຑລີນຎ຺ຈ ຣາຊູນໍ, ມເຫສິຕ຺ຕມກາຣຍິໍ.

໓໐໒. ‘‘ສມ຺ປຕ຺ຕິໍ ອນຸໂຠຕ຺ວານ, ເທເວສຸ ມນຸເຊສຸ ຈ;

ສພ຺ພຕ຺ຖ ສຸຂິຕາ ຫຸຕ຺ວາ, ເນກກປ຺ເປສຸ ສໍສຣິໍ.

໓໐໓. ‘‘ເອກນວຸຕິໂຕ ກປ຺ເປ, ວິປສ຺ສີ ໂລກນາຍໂກ;

ອຸປ຺ປຊ຺ຊິ ຈາຣຸທສ຺ສໂນ [ຈາຣຸນຍໂນ (ສີ. ປີ.)], ສພ຺ພຘມ຺ມວິປສ຺ສໂກ.

໓໐໔. ‘‘ຕມຫໍ ໂລກນາຍກໍ, ອຸເປຕ຺ວາ ນຣສາຣຖິໍ;

ຘມ຺ມໍ ຠຓິຕໍ ສຸຕ຺ວານ, ປພ຺ພຊິໍ ອນຄາຣິຍໍ.

໓໐໕. ‘‘ທສວສ຺ສສຫສ຺ສານິ, ຕສ຺ສ ວີຣສ຺ສ ສາສເນ;

ພ຺ຣຫ຺ມຈຣິຍໍ ຈຣິຕ຺ວານ, ຍຸຕ຺ຕໂຍຄາ ພຫຸສ຺ສຸຕາ.

໓໐໖. ‘‘ປຈ຺ຈຍາກາຣກຸສລາ, ຈຕຸສຈ຺ຈວິສາຣທາ;

ນິປຸຓາ ຈິຕ຺ຕກຖິກາ, ສຕ຺ຖຸສາສນກາຣິກາ.

໓໐໗. ‘‘ຕໂຕ ຈຸຕາຫໍ ຕຸສິຕໍ, ອຸປປນ຺ນາ ຍສສ຺ສິນີ;

ອຠິໂຠມິ ຕຫິໍ ອຎ຺ເຎ, ພ຺ຣຫ຺ມຈາຣີຜເລນຫໍ.

໓໐໘. ‘‘ຍຕ຺ຖ ຍຕ຺ຖູປປນ຺ນາຫໍ, ມຫາໂຠຄາ ມຫທ຺ຘນາ;

ເມຘາວິນີ ສີລວຕີ [ຣູປວຕີ (ສີ. ສ຺ຍາ. ປີ.)], ວິນີຕປຣິສາປິ ຈ.

໓໐໙. ‘‘ຠວາມິ ເຕນ ກມ຺ເມນ, ໂຍເຄນ ຊິນສາສເນ;

ສພ຺ພາ ສມ຺ປຕ຺ຕິໂຍ ມຍ຺ຫໍ, ສຸລຠາ ມນໂສ ປິຍາ.

໓໑໐. ‘‘ໂຍປິ ເມ ຠວເຕ ຠຕ຺ຕາ, ຍຕ຺ຖ ຍຕ຺ຖ ຄຕາຍປິ;

ວິມາເນຕິ ນ ມໍ ໂກຈິ, ປຏິປຕ຺ຕິພເລນ ເມ.

໓໑໑. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ນາເມນ ໂກຓາຄມໂນ, ອຸປ຺ປຊ຺ຊິ ວທຕໍ ວໂຣ.

໓໑໒. ‘‘ຕທາ ຫິ ພາຣາຓສິຍໍ, ສຸສມິທ຺ຘກຸລປ຺ປຊາ [ສຸສມິທ຺ຘິ… (ສ຺ຍາ.)];

ຘນຎ຺ຊານີ ສຸເມຘາ ຈ, ອຫມ຺ປິ ຈ ຕໂຍ ຊນາ.

໓໑໓. ‘‘ສງ຺ຆາຣາມມທາສິມ຺ຫ, ທານສຫາຍິກາ ປຸເຣ [ເນເກ ສຫສ຺ສິເກ ມຸເນ (ສ຺ຍາ.), ທານໍ ສຫສ຺ສິກໍ ມຸເນ (ປີ.)];

ສງ຺ຆສ຺ສ ຈ ວິຫາຣມ຺ປິ [ສສໍຆສ຺ສ ວິຫາຣໍ ຫິ (ສ຺ຍາ. ປີ.)], ອຸທ຺ທິສ຺ສ ກາຣິກາ [ທາຍິກາ (ປີ.)] ມຍໍ.

