໑໐. ທສກນິປາໂຕ

໑. ກາຬຸທາຍິຕ຺ເຖຣຄາຖາ

໕໒໗. ‘‘ອງ຺ຄາຣິໂນ ທານິ ທຸມາ ຠທນ຺ເຕ, ຜເລສິໂນ ຉທນໍ ວິປ຺ປຫາຍ;

ເຕ ອຈ຺ຈິມນ຺ໂຕວ ປຠາສຍນ຺ຕິ, ສມໂຍ ມຫາວີຣ ຠາຄີ ຣສານໍ.

໕໒໘. ‘‘ທຸມານິ ຜຸລ຺ລານິ ມໂນຣມານິ, ສມນ຺ຕໂຕ ສພ຺ພທິສາ ປວນ຺ຕິ;

ປຕ຺ຕໍ ປຫາຍ ຜລມາສສານາ [ຜລມາສມາໂນ (ກ.)], ກາໂລ ອິໂຕ ປກ຺ກມນາຍ ວີຣ.

໕໒໙. ‘‘ເນວາຕິສີຕໍ ນ ປນາຕິອຸຓ຺ຫໍ, ສຸຂາ ອຸຕຸ ອທ຺ຘນິຍາ ຠທນ຺ເຕ;

ປສ຺ສນ຺ຕຸ ຕໍ ສາກິຍາ ໂກຬິຍາ ຈ, ປຈ຺ຉາມຸຂໍ ໂຣຫິນິຍໍ ຕຣນ຺ຕໍ.

໕໓໐. ‘‘ອາສາຍ ກສເຕ ເຂຕ຺ຕໍ, ພີຊໍ ອາສາຍ ວປ຺ປຕິ;

ອາສາຍ ວາຓິຊາ ຍນ຺ຕິ, ສມຸທ຺ທໍ ຘນຫາຣກາ;

ຍາຍ ອາສາຍ ຕິຏ຺ຐາມິ, ສາ ເມ ອາສາ ສມິຊ຺ຌຕຸ.

໕໓໑. [ສໍ. ນິ. ໑.໑໙໘] ‘‘ປຸນປ຺ປຸນໍ ເຈວ ວປນ຺ຕິ ພີຊໍ, ປຸນປ຺ປຸນໍ ວສ຺ສຕິ ເທວຣາຊາ;

ປຸນປ຺ປຸນໍ ເຂຕ຺ຕໍ ກສນ຺ຕິ ກສ຺ສກາ, ປຸນປ຺ປຸນໍ ຘຎ຺ຎມຸເປຕິ ຣຏ຺ຐໍ.

໕໓໒. [ສໍ. ນິ. ໑.໑໙໘] ‘‘ປຸນປ຺ປຸນໍ ຍາຈນກາ ຈຣນ຺ຕິ, ປຸນປ຺ປຸນໍ ທານປຕີ ທທນ຺ຕິ;

ປຸນປ຺ປຸນໍ ທານປຕີ ທທິຕ຺ວາ, ປຸນປ຺ປຸນໍ ສຄ຺ຄມຸເປນ຺ຕິ ຐານໍ.

໕໓໓. ‘‘ວີໂຣ ຫເວ ສຕ຺ຕຍຸຄໍ ປຸເນຕິ, ຍສ຺ມິໍ ກຸເລ ຊາຍຕິ ຠູຣິປຎ຺ໂຎ;

ມຎ຺ຎາມຫໍ ສກ຺ກຕິ ເທວເທໂວ, ຕຍາ ຫິ ຊາໂຕ [ຕຍາຠິຊາໂຕ (ສີ.)] ມຸນິ ສຈ຺ຈນາໂມ.

໕໓໔. ‘‘ສຸທ຺ໂຘທໂນ ນາມ ປິຕາ ມເຫສິໂນ, ພຸທ຺ຘສ຺ສ ມາຕາ ປນ ມາຍນາມາ;

ຍາ ໂພຘິສຕ຺ຕໍ ປຣິຫຣິຍ ກຸຈ຺ຉິນາ, ກາຍສ຺ສ ເຠທາ ຕິທິວມ຺ຫິ ໂມທຕິ.

