໕. ຈຸນ຺ທສຸຕ຺ຕໍ

໘໓. ‘‘ປຸຈ຺ຉາມິ ມຸນິໍ ປຫູຕປຎ຺ຎໍ, (ອິຕິ ຈຸນ຺ໂທ ກມ຺ມາຣປຸຕ຺ໂຕ)

ພຸທ຺ຘໍ ຘມ຺ມສ຺ສາມິໍ ວີຕຕຓ຺ຫໍ;

ທ຺ວິປທຸຕ຺ຕມໍ [ທິປທຸຕ຺ຕມໍ (ສີ. ສ຺ຍາ. ກໍ. ປີ.)] ສາຣຖີນໍ ປວຣໍ, ກຕິ ໂລເກ ສມຓາ ຕທິງ຺ຆ ພ຺ຣູຫິ’’.

໘໔. ‘‘ຈຕຸໂຣ ສມຓາ ນ ປຎ຺ຈມຕ຺ຖິ, (ຈຸນ຺ທາຕິ ຠຄວາ)

ເຕ ເຕ ອາວິກໂຣມິ ສກ຺ຂິປຸຏ຺ໂຐ;

ມຄ຺ຄຊິໂນ ມຄ຺ຄເທສໂກ ຈ, ມຄ຺ເຄ ຊີວຕິ ໂຍ ຈ ມຄ຺ຄທູສີ’’.

໘໕. ‘‘ກໍ ມຄ຺ຄຊິນໍ ວທນ຺ຕິ ພຸທ຺ຘາ, (ອິຕິ ຈຸນ຺ໂທ ກມ຺ມາຣປຸຕ຺ໂຕ)

ມຄ຺ຄກ຺ຂາຍີ ກຖໍ ອຕຸລ຺ໂຍ ໂຫຕິ;

ມຄ຺ເຄ ຊີວຕິ ເມ ພ຺ຣູຫິ ປຸຏ຺ໂຐ, ອຖ ເມ ອາວິກໂຣຫິ ມຄ຺ຄທູສິໍ’’ [ມຄ຺ຄທູສີ (ກ.)].

໘໖. ‘‘ໂຍ ຕິຓ຺ຓກຖໍກໂຖ ວິສລ຺ໂລ, ນິພ຺ພານາຠິຣໂຕ ອນານຸຄິທ຺ໂຘ;

ໂລກສ຺ສ ສເທວກສ຺ສ ເນຕາ, ຕາທິໍ ມຄ຺ຄຊິນໍ ວທນ຺ຕິ ພຸທ຺ຘາ.

໘໗. ‘‘ປຣມໍ ປຣມນ຺ຕິ ໂຍຘ ຎຕ຺ວາ, ອກ຺ຂາຕິ ວິຠຊເຕ ອິເຘວ ຘມ຺ມໍ;

ຕໍ ກງ຺ຂຉິທໍ ມຸນິໍ ອເນຊໍ, ທຸຕິຍໍ ຠິກ຺ຂຸນມາຫຸ ມຄ຺ຄເທສິໍ.

໘໘. ‘‘ໂຍ ຘມ຺ມປເທ ສຸເທສິເຕ, ມຄ຺ເຄ ຊີວຕິ ສຎ຺ຎໂຕ ສຕີມາ;

ອນວຊ຺ຊປທານິ ເສວມາໂນ, ຕຕິຍໍ ຠິກ຺ຂຸນມາຫຸ ມຄ຺ຄຊີວິໍ.

໘໙. ‘‘ຉທນໍ ກຕ຺ວານ ສຸພ຺ພຕານໍ, ປກ຺ຂນ຺ທີ ກຸລທູສໂກ ປຄພ຺ໂຠ;

ມາຍາວີ ອສຎ຺ຎໂຕ ປລາໂປ, ປຕິຣູເປນ ຈຣໍ ສ ມຄ຺ຄທູສີ.

໙໐. ‘‘ເອເຕ ຈ ປຏິວິຊ຺ຌິ ໂຍ ຄຫຏ຺ໂຐ, ສຸຕວາ ອຣິຍສາວໂກ ສປຎ຺ໂຎ;

ສພ຺ເພ ເນຕາທິສາຕິ [ສພ຺ເພ ເນ ຕາທິສາຕິ (ສີ. ສ຺ຍາ. ປີ.)] ຎຕ຺ວາ, ອິຕິ ທິສ຺ວາ ນ ຫາເປຕິ ຕສ຺ສ ສທ຺ຘາ;

ກຖໍ ຫິ ທຸຏ຺ເຐນ ອສມ຺ປທຸຏ຺ຐໍ, ສຸທ຺ຘໍ ອສຸທ຺ເຘນ ສມໍ ກເຣຍ຺ຍາ’’ຕິ.

ຈຸນ຺ທສຸຕ຺ຕໍ ປຎ຺ຈມໍ ນິຏ຺ຐິຕໍ.