໑໐. ອາຬວກສຸຕ຺ຕໍ

ເອວໍ ເມ ສຸຕໍ – ເອກໍ ສມຍໍ ຠຄວາ ອາຬວິຍໍ ວິຫຣຕິ ອາຬວກສ຺ສ ຍກ຺ຂສ຺ສ ຠວເນ. ອຖ ໂຂ ອາຬວໂກ ຍກ຺ໂຂ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ເອຕທໂວຈ – ‘‘ນິກ຺ຂມ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ນິກ຺ຂມິ. ‘‘ປວິສ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ປາວິສິ.

ທຸຕິຍມ຺ປິ ໂຂ…ເປ… ຕຕິຍມ຺ປິ ໂຂ ອາຬວໂກ ຍກ຺ໂຂ ຠຄວນ຺ຕໍ ເອຕທໂວຈ – ‘‘ນິກ຺ຂມ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ນິກ຺ຂມິ. ‘‘ປວິສ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ປາວິສິ.

ຈຕຸຕ຺ຖມ຺ປິ ໂຂ ອາຬວໂກ ຍກ຺ໂຂ ຠຄວນ຺ຕໍ ເອຕທໂວຈ – ‘‘ນິກ຺ຂມ, ສມຓາ’’ຕິ. ‘‘ນ ຂ຺ວາຫໍ ຕໍ, ອາວຸໂສ, ນິກ຺ຂມິສ຺ສາມິ. ຍໍ ເຕ ກຣຓີຍໍ, ຕໍ ກໂຣຫີ’’ຕິ.

‘‘ປຎ຺ຫໍ ຕໍ, ສມຓ, ປຸຈ຺ຉິສ຺ສາມິ. ສເຈ ເມ ນ ພ຺ຍາກຣິສ຺ສສິ, ຈິຕ຺ຕໍ ວາ ເຕ ຂິປິສ຺ສາມິ, ຫທຍໍ ວາ ເຕ ຜາເລສ຺ສາມິ, ປາເທສຸ ວາ ຄເຫຕ຺ວາ ປາຣຄງ຺ຄາຍ ຂິປິສ຺ສາມີ’’ຕິ.

‘‘ນ ຂ຺ວາຫໍ ຕໍ, ອາວຸໂສ, ປສ຺ສາມິ ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ໂຍ ເມ ຈິຕ຺ຕໍ ວາ ຂິເປຍ຺ຍ ຫທຍໍ ວາ ຜາເລຍ຺ຍ ປາເທສຸ ວາ ຄເຫຕ຺ວາ ປາຣຄງ຺ຄາຍ ຂິເປຍ຺ຍ. ອປິ ຈ ຕ຺ວໍ, ອາວຸໂສ, ປຸຈ຺ຉ ຍທາກງ຺ຂສີ’’ຕິ. ອຖ ໂຂ ອາຬວໂກ ຍກ຺ໂຂ ຠຄວນ຺ຕໍ ຄາຖາຍ ອຊ຺ຌຠາສິ –

໑໘໓. ‘‘ກິໍ ສູຘ ວິຕ຺ຕໍ ປຸຣິສສ຺ສ ເສຏ຺ຐໍ, ກິໍ ສຸ ສຸຈິຓ຺ຓໍ ສຸຂມາວຫາຕິ;

ກິໍ ສຸ [ກິໍ ສູ (ສີ.)] ຫເວ ສາທຸຕຣໍ ຣສານໍ, ກຖໍ ຊີວິໍ ຊີວິຕມາຫຸ ເສຏ຺ຐໍ’’.

໑໘໔. ‘‘ສທ຺ຘີຘ ວິຕ຺ຕໍ ປຸຣິສສ຺ສ ເສຏ຺ຐໍ, ຘມ຺ໂມ ສຸຈິຓ຺ໂຓ ສຸຂມາວຫາຕິ;

ສຈ຺ຈໍ ຫເວ ສາທຸຕຣໍ ຣສານໍ, ປຎ຺ຎາຊີວິໍ ຊີວິຕມາຫຸ ເສຏ຺ຐໍ’’.

໑໘໕. ‘‘ກຖໍ ສຸ ຕຣຕິ ໂອຆໍ, ກຖໍ ສຸ ຕຣຕິ ອຓ຺ຓວໍ;

ກຖໍ ສຸ ທຸກ຺ຂມຈ຺ເຈຕິ, ກຖໍ ສຸ ປຣິສຸຊ຺ຌຕິ’’.

