໑໑. ກລຫວິວາທສຸຕ຺ຕໍ

໘໖໘. ‘‘ກຸໂຕປຫູຕາ ກລຫາ ວິວາທາ, ປຣິເທວໂສກາ ສຫມຈ຺ຉຣາ ຈ;

ມານາຕິມານາ ສຫເປສຸຓາ ຈ, ກຸໂຕປຫູຕາ ເຕ ຕທິງ຺ຆ ພ຺ຣູຫິ’’.

໘໖໙. ‘‘ປິຍປ຺ປຫູຕາ ກລຫາ ວິວາທາ,

ປຣິເທວໂສກາ ສຫມຈ຺ຉຣາ ຈ;

ມານາຕິມານາ ສຫເປສຸຓາ ຈ,

ມຈ຺ເຉຣຍຸຕ຺ຕາ ກລຫາ ວິວາທາ;

ວິວາທຊາເຕສຸ ຈ ເປສຸຓານິ’’.

໘໗໐. ‘‘ປິຍາ ສຸ [ປິຍານຸ (ສ຺ຍາ.), ປິຍສ຺ສຸ (ກ.)] ໂລກສ຺ມິໍ ກຸໂຕນິທານາ, ເຍ ຈາປິ [ເຍ ວາປິ (ສີ. ສ຺ຍາ. ປີ.)] ໂລຠາ ວິຈຣນ຺ຕິ ໂລເກ;

ອາສາ ຈ ນິຏ຺ຐາ ຈ ກຸໂຕນິທານາ, ເຍ ສມ຺ປຣາຍາຍ ນຣສ຺ສ ໂຫນ຺ຕິ’’.

໘໗໑. ‘‘ຉນ຺ທານິທານານິ ປິຍານິ ໂລເກ, ເຍ ຈາປິ ໂລຠາ ວິຈຣນ຺ຕິ ໂລເກ;

ອາສາ ຈ ນິຏ຺ຐາ ຈ ອິໂຕນິທານາ, ເຍ ສມ຺ປຣາຍາຍ ນຣສ຺ສ ໂຫນ຺ຕິ’’.

໘໗໒. ‘‘ຉນ຺ໂທ ນຸ ໂລກສ຺ມິໍ ກຸໂຕນິທາໂນ, ວິນິຈ຺ຉຍາ ຈາປິ [ວາປິ (ສີ. ສ຺ຍາ. ປີ.)] ກຸໂຕປຫູຕາ;

ໂກໂຘ ໂມສວຊ຺ຊຎ຺ຈ ກຖໍກຖາ ຈ, ເຍ ວາປິ ຘມ຺ມາ ສມເຓນ ວຸຕ຺ຕາ’’.

໘໗໓. ‘‘ສາຕໍ ອສາຕນ຺ຕິ ຍມາຫຸ ໂລເກ, ຕມູປນິສ຺ສາຍ ປໂຫຕິ ຉນ຺ໂທ;

ຣູເປສຸ ທິສ຺ວາ ວິຠວໍ ຠວຎ຺ຈ, ວິນິຈ຺ຉຍໍ ກຸພ຺ພຕິ [ກຸຣຸເຕ (ພຫູສຸ)] ຊນ຺ຕຸ ໂລເກ.

໘໗໔. ‘‘ໂກໂຘ ໂມສວຊ຺ຊຎ຺ຈ ກຖໍກຖາ ຈ, ເອເຕປິ ຘມ຺ມາ ທ຺ວຍເມວ ສນ຺ເຕ;

ກຖໍກຖີ ຎາຓປຖາຍ ສິກ຺ເຂ, ຎຕ຺ວາ ປວຸຕ຺ຕາ ສມເຓນ ຘມ຺ມາ’’.

໘໗໕. ‘‘ສາຕໍ ອສາຕຎ຺ຈ ກຸໂຕນິທານາ, ກິສ຺ມິໍ ອສນ຺ເຕ ນ ຠວນ຺ຕິ ເຫເຕ;

ວິຠວໍ ຠວຎ຺ຈາປິ ຍເມຕມຕ຺ຖໍ, ເອຕໍ ເມ ປພ຺ຣູຫິ ຍໂຕນິທານໍ’’.

