໘. ສລ຺ລສຸຕ຺ຕໍ

໕໗໙. ອນິມິຕ຺ຕມນຎ຺ຎາຕໍ, ມຈ຺ຈານໍ ອິຘ ຊີວິຕໍ;

ກສິຣຎ຺ຈ ປຣິຕ຺ຕຎ຺ຈ, ຕຎ຺ຈ ທຸກ຺ເຂນ ສໍຍຸຕໍ.

໕໘໐. ນ ຫິ ໂສ ອຸປກ຺ກໂມ ອຕ຺ຖິ, ເຍນ ຊາຕາ ນ ມິຍ຺ຍເຣ;

ຊຣມ຺ປິ ປຕ຺ວາ ມຣຓໍ, ເອວໍຘມ຺ມາ ຫິ ປາຓິໂນ.

໕໘໑. ຜລານມິວ ປກ຺ການໍ, ປາໂຕ ປຕນໂຕ [ປປຕໂຕ (ສີ. ປີ. ອຏ຺ຐ.)] ຠຍໍ;

ເອວໍ ຊາຕານ ມຈ຺ຈານໍ, ນິຈ຺ຈໍ ມຣຓໂຕ ຠຍໍ.

໕໘໒. ຍຖາປິ ກຸມ຺ຠກາຣສ຺ສ, ກຕາ ມຕ຺ຕິກຠາຊນາ;

ສພ຺ເພ ເຠທນປຣິຍນ຺ຕາ [ເຠທປຣິຍນ຺ຕາ (ສ຺ຍາ.)], ເອວໍ ມຈ຺ຈານ ຊີວິຕໍ.

໕໘໓. ທຫຣາ ຈ ມຫນ຺ຕາ ຈ, ເຍ ພາລາ ເຍ ຈ ປຓ຺ຑິຕາ;

ສພ຺ເພ ມຈ຺ຈຸວສໍ ຍນ຺ຕິ, ສພ຺ເພ ມຈ຺ຈຸປຣາຍຓາ.

໕໘໔. ເຕສໍ ມຈ຺ຈຸປເຣຕານໍ, ຄຈ຺ຉຕໍ ປຣໂລກໂຕ;

ນ ປິຕາ ຕາຍເຕ ປຸຕ຺ຕໍ, ຎາຕີ ວາ ປນ ຎາຕເກ.

໕໘໕. ເປກ຺ຂຕໍ ເຍວ ຎາຕີນໍ, ປສ຺ສ ລາລປຕໍ ປຸຖຸ;

ເອກເມໂກວ ມຈ຺ຈານໍ, ໂຄວຊ຺ໂຌ ວິຍ ນີຍຕິ [ນິຍ຺ຍຕິ (ພຫູສຸ)].

໕໘໖. ເອວມພ຺ຠາຫໂຕ ໂລໂກ, ມຈ຺ຈຸນາ ຈ ຊຣາຍ ຈ;

ຕສ຺ມາ ຘີຣາ ນ ໂສຈນ຺ຕິ, ວິທິຕ຺ວາ ໂລກປຣິຍາຍໍ.

໕໘໗. ຍສ຺ສ ມຄ຺ຄໍ ນ ຊານາສິ, ອາຄຕສ຺ສ ຄຕສ຺ສ ວາ;

ອຸໂຠ ອນ຺ເຕ ອສມ຺ປສ຺ສໍ, ນິຣຕ຺ຖໍ ປຣິເທວສິ.

໕໘໘. ປຣິເທວຍມາໂນ ເຈ, ກິຎ຺ຈິທຕ຺ຖໍ ອຸທພ຺ພເຫ;

ສມ຺ມູຬ຺ໂຫ ຫິໍສມຕ຺ຕານໍ, ກຍິຣາ ເຈ ນໍ ວິຈກ຺ຂໂຓ.

