໑. ວງ຺ຄີສຕ຺ເຖຣຄາຖາ

໑໒໑໘. ‘‘ນິກ຺ຂນ຺ຕໍ ວຕ ມໍ ສນ຺ຕໍ, ອຄາຣສ຺ມານຄາຣິຍໍ;

ວິຕກ຺ກາ ອຸປຘາວນ຺ຕິ, ປຄພ຺ຠາ ກຓ຺ຫໂຕ ອິເມ.

໑໒໑໙. ‘‘ອຸຄ຺ຄປຸຕ຺ຕາ ມຫິສ຺ສາສາ, ສິກ຺ຂິຕາ ທຬ຺ຫຘມ຺ມິໂນ [ທຬ຺ຫຘນ຺ວິໂນ (ສີ. ອຏ຺ຐ.)];

ສມນ຺ຕາ ປຣິກິເຣຍ຺ຍຸໍ, ສຫສ຺ສໍ ອປລາຍິນໍ.

໑໒໒໐. ‘‘ສເຈປິ ເອຕ຺ຕກາ [ເອຕໂຕ (ສໍ. ນິ. ໑.໒໐໙)] ຠິຍ຺ໂຍ, ອາຄມິສ຺ສນ຺ຕິ ອິຕ຺ຖິໂຍ;

ເນວ ມໍ ພ຺ຍາຘຍິສ຺ສນ຺ຕິ [ພ຺ຍາຖຍິສ຺ສນ຺ຕິ (?)], ຘມ຺ເມ ສມ຺ຫິ [ຘມ຺ເມສ຺ວມ຺ຫິ (ສ຺ຍາ. ກ.)] ປຕິຏ຺ຐິໂຕ.

໑໒໒໑. ‘‘ສກ຺ຂີ ຫິ ເມ ສຸຕໍ ເອຕໍ, ພຸທ຺ຘສ຺ສາທິຈ຺ຈພນ຺ຘຸໂນ;

ນິພ຺ພານຄມນໍ ມຄ຺ຄໍ, ຕຕ຺ຖ ເມ ນິຣໂຕ ມໂນ.

໑໒໒໒. ‘‘ເອວໍ ເຈ ມໍ ວິຫຣນ຺ຕໍ, ປາປິມ ອຸປຄຈ຺ຉສິ;

ຕຖາ ມຈ຺ຈຸ ກຣິສ຺ສາມິ, ນ ເມ ມຄ຺ຄມ຺ປິ ທກ຺ຂສິ.

໑໒໒໓. ‘‘ອຣຕິຎ຺ຈ [ອຣຕິໍ (ພຫູສຸ)] ຣຕິຎ຺ຈ ປຫາຍ, ສພ຺ພໂສ ເຄຫສິຕຎ຺ຈ ວິຕກ຺ກໍ;

ວນຖໍ ນ ກເຣຍ຺ຍ ກຸຫິຎ຺ຈິ, ນິພ຺ພນໂຖ ອວນໂຖ ສ [ນິພ຺ພນໂຖ ອຣໂຕ ສ ຫິ (ສໍ. ນິ. ໑.໒໑໐)] ຠິກ຺ຂຸ.

໑໒໒໔. ‘‘ຍມິຘ ປຖວິຎ຺ຈ ເວຫາສໍ, ຣູປຄຕໍ ຊຄໂຕຄຘໍ ກິຎ຺ຈິ;

ປຣິຊີຍຕິ ສພ຺ພມນິຈ຺ຈໍ, ເອວໍ ສເມຈ຺ຈ ຈຣນ຺ຕິ ມຸຕຕ຺ຕາ.

໑໒໒໕. ‘‘ອຸປຘີສຸ ຊນາ ຄຘິຕາເສ, ທິຏ຺ຐສຸເຕ [ທິຏ຺ເຐ ສຸເຕ (ສີ.)] ປຏິເຆ ຈ ມຸເຕ ຈ;

ເອຕ຺ຖ ວິໂນທຍ ຉນ຺ທມເນໂຊ, ໂຍ ເຫຕ຺ຖ ນ ລິມ຺ປຕິ ມຸນິ ຕມາຫຸ [ຕໍ ມຸນິມາຫຸ (ສໍ. ນິ. ໑.໒໑໐)].

