໕. ຈຣິຍາກຖາ

໒໘. ຈຣິຍາຕິ, ອຏ຺ຐ ຈຣິຍາໂຍ – ອິຣິຍາປຖຈຣິຍາ, ອາຍຕນຈຣິຍາ, ສຕິຈຣິຍາ, ສມາຘິຈຣິຍາ, ຎາຓຈຣິຍາ, ມຄ຺ຄຈຣິຍາ, ປຕ຺ຕິຈຣິຍາ, ໂລກຕ຺ຖຈຣິຍາຕິ.

ອິຣິຍາປຖຈຣິຍາຕິ ຈຕູສຸ ອິຣິຍາປເຖສຸ. ອາຍຕນຈຣິຍາຕິ ຉສຸ ອຊ຺ຌຕ຺ຕິກພາຫິເຣສຸ ອາຍຕເນສຸ. ສຕິຈຣິຍາຕິ ຈຕູສຸ ສຕິປຏ຺ຐາເນສຸ. ສມາຘິຈຣິຍາຕິ ຈຕູສຸ ຌາເນສຸ. ຎາຓຈຣິຍາຕິ ຈຕູສຸ ອຣິຍສຈ຺ເຈສຸ. ມຄ຺ຄຈຣິຍາຕິ ຈຕູສຸ ອຣິຍມຄ຺ເຄສຸ. ປຕ຺ຕິຈຣິຍາຕິ ຈຕູສຸ ສາມຎ຺ຎຜເລສຸ. ໂລກຕ຺ຖຈຣິຍາຕິ ຕຖາຄເຕສຸ ອຣຫນ຺ເຕສຸ ສມ຺ມາສມ຺ພຸທ຺ເຘສຸ ປເທເສ [ປເທໂສ (ສ຺ຍາ.)] ປຈ຺ເຈກພຸທ຺ເຘສຸ ປເທເສ ສາວເກສຸ.

ອິຣິຍາປຖຈຣິຍາ ຈ ປຓິຘິສມ຺ປນ຺ນານໍ. ອາຍຕນຈຣິຍາ ຈ ອິນ຺ທ຺ຣິເຍສຸ ຄຸຕ຺ຕທ຺ວາຣານໍ. ສຕິຈຣິຍາ ຈ ອປ຺ປມາທວິຫາຣີນໍ. ສມາຘິຈຣິຍາ ຈ ອຘິຈິຕ຺ຕມນຸຍຸຕ຺ຕານໍ. ຎາຓຈຣິຍາ ຈ ພຸທ຺ຘິສມ຺ປນ຺ນານໍ. ມຄ຺ຄຈຣິຍາ ຈ ສມ຺ມາປຏິປນ຺ນານໍ. ປຕ຺ຕິຈຣິຍາ ຈ ອຘິຄຕຜລານໍ. ໂລກຕ຺ຖຈຣິຍາ ຈ ຕຖາຄຕານໍ ອຣຫນ຺ຕານໍ ສມ຺ມາສມ຺ພຸທ຺ຘານໍ ປເທເສ ປຈ຺ເຈກພຸທ຺ຘານໍ ປເທເສ ສາວການໍ. ອິມາ ອຏ຺ຐ ຈຣິຍາໂຍ.

໒໙. ອປຣາປິ ອຏ຺ຐ ຈຣິຍາໂຍ. ອຘິມຸຈ຺ຈນ຺ໂຕ ສທ຺ຘາຍ ຈຣຕິ, ປຄ຺ຄຓ຺ຫນ຺ໂຕ ວີຣິເຍນ ຈຣຕິ, ອຸປຏ຺ຐາເປນ຺ໂຕ ສຕິຍາ ຈຣຕິ, ອວິກ຺ເຂປໍ ກໂຣນ຺ໂຕ ສມາຘິນາ ຈຣຕິ, ປຊານນ຺ໂຕ ປຎ຺ຎາຍ ຈຣຕິ, ວິຊານນ຺ໂຕ ວິຎ຺ຎາຓຈຣິຍາຍ ຈຣຕິ, ເອວໍ ປຏິປນ຺ນສ຺ສ ກຸສລາ ຘມ຺ມາ ອາຍາເປນ຺ຕີຕິ ອາຍຕນຈຣິຍາຍ ຈຣຕິ, ເອວໍ ປຏິປນ຺ໂນ ວິເສສມຘິຄຈ຺ຉຕີຕິ ວິເສສຈຣິຍາຍ ຈຣຕິ. ອິມາ ອຏ຺ຐ ຈຣິຍາໂຍ.

ອປຣາປິ ອຏ຺ຐ ຈຣິຍາໂຍ. ທສ຺ສນຈຣິຍາ ຈ ສມ຺ມາທິຏ຺ຐິຍາ, ອຠິນິໂຣປນຈຣິຍາ ຈ ສມ຺ມາສງ຺ກປ຺ປສ຺ສ, ປຣິຄ຺ຄຫຈຣິຍາ ຈ ສມ຺ມາວາຈາຍ, ສມຸຏ຺ຐານຈຣິຍາ ຈ ສມ຺ມາກມ຺ມນ຺ຕສ຺ສ, ໂວທານຈຣິຍາ ຈ ສມ຺ມາອາຊີວສ຺ສ, ປຄ຺ຄຫຈຣິຍາ ຈ ສມ຺ມາວາຍາມສ຺ສ, ອຸປຏ຺ຐານຈຣິຍາ ຈ ສມ຺ມາສຕິຍາ, ອວິກ຺ເຂປຈຣິຍາ ຈ ສມ຺ມາສມາຘິສ຺ສ. ອິມາ ອຏ຺ຐ ຈຣິຍາໂຍຕິ.

ຈຣິຍາກຖາ ນິຏ຺ຐິຕາ.