໓໑໔. ‘‘ຕໂຕ ຈຸຕາ ມຍໍ ສພ຺ພາ, ຕາວຕິໍສູປຄາ ອຫຸໍ;

ຍສສາ ອຄ຺ຄຕໍ ປຕ຺ຕາ, ມນຸສ຺ເສສຸ ຕເຖວ ຈ.

໓໑໕. ‘‘ອິມສ຺ມິໍເຍວ ກປ຺ປມ຺ຫິ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໓໑໖. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໓໑໗. ‘‘ຕສ຺ສາສິໍ ເຊຏ຺ຐິກາ ຘີຕາ, ສມຓີ ອິຕິ ວິສ຺ສຸຕາ;

ຘມ຺ມໍ ສຸຕ຺ວາ ຊິນຄ຺ຄສ຺ສ, ປພ຺ພຊ຺ຊໍ ສມໂຣຈຍິໍ.

໓໑໘. ‘‘ອນຸຊານິ ນ ໂນ ຕາໂຕ, ອຄາເຣວ ຕທາ ມຍໍ;

ວີສວສ຺ສສຫສ຺ສານິ, ວິຈຣິມ຺ຫ ອຕນ຺ທິຕາ.

໓໑໙. ‘‘ໂກມາຣິພ຺ຣຫ຺ມຈຣິຍໍ, ຣາຊກຎ຺ຎາ ສຸເຂຘິຕາ;

ພຸທ຺ໂຘປຏ຺ຐານນິຣຕາ, ມຸທິຕາ ສຕ຺ຕ ຘີຕໂຣ.

໓໒໐. ‘‘ສມຓີ ສມຓຄຸຕ຺ຕາ ຈ, ຠິກ຺ຂຸນີ ຠິກ຺ຂຸທາຍິກາ;

ຘມ຺ມາ ເຈວ ສຸຘມ຺ມາ ຈ, ສຕ຺ຕມີ ສງ຺ຆທາຍິກາ.

໓໒໑. ‘‘ອຫໍ ອຸປ຺ປລວຓ຺ຓາ ຈ, ປຏາຈາຣາ ຈ ກຸຓ຺ຑລາ;

ກິສາໂຄຕມີ ຘມ຺ມທິນ຺ນາ, ວິສາຂາ ໂຫຕິ ສຕ຺ຕມີ.

໓໒໒. ‘‘ກທາຈິ ໂສ ນຣາທິຈ຺ໂຈ, ຘມ຺ມໍ ເທເສສິ ອພ຺ຠຸຕໍ;

ມຫານິທານສຸຕ຺ຕນ຺ຕໍ, ສຸຕ຺ວາ ຕໍ ປຣິຍາປຸຓິໍ.

໓໒໓. ‘‘ເຕຫິ ກມ຺ເມຫິ ສຸກເຕຫິ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໓໒໔. ‘‘ປຈ຺ຉິເມ ຈ ຠເວ ທານິ, ສາກລາຍ ປຸຣຸຕ຺ຕເມ;

ຣຎ຺ໂຎ ມທ຺ທສ຺ສ ຘີຕາມ຺ຫິ, ມນາປາ ທຍິຕາ ປິຍາ.

໓໒໕. ‘‘ສຫ ເມ ຊາຕມຕ຺ຕມ຺ຫິ, ເຂມໍ ຕມ຺ຫິ ປຸເຣ ອຫຸ;

ຕໂຕ ເຂມາຕິ ນາມໍ ເມ, ຄຸຓໂຕ ອຸປປຊ຺ຊຖ.

໓໒໖. ‘‘ຍທາຫໍ ໂຍພ຺ພນໍ ປຕ຺ຕາ, ຣູປລາວຎ຺ຎຠູສິຕາ [ຣູປວຓ຺ຓວິຠູສິຕາ (ສ຺ຍາ.), ຣູປວນ຺ຕາ ວິຠູສິຕາ (ປີ.), ຣູປວິລາສຠູສິຕາ (ກ.)];

ຕທາ ອທາສິ ມໍ ຕາໂຕ, ພິມ຺ພິສາຣສ຺ສ ຣາຊິໂນ.

໓໒໗. ‘‘ຕສ຺ສາຫໍ ສຸປ຺ປິຍາ ອາສິໍ, ຣູປເກ ລາຍເນ ຣຕາ;

ຣູປານໍ ໂທສວາທີຕິ, ນ ອຸເປສິໍ ມຫາທຍໍ.