໕໓໕. ‘‘ສາ ໂຄຕມີ ກາລກຕາ ອິໂຕ ຈຸຕາ, ທິພ຺ເພຫິ ກາເມຫິ ສມງ຺ຄິຠູຕາ;

ສາ ໂມທຕິ ກາມຄຸເຓຫິ ປຎ຺ຈຫິ, ປຣິວາຣິຕາ ເທວຄເຓຫິ ເຕຫິ.

໕໓໖. ‘‘ພຸທ຺ຘສ຺ສ ປຸຕ຺ໂຕມ຺ຫິ ອສຍ຺ຫສາຫິໂນ, ອງ຺ຄີຣສສ຺ສປ຺ປຏິມສ຺ສ ຕາທິໂນ;

ປິຕຸປິຕາ ມຍ຺ຫໍ ຕຸວໍສິ ສກ຺ກ, ຘມ຺ເມນ ເມ ໂຄຕມ ອຍ຺ຍໂກສີ’’ຕິ.

… ກາຬຸທາຍີ ເຖໂຣ….

໒. ເອກວິຫາຣິຍຕ຺ເຖຣຄາຖາ

໕໓໗. ‘‘ປຸຣໂຕ ປຈ຺ຉໂຕ ວາປິ, ອປໂຣ ເຈ ນ ວິຊ຺ຊຕິ;

ອຕີວ ຜາສຸ ຠວຕິ, ເອກສ຺ສ ວສໂຕ ວເນ.

໕໓໘. ‘‘ຫນ຺ທ ເອໂກ ຄມິສ຺ສາມິ, ອຣຎ຺ຎໍ ພຸທ຺ຘວຓ຺ຓິຕໍ;

ຜາສຸ [ຜາສຸໍ (ສ຺ຍາ. ປີ.)] ເອກວິຫາຣິສ຺ສ, ປຫິຕຕ຺ຕສ຺ສ ຠິກ຺ຂຸໂນ.

໕໓໙. ‘‘ໂຍຄີ-ປີຕິກຣໍ ຣມ຺ມໍ, ມຕ຺ຕກຸຎ຺ຊຣເສວິຕໍ;

ເອໂກ ອຕ຺ຕວສີ ຂິປ຺ປໍ, ປວິສິສ຺ສາມິ ການນໍ.

໕໔໐. ‘‘ສຸປຸປ຺ຜິເຕ ສີຕວເນ, ສີຕເລ ຄິຣິກນ຺ທເຣ;

ຄຕ຺ຕານິ ປຣິສິຎ຺ຈິຕ຺ວາ, ຈງ຺ກມິສ຺ສາມິ ເອກໂກ.

໕໔໑. ‘‘ເອກາກິໂຍ ອທຸຕິໂຍ, ຣມຓີເຍ ມຫາວເນ;

ກທາຫໍ ວິຫຣິສ຺ສາມິ, ກຕກິຈ຺ໂຈ ອນາສໂວ.

໕໔໒. ‘‘ເອວໍ ເມ ກຕ຺ຕຸກາມສ຺ສ, ອຘິປ຺ປາໂຍ ສມິຊ຺ຌຕຸ;

ສາຘິຍິສ຺ສາມຫໍເຍວ, ນາຎ຺ໂຎ ອຎ຺ຎສ຺ສ ກາຣໂກ.

໕໔໓. ‘‘ເອສ ພນ຺ຘາມິ ສນ຺ນາຫໍ, ປວິສິສ຺ສາມິ ການນໍ;

ນ ຕໂຕ ນິກ຺ຂມິສ຺ສາມິ, ອປ຺ປຕ຺ໂຕ ອາສວກ຺ຂຍໍ.

໕໔໔. ‘‘ມາລຸເຕ ອຸປວາຍນ຺ເຕ, ສີເຕ ສຸຣຠິຄນ຺ຘິເກ [ຄນ຺ຘເກ (ສ຺ຍາ. ປີ. ກ.)];

ອວິຊ຺ຊໍ ທາລຍິສ຺ສາມິ, ນິສິນ຺ໂນ ນຄມຸທ຺ຘນິ.

