໘. ອຏ຺ຐມວຄ຺ໂຄ

໗໑. ‘‘ສຸສຸຂຸມນິປຸຓຕ຺ຖທສ຺ສິນາ, ມຕິກຸສເລນ ນິວາຕວຸຕ຺ຕິນາ;

ສໍເສວິຕວຸທ຺ຘສີລິນາ [ສໍເສວິຕພຸທ຺ຘສີລິນາ (ກ.)], ນິພ຺ພານໍ ນ ຫິ ເຕນ ທຸລ຺ລຠ’’ນ຺ຕິ.

… ວຈ຺ຉປາໂລ ເຖໂຣ….

໗໒. ‘‘ຍຖາ ກຬີໂຣ ສຸສຸ ວຑ຺ຒິຕຄ຺ໂຄ, ທຸນ຺ນິກ຺ຂໂມ ໂຫຕິ ປສາຂຊາໂຕ;

ເອວໍ ອຫໍ ຠຣິຍາຍານິຕາຍ, ອນຸມຎ຺ຎໍ ມໍ ປພ຺ພຊິໂຕມ຺ຫິ ທານີ’’ຕິ.

… ອາຕຸໂມ ເຖໂຣ….

໗໓. ‘‘ຊິຓ຺ຓຎ຺ຈ ທິສ຺ວາ ທຸຂິຕຎ຺ຈ ພ຺ຍາຘິຕໍ, ມຕຎ຺ຈ ທິສ຺ວາ ຄຕມາຍຸສງ຺ຂຍໍ;

ຕໂຕ ອຫໍ ນິກ຺ຂມິຕູນ ປພ຺ພຊິໍ, ປຫາຍ ກາມານິ ມໂນຣມານີ’’ຕິ.

… ມາຓໂວ ເຖໂຣ….

໗໔. ‘‘ກາມຈ຺ຉນ຺ໂທ ຈ ພ຺ຍາປາໂທ, ຖິນມິທ຺ຘຎ຺ຈ [ຖີນມິທ຺ຘຎ຺ຈ (ສີ. ສ຺ຍາ.)] ຠິກ຺ຂຸໂນ;

ອຸທ຺ຘຈ຺ຈໍ ວິຈິກິຈ຺ຉາ ຈ, ສພ຺ພໂສວ ນ ວິຊ຺ຊຕີ’’ຕິ.

… ສຸຍາມໂນ ເຖໂຣ….

໗໕. ‘‘ສາຘຸ ສຸວິຫິຕານ ທສ຺ສນໍ, ກງ຺ຂາ ຉິຊ຺ຊຕິ ພຸທ຺ຘິ ວຑ຺ຒຕິ;

ພາລມ຺ປິ ກໂຣນ຺ຕິ ປຓ຺ຑິຕໍ, ຕສ຺ມາ ສາຘຸ ສຕໍ ສມາຄໂມ’’ຕິ.

… ສຸສາຣໂທ ເຖໂຣ….

໗໖. ‘‘ອຸປ຺ປຕນ຺ເຕສຸ ນິປເຕ, ນິປຕນ຺ເຕສຸ ອຸປ຺ປເຕ;

ວເສ ອວສມາເນສຸ, ຣມມາເນສຸ ໂນ ຣເມ’’ຕິ.

… ປິຍຎ຺ຊໂຫ ເຖໂຣ….

໗໗. ‘‘ອິທໍ ປຸເຣ ຈິຕ຺ຕມຈາຣິ ຈາຣິກໍ, ເຍນິຈ຺ຉກໍ ຍຕ຺ຖກາມໍ ຍຖາສຸຂໍ;

ຕທຊ຺ຊຫໍ ນິຄ຺ຄເຫສ຺ສາມິ ໂຍນິໂສ, ຫຕ຺ຖິປ຺ປຠິນ຺ນໍ ວິຍ ອງ຺ກຸສຄ຺ຄໂຫ’’ຕິ.

… ຫຕ຺ຖາໂຣຫປຸຕ຺ໂຕ ເຖໂຣ….

໗໘. ‘‘ອເນກຊາຕິສໍສາຣໍ, ສນ຺ຘາວິສ຺ສໍ ອນິພ຺ພິສໍ;

ຕສ຺ສ ເມ ທຸກ຺ຂຊາຕສ຺ສ, ທຸກ຺ຂກ຺ຂນ຺ໂຘ ອປຣທ຺ໂຘ’’ຕິ.

… ເມຓ຺ຑສິໂຣ ເຖໂຣ….

໗໙. ‘‘ສພ຺ໂພ ຣາໂຄ ປຫີໂນ ເມ, ສພ຺ໂພ ໂທໂສ ສມູຫໂຕ;

ສພ຺ໂພ ເມ ວິຄໂຕ ໂມໂຫ, ສີຕິຠູໂຕສ຺ມິ ນິພ຺ພຸໂຕ’’ຕິ.

… ຣກ຺ຂິໂຕ ເຖໂຣ….

໘໐. ‘‘ຍໍ ມຍາ ປກຕໍ ກມ຺ມໍ, ອປ຺ປໍ ວາ ຍທິ ວາ ພຫຸໍ;

ສພ຺ພເມຕໍ ປຣິກ຺ຂີຓໍ, ນຕ຺ຖິ ທານິ ປຸນພ຺ຠໂວ’’ຕິ.

… ອຸຄ຺ໂຄ ເຖໂຣ….

ວຄ຺ໂຄ ອຏ຺ຐໂມ ນິຏ຺ຐິໂຕ.

ຕສ຺ສຸທ຺ທານໍ –

ວຈ຺ຉປາໂລ ຈ ໂຍ ເຖໂຣ, ອາຕຸໂມ ມາຓໂວ ອິສິ;

ສຸຍາມໂນ ສຸສາຣໂທ, ເຖໂຣ ໂຍ ຈ ປິຍຎ຺ຊໂຫ;

ອາໂຣຫປຸຕ຺ໂຕ ເມຓ຺ຑສິໂຣ, ຣກ຺ຂິໂຕ ອຸຄ຺ຄສວ຺ຫໂຍຕິ.