໗. ສຕ຺ຕກນິປາໂຕ

໑. ສຸນ຺ທຣສມຸທ຺ທຕ຺ເຖຣຄາຖາ

໔໕໙. ‘‘ອລງ຺ກຕາ ສຸວສນາ, ມາລຘາຣີ [ມາລາຠາຣີ (ສີ.), ມາລຠາຣີ (ສ຺ຍາ.)] ວິຠູສິຕາ;

ອລຕ຺ຕກກຕາປາທາ, ປາທຸກາຣຸຍ຺ຫ ເວສິກາ.

໔໖໐. ‘‘ປາທຸກາ ໂອຣຸຫິຕ຺ວານ, ປຸຣໂຕ ປຎ຺ຊລີກຕາ;

ສາ ມໍ ສຓ຺ເຫນ ມຸທຸນາ, ມ຺ຫິຕປຸພ຺ພໍ [ມິຫິຕປຸພ຺ພໍ (ສີ.)] ອຠາສຖ’’.

໔໖໑. ‘‘ຍຸວາສິ ຕ຺ວໍ ປພ຺ພຊິໂຕ, ຕິຏ຺ຐາຫິ ມມ ສາສເນ;

ຠຸຎ຺ຊ ມານຸສເກ ກາເມ, ອຫໍ ວິຕ຺ຕໍ ທທາມິ ເຕ;

ສຈ຺ຈໍ ເຕ ປຏິຊານາມິ, ອຄ຺ຄິໍ ວາ ເຕ ຫຣາມຫໍ.

໔໖໒. ‘‘ຍທາ ຊິຓ຺ຓາ ຠວິສ຺ສາມ, ອຸໂຠ ທຓ຺ຑປຣາຍນາ;

ອຸໂຠປິ ປພ຺ພຊິສ຺ສາມ, ອຸຠຍຕ຺ຖ ກຏຄ຺ຄໂຫ’’.

໔໖໓. ‘‘ຕຎ຺ຈ ທິສ຺ວານ ຍາຈນ຺ຕິໍ, ເວສິກໍ ປຎ຺ຊລີກຕໍ;

ອລງ຺ກຕໍ ສຸວສນໍ, ມຈ຺ຈຸປາສໍວ ໂອຑ຺ຑິຕໍ.

໔໖໔. ‘‘ຕໂຕ ເມ ມນສີກາໂຣ…ເປ… ນິພ຺ພິທາ ສມຕິຏ຺ຐຖ.

໔໖໕. ‘‘ຕໂຕ ຈິຕ຺ຕໍ ວິມຸຈ຺ຈິ ເມ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

… ສຸນ຺ທຣສມຸທ຺ໂທ ເຖໂຣ….

໒. ລກຸຓ຺ຑກຠທ຺ທິຍຕ຺ເຖຣຄາຖາ

໔໖໖. ປເຣ ອມ຺ພາຏກາຣາເມ, ວນສຓ຺ຑມ຺ຫິ ຠທ຺ທິໂຍ;

ສມູລໍ ຕຓ຺ຫມພ຺ພຸຍ຺ຫ, ຕຕ຺ຖ ຠທ຺ໂທວ ຌາຍຕິ [ຠທ຺ໂທ’ຘິຌາຍາຍຕິ (ສີ.), ຠທ຺ໂທ ຌິຍາຍຕິ (ສ຺ຍາ. ສີ. ອຏ຺ຐ.)].

໔໖໗. ‘‘ຣມນ຺ເຕເກ ມຸທິງ຺ເຄຫິ [ມຸຕິງ຺ເຄຫິ (ສີ. ອຏ຺ຐ.)], ວີຓາຫິ ປຓເວຫິ ຈ;

ອຫຎ຺ຈ ຣຸກ຺ຂມູລສ຺ມິໍ, ຣໂຕ ພຸທ຺ຘສ຺ສ ສາສເນ.

໔໖໘. ‘‘ພຸທ຺ໂຘ ເຈ [ພຸທ຺ໂຘ ຈ (ສພ຺ພຕ຺ຖ)] ເມ ວຣໍ ທຊ຺ຊາ, ໂສ ຈ ລພ຺ເຠຖ ເມ ວໂຣ;

ຄຓ຺ເຫຫໍ ສພ຺ພໂລກສ຺ສ, ນິຈ຺ຈໍ ກາຍຄຕໍ ສຕິໍ.

໔໖໙. ‘‘ເຍ ມໍ ຣູເປນ ປາມິໍສຸ, ເຍ ຈ ໂຆເສນ ອນ຺ວຄູ;

ຉນ຺ທຣາຄວສູເປຕາ, ນ ມໍ ຊານນ຺ຕິ ເຕ ຊນາ.

໔໗໐. ‘‘ອຊ຺ຌຕ຺ຕຎ຺ຈ ນ ຊານາຕິ, ພຫິທ຺ຘາ ຈ ນ ປສ຺ສຕິ;

ສມນ຺ຕາວຣໂຓ ພາໂລ, ສ ເວ ໂຆເສນ ວຸຍ຺ຫຕິ.

