໗. ມຫາປຊາປຕິໂຄຕມີເຖຣີອປທານໍ

໙໗. ‘‘ເອກທາ ໂລກປຊ຺ໂຊໂຕ, ເວສາລິຍໍ ມຫາວເນ;

ກູຏາຄາເຣ ສຸສາລາຍໍ, ວສເຕ ນຣສາຣຖິ.

໙໘. ‘‘ຕທາ ຊິນສ຺ສ ມາຕຸຈ຺ຉາ, ມຫາໂຄຕມິ ຠິກ຺ຂຸນີ;

ຕຫິໍ ກເຕ [ຕຫິໍເຍວ (ສ຺ຍາ.)] ປຸເຣ ຣມ຺ເມ, ວສີ ຠິກ຺ຂຸນຸປສ຺ສເຍ.

໙໙. ‘‘ຠິກ຺ຂຸນີຫິ ວິມຸຕ຺ຕາຫິ, ສເຕຫິ ສຫ ປຎ຺ຈຫິ;

ຣໂຫຄຕາຍ ຕສ຺ເສວໍ, ຈິຕສ຺ສາສິ [ຈິຕ຺ຕສ຺ສາປິ (ສ຺ຍາ.)] ວິຕກ຺ກິຕໍ.

໑໐໐. ‘‘ພຸທ຺ຘສ຺ສ ປຣິນິພ຺ພານໍ, ສາວກຄ຺ຄຍຸຄສ຺ສ ວາ;

ຣາຫຸລານນ຺ທນນ຺ທານໍ, ນາຫໍ ລຈ຺ຉາມິ ປສ຺ສິຕຸໍ.

໑໐໑. ‘‘ພຸທ຺ຘສ຺ສ ປຣິນິພ຺ພານາ, ສາວກຄ຺ຄຍຸຄສ຺ສ ວາ;

ມຫາກສ຺ສປນນ຺ທານໍ, ອານນ຺ທຣາຫຸລານ ຈ.

໑໐໒. ‘‘ປຏິກຈ຺ຈາຍຸສງ຺ຂາຣໍ [ປຏິຄຈ຺ຈາຍຸສງ຺ຂາເຣ (ສີ.)], ໂອສຊ຺ຊິຕ຺ວານ ນິພ຺ພຸຕິໍ;

ຄຈ຺ເຉຍ຺ຍໍ ໂລກນາເຖນ, ອນຸຎ຺ຎາຕາ ມເຫສິນາ.

໑໐໓. ‘‘ຕຖາ ປຎ຺ຈສຕານມ຺ປິ, ຠິກ຺ຂຸນີນໍ ວິຕກ຺ກິຕໍ;

ອາສິ ເຂມາທິການມ຺ປິ, ເອຕເທວ ວິຕກ຺ກິຕໍ.

໑໐໔. ‘‘ຠູມິຈາໂລ ຕທາ ອາສິ, ນາທິຕາ ເທວທຸນ຺ທຸຠີ;

ອຸປສ຺ສຍາຘິວຕ຺ຖາໂຍ, ເທວຕາ ໂສກປີຬິຕາ.

໑໐໕. ‘‘ວິລປນ຺ຕາ ສຸກຣຸຓໍ [ສກຣຸຓໍ (ສີ. ສ຺ຍາ. ປີ.)], ຕຕ຺ຖສ຺ສູນິ ປວຕ຺ຕຍຸໍ;

ມິຕ຺ຕາ [ສພ຺ພາ (ສ຺ຍາ. ປີ.)] ຠິກ຺ຂຸນິໂຍ ຕາຫິ, ອຸປຄນ຺ຕ຺ວານ ໂຄຕມິໍ.

໑໐໖. ‘‘ນິປຈ຺ຈ ສິຣສາ ປາເທ, ອິທໍ ວຈນມພ຺ຣວຸໍ;

‘ຕຕ຺ຖ ໂຕຍລວາສິຕ຺ຕາ, ມຍມຍ຺ເຍ ຣໂຫຄຕາ.

໑໐໗. ‘‘‘ສາ ຈລາ ຈລິຕາ ຠູມິ, ນາທິຕາ ເທວທຸນ຺ທຸຠີ;

ປຣິເທວາ ຈ ສຸຍ຺ຍນ຺ເຕ, ກິມຕ຺ຖໍ ນູນ ໂຄຕມີ’.

