໑໒. ມຸນິສຸຕ຺ຕໍ

໒໐໙. ສນ຺ຖວາໂຕ [ສນ຺ຘວໂຕ (ກ.)] ຠຍໍ ຊາຕໍ, ນິເກຕາ ຊາຍເຕ ຣໂຊ;

ອນິເກຕມສນ຺ຖວໍ, ເອຕໍ ເວ ມຸນິທສ຺ສນໍ.

໒໑໐. ໂຍ ຊາຕມຸຈ຺ຉິຊ຺ຊ ນ ໂຣປເຍຍ຺ຍ, ຊາຍນ຺ຕມສ຺ສ ນານຸປ຺ປເວຈ຺ເຉ;

ຕມາຫຸ ເອກໍ ມຸນິນໍ ຈຣນ຺ຕໍ, ອທ຺ທກ຺ຂິ ໂສ ສນ຺ຕິປທໍ ມເຫສິ.

໒໑໑. ສງ຺ຂາຍ ວຕ຺ຖູນິ ປມາຍ [ປຫາຍ (ກ. ສີ. ກ.), ສມາຍ (ກ.) ປ + ມີ + ຕ຺ວາ = ປມາຍ, ຍຖາ ນິສ຺ສາຍາຕິປທໍ] ພີຊໍ, ສິເນຫມສ຺ສ ນານຸປ຺ປເວຈ຺ເຉ;

ສ ເວ ມຸນີ ຊາຕິຂຍນ຺ຕທສ຺ສີ, ຕກ຺ກໍ ປຫາຍ ນ ອຸເປຕິ ສງ຺ຂໍ.

໒໑໒. ອຎ຺ຎາຍ ສພ຺ພານິ ນິເວສນານິ, ອນິກາມຍໍ ອຎ຺ຎຕຣມ຺ປິ ເຕສໍ;

ສ ເວ ມຸນີ ວີຕເຄໂຘ ອຄິທ຺ໂຘ, ນາຍູຫຕີ ປາຣຄໂຕ ຫິ ໂຫຕິ.

໒໑໓. ສພ຺ພາຠິຠຸໍ ສພ຺ພວິທຸໍ ສຸເມຘໍ, ສພ຺ເພສຸ ຘມ຺ເມສຸ ອນູປລິຕ຺ຕໍ;

ສພ຺ພຎ຺ຊຫໍ ຕຓ຺ຫກ຺ຂເຍ ວິມຸຕ຺ຕໍ, ຕໍ ວາປິ ຘີຣາ ມຸນິ [ມຸນິໍ (ສີ. ປີ.)] ເວທຍນ຺ຕິ.

໒໑໔. ປຎ຺ຎາພລໍ ສີລວຕູປປນ຺ນໍ, ສມາຫິຕໍ ຌານຣຕໍ ສຕີມໍ;

ສງ຺ຄາ ປມຸຕ຺ຕໍ ອຂິລໍ ອນາສວໍ, ຕໍ ວາປິ ຘີຣາ ມຸນິ ເວທຍນ຺ຕິ.

໒໑໕. ເອກໍ ຈຣນ຺ຕໍ ມຸນິມປ຺ປມຕ຺ຕໍ, ນິນ຺ທາປສໍສາສຸ ອເວຘມານໍ;

ສີຫໍວ ສທ຺ເທສຸ ອສນ຺ຕສນ຺ຕໍ, ວາຕໍວ ຊາລມ຺ຫິ ອສຊ຺ຊມານໍ;

ປທ຺ມໍວ [ປທຸມໍວ (ສີ. ສ຺ຍາ. ປີ.)] ໂຕເຍນ ອລິປ຺ປມານໍ [ອລິມ຺ປມານໍ (ສ຺ຍາ. ກ.)], ເນຕາຣມຎ຺ເຎສມນຎ຺ຎເນຍ຺ຍໍ;

ຕໍ ວາປິ ຘີຣາ ມຸນິ ເວທຍນ຺ຕິ.

໒໑໖. ໂຍ ໂອຄຫເຓ ຖມ຺ໂຠຣິວາຠິຊາຍຕິ, ຍສ຺ມິໍ ປເຣ ວາຈາປຣິຍນ຺ຕໍ [ວາຈໍ ປຣິຍນ຺ຕໍ (ກ.)] ວທນ຺ຕິ;

ຕໍ ວີຕຣາຄໍ ສຸສມາຫິຕິນ຺ທ຺ຣິຍໍ, ຕໍ ວາປິ ຘີຣາ ມຸນິ ເວທຍນ຺ຕິ.

