໙. ເຫມວຕສຸຕ຺ຕໍ

໑໕໓. ‘‘ອຊ຺ຊ ປນ຺ນຣໂສ ອຸໂປສໂຖ, (ອິຕິ ສາຕາຄິໂຣ ຍກ຺ໂຂ)

ທິພ຺ພາ [ທິພ຺ຍາ (ສີ. ສ຺ຍາ. ກໍ. ປີ.)] ຣຕ຺ຕິ ອຸປຏ຺ຐິຕາ;

ອໂນມນາມໍ ສຕ຺ຖາຣໍ, ຫນ຺ທ ປສ຺ສາມ ໂຄຕມໍ’’.

໑໕໔. ‘‘ກຈ຺ຈິ ມໂນ ສຸປຓິຫິໂຕ, (ອິຕິ ເຫມວໂຕ ຍກ຺ໂຂ)

ສພ຺ພຠູເຕສຸ ຕາທິໂນ;

ກຈ຺ຈິ ອິຏ຺ເຐ ອນິຏ຺ເຐ ຈ, ສງ຺ກປ຺ປສ຺ສ ວສີກຕາ’’.

໑໕໕. ‘‘ມໂນ ຈສ຺ສ ສຸປຓິຫິໂຕ, (ອິຕິ ສາຕາຄິໂຣ ຍກ຺ໂຂ)

ສພ຺ພຠູເຕສຸ ຕາທິໂນ;

ອໂຖ ອິຏ຺ເຐ ອນິຏ຺ເຐ ຈ, ສງ຺ກປ຺ປສ຺ສ ວສີກຕາ’’.

໑໕໖. ‘‘ກຈ຺ຈິ ອທິນ຺ນໍ ນາທິຍຕິ, (ອິຕິ ເຫມວໂຕ ຍກ຺ໂຂ)

ກຈ຺ຈິ ປາເຓສຸ ສຎ຺ຎໂຕ;

ກຈ຺ຈິ ອາຣາ ປມາທມ຺ຫາ, ກຈ຺ຈິ ຌານໍ ນ ຣິຎ຺ຈຕິ’’.

໑໕໗. ‘‘ນ ໂສ ອທິນ຺ນໍ ອາທິຍຕິ, (ອິຕິ ສາຕາຄິໂຣ ຍກ຺ໂຂ)

ອໂຖ ປາເຓສຸ ສຎ຺ຎໂຕ;

ອໂຖ ອາຣາ ປມາທມ຺ຫາ, ພຸທ຺ໂຘ ຌານໍ ນ ຣິຎ຺ຈຕິ’’.

໑໕໘. ‘‘ກຈ຺ຈິ ມຸສາ ນ ຠຓຕິ, (ອິຕິ ເຫມວໂຕ ຍກ຺ໂຂ)

ກຈ຺ຈິ ນ ຂີຓພ຺ຍປ຺ປໂຖ;

ກຈ຺ຈິ ເວຠູຕິຍໍ ນາຫ, ກຈ຺ຈິ ສມ຺ຜໍ ນ ຠາສຕິ’’.

໑໕໙. ‘‘ມຸສາ ຈ ໂສ ນ ຠຓຕິ, (ອິຕິ ສາຕາຄິໂຣ ຍກ຺ໂຂ)

ອໂຖ ນ ຂີຓພ຺ຍປ຺ປໂຖ;

ອໂຖ ເວຠູຕິຍໍ ນາຫ, ມນ຺ຕາ ອຕ຺ຖໍ ຈ [ອຕ຺ຖໍ ໂສ (ສີ. ປີ. ກ.)] ຠາສຕິ’’.

໑໖໐. ‘‘ກຈ຺ຈິ ນ ຣຊ຺ຊຕິ ກາເມສຸ, (ອິຕິ ເຫມວໂຕ ຍກ຺ໂຂ)

ກຈ຺ຈິ ຈິຕ຺ຕໍ ອນາວິລໍ;

ກຈ຺ຈິ ໂມຫໍ ອຕິກ຺ກນ຺ໂຕ, ກຈ຺ຈິ ຘມ຺ເມສຸ ຈກ຺ຂຸມາ’’.

໑໖໑. ‘‘ນ ໂສ ຣຊ຺ຊຕິ ກາເມສຸ, (ອິຕິ ສາຕາຄິໂຣ ຍກ຺ໂຂ)

ອໂຖ ຈິຕ຺ຕໍ ອນາວິລໍ;

ສພ຺ພໂມຫໍ ອຕິກ຺ກນ຺ໂຕ, ພຸທ຺ໂຘ ຘມ຺ເມສຸ ຈກ຺ຂຸມາ’’.

