໙. ຄູຖຂາທກເປຕິວຕ຺ຖຸ

໗໗໔. ‘‘ຄູຖກູປໂຕ ອຸຄ຺ຄນ຺ຕ຺ວາ, ກາ ນຸ ທີນາ ປຕິຏ຺ຐສິ;

ນິສ຺ສໍສຍໍ ປາປກມ຺ມນ຺ຕາ, ກິໍ ນຸ ສທ຺ທຫເສ ຕຸວ’’ນ຺ຕິ.

໗໗໕. ‘‘ອຫໍ ຠທນ຺ເຕ ເປຕີມ຺ຫິ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’’ຕິ.

໗໗໖. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ອິທໍ ທຸກ຺ຂໍ ນິຄຈ຺ຉສີ’’ຕິ.

໗໗໗. ‘‘ອຫຸ ອາວາສິໂກ ມຍ຺ຫໍ, ອິສ຺ສຸກີ ກຸລມຈ຺ຉຣີ;

ອຊ຺ໂຌສິໂຕ ມຍ຺ຫໍ ຆເຣ, ກທຣິໂຍ ປຣິຠາສໂກ.

໗໗໘. ‘‘ຕສ຺ສາຫໍ ວຈນໍ ສຸຕ຺ວາ, ຠິກ຺ຂໂວ ປຣິຠາສິສໍ;

ຕສ຺ສ ກມ຺ມວິປາເກນ, ເປຕໂລກໍ ອິໂຕ ຄຕາ’’ຕິ.

໗໗໙. ‘‘ອມິຕ຺ໂຕ ມິຕ຺ຕວຓ຺ເຓນ, ໂຍ ເຕ ອາສິ ກຸລູປໂກ;

ກາຍສ຺ສ ເຠທາ ທຸປ຺ປຎ຺ໂຎ, ກິໍ ນຸ ເປຈ຺ຈ ຄຕິໍ ຄໂຕ’’ຕິ.

໗໘໐. ‘‘ຕສ຺ເສວາຫໍ ປາປກມ຺ມສ຺ສ, ສີເສ ຕິຏ຺ຐາມິ ມຕ຺ຖເກ;

ໂສ ຈ ປຣວິສຍໍ ປຕ຺ໂຕ, ມເມວ ປຣິຈາຣໂກ.

໗໘໑. ‘‘ຍໍ ຠທນ຺ເຕ ຫທນ຺ຕຎ຺ເຎ, ເອຕໍ ເມ ໂຫຕິ ໂຠຊນໍ;

ອຫຎ຺ຈ ໂຂ ຍໍ ຫທາມິ, ເອຕໍ ໂສ ອຸປຊີວຕີ’’ຕິ.

ຄູຖຂາທກເປຕິວຕ຺ຖຸ ນວມໍ.