໒໑໗. ໂຍ ເວ ຐິຕຕ຺ໂຕ ຕສຣໍວ ອຸຊ຺ຊຸ, ຊິຄຸຈ຺ຉຕິ ກມ຺ເມຫິ ປາປເກຫິ;

ວີມໍສມາໂນ ວິສມໍ ສມຎ຺ຈ, ຕໍ ວາປິ ຘີຣາ ມຸນິ ເວທຍນ຺ຕິ.

໒໑໘. ໂຍ ສຎ຺ຎຕຕ຺ໂຕ ນ ກໂຣຕິ ປາປໍ, ທຫໂຣ ມຊ຺ຌິໂມ ຈ ມຸນິ [ທຫໂຣ ຈ ມຊ຺ໂຌ ຈ ມຸນີ (ສີ. ສ຺ຍາ. ກໍ. ປີ.)] ຍຕຕ຺ໂຕ;

ອໂຣສເນຍ຺ໂຍ ນ ໂສ ໂຣເສຕິ ກຎ຺ຈິ [ນ ໂຣເສຕິ (ສ຺ຍາ.)], ຕໍ ວາປິ ຘີຣາ ມຸນິ ເວທຍນ຺ຕິ.

໒໑໙. ຍທຄ຺ຄໂຕ ມຊ຺ຌໂຕ ເສສໂຕ ວາ, ປິຓ຺ຑໍ ລເຠຖ ປຣທຕ຺ຕູປຊີວີ;

ນາລໍ ຖຸຕຸໍ ໂນປິ ນິປຈ຺ຈວາທີ, ຕໍ ວາປິ ຘີຣາ ມຸນິ ເວທຍນ຺ຕິ.

໒໒໐. ມຸນິໍ ຈຣນ຺ຕໍ ວິຣຕໍ ເມຖຸນສ຺ມາ, ໂຍ ໂຍພ຺ພເນ ໂນປນິພຊ຺ຌເຕ ກ຺ວຈິ;

ມທປ຺ປມາທາ ວິຣຕໍ ວິປ຺ປມຸຕ຺ຕໍ, ຕໍ ວາປິ ຘີຣາ ມຸນິ ເວທຍນ຺ຕິ.

໒໒໑. ອຎ຺ຎາຍ ໂລກໍ ປຣມຕ຺ຖທສ຺ສິໍ, ໂອຆໍ ສມຸທ຺ທໍ ອຕິຕຣິຍ ຕາທິໍ;

ຕໍ ຉິນ຺ນຄນ຺ຖໍ ອສິຕໍ ອນາສວໍ, ຕໍ ວາປິ ຘີຣາ ມຸນິ ເວທຍນ຺ຕິ.

໒໒໒. ອສມາ ອຸໂຠ ທູຣວິຫາຣວຸຕ຺ຕິໂນ, ຄິຫີ [ຄິຫິ (ກ.)] ທາຣໂປສີ ອມໂມ ຈ ສຸພ຺ພໂຕ;

ປຣປາຓໂຣຘາຍ ຄິຫີ ອສຎ຺ຎໂຕ, ນິຈ຺ຈໍ ມຸນີ ຣກ຺ຂຕິ ປາຓິເນ [ປາຓິໂນ (ສີ.)] ຍໂຕ.

໒໒໓. ສິຂີ ຍຖາ ນີລຄີໂວ [ນີລຄິໂວ (ສ຺ຍາ.)] ວິຫງ຺ຄໂມ, ຫໍສສ຺ສ ໂນເປຕິ ຊວໍ ກຸທາຈນໍ;

ເອວໍ ຄິຫີ ນານຸກໂຣຕິ ຠິກ຺ຂຸໂນ, ມຸນິໂນ ວິວິຕ຺ຕສ຺ສ ວນມ຺ຫິ ຌາຍໂຕຕິ.

ມຸນິສຸຕ຺ຕໍ ທ຺ວາທສມໍ ນິຏ຺ຐິຕໍ.

ອຸຣຄວຄ຺ໂຄ ປຐໂມ ນິຏ຺ຐິໂຕ.