໕໔໕. ‘‘ວເນ ກຸສຸມສຎ຺ຉນ຺ເນ, ປພ຺ຠາເຣ ນູນ ສີຕເລ;

ວິມຸຕ຺ຕິສຸເຂນ ສຸຂິໂຕ, ຣມິສ຺ສາມິ ຄິຣິພ຺ພເຊ.

໕໔໖. ‘‘ໂສຫໍ ປຣິປຸຓ຺ຓສງ຺ກປ຺ໂປ, ຈນ຺ໂທ ປນ຺ນຣໂສ ຍຖາ;

ສພ຺ພາສວປຣິກ຺ຂີໂຓ, ນຕ຺ຖິ ທານິ ປຸນພ຺ຠໂວ’’ຕິ.

… ເອກວິຫາຣິໂຍ ເຖໂຣ….

໓. ມຫາກປ຺ປິນຕ຺ເຖຣຄາຖາ

໕໔໗. ‘‘ອນາຄຕໍ ໂຍ ປຏິກຈ຺ຈ [ປຏິຄຈ຺ຈ (ສີ.)] ປສ຺ສຕິ, ຫິຕຎ຺ຈ ອຕ຺ຖໍ ອຫິຕຎ຺ຈ ຕໍ ທ຺ວຍໍ;

ວິທ຺ເທສິໂນ ຕສ຺ສ ຫິເຕສິໂນ ວາ, ຣນ຺ຘໍ ນ ປສ຺ສນ຺ຕິ ສເມກ຺ຂມານາ.

໕໔໘. [ປຏິ. ມ. ໑.໑໖໐ ປຏິສມ຺ຠິທາມຄ຺ເຄ] ‘‘ອານາປານສຕີ ຍສ຺ສ, ປຣິປຸຓ຺ຓາ ສຸຠາວິຕາ;

ອນຸປຸພ຺ພໍ ປຣິຈິຕາ, ຍຖາ ພຸທ຺ເຘນ ເທສິຕາ;

ໂສມໍ ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາ.

໕໔໙. ‘‘ໂອທາຕໍ ວຕ ເມ ຈິຕ຺ຕໍ, ອປ຺ປມາຓໍ ສຸຠາວິຕໍ;

ນິພ຺ພິທ຺ຘໍ ປຄ຺ຄຫີຕຎ຺ຈ, ສພ຺ພາ ໂອຠາສເຕ ທິສາ.

໕໕໐. ‘‘ຊີວເຕ ວາປິ ສປ຺ປຎ຺ໂຎ, ອປິ ວິຕ຺ຕປຣິກ຺ຂໂຍ;

ປຎ຺ຎາຍ ຈ ອລາເຠນ, ວິຕ຺ຕວາປິ ນ ຊີວຕິ.

໕໕໑. ‘‘ປຎ຺ຎາ ສຸຕວິນິຈ຺ຉິນີ, ປຎ຺ຎາ ກິຕ຺ຕິສິໂລກວທ຺ຘນີ;

ປຎ຺ຎາສຫິໂຕ ນໂຣ ອິຘ, ອປິ ທຸກ຺ເຂສຸ ສຸຂານິ ວິນ຺ທຕິ.

໕໕໒. ‘‘ນາຍໍ ອຊ຺ຊຕໂນ ຘມ຺ໂມ, ນຈ຺ເຉໂຣ ນປິ ອພ຺ຠຸໂຕ;

ຍຕ຺ຖ ຊາເຍຖ ມີເຍຖ, ຕຕ຺ຖ ກິໍ ວິຍ ອພ຺ຠຸຕໍ.

໕໕໓. ‘‘ອນນ຺ຕຣໍ ຫິ ຊາຕສ຺ສ, ຊີວິຕາ ມຣຓໍ ຘຸວໍ;

ຊາຕາ ຊາຕາ ມຣນ຺ຕີຘ, ເອວໍຘມ຺ມາ ຫິ ປາຓິໂນ.