໑໘໖. ‘‘ສທ຺ຘາ ຕຣຕິ ໂອຆໍ, ອປ຺ປມາເທນ ອຓ຺ຓວໍ;

ວີຣິເຍນ [ວິຣິເຍນ (ສີ. ສ຺ຍາ. ກໍ. ປີ.)] ທຸກ຺ຂມຈ຺ເຈຕິ, ປຎ຺ຎາຍ ປຣິສຸຊ຺ຌຕິ’’.

໑໘໗. ‘‘ກຖໍ ສຸ ລຠເຕ ປຎ຺ຎໍ, ກຖໍ ສຸ ວິນ຺ທເຕ ຘນໍ;

ກຖໍ ສຸ ກິຕ຺ຕິໍ ປປ຺ໂປຕິ, ກຖໍ ມິຕ຺ຕານິ ຄນ຺ຖຕິ;

ອສ຺ມາ ໂລກາ ປຣໍ ໂລກໍ, ກຖໍ ເປຈ຺ຈ ນ ໂສຈຕິ’’.

໑໘໘. ‘‘ສທ຺ທຫາໂນ ອຣຫຕໍ, ຘມ຺ມໍ ນິພ຺ພານປຕ຺ຕິຍາ;

ສຸສ຺ສູສໍ [ສຸສ຺ສູສາ (ສີ. ປີ.)] ລຠເຕ ປຎ຺ຎໍ, ອປ຺ປມຕ຺ໂຕ ວິຈກ຺ຂໂຓ.

໑໘໙. ‘‘ປຕິຣູປກາຣີ ຘຸຣວາ, ອຸຏ຺ຐາຕາ ວິນ຺ທເຕ ຘນໍ;

ສຈ຺ເຈນ ກິຕ຺ຕິໍ ປປ຺ໂປຕິ, ທທໍ ມິຕ຺ຕານິ ຄນ຺ຖຕິ.

໑໙໐. ‘‘ຍສ຺ເສເຕ ຈຕຸໂຣ ຘມ຺ມາ, ສທ຺ຘສ຺ສ ຆຣເມສິໂນ;

ສຈ຺ຈໍ ຘມ຺ໂມ [ທໂມ (?)] ຘິຕິ ຈາໂຄ, ສ ເວ ເປຈ຺ຈ ນ ໂສຈຕິ.

໑໙໑. ‘‘ອິງ຺ຆ ອຎ຺ເຎປິ ປຸຈ຺ຉສ຺ສຸ, ປຸຖູ ສມຓພ຺ຣາຫ຺ມເຓ;

ຍທິ ສຈ຺ຈາ ທມາ ຈາຄາ, ຂນ຺ຕ຺ຍາ ຠິຍ຺ໂຍຘ ວິຊ຺ຊຕິ’’.

໑໙໒. ‘‘ກຖໍ ນຸ ທານິ ປຸຈ຺ເຉຍ຺ຍໍ, ປຸຖູ ສມຓພ຺ຣາຫ຺ມເຓ;

ໂຍຫໍ [ໂສຫໍ (ສີ. ປີ.)] ອຊ຺ຊ ປຊານາມິ, ໂຍ ອຕ຺ໂຖ ສມ຺ປຣາຍິໂກ.

໑໙໓. ‘‘ອຕ຺ຖາຍ ວຕ ເມ ພຸທ຺ໂຘ, ວາສາຍາຬວິມາຄມາ;

ໂຍຫໍ [ອຏ຺ຐິນ຺ຫາຣູຫິ ສໍຍຸຕ຺ໂຕ (ສ຺ຍາ. ກ.)] ອຊ຺ຊ ປຊານາມິ, ຍຕ຺ຖ ທິນ຺ນໍ ມຫປ຺ຜລໍ.

໑໙໔. ‘‘ໂສ ອຫໍ ວິຈຣິສ຺ສາມິ, ຄາມາ ຄາມໍ ປຸຣາ ປຸຣໍ;

ນມສ຺ສມາໂນ ສມ຺ພຸທ຺ຘໍ, ຘມ຺ມສ຺ສ ຈ ສຸຘມ຺ມຕ’’ນ຺ຕິ.

ອາຬວກສຸຕ຺ຕໍ ທສມໍ ນິຏ຺ຐິຕໍ.