໘. ອງ຺ຄຸລິມາລຕ຺ເຖຣຄາຖາ

໘໖໖. ‘‘ຄຈ຺ຉໍ ວເທສິ ສມຓ ‘ຏ຺ຐິໂຕມ຺ຫິ’, ມມຎ຺ຈ ພ຺ຣູສິ ຐິຕມຏ຺ຐິໂຕຕິ;

ປຸຈ຺ຉາມິ ຕໍ ສມຓ ເອຕມຕ຺ຖໍ, ‘ກຖໍ ຐິໂຕ ຕ຺ວໍ ອຫມຏ຺ຐິໂຕມ຺ຫິ’’’.

໘໖໗. ‘‘ຐິໂຕ ອຫໍ ອງ຺ຄຸລິມາລ ສພ຺ພທາ, ສພ຺ເພສຸ ຠູເຕສຸ ນິຘາຍ ທຓ຺ຑໍ;

ຕຸວຎ຺ຈ ປາເຓສຸ ອສຎ຺ຎໂຕສິ, ຕສ຺ມາ ຐິໂຕຫໍ ຕຸວມຏ຺ຐິໂຕສິ’’.

໘໖໘. ‘‘ຈິຣສ຺ສໍ ວຕ ເມ ມຫິໂຕ ມເຫສີ, ມຫາວນໍ ສມໂຓ ປຈ຺ຈປາທິ [ປຈ຺ຈຸປາທິ (ສພ຺ພຕ຺ຖ)];

ໂສຫໍ ຈຊິສ຺ສາມິ ສຫສ຺ສປາປໍ, ສຸຕ຺ວານ ຄາຖໍ ຕວ ຘມ຺ມຍຸຕ຺ຕໍ’’.

໘໖໙. ອິຈ຺ເຈວ ໂຈໂຣ ອສິມາວຸຘຎ຺ຈ, ໂສພ຺ເຠ ປປາເຕ ນຣເກ ອນ຺ວກາສິ [ອກິຣິ (ມ. ນິ. ໒.໓໔໙)];

ອວນ຺ທິ ໂຈໂຣ ສຸຄຕສ຺ສ ປາເທ, ຕຕ຺ເຖວ ປພ຺ພຊ຺ຊມຍາຈິ ພຸທ຺ຘໍ.

໘໗໐. ພຸທ຺ໂຘ ຈ ໂຂ ກາຣຸຓິໂກ ມເຫສິ, ໂຍ ສຕ຺ຖາ ໂລກສ຺ສ ສເທວກສ຺ສ;

‘ຕເມຫິ ຠິກ຺ຂູ’ຕິ ຕທາ ອໂວຈ, ເອເສວ ຕສ຺ສ ອຫຸ ຠິກ຺ຂຸຠາໂວ.

໘໗໑. ‘‘ໂຍ ຈ ປຸພ຺ເພ ປມຊ຺ຊິຕ຺ວາ, ປຈ຺ຉາ ໂສ ນປ຺ປມຊ຺ຊຕິ;

ໂສມໍ ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາ.

໘໗໒. ‘‘ຍສ຺ສ ປາປໍ ກຕໍ ກມ຺ມໍ, ກຸສເລນ ປິຘີຍຕິ [ປິຖີຍຕິ (ສີ. ສ຺ຍາ.)];

ໂສມໍ ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາ.

໘໗໓. ‘‘ໂຍ ຫເວ ທຫໂຣ ຠິກ຺ຂຸ, ຍຸຎ຺ຊຕິ ພຸທ຺ຘສາສເນ;

ໂສມໍ ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາ.

໘໗໔. [ທິສາ ຫິ (ສ຺ຍາ. ກ., ມ. ນິ. ໒.໓໕໒)] ‘‘ທິສາປິ ເມ ຘມ຺ມກຖໍ ສຸຓນ຺ຕຸ, ທິສາປິ ເມ ຍຸຎ຺ຊນ຺ຕຸ ພຸທ຺ຘສາສເນ;

ທິສາປິ ເມ ເຕ ມນຸເຊ ຠຊນ຺ຕຸ, ເຍ ຘມ຺ມເມວາທປຍນ຺ຕິ ສນ຺ໂຕ.

໘໗໕. ‘‘ທິສາ ຫິ ເມ ຂນ຺ຕິວາທານໍ, ອວິໂຣຘປ຺ປສໍສິນໍ;

ສຸຓນ຺ຕຸ ຘມ຺ມໍ ກາເລນ, ຕຎ຺ຈ ອນຸວິຘີຍນ຺ຕຸ.

໘໗໖. ‘‘ນ ຫິ ຊາຕຸ ໂສ ມມໍ ຫິໍເສ, ອຎ຺ຎໍ ວາ ປນ ກິຎ຺ຈນໍ [ກຎ຺ຈິນໍ (ສີ. ສ຺ຍາ.), ກຎ຺ຈນໍ (?)];

ປປ຺ປຸຍ຺ຍ ປຣມໍ ສນ຺ຕິໍ, ຣກ຺ເຂຍ຺ຍ ຕສຖາວເຣ.