໑໒໒໖. ‘‘ອຖ ສຏ຺ຐິສິຕາ ສວິຕກ຺ກາ, ປຸຖຸຊ຺ຊນຕາຍ [ປຸຖູ ຊນຕາຍ (ສໍ. ນິ. ໑.໒໑໐)] ອຘມ຺ມາ ນິວິຏ຺ຐາ;

ນ ຈ ວຄ຺ຄຄຕສ຺ສ ກຸຫິຎ຺ຈິ, ໂນ ປນ ທຸຏ຺ຐຸລ຺ລຄາຫີ [ທຸຏ຺ຐຸລ຺ລຠາຓີ (ສໍ. ນິ. ໑.໒໑໐)] ສ ຠິກ຺ຂຸ.

໑໒໒໗. ‘‘ທພ຺ໂພ ຈິຣຣຕ຺ຕສມາຫິໂຕ, ອກຸຫໂກ ນິປໂກ ອປິຫາລຸ;

ສນ຺ຕໍ ປທໍ ອຊ຺ຌຄມາ ມຸນິ, ປຏິຈ຺ຈ ປຣິນິພ຺ພຸໂຕ ກງ຺ຂຕິ ກາລໍ.

໑໒໒໘. ‘‘ມານໍ ປຊຫສ຺ສຸ ໂຄຕມ, ມານປຖຎ຺ຈ ຊຫສ຺ສຸ ອເສສໍ;

ມານປຖມ຺ຫິ ສ ມຸຈ຺ຉິໂຕ, ວິປ຺ປຏິສາຣີຫຸວາ ຈິຣຣຕ຺ຕໍ.

໑໒໒໙. ‘‘ມກ຺ເຂນ ມກ຺ຂິຕາ ປຊາ, ມານຫຕາ ນິຣຍໍ ປປຕນ຺ຕິ;

ໂສຈນ຺ຕິ ຊນາ ຈິຣຣຕ຺ຕໍ, ມານຫຕາ ນິຣຍໍ ອຸປປນ຺ນາ.

໑໒໓໐. ‘‘ນ ຫິ ໂສຈຕິ ຠິກ຺ຂຸ ກທາຈິ, ມຄ຺ຄຊິໂນ ສມ຺ມາ ປຏິປນ຺ໂນ;

ກິຕ຺ຕິຎ຺ຈ ສຸຂຎ຺ຈານຸໂຠຕິ, ຘມ຺ມທໂສຕິ ຕມາຫຸ ຕຖຕ຺ຕໍ.

໑໒໓໑. ‘‘ຕສ຺ມາ ອຂິໂລ ອິຘ [ອຂິໂລ (ສີ.), ອຂິໂລຘ (ສໍ. ນິ. ໑.໒໑໑)] ປຘານວາ, ນີວຣຓານິ ປຫາຍ ວິສຸທ຺ໂຘ;

ມານຎ຺ຈ ປຫາຍ ອເສສໍ, ວິຊ຺ຊາຍນ຺ຕກໂຣ ສມິຕາວີ.

໑໒໓໒. ‘‘ກາມຣາເຄນ ຑຍ຺ຫາມິ, ຈິຕ຺ຕໍ ເມ ປຣິຑຍ຺ຫຕິ;

ສາຘຸ ນິພ຺ພາປນໍ ພ຺ຣູຫິ, ອນຸກມ຺ປາຍ ໂຄຕມ.

໑໒໓໓. ‘‘ສຎ຺ຎາຍ ວິປຣິເຍສາ, ຈິຕ຺ຕໍ ເຕ ປຣິຑຍ຺ຫຕິ;

ນິມິຕ຺ຕໍ ປຣິວຊ຺ເຊຫິ, ສຸຠໍ ຣາຄູປສໍຫິຕໍ ( ) [(ສງ຺ຂາເຣ ປຣໂຕ ປສ຺ສ, ທຸກ຺ຂໂຕ ມາ ຈ ອຕ຺ຕໂຕ; ນິພ຺ພາເປຫິ ມຫາຣາຄໍ, ມາ ທຍ຺ຫິຕ຺ໂຖ ປຸນປ຺ປຸນໍ;) (ສີ. ສໍ. ນິ. ໑.໒໑໒) ອຸທ຺ທານຄາຖາຍໍ ເອກສຕ຺ຕຕີຕິສງ຺ຂ຺ຍາ ຈ, ເຖຣຄາຖາຏ຺ຐກຖາ ຈ ປສ຺ສິຕພ຺ພາ].