໑໐໘. ‘‘ຕທາ ອໂວຈ ສາ ສພ຺ພໍ, ຍຖາປຣິວິຕກ຺ກິຕໍ;

ຕາໂຍປິ ສພ຺ພາ ອາຫໍສຸ, ຍຖາປຣິວິຕກ຺ກິຕໍ.

໑໐໙. ‘‘‘ຍທິ ເຕ ຣຸຈິຕໍ ອຍ຺ເຍ, ນິພ຺ພານໍ ປຣມໍ ສິວໍ;

ນິພ຺ພາຍິສ຺ສາມ ສພ຺ພາປິ, ພຸທ຺ຘານຸຎ຺ຎາຍ ສຸພ຺ພເຕ.

໑໑໐. ‘‘‘ມຍໍ ສຫາວ ນິກ຺ຂນ຺ຕາ, ຆຣາປິ ຈ ຠວາປິ ຈ;

ສຫາເຍວ ຄມິສ຺ສາມ, ນິພ຺ພານໍ ປທມຸຕ຺ຕມໍ’.

໑໑໑. ‘‘‘ນິພ຺ພານາຍ ວຊນ຺ຕີນໍ, ກິໍ ວກ຺ຂາມີ’ຕິ ສາ ວທໍ;

ສຫ ສພ຺ພາຫິ ນິຄ຺ຄຎ຺ຉິ, ຠິກ຺ຂຸນີນິລຍາ ຕທາ.

໑໑໒. ‘‘ອຸປສ຺ສເຍ ຍາຘິວຕ຺ຖາ, ເທວຕາ ຕາ ຂມນ຺ຕຸ ເມ;

ຠິກ຺ຂຸນີນິລຍສ຺ເສທໍ, ປຈ຺ຉິມໍ ທສ຺ສນໍ ມມ.

໑໑໓. ‘‘ນ ຊຣາ ມຈ຺ຈຸ ວາ ຍຕ຺ຖ, ອປ຺ປິເຍຫິ ສມາຄໂມ;

ປິເຍຫິ ນ ວິໂຍໂຄຕ຺ຖິ, ຕໍ ວຊິສ຺ສໍ [ຕໍ ວຊ຺ຊິຍໍ (ສ຺ຍາ.)] ອສງ຺ຂຕໍ.

໑໑໔. ‘‘ອວີຕຣາຄາ ຕໍ ສຸຕ຺ວາ, ວຈນໍ ສຸຄໂຕຣສາ;

ໂສກຏ຺ຏາ ປຣິເທວິໍສຸ, ອໂຫ ໂນ ອປ຺ປປຸຎ຺ຎຕາ.

໑໑໕. ‘‘ຠິກ຺ຂຸນີນິລໂຍ ສຸຎ຺ໂຎ, ຠູໂຕ ຕາຫິ ວິນາ ອຍໍ;

ປຠາເຕ ວິຍ ຕາຣາໂຍ, ນ ທິສ຺ສນ຺ຕິ ຊິໂນຣສາ.

໑໑໖. ‘‘ນິພ຺ພານໍ ໂຄຕມີ ຍາຕິ, ສເຕຫິ ສຫ ປຎ຺ຈຫິ;

ນທີສເຕຫິວ ສຫ, ຄງ຺ຄາ ປຎ຺ຈຫິ ສາຄຣໍ.

໑໑໗. ‘‘ຣຖິຍາຍ ວຊນ຺ຕິໂຍ [ວຊນ຺ຕິໍ ຕໍ (ສີ.), ວຊນ຺ຕິ ຕໍ (ສ຺ຍາ.), ວຊນ຺ຕານໍ (ປີ.)], ທິສ຺ວາ ສທ຺ຘາ ອຸປາສິກາ;

ຆຣາ ນິກ຺ຂມ຺ມ ປາເທສຸ, ນິປຈ຺ຈ ອິທມພ຺ຣວຸໍ.