໘໗໗. [ເຖຣຄາ. ໑໙] ‘‘ອຸທກຎ຺ຫິ ນຍນ຺ຕິ ເນຕ຺ຕິກາ, ອຸສຸກາຣາ ນມຍນ຺ຕິ [ທມຍນ຺ຕິ (ກ.)] ເຕຊນໍ;

ທາຣຸໍ ນມຍນ຺ຕິ [ທມຍນ຺ຕິ (ກ.)] ຕຈ຺ຉກາ, ອຕ຺ຕານໍ ທມຍນ຺ຕິ ປຓ຺ຑິຕາ.

໘໗໘. ‘‘ທຓ຺ເຑເນເກ ທມຍນ຺ຕິ, ອງ຺ກຸເສຠິ ກສາຫິ ຈ;

ອທຓ຺ເຑນ ອສຕ຺ເຖນ, ອຫໍ ທນ຺ໂຕມ຺ຫິ ຕາທິນາ.

໘໗໙. ‘‘‘ອຫິໍສໂກ’ຕິ ເມ ນາມໍ, ຫິໍສກສ຺ສ ປຸເຣ ສໂຕ;

ອຊ຺ຊາຫໍ ສຈ຺ຈນາໂມມ຺ຫິ, ນ ນໍ ຫິໍສາມິ ກິຎ຺ຈນໍ [ກຎ຺ຈິນໍ (ສີ. ສ຺ຍາ.), ກຎ຺ຈນໍ (?)].

໘໘໐. ‘‘ໂຈໂຣ ອຫໍ ປຸເຣ ອາສິໍ, ອງ຺ຄຸລິມາໂລຕິ ວິສ຺ສຸໂຕ;

ວຸຍ຺ຫມາໂນ ມໂຫເຆນ, ພຸທ຺ຘໍ ສຣຓມາຄມໍ.

໘໘໑. ‘‘ໂລຫິຕປາຓິ ປຸເຣ ອາສິໍ, ອງ຺ຄຸລິມາໂລຕິ ວິສ຺ສຸໂຕ;

ສຣຓຄມນໍ ປສ຺ສ, ຠວເນຕ຺ຕິ ສມູຫຕາ.

໘໘໒. ‘‘ຕາທິສໍ ກມ຺ມໍ ກຕ຺ວານ, ພຫຸໍ ທຸຄ຺ຄຕິຄາມິນໍ;

ຜຸຏ຺ໂຐ ກມ຺ມວິປາເກນ, ອນໂຓ ຠຸຎ຺ຊາມິ ໂຠຊນໍ.

໘໘໓. ‘‘ປມາທມນຸຍຸຎ຺ຊນ຺ຕິ, ພາລາ ທຸມ຺ເມຘິໂນ ຊນາ;

ອປ຺ປມາທຎ຺ຈ ເມຘາວີ, ຘນໍ ເສຏ຺ຐໍວ ຣກ຺ຂຕິ.

໘໘໔. ‘‘ມາ ປມາທມນຸຍຸຎ຺ເຊຖ, ມາ ກາມຣຕິສນ຺ຖວໍ [ສນ຺ຘວໍ (ກ.)];

ອປ຺ປມຕ຺ໂຕ ຫິ ຌາຍນ຺ໂຕ, ປປ຺ໂປຕິ ປຣມໍ ສຸຂໍ.

໘໘໕. ‘‘ສ຺ວາຄຕໍ ນາປຄຕໍ, ເນຕໍ ທຸມ຺ມນ຺ຕິຕໍ ມມ;

ສວິຠຕ຺ເຕສຸ ຘມ຺ເມສຸ, ຍໍ ເສຏ຺ຐໍ ຕທຸປາຄມໍ.

໘໘໖. ‘‘ສ຺ວາຄຕໍ ນາປຄຕໍ, ເນຕໍ ທຸມ຺ມນ຺ຕິຕໍ ມມ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໘໘໗. ‘‘ອຣຎ຺ເຎ ຣຸກ຺ຂມູເລ ວາ, ປພ຺ພເຕສຸ ຄຸຫາສຸ ວາ;

ຕຕ຺ຖ ຕຕ຺ເຖວ ອຏ຺ຐາສິໍ, ອຸພ຺ພິຄ຺ຄມນໂສ ຕທາ.

໘໘໘. ‘‘ສຸຂໍ ສຍາມິ ຐາຍາມິ, ສຸຂໍ ກປ຺ເປມິ ຊີວິຕໍ;

ອຫຕ຺ຖປາໂສ ມາຣສ຺ສ, ອໂຫ ສຕ຺ຖານຸກມ຺ປິໂຕ.

໘໘໙. ‘‘ພ຺ຣຫ຺ມຊຈ຺ໂຈ ປຸເຣ ອາສິໍ, ອຸທິຈ຺ໂຈ ອຸຠໂຕ ອຫຸ;

ໂສຊ຺ຊ ປຸຕ຺ໂຕ ສຸຄຕສ຺ສ, ຘມ຺ມຣາຊສ຺ສ ສຕ຺ຖຸໂນ.

໘໙໐. ‘‘ວີຕຕຓ຺ໂຫ ອນາທາໂນ, ຄຸຕ຺ຕທ຺ວາໂຣ ສຸສໍວຸໂຕ;

ອຆມູລໍ ວຘິຕ຺ວານ, ປຕ຺ໂຕ ເມ ອາສວກ຺ຂໂຍ.

໘໙໑. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ’’ຕິ.

… ອງ຺ຄຸລິມາໂລ ເຖໂຣ….