໕໕໔. ‘‘ນ ເຫຕທຕ຺ຖາຍ ມຕສ຺ສ ໂຫຕິ, ຍໍ ຊີວິຕຕ຺ຖໍ ປຣໂປຣິສານໍ;

ມຕມ຺ຫິ ຣຸຓ຺ຓໍ ນ ຍໂສ ນ ໂລກ຺ຍໍ, ນ ວຓ຺ຓິຕໍ ສມຓພ຺ຣາຫ຺ມເຓຫິ.

໕໕໕. ‘‘ຈກ຺ຂຸໍ ສຣີຣໍ ອຸປຫນ຺ຕິ ເຕນ [ອຸປຫນ຺ຕິ ຣຸຓ຺ຓໍ (ສີ.), ອຸປຫນ຺ຕິ ໂຣຓ຺ຓໍ (ສ຺ຍາ. ປີ.)], ນິຫີຍຕິ ວຓ຺ຓພລໍ ມຕີ ຈ;

ອານນ຺ທິໂນ ຕສ຺ສ ທິສາ ຠວນ຺ຕິ, ຫິເຕສິໂນ ນາສ຺ສ ສຸຂີ ຠວນ຺ຕິ.

໕໕໖. ‘‘ຕສ຺ມາ ຫິ ອິຈ຺ເຉຍ຺ຍ ກຸເລ ວສນ຺ເຕ, ເມຘາວິໂນ ເຈວ ພຫຸສ຺ສຸເຕ ຈ;

ເຍສໍ ຫິ ປຎ຺ຎາວິຠເວນ ກິຈ຺ຈໍ, ຕຣນ຺ຕິ ນາວາຍ ນທິໍວ ປຸຓ຺ຓ’’ນ຺ຕິ.

… ມຫາກປ຺ປິໂນ ເຖໂຣ….

໔. ຈູຬປນ຺ຖກຕ຺ເຖຣຄາຖາ

໕໕໗. ‘‘ທນ຺ຘາ ມຍ຺ຫໍ ຄຕີ ອາສິ, ປຣິຠູໂຕ ປຸເຣ ອຫໍ;

ຠາຕາ ຈ ມໍ ປຓາເມສິ, ‘ຄຈ຺ຉ ທານິ ຕຸວໍ ຆຣໍ’.

໕໕໘. ‘‘ໂສຫໍ ປຓາມິໂຕ ສນ຺ໂຕ [ຠາຕາ (ອຏ຺ຐ.)], ສງ຺ຆາຣາມສ຺ສ ໂກຏ຺ຐເກ;

ທຸມ຺ມໂນ ຕຕ຺ຖ ອຏ຺ຐາສິໍ, ສາສນສ຺ມິໍ ອເປກ຺ຂວາ.

໕໕໙. ‘‘ຠຄວາ ຕຕ຺ຖ ອາຄຈ຺ຉິ [ອາຄຎ຺ຉິ (ສີ. ປີ.)], ສີສໍ ມຍ຺ຫໍ ປຣາມສິ;

ພາຫາຍ ມໍ ຄເຫຕ຺ວານ, ສງ຺ຆາຣາມໍ ປເວສຍິ.

໕໖໐. ‘‘ອນຸກມ຺ປາຍ ເມ ສຕ຺ຖາ, ປາທາສິ ປາທປຸຎ຺ຉນິໍ;

‘ເອຕໍ ສຸທ຺ຘໍ ອຘິຏ຺ເຐຫິ, ເອກມນ຺ຕໍ ສ຺ວຘິຏ຺ຐິຕໍ’.

໕໖໑. ‘‘ຕສ຺ສາຫໍ ວຈນໍ ສຸຕ຺ວາ, ວິຫາສິໍ ສາສເນ ຣໂຕ;

ສມາຘິໍ ປຏິປາເທສິໍ, ອຸຕ຺ຕມຕ຺ຖສ຺ສ ປຕ຺ຕິຍາ.

໕໖໒. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໕໖໓. ‘‘ສຫສ຺ສກ຺ຂຕ຺ຕຸມຕ຺ຕານໍ, ນິມ຺ມິນິຕ຺ວານ ປນ຺ຖໂກ;

ນິສີທມ຺ພວເນ ຣມ຺ເມ, ຍາວ ກາລປ຺ປເວທນາ.