໑໑໘. ‘‘‘ປສີທສ຺ສຸ ມຫາໂຠເຄ, ອນາຖາໂຍ ວິຫາຍ ໂນ;

ຕຍາ ນ ຍຸຕ຺ຕາ [ຍຸຕ຺ຕໍ (ສີ. ສ຺ຍາ. ປີ.)] ນິພ຺ພາຕຸໍ, ອິຈ຺ຉຏ຺ຏາ ວິລປິໍສຸ ຕາ’.

໑໑໙. ‘‘ຕາສໍ ໂສກປຫານຕ຺ຖໍ, ອໂວຈ ມຘຸຣໍ ຄິຣໍ;

‘ຣຸທິເຕນ ອລໍ ປຸຕ຺ຕາ, ຫາສກາໂລຍມຊ຺ຊ ໂວ.

໑໒໐. ‘‘‘ປຣິຎ຺ຎາຕໍ ມຍາ ທຸກ຺ຂໍ, ທຸກ຺ຂເຫຕຸ ວິວຊ຺ຊິໂຕ;

ນິໂຣໂຘ ເມ ສຈ຺ຉິກໂຕ, ມຄ຺ໂຄ ຈາປິ ສຸຠາວິໂຕ.

ປຐມໍ ຠາຓວາຣໍ.

໑໒໑. ‘‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໑໒໒. ‘‘‘ຍສ຺ສຕ຺ຖາຍ ປພ຺ພຊິຕາ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໑໒໓. ‘‘‘ພຸທ຺ໂຘ ຕສ຺ສ ຈ ສທ຺ຘມ຺ໂມ, ອນູໂນ ຍາວ ຕິຏ຺ຐຕິ;

ນິພ຺ພາຕຸໍ ຕາວ ກາໂລ ເມ, ມາ ມໍ ໂສຈຖ ປຸຕ຺ຕິກາ.

໑໒໔. ‘‘‘ໂກຓ຺ຑຎ຺ຎານນ຺ທນນ຺ທາທີ, ຕິຏ຺ຐນ຺ຕິ ຣາຫຸໂລ ຊິໂນ;

ສຸຂິໂຕ ສຫິໂຕ ສງ຺ໂຆ, ຫຕທພ຺ພາ ຈ ຕິຕ຺ຖິຍາ.

໑໒໕. ‘‘‘ໂອກ຺ກາກວໍສສ຺ສ ຍໂສ, ອຸສ຺ສິໂຕ ມາຣມທ຺ທໂນ;

ນນຸ ສມ຺ປຕິ ກາໂລ ເມ, ນິພ຺ພານຕ຺ຖາຍ ປຸຕ຺ຕິກາ.

໑໒໖. ‘‘‘ຈິຣປ຺ປຠຸຕິ ຍໍ ມຍ຺ຫໍ, ປຕ຺ຖິຕໍ ອຊ຺ຊ ສິຊ຺ຌເຕ;

ອານນ຺ທເຠຣິກາໂລຍໍ, ກິໍ ໂວ ອສ຺ສູຫິ ປຸຕ຺ຕິກາ.

໑໒໗. ‘‘‘ສເຈ ມຍິ ທຍາ ອຕ຺ຖິ, ຍທິ ຈຕ຺ຖິ ກຕຎ຺ຎຸຕາ;

ສທ຺ຘມ຺ມຏ຺ຐິຕິຍາ ສພ຺ພາ, ກໂຣຖ ວີຣິຍໍ ທຬ຺ຫໍ.

໑໒໘. ‘‘‘ຖີນໍ ອທາສິ ປພ຺ພຊ຺ຊໍ, ສມ຺ພຸທ຺ໂຘ ຍາຈິໂຕ ມຍາ;

ຕສ຺ມາ ຍຖາຫໍ ນນ຺ທິສ຺ສໍ, ຕຖາ ຕມນຸຕິຏ຺ຐຖ’.

໑໒໙. ‘‘ຕາ ເອວມນຸສາສິຕ຺ວາ, ຠິກ຺ຂຸນີຫິ ປຸຣກ຺ຂຕາ;

ອຸເປຈ຺ຈ ພຸທ຺ຘໍ ວນ຺ທິຕ຺ວາ, ອິທໍ ວຈນມພ຺ຣວິ.

