໙. ພລກຖາ

໔໔. ສາວຕ຺ຖິນິທານໍ [ສໍ. ນິ. ໕.໗໐໕-໗໑໖ ປສ຺ສິຕພ຺ພາ]. ‘‘ປຎ຺ຈິມານິ, ຠິກ຺ຂເວ, ພລານິ. ກຕມານິ ປຎ຺ຈ? ສທ຺ຘາພລໍ, ວີຣິຍພລໍ, ສຕິພລໍ, ສມາຘິພລໍ, ປຎ຺ຎາພລໍ – ອິມານິ ໂຂ, ຠິກ຺ຂເວ, ປຎ຺ຈ ພລານິ.

‘‘ອປິ ຈ, ອຏ຺ຐສຏ຺ຐິ ພລານິ – ສທ຺ຘາພລໍ, ວີຣິຍພລໍ, ສຕິພລໍ, ສມາຘິພລໍ, ປຎ຺ຎາພລໍ, ຫິຣິພລໍ, ໂອຕ຺ຕປ຺ປພລໍ, ປຏິສງ຺ຂານພລໍ, ຠາວນາພລໍ, ອນວຊ຺ຊພລໍ, ສງ຺ຄຫພລໍ, ຂນ຺ຕິພລໍ, ປຎ຺ຎຕ຺ຕິພລໍ, ນິຊ຺ຌຕ຺ຕິພລໍ, ອິສ຺ສຣິຍພລໍ, ອຘິຏ຺ຐານພລໍ, ສມຖພລໍ, ວິປສ຺ສນາພລໍ, ທສ ເສຂພລານິ, ທສ ອເສຂພລານິ, ທສ ຂີຓາສວພລານິ, ທສ ອິທ຺ຘິພລານິ, ທສ ຕຖາຄຕພລານິ’’.

ກຕມໍ ສທ຺ຘາພລໍ? ອສ຺ສທ຺ຘິເຍ ນ ກມ຺ປຕີຕິ – ສທ຺ຘາພລໍ. ສຫຊາຕານໍ ຘມ຺ມານໍ ອຸປຕ຺ຖມ຺ຠນຏ຺ເຐນ ສທ຺ຘາພລໍ, ກິເລສານໍ ປຣິຍາທານຏ຺ເຐນ ສທ຺ຘາພລໍ, ປຏິເວຘາທິວິໂສຘນຏ຺ເຐນ ສທ຺ຘາພລໍ, ຈິຕ຺ຕສ຺ສ ອຘິຏ຺ຐານຏ຺ເຐນ ສທ຺ຘາພລໍ, ຈິຕ຺ຕສ຺ສ ໂວທານຏ຺ເຐນ ສທ຺ຘາພລໍ, ວິເສສາຘິຄມຏ຺ເຐນ ສທ຺ຘາພລໍ, ອຸຕ຺ຕຣິ ປຏິເວຘຏ຺ເຐນ ສທ຺ຘາພລໍ, ສຈ຺ຈາຠິສມຍຏ຺ເຐນ ສທ຺ຘາພລໍ, ນິໂຣເຘ ປຕິຏ຺ຐາປກຏ຺ເຐນ ສທ຺ຘາພລໍ. ອິທໍ ສທ຺ຘາພລໍ.

ກຕມໍ ວີຣິຍພລໍ? ໂກສຊ຺ເຊ ນ ກມ຺ປຕີຕິ – ວີຣິຍພລໍ. ສຫຊາຕານໍ ຘມ຺ມານໍ ອຸປຕ຺ຖມ຺ຠນຏ຺ເຐນ ວີຣິຍພລໍ, ກິເລສານໍ ປຣິຍາທານຏ຺ເຐນ ວີຣິຍພລໍ, ປຏິເວຘາທິວິໂສຘນຏ຺ເຐນ ວີຣິຍພລໍ, ຈິຕ຺ຕສ຺ສ ອຘິຏ຺ຐານຏ຺ເຐນ ວີຣິຍພລໍ, ຈິຕ຺ຕສ຺ສ ໂວທານຏ຺ເຐນ ວີຣິຍພລໍ, ວິເສສາຘິຄມຏ຺ເຐນ ວີຣິຍພລໍ, ອຸຕ຺ຕຣິ ປຏິເວຘຏ຺ເຐນ ວີຣິຍພລໍ, ສຈ຺ຈາຠິສມຍຏ຺ເຐນ ວີຣິຍພລໍ, ນິໂຣເຘ ປຕິຏ຺ຐາປກຏ຺ເຐນ ວີຣິຍພລໍ. ອິທໍ ວີຣິຍພລໍ.

ກຕມໍ ສຕິພລໍ? ປມາເທ ນ ກມ຺ປຕີຕິ – ສຕິພລໍ. ສຫຊາຕານໍ ຘມ຺ມານໍ ອຸປຕ຺ຖມ຺ຠນຏ຺ເຐນ ສຕິພລໍ…ເປ… ນິໂຣເຘ ປຕິຏ຺ຐາປກຏ຺ເຐນ ສຕິພລໍ. ອິທໍ ສຕິພລໍ.

ກຕມໍ ສມາຘິພລໍ? ອຸທ຺ຘຈ຺ເຈ ນ ກມ຺ປຕີຕິ – ສມາຘິພລໍ. ສຫຊາຕານໍ ຘມ຺ມານໍ ອຸປຕ຺ຖມ຺ຠນຏ຺ເຐນ ສມາຘິພລໍ…ເປ… ນິໂຣເຘ ປຕິຏ຺ຐາປກຏ຺ເຐນ ສມາຘິພລໍ. ອິທໍ ສມາຘິພລໍ.