໕໖໔. ‘‘ຕໂຕ ເມ ສຕ຺ຖາ ປາເຫສິ, ທູຕໍ ກາລປ຺ປເວທກໍ;

ປເວທິຕມ຺ຫິ ກາລມ຺ຫິ, ເວຫາສາທຸປສງ຺ກມິໍ [ເວຫາສານຸປສງ຺ກມິໍ (ສ຺ຍາ. ກ.)].

໕໖໕. ‘‘ວນ຺ທິຕ຺ວາ ສຕ຺ຖຸໂນ ປາເທ, ເອກມນ຺ຕໍ ນິສີທຫໍ;

ນິສິນ຺ນໍ ມໍ ວິທິຕ຺ວານ, ອຖ ສຕ຺ຖາ ປຏິຄ຺ຄຫິ.

໕໖໖. ‘‘ອາຍາໂຄ ສພ຺ພໂລກສ຺ສ, ອາຫຸຕີນໍ ປຏິຄ຺ຄໂຫ;

ປຸຎ຺ຎກ຺ເຂຕ຺ຕໍ ມນຸສ຺ສານໍ, ປຏິຄຓ຺ຫິຕ຺ຖ ທກ຺ຂິຓ’’ນ຺ຕິ.

… ຈູຬປນ຺ຖໂກ ເຖໂຣ….

໕. ກປ຺ປຕ຺ເຖຣຄາຖາ

໕໖໗. ‘‘ນານາກຸລມລສມ຺ປຸຓ຺ໂຓ, ມຫາອຸກ຺ກາຣສມ຺ຠໂວ;

ຈນ຺ທນິກໍວ ປຣິປກ຺ກໍ, ມຫາຄຓ຺ໂຑ ມຫາວໂຓ.

໕໖໘. ‘‘ປຸພ຺ພຣຸຫິຣສມ຺ປຸຓ຺ໂຓ, ຄູຖກູເປນ ຄາຬ຺ຫິໂຕ [ຄູຖກູເປ ນິຄາຬ຺ຫິໂຕ (ສ຺ຍາ. ປີ. ກ.)];

ອາໂປປຄ຺ຆຣໂຓ ກາໂຍ, ສທາ ສນ຺ທຕິ ປູຕິກໍ.

໕໖໙. ‘‘ສຏ຺ຐິກຓ຺ຑຣສມ຺ພນ຺ໂຘ, ມໍສເລປນເລປິໂຕ;

ຈມ຺ມກຎ຺ຈຸກສນ຺ນທ຺ໂຘ, ປູຕິກາໂຍ ນິຣຕ຺ຖໂກ.

໕໗໐. ‘‘ອຏ຺ຐິສງ຺ຆາຕຆຏິໂຕ, ນ຺ຫາຣຸສຸຕ຺ຕນິພນ຺ຘໂນ;

ເນເກສໍ ສໍຄຕີຠາວາ, ກປ຺ເປຕິ ອິຣິຍາປຖໍ.

໕໗໑. ‘‘ຘຸວປ຺ປຍາໂຕ ມຣຓາຍ, ມຈ຺ຈຸຣາຊສ຺ສ ສນ຺ຕິເກ;

ອິເຘວ ຉຑ຺ຑຍິຕ຺ວານ, ເຍນກາມງ຺ຄໂມ ນໂຣ.

໕໗໒. ‘‘ອວິຊ຺ຊາຍ ນິວຸໂຕ ກາໂຍ, ຈຕຸຄນ຺ເຖນ ຄນ຺ຖິໂຕ;

ໂອຆສໍສີທໂນ ກາໂຍ, ອນຸສຍຊາລໂມຕ຺ຖໂຕ.

໕໗໓. ‘‘ປຎ຺ຈນີວຣເຓ ຍຸຕ຺ໂຕ, ວິຕກ຺ເກນ ສມປ຺ປິໂຕ;

ຕຓ຺ຫາມູເລນານຸຄໂຕ, ໂມຫຈ຺ຉາທນຉາທິໂຕ.