໑໓໐. ‘‘‘ອຫໍ ສຸຄຕ ເຕ ມາຕາ, ຕ຺ວຎ຺ຈ ວີຣ ປິຕາ ມມ;

ສທ຺ຘມ຺ມສຸຂທ [ສທ຺ຘມ຺ມສຸຂໂທ (ສີ. ສ຺ຍາ. ປີ.)] ນາຖ, ຕຍາ ຊາຕາມ຺ຫິ ໂຄຕມ.

໑໓໑. ‘‘‘ສໍວທ຺ຘິໂຕຍໍ ສຸຄຕ, ຣູປກາໂຍ ມຍາ ຕວ;

ອນິນ຺ທິໂຕ [ອານນ຺ທິໂຍ (ສ຺ຍາ.), ອນິນ຺ທິໂຍ (ປີ.)] ຘມ຺ມກາໂຍ [ຘມ຺ມຕນຸ (ສີ. ປີ. ກ.)], ມມ ສໍວທ຺ຘິໂຕ ຕຍາ.

໑໓໒. ‘‘‘ມຸຫຸຕ຺ຕໍ ຕຓ຺ຫາສມຓໍ, ຂີຣໍ ຕ຺ວໍ ປາຍິໂຕ ມຍາ;

ຕຍາຫໍ ສນ຺ຕມຈ຺ຈນ຺ຕໍ, ຘມ຺ມຂີຣຎ຺ຫິ [ຘມ຺ມຂີຣມ຺ປິ (ສ຺ຍາ., ກ.)] ປາຍິຕາ.

໑໓໓. ‘‘‘ພນ຺ຘນາຣກ຺ຂເນ ມຍ຺ຫໍ, ອຓໂຓ [ອນໂຓ (ສີ. ສ຺ຍາ. ປີ.)] ຕ຺ວໍ ມຫາມຸເນ;

ປຸຕ຺ຕກາມາ ຖິໂຍ ຍາຈໍ, ລຠນ຺ຕິ ຕາທິສໍ ສຸຕໍ.

໑໓໔. ‘‘‘ມນ຺ຘາຕາທິນຣິນ຺ທານໍ, ຍາ ມາຕາ ສາ ຠວຓ຺ຓເວ;

ນິມຸຄ຺ຄາຫໍ ຕຍາ ປຸຕ຺ຕ, ຕາຣິຕາ ຠວສາຄຣາ.

໑໓໕. ‘‘‘ຣຎ຺ໂຎ ມາຕາ ມເຫສີຕິ, ສຸລຠໍ ນາມມິຕ຺ຖິນໍ;

ພຸທ຺ຘມາຕາຕິ ຍໍ ນາມໍ, ເອຕໍ ປຣມທຸລ຺ລຠໍ.

໑໓໖. ‘‘‘ຕຎ຺ຈ ລທ຺ຘໍ ມຫາວີຣ, ປຓິຘານໍ ມມໍ ຕຍາ;

ອຓຸກໍ ວາ ມຫນ຺ຕໍ ວາ, ຕໍ ສພ຺ພໍ ປູຣິຕໍ ມຍາ.

໑໓໗. ‘‘‘ປຣິນິພ຺ພາຕຸມິຈ຺ຉາມິ, ວິຫາເຍມໍ ກເຬວຣໍ;

ອນຸຊານາຫິ ເມ ວີຣ, ທຸກ຺ຂນ຺ຕກຣ ນາຍກ.

໑໓໘. ‘‘‘ຈກ຺ກງ຺ກຸສຘຊາກິຓ຺ເຓ, ປາເທ ກມລໂກມເລ;

ປສາເຣຫິ ປຓາມໍ ເຕ, ກຣິສ຺ສໍ ປຸຕ຺ຕອຸຕ຺ຕເມ [ປຸຕ຺ຕເປມສາ (ສີ. ປີ.), ປຸຕ຺ຕເປມຫໍ (ສ຺ຍາ.)].

໑໓໙. ‘‘‘ສຸວຓ຺ຓຣາສິສງ຺ກາສໍ, ສຣີຣໍ ກຸຣຸ ປາກຏໍ;

ກຕ຺ວາ ເທຫໍ ສຸທິຏ຺ຐໍ ເຕ, ສນ຺ຕິໍ ຄຈ຺ຉາມິ ນາຍກ’.