ກຕມໍ ປຎ຺ຎາພລໍ? ອວິຊ຺ຊາຍ ນ ກມ຺ປຕີຕິ – ປຎ຺ຎາພລໍ. ສຫຊາຕານໍ ຘມ຺ມານໍ ອຸປຕ຺ຖມ຺ຠນຏ຺ເຐນ ປຎ຺ຎາພລໍ…ເປ… ນິໂຣເຘ ປຕິຏ຺ຐາປກຏ຺ເຐນ ປຎ຺ຎາພລໍ. ອິທໍ ປຎ຺ຎາພລໍ.

ກຕມໍ ຫິຣິພລໍ? ເນກ຺ຂມ຺ເມນ ກາມຈ຺ຉນ຺ທໍ ຫິຣີຍຕີຕິ [ຫິຣິຍຕີຕິ (ສ຺ຍາ. ກ.)] – ຫິຣິພລໍ. ອພ຺ຍາປາເທນ ພ຺ຍາປາທໍ ຫິຣີຍຕີຕິ – ຫິຣິພລໍ. ອາໂລກສຎ຺ຎາຍ ຖິນມິທ຺ຘໍ ຫິຣີຍຕີຕິ – ຫິຣິພລໍ. ອວິກ຺ເຂເປນ ອຸທ຺ຘຈ຺ຈໍ ຫິຣີຍຕີຕິ – ຫິຣິພລໍ. ຘມ຺ມວວຕ຺ຖາເນນ ວິຈິກິຈ຺ຉໍ ຫິຣີຍຕີຕິ – ຫິຣິພລໍ. ຎາເຓນ ອວິຊ຺ຊໍ ຫິຣີຍຕີຕິ – ຫິຣິພລໍ. ປາໂມຊ຺ເຊນ ອຣຕິໍ ຫິຣີຍຕີຕິ – ຫິຣິພລໍ. ປຐເມນ ຌາເນນ ນີວຣເຓ ຫິຣີຍຕີຕິ – ຫິຣິພລໍ…ເປ… ອຣຫຕ຺ຕມຄ຺ເຄນ ສພ຺ພກິເລເສ ຫິຣີຍຕີຕິ – ຫິຣິພລໍ. ອິທໍ ຫິຣິພລໍ.

ກຕມໍ ໂອຕ຺ຕປ຺ປພລໍ? ເນກ຺ຂມ຺ເມນ ກາມຈ຺ຉນ຺ທໍ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ອພ຺ຍາປາເທນ ພ຺ຍາປາທໍ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ອາໂລກສຎ຺ຎາຍ ຖິນມິທ຺ຘໍ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ອວິກ຺ເຂເປນ ອຸທ຺ຘຈ຺ຈໍ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ຘມ຺ມວວຕ຺ຖາເນນ ວິຈິກິຈ຺ຉໍ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ຎາເຓນ ອວິຊ຺ຊໍ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ປາໂມຊ຺ເຊນ ອຣຕິໍ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ປຐເມນ ຌາເນນ ນີວຣເຓ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ…ເປ… ອຣຫຕ຺ຕມຄ຺ເຄນ ສພ຺ພກິເລເສ ໂອຕ຺ຕປ຺ປຕີຕິ – ໂອຕ຺ຕປ຺ປພລໍ. ອິທໍ ໂອຕ຺ຕປ຺ປພລໍ.

ກຕມໍ ປຏິສງ຺ຂານພລໍ? ເນກ຺ຂມ຺ເມນ ກາມຈ຺ຉນ຺ທໍ ປຏິສງ຺ຂາຕີຕິ – ປຏິສງ຺ຂານພລໍ. ອພ຺ຍາປາເທນ ພ຺ຍາປາທໍ ປຏິສງ຺ຂາຕີຕິ – ປຏິສງ຺ຂານພລໍ. ອາໂລກສຎ຺ຎາຍ ຖິນມິທ຺ຘໍ ປຏິສງ຺ຂາຕີຕິ – ປຏິສງ຺ຂານພລໍ. ອວິກ຺ເຂເປນ ອຸທ຺ຘຈ຺ຈໍ ປຏິສງ຺ຂາຕີຕິ – ປຏິສງ຺ຂານພລໍ. ຘມ຺ມວວຕ຺ຖາເນນ ວິຈິກິຈ຺ຉໍ ປຏິສງ຺ຂາຕີຕິ – ປຏິສງ຺ຂານພລໍ. ຎາເຓນ ອວິຊ຺ຊໍ ປຏິສງ຺ຂາຕີຕິ – ປຏິສງ຺ຂານພລໍ. ປາໂມຊ຺ເຊນ ອຣຕິໍ ປຏິສງ຺ຂາຕີຕິ – ປຏິສງ຺ຂານພລໍ. ປຐເມນ ຌາເນນ ນີວຣເຓ ປຏິສງ຺ຂາຕີຕິ – ປຏິສງ຺ຂານພລໍ…ເປ… ອຣຫຕ຺ຕມຄ຺ເຄນ ສພ຺ພກິເລເສ ປຏິສງ຺ຂາຕີຕິ – ປຏິສງ຺ຂານພລໍ. ອິທໍ ປຏິສງ຺ຂານພລໍ.