໑໒໓໔. ‘‘ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ;

ສຕິ ກາຍຄຕາ ຕ຺ຍຕ຺ຖຸ, ນິພ຺ພິທາພຫຸໂລ ຠວ.

໑໒໓໕. ‘‘ອນິມິຕ຺ຕຎ຺ຈ ຠາເວຫິ, ມານານຸສຍມຸຊ຺ຊຫ;

ຕໂຕ ມານາຠິສມຍາ, ອຸປສນ຺ໂຕ ຈຣິສ຺ສສິ.

໑໒໓໖. ‘‘ຕເມວ ວາຈໍ ຠາເສຍ຺ຍ, ຍາຍຕ຺ຕານໍ ນ ຕາປເຍ;

ປເຣ ຈ ນ ວິຫິໍເສຍ຺ຍ, ສາ ເວ ວາຈາ ສຸຠາສິຕາ.

໑໒໓໗. ‘‘ປິຍວາຈເມວ ຠາເສຍ຺ຍ, ຍາ ວາຈາ ປຏິນນ຺ທິຕາ;

ຍໍ ອນາທາຍ ປາປານິ, ປເຣສໍ ຠາສເຕ ປິຍໍ.

໑໒໓໘. ‘‘ສຈ຺ຈໍ ເວ ອມຕາ ວາຈາ, ເອສ ຘມ຺ໂມ ສນນ຺ຕໂນ;

ສຈ຺ເຈ ອຕ຺ເຖ ຈ ຘມ຺ເມ ຈ, ອາຫຸ ສນ຺ໂຕ ປຕິຏ຺ຐິຕາ.

໑໒໓໙. ‘‘ຍໍ ພຸທ຺ໂຘ ຠາສຕິ ວາຈໍ, ເຂມໍ ນິພ຺ພານປຕ຺ຕິຍາ;

ທຸກ຺ຂສ຺ສນ຺ຕກິຣິຍາຍ, ສາ ເວ ວາຈານມຸຕ຺ຕມາ.

໑໒໔໐. ‘‘ຄມ຺ຠີຣປຎ຺ໂຎ ເມຘາວີ, ມຄ຺ຄາມຄ຺ຄສ຺ສ ໂກວິໂທ;

ສາຣິປຸຕ຺ໂຕ ມຫາປຎ຺ໂຎ, ຘມ຺ມໍ ເທເສຕິ ຠິກ຺ຂຸນໍ.

໑໒໔໑. ‘‘ສງ຺ຂິຕ຺ເຕນປິ ເທເສຕິ, ວິຕ຺ຖາເຣນປິ ຠາສຕິ;

ສາລິກາຍິວ ນິຄ຺ໂຆໂສ, ປຏິຠານໍ ອຸທິຍ຺ຍຕິ [ອຸທີຣຍິ (ສີ.), ອຸທີຍ຺ຍຕິ (ສ຺ຍາ.), ອຸທຍ຺ຍຕິ (?) ອຸຏ຺ຐຫຕີຕິ ຕໍສໍວຓ຺ຓນາ].

໑໒໔໒. ‘‘ຕສ຺ສ ຕໍ ເທສຍນ຺ຕສ຺ສ, ສຸຓນ຺ຕິ ມຘຸຣໍ ຄິຣໍ;

ສເຣນ ຣຊນີເຍນ, ສວນີເຍນ ວຄ຺ຄຸນາ;

ອຸທຄ຺ຄຈິຕ຺ຕາ ມຸທິຕາ, ໂສຕໍ ໂອເຘນ຺ຕິ ຠິກ຺ຂໂວ.

