໒. ສາຣິປຸຕ຺ຕຕ຺ເຖຣມາຕຸເປຕິວຕ຺ຖຸ

໑໑໖. ‘‘ນຄ຺ຄາ ທຸພ຺ພຓ຺ຓຣູປາສິ, ກິສາ ຘມນິສນ຺ຖຕາ;

ອຸປ຺ຜາສຸລິເກ ກິສິເກ, ກາ ນຸ ຕ຺ວໍ ອິຘ ຕິຏ຺ຐສິ’’.

໑໑໗. ‘‘ອຫໍ ເຕ ສກິຍາ ມາຕາ, ປຸພ຺ເພ ອຎ຺ຎາສຸ ຊາຕີສຸ;

ອຸປປນ຺ນາ ເປຕ຺ຕິວິສຍໍ, ຂຸປ຺ປິປາສສມປ຺ປິຕາ.

໑໑໘. ‘‘ຉຑ຺ຑິຕໍ ຂິປິຕໍ ເຂຬໍ, ສິງ຺ຆາຓິກໍ ສິເລສຸມໍ;

ວສຎ຺ຈ ຑຍ຺ຫມານານໍ, ວິຊາຕານຎ຺ຈ ໂລຫິຕໍ.

໑໑໙. ‘‘ວຓິການຎ຺ຈ ຍໍ ຆານ-ສີສຈ຺ຉິນ຺ນານ ໂລຫິຕໍ;

ຂຸທາປເຣຕາ ຠຸຎ຺ຊາມິ, ອິຕ຺ຖິປຸຣິສນິສ຺ສິຕໍ.

໑໒໐. ‘‘ປຸພ຺ພໂລຫິຕໍ ຠກ຺ຂາມິ [ປຸພ຺ພໂລຫິຕຠກ຺ຂາສ຺ມິ (ສີ.)], ປສູນໍ ມານຸສານ ຈ;

ອເລຓາ ອນຄາຣາ ຈ, ນີລມຎ຺ຈປຣາຍຓາ.

໑໒໑. ‘‘ເທຫິ ປຸຕ຺ຕກ ເມ ທານໍ, ທຕ຺ວາ ອນ຺ວາທິສາຫິ ເມ;

ອປ຺ເປວ ນາມ ມຸຈ຺ເຈຍ຺ຍໍ, ປຸພ຺ພໂລຫິຕໂຠຊນາ’’ຕິ.

໑໒໒. ມາຕຸຍາ ວຈນໍ ສຸຕ຺ວາ, ອຸປຕິສ຺ໂສນຸກມ຺ປໂກ;

ອາມນ຺ຕຍິ ໂມຄ຺ຄລ຺ລານໍ, ອນຸຣຸທ຺ຘຎ຺ຈ ກປ຺ປິນໍ.

໑໒໓. ຈຕສ຺ໂສ ກຸຏິໂຍ ກຕ຺ວາ, ສງ຺ເຆ ຈາຕຸທ຺ທິເສ ອທາ;

ກຸຏິໂຍ ອນ຺ນປານຎ຺ຈ, ມາຕຸ ທກ຺ຂິຓມາທິສີ.

໑໒໔. ສມນນ຺ຕຣານຸທ຺ທິຏ຺ເຐ, ວິປາໂກ ອຸທປຊ຺ຊຖ;

ໂຠຊນໍ ປານີຍໍ ວຕ຺ຖໍ, ທກ຺ຂິຓາຍ ອິທໍ ຜລໍ.

໑໒໕. ຕໂຕ ສຸທ຺ຘາ ສຸຈິວສນາ, ກາສິກຸຕ຺ຕມຘາຣິນີ;

ວິຈິຕ຺ຕວຕ຺ຖາຠຣຓາ, ໂກລິຕໍ ອຸປສງ຺ກມິ.

໑໒໖. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໒໗. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໒໘. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໒໙. ‘‘ສາຣິປຸຕ຺ຕສ຺ສາຫໍ ມາຕາ, ປຸພ຺ເພ ອຎ຺ຎາສຸ ຊາຕີສຸ;

ອຸປປນ຺ນາ ເປຕ຺ຕິວິສຍໍ, ຂຸປ຺ປິປາສສມປ຺ປິຕາ.

໑໓໐. ‘‘ຉຑ຺ຑິຕໍ ຂິປິຕໍ ເຂຬໍ, ສິງ຺ຆາຓິກໍ ສິເລສຸມໍ;

ວສຎ຺ຈ ຑຍ຺ຫມານານໍ, ວິຊາຕານຎ຺ຈ ໂລຫິຕໍ.

໑໓໑. ‘‘ວຓິການຎ຺ຈ ຍໍ ຆານ-ສີສຈ຺ຉິນ຺ນານ ໂລຫິຕໍ;

ຂຸທາປເຣຕາ ຠຸຎ຺ຊາມິ, ອິຕ຺ຖິປຸຣິສນິສ຺ສິຕໍ.

໑໓໒. ‘‘ປຸພ຺ພໂລຫິຕໍ ຠກ຺ຂິສ຺ສໍ, ປສູນໍ ມານຸສານ ຈ;

ອເລຓາ ອນຄາຣາ ຈ, ນີລມຎ຺ຈປຣາຍຓາ.

໑໓໓. ‘‘ສາຣິປຸຕ຺ຕສ຺ສ ທາເນນ, ໂມທາມິ ອກຸໂຕຠຍາ;

ມຸນິໍ ກາຣຸຓິກໍ ໂລເກ, ຠນ຺ເຕ ວນ຺ທິຕຸມາຄຕາ’’ຕິ.

ສາຣິປຸຕ຺ຕຕ຺ເຖຣສ຺ສ ມາຕຸເປຕິວຕ຺ຖຸ ທຸຕິຍໍ.