ກຕມໍ ຠາວນາພລໍ? ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມໍ ຠາເວຕີຕິ – ຠາວນາພລໍ. ພ຺ຍາປາທໍ ປຊຫນ຺ໂຕ ອພ຺ຍາປາທໍ ຠາເວຕີຕິ – ຠາວນາພລໍ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎໍ ຠາເວຕີຕິ – ຠາວນາພລໍ. ອຸທ຺ຘຈ຺ຈໍ ປຊຫນ຺ໂຕ ອວິກ຺ເຂປໍ ຠາເວຕີຕິ – ຠາວນາພລໍ. ວິຈິກິຈ຺ຉໍ ປຊຫນ຺ໂຕ ຘມ຺ມວວຕ຺ຖານໍ ຠາເວຕີຕິ – ຠາວນາພລໍ. ອວິຊ຺ຊໍ ປຊຫນ຺ໂຕ ຎາຓໍ ຠາເວຕີຕິ – ຠາວນາພລໍ. ອຣຕິໍ ປຊຫນ຺ໂຕ ປາໂມຊ຺ຊໍ ຠາເວຕີຕິ – ຠາວນາພລໍ. ນີວຣເຓ ປຊຫນ຺ໂຕ ປຐມໍ ຌານໍ ຠາເວຕີຕິ – ຠາວນາພລໍ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄໍ ຠາເວຕີຕິ – ຠາວນາພລໍ. ອິທໍ ຠາວນາພລໍ.

ກຕມໍ ອນວຊ຺ຊພລໍ? ກາມຈ຺ຉນ຺ທສ຺ສ ປຫີນຕ຺ຕາ ເນກ຺ຂມ຺ເມ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ພ຺ຍາປາທສ຺ສ ປຫີນຕ຺ຕາ ອພ຺ຍາປາເທ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ຖິນມິທ຺ຘສ຺ສ ປຫີນຕ຺ຕາ ອາໂລກສຎ຺ຎາຍ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ອຸທ຺ຘຈ຺ຈສ຺ສ ປຫີນຕ຺ຕາ ອວິກ຺ເຂເປ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ວິຈິກິຈ຺ຉາຍ ປຫີນຕ຺ຕາ ຘມ຺ມວວຕ຺ຖາເນ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ອວິຊ຺ຊາຍ ປຫີນຕ຺ຕາ ຎາເຓ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ອຣຕິຍາ ປຫີນຕ຺ຕາ ປາໂມຊ຺ເຊ ນຕ຺ຖິ ກິຎ຺ຈິ ວຊ຺ຊນ຺ຕິ ອນວຊ຺ຊພລໍ. ນີວຣຓານໍ ປຫີນຕ຺ຕາ ປຐມຊ຺ຌາເນ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ…ເປ… ສພ຺ພກິເລສານໍ ປຫີນຕ຺ຕາ ອຣຫຕ຺ຕມຄ຺ເຄ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ອິທໍ ອນວຊ຺ຊພລໍ.

ກຕມໍ ສງ຺ຄຫພລໍ? ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມວເສນ ຈິຕ຺ຕໍ ສງ຺ຄຓ຺ຫາຕີຕິ – ສງ຺ຄຫພລໍ. ພ຺ຍາປາທໍ ປຊຫນ຺ໂຕ ອພ຺ຍາປາທວເສນ ຈິຕ຺ຕໍ ສງ຺ຄຓ຺ຫາຕີຕິ – ສງ຺ຄຫພລໍ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎາວເສນ ຈິຕ຺ຕໍ ສງ຺ຄຓ຺ຫາຕີຕິ – ສງ຺ຄຫພລໍ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄວເສນ ຈິຕ຺ຕໍ ສງ຺ຄຓ຺ຫາຕີຕິ – ສງ຺ຄຫພລໍ. ອິທໍ ສງ຺ຄຫພລໍ.

ກຕມໍ ຂນ຺ຕິພລໍ? ກາມຈ຺ຉນ຺ທສ຺ສ ປຫີນຕ຺ຕາ ເນກ຺ຂມ຺ມໍ ຂມຕີຕິ – ຂນ຺ຕິພລໍ. ພ຺ຍາປາທສ຺ສ ປຫີນຕ຺ຕາ ອພ຺ຍາປາໂທ ຂມຕີຕິ – ຂນ຺ຕິພລໍ. ຖິນມິທ຺ຘສ຺ສ ປຫີນຕ຺ຕາ ອາໂລກສຎ຺ຎາ ຂມຕີຕິ – ຂນ຺ຕິພລໍ. ອຸທ຺ຘຈ຺ຈສ຺ສ ປຫີນຕ຺ຕາ ອວິກ຺ເຂໂປ ຂມຕີຕິ – ຂນ຺ຕິພລໍ. ວິຈິກິຈ຺ຉາຍ ປຫີນຕ຺ຕາ ຘມ຺ມວວຕ຺ຖານໍ ຂມຕີຕິ – ຂນ຺ຕິພລໍ. ອວິຊ຺ຊາຍ ປຫີນຕ຺ຕາ ຎາຓໍ ຂມຕີຕິ – ຂນ຺ຕິພລໍ. ອຣຕິຍາ ປຫີນຕ຺ຕາ ປາໂມຊ຺ຊໍ ຂມຕີຕິ – ຂນ຺ຕິພລໍ. ນີວຣຓານໍ ປຫີນຕ຺ຕາ ປຐມໍ ຌານໍ ຂມຕີຕິ – ຂນ຺ຕິພລໍ…ເປ… ສພ຺ພກິເລສານໍ ປຫີນຕ຺ຕາ ອຣຫຕ຺ຕມຄ຺ໂຄ ຂມຕີຕິ – ຂນ຺ຕິພລໍ. ອິທໍ ຂນ຺ຕິພລໍ.