໑໔໐. ‘‘ທ຺ວຕ຺ຕິໍສລກ຺ຂຓູເປຕໍ, ສຸປ຺ປຠາລງ຺ກຕໍ ຕນຸໍ;

ສຎ຺ຌາຆນາວ ພາລກ຺ກໍ, ມາຕຸຈ຺ຉໍ ທສ຺ສຍີ ຊິໂນ.

໑໔໑. ‘‘ຜຸລ຺ລາຣວິນ຺ທສໍກາເສ, ຕຣຸຓາທິຈ຺ຈສປ຺ປເຠ;

ຈກ຺ກງ຺ກິເຕ ປາທຕເລ, ຕໂຕ ສາ ສິຣສາ ປຕິ.

໑໔໒. ‘‘‘ປຓມາມິ ນຣາທິຈ຺ຈ, ອາທິຈ຺ຈກຸລເກຕຸກໍ;

ປຈ຺ຉິເມ ມຣເຓ ມຍ຺ຫໍ [ສຣຓໍ ມຍ຺ຫໍ (ສ຺ຍາ.)], ນ ຕໍ ອິກ຺ຂາມຫໍ ປຸໂນ.

໑໔໓. ‘‘‘ອິຕ຺ຖິໂຍ ນາມ ໂລກຄ຺ຄ, ສພ຺ພໂທສາກຣາ ມຕາ;

ຍທິ ໂກ ຈຕ຺ຖິ ໂທໂສ ເມ, ຂມສ຺ສຸ ກຣຸຓາກຣ.

໑໔໔. ‘‘‘ອິຕ຺ຖິການຎ຺ຈ ປພ຺ພຊ຺ຊໍ, ຫໍ ຕໍ ຍາຈິໍ ປຸນປ຺ປຸນໍ;

ຕຕ຺ຖ ເຈ ອຕ຺ຖິ ໂທໂສ ເມ, ຕໍ ຂມສ຺ສຸ ນຣາສຠ.

໑໔໕. ‘‘‘ມຍາ ຠິກ຺ຂຸນິໂຍ ວີຣ, ຕວານຸຎ຺ຎາຍ ສາສິຕາ;

ຕຕ຺ຣ ເຈ ອຕ຺ຖິ ທຸນ຺ນີຕໍ, ຕໍ ຂມສ຺ສຸ ຂມາຘິປ [ຂມາຘິຕິ (ສ຺ຍາ.), ຂມາປິໂຕ (ກ.)].

໑໔໖. ‘‘‘ອກ຺ຂນ຺ເຕ ນາມ ຂນ຺ຕພ຺ພໍ, ກິໍ ຠເວ ຄຸຓຠູສເນ;

ກິມຸຕ຺ຕຣໍ ເຕ ວກ຺ຂາມິ, ນິພ຺ພານາຍ ວຊນ຺ຕິຍາ.

໑໔໗. ‘‘‘ສຸທ຺ເຘ ອນູເນ ມມ ຠິກ຺ຂຸສງ຺ເຆ, ໂລກາ ອິໂຕ ນິສ຺ສຣິຕຸໍ ຂມນ຺ເຕ;

ປຠາຕກາເລ ພ຺ຍສນງ຺ຄຕານໍ, ທິສ຺ວານ ນິຍ຺ຍາຕິວ ຈນ຺ທເລຂາ’.

໑໔໘. ‘‘‘ຕເທຕຣາ ຠິກ຺ຂຸນິໂຍ ຊິນຄ຺ຄໍ, ຕາຣາວ ຈນ຺ທານຸຄຕາ ສຸເມຣຸໍ;

ປທກ຺ຂິຓໍ ກຈ຺ຈ ນິປຈ຺ຈ ປາເທ, ຐິຕາ ມຸຂນ຺ຕໍ ສມຸທິກ຺ຂມານາ.

໑໔໙. ‘‘‘ນ ຕິຕ຺ຕິປຸພ຺ພໍ ຕວ ທສ຺ສເນນ, ຈກ຺ຂຸໍ ນ ໂສຕໍ ຕວ ຠາສິເຕນ;

ຈິຕ຺ຕໍ ມມໍ ເກວລເມກເມວ, ປປ຺ປຸຍ຺ຍ ຕໍ ຘມ຺ມຣເສນ ຕິຕ຺ຕິ.