໓໒໘. ‘‘ພິມ຺ພິສາໂຣ ຕທາ ຣາຊາ, ມມານຸຄ຺ຄຫພຸທ຺ຘິຍາ;

ວຓ຺ຓຍິຕ຺ວາ ເວຬຸວນໍ, ຄາຍເກ ຄາປຍີ ມມໍ.

໓໒໙. ‘‘ຣມ຺ມໍ ເວຬຸວນໍ ເຍນ, ນ ທິຏ຺ຐໍ ສຸຄຕາລຍໍ;

ນ ເຕນ ນນ຺ທນໍ ທິຏ຺ຐໍ, ອິຕິ ມຎ຺ຎາມເສ ມຍໍ.

໓໓໐. ‘‘ເຍນ ເວຬຸວນໍ ທິຏ຺ຐໍ, ນຣນນ຺ທນນນ຺ທນໍ;

ສຸທິຏ຺ຐໍ ນນ຺ທນໍ ເຕນ, ອມຣິນ຺ທສຸນນ຺ທນໍ.

໓໓໑. ‘‘ວິຫາຍ ນນ຺ທນໍ ເທວາ, ໂອຕຣິຕ຺ວາ ມຫີຕລໍ [ມຫີຕເລ (ສ຺ຍາ. ປີ.)];

ຣມ຺ມໍ ເວຬຸວນໍ ທິສ຺ວາ, ນ ຕປ຺ປນ຺ຕິ ສຸວິມ຺ຫິຕາ.

໓໓໒. ‘‘ຣາຊປຸຎ຺ເຎນ ນິພ຺ພຕ຺ຕໍ, ພຸທ຺ຘປຸຎ຺ເຎນ ຠູສິຕໍ;

ໂກ ວຕ຺ຕາ ຕສ຺ສ ນິສ຺ເສສໍ, ວນສ຺ສ ຄຸຓສຎ຺ຈຍໍ.

໓໓໓. ‘‘ຕໍ ສຸຕ຺ວາ ວນສມິທ຺ຘໍ, ມມ ໂສຕມໂນຫຣໍ;

ທຏ຺ຐຸກາມາ ຕມຸຍ຺ຍານໍ, ຣຎ຺ໂຎ ອາໂຣຈຍິໍ ຕທາ.

໓໓໔. ‘‘ມຫຕາ ປຣິວາເຣນ, ຕທາ ຈ ໂສ [ຕທາ ມໍ ໂສ (ສ຺ຍາ. ປີ.)] ມຫີປຕິ;

ມໍ ເປເສສິ [ສໍເປເສສິ (ສ຺ຍາ.), ສມ຺ປາເປສິ (ປີ.)] ຕມຸຍ຺ຍານໍ, ທສ຺ສນາຍ ສມຸສ຺ສຸກໍ.

໓໓໕. ‘‘ຄຈ຺ຉ ປສ຺ສ ມຫາໂຠເຄ, ວນໍ ເນຕ຺ຕຣສາຍນໍ;

ຍໍ ສທາ ຠາຕິ ສິຣິຍາ, ສຸຄຕາຠານຸຣຎ຺ຊິຕໍ.

໓໓໖. ‘‘ຍທາ ຈ ປິຓ຺ຑາຍ ມຸນິ, ຄິຣິພ຺ພຊປຸຣຸຕ຺ຕມໍ;

ປວິຏ຺ໂຐຫໍ ຕທາເຍວ, ວນໍ ທຏ຺ຐຸມຸປາຄມິໍ.

໓໓໗. ‘‘ຕທາ ຕໍ ຜຸລ຺ລວິປິນໍ, ນານາຠມຣກູຊິຕໍ;

ໂກກິລາຄີຕສຫິຕໍ, ມຍູຣຄຓນຈ຺ຈິຕໍ.

໓໓໘. ‘‘ອປ຺ປສທ຺ທມນາກິຓ຺ຓໍ, ນານາຈງ຺ກມຠູສິຕໍ;

ກຸຏິມຓ຺ຑປສງ຺ກິຓ຺ຓໍ, ໂຍຄີວຣວິຣາຊິຕໍ.

໓໓໙. ‘‘ວິຈຣນ຺ຕີ ອມຎ຺ຎິສ຺ສໍ, ສຜລໍ ນຍນໍ ມມ;

ຕຕ຺ຖາປິ ຕຣຸຓໍ ຠິກ຺ຂຸໍ, ຍຸຕ຺ຕໍ ທິສ຺ວາ ວິຈິນ຺ຕຍິໍ.

