໖. ປຣາຠວສຸຕ຺ຕໍ

ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ໂຂ ອຎ຺ຎຕຣາ ເທວຕາ ອຠິກ຺ກນ຺ຕາຍ ຣຕ຺ຕິຍາ ອຠິກ຺ກນ຺ຕວຓ຺ຓາ ເກວລກປ຺ປໍ ເຊຕວນໍ ໂອຠາເສຕ຺ວາ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິຕາ ໂຂ ສາ ເທວຕາ ຠຄວນ຺ຕໍ ຄາຖາຍ ອຊ຺ຌຠາສິ –

໙໑. ‘‘ປຣາຠວນ຺ຕໍ ປຸຣິສໍ, ມຍໍ ປຸຈ຺ຉາມ ໂຄຕມ [ໂຄຕມໍ (ສີ. ສ຺ຍາ.)];

ຠຄວນ຺ຕໍ [ຠວນ຺ຕໍ (ສ຺ຍາ. ກ.)] ປຸຏ຺ຐຸມາຄມ຺ມ, ກິໍ ປຣາຠວໂຕ ມຸຂໍ’’.

໙໒. ‘‘ສຸວິຊາໂນ ຠວໍ ໂຫຕິ, ສຸວິຊາໂນ [ທຸວິຊາໂນ (ສ຺ຍາ. ກ.)] ປຣາຠໂວ;

ຘມ຺ມກາໂມ ຠວໍ ໂຫຕິ, ຘມ຺ມເທສ຺ສີ ປຣາຠໂວ’’.

໙໓. ‘‘ອິຕິ ເຫຕໍ ວິຊານາມ, ປຐໂມ ໂສ ປຣາຠໂວ;

ທຸຕິຍໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໙໔. ‘‘ອສນ຺ຕສ຺ສ ປິຍາ ໂຫນ຺ຕິ, ສນ຺ເຕ ນ ກຸຣຸເຕ ປິຍໍ;

ອສຕໍ ຘມ຺ມໍ ໂຣເຈຕິ, ຕໍ ປຣາຠວໂຕ ມຸຂໍ’’.

໙໕. ‘‘ອິຕິ ເຫຕໍ ວິຊານາມ, ທຸຕິໂຍ ໂສ ປຣາຠໂວ;

ຕຕິຍໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໙໖. ‘‘ນິທ຺ທາສີລີ ສຠາສີລີ, ອນຸຏ຺ຐາຕາ ຈ ໂຍ ນໂຣ;

ອລໂສ ໂກຘປຎ຺ຎາໂຓ, ຕໍ ປຣາຠວໂຕ ມຸຂໍ’’.

໙໗. ‘‘ອິຕິ ເຫຕໍ ວິຊານາມ, ຕຕິໂຍ ໂສ ປຣາຠໂວ;

ຈຕຸຕ຺ຖໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໙໘. ‘‘ໂຍ ມາຕຣໍ [ໂຍ ມາຕຣໍ ວາ (ສີ. ສ຺ຍາ. ກໍ. ປີ.)] ປິຕຣໍ ວາ, ຊິຓ຺ຓກໍ ຄຕໂຍພ຺ພນໍ;

ປຫຸ ສນ຺ໂຕ ນ ຠຣຕິ, ຕໍ ປຣາຠວໂຕ ມຸຂໍ’’.

໙໙. ‘‘ອິຕິ ເຫຕໍ ວິຊານາມ, ຈຕຸຕ຺ໂຖ ໂສ ປຣາຠໂວ;

ປຎ຺ຈມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໐໐. ‘‘ໂຍ ພ຺ຣາຫ຺ມຓໍ [ໂຍ ພ຺ຣາຫ຺ມຓໍ ວາ (ສີ. ສ຺ຍາ. ກໍ. ປີ.)] ສມຓໍ ວາ, ອຎ຺ຎໍ ວາປິ ວນິພ຺ພກໍ;

ມຸສາວາເທນ ວຎ຺ເຈຕິ, ຕໍ ປຣາຠວໂຕ ມຸຂໍ’’.

໑໐໑. ‘‘ອິຕິ ເຫຕໍ ວິຊານາມ, ປຎ຺ຈໂມ ໂສ ປຣາຠໂວ;

ຉຏ຺ຐມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໐໒. ‘‘ປຫູຕວິຕ຺ໂຕ ປຸຣິໂສ, ສຫິຣຎ຺ໂຎ ສໂຠຊໂນ;

ເອໂກ ຠຸຎ຺ຊຕິ ສາທູນິ, ຕໍ ປຣາຠວໂຕ ມຸຂໍ’’.

