໒. ສຬລປຸປ຺ຜິກາເຖຣີອປທານໍ

໒໒. ‘‘ຈນ຺ທຠາຄານທີຕີເຣ, ອໂຫສິໍ ກິນ຺ນຣີ ຕທາ;

ອທ຺ທສາຫໍ ເທວເທວໍ, ຈງ຺ກມນ຺ຕໍ ນຣາສຠໍ.

໒໓. ‘‘ໂອຈິນິຕ຺ວານ ສຬລໍ, ພຸທ຺ຘເສຏ຺ຐສ຺ສທາສຫໍ;

ອຸປສິງ຺ຆິ ມຫາວີໂຣ, ສຬລໍ ເທວຄນ຺ຘິກໍ.

໒໔. ‘‘ປຏິຄ຺ຄເຫຕ຺ວາ ສມ຺ພຸທ຺ໂຘ, ວິປສ຺ສີ ໂລກນາຍໂກ;

ອຸປສິງ຺ຆິ ມຫາວີໂຣ, ເປກ຺ຂມານາຍ ເມ ຕທາ.

໒໕. ‘‘ອຎ຺ຊລິໍ ປຄ຺ຄເຫຕ຺ວານ, ວນ຺ທິຕ຺ວາ ທ຺ວິປທຸຕ຺ຕມໍ [ທິປທຸຕ຺ຕມໍ (ສີ. ສ຺ຍາ. ປີ.)];

ສກໍ ຈິຕ຺ຕໍ ປສາເທຕ຺ວາ, ຕໂຕ ປພ຺ພຕມາຣຸຫິໍ.

໒໖. ‘‘ເອກນວຸຕິໂຕ ກປ຺ເປ, ຍໍ ປຸປ຺ຜມທທິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໒໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໒໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ສຬລປຸປ຺ຜິກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ສຬລປຸປ຺ຜິກາເຖຣິຍາປທານໍ ທຸຕິຍໍ.