໑໒໔໓. ‘‘ອຊ຺ຊ ປນ຺ນຣເສ ວິສຸທ຺ຘິຍາ, ຠິກ຺ຂູ ປຎ຺ຈສຕາ ສມາຄຕາ;

ສໍໂຍຊນພນ຺ຘນຈ຺ຉິທາ, ອນີຆາ ຂີຓປຸນພ຺ຠວາ ອິສີ.

໑໒໔໔. ‘‘ຈກ຺ກວຕ຺ຕີ ຍຖາ ຣາຊາ, ອມຈ຺ຈປຣິວາຣິໂຕ;

ສມນ຺ຕາ ອນຸປຣິເຍຕິ, ສາຄຣນ຺ຕໍ ມຫິໍ ອິມໍ.

໑໒໔໕. ‘‘ເອວໍ ວິຊິຕສງ຺ຄາມໍ, ສຕ຺ຖວາຫໍ ອນຸຕ຺ຕຣໍ;

ສາວກາ ປຍິຣຸປາສນ຺ຕິ, ເຕວິຊ຺ຊາ ມຈ຺ຈຸຫາຍິໂນ.

໑໒໔໖. ‘‘ສພ຺ເພ ຠຄວໂຕ ປຸຕ຺ຕາ, ປລາເປຕ຺ຖ ນ ວິຊ຺ຊຕິ;

ຕຓ຺ຫາສລ຺ລສ຺ສ ຫນ຺ຕາຣໍ, ວນ຺ເທ ອາທິຈ຺ຈພນ຺ຘຸນໍ.

໑໒໔໗. ‘‘ປໂຣສຫສ຺ສໍ ຠິກ຺ຂູນໍ, ສຸຄຕໍ ປຍິຣຸປາສຕິ;

ເທເສນ຺ຕໍ ວິຣຊໍ ຘມ຺ມໍ, ນິພ຺ພານໍ ອກຸໂຕຠຍໍ.

໑໒໔໘. ‘‘ສຸຓນ຺ຕິ ຘມ຺ມໍ ວິມລໍ, ສມ຺ມາສມ຺ພຸທ຺ຘເທສິຕໍ;

ໂສຠຕິ ວຕ ສມ຺ພຸທ຺ໂຘ, ຠິກ຺ຂຸສງ຺ຆປຸຣກ຺ຂໂຕ.

໑໒໔໙. ‘‘‘ນາຄນາໂມ’ສິ ຠຄວາ, ອິສີນໍ ອິສິສຕ຺ຕໂມ;

ມຫາເມໂຆວ ຫຸຕ຺ວານ, ສາວເກ ອຠິວສ຺ສສິ.

໑໒໕໐. ‘‘ທິວາ ວິຫາຣາ ນິກ຺ຂມ຺ມ, ສຕ຺ຖຸທສ຺ສນກມ຺ຍຕາ;

ສາວໂກ ເຕ ມຫາວີຣ, ປາເທ ວນ຺ທຕິ ວງ຺ຄິໂສ.

໑໒໕໑. ‘‘ອຸມ຺ມຄ຺ຄປຖໍ ມາຣສ຺ສ, ອຠິຠຸຍ຺ຍ ຈຣຕິ ປຠິຊ຺ຊ ຂີລານິ;

ຕໍ ປສ຺ສຖ ພນ຺ຘປມຸຎ຺ຈກຣໍ, ອສິຕໍວ ຠາຄໂສ ປວິຠຊ຺ຊ.

໑໒໕໒. ‘‘ໂອຆສ຺ສ ຫິ ນິຕຣຓຕ຺ຖໍ, ອເນກວິຫິຕໍ ມຄ຺ຄໍ ອກ຺ຂາສິ;

ຕສ຺ມິຎ຺ຈ ອມເຕ ອກ຺ຂາເຕ, ຘມ຺ມທສາ ຐິຕາ ອສໍຫີຣາ.

໑໒໕໓. ‘‘ປຊ຺ໂຊຕກໂຣ ອຕິວິຊ຺ຌ [ອຕິວິຊ຺ຌ ຘມ຺ມໍ (ສີ.)], ສພ຺ພຐິຕີນໍ ອຕິກ຺ກມມທ຺ທສ [ອຕິກ຺ກມມທ຺ທ (ສີ. ກ.)];

ຎຕ຺ວາ ຈ ສຈ຺ຉິກຕ຺ວາ ຈ, ອຄ຺ຄໍ ໂສ ເທສຍິ ທສທ຺ຘານໍ.