໑໖໒. ‘‘ກຈ຺ຈິ ວິຊ຺ຊາຍ ສມ຺ປນ຺ໂນ, (ອິຕິ ເຫມວໂຕ ຍກ຺ໂຂ )

ກຈ຺ຈິ ສໍສຸທ຺ຘຈາຣໂຓ;

ກຈ຺ຈິສ຺ສ ອາສວາ ຂີຓາ, ກຈ຺ຈິ ນຕ຺ຖິ ປຸນພ຺ຠໂວ’’.

໑໖໓. ‘‘ວິຊ຺ຊາຍ ເຈວ ສມ຺ປນ຺ໂນ, (ອິຕິ ສາຕາຄິໂຣ ຍກ຺ໂຂ)

ອໂຖ ສໍສຸທ຺ຘຈາຣໂຓ;

ສພ຺ພສ຺ສ ອາສວາ ຂີຓາ, ນຕ຺ຖິ ຕສ຺ສ ປຸນພ຺ຠໂວ’’.

໑໖໔. ‘‘ສມ຺ປນ຺ນໍ ມຸນິໂນ ຈິຕ຺ຕໍ, ກມ຺ມຸນາ ພ຺ຍປ຺ປເຖນ ຈ;

ວິຊ຺ຊາຈຣຓສມ຺ປນ຺ນໍ, ຘມ຺ມໂຕ ນໍ ປສໍສຕິ’’.

໑໖໕. ‘‘ສມ຺ປນ຺ນໍ ມຸນິໂນ ຈິຕ຺ຕໍ, ກມ຺ມຸນາ ພ຺ຍປ຺ປເຖນ ຈ;

ວິຊ຺ຊາຈຣຓສມ຺ປນ຺ນໍ, ຘມ຺ມໂຕ ອນຸໂມທສິ’’.

໑໖໖. ‘‘ສມ຺ປນ຺ນໍ ມຸນິໂນ ຈິຕ຺ຕໍ, ກມ຺ມຸນາ ພ຺ຍປ຺ປເຖນ ຈ;

ວິຊ຺ຊາຈຣຓສມ຺ປນ຺ນໍ, ຫນ຺ທ ປສ຺ສາມ ໂຄຕມໍ.

໑໖໗. ‘‘ເອຓິຊງ຺ຆໍ ກິສໍ ວີຣໍ [ຘີຣໍ (ສ຺ຍາ.)], ອປ຺ປາຫາຣໍ ອໂລລຸປໍ;

ມຸນິໍ ວນສ຺ມິໍ ຌາຍນ຺ຕໍ, ເອຫິ ປສ຺ສາມ ໂຄຕມໍ.

໑໖໘. ‘‘ສີຫໍເວກຈຣໍ ນາຄໍ, ກາເມສຸ ອນເປກ຺ຂິນໍ;

ອຸປສງ຺ກມ຺ມ ປຸຈ຺ຉາມ, ມຈ຺ຈຸປາສປ຺ປໂມຈນໍ.

໑໖໙. ‘‘ອກ຺ຂາຕາຣໍ ປວຕ຺ຕາຣໍ, ສພ຺ພຘມ຺ມານ ປາຣຄຸໍ;

ພຸທ຺ຘໍ ເວຣຠຍາຕີຕໍ, ມຍໍ ປຸຈ຺ຉາມ ໂຄຕມໍ’’.

໑໗໐. ‘‘ກິສ຺ມິໍ ໂລໂກ ສມຸປ຺ປນ຺ໂນ, (ອິຕິ ເຫມວໂຕ ຍກ຺ໂຂ)

ກິສ຺ມິໍ ກຸພ຺ພຕິ ສນ຺ຖວໍ [ສນ຺ຘວໍ (ກ.)];

ກິສ຺ສ ໂລໂກ ອຸປາທາຍ, ກິສ຺ມິໍ ໂລໂກ ວິຫຎ຺ຎຕິ’’.

໑໗໑. ‘‘ຉສຸ [ຉສ຺ສຸ (ສີ. ປີ.)] ໂລໂກ ສມຸປ຺ປນ຺ໂນ, (ເຫມວຕາຕິ ຠຄວາ)

ຉສຸ ກຸພ຺ພຕິ ສນ຺ຖວໍ;

ຉນ຺ນເມວ ອຸປາທາຍ, ຉສຸ ໂລໂກ ວິຫຎ຺ຎຕິ’’.