ກຕມໍ ປຎ຺ຎຕ຺ຕິພລໍ? ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມວເສນ ຈິຕ຺ຕໍ ປຎ຺ຎເປຕີຕິ – ປຎ຺ຎຕ຺ຕິພລໍ. ພ຺ຍາປາທໍ ປຊຫນ຺ໂຕ ອພ຺ຍາປາທວເສນ ຈິຕ຺ຕໍ ປຎ຺ຎເປຕີຕິ – ປຎ຺ຎຕ຺ຕິພລໍ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎາວເສນ ຈິຕ຺ຕໍ ປຎ຺ຎເປຕີຕິ – ປຎ຺ຎຕ຺ຕິພລໍ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄວເສນ ຈິຕ຺ຕໍ ປຎ຺ຎເປຕີຕິ – ປຎ຺ຎຕ຺ຕິພລໍ. ອິທໍ ປຎ຺ຎຕ຺ຕິພລໍ.

ກຕມໍ ນິຊ຺ຌຕ຺ຕິພລໍ? ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມວເສນ ຈິຕ຺ຕໍ ນິຊ຺ຌາເປຕີຕິ – ນິຊ຺ຌຕ຺ຕິພລໍ. ພ຺ຍາປາທໍ ປຊຫນ຺ໂຕ ອພ຺ຍາປາທວເສນ ຈິຕ຺ຕໍ ນິຊ຺ຌາເປຕີຕິ – ນິຊ຺ຌຕ຺ຕິພລໍ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎາວເສນ ຈິຕ຺ຕໍ ນິຊ຺ຌາເປຕີຕິ – ນິຊ຺ຌຕ຺ຕິພລໍ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄວເສນ ຈິຕ຺ຕໍ ນິຊ຺ຌາເປຕີຕິ – ນິຊ຺ຌຕ຺ຕິພລໍ. ອິທໍ ນິຊ຺ຌຕ຺ຕິພລໍ.

ກຕມໍ ອິສ຺ສຣິຍພລໍ? ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມວເສນ ຈິຕ຺ຕໍ ວສໍ ວຕ຺ເຕຕີຕິ – ອິສ຺ສຣິຍພລໍ. ພ຺ຍາປາທໍ ປຊຫນ຺ໂຕ ອພ຺ຍາປາທວເສນ ຈິຕ຺ຕໍ ວສໍ ວຕ຺ເຕຕີຕິ – ອິສ຺ສຣິຍພລໍ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎາວເສນ ຈິຕ຺ຕໍ ວສໍ ວຕ຺ເຕຕີຕິ – ອິສ຺ສຣິຍພລໍ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄວເສນ ຈິຕ຺ຕໍ ວສໍ ວຕ຺ເຕຕີຕິ – ອິສ຺ສຣິຍພລໍ. ອິທໍ ອິສ຺ສຣິຍພລໍ.

ກຕມໍ ອຘິຏ຺ຐານພລໍ? ກາມຈ຺ຉນ຺ທໍ ປຊຫນ຺ໂຕ ເນກ຺ຂມ຺ມວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐານພລໍ. ພ຺ຍາປາທໍ ປຊຫນ຺ໂຕ ອພ຺ຍາປາທວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐານພລໍ. ຖິນມິທ຺ຘໍ ປຊຫນ຺ໂຕ ອາໂລກສຎ຺ຎາວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐານພລໍ…ເປ… ສພ຺ພກິເລເສ ປຊຫນ຺ໂຕ ອຣຫຕ຺ຕມຄ຺ຄວເສນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐານພລໍ. ອິທໍ ອຘິຏ຺ຐານພລໍ.

ກຕມໍ ສມຖພລໍ? ເນກ຺ຂມ຺ມວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມຖພລໍ, ອພ຺ຍາປາທວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມຖພລໍ, ອາໂລກສຎ຺ຎາວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມຖພລໍ…ເປ… ປຏິນິສ຺ສຄ຺ຄານຸປສ຺ສີ ອສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມຖພລໍ, ປຏິນິສ຺ສຄ຺ຄານຸປສ຺ສີ ປສ຺ສາສວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມຖພລໍ.

ສມຖພລນ຺ຕິ ເກນຏ຺ເຐນ ສມຖພລໍ? ປຐເມນ ຌາເນນ ນີວຣເຓ ນ ກມ຺ປຕີຕິ – ສມຖພລໍ. ທຸຕິເຍນ ຌາເນນ ວິຕກ຺ກວິຈາເຣ ນ ກມ຺ປຕີຕິ – ສມຖພລໍ. ຕຕິເຍນ ຌາເນນ ປີຕິຍາ ນ ກມ຺ປຕີຕິ – ສມຖພລໍ. ຈຕຸຕ຺ເຖນ ຌາເນນ ສຸຂທຸກ຺ເຂ ນ ກມ຺ປຕີຕິ – ສມຖພລໍ. ອາກາສານຎ຺ຈາຍຕນສມາປຕ຺ຕິຍາ ຣູປສຎ຺ຎາຍ ປຏິຆສຎ຺ຎາຍ ນານຕ຺ຕສຎ຺ຎາຍ ນ ກມ຺ປຕີຕິ – ສມຖພລໍ. ວິຎ຺ຎາຓຎ຺ຈາຍຕນສມາປຕ຺ຕິຍາ ອາກາສານຎ຺ຈາຍຕນສຎ຺ຎາຍ ນ ກມ຺ປຕີຕິ – ສມຖພລໍ. ອາກິຎ຺ຈຎ຺ຎາຍຕນສມາປຕ຺ຕິຍາ ວິຎ຺ຎາຓຎ຺ຈາຍຕນສຎ຺ຎາຍ ນ ກມ຺ປຕີຕິ – ສມຖພລໍ. ເນວສຎ຺ຎານາສຎ຺ຎາຍຕນສມາປຕ຺ຕິຍາ ອາກິຎ຺ຈຎ຺ຎາຍຕນສຎ຺ຎາຍ ນ ກມ຺ປຕີຕິ – ສມຖພລໍ. ອຸທ຺ຘຈ຺ເຈ ຈ ອຸທ຺ຘຈ຺ຈສຫຄຕກິເລເສ ຈ ຂນ຺ເຘ ຈ ນ ກມ຺ປຕີ ນ ຈລຕິ ນ ເວຘຕີຕິ – ສມຖພລໍ. ອິທໍ ສມຖພລໍ.