໑໒໕໔. ‘‘ເອວໍ ສຸເທສິເຕ ຘມ຺ເມ, ໂກ ປມາໂທ ວິຊານຕໍ ຘມ຺ມໍ;

ຕສ຺ມາ ຫິ ຕສ຺ສ ຠຄວໂຕ ສາສເນ, ອປ຺ປມຕ຺ໂຕ ສທາ ນມສ຺ສມນຸສິກ຺ເຂ.

໑໒໕໕. ‘‘ພຸທ຺ຘານຸພຸທ຺ໂຘ ໂຍ ເຖໂຣ, ໂກຓ຺ຑຎ຺ໂຎ ຕິພ຺ພນິກ຺ກໂມ;

ລາຠີ ສຸຂວິຫາຣານໍ, ວິເວການໍ ອຠິຓ຺ຫໂສ.

໑໒໕໖. ‘‘ຍໍ ສາວເກນ ປຕ຺ຕພ຺ພໍ, ສຕ຺ຖຸ ສາສນກາຣິນາ;

ສພ຺ພສ຺ສ ຕໍ ອນຸປ຺ປຕ຺ຕໍ, ອປ຺ປມຕ຺ຕສ຺ສ ສິກ຺ຂໂຕ.

໑໒໕໗. ‘‘ມຫານຸຠາໂວ ເຕວິຊ຺ໂຊ, ເຈໂຕປຣິຍໂກວິໂທ;

ໂກຓ຺ຑຎ຺ໂຎ ພຸທ຺ຘທາຍາໂທ, ປາເທ ວນ຺ທຕິ ສຕ຺ຖຸໂນ.

໑໒໕໘. ‘‘ນຄສ຺ສ ປສ຺ເສ ອາສີນໍ, ມຸນິໍ ທຸກ຺ຂສ຺ສ ປາຣຄຸໍ;

ສາວກາ ປຍິຣຸປາສນ຺ຕິ, ເຕວິຊ຺ຊາ ມຈ຺ຈຸຫາຍິໂນ.

໑໒໕໙. ‘‘ເຈຕສາ [ເຕ ເຈຕສາ (ສໍ. ນິ. ໑.໒໑໘)] ອນຸປຣິເຍຕິ, ໂມຄ຺ຄລ຺ລາໂນ ມຫິທ຺ຘິໂກ;

ຈິຕ຺ຕໍ ເນສໍ ສມນ຺ເວສໍ [ສມນ຺ເນສໍ (ສໍ. ນິ. ໑.໒໑໘)], ວິປ຺ປມຸຕ຺ຕໍ ນິຣູປຘິໍ.

໑໒໖໐. ‘‘ເອວໍ ສພ຺ພງ຺ຄສມ຺ປນ຺ນໍ, ມຸນິໍ ທຸກ຺ຂສ຺ສ ປາຣຄຸໍ;

ອເນກາກາຣສມ຺ປນ຺ນໍ, ປຍິຣຸປາສນ຺ຕິ ໂຄຕມໍ.

໑໒໖໑. ‘‘ຈນ຺ໂທ ຍຖາ ວິຄຕວລາຫເກ ນເຠ, ວິໂຣຈຕິ ວີຕມໂລວ ຠາຓຸມາ;

ເອວມ຺ປິ ອງ຺ຄີຣສ ຕ຺ວໍ ມຫາມຸນິ, ອຕິໂຣຈສິ ຍສສາ ສພ຺ພໂລກໍ.

໑໒໖໒. ‘‘ກາເວຍ຺ຍມຕ຺ຕາ ວິຈຣິມ຺ຫ ປຸພ຺ເພ, ຄາມາ ຄາມໍ ປຸຣາ ປຸຣໍ;

ອຖທ຺ທສາມ ສມ຺ພຸທ຺ຘໍ, ສພ຺ພຘມ຺ມານ ປາຣຄຸໍ.

