໔. ມງ຺ຄລສຸຕ຺ຕໍ

ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ໂຂ ອຎ຺ຎຕຣາ ເທວຕາ ອຠິກ຺ກນ຺ຕາຍ ຣຕ຺ຕິຍາ ອຠິກ຺ກນ຺ຕວຓ຺ຓາ ເກວລກປ຺ປໍ ເຊຕວນໍ ໂອຠາເສຕ຺ວາ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິຕາ ໂຂ ສາ ເທວຕາ ຠຄວນ຺ຕໍ ຄາຖາຍ ອຊ຺ຌຠາສິ –

໒໖໑. ‘‘ພຫູ ເທວາ ມນຸສ຺ສາ ຈ, ມງ຺ຄລານິ ອຈິນ຺ຕຍຸໍ;

ອາກງ຺ຂມານາ ໂສຕ຺ຖານໍ, ພ຺ຣູຫິ ມງ຺ຄລມຸຕ຺ຕມໍ’’.

໒໖໒. ‘‘ອເສວນາ ຈ ພາລານໍ, ປຓ຺ຑິຕານຎ຺ຈ ເສວນາ;

ປູຊາ ຈ ປູຊເນຍ຺ຍານໍ [ປູຊນີຍານໍ (ສີ. ສ຺ຍາ. ກໍ. ປີ.)], ເອຕໍ ມງ຺ຄລມຸຕ຺ຕມໍ.

໒໖໓. ‘‘ປຕິຣູປເທສວາໂສ ຈ, ປຸພ຺ເພ ຈ ກຕປຸຎ຺ຎຕາ;

ອຕ຺ຕສມ຺ມາປຓິຘິ [ອຕ຺ຕສມ຺ມາປຓີຘີ (ກຕ຺ຖຈິ)] ຈ, ເອຕໍ ມງ຺ຄລມຸຕ຺ຕມໍ.

໒໖໔. ‘‘ພາຫຸສຈ຺ຈຎ຺ຈ ສິປ຺ປຎ຺ຈ, ວິນໂຍ ຈ ສຸສິກ຺ຂິໂຕ;

ສຸຠາສິຕາ ຈ ຍາ ວາຈາ, ເອຕໍ ມງ຺ຄລມຸຕ຺ຕມໍ.

໒໖໕. ‘‘ມາຕາປິຕຸ ອຸປຏ຺ຐານໍ, ປຸຕ຺ຕທາຣສ຺ສ ສງ຺ຄໂຫ;

ອນາກຸລາ ຈ ກມ຺ມນ຺ຕາ, ເອຕໍ ມງ຺ຄລມຸຕ຺ຕມໍ.

໒໖໖. ‘‘ທານຎ຺ຈ ຘມ຺ມຈຣິຍາ ຈ, ຎາຕການຎ຺ຈ ສງ຺ຄໂຫ;

ອນວຊ຺ຊານິ ກມ຺ມານິ, ເອຕໍ ມງ຺ຄລມຸຕ຺ຕມໍ.

໒໖໗. ‘‘ອາຣຕີ ວິຣຕີ ປາປາ, ມຊ຺ຊປານາ ຈ ສໍຍໂມ;

ອປ຺ປມາໂທ ຈ ຘມ຺ເມສຸ, ເອຕໍ ມງ຺ຄລມຸຕ຺ຕມໍ.

໒໖໘. ‘‘ຄາຣໂວ ຈ ນິວາໂຕ ຈ, ສນ຺ຕຸຏ຺ຐິ ຈ ກຕຎ຺ຎຸຕາ;

ກາເລນ ຘມ຺ມສ຺ສວນໍ [ຘມ຺ມສວຓໍ (ກຕ຺ຖຈິ), ຘມ຺ມສວນໍ (ສີ. ກ.)], ເອຕໍ ມງ຺ຄລມຸຕ຺ຕມໍ.

໒໖໙. ‘‘ຂນ຺ຕີ ຈ ໂສວຈສ຺ສຕາ, ສມຓານຎ຺ຈ ທສ຺ສນໍ;

ກາເລນ ຘມ຺ມສາກຈ຺ຉາ, ເອຕໍ ມງ຺ຄລມຸຕ຺ຕມໍ.

໒໗໐. ‘‘ຕໂປ ຈ ພ຺ຣຫ຺ມຈຣິຍຎ຺ຈ, ອຣິຍສຈ຺ຈານ ທສ຺ສນໍ;

ນິພ຺ພານສຈ຺ຉິກິຣິຍາ ຈ, ເອຕໍ ມງ຺ຄລມຸຕ຺ຕມໍ.

໒໗໑. ‘‘ຜຸຏ຺ຐສ຺ສ ໂລກຘມ຺ເມຫິ, ຈິຕ຺ຕໍ ຍສ຺ສ ນ ກມ຺ປຕິ;

ອໂສກໍ ວິຣຊໍ ເຂມໍ, ເອຕໍ ມງ຺ຄລມຸຕ຺ຕມໍ.

໒໗໒. ‘‘ເອຕາທິສານິ ກຕ຺ວານ, ສພ຺ພຕ຺ຖມປຣາຊິຕາ;

ສພ຺ພຕ຺ຖ ໂສຕ຺ຖິໍ ຄຈ຺ຉນ຺ຕິ, ຕໍ ເຕສໍ ມງ຺ຄລມຸຕ຺ຕມ’’ນ຺ຕິ.

ມງ຺ຄລສຸຕ຺ຕໍ ຈຕຸຕ຺ຖໍ ນິຏ຺ຐິຕໍ.