໑໐. ອຸທກທາຍິກາເຖຣີອປທານໍ

໑໑໖. ‘‘ນຄເຣ ພນ຺ຘຸມຕິຍາ, ອໂຫສິໍ ອຸທຫາຣິກາ;

ອຸທຫາເຣນ ຊີວາມິ, ເຕນ ໂປເສມິ ທາຣເກ.

໑໑໗. ‘‘ເທຍ຺ຍຘມ຺ໂມ ຈ ເມ ນຕ຺ຖິ, ປຸຎ຺ຎກ຺ເຂຕ຺ເຕ ອນຸຕ຺ຕເຣ;

ໂກຏ຺ຐກໍ ອຸປສງ຺ກມ຺ມ, ອຸທກໍ ປຏ຺ຐເປສຫໍ.

໑໑໘. ‘‘ເຕນ ກມ຺ເມນ ສຸກເຕນ, ຕາວຕິໍສມຄຈ຺ຉຫໍ;

ຕຕ຺ຖ ເມ ສຸກຕໍ ພ຺ຍມ຺ຫໍ, ອຸທຫາເຣນ ນິມ຺ມິຕໍ.

໑໑໙. ‘‘ອຈ຺ຉຣານໍ ສຫສ຺ສສ຺ສ, ອຫຎ຺ຫິ ປວຣາ ຕທາ;

ທສຏ຺ຐາເນຫິ ຕາ ສພ຺ພາ, ອຠິໂຠມິ ສທາ ອຫໍ.

໑໒໐. ‘‘ປຎ຺ຎາສໍ ເທວຣາຊູນໍ, ມເຫສິຕ຺ຕມກາຣຍິໍ;

ວີສຕິຈກ຺ກວຕ຺ຕີນໍ, ມເຫສິຕ຺ຕມກາຣຍິໍ.

໑໒໑. ‘‘ທຸເວ ຠເວ ສໍສຣາມິ, ເທວຕ຺ເຕ ອຖ ມານຸເສ;

ທຸຄ຺ຄຕິໍ ນາຠິຊານາມິ, ທກທານສ຺ສິທໍ ຜລໍ.

໑໒໒. ‘‘ປພ຺ພຕຄ຺ເຄ ທຸມຄ຺ເຄ ວາ, ອນ຺ຕລິກ຺ເຂ ຈ ຠູມິຍໍ;

ຍທາ ອຸທກມິຈ຺ຉາມິ, ຂິປ຺ປໍ ປຏິລຠາມຫໍ.

໑໒໓. ‘‘ອວຸຏ຺ຐິກາ ທິສາ ນຕ຺ຖິ, ສນ຺ຕຕ຺ຕາ ກຸຖິຕາປິ [ສນ຺ຕຕ຺ຕາ ກຸຖິຕາ ນ ຈ (ສີ. ປີ.), ສນ຺ຕຕ຺ຕາ ຂຸປ຺ປິຕາ ຫິ ເມ (ສ຺ຍາ.)] ຈ;

ມມ ສງ຺ກປ຺ປມຎ຺ຎາຍ, ມຫາເມໂຆ ປວສ຺ສຕິ.

໑໒໔. ‘‘ກທາຈິ ນີຍມານາຍ, ຎາຕິສງ຺ເຆນ ເມ ຕທາ;

ຍທາ ອິຈ຺ຉາມຫໍ ວສ຺ສໍ, ມຫາເມໂຆ ອຊາຍຖ.

໑໒໕. ‘‘ອຸຓ຺ຫໍ ວາ ປຣິຬາໂຫ ວາ, ສຣີເຣ ເມ ນ ວິຊ຺ຊຕິ;

ກາເຍ ຈ ເມ ຣໂຊ ນຕ຺ຖິ, ທກທານສ຺ສິທໍ ຜລໍ.

໑໒໖. ‘‘ວິສຸທ຺ຘມນສາ ອຊ຺ຊ, ອເປຕມນປາປິກາ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໑໒໗. ‘‘ເອກນວຸຕິໂຕ ກປ຺ເປ, ຍໍ ທກໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ທກທານສ຺ສິທໍ ຜລໍ.

໑໒໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໑໒໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໓໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອຸທກທາຍິກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ອຸທກທາຍິກາເຖຣິຍາປທານໍ ທສມໍ.

ສຸເມຘາວຄ຺ໂຄ ປຐໂມ.