໑໑. ວິຊຍສຸຕ຺ຕໍ

໑໙໕. ຈຣໍ ວາ ຍທິ ວາ ຕິຏ຺ຐໍ, ນິສິນ຺ໂນ ອຸທ ວາ ສຍໍ;

ສມິຎ຺ເຊຕິ ປສາເຣຕິ, ເອສາ ກາຍສ຺ສ ອິຎ຺ຊນາ.

໑໙໖. ອຏ຺ຐິນຫາຣຸສໍຍຸຕ຺ໂຕ, ຕຈມໍສາວເລປໂນ;

ຉວິຍາ ກາໂຍ ປຏິຈ຺ຉນ຺ໂນ, ຍຖາຠູຕໍ ນ ທິສ຺ສຕິ.

໑໙໗. ອນ຺ຕປູໂຣ ອຸທຣປູໂຣ, ຍກນເປຬສ຺ສ [ຍກເປຬສ຺ສ (ສີ. ສ຺ຍາ.)] ວຕ຺ຖິໂນ;

ຫທຍສ຺ສ ປປ຺ຜາສສ຺ສ, ວກ຺ກສ຺ສ ປິຫກສ຺ສ ຈ.

໑໙໘. ສິງ຺ຆາຓິກາຍ ເຂຬສ຺ສ, ເສທສ຺ສ ຈ ເມທສ຺ສ ຈ;

ໂລຫິຕສ຺ສ ລສິກາຍ, ປິຕ຺ຕສ຺ສ ຈ ວສາຍ ຈ.

໑໙໙. ອຖສ຺ສ ນວຫິ ໂສເຕຫິ, ອສຸຈີ ສວຕິ ສພ຺ພທາ;

ອກ຺ຂິມ຺ຫາ ອກ຺ຂິຄູຖໂກ, ກຓ຺ຓມ຺ຫາ ກຓ຺ຓຄູຖໂກ.

໒໐໐. ສິງ຺ຆາຓິກາ ຈ ນາສໂຕ, ມຸເຂນ ວມເຕກທາ;

ປິຕ຺ຕໍ ເສມ຺ຫຎ຺ຈ ວມຕິ, ກາຍມ຺ຫາ ເສທຊລ຺ລິກາ.

໒໐໑. ອຖສ຺ສ ສຸສິຣໍ ສີສໍ, ມຕ຺ຖລຸງ຺ຄສ຺ສ ປູຣິຕໍ;

ສຸຠໂຕ ນໍ ມຎ຺ຎຕິ, ພາໂລ ອວິຊ຺ຊາຍ ປຸຣກ຺ຂໂຕ.

໒໐໒. ຍທາ ຈ ໂສ ມໂຕ ເສຕິ, ອຸທ຺ຘຸມາໂຕ ວິນີລໂກ;

ອປວິທ຺ໂຘ ສຸສານສ຺ມິໍ, ອນເປກ຺ຂາ ໂຫນ຺ຕິ ຎາຕໂຍ.

໒໐໓. ຂາທນ຺ຕິ ນໍ ສຸວານາ [ສຸປາຓາ (ປີ.)] ຈ, ສິງ຺ຄາລາ [ສິຄາລາ (ສີ. ສ຺ຍາ. ກໍ. ປີ.)] ວກາ ກິມີ;

ກາກາ ຄິຊ຺ຌາ ຈ ຂາທນ຺ຕິ, ເຍ ຈຎ຺ເຎ ສນ຺ຕິ ປາຓິໂນ.

໒໐໔. ສຸຕ຺ວານ ພຸທ຺ຘວຈນໍ, ຠິກ຺ຂຸ ປຎ຺ຎາຓວາ ອິຘ;

ໂສ ໂຂ ນໍ ປຣິຊານາຕິ, ຍຖາຠູຕຎ຺ຫິ ປສ຺ສຕິ.

໒໐໕. ຍຖາ ອິທໍ ຕຖາ ເອຕໍ, ຍຖາ ເອຕໍ ຕຖາ ອິທໍ;

ອຊ຺ຌຕ຺ຕຎ຺ຈ ພຫິທ຺ຘາ ຈ, ກາເຍ ຉນ຺ທໍ ວິຣາຊເຍ.

໒໐໖. ຉນ຺ທຣາຄວິຣຕ຺ໂຕ ໂສ, ຠິກ຺ຂຸ ປຎ຺ຎາຓວາ ອິຘ;

ອຊ຺ຌຄາ ອມຕໍ ສນ຺ຕິໍ, ນິພ຺ພານໍ ປທມຈ຺ຈຸຕໍ.

໒໐໗. ທ຺ວິປາທໂກຍໍ [ທິປາທໂກຍໍ (ສີ. ສ຺ຍາ. ກໍ. ປີ.)] ອສຸຈິ, ທຸຄ຺ຄນ຺ໂຘ ປຣິຫາຣຕິ [ປຣິຫີຣຕິ (ສີ. ສ຺ຍາ. ກໍ. ປີ.)];

ນານາກຸຓປປຣິປູໂຣ, ວິສ຺ສວນ຺ໂຕ ຕໂຕ ຕໂຕ.

໒໐໘. ເອຕາທິເສນ ກາເຍນ, ໂຍ ມຎ຺ເຎ ອຸຓ຺ຓເມຕເວ [ອຸນ຺ນເມຕເວ (?)];

ປຣໍ ວາ ອວຊາເນຍ຺ຍ, ກິມຎ຺ຎຕ຺ຣ ອທສ຺ສນາຕິ.

ວິຊຍສຸຕ຺ຕໍ ເອກາທສມໍ ນິຏ຺ຐິຕໍ.