໙. ກູຏວິນິຈ຺ຉຍິກເປຕວຕ຺ຖຸ

໔໙໙. ‘‘ມາລີ ກິຣິຏີ ກາຍູຣີ [ເກຍູຣີ (ສີ.)], ຄຕ຺ຕາ ເຕ ຈນ຺ທນຸສ຺ສທາ;

ປສນ຺ນມຸຂວຓ຺ໂຓສິ, ສູຣິຍວຓ຺ໂຓວ ໂສຠສິ.

໕໐໐. ‘‘ອມານຸສາ ປາຣິສຊ຺ຊາ, ເຍ ເຕເມ ປຣິຈາຣກາ;

ທສ ກຎ຺ຎາສຫສ຺ສານິ, ຍາ ເຕມາ ປຣິຈາຣິກາ;

ຕາ [ກາ (ກ.)] ກມ຺ພຸກາຍູຣຘຣາ, ກຎ຺ຈນາເວຬຠູສິຕາ.

໕໐໑. ‘‘ມຫານຸຠາໂວສິ ຕຸວໍ, ໂລມຫໍສນຣູປວາ;

ປິຏ຺ຐິມໍສານິ ອຕ຺ຕໂນ, ສາມໍ ອຸກ຺ກຈ຺ຈ [ອຸກ຺ກຑ຺ຒ (ສີ.)] ຂາທສິ.

໕໐໒. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຸຏໍ ກຕໍ;

ກິສ຺ສ ກມ຺ມວິປາເກນ, ປິຏ຺ຐິມໍສານິ ອຕ຺ຕໂນ;

ສາມໍ ອຸກ຺ກຈ຺ຈ ຂາທສີ’’ຕິ.

໕໐໓. ‘‘ອຕ຺ຕໂນຫໍ ອນຕ຺ຖາຍ, ຊີວໂລເກ ອຈາຣິສໍ;

ເປສຸຎ຺ຎມຸສາວາເທນ, ນິກຕິວຎ຺ຈນາຍ ຈ.

໕໐໔. ‘‘ຕຕ຺ຖາຫໍ ປຣິສໍ ຄນ຺ຕ຺ວາ, ສຈ຺ຈກາເລ ອຸປຏ຺ຐິເຕ;

ອຕ຺ຖໍ ຘມ຺ມໍ ນິຣາກຕ຺ວາ [ນິຣໍກຕ຺ວາ (ກ.) ນິ + ອາ + ກຣ + ຕ຺ວາ = ນິຣາກຕ຺ວາ], ອຘມ຺ມມນຸວຕ຺ຕິສໍ.

໕໐໕. ‘‘ເອວໍ ໂສ ຂາທຕຕ຺ຕານໍ, ໂຍ ໂຫຕິ ປິຏ຺ຐິມໍສິໂກ;

ຍຖາຫໍ ອຊ຺ຊ ຂາທາມິ, ປິຏ຺ຐິມໍສານິ ອຕ຺ຕໂນ.

໕໐໖. ‘‘ຕຍິທໍ ຕຍາ ນາຣທ ສາມໍ ທິຏ຺ຐໍ, ອນຸກມ຺ປກາ ເຍ ກຸສລາ ວເທຍ຺ຍຸໍ;

ມາ ເປສຸຓໍ ມາ ຈ ມຸສາ ອຠາຓິ, ມາ ໂຂສິ ປິຏ຺ຐິມໍສິໂກ ຕຸວ’’ນ຺ຕິ.

ກູຏວິນິຈ຺ຉຍິກເປຕວຕ຺ຖຸ ນວມໍ.