໖. ຊຣາສຸຕ຺ຕໍ

໘໑໐. ອປ຺ປໍ ວຕ ຊີວິຕໍ ອິທໍ, ໂອຣໍ ວສ຺ສສຕາປິ ມິຍ຺ຍຕິ [ມີຍຕິ (ສີ. ອຏ຺ຐ.)];

ໂຍ ເຈປິ ອຕິຈ຺ຈ ຊີວຕິ, ອຖ ໂຂ ໂສ ຊຣສາປິ ມິຍ຺ຍຕິ.

໘໑໑. ໂສຈນ຺ຕິ ຊນາ ມມາຍິເຕ, ນ ຫິ ສນ຺ຕິ [ນ ຫິ ສນ຺ຕາ (ສີ.), ນ ຫີ ສນ຺ຕິ (ກຕ຺ຖຈິ)] ນິຈ຺ຈາ ປຣິຄ຺ຄຫາ;

ວິນາຠາວສນ຺ຕເມວິທໍ, ອິຕິ ທິສ຺ວາ ນາຄາຣມາວເສ.

໘໑໒. ມຣເຓນປິ ຕໍ ປຫີຍຕິ [ປຫິຍ຺ຍຕິ (ສີ. ສ຺ຍາ. ກ.)], ຍໍ ປຸຣິໂສ ມມິທນ຺ຕິ [ມມຍິທນ຺ຕິ (ສີ. ສ຺ຍາ. ກ.), ມມາຍນ຺ຕິ (ກ.)] ມຎ຺ຎຕິ;

ເອຕມ຺ປິ ວິທິຕ຺ວາ [ເອຕໍ ທິສ຺ວານ (ນິທ຺ເທເສ), ເອຕມ຺ປິ ວິທິຕ຺ວ (?)] ປຓ຺ຑິໂຕ, ນ ມມຕ຺ຕາຍ ນເມຖ ມາມໂກ.

໘໑໓. ສຸປິເນນ ຍຖາປິ ສງ຺ຄຕໍ, ປຏິພຸທ຺ໂຘ ປຸຣິໂສ ນ ປສ຺ສຕິ;

ເອວມ຺ປິ ປິຍາຍິຕໍ ຊນໍ, ເປຕໍ ກາລກຕໍ ນ ປສ຺ສຕິ.

໘໑໔. ທິຏ຺ຐາປິ ສຸຕາປິ ເຕ ຊນາ, ເຍສໍ ນາມມິທໍ ປວຸຈ຺ຈຕິ [ນາມເມວາ ວສິສ຺ສຕິ (ສີ. ສ຺ຍາ. ປີ.)];

ນາມໍເຍວາວສິສ຺ສຕິ, ອກ຺ເຂຍ຺ຍໍ ເປຕສ຺ສ ຊນ຺ຕຸໂນ.

໘໑໕. ໂສກປ຺ປຣິເທວມຈ຺ຉຣໍ [ໂສກປຣິເທວມຈ຺ຉຣໍ (ສີ. ສ຺ຍາ. ປີ.), ໂສກໍ ປຣິເທວມຈ຺ຉຣໍ (?)], ນ ຊຫນ຺ຕິ ຄິທ຺ຘາ ມມາຍິເຕ;

ຕສ຺ມາ ມຸນໂຍ ປຣິຄ຺ຄຫໍ, ຫິຕ຺ວາ ອຈຣິໍສຸ ເຂມທສ຺ສິໂນ.

໘໑໖. ປຕິລີນຈຣສ຺ສ ຠິກ຺ຂຸໂນ, ຠຊມານສ຺ສ ວິວິຕ຺ຕມາສນໍ;

ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍ.

໘໑໗. ສພ຺ພຕ຺ຖ ມຸນີ ອນິສ຺ສິໂຕ, ນ ປິຍໍ ກຸພ຺ພຕິ ໂນປິ ອປ຺ປິຍໍ;

ຕສ຺ມິໍ ປຣິເທວມຈ຺ຉຣໍ, ປຓ຺ເຓ ວາຣິ ຍຖາ ນ ລິມ຺ປຕິ [ລິປ຺ປຕິ (ສີ. ປີ.)].

໘໑໘. ອຸທພິນ຺ທຸ ຍຖາປິ ໂປກ຺ຂເຣ, ປທຸເມ ວາຣິ ຍຖາ ນ ລິມ຺ປຕິ;

ເອວໍ ມຸນິ ໂນປລິມ຺ປຕິ, ຍທິທໍ ທິຏ຺ຐສຸຕໍ ມຸເຕສຸ ວາ.

໘໑໙. ໂຘໂນ ນ ຫິ ເຕນ ມຎ຺ຎຕິ, ຍທິທໍ ທິຏ຺ຐສຸຕໍ ມຸເຕສຸ ວາ;

ນາຎ຺ເຎນ ວິສຸທ຺ຘິມິຈ຺ຉຕິ, ນ ຫິ ໂສ ຣຊ຺ຊຕິ ໂນ ວິຣຊ຺ຊຕີຕິ.

ຊຣາສຸຕ຺ຕໍ ຉຏ຺ຐໍ ນິຏ຺ຐິຕໍ.