໕. ປຎ຺ຈກນິປາໂຕ

໑. ຣາຊທຕ຺ຕຕ຺ເຖຣຄາຖາ

໓໑໕. ‘‘ຠິກ຺ຂຸ ສິວຖິກໍ [ສີວຖິກໍ (ສີ. ສ຺ຍາ. ປີ.)] ຄນ຺ຕ຺ວາ, ອທ຺ທສ ອິຕ຺ຖິມຸຊ຺ຌິຕໍ;

ອປວິທ຺ຘໍ ສຸສານສ຺ມິໍ, ຂຊ຺ຊນ຺ຕິໍ ກິມິຫີ ຜຸຏໍ.

໓໑໖. ‘‘ຍຎ຺ຫິ ເອເກ ຊິຄຸຈ຺ຉນ຺ຕິ, ມຕໍ ທິສ຺ວານ ປາປກໍ;

ກາມຣາໂຄ ປາຕຸຣຫຸ, ອນ຺ໂຘວ ສວຕີ [ວສຕີ (ສີ.)] ອຫຸໍ.

໓໑໗. ‘‘ໂອຣໍ ໂອທນປາກມ຺ຫາ, ຕມ຺ຫາ ຐານາ ອປກ຺ກມິໍ;

ສຕິມາ ສມ຺ປຊາໂນຫໍ, ເອກມນ຺ຕໍ ອຸປາວິສິໍ.

໓໑໘. ‘‘ຕໂຕ ເມ ມນສີກາໂຣ, ໂຍນິໂສ ອຸທປຊ຺ຊຖ;

ອາທີນໂວ ປາຕຸຣຫຸ, ນິພ຺ພິທາ ສມຕິຏ຺ຐຖ.

໓໑໙. ‘‘ຕໂຕ ຈິຕ຺ຕໍ ວິມຸຈ຺ຈິ ເມ, ປສ຺ສ ຘມ຺ມສຸຘມ຺ມຕໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນ’’ນ຺ຕິ.

… ຣາຊທຕ຺ໂຕ ເຖໂຣ….

໒. ສຸຠູຕຕ຺ເຖຣຄາຖາ

໓໒໐. ‘‘ອໂຍເຄ ຍຸຎ຺ຊມຕ຺ຕານໍ, ປຸຣິໂສ ກິຈ຺ຈມິຈ຺ຉໂກ [ກິຈ຺ຈມິຈ຺ຉໂຕ (ສີ.), ກິຈ຺ຈມິຈ຺ຉຍໍ (ກຕ຺ຖຈິ)];

ຈຣໍ ເຈ ນາຘິຄຈ຺ເຉຍ຺ຍ, ‘ຕໍ ເມ ທຸພ຺ຠຄລກ຺ຂຓໍ’.

໓໒໑. ‘‘ອພ຺ພູຬ຺ຫໍ ອຆຄຕໍ ວິຊິຕໍ, ເອກຎ຺ເຈ ໂອສ຺ສເຊຍ຺ຍ ກລີວ ສິຍາ;

ສພ຺ພານິປິ ເຈ ໂອສ຺ສເຊຍ຺ຍ ອນ຺ໂຘວ ສິຍາ, ສມວິສມສ຺ສ ອທສ຺ສນໂຕ.

໓໒໒. ‘‘ຍຎ຺ຫິ ກຍິຣາ ຕຎ຺ຫິ ວເທ, ຍໍ ນ ກຍິຣາ ນ ຕໍ ວເທ;

ອກໂຣນ຺ຕໍ ຠາສມານໍ, ປຣິຊານນ຺ຕິ ປຓ຺ຑິຕາ.

໓໒໓. [ຘ. ປ. ໕໑ ຘມ຺ມປເທປິ] ‘‘ຍຖາປິ ຣຸຈິຣໍ ປຸປ຺ຜໍ, ວຓ຺ຓວນ຺ຕໍ ອຄນ຺ຘກໍ;

ເອວໍ ສຸຠາສິຕາ ວາຈາ, ອຜລາ ໂຫຕິ ອກຸພ຺ພໂຕ.