໕໗໔. ‘‘ເອວາຍໍ ວຕ຺ຕເຕ ກາໂຍ, ກມ຺ມຍນ຺ເຕນ ຍນ຺ຕິໂຕ;

ສມ຺ປຕ຺ຕິ ຈ ວິປຕ຺ຍນ຺ຕາ, ນານາຠາໂວ ວິປຊ຺ຊຕິ.

໕໗໕. ‘‘ເຍມໍ ກາຍໍ ມມາຍນ຺ຕິ, ອນ຺ຘພາລາ ປຸຖຸຊ຺ຊນາ;

ວຑ຺ເຒນ຺ຕິ ກຏສິໍ ໂຆຣໍ, ອາທິຍນ຺ຕິ ປຸນພ຺ຠວໍ.

໕໗໖. ‘‘ເຍມໍ ກາຍໍ ວິວຊ຺ເຊນ຺ຕິ, ຄູຖລິຕ຺ຕໍວ ປນ຺ນຄໍ;

ຠວມູລໍ ວມິຕ຺ວານ, ປຣິນິພ຺ພິສ຺ສນ຺ຕິນາສວາ’’ຕິ [ປຣິນິພ຺ພນ຺ຕຸນາສວາ (ສີ.)].

… ກປ຺ໂປ ເຖໂຣ….

໖. ວງ຺ຄນ຺ຕປຸຕ຺ຕອຸປເສນຕ຺ເຖຣຄາຖາ

໕໗໗. ‘‘ວິວິຕ຺ຕໍ ອປ຺ປນິຄ຺ໂຆສໍ, ວາຬມິຄນິເສວິຕໍ;

ເສເວ ເສນາສນໍ ຠິກ຺ຂຸ, ປຏິສລ຺ລານກາຣຓາ.

໕໗໘. ‘‘ສງ຺ກາຣປຸຎ຺ຊາ ອາຫຕ຺ວາ [ອາຫິຕ຺ວາ (ກ.)], ສຸສານາ ຣຖິຍາຫິ ຈ;

ຕໂຕ ສງ຺ຆາຏິກໍ ກຕ຺ວາ, ລູຂໍ ຘາເຣຍ຺ຍ ຈີວຣໍ.

໕໗໙. ‘‘ນີຈໍ ມນໍ ກຣິຕ຺ວານ, ສປທານໍ ກຸລາ ກຸລໍ;

ປິຓ຺ຑິກາຍ ຈເຣ ຠິກ຺ຂຸ, ຄຸຕ຺ຕທ຺ວາໂຣ ສຸສໍວຸໂຕ.

໕໘໐. ‘‘ລູເຂນປິ ວາ [ລູເຂນປິ ຈ (ພຫູສຸ)] ສນ຺ຕຸສ຺ເສ, ນາຎ຺ຎໍ ປຕ຺ເຖ ຣສໍ ພຫຸໍ;

ຣເສສຸ ອນຸຄິທ຺ຘສ຺ສ, ຌາເນ ນ ຣມຕີ ມໂນ.

໕໘໑. ‘‘ອປ຺ປິຈ຺ໂຉ ເຈວ ສນ຺ຕຸຏ຺ໂຐ, ປວິວິຕ຺ໂຕ ວເສ ມຸນິ;

ອສໍສຏ຺ໂຐ ຄຫຏ຺ເຐຫິ, ອນາຄາເຣຫິ ຈູຠຍໍ.

໕໘໒. ‘‘ຍຖາ ຊໂຬ ວ ມູໂຄ ວ, ອຕ຺ຕານໍ ທສ຺ສເຍ ຕຖາ;

ນາຕິເວລໍ ສມ຺ຠາເສຍ຺ຍ, ສງ຺ຆມຊ຺ຌມ຺ຫິ ປຓ຺ຑິໂຕ.

໕໘໓. ‘‘ນ ໂສ ອຸປວເທ ກຎ຺ຈິ, ອຸປຆາຕໍ ວິວຊ຺ຊເຍ;

ສໍວຸໂຕ ປາຕິໂມກ຺ຂສ຺ມິໍ, ມຕ຺ຕຎ຺ຎູ ຈສ຺ສ ໂຠຊເນ.

