໔. ເຣວຕີເປຕວຕ຺ຖຸ

໗໑໔. [ວິ. ວ. ໘໖໓] ‘‘ອຸຏ຺ເຐຫິ ເຣວເຕ ສຸປາປຘມ຺ເມ, ອປາຣຸຕທ຺ວາເຣ ອທານສີເລ;

ເນສ຺ສາມ ຕໍ ຍຕ຺ຖ ຖຸນນ຺ຕິ ທຸຄ຺ຄຕາ, ສມປ຺ປິຕາ [ສມຊ຺ຊຕາ (ສີ.)] ເນຣຍິກາ ທຸເຂນາ’’ຕິ.

໗໑໕. ອິຈ຺ເຈວ [ອິຈ຺ເຈວໍ (ສ຺ຍາ. ກ.)] ວຕ຺ວານ ຍມສ຺ສ ທູຕາ, ເຕ ທ຺ເວ ຍກ຺ຂາ ໂລຫິຕກ຺ຂາ ພ຺ຣຫນ຺ຕາ;

ປຈ຺ເຈກພາຫາສຸ ຄເຫຕ຺ວາ ເຣວຕໍ, ປກ຺ກາມຍຸໍ ເທວຄຓສ຺ສ ສນ຺ຕິເກ.

໗໑໖. ‘‘ອາທິຈ຺ຈວຓ຺ຓໍ ຣຸຈິຣໍ ປຠສ຺ສຣໍ, ພ຺ຍມ຺ຫໍ ສຸຠໍ ກຎ຺ຈນຊາລຉນ຺ນໍ;

ກສ຺ເສຕມາກິຓ຺ຓຊນໍ ວິມານໍ, ສຸຣິຍສ຺ສ ຣໍສີຣິວ ໂຊຕມານໍ.

໗໑໗. ‘‘ນາຣີຄຓາ ຈນ຺ທນສາຣລິຕ຺ຕາ [ຈນ຺ທນສາຣານຸລິຕ຺ຕາ (ສ຺ຍາ.)], ອຸຠໂຕ ວິມານໍ ອຸປໂສຠຍນ຺ຕິ;

ຕໍ ທິສ຺ສຕິ ສຸຣິຍສມານວຓ຺ຓໍ, ໂກ ໂມທຕິ ສຄ຺ຄປຕ຺ໂຕ ວິມາເນ’’ຕິ.

໗໑໘. ‘‘ພາຣາຓສິຍໍ ນນ຺ທິໂຍ ນາມາສິ, ອຸປາສໂກ ອມຈ຺ຉຣີ ທານປຕິ ວທຎ຺ຎູ;

ຕສ຺ເສຕມາກິຓ຺ຓຊນໍ ວິມານໍ, ສຸຣິຍສ຺ສ ຣໍສີຣິວ ໂຊຕມານໍ.

໗໑໙. ‘‘ນາຣີຄຓາ ຈນ຺ທນສາຣລິຕ຺ຕາ, ອຸຠໂຕ ວິມານໍ ອຸປໂສຠຍນ຺ຕິ;

ຕໍ ທິສ຺ສຕິ ສຸຣິຍສມານວຓ຺ຓໍ, ໂສ ໂມທຕິ ສຄ຺ຄປຕ຺ໂຕ ວິມາເນ’’ຕິ.

໗໒໐. ‘‘ນນ຺ທິຍສ຺ສາຫໍ ຠຣິຍາ, ອຄາຣິນີ ສພ຺ພກຸລສ຺ສ ອິສ຺ສຣາ;

ຠຕ຺ຕຸ ວິມາເນ ຣມິສ຺ສາມິ ທານຫໍ, ນ ປຕ຺ຖເຍ ນິຣຍທສ຺ສນາຍາ’’ຕິ.

໗໒໑. ‘‘ເອໂສ ເຕ ນິຣໂຍ ສຸປາປຘມ຺ເມ, ປຸຎ຺ຎໍ ຕຍາ ອກຕໍ ຊີວໂລເກ;

ນ ຫິ ມຈ຺ຉຣີ ໂຣສໂກ ປາປຘມ຺ໂມ, ສຄ຺ຄູປຄານໍ ລຠຕິ ສຫພ຺ຍຕ’’ນ຺ຕິ.

໗໒໒. ‘‘ກິໍ ນຸ ຄູຖຎ຺ຈ ມຸຕ຺ຕຎ຺ຈ, ອສຸຈີ ປຏິທິສ຺ສຕິ;

ທຸຄ຺ຄນ຺ຘໍ ກິມິທໍ ມີຬ຺ຫໍ, ກິເມຕໍ ອຸປວາຍຕີ’’ຕິ.

໗໒໓. ‘‘ເອສ ສໍສວໂກ ນາມ, ຄມ຺ຠີໂຣ ສຕໂປຣິໂສ;

ຍຕ຺ຖ ວສ຺ສສຫສ຺ສານິ, ຕຸວໍ ປຈ຺ຈສິ ເຣວເຕ’’ຕິ.

