໗. ຣາຊປຸຕ຺ຕເປຕວຕ຺ຖຸ

໗໕໓. ປຸພ຺ເພ ກຕານໍ ກມ຺ມານໍ, ວິປາໂກ ມຖເຍ ມນໍ;

ຣູເປ ສທ຺ເທ ຣເສ ຄນ຺ເຘ, ໂຜຏ຺ຐພ຺ເພ ຈ ມໂນຣເມ.

໗໕໔. ນຈ຺ຈໍ ຄີຕໍ ຣຕິໍ ຂິຑ຺ຑໍ, ອນຸຠຸຕ຺ວາ ອນປ຺ປກໍ;

ອຸຍ຺ຍາເນ ປຣິຈຣິຕ຺ວາ, ປວິສນ຺ໂຕ ຄິຣິພ຺ພຊໍ.

໗໕໕. ອິສິໍ ສຸເນຕ຺ຕ [ສຸນິຕ (ກ.)] ມທ຺ທກ຺ຂິ, ອຕ຺ຕທນ຺ຕໍ ສມາຫິຕໍ;

ອປ຺ປິຈ຺ຉໍ ຫິຣິສມ຺ປນ຺ນໍ, ອຸຎ຺ເຉ ປຕ຺ຕຄເຕ ຣຕໍ.

໗໕໖. ຫຕ຺ຖິກ຺ຂນ຺ຘໂຕ ໂອຣຸຍ຺ຫ, ລທ຺ຘາ ຠນ຺ເຕຕິ ຈາພ຺ຣວິ;

ຕສ຺ສ ປຕ຺ຕໍ ຄເຫຕ຺ວານ, ອຸຈ຺ຈໍ ປຄ຺ຄຍ຺ຫ ຂຕ຺ຕິໂຍ.

໗໕໗. ຖຓ຺ຑິເລ ປຕ຺ຕໍ ຠິນ຺ທິຕ຺ວາ, ຫສມາໂນ ອປກ຺ກມິ;

‘‘ຣຎ຺ໂຎ ກິຕວສ຺ສາຫໍ ປຸຕ຺ໂຕ, ກິໍ ມໍ ຠິກ຺ຂຸ ກຣິສ຺ສສິ’’.

໗໕໘. ຕສ຺ສ ກມ຺ມສ຺ສ ຜຣຸສສ຺ສ, ວິປາໂກ ກຏຸໂກ ອຫຸ;

ຍໍ ຣາຊປຸຕ຺ໂຕ ເວເທສິ, ນິຣຍມ຺ຫິ ສມປ຺ປິໂຕ.

໗໕໙. ຉເຬວ ຈຕຸຣາສີຕິ, ວສ຺ສານິ ນວຸຕານິ ຈ;

ຠຸສໍ ທຸກ຺ຂໍ ນິຄຈ຺ຉິຕ຺ໂຖ, ນິຣເຍ ກຕກິພ຺ພິໂສ.

໗໖໐. ອຸຕ຺ຕາໂນປິ ຈ ປຈ຺ຈິຕ຺ຖ, ນິກຸຊ຺ໂຊ ວາມທກ຺ຂິໂຓ;

ອຸທ຺ຘໍປາໂທ ຐິໂຕ ເຈວ, ຈິຣໍ ພາໂລ ອປຈ຺ຈຖ.

໗໖໑. ພຫູນິ ວສ຺ສສຫສ຺ສານິ, ປູຄານິ ນຫຸຕານິ ຈ;

ຠຸສໍ ທຸກ຺ຂໍ ນິຄຈ຺ຉິຕ຺ໂຖ, ນິຣເຍ ກຕກິພ຺ພິໂສ.

໗໖໒. ເອຕາທິສໍ ໂຂ ກຏຸກໍ, ອປ຺ປທຸຏ຺ຐປ຺ປໂທສິນໍ;

ປຈ຺ຈນ຺ຕິ ປາປກມ຺ມນ຺ຕາ, ອິສິມາສຊ຺ຊ ສຸພ຺ພຕໍ.

໗໖໓. ໂສ ຕຕ຺ຖ ພຫຸວສ຺ສານິ, ເວທຍິຕ຺ວາ ພຫຸໍ ທຸຂໍ;

ຂຸປ຺ປິປາສຫໂຕ ນາມ [ຂຸປ຺ປິປາສາຫໂຕ ນາມ (ສີ. ປີ)], ເປໂຕ ອາສິ ຕໂຕ ຈຸໂຕ.

໗໖໔. ເອຕມາທີນວໍ ຎຕ຺ວາ [ທິສ຺ວາ (ສີ.)], ອິສ຺ສຣມທສມ຺ຠວໍ;

ປຫາຍ ອິສ຺ສຣມທໍ, ນິວາຕມນຸວຕ຺ຕເຍ.

໗໖໕. ທິຏ຺ເຐວ ຘມ຺ເມ ປາສໍໂສ, ໂຍ ພຸທ຺ເຘສຸ ສຄາຣໂວ;

ກາຍສ຺ສ ເຠທາ ສປ຺ປຎ຺ໂຎ, ສຄ຺ຄໍ ໂສ ອຸປປຊ຺ຊຕີຕິ.

ຣາຊປຸຕ຺ຕເປຕວຕ຺ຖຸ ສຕ຺ຕມໍ.