໑. ປຐມວຄ຺ໂຄ

໑. ‘‘ຉນ຺ນາ ເມ ກຸຏິກາ ສຸຂາ ນິວາຕາ, ວສ຺ສ ເທວ ຍຖາສຸຂໍ;

ຈິຕ຺ຕໍ ເມ ສຸສມາຫິຕໍ ວິມຸຕ຺ຕໍ, ອາຕາປີ ວິຫຣາມິ ວສ຺ສ ເທວາ’’ຕິ.

ອິຕ຺ຖໍ ສຸທໍ [ອິຕ຺ຖໍ ສຸມໍ (ກ. ອຏ຺ຐ.)] ອາຍສ຺ມາ ສຸຠູຕິຕ຺ເຖໂຣ ຄາຖໍ ອຠາສິຕ຺ຖາຕິ.

໒. ‘‘ອຸປສນ຺ໂຕ ອຸປຣໂຕ, ມນ຺ຕຠາຓີ ອນຸທ຺ຘໂຕ;

ຘຸນາຕິ ປາປເກ ຘມ຺ເມ, ທຸມປຕ຺ຕໍວ ມາລຸໂຕ’’ຕິ.

ອິຕ຺ຖໍ ສຸທໍ ອາຍສ຺ມາ ມຫາໂກຏ຺ຐິໂກ [ມຫາໂກຏ຺ຐິໂຕ (ສີ. ສ຺ຍາ.)] ເຖໂຣ ຄາຖໍ ອຠາສິຕ຺ຖາຕິ.

໓. ‘‘ປຎ຺ຎໍ ອິມໍ ປສ຺ສ ຕຖາຄຕານໍ, ອຄ຺ຄິ ຍຖາ ປຊ຺ຊລິໂຕ ນິສີເຖ;

ອາໂລກທາ ຈກ຺ຂຸທທາ ຠວນ຺ຕິ, ເຍ ອາຄຕານໍ ວິນຍນ຺ຕິ ກງ຺ຂ’’ນ຺ຕິ.

ອິຕ຺ຖໍ ສຸທໍ ອາຍສ຺ມາ ກງ຺ຂາເຣວໂຕ ເຖໂຣ ຄາຖໍ ອຠາສິຕ຺ຖາຕິ.

໔. ‘‘ສມ຺ຠິເຣວ ສມາເສຖ, ປຓ຺ຑິເຕຫຕ຺ຖທສ຺ສິຠິ;

ອຕ຺ຖໍ ມຫນ຺ຕໍ ຄມ຺ຠີຣໍ, ທຸທ຺ທສໍ ນິປຸຓໍ ອຓຸໍ;

ຘີຣາ ສມຘິຄຈ຺ຉນ຺ຕິ, ອປ຺ປມຕ຺ຕາ ວິຈກ຺ຂຓາ’’ຕິ.

ອິຕ຺ຖໍ ສຸທໍ ອາຍສ຺ມາ ປຸຓ຺ໂຓ ມນ຺ຕາຓິປຸຕ຺ໂຕ [ມນ຺ຕານິປຸຕ຺ໂຕ (ສ຺ຍາ. ກ.)] ເຖໂຣ ຄາຖໍ ອຠາສິຕ຺ຖາຕິ.

໕. ‘‘ໂຍ ທຸທ຺ທມິໂຍ ທເມນ ທນ຺ໂຕ, ທພ຺ໂພ ສນ຺ຕຸສິໂຕ ວິຕິຓ຺ຓກງ຺ໂຂ;

ວິຊິຕາວີ ອເປຕເຠຣໂວ ຫິ, ທພ຺ໂພ ໂສ ປຣິນິພ຺ພຸໂຕ ຐິຕຕ຺ໂຕ’’ຕິ.

ອິຕ຺ຖໍ ສຸທໍ ອາຍສ຺ມາ ທພ຺ໂພ ເຖໂຣ ຄາຖໍ ອຠາສິຕ຺ຖາຕິ.