໑໕໐. ‘‘‘ນທໂຕ ປຣິສາຍໍ ເຕ, ວາທິຕພ຺ພປຫາຣິໂນ;

ເຍ ເຕ ທກ຺ຂນ຺ຕິ ວທນໍ, ຘຎ຺ຎາ ເຕ ນຣປຸງ຺ຄວ.

໑໕໑. ‘‘‘ທີຆງ຺ຄຸລີ ຕມ຺ພນເຂ, ສຸເຠ ອາຍຕປຓ຺ຫິເກ;

ເຍ ປາເທ ປຓມິສ຺ສນ຺ຕິ [ປຓມາຍນ຺ຕິ (ສ຺ຍາ.)], ເຕປິ ຘຎ຺ຎາ ຄຸຓນ຺ຘຣ.

໑໕໒. ‘‘‘ມຘຸຣານິ ປຫຏ຺ຐານິ, ໂທສຄ຺ຆານິ ຫິຕານິ ຈ;

ເຍ ເຕ ວາກ຺ຍານິ ສຸຍ຺ຍນ຺ຕິ, ເຕປິ ຘຎ຺ຎາ ນຣຸຕ຺ຕມ.

໑໕໓. ‘‘‘ຘຎ຺ຎາຫໍ ເຕ ມຫາວີຣ, ປາທປູຊນຕປ຺ປຣາ [ມານປູຊນຕປ຺ປຣາ (ກ.)];

ຕິຓ຺ຓສໍສາຣກນ຺ຕາຣາ, ສຸວາກ຺ເຍນ ສິຣີມໂຕ’.

໑໕໔. ‘‘ຕໂຕ ສາ ອນຸສາເວຕ຺ວາ [ອນຸມາເນ ຕ຺ວາ (ກ.)], ຠິກ຺ຂຸສງ຺ຆມ຺ປິ ສຸພ຺ພຕາ;

ຣາຫຸລານນ຺ທນນ຺ເທ ຈ, ວນ຺ທິຕ຺ວາ ອິທມພ຺ຣວິ.

໑໕໕. ‘‘‘ອາສີວິສາລຍສເມ, ໂຣຄາວາເສ ກເຬວເຣ;

ນິພ຺ພິນ຺ທາ ທຸກ຺ຂສງ຺ຆາເຏ, ຊຣາມຣຓໂຄຈເຣ.

໑໕໖. ‘‘‘ນານາກລິມລາກິຓ຺ເຓ [ນານາກຸຓປມລາກິຓ຺ເຓ (ສ຺ຍາ.), ນານາກາຬມລາກິຓ຺ເຓ (ກ.)], ປຣາຍຕ຺ເຕ ນິຣີຫເກ;

ເຕນ ນິພ຺ພາຕຸມິຈ຺ຉາມິ, ອນຸມຎ຺ຎຖ ປຸຕ຺ຕກາ’.

໑໕໗. ‘‘ນນ຺ໂທ ຣາຫຸລຠທ຺ໂທ ຈ, ວີຕໂສກາ ນິຣາສວາ;

ຐິຕາຈລຏ຺ຐິຕິ ຖິຣາ, ຘມ຺ມຕມນຸຈິນ຺ຕຍຸໍ.

໑໕໘. ‘‘‘ຘິຣຕ຺ຖຸ ສງ຺ຂຕໍ ໂລລໍ, ອສາຣໍ ກທລູປມໍ;

ມາຍາມຣີຈິສທິສໍ, ອິຕຣໍ ອນວຏ຺ຐິຕໍ.

໑໕໙. ‘‘‘ຍຕ຺ຖ ນາມ ຊິນສ຺ສາຍໍ, ມາຕຸຈ຺ຉາ ພຸທ຺ຘໂປສິກາ;

ໂຄຕມີ ນິຘນໍ ຍາຕິ, ອນິຈ຺ຈໍ ສພ຺ພສງ຺ຂຕໍ’.