໕໘໔. ‘‘ສຸຄ຺ຄຫີຕນິມິຕ຺ຕສ຺ສ, ຈິຕ຺ຕສ຺ສຸປ຺ປາທໂກວິໂທ;

ສມໍ ອນຸຍຸຎ຺ເຊຍ຺ຍ, ກາເລນ ຈ ວິປສ຺ສນໍ.

໕໘໕. ‘‘ວີຣິຍສາຕຈ຺ຈສມ຺ປນ຺ໂນ, ຍຸຕ຺ຕໂຍໂຄ ສທາ ສິຍາ;

ນ ຈ ອປ຺ປຕ຺ວາ ທຸກ຺ຂນ຺ຕໍ, ວິສ຺ສາສໍ ເອຍ຺ຍ ປຓ຺ຑິໂຕ.

໕໘໖. ‘‘ເອວໍ ວິຫຣມານສ຺ສ, ສຸທ຺ຘິກາມສ຺ສ ຠິກ຺ຂຸໂນ;

ຂີຍນ຺ຕິ ອາສວາ ສພ຺ເພ, ນິພ຺ພຸຕິຎ຺ຈາຘິຄຈ຺ຉຕີ’’ຕິ.

… ອຸປເສໂນ ວງ຺ຄນ຺ຕປຸຕ຺ໂຕ ເຖໂຣ….

໗. (ອປຣ)-ໂຄຕມຕ຺ເຖຣຄາຖາ

໕໘໗. ‘‘ວິຊາເນຍ຺ຍ ສກໍ ອຕ຺ຖໍ, ອວໂລເກຍ຺ຍາຖ ປາວຈນໍ;

ຍຎ຺ເຈຕ຺ຖ ອສ຺ສ ປຕິຣູປໍ, ສາມຎ຺ຎໍ ອຊ຺ຌຸປຄຕສ຺ສ.

໕໘໘. ‘‘ມິຕ຺ຕໍ ອິຘ ຈ ກລ຺ຍາຓໍ, ສິກ຺ຂາ ວິປຸລໍ ສມາທານໍ;

ສຸສ຺ສູສາ ຈ ຄຣູນໍ, ເອຕໍ ສມຓສ຺ສ ປຕິຣູປໍ.

໕໘໙. ‘‘ພຸທ຺ເຘສຸ ສຄາຣວຕາ, ຘມ຺ເມ ອປຈິຕິ ຍຖາຠູຕໍ;

ສງ຺ເຆ ຈ ຈິຕ຺ຕິກາໂຣ, ເອຕໍ ສມຓສ຺ສ ປຕິຣູປໍ.

໕໙໐. ‘‘ອາຈາຣໂຄຈເຣ ຍຸຕ຺ໂຕ, ອາຊີໂວ ໂສຘິໂຕ ອຄາຣຍ຺ໂຫ;

ຈິຕ຺ຕສ຺ສ ຈ ສຓ຺ຐປນໍ, ເອຕໍ ສມຓສ຺ສ ປຕິຣູປໍ.

໕໙໑. ‘‘ຈາຣິຕ຺ຕໍ ອຖ ວາຣິຕ຺ຕໍ, ອິຣິຍາປຖິຍໍ ປສາທນິຍໍ;

ອຘິຈິຕ຺ເຕ ຈ ອາໂຍໂຄ, ເອຕໍ ສມຓສ຺ສ ປຕິຣູປໍ.

໕໙໒. ‘‘ອາຣຎ຺ຎການິ ເສນາສນານິ, ປນ຺ຕານິ ອປ຺ປສທ຺ທານິ;

ຠຊິຕພ຺ພານິ ມຸນິນາ, ເອຕໍ ສມຓສ຺ສ ປຕິຣູປໍ.

໕໙໓. ‘‘ສີລຎ຺ຈ ພາຫຸສຈ຺ຈຎ຺ຈ, ຘມ຺ມານໍ ປວິຈໂຍ ຍຖາຠູຕໍ;

ສຈ຺ຈານໍ ອຠິສມໂຍ, ເອຕໍ ສມຓສ຺ສ ປຕິຣູປໍ.