໑໑. ຣາຫຸລສຸຕ຺ຕໍ

໓໓໗. ‘‘ກຈ຺ຈິ ອຠິຓ຺ຫສໍວາສາ, ນາວຊານາສິ ປຓ຺ຑິຕໍ;

ອຸກ຺ກາຘາໂຣ [ໂອກ຺ກາຘາໂຣ (ສ຺ຍາ. ກ.)] ມນຸສ຺ສານໍ, ກຈ຺ຈິ ອປຈິໂຕ ຕຍາ’’ [ຕວ (ສີ. ອຏ຺ຐ.)].

໓໓໘. ‘‘ນາຫໍ ອຠິຓ຺ຫສໍວາສາ, ອວຊານາມິ ປຓ຺ຑິຕໍ;

ອຸກ຺ກາຘາໂຣ ມນຸສ຺ສານໍ, ນິຈ຺ຈໍ ອປຈິໂຕ ມຍາ’’.

໓໓໙. ‘‘ປຎ຺ຈ ກາມຄຸເຓ ຫິຕ຺ວາ, ປິຍຣູເປ ມໂນຣເມ;

ສທ຺ຘາຍ ຆຣາ ນິກ຺ຂມ຺ມ, ທຸກ຺ຂສ຺ສນ຺ຕກໂຣ ຠວ.

໓໔໐. ‘‘ມິຕ຺ເຕ ຠຊສ຺ສຸ ກລ຺ຍາເຓ, ປນ຺ຕຎ຺ຈ ສຍນາສນໍ;

ວິວິຕ຺ຕໍ ອປ຺ປນິຄ຺ໂຆສໍ, ມຕ຺ຕຎ຺ຎູ ໂຫຫິ ໂຠຊເນ.

໓໔໑. ‘‘ຈີວເຣ ປິຓ຺ຑປາເຕ ຈ, ປຈ຺ຈເຍ ສຍນາສເນ;

ເອເຕສຸ ຕຓ຺ຫໍ ມາກາສິ, ມາ ໂລກໍ ປຸນຣາຄມິ.

໓໔໒. ‘‘ສໍວຸໂຕ ປາຕິໂມກ຺ຂສ຺ມິໍ, ອິນ຺ທ຺ຣິເຍສຸ ຈ ປຎ຺ຈສຸ;

ສຕິ ກາຍຄຕາຕ຺ຍຕ຺ຖຸ, ນິພ຺ພິທາພຫຸໂລ ຠວ.

໓໔໓. ‘‘ນິມິຕ຺ຕໍ ປຣິວຊ຺ເຊຫິ, ສຸຠໍ ຣາຄູປສຎ຺ຫິຕໍ;

ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ.

໓໔໔. ‘‘ອນິມິຕ຺ຕຎ຺ຈ ຠາເວຫິ, ມານານຸສຍມຸຊ຺ຊຫ;

ຕໂຕ ມານາຠິສມຍາ, ອຸປສນ຺ໂຕ ຈຣິສ຺ສຕີ’’ຕິ.

ອິຕ຺ຖໍ ສຸທໍ ຠຄວາ ອາຍສ຺ມນ຺ຕໍ ຣາຫຸລໍ ອິມາຫິ ຄາຖາຫິ ອຠິຓ຺ຫໍ ໂອວທຕີຕິ.

ຣາຫຸລສຸຕ຺ຕໍ ເອກາທສມໍ ນິຏ຺ຐິຕໍ.