໕. ປຎ຺ຈທີປທາຍິກາເຖຣີອປທານໍ

໖໑. ‘‘ນຄເຣ ຫໍສວຕິຍາ, ຈາຣິກີ [ຈາຣິກາ (ສີ. ສ຺ຍາ.)] ອາສຫໍ ຕທາ;

ອາຣາເມນ ຈ ອາຣາມໍ [ອາຣາເມນ ວິຫາເຣນ (ສ຺ຍາ. ປີ.)], ຈຣາມິ ກຸສລຕ຺ຖິກາ.

໖໒. ‘‘ກາຬປກ຺ຂມ຺ຫິ ທິວເສ, ອທ຺ທສໍ ໂພຘິມຸຕ຺ຕມໍ;

ຕຕ຺ຖ ຈິຕ຺ຕໍ ປສາເທຕ຺ວາ, ໂພຘິມູເລ ນິສີທຫໍ.

໖໓. ‘‘ຄຣຸຈິຕ຺ຕໍ ອຸປຏ຺ເຐຕ຺ວາ, ສິເຣ ກຕ຺ວານ ອຎ຺ຊລິໍ;

ໂສມນສ຺ສໍ ປເວເທຕ຺ວາ, ເອວໍ ຈິນ຺ເຕສິ ຕາວເທ.

໖໔. ‘‘‘ຍທິ ພຸທ຺ໂຘ ອມິຕຄຸໂຓ, ອສມປ຺ປຏິປຸຄ຺ຄໂລ;

ທສ຺ເສຕຸ ປາຏິຫີຣໍ ເມ, ໂພຘິ ໂອຠາສຕຸ ອຍໍ’.

໖໕. ‘‘ສຫ ອາວຊ຺ຊິເຕ ມຍ຺ຫໍ, ໂພຘິ ປຊ຺ຊລິ ຕາວເທ;

ສພ຺ພໂສຓ຺ຓມຍາ ອາສິ, ທິສາ ສພ຺ພາ ວິໂຣຈຕິ.

໖໖. ‘‘ສຕ຺ຕຣຕ຺ຕິນ຺ທິວໍ ຕຕ຺ຖ, ໂພຘິມູເລ ນິສີທຫໍ;

ສຕ຺ຕເມ ທິວເສ ປຕ຺ເຕ, ທີປປູຊໍ ອກາສຫໍ.

໖໗. ‘‘ອາສນໍ ປຣິວາເຣຕ຺ວາ, ປຎ຺ຈ ທີປານິ ປຊ຺ຊລຸໍ;

ຍາວ ອຸເທຕິ ສູຣິໂຍ, ທີປາ ເມ ປຊ຺ຊລຸໍ ຕທາ.

໖໘. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໖໙. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ປຎ຺ຈທີປາຕິ ວຸຈ຺ຈຕິ;

ສຏ຺ຐິໂຍຊນມຸພ຺ເພຘໍ, ຕິໍສໂຍຊນວິຕ຺ຖຕໍ.

໗໐. ‘‘ອສງ຺ຂິຍານິ ທີປານິ, ປຣິວາເຣ ຊລິໍສຸ ເມ;

ຍາວຕາ ເທວຠວນໍ, ທີປາໂລເກນ ໂຊຕຕິ.

໗໑. ‘‘ປຣມ຺ມຸຂາ [ປຸພ຺ພມຸຂາ (ສ຺ຍາ.)] ນິສີທິຕ຺ວາ, ຍທິ ອິຈ຺ຉາມິ ປສ຺ສິຕຸໍ;

ອຸທ຺ຘໍ ອໂຘ ຈ ຕິຣິຍໍ, ສພ຺ພໍ ປສ຺ສາມິ ຈກ຺ຂຸນາ.

໗໒. ‘‘ຍາວຕາ ອຠິກງ຺ຂາມິ, ທຏ຺ຐຸໍ ສຸຄຕທຸຄ຺ຄເຕ [ສຸກຕທຸກ຺ກເຏ (ປີ.)];

ຕຕ຺ຖ ອາວຣຓໍ ນຕ຺ຖິ, ຣຸກ຺ເຂສຸ ປພ຺ພເຕສຸ ວາ.

໗໓. ‘‘ອສີຕິ ເທວຣາຊູນໍ, ມເຫສິຕ຺ຕມກາຣຍິໍ;

ສຕານໍ ຈກ຺ກວຕ຺ຕີນໍ, ມເຫສິຕ຺ຕມກາຣຍິໍ.

໗໔. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ທີປສຕສຫສ຺ສານິ, ປຣິວາເຣ ຊລນ຺ຕິ ເມ.

໗໕. ‘‘ເທວໂລກາ ຈວິຕ຺ວານ, ອຸປ຺ປຊ຺ຊິໍ ມາຕຸກຸຈ຺ຉິຍໍ;

ມາຕຸກຸຈ຺ຉິຄຕາ ສນ຺ຕີ, ອກ຺ຂິ ເມ ນ ນິມີລຕິ.

໗໖. ‘‘ທີປສຕສຫສ຺ສານິ, ປຸຎ຺ຎກມ຺ມສມງ຺ຄິຕາ;

ຊລນ຺ຕິ ສູຕິກາເຄເຫ, ປຎ຺ຈທີປານິທໍ ຜລໍ.

໗໗. ‘‘ປຈ຺ຉິເມ ຠເວ ສມ຺ປຕ຺ເຕ, ມານສໍ ວິນິວຕ຺ຕຍິໍ;

ອຊຣາມຕໍ ສີຕິຠາວໍ, ນິພ຺ພານໍ ຜສ຺ສຍິໍ ອຫໍ.

໗໘. ‘‘ຊາຕິຍາ ສຕ຺ຕວສ຺ສາຫໍ, ອຣຫຕ຺ຕມປາປຸຓິໍ;

ອຸປສມ຺ປາທຍີ ພຸທ຺ໂຘ, ຄຸຓມຎ຺ຎາຍ ໂຄຕໂມ.

໗໙. ‘‘ມຓ຺ຑເປ ຣຸກ຺ຂມູເລ ວາ, ສຸຎ຺ຎາຄາເຣ ວສນ຺ຕິຍາ;

ສທາ ປຊ຺ຊລເຕ ທີປໍ, ປຎ຺ຈທີປານິທໍ ຜລໍ.

໘໐. ‘‘ທິພ຺ພຈກ຺ຂຸ ວິສຸທ຺ຘໍ ເມ, ສມາຘິກຸສລາ ອຫໍ;

ອຠິຎ຺ຎາປາຣມິປ຺ປຕ຺ຕາ, ປຎ຺ຈທີປານິທໍ ຜລໍ.

໘໑. ‘‘ສພ຺ພໂວສິຕໂວສານາ, ກຕກິຈ຺ຈາ ອນາສວາ;

ປຎ຺ຈທີປາ ມຫາວີຣ, ປາເທ ວນ຺ທາມິ ຈກ຺ຂຸມ.

໘໒. ‘‘ສຕສຫສ຺ສິໂຕ ກປ຺ເປ, ຍໍ ທີປມທທິໍ ຕທາ;

ທຸຄ຺ຄຕິໍ ນາຠິຊານາມິ, ປຎ຺ຈທີປານິທໍ ຜລໍ.

໘໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໘໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໘໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ປຎ຺ຈທີປທາຍິກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ປຎ຺ຈທີປທາຍິກາເຖຣິຍາປທານໍ ປຎ຺ຈມໍ.