໓. ເຕລການິຕ຺ເຖຣຄາຖາ

໗໔໗. ‘‘ຈິຣຣຕ຺ຕໍ ວຕາຕາປີ, ຘມ຺ມໍ ອນຸວິຈິນ຺ຕຍໍ;

ສມໍ ຈິຕ຺ຕສ຺ສ ນາລຕ຺ຖໍ, ປຸຈ຺ຉໍ ສມຓພ຺ຣາຫ຺ມເຓ.

໗໔໘. ‘‘‘ໂກ ໂສ ປາຣງ຺ຄໂຕ ໂລເກ, ໂກ ປຕ຺ໂຕ ອມໂຕຄຘໍ;

ກສ຺ສ ຘມ຺ມໍ ປຏິຈ຺ຉາມິ, ປຣມຕ຺ຖວິຊານນໍ’.

໗໔໙. ‘‘ອນ຺ໂຕວງ຺ກຄໂຕ ອາສິ, ມຈ຺ໂຉວ ຆສມາມິສໍ;

ພທ຺ໂຘ ມຫິນ຺ທປາເສນ, ເວປຈິຕ຺ຍສຸໂຣ ຍຖາ.

໗໕໐. ‘‘ອຎ຺ຉາມິ ນໍ ນ ມຸຎ຺ຈາມິ, ອສ຺ມາ ໂສກປຣິທ຺ທວາ;

ໂກ ເມ ພນ຺ຘໍ ມຸຎ຺ຈໍ ໂລເກ, ສມ຺ໂພຘິໍ ເວທຍິສ຺ສຕິ.

໗໕໑. ‘‘ສມຓໍ ພ຺ຣາຫ຺ມຓໍ ວາ ກໍ, ອາທິສນ຺ຕໍ ປຠງ຺ຄຸນໍ.

ກສ຺ສ ຘມ຺ມໍ ປຏິຈ຺ຉາມິ, ຊຣາມຈ຺ຈຸປວາຫນໍ.

໗໕໒. ‘‘ວິຈິກິຈ຺ຉາກງ຺ຂາຄນ຺ຖິຕໍ, ສາຣມ຺ຠພລສຎ຺ຎຸຕໍ;

ໂກຘປ຺ປຕ຺ຕມນຕ຺ຖທ຺ຘໍ, ອຠິຊປ຺ປປ຺ປທາຣຓໍ.

໗໕໓. ‘‘ຕຓ຺ຫາຘນຸສມຸຏ຺ຐານໍ, ທ຺ເວ ຈ ປນ຺ນຣສາຍຸຕໍ [ທ຺ເວຘາປນ຺ນຣສາຍຸຕໍ (?)];

ປສ຺ສ ໂອຣສິກໍ ພາຬ຺ຫໍ, ເຠຕ຺ວານ ຍທິ [ຍທ (ສີ. ອຏ຺ຐ.) ຫທິ (?) ‘‘ຫທເຍ’’ຕິ ຕໍສໍວຓ຺ຓນາ] ຕິຏ຺ຐຕິ.

໗໕໔. ‘‘ອນຸທິຏ຺ຐີນໍ ອປ຺ປຫານໍ, ສງ຺ກປ຺ປປຣເຕຊິຕໍ;

ເຕນ ວິທ຺ໂຘ ປເວຘາມິ, ປຕ຺ຕໍວ ມາລຸເຕຣິຕໍ.

໗໕໕. ‘‘ອຊ຺ຌຕ຺ຕໍ ເມ ສມຸຏ຺ຐາຍ, ຂິປ຺ປໍ ປຈ຺ຈຕິ ມາມກໍ;

ຉຜສ຺ສາຍຕນີ ກາໂຍ, ຍຕ຺ຖ ສຣຕິ ສພ຺ພທາ.

໗໕໖. ‘‘ຕໍ ນ ປສ຺ສາມິ ເຕກິຈ຺ຉໍ, ໂຍ ເມຕໍ ສລ຺ລມຸທ຺ຘເຣ;

ນານາຣຊ຺ເຊນ ສຕ຺ເຖນ [ນາຣຄ຺ເຄນ ນ ສຕ຺ເຖນ (?)], ນາຎ຺ເຎນ ວິຈິກິຈ຺ຉິຕໍ.

໗໕໗. ‘‘ໂກ ເມ ອສຕ຺ໂຖ ອວໂຓ, ສລ຺ລມພ຺ຠນ຺ຕຣປສ຺ສຍໍ;

ອຫິໍສໍ ສພ຺ພຄຕ຺ຕານິ, ສລ຺ລໍ ເມ ອຸທ຺ຘຣິສ຺ສຕິ.