ກຕມໍ ວິປສ຺ສນາພລໍ? ອນິຈ຺ຈານຸປສ຺ສນາ ວິປສ຺ສນາພລໍ, ທຸກ຺ຂານຸປສ຺ສນາ ວິປສ຺ສນາພລໍ…ເປ… ປຏິນິສ຺ສຄ຺ຄານຸປສ຺ສນາ ວິປສ຺ສນາພລໍ, ຣູເປ ອນິຈ຺ຈານຸປສ຺ສນາ ວິປສ຺ສນາພລໍ, ຣູເປ ທຸກ຺ຂານຸປສ຺ສນາ ວິປສ຺ສນາພລໍ…ເປ… ຣູເປ ປຏິນສ຺ສຄ຺ຄານຸປສ຺ສນາ ວິປສ຺ສນາພລໍ, ເວທນາຍ…ເປ… ສຎ຺ຎາຍ… ສງ຺ຂາເຣສຸ… ວິຎ຺ຎາເຓ… ຈກ຺ຂຸສ຺ມິໍ…ເປ… ຊຣາມຣເຓ ອນິຈ຺ຈານຸປສ຺ສນາ ວິປສ຺ສນາພລໍ, ຊຣາມຣເຓ ທຸກ຺ຂານຸປສ຺ສນາ ວິປສ຺ສນາພລໍ…ເປ… ຊຣາມຣເຓ ປຏິນິສ຺ສຄ຺ຄານຸປສ຺ສນາ ວິປສ຺ສນາພລໍ. ວິປສ຺ສນາພລນ຺ຕິ ເກນຏ຺ເຐນ ວິປສ຺ສນາພລໍ? ອນິຈ຺ຈານຸປສ຺ສນາຍ ນິຈ຺ຈສຎ຺ຎາຍ ນ ກມ຺ປຕີຕິ – ວິປສ຺ສນາພລໍ. ທຸກ຺ຂານຸປສ຺ສນາຍ ສຸຂສຎ຺ຎາຍ ນ ກມ຺ປຕີຕິ – ວິປສ຺ສນາພລໍ. ອນຕ຺ຕານຸປສ຺ສນາຍ ອຕ຺ຕສຎ຺ຎາຍ ກມ຺ປຕີຕິ – ວິປສ຺ສນາພລໍ. ນິພ຺ພິທານຸປສ຺ສນາຍ ນນ຺ທິຍາ ນ ກມ຺ປຕີຕິ – ວິປສ຺ສນາພລໍ. ວິຣາຄານຸປສ຺ສນາຍ ຣາເຄ ນ ກມ຺ປຕີຕິ – ວິປສ຺ສນາພລໍ. ນິໂຣຘານຸປສ຺ສນາ ສມຸທເຍ ນ ກມ຺ປຕີຕິ – ວິປສ຺ສນາພລໍ. ປຏິນິສ຺ສຄ຺ຄານຸປສ຺ສນາຍ ອາທາເນ ນ ກມ຺ປຕີຕິ – ວິປສ຺ສນາພລໍ. ອວິຊ຺ຊາຍ ອວິຊ຺ຊາສຫຄຕກິເລເສ ຈ ຂນ຺ເຘ ຈ ນ ກມ຺ປຕິ ນ ຈລຕິ ນ ເວຘຕີຕິ – ວິປສ຺ສນາພລໍ. ອິທໍ ວິປສ຺ສນາພລໍ.

ກຕມານິ ທສ ເສຂພລານິ, ທສ ອເສຂພລານິ? ສມ຺ມາທິຏ຺ຐິໍ [ສມ຺ມາທິຏ຺ຐິ (ກ.) ເອວມີທິເສສຸ ນວສຸ ປເທສຸ ທຸຕິຍນ຺ຕວຈເນນ. ທີ. ນິ. ໓.໓໔໘ ປສ຺ສິຕພ຺ພາ] ສິກ຺ຂຕີຕິ – ເສຂພລໍ. ຕຕ຺ຖ ສິກ຺ຂິຕຕ຺ຕາ ອເສຂພລໍ. ສມ຺ມາສງ຺ກປ຺ປໍ ສິກ຺ຂຕີຕິ – ເສຂພລໍ. ຕຕ຺ຖ ສິກ຺ຂິຕຕ຺ຕາ – ອເສຂພລໍ. ສມ຺ມາວາຈໍ…ເປ… ສມ຺ມາກມ຺ມນ຺ຕໍ… ສມ຺ມາອາຊີວໍ… ສມ຺ມາວາຍາມໍ… ສມ຺ມາສຕິໍ… ສມ຺ມາສມາຘິໍ… ສມ຺ມາຎາຓໍ…ເປ… ສມ຺ມາວິມຸຕ຺ຕິໍ ສິກ຺ຂຕີຕິ – ເສຂພລໍ. ຕຕ຺ຖ ສິກ຺ຂິຕຕ຺ຕາ – ອເສຂພລໍ. ອິມານິ ທສ ເສຂພລານິ, ທສ ອເສຂພລານິ.