໑໐໓. ‘‘ອິຕິ ເຫຕໍ ວິຊານາມ, ຉຏ຺ຐໂມ ໂສ ປຣາຠໂວ;

ສຕ຺ຕມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໐໔. ‘‘ຊາຕິຕ຺ຖທ຺ໂຘ ຘນຕ຺ຖທ຺ໂຘ, ໂຄຕ຺ຕຕ຺ຖທ຺ໂຘ ຈ ໂຍ ນໂຣ;

ສຎ຺ຎາຕິໍ ອຕິມຎ຺ເຎຕິ, ຕໍ ປຣາຠວໂຕ ມຸຂໍ’’.

໑໐໕. ‘‘ອິຕິ ເຫຕໍ ວິຊານາມ, ສຕ຺ຕໂມ ໂສ ປຣາຠໂວ;

ອຏ຺ຐມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໐໖. ‘‘ອິຕ຺ຖິຘຸຕ຺ໂຕ ສຸຣາຘຸຕ຺ໂຕ, ອກ຺ຂຘຸຕ຺ໂຕ ຈ ໂຍ ນໂຣ;

ລທ຺ຘໍ ລທ຺ຘໍ ວິນາເສຕິ, ຕໍ ປຣາຠວໂຕ ມຸຂໍ’’.

໑໐໗. ‘‘ອິຕິ ເຫຕໍ ວິຊານາມ, ອຏ຺ຐໂມ ໂສ ປຣາຠໂວ;

ນວມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໐໘. ‘‘ເສຫິ ທາເຣຫິ ອສນ຺ຕຸຏ຺ໂຐ [ທາເຣຫ຺ຍສນ຺ຕຸຏ຺ໂຐ (ກ.)], ເວສິຍາສຸ ປທຸສ຺ສຕິ [ປທິສ຺ສຕິ (ສີ.)];

ທຸສ຺ສຕິ [ທິສ຺ສຕິ (ສີ. ປີ.)] ປຣທາເຣສຸ, ຕໍ ປຣາຠວໂຕ ມຸຂໍ’’.

໑໐໙. ‘‘ອິຕິ ເຫຕໍ ວິຊານາມ, ນວໂມ ໂສ ປຣາຠໂວ;

ທສມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໑໐. ‘‘ອຕີຕໂຍພ຺ພໂນ ໂປໂສ, ອາເນຕິ ຕິມ຺ພຣຸຕ຺ຖນິໍ;

ຕສ຺ສາ ອິສ຺ສາ ນ ສຸປຕິ, ຕໍ ປຣາຠວໂຕ ມຸຂໍ’’.

໑໑໑. ‘‘ອິຕິ ເຫຕໍ ວິຊານາມ, ທສໂມ ໂສ ປຣາຠໂວ;

ເອກາທສມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໑໒. ‘‘ອິຕ຺ຖິໍ ໂສຓ຺ຑິໍ ວິກິຣຓິໍ, ປຸຣິສໍ ວາປິ ຕາທິສໍ;

ອິສ຺ສຣິຍສ຺ມິໍ ຐເປຕິ [ຐາເປຕິ (ສີ. ປີ.), ຖເປຕິ (ກ.)], ຕໍ ປຣາຠວໂຕ ມຸຂໍ’’.

໑໑໓. ‘‘ອິຕິ ເຫຕໍ ວິຊານາມ, ເອກາທສໂມ ໂສ ປຣາຠໂວ;

ທ຺ວາທສມໍ ຠຄວາ ພ຺ຣູຫິ, ກິໍ ປຣາຠວໂຕ ມຸຂໍ’’.

໑໑໔. ‘‘ອປ຺ປໂຠໂຄ ມຫາຕຓ຺ໂຫ, ຂຕ຺ຕິເຍ ຊາຍເຕ ກຸເລ;

ໂສ ຈ ຣຊ຺ຊໍ ປຕ຺ຖຍຕິ, ຕໍ ປຣາຠວໂຕ ມຸຂໍ’’.

໑໑໕. ‘‘ເອເຕ ປຣາຠເວ ໂລເກ, ປຓ຺ຑິໂຕ ສມເວກ຺ຂິຍ;

ອຣິໂຍ ທສ຺ສນສມ຺ປນ຺ໂນ, ສ ໂລກໍ ຠຊເຕ ສິວ’’ນ຺ຕິ.

ປຣາຠວສຸຕ຺ຕໍ ຉຏ຺ຐໍ ນິຏ຺ຐິຕໍ.