໗໕໘. ‘‘ຘມ຺ມປ຺ປຕິ ຫິ ໂສ ເສຏ຺ໂຐ, ວິສໂທສປ຺ປວາຫໂກ;

ຄມ຺ຠີເຣ ປຕິຕສ຺ສ ເມ, ຖລໍ ປາຓິຎ຺ຈ ທສ຺ສເຍ.

໗໕໙. ‘‘ຣຫເທຫມສ຺ມິ ໂອຄາຬ຺ໂຫ, ອຫາຣິຍຣຊມຕ຺ຕິເກ;

ມາຍາອຸສູຍສາຣມ຺ຠ, ຖິນມິທ຺ຘມປຕ຺ຖເຏ.

໗໖໐. ‘‘ອຸທ຺ຘຈ຺ຈເມຆຖນິຕໍ, ສໍໂຍຊນວລາຫກໍ;

ວາຫາ ວຫນ຺ຕິ ກຸທ຺ທິຏ຺ຐິໍ [ທຸທ຺ທິຏ຺ຐິໍ (ສີ. ຘ. ປ. ໓໓໙)], ສງ຺ກປ຺ປາ ຣາຄນິສ຺ສິຕາ.

໗໖໑. ‘‘ສວນ຺ຕິ ສພ຺ພຘິ ໂສຕາ, ລຕາ ອຸພ຺ຠິຊ຺ຊ ຕິຏ຺ຐຕິ;

ເຕ ໂສເຕ ໂກ ນິວາເຣຍ຺ຍ, ຕໍ ລຕໍ ໂກ ຫິ ເຉຈ຺ຉຕິ.

໗໖໒. ‘‘ເວລໍ ກໂຣຖ ຠທ຺ທນ຺ເຕ, ໂສຕານໍ ສນ຺ນິວາຣຓໍ;

ມາ ເຕ ມໂນມໂຍ ໂສໂຕ, ຣຸກ຺ຂໍວ ສຫສາ ລຸເວ.

໗໖໓. ‘‘ເອວໍ ເມ ຠຍຊາຕສ຺ສ, ອປາຣາ ປາຣເມສໂຕ;

ຕາໂຓ ປຎ຺ຎາວຸໂຘ ສຕ຺ຖາ, ອິສິສງ຺ຆນິເສວິໂຕ.

໗໖໔. ‘‘ໂສປາຓໍ ສຸຄຕໍ ສຸທ຺ຘໍ, ຘມ຺ມສາຣມຍໍ ທຬ຺ຫໍ;

ປາທາສິ ວຸຍ຺ຫມານສ຺ສ, ‘ມາ ຠາຍີ’ຕິ ຈ ມພ຺ຣວິ.

໗໖໕. ‘‘ສຕິປຏ຺ຐານປາສາທໍ, ອາຣຸຍ຺ຫ ປຈ຺ຈເວກ຺ຂິສໍ;

ຍໍ ຕໍ ປຸພ຺ເພ ອມຎ຺ຎິສ຺ສໍ, ສກ຺ກາຍາຠິຣຕໍ ປຊໍ.

໗໖໖. ‘‘ຍທາ ຈ ມຄ຺ຄມທ຺ທກ຺ຂິໍ, ນາວາຍ ອຠິຣູຫນໍ;

ອນຘິຏ຺ຐາຍ ອຕ຺ຕານໍ, ຕິຕ຺ຖມທ຺ທກ຺ຂິມຸຕ຺ຕມໍ.

໗໖໗. ‘‘ສລ຺ລໍ ອຕ຺ຕສມຸຏ຺ຐານໍ, ຠວເນຕ຺ຕິປ຺ປຠາວິຕໍ;

ເອເຕສໍ ອປ຺ປວຕ຺ຕາຍ [ອປ຺ປວຕ຺ຕິຍາ (?)], ເທເສສິ ມຄ຺ຄມຸຕ຺ຕມໍ.

໗໖໘. ‘‘ທີຆຣຕ຺ຕານຸສຍິຕໍ, ຈິຣຣຕ຺ຕມຘິຏ຺ຐິຕໍ;

ພຸທ຺ໂຘ ເມປານຸທີ ຄນ຺ຖໍ, ວິສໂທສປ຺ປວາຫໂນ’’ຕິ.

…ເຕລການິ ເຖໂຣ….