໓໒໔. [ຘ. ປ. ໕໒] ‘‘ຍຖາປິ ຣຸຈິຣໍ ປຸປ຺ຜໍ, ວຓ຺ຓວນ຺ຕໍ ສຸຄນ຺ຘກໍ [ສຄນ຺ຘກໍ (ສີ. ສ຺ຍາ. ປີ.)];

ເອວໍ ສຸຠາສິຕາ ວາຈາ, ສຜລາ ໂຫຕິ ກຸພ຺ພໂຕ’’ຕິ [ສກຸພ຺ພໂຕ (ສີ. ປີ.), ສຸກຸພ຺ພໂຕ (ສ຺ຍາ.)].

… ສຸຠູໂຕ ເຖໂຣ….

໓. ຄິຣິມານນ຺ທຕ຺ເຖຣຄາຖາ

໓໒໕. ‘‘ວສ຺ສຕິ ເທໂວ ຍຖາ ສຸຄີຕໍ, ຉນ຺ນາ ເມ ກຸຏິກາ ສຸຂາ ນິວາຕາ;

ຕສ຺ສໍ ວິຫຣາມິ ວູປສນ຺ໂຕ, ອຖ ເຈ ປຕ຺ຖຍສີ ປວສ຺ສ ເທວ.

໓໒໖. ‘‘ວສ຺ສຕິ ເທໂວ ຍຖາ ສຸຄີຕໍ, ຉນ຺ນາ ເມ ກຸຏິກາ ສຸຂາ ນິວາຕາ;

ຕສ຺ສໍ ວິຫຣາມິ ສນ຺ຕຈິຕ຺ໂຕ, ອຖ ເຈ ປຕ຺ຖຍສີ ປວສ຺ສ ເທວ.

໓໒໗. ‘‘ວສ຺ສຕິ ເທໂວ…ເປ… ຕສ຺ສໍ ວິຫຣາມິ ວີຕຣາໂຄ…ເປ….

໓໒໘. ‘‘ວສ຺ສຕິ ເທໂວ…ເປ… ຕສ຺ສໍ ວິຫຣາມິ ວີຕໂທໂສ…ເປ….

໓໒໙. ‘‘ວສ຺ສຕິ ເທໂວ…ເປ… ຕສ຺ສໍ ວິຫຣາມິ ວີຕໂມໂຫ;

ອຖ ເຈ ປຕ຺ຖຍສີ ປວສ຺ສ ເທວາ’’ຕິ.

… ຄິຣິມານນ຺ໂທ ເຖໂຣ….

໔. ສຸມນຕ຺ເຖຣຄາຖາ

໓໓໐. ‘‘ຍໍ ປຕ຺ຖຍາໂນ ຘມ຺ເມສຸ, ອຸປຊ຺ຌາໂຍ ອນຸຄ຺ຄຫິ;

ອມຕໍ ອຠິກງ຺ຂນ຺ຕໍ, ກຕໍ ກຕ຺ຕພ຺ພກໍ ມຍາ.

໓໓໑. ‘‘ອນຸປ຺ປຕ຺ໂຕ ສຈ຺ຉິກໂຕ, ສຍໍ ຘມ຺ໂມ ອນີຕິໂຫ;

ວິສຸທ຺ຘິຎາໂຓ ນິກ຺ກງ຺ໂຂ, ພ຺ຍາກໂຣມິ ຕວນ຺ຕິເກ.

໓໓໒. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສທຕ຺ໂຖ ເມ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນໍ.

໓໓໓. ‘‘ອປ຺ປມຕ຺ຕສ຺ສ ເມ ສິກ຺ຂາ, ສຸສ຺ສຸຕາ ຕວ ສາສເນ;

ສພ຺ເພ ເມ ອາສວາ ຂີຓາ, ນຕ຺ຖິ ທານິ ປຸນພ຺ຠໂວ.

໓໓໔. ‘‘ອນຸສາສິ ມໍ ອຣິຍວຕາ, ອນຸກມ຺ປິ ອນຸຄ຺ຄຫິ;

ອໂມໂຆ ຕຸຍ຺ຫໂມວາໂທ, ອນ຺ເຕວາສິມ຺ຫິ ສິກ຺ຂິໂຕ’’ຕິ.

… ສຸມໂນ ເຖໂຣ….

໕. ວຑ຺ຒຕ຺ເຖຣຄາຖາ

໓໓໕. ‘‘ສາຘູ ຫິ ກິຣ ເມ ມາຕາ, ປໂຕທໍ ອຸປທໍສຍິ;

ຍສ຺ສາຫໍ ວຈນໍ ສຸຕ຺ວາ, ອນຸສິຏ຺ໂຐ ຊເນຕ຺ຕິຍາ;

ອາຣທ຺ຘວີຣິໂຍ ປຫິຕຕ຺ໂຕ, ປຕ຺ໂຕ ສມ຺ໂພຘິມຸຕ຺ຕມໍ.