໑໖໐. ‘‘ອານນ຺ໂທ ຈ ຕທາ ເສໂຂ, ໂສກຏ຺ໂຏ [ກນິຏ຺ໂຐ (ສ຺ຍາ.)] ຊິນວຈ຺ຉໂລ;

ຕຕ຺ຖສ຺ສູນິ ກໂຣນ຺ໂຕ ໂສ, ກຣຸຓໍ ປຣິເທວຕິ.

໑໖໑. ‘‘ຫາ ສນ຺ຕິໍ [ຠາສນ຺ຕີ (ສ຺ຍາ.)] ໂຄຕມີ ຍາຕິ, ນູນ ພຸທ຺ໂຘປິ ນິພ຺ພຸຕິໍ;

ຄຈ຺ຉຕິ ນ ຈິເຣເນວ, ອຄ຺ຄິຣິວ ນິຣິນ຺ຘໂນ.

໑໖໒. ‘‘ເອວໍ ວິລາປມານໍ ຕໍ, ອານນ຺ທໍ ອາຫ ໂຄຕມີ;

ສຸຕສາຄຣຄມ຺ຠີຣ, ພຸທ຺ໂຘປຏ຺ຐານຕປ຺ປຣ.

໑໖໓. ‘‘‘ນ ຍຸຕ຺ຕໍ ໂສຈິຕຸໍ ປຸຕ຺ຕ, ຫາສກາເລ ອຸປຏ຺ຐິເຕ;

ຕຍາ ເມ ສຣຓໍ ປຸຕ຺ຕ, ນິພ຺ພານໍ ຕມຸປາຄຕໍ.

໑໖໔. ‘‘‘ຕຍາ ຕາຕ ສມຊ຺ຌິຏ຺ໂຐ, ປພ຺ພຊ຺ຊໍ ອນຸຊານິ ໂນ;

ມາ ປຸຕ຺ຕ ວິມໂນ ໂຫຫິ, ສຜໂລ ເຕ ປຣິສ຺ສໂມ.

໑໖໕. ‘‘‘ຍໍ ນ ທິຏ຺ຐໍ ປຸຣາເຓຫິ, ຕິຕ຺ຖິກາຈຣິເຍຫິປິ;

ຕໍ ປທໍ ສຸກຸມາຣີຫິ, ສຕ຺ຕວສ຺ສາຫິ ເວທິຕໍ.

໑໖໖. ‘‘‘ພຸທ຺ຘສາສນປາເລຕ, ປຈ຺ຉິມໍ ທສ຺ສນໍ ຕວ;

ຕຕ຺ຖ ຄຈ຺ຉາມຫໍ ປຸຕ຺ຕ, ຄໂຕ ຍຕ຺ຖ ນ ທິສ຺ສເຕ.

໑໖໗. ‘‘‘ກທາຈິ ຘມ຺ມໍ ເທເສນ຺ໂຕ, ຂິປີ ໂລກຄ຺ຄນາຍໂກ;

ຕທາຫໍ ອາສີສວາຈໍ, ອໂວຈໍ ອນຸກມ຺ປິກາ.

໑໖໘. ‘‘‘ຈິຣໍ ຊີວ ມຫາວີຣ, ກປ຺ປໍ ຕິຏ຺ຐ ມຫາມຸເນ;

ສພ຺ພໂລກສ຺ສ ອຕ຺ຖາຍ, ຠວສ຺ສຸ ອຊຣາມໂຣ.

໑໖໙. ‘‘‘ຕໍ ຕຖາວາທິນິໍ ພຸທ຺ໂຘ, ມມໍ ໂສ ເອຕທພ຺ຣວິ;

‘ນ ເຫວໍ ວນ຺ທິຍາ ພຸທ຺ຘາ, ຍຖາ ວນ຺ທສິ ໂຄຕມີ.

໑໗໐. ‘‘‘ກຖໍ ຈຣຫິ ສພ຺ພຎ຺ຎູ, ວນ຺ທິຕພ຺ພາ ຕຖາຄຕາ;

ກຖໍ ອວນ຺ທິຍາ ພຸທ຺ຘາ, ຕໍ ເມ ອກ຺ຂາຫິ ປຸຈ຺ຉິໂຕ.