໙. ປຎ຺ຈທີປິກາເຖຣີອປທານໍ

໙໑. ‘‘ນຄເຣ ຫໍສວຕິຍາ, ຈາຣິກີ [ຈາຣິນິໍ (ສ຺ຍາ.)] ອາສຫໍ ຕທາ;

ອາຣາເມນ ຈ ອາຣາມໍ, ຈຣາມິ ກຸສລຕ຺ຖິກາ.

໙໒. ‘‘ກາຬປກ຺ຂມ຺ຫິ ທິວເສ, ອທ຺ທສໍ ໂພຘິມຸຕ຺ຕມໍ;

ຕຕ຺ຖ ຈິຕ຺ຕໍ ປສາເທຕ຺ວາ, ໂພຘິມູເລ ນິສີທຫໍ.

໙໓. ‘‘ຄຣຸຈິຕ຺ຕໍ ອຸປຏ຺ເຐຕ຺ວາ, ສິເຣ ກຕ຺ວານ ອຎ຺ຊລິໍ;

ໂສມນສ຺ສໍ ປເວເທຕ຺ວາ, ເອວໍ ຈິນ຺ເຕສິ ຕາວເທ.

໙໔. ‘‘‘ຍທິ ພຸທ຺ໂຘ ອມິຕຄຸໂຓ, ອສມປ຺ປຏິປຸຄ຺ຄໂລ;

ທສ຺ເສຕຸ ປາຏິຫີຣໍ ເມ, ໂພຘິ ໂອຠາສຕຸ ອຍໍ’.

໙໕. ‘‘ສຫ ອາວຊ຺ຊິເຕ ມຍ຺ຫໍ, ໂພຘິ ປຊ຺ຊລິ ຕາວເທ;

ສພ຺ພໂສຓ຺ຓມຍາ ອາສິ, ທິສາ ສພ຺ພາ ວິໂຣຈຕິ.

໙໖. ‘‘ສຕ຺ຕຣຕ຺ຕິນ຺ທິວໍ [ສຕ຺ຕຣຕ຺ຕິທິວໍ (ປີ. ກ.)] ຕຕ຺ຖ, ໂພຘິມູເລ ນິສີທຫໍ;

ສຕ຺ຕເມ ທິວເສ ປຕ຺ເຕ, ທີປປູຊໍ ອກາສຫໍ.

໙໗. ‘‘ອາສນໍ ປຣິວາເຣຕ຺ວາ, ປຎ຺ຈທີປານິ ປຊ຺ຊລຸໍ;

ຍາວ ອຸເທຕິ ສູຣິໂຍ, ທີປາ ເມ ປຊ຺ຊລຸໍ ຕທາ.

໙໘. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໙໙. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ປຎ຺ຈທີປາຕິ ວຸຈ຺ຈຕິ;

ສຏ຺ຐິໂຍຊນມຸພ຺ເພຘໍ [ສຕໂຍຊນມຸພ຺ເພຘໍ (ສີ. ສ຺ຍາ. ປີ.)], ຕິໍສໂຍຊນວິຕ຺ຖຕໍ [ສຏ຺ຐິ… (ສ຺ຍາ. ປີ.)].

໑໐໐. ‘‘ອສງ຺ຂິຍານິ ທີປານິ, ປຣິວາເຣ ຊລນ຺ຕິ ເມ;

ຍາວຕາ ເທວຠວນໍ, ທີປາໂລເກນ ໂຊຕຕິ.

໑໐໑. ‘‘ປຣມ຺ມຸຂາ ນິສີທິຕ຺ວາ [ປຸຣຕ຺ຖາຠິມຸຂາ ສນ຺ຕິ (ສ຺ຍາ.), ປຸຣຕ຺ຖາຠິມຸຂາ ຖິຕາ (ປີ.)], ຍທິ ອິຈ຺ຉາມິ ປສ຺ສິຕຸໍ;

ອຸທ຺ຘໍ ອໂຘ ຈ ຕິຣິຍໍ, ສພ຺ພໍ ປສ຺ສາມິ ຈກ຺ຂຸນາ.

