໔. ເອກາສນທາຍິກາເຖຣີອປທານໍ

໓໗. ‘‘ນຄເຣ ຫໍສວຕິຍາ, ອໂຫສິໍ ພາລິກາ [ມາລິກາ (ສ຺ຍາ. ປີ.)] ຕທາ;

ມາຕາ ຈ ເມ ປິຕາ ເຈວ, ກມ຺ມນ຺ຕໍ ອຄມໍສຸ ເຕ.

໓໘. ‘‘ມຊ຺ຌນ຺ຫິກມ຺ຫິ ສູຣິເຍ, ອທ຺ທສໍ ສມຓໍ ອຫໍ;

ວີຖິຍາ ອນຸຄຈ຺ຉນ຺ຕໍ, ອາສນໍ ປຎ຺ຎເປສຫໍ.

໓໙. ‘‘ໂຄນກາວິກຕິກາຫິ [ໂຄນກຈິຕ຺ຕກາທີຫິ (ສີ.)], ປຎ຺ຎເປຕ຺ວາ ມມາສນໍ;

ປສນ຺ນຈິຕ຺ຕາ ສຸມນາ, ອິທໍ ວຈນມພ຺ຣວິໍ.

໔໐. ‘‘‘ສນ຺ຕຕ຺ຕາ ກຸຖິຕາ ຠູມິ, ສູໂຣ ມຊ຺ຌນ຺ຫິເກ ຐິໂຕ;

ມາລຸຕາ ຈ ນ ວາຍນ຺ຕິ, ກາໂລ ເຈເວຕ຺ຖ ເມຫິຕິ [ເຈຕ຺ຖ ອຸປຏ຺ຐິໂຕ (ສີ.), ເຈວຕ຺ຖໍ ເອຕິ ຕໍ (ປີ.)].

໔໑. ‘‘‘ປຎ຺ຎຕ຺ຕມາສນມິທໍ, ຕວຕ຺ຖາຍ ມຫາມຸນິ;

ອນຸກມ຺ປໍ ອຸປາທາຍ, ນິສີທ ມມ ອາສເນ’.

໔໒. ‘‘ນິສີທິ ຕຕ຺ຖ ສມໂຓ, ສຸທນ຺ໂຕ ສຸທ຺ຘມານໂສ;

ຕສ຺ສ ປຕ຺ຕໍ ຄເຫຕ຺ວານ, ຍຖາຣນ຺ຘໍ ອທາສຫໍ.

໔໓. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໔໔. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ອາສເນນ ສຸນິມ຺ມິຕໍ;

ສຏ຺ຐິໂຍຊນມຸພ຺ເພຘໍ, ຕິໍສໂຍຊນວິຕ຺ຖຕໍ.

໔໕. ‘‘ໂສຓ຺ຓມຍາ ມຓິມຍາ, ອໂຖປິ ຜລິກາມຍາ;

ໂລຫິຕງ຺ຄມຍາ ເຈວ, ປລ຺ລງ຺ກາ ວິວິຘາ ມມ.

໔໖. ‘‘ຕູລິກາ ວິກຕິກາຫິ, ກຏ຺ຏິສ຺ສຈິຕ຺ຕກາຫິ ຈ;

ອຸທ຺ທເອກນ຺ຕໂລມີ ຈ, ປລ຺ລງ຺ກາ ເມ ສຸສຓ຺ຐິຕາ [ສຸສນ຺ຖຕາ (ສີ.)].

໔໗. ‘‘ຍທາ ອິຈ຺ຉາມິ ຄມນໍ, ຫາສຂິຑ຺ຑສມປ຺ປິຕາ;

ສຫ ປລ຺ລງ຺ກເສຏ຺ເຐນ, ຄຈ຺ຉາມິ ມມ ປຕ຺ຖິຕໍ.

໔໘. ‘‘ອສີຕິ ເທວຣາຊູນໍ, ມເຫສິຕ຺ຕມກາຣຍິໍ;

ສຕ຺ຕຕິ ຈກ຺ກວຕ຺ຕີນໍ, ມເຫສິຕ຺ຕມກາຣຍິໍ.