໕໘໙. ນ ຫິ ຣຸຓ຺ເຓນ ໂສເກນ, ສນ຺ຕິໍ ປປ຺ໂປຕິ ເຈຕໂສ;

ຠິຍ຺ຍສ຺ສຸປ຺ປຊ຺ຊເຕ ທຸກ຺ຂໍ, ສຣີຣໍ ຈຸປຫຎ຺ຎຕິ.

໕໙໐. ກິໂສ ວິວຓ຺ໂຓ ຠວຕິ, ຫິໍສມຕ຺ຕານມຕ຺ຕນາ;

ນ ເຕນ ເປຕາ ປາເລນ຺ຕິ, ນິຣຕ຺ຖາ ປຣິເທວນາ.

໕໙໑. ໂສກມປ຺ປຊຫໍ ຊນ຺ຕຸ, ຠິຍ຺ໂຍ ທຸກ຺ຂໍ ນິຄຈ຺ຉຕິ;

ອນຸຕ຺ຖຸນນ຺ໂຕ ກາລງ຺ກຕໍ [ກາລກຕໍ (ສີ. ສ຺ຍາ.)], ໂສກສ຺ສ ວສມນ຺ວຄູ.

໕໙໒. ອຎ຺ເຎປິ ປສ຺ສ ຄມິເນ, ຍຖາກມ຺ມູປເຄ ນເຣ;

ມຈ຺ຈຸໂນ ວສມາຄມ຺ມ, ຜນ຺ທນ຺ເຕວິຘ ປາຓິໂນ.

໕໙໓. ເຍນ ເຍນ ຫິ ມຎ຺ຎນ຺ຕິ, ຕໂຕ ຕໍ ໂຫຕິ ອຎ຺ຎຖາ;

ເອຕາທິໂສ ວິນາຠາໂວ, ປສ຺ສ ໂລກສ຺ສ ປຣິຍາຍໍ.

໕໙໔. ອປິ ວສ຺ສສຕໍ ຊີເວ, ຠິຍ຺ໂຍ ວາ ປນ ມາຓໂວ;

ຎາຕິສງ຺ຆາ ວິນາ ໂຫຕິ, ຊຫາຕິ ອິຘ ຊີວິຕໍ.

໕໙໕. ຕສ຺ມາ ອຣຫໂຕ ສຸຕ຺ວາ, ວິເນຍ຺ຍ ປຣິເທວິຕໍ;

ເປຕໍ ກາລງ຺ກຕໍ ທິສ຺ວາ, ເນໂສ ລພ຺ຠາ ມຍາ ອິຕິ.

໕໙໖. ຍຖາ ສຣຓມາທິຕ຺ຕໍ, ວາຣິນາ ປຣິນິພ຺ພເຍ [ປຣິນິພ຺ພຸໂຕ (ສີ. ກ.)];

ເອວມ຺ປິ ຘີໂຣ ສປຎ຺ໂຎ, ປຓ຺ຑິໂຕ ກຸສໂລ ນໂຣ;

ຂິປ຺ປມຸປ຺ປຕິຕໍ ໂສກໍ, ວາໂຕ ຕູລໍວ ຘໍສເຍ.

໕໙໗. ປຣິເທວໍ ປຊປ຺ປຎ຺ຈ, ໂທມນສ຺ສຎ຺ຈ ອຕ຺ຕໂນ;

ອຕ຺ຕໂນ ສຸຂເມສາໂນ, ອພ຺ພເຫ ສລ຺ລມຕ຺ຕໂນ.

໕໙໘. ອພ຺ພຸຬ຺ຫສລ຺ໂລ ອສິໂຕ, ສນ຺ຕິໍ ປປ຺ປຸຍ຺ຍ ເຈຕໂສ;

ສພ຺ພໂສກໍ ອຕິກ຺ກນ຺ໂຕ, ອໂສໂກ ໂຫຕິ ນິພ຺ພຸໂຕຕິ.

ສລ຺ລສຸຕ຺ຕໍ ອຏ຺ຐມໍ ນິຏ຺ຐິຕໍ.