໑. ສໍສາຣໂມຈກເປຕິວຕ຺ຖຸ

໙໕. ‘‘ນຄ຺ຄາ ທຸພ຺ພຓ຺ຓຣູປາສິ, ກິສາ ຘມນິສນ຺ຖຕາ;

ອຸປ຺ຜາສຸລິເກ [ອຸປ຺ປາສຸຬິເກ (ກ.)] ກິສິເກ, ກາ ນຸ ຕ຺ວໍ ອິຘ ຕິຏ຺ຐສີ’’ຕິ.

໙໖. ‘‘ອຫໍ ຠທນ຺ເຕ ເປຕີມ຺ຫິ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’’ຕິ.

໙໗. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ເປຕໂລກໍ ອິໂຕ ຄຕາ’’ຕິ.

໙໘. ‘‘ອນຸກມ຺ປກາ ມຍ຺ຫໍ ນາເຫສຸໍ ຠນ຺ເຕ, ປິຕາ ຈ ມາຕາ ອຖວາປິ ຎາຕກາ;

ເຍ ມໍ ນິໂຍເຊຍ຺ຍຸໍ ທທາຫິ ທານໍ, ປສນ຺ນຈິຕ຺ຕາ ສມຓພ຺ຣາຫ຺ມຓານໍ.

໙໙. ‘‘ອິໂຕ ອຫໍ ວສ຺ສສຕານິ ປຎ຺ຈ, ຍໍ ເອວຣູປາ ວິຈຣາມິ ນຄ຺ຄາ;

ຂຸທາຍ ຕຓ຺ຫາຍ ຈ ຂຊ຺ຊມານາ, ປາປສ຺ສ ກມ຺ມສ຺ສ ຜລໍ ມເມທໍ.

໑໐໐. ‘‘ວນ຺ທາມິ ຕໍ ອຍ຺ຍ ປສນ຺ນຈິຕ຺ຕາ, ອນຸກມ຺ປ ມໍ ວີຣ ມຫານຸຠາວ;

ທຕ຺ວາ ຈ ເມ ອາທິສ ຍໍ ຫິ ກິຎ຺ຈິ, ໂມເຈຫິ ມໍ ທຸຄ຺ຄຕິຍາ ຠທນ຺ເຕ’’ຕິ.

໑໐໑. ສາຘູຕິ ໂສ ປຏິສ຺ສຸຕ຺ວາ, ສາຣິປຸຕ຺ໂຕນຸກມ຺ປໂກ;

ຠິກ຺ຂູນໍ ອາໂລປໍ ທຕ຺ວາ, ປາຓິມຕ຺ຕຎ຺ຈ ໂຈຬກໍ;

ຖາລກສ຺ສ ຈ ປານີຍໍ, ຕສ຺ສາ ທກ຺ຂິຓມາທິສິ.

໑໐໒. ສມນນ຺ຕຣານຸທ຺ທິຏ຺ເຐ, ວິປາໂກ ອຸທປຊ຺ຊຖ;

ໂຠຊນຈ຺ຉາທນປານີຍໍ, ທກ຺ຂິຓາຍ ອິທໍ ຜລໍ.

໑໐໓. ຕໂຕ ສຸທ຺ຘາ ສຸຈິວສນາ, ກາສິກຸຕ຺ຕມຘາຣິນີ;

ວິຈິຕ຺ຕວຕ຺ຖາຠຣຓາ, ສາຣິປຸຕ຺ຕໍ ອຸປສງ຺ກມິ.

໑໐໔. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໐໕. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໐໖. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໗. ‘‘ອຸປ຺ປຓ຺ຑຸກິໍ ກິສໍ ຉາຕໍ, ນຄ຺ຄໍ ສມ຺ປຕິຕຈ຺ຉວິໍ [ອາປຕິຕຈ຺ຉວິໍ (ສີ.)];

ມຸນິ ກາຣຸຓິໂກ ໂລເກ, ຕໍ ມໍ ອທ຺ທກ຺ຂິ ທຸຄ຺ຄຕໍ.

໑໐໘. ‘‘ຠິກ຺ຂູນໍ ອາໂລປໍ ທຕ຺ວາ, ປາຓິມຕ຺ຕຎ຺ຈ ໂຈຬກໍ;

ຖາລກສ຺ສ ຈ ປານີຍໍ, ມມ ທກ຺ຂິຓມາທິສິ.

໑໐໙. ‘‘ອາໂລປສ຺ສ ຜລໍ ປສ຺ສ, ຠຕ຺ຕໍ ວສ຺ສສຕໍ ທສ;

ຠຸຎ຺ຊາມິ ກາມກາມິນີ, ອເນກຣສພ຺ຍຎ຺ຊນໍ.

໑໑໐. ‘‘ປາຓິມຕ຺ຕສ຺ສ ໂຈຬສ຺ສ, ວິປາກໍ ປສ຺ສ ຍາທິສໍ;

ຍາວຕາ ນນ຺ທຣາຊສ຺ສ, ວິຊິຕສ຺ມິໍ ປຏິຈ຺ຉທາ.

໑໑໑. ‘‘ຕໂຕ ພຫຸຕຣາ ຠນ຺ເຕ, ວຕ຺ຖານຈ຺ຉາທນານິ ເມ;

ໂກເສຍ຺ຍກມ຺ພລີຍານິ, ໂຂມກປ຺ປາສິການິ ຈ.

໑໑໒. ‘‘ວິປຸລາ ຈ ມຫຄ຺ຆາ ຈ, ເຕປາກາເສວລມ຺ພເຣ;

ສາຫໍ ຕໍ ປຣິທຫາມິ, ຍໍ ຍໍ ຫິ ມນໂສ ປິຍໍ.

໑໑໓. ‘‘ຖາລກສ຺ສ ຈ ປານີຍໍ, ວິປາກໍ ປສ຺ສ ຍາທິສໍ;

ຄມ຺ຠີຣາ ຈຕຸຣສ຺ສາ ຈ, ໂປກ຺ຂຣຎ຺ໂຎ ສຸນິມ຺ມິຕາ.

໑໑໔. ‘‘ເສໂຕທກາ ສຸປ຺ປຕິຕ຺ຖາ, ສີຕາ ອປ຺ປຏິຄນ຺ຘິຍາ;

ປທຸມຸປ຺ປລສຎ຺ຉນ຺ນາ, ວາຣິກິຎ຺ຊກ຺ຂປູຣິຕາ.

໑໑໕. ‘‘ສາຫໍ ຣມາມິ ກີຬາມິ, ໂມທາມິ ອກຸໂຕຠຍາ;

ມຸນິໍ ກາຣຸຓິກໍ ໂລເກ, ຠນ຺ເຕ ວນ຺ທິຕຸມາຄຕາ’’ຕິ.

ສໍສາຣໂມຈກເປຕິວຕ຺ຖຸ ປຐມໍ.