໓໓໖. ‘‘ອຣຫາ ທກ຺ຂິເຓຍ຺ໂຍມ຺ຫິ, ເຕວິຊ຺ໂຊ ອມຕທ຺ທໂສ;

ເຊຕ຺ວາ ນມຸຈິໂນ ເສນໍ, ວິຫຣາມິ ອນາສໂວ.

໓໓໗. ‘‘ອຊ຺ຌຕ຺ຕຎ຺ຈ ພຫິທ຺ຘາ ຈ, ເຍ ເມ ວິຊ຺ຊິໍສຸ ອາສວາ;

ສພ຺ເພ ອເສສາ ອຸຈ຺ຉິນ຺ນາ, ນ ຈ ອຸປ຺ປຊ຺ຊເຣ ປຸນ.

໓໓໘. ‘‘ວິສາຣທາ ໂຂ ຠຄິນີ, ເອຕມຕ຺ຖໍ ອຠາສຍິ;

‘ອປິຫາ ນູນ ມຍິປິ, ວນໂຖ ເຕ ນ ວິຊ຺ຊຕິ’.

໓໓໙. ‘‘ປຣິຍນ຺ຕກຕໍ ທຸກ຺ຂໍ, ອນ຺ຕິໂມຍໍ ສມຸສ຺ສໂຍ;

ຊາຕິມຣຓສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ.

… ວຑ຺ໂຒ ເຖໂຣ….

໖. ນທີກສ຺ສປຕ຺ເຖຣຄາຖາ

໓໔໐. ‘‘ອຕ຺ຖາຍ ວຕ ເມ ພຸທ຺ໂຘ, ນທິໍ ເນຣຎ຺ຊຣໍ ອຄາ;

ຍສ຺ສາຫໍ ຘມ຺ມໍ ສຸຕ຺ວານ, ມິຈ຺ຉາທິຏ຺ຐິໍ ວິວຊ຺ຊຍິໍ.

໓໔໑. ‘‘ຍຊິໍ ອຸຈ຺ຈາວເຈ ຍຎ຺ເຎ, ອຄ຺ຄິຫຸຕ຺ຕໍ ຊຸຫິໍ ອຫໍ;

‘ເອສາ ສຸທ຺ຘີ’ຕິ ມຎ຺ຎນ຺ໂຕ, ອນ຺ຘຠູໂຕ [ອນ຺ຘີຠູໂຕ (ກ.)] ປຸຖຸຊ຺ຊໂນ.

໓໔໒. ‘‘ທິຏ຺ຐິຄຫນປກ຺ຂນ຺ໂທ [ປກ຺ຂນ຺ໂຕ (ສີ.), ປກ຺ຂນ຺ໂນ (ສ຺ຍາ. ປີ.)], ປຣາມາເສນ ໂມຫິໂຕ;

ອສຸທ຺ຘິໍ ມຎ຺ຎິສໍ ສຸທ຺ຘິໍ, ອນ຺ຘຠູໂຕ ອວິທ຺ທສຸ.

໓໔໓. ‘‘ມິຈ຺ຉາທິຏ຺ຐິ ປຫີນາ ເມ, ຠວາ ສພ຺ເພ ປທາລິຕາ [ວິທາລິຕາ (ກ.)];

ຊຸຫາມິ ທກ຺ຂິເຓຍ຺ຍຄ຺ຄິໍ, ນມສ຺ສາມິ ຕຖາຄຕໍ.

໓໔໔. ‘‘ໂມຫາ ສພ຺ເພ ປຫີນາ ເມ, ຠວຕຓ຺ຫາ ປທາລິຕາ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ’’ຕິ.

… ນທີກສ຺ສໂປ ເຖໂຣ….

໗. ຄຍາກສ຺ສປຕ຺ເຖຣຄາຖາ

໓໔໕. ‘‘ປາໂຕ ມຊ຺ຌນ຺ຫິກໍ ສາຍໍ, ຕິກ຺ຂຕ຺ຕຸໍ ທິວສສ຺ສຫໍ;

ໂອຕຣິໍ ອຸທກໍ ໂສຫໍ, ຄຍາຍ ຄຍຜຄ຺ຄຸຍາ.