໑໗໒. ‘‘ກຕມໍ ຕໍ ອຸປາທານໍ, ຍຕ຺ຖ ໂລໂກ ວິຫຎ຺ຎຕິ;

ນິຍ຺ຍານໍ ປຸຈ຺ຉິໂຕ ພ຺ຣູຫິ, ກຖໍ ທຸກ຺ຂາ ປມຸຈ຺ຈຕິ’’ [ປມຸຎ຺ຈຕິ (ສ຺ຍາ.)].

໑໗໓. ‘‘ປຎ຺ຈ ກາມຄຸຓາ ໂລເກ, ມໂນຉຏ຺ຐາ ປເວທິຕາ;

ເອຕ຺ຖ ຉນ຺ທໍ ວິຣາເຊຕ຺ວາ, ເອວໍ ທຸກ຺ຂາ ປມຸຈ຺ຈຕິ.

໑໗໔. ‘‘ເອຕໍ ໂລກສ຺ສ ນິຍ຺ຍານໍ, ອກ຺ຂາຕໍ ໂວ ຍຖາຕຖໍ;

ເອຕໍ ໂວ ອຫມກ຺ຂາມິ, ເອວໍ ທຸກ຺ຂາ ປມຸຈ຺ຈຕິ’’.

໑໗໕. ‘‘ໂກ ສູຘ ຕຣຕິ ໂອຆໍ, ໂກຘ ຕຣຕິ ອຓ຺ຓວໍ;

ອປ຺ປຕິຏ຺ເຐ ອນາລມ຺ເພ, ໂກ ຄມ຺ຠີເຣ ນ ສີທຕິ’’.

໑໗໖. ‘‘ສພ຺ພທາ ສີລສມ຺ປນ຺ໂນ, ປຎ຺ຎວາ ສຸສມາຫິໂຕ;

ອຊ຺ຌຕ຺ຕຈິນ຺ຕີ [ອຊ຺ຌຕ຺ຕສຎ຺ຎີ (ສ຺ຍາ. ກໍ. ກ.)] ສຕິມາ, ໂອຆໍ ຕຣຕິ ທຸຕ຺ຕຣໍ.

໑໗໗. ‘‘ວິຣໂຕ ກາມສຎ຺ຎາຍ, ສພ຺ພສໍໂຍຊນາຕິໂຄ;

ນນ຺ທີຠວປຣິກ຺ຂີໂຓ, ໂສ ຄມ຺ຠີເຣ ນ ສີທຕິ’’.

໑໗໘. ‘‘ຄພ຺ຠີຣປຎ຺ຎໍ ນິປຸຓຕ຺ຖທສ຺ສິໍ, ອກິຎ຺ຈນໍ ກາມຠເວ ອສຕ຺ຕໍ;

ຕໍ ປສ຺ສຖ ສພ຺ພຘິ ວິປ຺ປມຸຕ຺ຕໍ, ທິພ຺ເພ ປເຖ ກມມານໍ ມເຫສິໍ.

໑໗໙. ‘‘ອໂນມນາມໍ ນິປຸຓຕ຺ຖທສ຺ສິໍ, ປຎ຺ຎາທທໍ ກາມາລເຍ ອສຕ຺ຕໍ;

ຕໍ ປສ຺ສຖ ສພ຺ພວິທຸໍ ສຸເມຘໍ, ອຣິເຍ ປເຖ ກມມານໍ ມເຫສິໍ.

໑໘໐. ‘‘ສຸທິຏ຺ຐໍ ວຕ ໂນ ອຊ຺ຊ, ສຸປ຺ປຠາຕໍ ສຸຫຸຏ຺ຐິຕໍ;

ຍໍ ອທ຺ທສາມ ສມ຺ພຸທ຺ຘໍ, ໂອຆຕິຓ຺ຓມນາສວໍ.

໑໘໑. ‘‘ອິເມ ທສສຕາ ຍກ຺ຂາ, ອິທ຺ຘິມນ຺ໂຕ ຍສສ຺ສິໂນ;

ສພ຺ເພ ຕໍ ສຣຓໍ ຍນ຺ຕິ, ຕ຺ວໍ ໂນ ສຕ຺ຖາ ອນຸຕ຺ຕໂຣ.

໑໘໒. ‘‘ເຕ ມຍໍ ວິຈຣິສ຺ສາມ, ຄາມາ ຄາມໍ ນຄາ ນຄໍ;

ນມສ຺ສມານາ ສມ຺ພຸທ຺ຘໍ, ຘມ຺ມສ຺ສ ຈ ສຸຘມ຺ມຕ’’ນ຺ຕິ.

ເຫມວຕສຸຕ຺ຕໍ ນວມໍ ນິຏ຺ຐິຕໍ.