໑໐໒. ‘‘ຍາວຕາ ອຠິກງ຺ຂາມິ, ທຏ຺ຐຸໍ ສຸຄຕທຸຄ຺ຄເຕ [ສຸກຕທຸກ຺ກເຕ (ປີ.];

ຕຕ຺ຖ ອາວຣຓໍ ນຕ຺ຖິ, ຣຸກ຺ເຂສຸ ປພ຺ພເຕສຸ ວາ.

໑໐໓. ‘‘ອສີຕິ ເທວຣາຊູນໍ, ມເຫສິຕ຺ຕມກາຣຍິໍ;

ສຕານໍ ຈກ຺ກວຕ຺ຕີນໍ, ມເຫສິຕ຺ຕມກາຣຍິໍ.

໑໐໔. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ທີປສຕສຫສ຺ສານິ, ປຣິວາເຣ ຊລນ຺ຕິ ເມ.

໑໐໕. ‘‘ເທວໂລກາ ຈວິຕ຺ວານ, ອຸປ຺ປຊ຺ຊິໍ ມາຕຸກຸຈ຺ຉິຍໍ;

ມາຕຸກຸຈ຺ຉິຄຕາ ສນ຺ຕີ [ມາຕຸກຸຈ຺ຉິຄຕໍ ສນ຺ຕິໍ (ສີ.)], ອກ຺ຂິ ເມ ນ ນິມີລຕິ.

໑໐໖. ‘‘ທີປສຕສຫສ຺ສານິ, ປຸຎ຺ຎກມ຺ມສມງ຺ຄິຕາ;

ຊລນ຺ຕິ ສູຕິກາເຄເຫ [ສູຕິຆເຣ ປຊ຺ຊລນ຺ຕິ (ສພ຺ພຕ຺ຖ)], ປຎ຺ຈທີປານິທໍ ຜລໍ.

໑໐໗. ‘‘ປຈ຺ຉິເມ ຠເວ ສມ຺ປຕ຺ເຕ, ມານສໍ ວິນິວຕ຺ຕຍິໍ;

ອຊຣາມຕໍ ສີຕິຠາວໍ, ນິພ຺ພານໍ ຜສ຺ສຍິໍ ອຫໍ.

໑໐໘. ‘‘ຊາຕິຍາ ສຕ຺ຕວສ຺ສາຫໍ, ອຣຫຕ຺ຕມປາປຸຓິໍ;

ອຸປສມ຺ປາທຍີ ພຸທ຺ໂຘ, ຄຸຓມຎ຺ຎາຍ ໂຄຕໂມ.

໑໐໙. ‘‘ມຓ຺ຑເປ ຣຸກ຺ຂມູເລ ວາ, ປາສາເທສຸ ຄຸຫາສຸ ວາ;

ສຸຎ຺ຎາຄາເຣ ວສນ຺ຕິຍາ [ຈ ຌາຍນ຺ເຕ (ສີ.), ຈ ຌາຍນ຺ຕາ (ປີ.), ປຊ຺ຌາຍນ຺ຕາ (ສ຺ຍາ.)], ປຎ຺ຈທີປາ ຊລນ຺ຕິ ເມ.

໑໑໐. ‘‘ທິພ຺ພຈກ຺ຂຸ ວິສຸທ຺ຘໍ ເມ, ສມາຘິກຸສລາ ອຫໍ;

ອຠິຎ຺ຎາປາຣມິປ຺ປຕ຺ຕາ, ປຎ຺ຈທີປານິທໍ ຜລໍ.

໑໑໑. ‘‘ສພ຺ພໂວສິຕໂວສານາ, ກຕກິຈ຺ຈາ ອນາສວາ;

ປຎ຺ຈທີປາ ມຫາວີຣ, ປາເທ ວນ຺ທາມິ [ວນ຺ທຕິ (ສີ. ກ.)] ຈກ຺ຂຸມ.

໑໑໒. ‘‘ສຕສຫສ຺ສິໂຕ ກປ຺ເປ, ຍໍ ທີປມທທິໍ ຕທາ;

ທຸຄ຺ຄຕິໍ ນາຠິຊານາມິ, ປຎ຺ຈທີປານິທໍ ຜລໍ.

໑໑໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໑໑໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໑໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ປຎ຺ຈທີປິກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ປຎ຺ຈທີປິກາເຖຣິຍາປທານໍ ນວມໍ.