໑໒໖໓. ‘‘ໂສ ເມ ຘມ຺ມມເທເສສິ, ມຸນິ ທຸກ຺ຂສ຺ສ ປາຣຄູ;

ຘມ຺ມໍ ສຸຕ຺ວາ ປສີທິມ຺ຫ, ສທ຺ຘາ [ອທ຺ຘາ (ສີ. ອຏ຺ຐ.)] ໂນ ອຸທປຊ຺ຊຖ.

໑໒໖໔. ‘‘ຕສ຺ສາຫໍ ວຈນໍ ສຸຕ຺ວາ, ຂນ຺ເຘ ອາຍຕນານິ ຈ;

ຘາຕຸໂຍ ຈ ວິທິຕ຺ວານ, ປພ຺ພຊິໍ ອນຄາຣິຍໍ.

໑໒໖໕. ‘‘ພຫູນໍ ວຕ ອຕ຺ຖາຍ, ອຸປ຺ປຊ຺ຊນ຺ຕິ ຕຖາຄຕາ;

ອິຕ຺ຖີນໍ ປຸຣິສານຎ຺ຈ, ເຍ ເຕ ສາສນກາຣກາ.

໑໒໖໖. ‘‘ເຕສໍ ໂຂ ວຕ ອຕ຺ຖາຍ, ໂພຘິມຊ຺ຌຄມາ ມຸນິ;

ຠິກ຺ຂູນໍ ຠິກ຺ຂຸນີນຎ຺ຈ, ເຍ ນິຣາມຄຕທ຺ທສາ.

໑໒໖໗. ‘‘ສຸເທສິຕາ ຈກ຺ຂຸມຕາ, ພຸທ຺ເຘນາທິຈ຺ຈພນ຺ຘຸນາ;

ຈຕ຺ຕາຣິ ອຣິຍສຈ຺ຈານິ, ອນຸກມ຺ປາຍ ປາຓິນໍ.

໑໒໖໘. ‘‘ທຸກ຺ຂໍ ທຸກ຺ຂສມຸປ຺ປາທໍ, ທຸກ຺ຂສ຺ສ ຈ ອຕິກ຺ກມໍ;

ອຣິຍໍ ຈຏ຺ຐງ຺ຄິກໍ ມຄ຺ຄໍ, ທຸກ຺ຂູປສມຄາມິນໍ.

໑໒໖໙. ‘‘ເອວເມເຕ ຕຖາ ວຸຕ຺ຕາ, ທິຏ຺ຐາ ເມ ເຕ ຍຖາ ຕຖາ;

ສທຕ຺ໂຖ ເມ ອນຸປ຺ປຕ຺ໂຕ, ກຕໍ ພຸທ຺ຘສ຺ສ ສາສນໍ.

໑໒໗໐. ‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ ສນ຺ຕິເກ;

ສຸວິຠຕ຺ເຕສຸ [ສວິຠຕ຺ເຕສຸ (ສີ. ກ.)] ຘມ຺ເມສຸ, ຍໍ ເສຏ຺ຐໍ ຕທຸປາຄມິໍ.

໑໒໗໑. ‘‘ອຠິຎ຺ຎາປາຣມິປ຺ປຕ຺ໂຕ, ໂສຕຘາຕຸ ວິໂສຘິຕາ;

ເຕວິຊ຺ໂຊ ອິທ຺ຘິປຕ຺ໂຕມ຺ຫິ, ເຈໂຕປຣິຍໂກວິໂທ.

໑໒໗໒. ‘‘ປຸຈ຺ຉາມິ ສຕ຺ຖາຣມໂນມປຎ຺ຎໍ, ທິຏ຺ເຐວ ຘມ຺ເມ ໂຍ ວິຈິກິຈ຺ຉານໍ ເຉຕ຺ຕາ;

ອຄ຺ຄາຬເວ ກາລມກາສິ ຠິກ຺ຂຸ, ຎາໂຕ ຍສສ຺ສີ ອຠິນິພ຺ພຸຕຕ຺ໂຕ.