ກຕມານິ ທສ ຂີຓາສວພລານິ? [ອ. ນິ. ໑໐.໙໐ ປສ຺ສິຕພ຺ພາ] ອິຘ ຂີຓາສວສ຺ສ ຠິກ຺ຂຸໂນ ອນິຈ຺ຈໂຕ ສພ຺ເພ ສງ຺ຂາຣາ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐາ ໂຫນ຺ຕິ. ຍມ຺ປິ ຂີຓາສວສ຺ສ ຠິກ຺ຂຸໂນ ອນິຈ຺ຈໂຕ ສພ຺ເພ ສງ຺ຂາຣາ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐາ ໂຫນ຺ຕິ, ອິທມ຺ປິ ຂີຓາສວສ຺ສ ຠິກ຺ຂຸໂນ ພລໍ ໂຫຕິ, ຍໍ ພລໍ ອາຄມ຺ມ ຂີຓາສໂວ ຠິກ຺ຂຸ ອາສວານໍ ຂຍໍ ປຏິຊານາຕິ – ‘‘ຂີຓາ ເມ ອາສວາ’’ຕິ.

ປຸນ ຈປຣໍ ຂີຓາສວສ຺ສ ຠິກ຺ຂຸໂນ ອງ຺ຄາຣກາສູປມາ ກາມາ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐາ ໂຫນ຺ຕິ. ຍມ຺ປິ ຂີຓາສວສ຺ສ ຠິກ຺ຂຸໂນ ອງ຺ຄາຣກາສູປມາ ກາມາ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐາ ໂຫນ຺ຕິ, ອິທມ຺ປິ ຂີຓາສວສ຺ສ ຠິກ຺ຂຸໂນ ພລໍ ໂຫຕິ, ຍໍ ພລໍ ອາຄມ຺ມ ຂີຓາສໂວ ຠິກ຺ຂຸ ອາສວານໍ ຂຍໍ ປຏິຊານາຕິ – ‘‘ຂີຓາ ເມ ອາສວາ’’ຕິ.

ປຸນ ຈປຣໍ ຂີຓາສວສ຺ສ ຠິກ຺ຂຸໂນ ວິເວກນິນ຺ນໍ ຈິຕ຺ຕໍ ໂຫຕິ ວິເວກໂປຓໍ ວິເວກປພ຺ຠາຣໍ ວິເວກຏ຺ຐໍ ເນກ຺ຂມ຺ມາຠິຣຕໍ ພ຺ຍນ຺ຕີຠູຕໍ [ພ຺ຍນ຺ຕິຠູຕໍ (ກ.)] ສພ຺ພໂສ ອາສວຏ຺ຐານິເຍຫິ ຘມ຺ເມຫິ. ຍມ຺ປິ ຂີຓາສວສ຺ສ ຠິກ຺ຂຸໂນ ວິເວກນິນ຺ນໍ ຈິຕ຺ຕໍ ໂຫຕິ ວິເວກໂປຓໍ ວິເວກປພ຺ຠາຣໍ ວິເວກຏ຺ຐໍ ເນກ຺ຂມ຺ມາຠິຣຕໍ ພ຺ຍນ຺ຕິຠູຕໍ ສພ຺ພໂສ ອາສວຏ຺ຐານິເຍຫິ ຘມ຺ເມຫິ, ອິທມ຺ປິ ຂີຓາສວສ຺ສ ຠິກ຺ຂຸໂນ ພລໍ ໂຫຕິ, ຍໍ ພລໍ ອາຄມ຺ມ ຂີຓາສໂວ ຠິກ຺ຂຸ ອາສວານໍ ຂຍໍ ປຏິຊານາຕິ – ‘‘ຂີຓາ ເມ ອາສວາ’’ຕິ.

ປຸນ ຈປຣໍ ຂີຓາສວສ຺ສ ຠິກ຺ຂຸໂນ ຈຕ຺ຕາໂຣ ສຕິປຏ຺ຐານາ ຠາວິຕາ ໂຫນ຺ຕິ ສຸຠາວິຕາ. ຍມ຺ປິ ຂີຓາສວສ຺ສ ຠິກ຺ຂຸໂນ ຈຕ຺ຕາໂຣ ສຕິປຏ຺ຐານາ ຠາວິຕາ ໂຫນ຺ຕິ ສຸຠາວິຕາ, ອິທມ຺ປິ ຂີຓາສວສ຺ສ ຠິກ຺ຂຸໂນ ພລໍ ໂຫຕິ, ຍໍ ພລໍ ອາຄມ຺ມ ຂີຓາສໂວ ຠິກ຺ຂຸ ອາສວານໍ ຂຍໍ ປຏິຊານາຕິ – ‘‘ຂີຓາ ເມ ອາສວາ’’ຕິ.