໔໙. ‘‘ຠວາຠເວ ສໍສຣນ຺ຕີ, ມຫາໂຠຄໍ ລຠາມຫໍ;

ໂຠເຄ ເມ ອູນຕາ ນຕ຺ຖິ, ເອກາສນສ຺ສິທໍ ຜລໍ [ເອກາສນຜລໍ ອິທໍ (ສພ຺ພຕ຺ຖ) ເອວມຸປຣິປິ].

໕໐. ‘‘ທຸເວ ຠເວ ສໍສຣາມິ, ເທວຕ຺ເຕ ອຖ ມານຸເສ;

ອຎ຺ເຎ ຠເວ ນ ຊານາມິ, ເອກາສນສ຺ສິທໍ ຜລໍ.

໕໑. ‘‘ທຸເວ ກຸເລ ປຊາຍາມິ, ຂຕ຺ຕິເຍ ຈາປິ ພ຺ຣາຫ຺ມເຓ;

ອຸຈ຺ຈາກຸລີນາ [ອຸຈ຺ຈາກຸລິກາ (ສ຺ຍາ. ປີ. ກ.)] ສພ຺ພຕ຺ຖ, ເອກາສນສ຺ສິທໍ ຜລໍ.

໕໒. ‘‘ໂທມນສ຺ສໍ ນ ຊານາມິ, ຈິຕ຺ຕສນ຺ຕາປນໍ ມມ;

ເວວຓ຺ຓິຍໍ ນ ຊານາມິ, ເອກາສນສ຺ສິທໍ ຜລໍ.

໕໓. ‘‘ຘາຕິໂຍ ມໍ ອຸປຏ຺ຐນ຺ຕິ, ຂຸຊ຺ຊາ ເຈລາປິກາ [ເຂລາປິກາ (ສີ.), ເຈລາວິກາ (ປີ.)] ພຫູ;

ອງ຺ເກນ ອງ຺ກໍ ຄຈ຺ຉາມິ, ເອກາສນສ຺ສິທໍ ຜລໍ.

໕໔. ‘‘ອຎ຺ຎາ ນ຺ຫາເປນ຺ຕິ ໂຠເຊນ຺ຕິ, ອຎ຺ຎາ ຣເມນ຺ຕິ ມໍ ສທາ;

ອຎ຺ຎາ ຄນ຺ຘໍ ວິລິມ຺ປນ຺ຕິ, ເອກາສນສ຺ສິທໍ ຜລໍ [ອຎ຺ຎາ ມເມວ ນ຺ຫາເປນ຺ຕິ, ອຎ຺ຎາ ໂຠເຊນ຺ຕິ ໂຠຊນໍ; ອຎ຺ຎາ ມໍ ອລງ຺ກໂຣນ຺ຕິ, ອຎ຺ຎາ ຣເມນ຺ຕິ ມໍ ສທ຺ຘາ; (ສ຺ຍາ.)].

໕໕. ‘‘ມຓ຺ຑເປ ຣຸກ຺ຂມູເລ ວາ, ສຸຎ຺ຎາຄາເຣ ວສນ຺ຕິຍາ;

ມມ ສງ຺ກປ຺ປມຎ຺ຎາຍ, ປລ຺ລງ຺ໂກ ອຸປຕິຏ຺ຐຕິ.

໕໖. ‘‘ອຍໍ ປຈ຺ຉິມໂກ ມຍ຺ຫໍ, ຈຣິໂມ ວຕ຺ຕເຕ ຠໂວ;

ອຊ຺ຊາປິ ຣຊ຺ຊໍ ຉຑ຺ເຑຕ຺ວາ, ປພ຺ພຊິໍ ອນຄາຣິຍໍ.

໕໗. ‘‘ສຕສຫສ຺ສິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ເອກາສນສ຺ສິທໍ ຜລໍ.

໕໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໕໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໖໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ເອກາສນທາຍິກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ເອກາສນທາຍິກາເຖຣິຍາປທານໍ ຈຕຸຕ຺ຖໍ.