໑໒໗໓. ‘‘ນິຄ຺ໂຣຘກປ຺ໂປ ອິຕິ ຕສ຺ສ ນາມໍ, ຕຍາ ກຕໍ ຠຄວາ ພ຺ຣາຫ຺ມຓສ຺ສ;

ໂສ ຕໍ ນມສ຺ສໍ ອຈຣິ ມຸຕ຺ຍເປໂຂ, ອາຣທ຺ຘວີຣິໂຍ ທຬ຺ຫຘມ຺ມທສ຺ສີ.

໑໒໗໔. ‘‘ຕໍ ສາວກໍ ສກ຺ກ ມຍມ຺ປິ ສພ຺ເພ, ອຎ຺ຎາຕຸມິຈ຺ຉາມ ສມນ຺ຕຈກ຺ຂຸ;

ສມວຏ຺ຐິຕາ ໂນ ສວນາຍ ໂສຕາ [ເຫຕຸໍ (ສີ. ສ຺ຍາ.) ສຸຕ຺ຕນິປາຕຏ຺ຐກຖາ ປສ຺ສິຕພ຺ພາ], ຕຸວໍ ໂນ ສຕ຺ຖາ ຕ຺ວມນຸຕ຺ຕໂຣສິ’’.

໑໒໗໕. ຉິນ຺ທ ໂນ ວິຈິກິຈ຺ຉໍ ພ຺ຣູຫິ ເມຕໍ, ປຣິນິພ຺ພຸຕໍ ເວທຍ ຠູຣິປຎ຺ຎ;

ມຊ຺ເຌວ ໂນ ຠາສ ສມນ຺ຕຈກ຺ຂຸ, ສກ຺ໂກວ ເທວານ ສຫສ຺ສເນຕ຺ໂຕ.

໑໒໗໖. ‘‘ເຍ ເກຈິ ຄນ຺ຖາ ອິຘ ໂມຫມຄ຺ຄາ, ອຎ຺ຎາຓປກ຺ຂາ ວິຈິກິຈ຺ຉຐານາ;

ຕຖາຄຕໍ ປຕ຺ວາ ນ ເຕ ຠວນ຺ຕິ, ຈກ຺ຂຸຎ຺ຫິ ເອຕໍ ປຣມໍ ນຣານໍ.

໑໒໗໗. ‘‘ໂນ ເຈ ຫິ ຊາຕຸ ປຸຣິໂສ ກິເລເສ, ວາໂຕ ຍຖາ ອພ຺ຠຆນໍ ວິຫາເນ;

ຕໂມວສ຺ສ ນິວຸໂຕ ສພ຺ພໂລໂກ, ໂຊຕິມນ຺ໂຕປິ ນ ປຠາເສຍ຺ຍຸໍ [ນ ໂຊຕິມນ຺ໂຕປິ ນຣາ ຕເປຍ຺ຍຸໍ (ສຸ. ນິ. ໓໕໐)].

໑໒໗໘. ‘‘ຘີຣາ ຈ ປຊ຺ໂຊຕກຣາ ຠວນ຺ຕິ, ຕໍ ຕໍ ອຫໍ ວີຣ ຕເຖວ ມຎ຺ເຎ;

ວິປສ຺ສິນໍ ຊານມຸປາຄມິມ຺ຫ, ປຣິສາສຸ ໂນ ອາວິກໂຣຫິ ກປ຺ປໍ.

໑໒໗໙. ‘‘ຂິປ຺ປໍ ຄິຣໍ ເອຣຍ ວຄ຺ຄຸ ວຄ຺ຄຸໍ, ຫໍໂສວ ປຄ຺ຄຍ຺ຫ ສຓິກໍ ນິກູຊ;

ພິນ຺ທຸສ຺ສເຣນ ສຸວິກປ຺ປິເຕນ, ສພ຺ເພວ ເຕ ອຸຊ຺ຊຸຄຕາ ສຸໂຓມ.

໑໒໘໐. ‘‘ປຫີນຊາຕິມຣຓໍ ອເສສໍ, ນິຄ຺ຄຍ຺ຫ ໂຘນໍ ວເທສ຺ສາມິ [ປຏິເວທິຍາມິ (ສີ. ກ.)] ຘມ຺ມໍ;

ນ ກາມກາໂຣ ຫິ [ໂຫຕິ (ສີ. ກ.)] ປຸຖຸຊ຺ຊນານໍ, ສງ຺ເຂຍ຺ຍກາໂຣ ຈ [ວ (ພຫູສຸ)] ຕຖາຄຕານໍ.