ປຸນ ຈປຣໍ ຂີຓາສວສ຺ສ ຠິກ຺ຂຸໂນ ຈຕ຺ຕາໂຣ ສມ຺ມປ຺ປຘານາ ຠາວິຕາ ໂຫນ຺ຕິ ສຸຠາວິຕາ…ເປ… ຈຕ຺ຕາໂຣ ອິທ຺ຘິປາທາ ຠາວິຕາ ໂຫນ຺ຕິ ສຸຠາວິຕາ… ປຎ຺ຈິນ຺ທ຺ຣິຍານິ ຠາວິຕານິ ໂຫນ຺ຕິ ສຸຠາວິຕານິ… ປຎ຺ຈ ພລານິ ຠາວິຕານິ ໂຫນ຺ຕິ ສຸຠາວິຕານິ… ສຕ຺ຕ ໂພຊ຺ຌງ຺ຄາ ຠາວິຕາ ໂຫນ຺ຕິ ສຸຠາວິຕາ…ເປ… ອຣິໂຍ ອຏ຺ຐງ຺ຄິໂກ ມຄ຺ໂຄ ຠາວິໂຕ ໂຫຕິ ສຸຠາວິໂຕ. ຍມ຺ປິ ຂີຓາສວສ຺ສ ຠິກ຺ຂຸໂນ ອຏ຺ຐງ຺ຄິໂກ ມຄ຺ໂຄ ຠາວິໂຕ ໂຫຕິ ສຸຠາວິໂຕ, ອິທມ຺ປິ ຂີຓາສວສ຺ສ ຠິກ຺ຂຸໂນ ພລໍ ໂຫຕິ, ຍໍ ພລໍ ອາຄມ຺ມ ຂີຓາສໂວ ຠິກ຺ຂຸ ອາສວານໍ ຂຍໍ ປຏິຊານາຕິ – ‘‘ຂີຓາ ເມ ອາສວາ’’ຕິ. ອິມານິ ທສ ຂີຓາສວພລານິ.

ກຕມານິ ທສ ອິທ຺ຘິພລານິ? ອຘິຏ຺ຐານາ ອິທ຺ຘິ, ວິກຸພ຺ພນາ ອິທ຺ຘິ, ມໂນມຍາ ອິທ຺ຘິ, ຎາຓວິປ຺ຜາຣາ ອິທ຺ຘິ, ສມາຘິວິປ຺ຜາຣາ ອິທ຺ຘິ, ອຣິຍາ ອິທ຺ຘິ, ກມ຺ມວິປາກຊາ ອິທ຺ຘິ, ປຸຎ຺ຎວໂຕ ອິທ຺ຘິ, ວິຊ຺ຊາມຍາ ອິທ຺ຘິ, ຕຕ຺ຖ ຕຕ຺ຖ ສມ຺ມາ ປໂຍຄປ຺ປຈ຺ຈຍາ ອິຊ຺ຌນຏ຺ເຐນ ອິທ຺ຘິ – ອິມານິ ທສ ອິທ຺ຘິພລານິ.

ກຕມານິ ທສ ຕຖາຄຕພລານິ? ອິຘ ຕຖາຄໂຕ ຐານຎ຺ຈ ຐານໂຕ ອຏ຺ຐານຎ຺ຈ ອຏ຺ຐານໂຕ ຍຖາຠູຕໍ ປຊານາຕິ. ຍມ຺ປິ ຕຖາຄໂຕ ຐານຎ຺ຈ ຐານໂຕ ອຏ຺ຐານຎ຺ຈ ອຏ຺ຐານໂຕ ຍຖາຠູຕໍ ປຊານາຕິ, ອິທມ຺ປິ ຕຖາຄຕສ຺ສ ຕຖາຄຕພລໍ ໂຫຕິ, ຍໍ ພລໍ ອາຄມ຺ມ ຕຖາຄໂຕ ອາສຠໍ ຐານໍ ປຏິຊານາຕິ ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

ປຸນ ຈປຣໍ ຕຖາຄໂຕ ອຕີຕານາຄຕປຈ຺ຈຸປ຺ປນ຺ນານໍ ກມ຺ມສມາທານານໍ ຐານໂສ ເຫຕຸໂສ ວິປາກໍ ຍຖາຠູຕໍ ປຊານາຕິ. ຍມ຺ປິ ຕຖາຄໂຕ ອຕີຕານາຄຕປຈ຺ຈຸປ຺ປນ຺ນານໍ ກມ຺ມສມາທານານໍ ຐານໂສ ເຫຕຸໂສ ວິປາກໍ ຍຖາຠູຕໍ ປຊານາຕິ, ອິທມ຺ປິ ຕຖາຄຕສ຺ສ ຕຖາຄຕພລໍ ໂຫຕິ, ຍໍ ພລໍ ອາຄມ຺ມ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ, ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

ປຸນ ຈປຣໍ ຕຖາຄໂຕ ສພ຺ພຕ຺ຖຄາມິນິໍ ປຏິປທໍ [ສພ຺ພຕ຺ຖຄາມິນີປຏິປທໍ (ສ຺ຍາ.) ມ. ນິ. ໑.໑໔໘ ປສ຺ສິຕພ຺ພາ] ຍຖາຠູຕໍ ປຊານາຕິ. ຍມ຺ປິ ຕຖາຄໂຕ ສພ຺ພຕ຺ຖຄາມິນິໍ ປຏິປທໍ ຍຖາຠູຕໍ ປຊານາຕິ, ອິທມ຺ປິ ຕຖາຄຕສ຺ສ ຕຖາຄຕພລໍ ໂຫຕິ, ຍໍ ພລໍ ອາຄມ຺ມ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

ປຸນ ຈປຣໍ ຕຖາຄໂຕ ອເນກຘາຕຸນານາຘາຕຸໂລກໍ ຍຖາຠູຕໍ ປຊານາຕິ. ຍມ຺ປິ ຕຖາຄໂຕ ອເນກຘາຕຸນານາຘາຕຸໂລກໍ ຍຖາຠູຕໍ ປຊານາຕິ, ອິທມ຺ປິ ຕຖາຄຕສ຺ສ…ເປ….

ປຸນ ຈປຣໍ ຕຖາຄໂຕ ສຕ຺ຕານໍ ນານາຘິມຸຕ຺ຕິກຕໍ ຍຖາຠູຕໍ ປຊານາຕິ. ຍມ຺ປິ ຕຖາຄໂຕ ສຕ຺ຕານໍ ນານາຘິມຸຕ຺ຕິກຕໍ ຍຖາຠູຕໍ ປຊານາຕິ, ອິທມ຺ປິ ຕຖາຄຕສ຺ສ…ເປ….