໔໗໑. ‘‘ອຊ຺ຌຕ຺ຕຎ຺ຈ ນ ຊານາຕິ, ພຫິທ຺ຘາ ຈ ວິປສ຺ສຕິ;

ພຫິທ຺ຘາ ຜລທສ຺ສາວີ, ໂສປິ ໂຆເສນ ວຸຍ຺ຫຕິ.

໔໗໒. ‘‘ອຊ຺ຌຕ຺ຕຎ຺ຈ ປຊານາຕິ, ພຫິທ຺ຘາ ຈ ວິປສ຺ສຕິ;

ອນາວຣຓທສ຺ສາວີ, ນ ໂສ ໂຆເສນ ວຸຍ຺ຫຕີ’’ຕິ.

… ລກຸຓ຺ຑກຠທ຺ທິໂຍ ເຖໂຣ….

໓. ຠທ຺ທຕ຺ເຖຣຄາຖາ

໔໗໓. ‘‘ເອກປຸຕ຺ໂຕ ອຫໍ ອາສິໍ, ປິໂຍ ມາຕຸ ປິໂຍ ປິຕຸ;

ພຫູຫິ ວຕຈຣິຍາຫິ, ລທ຺ໂຘ ອາຍາຈນາຫິ ຈ.

໔໗໔. ‘‘ເຕ ຈ ມໍ ອນຸກມ຺ປາຍ, ອຕ຺ຖກາມາ ຫິເຕສິໂນ;

ອຸໂຠ ປິຕາ ຈ ມາຕາ ຈ, ພຸທ຺ຘສ຺ສ ອຸປນາມຍຸໍ’’.

໔໗໕. ‘‘ກິຈ຺ຉາ ລທ຺ໂຘ ອຍໍ ປຸຕ຺ໂຕ, ສຸຂຸມາໂລ ສຸເຂຘິໂຕ;

ອິມໍ ທທາມ ເຕ ນາຖ, ຊິນສ຺ສ ປຣິຈາຣກໍ’’.

໔໗໖. ‘‘ສຕ຺ຖາ ຈ ມໍ ປຏິຄ຺ຄຍ຺ຫ, ອານນ຺ທໍ ເອຕທພ຺ຣວິ;

‘ປພ຺ພາເຊຫິ ອິມໍ ຂິປ຺ປໍ, ເຫສ຺ສຕ຺ຍາຊານິໂຍ ອຍໍ.

໔໗໗. ‘‘ປພ຺ພາເຊຕ຺ວານ ມໍ ສຕ຺ຖາ, ວິຫາຣໍ ປາວິສີ ຊິໂນ;

ອໂນຄ຺ຄຕສ຺ມິໍ ສູຣິຍສ຺ມິໍ, ຕໂຕ ຈິຕ຺ຕໍ ວິມຸຈ຺ຈິ ເມ.

໔໗໘. ‘‘ຕໂຕ ສຕ຺ຖາ ນິຣາກຕ຺ວາ, ປຏິສລ຺ລານວຸຏ຺ຐິໂຕ;

‘ເອຫິ ຠທ຺ທາ’ຕິ ມໍ ອາຫ, ສາ ເມ ອາສູປສມ຺ປທາ.

໔໗໙. ‘‘ຊາຕິຍາ ສຕ຺ຕວສ຺ເສນ, ລທ຺ຘາ ເມ ອຸປສມ຺ປທາ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ອໂຫ ຘມ຺ມສຸຘມ຺ມຕາ’’ຕິ.

… ຠທ຺ໂທ ເຖໂຣ….

໔. ໂສປາກຕ຺ເຖຣຄາຖາ

໔໘໐. ‘‘ທິສ຺ວາ ປາສາທຉາຍາຍໍ, ຈງ຺ກມນ຺ຕໍ ນຣຸຕ຺ຕມໍ;

ຕຕ຺ຖ ນໍ ອຸປສງ຺ກມ຺ມ, ວນ຺ທິສ຺ສໍ [ວນ຺ທິສໍ (ສີ. ປີ.)] ປຸຣິສຸຕ຺ຕມໍ.

໔໘໑. ‘‘ເອກໍສໍ ຈີວຣໍ ກຕ຺ວາ, ສໍຫຣິຕ຺ວານ ປາຓໂຍ;

ອນຸຈງ຺ກມິສ຺ສໍ ວິຣຊໍ, ສພ຺ພສຕ຺ຕານມຸຕ຺ຕມໍ.

໔໘໒. ‘‘ຕໂຕ ປຎ຺ເຫ ອປຸຈ຺ຉິ ມໍ, ປຎ຺ຫານໍ ໂກວິໂທ ວິທູ;

ອຈ຺ຉມ຺ຠີ ຈ ອຠີໂຕ ຈ, ພ຺ຍາກາສິໍ ສຕ຺ຖຸໂນ ອຫໍ.