໗໒໔. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ເກນ ສໍສວໂກ ລທ຺ໂຘ, ຄມ຺ຠີໂຣ ສຕໂປຣິໂສ’’ຕິ.

໗໒໕. ‘‘ສມເຓ ພ຺ຣາຫ຺ມເຓ ຈາປິ, ອຎ຺ເຎ ວາປິ ວນິພ຺ພເກ;

ມຸສາວາເທນ ວຎ຺ເຈສິ, ຕໍ ປາປໍ ປກຕໍ ຕຍາ.

໗໒໖. ‘‘ເຕນ ສໍສວໂກ ລທ຺ໂຘ, ຄມ຺ຠີໂຣ ສຕໂປຣິໂສ;

ຕຕ຺ຖ ວສ຺ສສຫສ຺ສານິ, ຕຸວໍ ປຈ຺ຈສິ ເຣວເຕ.

໗໒໗. ‘‘ຫຕ຺ເຖປິ ຉິນ຺ທນ຺ຕິ ອໂຖປິ ປາເທ, ກຓ຺ເຓປິ ຉິນ຺ທນ຺ຕິ ອໂຖປິ ນາສໍ;

ອໂຖປິ ກາໂກຬຄຓາ ສເມຈ຺ຈ, ສງ຺ຄມ຺ມ ຂາທນ຺ຕິ ວິຜນ຺ທມານ’’ນ຺ຕິ.

໗໒໘. ‘‘ສາຘຸ ໂຂ ມໍ ປຏິເນຖ, ກາຫາມິ ກຸສລໍ ພຫຸໍ;

ທາເນນ ສມຈຣິຍາຍ, ສໍຍເມນ ທເມນ ຈ;

ຍໍ ກຕ຺ວາ ສຸຂິຕາ ໂຫນ຺ຕິ, ນ ຈ ປຈ຺ຉານຸຕປ຺ປເຣ’’ຕິ.

໗໒໙. ‘‘ປຸເຣ ຕຸວໍ ປມຊ຺ຊິຕ຺ວາ, ອິທານິ ປຣິເທວສິ;

ສຍໍ ກຕານໍ ກມ຺ມານໍ, ວິປາກໍ ອນຸໂຠສ຺ສສີ’’ຕິ.

໗໓໐. ‘‘ໂກ ເທວໂລກໂຕ ມນຸສ຺ສໂລກໍ, ຄນ຺ຕ຺ວານ ປຸຏ຺ໂຐ ເມ ເອວໍ ວເທຍ຺ຍ;

‘ນິກ຺ຂິຕ຺ຕທຓ຺ເຑສຸ ທທາຖ ທານໍ, ອຈ຺ຉາທນໍ ເສຍ຺ຍ [ສຍນ (ສີ.)] ມຖນ຺ນປານໍ;

ນ ຫິ ມຈ຺ຉຣີ ໂຣສໂກ ປາປຘມ຺ໂມ, ສຄ຺ຄູປຄານໍ ລຠຕິ ສຫພ຺ຍຕໍ’.

໗໓໑. ‘‘ສາຫໍ ນູນ ອິໂຕ ຄນ຺ຕ຺ວາ, ໂຍນິໍ ລທ຺ຘານ ມານຸສິໍ;

ວທຎ຺ຎູ ສີລສມ຺ປນ຺ນາ, ກາຫາມິ ກຸສລໍ ພຫຸໍ;

ທາເນນ ສມຈຣິຍາຍ, ສໍຍເມນ ທເມນ ຈ.

໗໓໒. ‘‘ອາຣາມານິ ຈ ໂຣປິສ຺ສໍ, ທຸຄ຺ເຄ ສງ຺ກມນານິ ຈ;

ປປຎ຺ຈ ອຸທປານຎ຺ຈ, ວິປ຺ປສນ຺ເນນ ເຈຕສາ.

໗໓໓. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໗໓໔. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;

ນ ຈ ທາເນ ປມຊ຺ຊິສ຺ສໍ, ສາມໍ ທິຏ຺ຐມິທໍ ມຍາ’’ຕິ.

໗໓໕. ອິຈ຺ເຈວໍ ວິປ຺ປລປນ຺ຕິໍ, ຜນ຺ທມານໍ ຕໂຕ ຕໂຕ;

ຂິປິໍສຸ ນິຣເຍ ໂຆເຣ, ອຸທ຺ຘໍປາທໍ ອວໍສິຣໍ.

໗໓໖. ‘‘ອຫໍ ປຸເຣ ມຈ຺ຉຣິນີ ອໂຫສິໍ, ປຣິຠາສິກາ ສມຓພ຺ຣາຫ຺ມຓານໍ;

ວິຕເຖນ ຈ ສາມິກໍ ວຎ຺ຈຍິຕ຺ວາ, ປຈ຺ຈາມຫໍ ນິຣເຍ ໂຆຣຣູເປ’’ຕິ.

ເຣວຕີເປຕວຕ຺ຖຸ ຈຕຸຕ຺ຖໍ.