໓໔໖. ‘‘‘ຍໍ ມຍາ ປກຕໍ ປາປໍ, ປຸພ຺ເພ ອຎ຺ຎາສຸ ຊາຕິສຸ;

ຕໍ ທານີຘ ປວາເຫມິ’, ເອວໍທິຏ຺ຐິ ປຸເຣ ອຫຸໍ.

໓໔໗. ‘‘ສຸຕ຺ວາ ສຸຠາສິຕໍ ວາຈໍ, ຘມ຺ມຕ຺ຖສຫິຕໍ ປທໍ;

ຕຖໍ ຍາຖາວກໍ ອຕ຺ຖໍ, ໂຍນິໂສ ປຈ຺ຈເວກ຺ຂິສໍ;

໓໔໘. ‘‘ນິນ຺ຫາຕສພ຺ພປາໂປມ຺ຫິ, ນິມ຺ມໂລ ປຍໂຕ ສຸຈິ;

ສຸທ຺ໂຘ ສຸທ຺ຘສ຺ສ ທາຍາໂທ, ປຸຕ຺ໂຕ ພຸທ຺ຘສ຺ສ ໂອຣໂສ.

໓໔໙. ‘‘ໂອຄຍ຺ຫຏ຺ຐງ຺ຄິກໍ ໂສຕໍ, ສພ຺ພປາປໍ ປວາຫຍິໍ;

ຕິສ຺ໂສ ວິຊ຺ຊາ ອຊ຺ຌຄມິໍ, ກຕໍ ພຸທ຺ຘສ຺ສ ສາສນ’’ນ຺ຕິ.

… ຄຍາກສ຺ສໂປ ເຖໂຣ….

໘. ວກ຺ກລິຕ຺ເຖຣຄາຖາ

໓໕໐. ‘‘ວາຕໂຣຄາຠິນີໂຕ ຕ຺ວໍ, ວິຫຣໍ ການເນ ວເນ;

ປວິຏ຺ຐໂຄຈເຣ ລູເຂ, ກຖໍ ຠິກ຺ຂຸ ກຣິສ຺ສສິ.

໓໕໑. ‘‘ປີຕິສຸເຂນ ວິປຸເລນ, ຜຣມາໂນ ສມຸສ຺ສຍໍ;

ລູຂມ຺ປິ ອຠິສມ຺ໂຠນ຺ໂຕ, ວິຫຣິສ຺ສາມິ ການເນ.

໓໕໒. ‘‘ຠາເວນ຺ໂຕ ສຕິປຏ຺ຐາເນ, ອິນ຺ທ຺ຣິຍານິ ພລານິ ຈ;

ໂພຊ຺ຌງ຺ຄານິ ຈ ຠາເວນ຺ໂຕ, ວິຫຣິສ຺ສາມິ ການເນ.

໓໕໓. ‘‘ອາຣທ຺ຘວີຣິເຍ ປຫິຕຕ຺ເຕ, ນິຈ຺ຈໍ ທຬ຺ຫປຣກ຺ກເມ [ອາຣທ຺ຘວີຣິໂຍ ປຫິຕຕ຺ໂຕ, ນິຈ຺ຈໍ ທຬ຺ຫປຣກ຺ກໂມ (ສີ.)];

ສມຄ຺ເຄ ສຫິເຕ ທິສ຺ວາ, ວິຫຣິສ຺ສາມິ ການເນ.

໓໕໔. ‘‘ອນຸສ຺ສຣນ຺ໂຕ ສມ຺ພຸທ຺ຘໍ, ອຄ຺ຄໍ ທນ຺ຕໍ ສມາຫິຕໍ;

ອຕນ຺ທິໂຕ ຣຕ຺ຕິນ຺ທິວໍ, ວິຫຣິສ຺ສາມິ ການເນ’’ຕິ.

… ວກ຺ກລິຕ຺ເຖໂຣ….

໙. ວິຊິຕເສນຕ຺ເຖຣຄາຖາ

໓໕໕. ‘‘ໂອລຄ຺ເຄສ຺ສາມິ ເຕ ຈິຕ຺ຕ, ອາຓິທ຺ວາເຣວ ຫຕ຺ຖິນໍ;

ນ ຕໍ ປາເປ ນິໂຍເຊສ຺ສໍ, ກາມຊາລ [ກາມຊາລໍ (ສ຺ຍາ.)] ສຣີຣຊ [ສຣີຣຊໍ (ສ຺ຍາ. ກ.)].