໔໘໓. ‘‘ວິສ຺ສຊ຺ຊິເຕສຸ ປຎ຺ເຫສຸ, ອນຸໂມທິ ຕຖາຄໂຕ;

ຠິກ຺ຂຸສງ຺ຆໍ ວິໂລເກຕ຺ວາ, ອິມມຕ຺ຖໍ ອຠາສຖ’’.

໔໘໔. ‘‘ລາຠາ ອງ຺ຄານໍ ມຄຘານໍ, ເຍສາຍໍ ປຣິຠຸຎ຺ຊຕິ;

ຈີວຣໍ ປິຓ຺ຑປາຕຎ຺ຈ, ປຈ຺ຈຍໍ ສຍນາສນໍ;

ປຈ຺ຈຸຏ຺ຐານຎ຺ຈ ສາມີຈິໍ, ເຕສໍ ລາຠາ’’ຕິ ຈາພ຺ຣວິ.

໔໘໕. ‘‘ອຊ຺ຊຕຄ຺ເຄ ມໍ ໂສປາກ, ທສ຺ສນາໂຍປສງ຺ກມ;

ເອສາ ເຈວ ເຕ ໂສປາກ, ຠວຕຸ ອຸປສມ຺ປທາ’’.

໔໘໖. ‘‘ຊາຕິຍາ ສຕ຺ຕວສ຺ໂສຫໍ, ລທ຺ຘານ ອຸປສມ຺ປທໍ;

ຘາເຣມິ ອນ຺ຕິມໍ ເທຫໍ, ອໂຫ ຘມ຺ມສຸຘມ຺ມຕາ’’ຕິ.

… ໂສປາໂກ ເຖໂຣ….

໕. ສຣຠງ຺ຄຕ຺ເຖຣຄາຖາ

໔໘໗. ‘‘ສເຣ ຫຕ຺ເຖຫິ ຠຎ຺ຊິຕ຺ວາ, ກຕ຺ວານ ກຸຏິມຈ຺ຉິສໍ;

ເຕນ ເມ ສຣຠງ຺ໂຄຕິ, ນາມໍ ສມ຺ມຸຕິຍາ ອຫຸ.

໔໘໘. ‘‘ນ ມຍ຺ຫໍ ກປ຺ປເຕ ອຊ຺ຊ, ສເຣ ຫຕ຺ເຖຫິ ຠຎ຺ຊິຕຸໍ;

ສິກ຺ຂາປທາ ໂນ ປຎ຺ຎຕ຺ຕາ, ໂຄຕເມນ ຍສສ຺ສິນາ.

໔໘໙. ‘‘ສກລໍ ສມຕ຺ຕໍ ໂຣຄໍ, ສຣຠງ຺ໂຄ ນາທ຺ທສໍ ປຸພ຺ເພ;

ໂສຍໍ ໂຣໂຄ ທິຏ຺ໂຐ, ວຈນກເຣນາຕິເທວສ຺ສ.

໔໙໐. ‘‘ເຍເນວ ມຄ຺ເຄນ ຄໂຕ ວິປສ຺ສີ, ເຍເນວ ມຄ຺ເຄນ ສິຂີ ຈ ເວສ຺ສຠູ;

ກກຸສນ຺ຘໂກຓາຄມໂນ ຈ ກສ຺ສໂປ, ເຕນຎ຺ຊເສນ ອຄມາສິ ໂຄຕໂມ.

໔໙໑. ‘‘ວີຕຕຓ຺ຫາ ອນາທານາ, ສຕ຺ຕ ພຸທ຺ຘາ ຂໂຍຄຘາ;

ເຍຫາຍໍ ເທສິໂຕ ຘມ຺ໂມ, ຘມ຺ມຠູເຕຫິ ຕາທິຠິ.

໔໙໒. ‘‘ຈຕ຺ຕາຣິ ອຣິຍສຈ຺ຈານິ, ອນຸກມ຺ປາຍ ປາຓິນໍ;

ທຸກ຺ຂໍ ສມຸທໂຍ ມຄ຺ໂຄ, ນິໂຣໂຘ ທຸກ຺ຂສງ຺ຂໂຍ.

໔໙໓. ‘‘ຍສ຺ມິໍ ນິວຕ຺ຕເຕ [ຍສ຺ມິໍ ນ ນິພ຺ພຕ຺ຕເຕ (ກ.)] ທຸກ຺ຂໍ, ສໍສາຣສ຺ມິໍ ອນນ຺ຕກໍ;

ເຠທາ ອິມສ຺ສ ກາຍສ຺ສ, ຊີວິຕສ຺ສ ຈ ສງ຺ຂຍາ;

ອຎ຺ໂຎ ປຸນພ຺ຠໂວ ນຕ຺ຖິ, ສຸວິມຸຕ຺ໂຕມ຺ຫິ ສພ຺ພຘີ’’ຕິ.

… ສຣຠງ຺ໂຄ ເຖໂຣ….

ສຕ຺ຕກນິປາໂຕ ນິຏ຺ຐິໂຕ.