໖. ‘‘ໂຍ ສີຕວນໍ ອຸປຄາ ຠິກ຺ຂຸ, ເອໂກ ສນ຺ຕຸສິໂຕ ສມາຫິຕຕ຺ໂຕ;

ວິຊິຕາວີ ອເປຕໂລມຫໍໂສ, ຣກ຺ຂໍ ກາຍຄຕາສຕິໍ ຘິຕິມາ’’ຕິ.

ອິຕ຺ຖໍ ສຸທໍ ອາຍສ຺ມາ ສີຕວນິໂຍ ເຖໂຣ ຄາຖໍ ອຠາສິຕ຺ຖາຕິ.

໗. ‘‘ໂຍປານຸທີ ມຈ຺ຈຸຣາຊສ຺ສ ເສນໍ, ນຬເສຕຸໍວ ສຸທຸພ຺ພລໍ ມໂຫໂຆ;

ວິຊິຕາວີ ອເປຕເຠຣໂວ ຫິ, ທນ຺ໂຕ ໂສ ປຣິນິພ຺ພຸໂຕ ຐິຕຕ຺ໂຕ’’ຕິ.

ອິຕ຺ຖໍ ສຸທໍ ອາຍສ຺ມາ ຠລ຺ລິໂຍ ເຖໂຣ ຄາຖໍ ອຠາສິຕ຺ຖາຕິ.

໘. ‘‘ໂຍ ທຸທ຺ທມິໂຍ ທເມນ ທນ຺ໂຕ, ວີໂຣ ສນ຺ຕຸສິໂຕ ວິຕິຓ຺ຓກງ຺ໂຂ;

ວິຊິຕາວີ ອເປຕໂລມຫໍໂສ, ວີໂຣ ໂສ ປຣິນິພ຺ພຸໂຕ ຐິຕຕ຺ໂຕ’’ຕິ.

ອິຕ຺ຖໍ ສຸທໍ ອາຍສ຺ມາ ວີໂຣ ເຖໂຣ ຄາຖໍ ອຠາສິຕ຺ຖາຕິ.

໙. ‘‘ສ຺ວາຄຕໍ ນ ທຸຣາຄຕໍ [ນາປຄຕໍ (ສີ. ສ຺ຍາ.)], ນຍິທໍ ທຸມນ຺ຕິຕໍ ມມ;

ສໍວິຠຕ຺ເຕສຸ ຘມ຺ເມສຸ, ຍໍ ເສຏ຺ຐໍ ຕທຸປາຄມິ’’ນ຺ຕິ.

ອິຕ຺ຖໍ ສຸທໍ ອາຍສ຺ມາ ປິລິນ຺ທວຈ຺ໂຉ [ປິລິນ຺ທິວຈ຺ໂຉ (ສີ.)] ເຖໂຣ ຄາຖໍ ອຠາສິຕ຺ຖາຕິ.

໑໐. ‘‘ວິຫຣິ ອເປກ຺ຂໍ ອິຘ ວາ ຫຸຣໍ ວາ, ໂຍ ເວທຄູ ສມິໂຕ ຍຕຕ຺ໂຕ;

ສພ຺ເພສຸ ຘມ຺ເມສຸ ອນູປລິຕ຺ໂຕ, ໂລກສ຺ສ ຊຎ຺ຎາ ອຸທຍພ຺ພຍຎ຺ຈາ’’ຕິ.

ອິຕ຺ຖໍ ສຸທໍ ອາຍສ຺ມາ ປຸຓ຺ຓມາໂສ ເຖໂຣ ຄາຖໍ ອຠາສິຕ຺ຖາຕິ.

ວຄ຺ໂຄ ປຐໂມ ນິຏ຺ຐິໂຕ.

ຕສ຺ສຸທ຺ທານໍ –

ສຸຠູຕິ ໂກຏ຺ຐິໂກ ເຖໂຣ, ກງ຺ຂາເຣວຕສມ຺ມໂຕ;

ມນ຺ຕາຓິປຸຕ຺ໂຕ ທພ຺ໂພ ຈ, ສີຕວນິໂຍ ຈ ຠລ຺ລິໂຍ;

ວີໂຣ ປິລິນ຺ທວຈ຺ໂຉ ຈ, ປຸຓ຺ຓມາໂສ ຕໂມນຸໂທຕິ.