໑໒໘໑. ‘‘ສມ຺ປນ຺ນເວຍ຺ຍາກຣຓໍ ຕເວທໍ, ສມຸຊ຺ຊຸປຎ຺ຎສ຺ສ ສມຸຄ຺ຄຫີຕໍ;

ອຍມຎ຺ຊລິ ປຈ຺ຉິໂມ ສຸປ຺ປຓາມິໂຕ, ມາ ໂມຫຍີ ຊານມໂນມປຎ຺ຎ.

໑໒໘໒. ‘‘ປໂຣປຣໍ ອຣິຍຘມ຺ມໍ ວິທິຕ຺ວາ, ມາ ໂມຫຍີ ຊານມໂນມວີຣິຍ;

ວາຣິໍ ຍຖາ ຆມ຺ມນິ ຆມ຺ມຕຕ຺ໂຕ, ວາຈາຠິກງ຺ຂາມິ ສຸຕໍ ປວສ຺ສ.

໑໒໘໓. ‘‘ຍທຕ຺ຖິກໍ ພ຺ຣຫ຺ມຈຣິຍໍ ອຈຣີ, ກປ຺ປາຍໂນ ກຈ຺ຈິສ຺ສຕໍ ອໂມຆໍ;

ນິພ຺ພາຍິ ໂສ ອາທຸ ສອຸປາທິເສໂສ [ອນຸປາທິເສສາ (ສີ.), ອນຸປາທິເສໂສ (ກ.)], ຍຖາ ວິມຸຕ຺ໂຕ ອຫຸ ຕໍ ສຸໂຓມ.

໑໒໘໔. ‘‘‘ອຈ຺ເຉຈ຺ຉິ ຕຓ຺ຫໍ ອິຘ ນາມຣູເປ,

(ອິຕິ ຠຄວາ) ກຓ຺ຫສ຺ສ ໂສຕໍ ທີຆຣຕ຺ຕານຸສຍິຕໍ;

ອຕາຣິ ຊາຕິໍ ມຣຓໍ ອເສສໍ’, ອິຈ຺ຈພ຺ຣວິ ຠຄວາ ປຎ຺ຈເສຏ຺ໂຐ.

໑໒໘໕. ‘‘ເອສ ສຸຕ຺ວາ ປສີທາມິ, ວໂຈ ເຕ ອິສິສຕ຺ຕມ;

ອໂມຆໍ ກິຣ ເມ ປຸຏ຺ຐໍ, ນ ມໍ ວຎ຺ເຈສິ ພ຺ຣາຫ຺ມໂຓ.

໑໒໘໖. ‘‘ຍຖາ ວາທີ ຕຖາ ກາຣີ, ອຫຸ ພຸທ຺ຘສ຺ສ ສາວໂກ;

ອຈ຺ເຉຈ຺ຉິ ມຈ຺ຈຸໂນ ຊາລໍ, ຕຕໍ ມາຍາວິໂນ ທຬ຺ຫໍ.

໑໒໘໗. ‘‘ອທ຺ທສ ຠຄວາ ອາທິໍ, ອຸປາທານສ຺ສ ກປ຺ປິໂຍ;

ອຈ຺ຈຄາ ວຕ ກປ຺ປາໂນ, ມຈ຺ຈຸເຘຍ຺ຍໍ ສຸທຸຕ຺ຕຣໍ.

໑໒໘໘. ‘‘ຕໍ ເທວເທວໍ ວນ຺ທາມິ, ປຸຕ຺ຕໍ ເຕ ທ຺ວິປທຸຕ຺ຕມ;

ອນຸຊາຕໍ ມຫາວີຣໍ, ນາຄໍ ນາຄສ຺ສ ໂອຣສ’’ນ຺ຕິ.

ອິຕ຺ຖໍ ສຸທໍ ອາຍສ຺ມາ ວງ຺ຄີໂສ ເຖໂຣ ຄາຖາໂຍ

ອຠາສິຕ຺ຖາຕິ.

ມຫານິປາໂຕ ນິຏ຺ຐິໂຕ.