໓໔໐. ‘‘‘ອີທິເສ ວິປິເນ ຣມ຺ເມ, ຐິໂຕຍໍ ນວໂຍພ຺ພເນ;

ວສນ຺ຕມິວ ກນ຺ເຕນ, ຣູເປນ ຈ ສມນ຺ວິໂຕ.

໓໔໑. ‘‘‘ນິສິນ຺ໂນ ຣຸກ຺ຂມູລມ຺ຫິ, ມຸຓ຺ໂຑ ສງ຺ຆາຏິປາຣຸໂຕ;

ຌາຍເຕ ວຕຍໍ ຠິກ຺ຂຸ, ຫິຕ຺ວາ ວິສຍຊໍ ຣຕິໍ.

໓໔໒. ‘‘‘ນນຸ ນາມ ຄຫຏ຺ເຐນ, ກາມໍ ຠຸຕ຺ວາ ຍຖາສຸຂໍ;

ປຈ຺ຉາ ຊິຓ຺ເຓນ ຘມ຺ໂມຍໍ, ຈຣິຕພ຺ໂພ ສຸຠທ຺ທໂກ’.

໓໔໓. ‘‘ສຸຎ຺ຎກນ຺ຕິ ວິທິຕ຺ວານ, ຄນ຺ຘເຄຫໍ ຊິນາລຍໍ;

ອຸເປຕ຺ວາ ຊິນມທ຺ທກ຺ຂໍ, ອຸທຍນ຺ຕໍວ ຠາກຣໍ.

໓໔໔. ‘‘ເອກກໍ ສຸຂມາສີນໍ, ພີຊມານໍ ວຣິຕ຺ຖິຍາ;

ທິສ຺ວາເນວໍ ວິຈິນ຺ເຕສິໍ, ນາຍໍ ລູໂຂ ນຣາສໂຠ.

໓໔໕. ‘‘ສາ ກຎ຺ຎາ ກນກາຠາສາ, ປທຸມານນໂລຈນາ;

ພິມ຺ໂພຏ຺ຐີ ກຸນ຺ທທສນາ, ມໂນເນຕ຺ຕຣສາຍນາ.

໓໔໖. ‘‘ເຫມໂທລາຠສວນາ [ເຫມໂທລາ ສຸວທີນາ (ສ຺ຍາ.)], ກລິກາກາຣສຸຕ຺ຖນີ [ກລສາກາຣສຸຕ຺ຕນີ (ສີ. ປີ.), ກມລາກາຣສຸຕ຺ຕນີ (ສ຺ຍາ.)];

ເວທິມຊ຺ຌາວ ສຸສ຺ໂສຓີ [ກນຸມຊ຺ຌາວ ສຸສ຺ໂສຓີ (ສີ.), ເວທິມຊ຺ຌາ ວຣໂສຓີ (ສ຺ຍາ. ປີ.)], ຣມ຺ໂຠຣຸ ຈາຣຸຠູສນາ.

໓໔໗. ‘‘ຣຕ຺ຕໍສກຸປສໍພ຺ຍານາ, ນີລມຏ຺ຐນິວາສນາ;

ອຕປ຺ປເນຍ຺ຍຣູເປນ, ຫາສຠາວສມນ຺ວິຕາ [ຫາວຠາວສມນ຺ວິຕາ (ສີ.), ສພ຺ພາຠຣຓມຓ຺ຑິຕາ (ສ຺ຍາ.)].

໓໔໘. ‘‘ທິສ຺ວາ ຕເມວໍ ຈິນ຺ເຕສິໍ, ອໂຫຍມຠິຣູປິນີ;

ນ ມຍາເນນ ເນຕ຺ເຕນ, ທິຏ຺ຐປຸພ຺ພາ ກຸທາຈນໍ.

໓໔໙. ‘‘ຕໂຕ ຊຣາຠິຠູຕາ ສາ, ວິວຓ຺ຓາ ວິກຕານນາ;

ຠິນ຺ນທນ຺ຕາ ເສຕສິຣາ, ສລາລາ ວທນາສຸຈິ.

໓໕໐. ‘‘ສງ຺ຂິຕ຺ຕກຓ຺ຓາ ເສຕກ຺ຂີ, ລມ຺ພາສຸຠປໂຍຘຣາ;

ວລິວິຕຕສພ຺ພງ຺ຄີ, ສິຣາວິຕຕເທຫິນີ.

໓໕໑. ‘‘ນຕງ຺ຄາ ທຓ຺ຑທຸຕິຍາ, ອຸປ຺ຜາສຸລິກຕາ [ອຸປ຺ປຓ຺ຑຸປຓ຺ຑຸກາ (ສີ. ສ຺ຍາ.)] ກິສາ;

ປເວຘມານາ ປຕິຕາ, ນິສ຺ສສນ຺ຕີ ມຸຫຸໍ ມຸຫຸໍ.