໓໕໖. ‘‘ຕ຺ວໍ ໂອລຄ຺ໂຄ ນ ຄຈ຺ຉສິ [ນ ຄຎ຺ຉິສິ (ປີ)], ທ຺ວາຣວິວຣໍ ຄໂຊວ ອລຠນ຺ໂຕ;

ນ ຈ ຈິຕ຺ຕກລິ ປຸນປ຺ປຸນໍ, ປສກ຺ກ [ປສຫໍ (ສີ. ສ຺ຍາ. ປີ.)] ປາປຣໂຕ ຈຣິສ຺ສສິ.

໓໕໗. ‘‘ຍຖາ ກຸຎ຺ຊຣໍ ອທນ຺ຕໍ, ນວຄ຺ຄຫມງ຺ກຸສຄ຺ຄໂຫ;

ພລວາ ອາວຕ຺ເຕຕິ ອກາມໍ, ເອວໍ ອາວຕ຺ຕຍິສ຺ສໍ ຕໍ.

໓໕໘. ‘‘ຍຖາ ວຣຫຍທມກຸສໂລ, ສາຣຖິ ປວໂຣ ທເມຕິ ອາຊຎ຺ຎໍ;

ເອວໍ ທມຍິສ຺ສໍ ຕໍ, ປຕິຏ຺ຐິໂຕ ປຎ຺ຈສຸ ພເລສຸ.

໓໕໙. ‘‘ສຕິຍາ ຕໍ ນິພນ຺ຘິສ຺ສໍ, ປຍຸຕ຺ໂຕ ເຕ ທເມສ຺ສາມິ [ປຍຕຕ຺ໂຕ ໂວທເປສ຺ສາມິ (ສີ.)];

ວີຣິຍຘຸຣນິຄ຺ຄຫິໂຕ, ນ ຍິໂຕ ທູຣໍ ຄມິສ຺ສເສ ຈິຕ຺ຕາ’’ຕິ.

… ວິຊິຕເສໂນ ເຖໂຣ….

໑໐. ຍສທຕ຺ຕຕ຺ເຖຣຄາຖາ

໓໖໐. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ອາຣກາ ໂຫຕິ ສທ຺ຘມ຺ມາ, ນຠໂສ ປຖວີ ຍຖາ.

໓໖໑. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ປຣິຫາຍຕິ ສທ຺ຘມ຺ມາ, ກາຬປກ຺ເຂວ ຈນ຺ທິມາ.

໓໖໒. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ປຣິສຸສ຺ສຕິ ສທ຺ຘມ຺ເມ, ມຈ຺ໂຉ ອປ຺ໂປທເກ ຍຖາ.

໓໖໓. ‘‘ອຸປາຣມ຺ຠຈິຕ຺ໂຕ ທຸມ຺ເມໂຘ, ສຸຓາຕິ ຊິນສາສນໍ;

ນ ວິຣູຫຕິ ສທ຺ຘມ຺ເມ, ເຂຕ຺ເຕ ພີຊໍວ ປູຕິກໍ.

໓໖໔. ‘‘ໂຍ ຈ ຕຸຏ຺ເຐນ ຈິຕ຺ເຕນ, ສຸຓາຕິ ຊິນສາສນໍ;

ເຂເປຕ຺ວາ ອາສເວ ສພ຺ເພ, ສຈ຺ຉິກຕ຺ວາ ອກຸປ຺ປຕໍ;

ປປ຺ປຸຍ຺ຍ ປຣມໍ ສນ຺ຕິໍ, ປຣິນິພ຺ພາຕິນາສໂວ’’ຕິ.

… ຍສທຕ຺ໂຕ ເຖໂຣ….

໑໑. ໂສຓກຸຏິກຓ຺ຓຕ຺ເຖຣຄາຖາ

໓໖໕. ‘‘ອຸປສມ຺ປທາ ຈ ເມ ລທ຺ຘາ, ວິມຸຕ຺ໂຕ ຈມ຺ຫິ ອນາສໂວ;

ໂສ ຈ ເມ ຠຄວາ ທິຏ຺ໂຐ, ວິຫາເຣ ຈ ສຫາວສິໍ.