໘໗໖. ‘‘ຜສ຺ສນິທານໍ ສາຕໍ ອສາຕໍ, ຜສ຺ເສ ອສນ຺ເຕ ນ ຠວນ຺ຕິ ເຫເຕ;

ວິຠວໍ ຠວຎ຺ຈາປິ ຍເມຕມຕ຺ຖໍ, ເອຕໍ ເຕ ປພ຺ຣູມິ ອິໂຕນິທານໍ’’.

໘໗໗. ‘‘ຜສ຺ໂສ ນຸ ໂລກສ຺ມິ ກຸໂຕນິທາໂນ, ປຣິຄ຺ຄຫາ ຈາປິ ກຸໂຕປຫູຕາ;

ກິສ຺ມິໍ ອສນ຺ເຕ ນ ມມຕ຺ຕມຕ຺ຖິ, ກິສ຺ມິໍ ວິຠູເຕ ນ ຜຸສນ຺ຕິ ຜສ຺ສາ’’.

໘໗໘. ‘‘ນາມຎ຺ຈ ຣູປຎ຺ຈ ປຏິຈ຺ຈ ຜສ຺ໂສ, ອິຈ຺ຉານິທານານິ ປຣິຄ຺ຄຫານິ;

ອິຈ຺ຉາຍສນ຺ຕ຺ຍາ ນ ມມຕ຺ຕມຕ຺ຖິ, ຣູເປ ວິຠູເຕ ນ ຜຸສນ຺ຕິ ຜສ຺ສາ’’.

໘໗໙. ‘‘ກຖໍສເມຕສ຺ສ ວິໂຠຕິ ຣູປໍ, ສຸຂໍ ທຸຂຎ຺ຈາປິ [ທຸຂໍ ວາປິ (ສີ. ສ຺ຍາ.)] ກຖໍ ວິໂຠຕິ;

ເອຕໍ ເມ ປພ຺ຣູຫິ ຍຖາ ວິໂຠຕິ, ຕໍ ຊານິຍາມາຕິ [ຊານິສ຺ສາມາຕິ (ສີ. ກ.)] ເມ ມໂນ ອຫຸ’’.

໘໘໐. ‘‘ນ ສຎ຺ຎສຎ຺ຎີ ນ ວິສຎ຺ຎສຎ຺ຎີ, ໂນປິ ອສຎ຺ຎີ ນ ວິຠູຕສຎ຺ຎີ;

ເອວໍສເມຕສ຺ສ ວິໂຠຕິ ຣູປໍ, ສຎ຺ຎານິທານາ ຫິ ປປຎ຺ຈສງ຺ຂາ’’.

໘໘໑. ‘‘ຍໍ ຕໍ ອປຸຈ຺ຉິມ຺ຫ ອກິຕ຺ຕຍີ ໂນ,

ອຎ຺ຎໍ ຕໍ ປຸຈ຺ຉາມ ຕທິງ຺ຆ ພ຺ຣູຫິ;

ເອຕ຺ຕາວຕຄ຺ຄໍ ນຸ [ໂນ (ສີ. ສ຺ຍາ.)] ວທນ຺ຕິ ເຫເກ,

ຍກ຺ຂສ຺ສ ສຸທ຺ຘິໍ ອິຘ ປຓ຺ຑິຕາເສ;

ອຸທາຫຸ ອຎ຺ຎມ຺ປິ ວທນ຺ຕິ ເອຕ຺ໂຕ.

໘໘໒. ‘‘ເອຕ຺ຕາວຕຄ຺ຄມ຺ປິ ວທນ຺ຕິ ເຫເກ, ຍກ຺ຂສ຺ສ ສຸທ຺ຘິໍ ອິຘ ປຓ຺ຑິຕາເສ;

ເຕສໍ ປເນເກ ສມຍໍ ວທນ຺ຕິ, ອນຸປາທິເສເສ ກຸສລາ ວທານາ.

໘໘໓. ‘‘ເອເຕ ຈ ຎຕ຺ວາ ອຸປນິສ຺ສິຕາຕິ, ຎຕ຺ວາ ມຸນີ ນິສ຺ສເຍ ໂສ ວິມໍສີ;

ຎຕ຺ວາ ວິມຸຕ຺ໂຕ ນ ວິວາທເມຕິ, ຠວາຠວາຍ ນ ສເມຕິ ຘີໂຣ’’ຕິ.

ກລຫວິວາທສຸຕ຺ຕໍ ເອກາທສມໍ ນິຏ຺ຐິຕໍ.