໓໕໒. ‘‘ຕໂຕ ເມ ອາສິ ສໍເວໂຄ, ອພ຺ຠຸໂຕ ໂລມຫໍສໂນ;

ຘິຣຕ຺ຖຸ ຣູປໍ ອສຸຈິໍ, ຣມນ຺ເຕ ຍຕ຺ຖ ພາລິສາ.

໓໕໓. ‘‘ຕທາ ມຫາກາຣຸຓິໂກ, ທິສ຺ວາ ສໍວິຄ຺ຄມານສໍ;

ອຸທຄ຺ຄຈິຕ຺ໂຕ ສຸຄໂຕ, ອິມາ ຄາຖາ ອຠາສຖ.

໓໕໔. ‘‘‘ອາຕຸຣໍ ອສຸຈິໍ ປູຕິໍ, ປສ຺ສ ເຂເມ ສມຸສ຺ສຍໍ;

ອຸຄ຺ຆຣນ຺ຕໍ ປຄ຺ຆຣນ຺ຕໍ, ພາລານໍ ອຠິນນ຺ທິຕໍ.

໓໕໕. ‘‘‘ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ;

ສຕິ ກາຍຄຕາ ຕ຺ຍຕ຺ຖຸ, ນິພ຺ພິທາ ພຫຸລາ ຠວ.

໓໕໖. ‘‘‘ຍຖາ ອິທໍ ຕຖາ ເອຕໍ, ຍຖາ ເອຕໍ ຕຖາ ອິທໍ;

ອຊ຺ຌຕ຺ຕຎ຺ຈ ພຫິທ຺ຘາ ຈ, ກາເຍ ຉນ຺ທໍ ວິຣາຊຍ.

໓໕໗. ‘‘‘ອນິມິຕ຺ຕຎ຺ຈ ຠາເວຫິ, ມານານຸສຍມຸຊ຺ຊຫ;

ຕໂຕ ມານາຠິສມຍາ, ອຸປສນ຺ຕາ ຈຣິສ຺ສສິ.

໓໕໘. ‘‘‘ເຍ ຣາຄຣຕ຺ຕານຸປຕນ຺ຕິ ໂສຕໍ, ສຍໍ ກຕໍ ມກ຺ກຏໂກວ ຊາລໍ;

ເອຕມ຺ປິ ເຉຕ຺ວານ ປຣິພ຺ພຊນ຺ຕິ, ນ ເປກ຺ຂິໂນ [ອນເປກ຺ຂິໂນ (ສີ. ສ຺ຍາ. ປີ.)] ກາມສຸຂໍ ປຫາຍ’.

໓໕໙. ‘‘ຕໂຕ ກລ຺ລິຕຈິຕ຺ຕໍ [ກລ຺ລິກຈິຕ຺ຕໍ (ສ຺ຍາ.), ກລິກຈິຕ຺ຕໍ (ປີ.)] ມໍ, ຎຕ຺ວານ ນຣສາຣຖິ;

ມຫານິທານໍ ເທເສສິ, ສຸຕ຺ຕນ຺ຕໍ ວິນຍາຍ ເມ.

໓໖໐. ‘‘ສຸຕ຺ວາ ສຸຕ຺ຕນ຺ຕເສຏ຺ຐໍ ຕໍ, ປຸພ຺ພສຎ຺ຎມນຸສ຺ສຣິໍ;

ຕຕ຺ຖ ຐິຕາວຫໍ ສນ຺ຕີ, ຘມ຺ມຈກ຺ຂຸໍ ວິໂສຘຍິໍ.

໓໖໑. ‘‘ນິປຕິຕ຺ວາ ມເຫສິສ຺ສ, ປາທມູລມ຺ຫິ ຕາວເທ;

ອຈ຺ຈຍໍ ເທສນຕ຺ຖາຍ, ອິທໍ ວຈນມພ຺ຣວິໍ.

໓໖໒. ‘‘‘ນໂມ ເຕ ສພ຺ພທສ຺ສາວີ, ນໂມ ເຕ ກຣຸຓາກຣ;

ນໂມ ເຕ ຕິຓ຺ຓສໍສາຣ, ນໂມ ເຕ ອມຕໍ ທທ.

໓໖໓. ‘‘‘ທິຏ຺ຐິຄຫນປກ຺ຂນ຺ທາ [… ປກ຺ຂນ຺ຕາ (ສີ. ສ຺ຍາ.)], ກາມຣາຄວິໂມຫິຕາ;