໓໖໖. ‘‘ພຫຸເທວ ຣຕ຺ຕິໍ ຠຄວາ, ອພ຺ໂຠກາເສຕິນາມຍິ;

ວິຫາຣກຸສໂລ ສຕ຺ຖາ, ວິຫາຣໍ ປາວິສີ ຕທາ.

໓໖໗. ‘‘ສນ຺ຖຣິຕ຺ວານ ສງ຺ຆາຏິໍ, ເສຍ຺ຍໍ ກປ຺ເປສິ ໂຄຕໂມ;

ສີໂຫ ເສລຄຸຫາຍໍວ, ປຫີນຠຍເຠຣໂວ.

໓໖໘. ‘‘ຕໂຕ ກລ຺ຍາຓວາກ຺ກຣໂຓ, ສມ຺ມາສມ຺ພຸທ຺ຘສາວໂກ;

ໂສໂຓ ອຠາສິ ສທ຺ຘມ຺ມໍ, ພຸທ຺ຘເສຏ຺ຐສ຺ສ ສມ຺ມຸຂາ.

໓໖໙. ‘‘ປຎ຺ຈກ຺ຂນ຺ເຘ ປຣິຎ຺ຎາຍ, ຠາວຍິຕ຺ວານ ອຎ຺ຊສໍ;

ປປ຺ປຸຍ຺ຍ ປຣມໍ ສນ຺ຕິໍ, ປຣິນິພ຺ພິສ຺ສຕ຺ຍນາສໂວ’’ຕິ.

… ໂສໂຓ ກຸຏິກຓ຺ຓເຖໂຣ….

໑໒. ໂກສິຍຕ຺ເຖຣຄາຖາ

໓໗໐. ‘‘ໂຍ ເວ ຄຣູນໍ ວຈນຎ຺ຎຸ ຘີໂຣ, ວເສ ຈ ຕມ຺ຫິ ຊນເຍຖ ເປມໍ;

ໂສ ຠຕ຺ຕິມາ ນາມ ຈ ໂຫຕິ ປຓ຺ຑິໂຕ, ຎຕ຺ວາ ຈ ຘມ຺ເມສຸ ວິເສສິ ອສ຺ສ.

໓໗໑. ‘‘ຍໍ ອາປທາ ອຸປ຺ປຕິຕາ ອຸຬາຣາ, ນກ຺ຂມ຺ຠຍນ຺ເຕ ປຏິສງ຺ຂຍນ຺ຕໍ;

ໂສ ຖາມວາ ນາມ ຈ ໂຫຕິ ປຓ຺ຑິໂຕ, ຎຕ຺ວາ ຈ ຘມ຺ເມສຸ ວິເສສິ ອສ຺ສ.

໓໗໒. ‘‘ໂຍ ເວ ສມຸທ຺ໂທວ ຐິໂຕ ອເນໂຊ, ຄມ຺ຠີຣປຎ຺ໂຎ ນິປຸຓຕ຺ຖທສ຺ສີ;

ອສໍຫາຣິໂຍ ນາມ ຈ ໂຫຕິ ປຓ຺ຑິໂຕ, ຎຕ຺ວາ ຈ ຘມ຺ເມສຸ ວິເສສິ ອສ຺ສ.

໓໗໓. ‘‘ພຫຸສ຺ສຸໂຕ ຘມ຺ມຘໂຣ ຈ ໂຫຕິ, ຘມ຺ມສ຺ສ ໂຫຕິ ອນຸຘມ຺ມຈາຣີ;

ໂສ ຕາທິໂສ ນາມ ຈ ໂຫຕິ ປຓ຺ຑິໂຕ, ຎຕ຺ວາ ຈ ຘມ຺ເມສຸ ວິເສສິ ອສ຺ສ.

໓໗໔. ‘‘ອຕ຺ຖຎ຺ຈ ໂຍ ຊານາຕິ ຠາສິຕສ຺ສ, ອຕ຺ຖຎ຺ຈ ຎຕ຺ວານ ຕຖາ ກໂຣຕິ;

ອຕ຺ຖນ຺ຕໂຣ ນາມ ສ ໂຫຕິ ປຓ຺ຑິໂຕ, ຎຕ຺ວາ ຈ ຘມ຺ເມສຸ ວິເສສິ ອສ຺ສາ’’ຕິ.

… ໂກສິໂຍ ເຖໂຣ….

ປຎ຺ຈກນິປາໂຕ ນິຏ຺ຐິໂຕ.