໑໓. ເຕຣສນິປາໂຕ

໑. ໂສຓໂກຬິວິສຕ຺ເຖຣຄາຖາ

໖໓໒. ‘‘ຍາຫຸ ຣຏ຺ເຐ ສມຸກ຺ກຏ຺ໂຐ, ຣຎ຺ໂຎ ອງ຺ຄສ຺ສ ປທ຺ຘຄູ [ປຕ຺ຖຄູ (ສ຺ຍາ.), ປຏ຺ຐຄູ (ກ.)];

ສ຺ວາຊ຺ຊ ຘມ຺ເມສຸ ອຸກ຺ກຏ຺ໂຐ, ໂສໂຓ ທຸກ຺ຂສ຺ສ ປາຣຄູ.

໖໓໓. ‘‘ປຎ຺ຈ ຉິນ຺ເທ ປຎ຺ຈ ຊເຫ, ປຎ຺ຈ ຈຸຕ຺ຕຣິ ຠາວເຍ;

ປຎ຺ຈສງ຺ຄາຕິໂຄ ຠິກ຺ຂຸ, ໂອຆຕິຓ຺ໂຓຕິ ວຸຈ຺ຈຕິ.

໖໓໔. ‘‘ອຸນ຺ນຬສ຺ສ ປມຕ຺ຕສ຺ສ, ພາຫິຣາສສ຺ສ [ພາຫິຣາສຍສ຺ສ (ກ.)] ຠິກ຺ຂຸໂນ;

ສີລໍ ສມາຘິ ປຎ຺ຎາ ຈ, ປາຣິປູຣິໍ ນ ຄຈ຺ຉຕິ.

໖໓໕. ‘‘ຍຎ຺ຫິ ກິຈ຺ຈໍ ອປວິທ຺ຘໍ [ຕທປວິທ຺ຘໍ (ສີ. ສ຺ຍາ.)], ອກິຈ຺ຈໍ ປນ ກຣີຍຕິ;

ອຸນ຺ນຬານໍ ປມຕ຺ຕານໍ, ເຕສໍ ວຑ຺ຒນ຺ຕິ ອາສວາ.

໖໓໖. ‘‘ເຍສຎ຺ຈ ສຸສມາຣທ຺ຘາ, ນິຈ຺ຈໍ ກາຍຄຕາ ສຕິ;

ອກິຈ຺ຈໍ ເຕ ນ ເສວນ຺ຕິ, ກິຈ຺ເຈ ສາຕຈ຺ຈກາຣິໂນ;

ສຕານໍ ສມ຺ປຊານານໍ, ອຕ຺ຖໍ ຄຈ຺ຉນ຺ຕິ ອາສວາ.

໖໓໗. ‘‘ອຸຊຸມຄ຺ຄມ຺ຫິ ອກ຺ຂາເຕ, ຄຈ຺ຉຖ ມາ ນິວຕ຺ຕຖ;

ອຕ຺ຕນາ ໂຈທຍຕ຺ຕານໍ, ນິພ຺ພານມຠິຫາຣເຍ.

໖໓໘. ‘‘ອຈ຺ຈາຣທ຺ຘມ຺ຫິ ວີຣິຍມ຺ຫິ, ສຕ຺ຖາ ໂລເກ ອນຸຕ຺ຕໂຣ;

ວີໂຓປມໍ ກຣິຕ຺ວາ ເມ, ຘມ຺ມໍ ເທເສສິ ຈກ຺ຂຸມາ;

ຕສ຺ສາຫໍ ວຈນໍ ສຸຕ຺ວາ, ວິຫາສິໍ ສາສເນ ຣໂຕ.

໖໓໙. ‘‘ສມຖໍ ປຏິປາເທສິໍ, ອຸຕ຺ຕມຕ຺ຖສ຺ສ ປຕ຺ຕິຍາ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໖໔໐. ‘‘ເນກ຺ຂມ຺ເມ [ນິກ຺ຂເມ (ກ.), ເນກ຺ຂມ຺ມໍ (ມຫາວ. ໒໔໔; ອ. ນິ. ໖.໕໕)] ອຘິມຸຕ຺ຕສ຺ສ, ປວິເວກຎ຺ຈ ເຈຕໂສ;

ອພ຺ຍາປຊ຺ຌາຘິມຸຕ຺ຕສ຺ສ [ອພ຺ຍາປຊ຺ຌາຘິມ຺ຫຕ຺ຕສ຺ສ (ກ.)], ອຸປາທານກ຺ຂຍສ຺ສ ຈ.

໖໔໑. ‘‘ຕຓ຺ຫກ຺ຂຍາຘິມຸຕ຺ຕສ຺ສ, ອສມ຺ໂມຫຎ຺ຈ ເຈຕໂສ;

ທິສ຺ວາ ອາຍຕນຸປ຺ປາທໍ, ສມ຺ມາ ຈິຕ຺ຕໍ ວິມຸຈ຺ຈຕິ.

໖໔໒. ‘‘ຕສ຺ສ ສມ຺ມາ ວິມຸຕ຺ຕສ຺ສ, ສນ຺ຕຈິຕ຺ຕສ຺ສ ຠິກ຺ຂຸໂນ;

ກຕສ຺ສ ປຏິຈໂຍ ນຕ຺ຖິ, ກຣຓີຍໍ ນ ວິຊ຺ຊຕິ.

໖໔໓. ‘‘ເສໂລ ຍຖາ ເອກຆໂນ [ເອກຆໂນ (ກ.)], ວາເຕນ ນ ສມີຣຕິ;

ເອວໍ ຣູປາ ຣສາ ສທ຺ທາ, ຄນ຺ຘາ ຜສ຺ສາ ຈ ເກວລາ.

໖໔໔. ‘‘ອິຏ຺ຐາ ຘມ຺ມາ ອນິຏ຺ຐາ ຈ, ນປ຺ປເວເຘນ຺ຕິ ຕາທິໂນ;

ຐິຕໍ ຈິຕ຺ຕໍ ວິສຎ຺ຎຸຕ຺ຕໍ, ວຍຎ຺ຈສ຺ສານຸປສ຺ສຕີ’’ຕິ.

… ໂສໂຓ ໂກຬິວິໂສ ເຖໂຣ….

ເຕຣສນິປາໂຕ ນິຏ຺ຐິໂຕ.