ປຸນ ຈປຣໍ ຕຖາຄໂຕ ປຣສຕ຺ຕານໍ ປຣປຸຄ຺ຄລານໍ ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ປຊານາຕິ. ຍມ຺ປິ ຕຖາຄໂຕ ປຣສຕ຺ຕານໍ ປຣປຸຄ຺ຄລານໍ ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ປຊານາຕິ, ອິທມ຺ປິ ຕຖາຄຕສ຺ສ…ເປ….

ປຸນ ຈປຣໍ ຕຖາຄໂຕ ຌານວິໂມກ຺ຂສມາຘິສມາປຕ຺ຕີນໍ ສໍກິເລສໍ ໂວທານໍ ວຸຏ຺ຐານໍ ຍຖາຠູຕໍ ປຊານາຕິ. ຍມ຺ປິ ຕຖາຄໂຕ ຌານວິໂມກ຺ຂສມາຘິສມາປຕ຺ຕີນໍ ສໍກິເລສໍ ໂວທານໍ ວຸຏ຺ຐານໍ ຍຖາຠູຕໍ ປຊານາຕິ, ອິທມ຺ປິ ຕຖາຄຕສ຺ສ…ເປ….

ປຸນ ຈປຣໍ ຕຖາຄໂຕ ອເນກວິຫິຕໍ ປຸພ຺ເພນິວາສໍ ອນຸສ຺ສຣຕິ, ເສຍ຺ຍຖິທໍ – ເອກມ຺ປິ ຊາຕິໍ ທ຺ເວປິ ຊາຕິໂຍ…ເປ… ອິຕິ ສາກາຣໍ ສອຸທ຺ເທສໍ ອເນກວິຫິຕໍ ປຸພ຺ເພນິວາສໍ ອນຸສ຺ສຣຕິ. ຍມ຺ປິ ຕຖາຄໂຕ ອເນກວິຫິຕໍ ປຸພ຺ເພນິວາສໍ ອນຸສ຺ສຣຕິ. ເສຍ຺ຍຖິທໍ – ເອກມ຺ປິ ຊາຕິໍ ທ຺ເວປິ ຊາຕິໂຍ…ເປ… ອິທມ຺ປິ ຕຖາຄຕສ຺ສ…ເປ….

ປຸນ ຈປຣໍ ຕຖາຄໂຕ ທິພ຺ເພນ ຈກ຺ຂຸນາ ວິສຸທ຺ເຘນ ອຕິກ຺ກນ຺ຕມານຸສເກນ ສຕ຺ເຕ ປສ຺ສຕິ ຈວມາເນ ອຸປປຊ຺ຊມາເນ…ເປ… ຍມ຺ປິ ຕຖາຄໂຕ ທິພ຺ເພນ ຈກ຺ຂຸນາ ວິສຸທ຺ເຘນ ອຕິກ຺ກນ຺ຕມານຸສເກນ ສຕ຺ເຕ ປສ຺ສຕິ ຈວມາເນ ອຸປປຊ຺ຊມາເນ…ເປ… ອິທມ຺ປິ ຕຖາຄຕສ຺ສ…ເປ….

ປຸນ ຈປຣໍ ຕຖາຄໂຕ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ. ຍມ຺ປິ ຕຖາຄໂຕ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ, ອິທມ຺ປິ ຕຖາຄຕສ຺ສ ຕຖາຄຕພລໍ ໂຫຕິ, ຍໍ ພລໍ ອາຄມ຺ມ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ. ອິມານິ ທສ ຕຖາຄຕພລານິ.

໔໕. ເກນຏ຺ເຐນ ສທ຺ຘາພລໍ? ເກນຏ຺ເຐນ ວີຣິຍພລໍ? ເກນຏ຺ເຐນ ສຕິພລໍ? ເກນຏ຺ເຐນ ສມາຘິພລໍ? ເກນຏ຺ເຐນ ປຎ຺ຎາພລໍ? ເກນຏ຺ເຐນ ຫິຣິພລໍ? ເກນຏ຺ເຐນ ໂອຕ຺ຕປ຺ປພລໍ? ເກນຏ຺ເຐນ ປຏິສງ຺ຂານພລໍ…ເປ… ເກນຏ຺ເຐນ ຕຖາຄຕພລໍ?

ອສ຺ສທ຺ຘິເຍ ອກມ຺ປິຍຏ຺ເຐນ ສທ຺ຘາພລໍ. ໂກສຊ຺ເຊ ອກມ຺ປິຍຏ຺ເຐນ ວີຣິຍພລໍ. ປມາເທ ອກມ຺ປິຍຏ຺ເຐນ ສຕິພລໍ. ອຸທ຺ຘຈ຺ເຈ ອກມ຺ປິຍຏ຺ເຐນ ສມາຘິພລໍ. ອວິຊ຺ຊາຍ ອກມ຺ປິຍຏ຺ເຐນ ປຎ຺ຎາພລໍ. ຫິຣີຍຕິ ປາປເກ ອກຸສເລ ຘມ຺ເມຕິ – ຫິຣິພລໍ. ໂອຕ຺ຕປ຺ປຕິ ປາປເກ ອກຸສເລ ຘມ຺ເມຕິ – ໂອຕ຺ຕປ຺ປພລໍ. ຎາເຓນ ກິເລເສ ປຏິສງ຺ຂາຕີຕິ – ປຏິສງ຺ຂານພລໍ. ຕຕ຺ຖ ຊາຕາ ຘມ຺ມາ ເອກຣສາ ໂຫນ຺ຕີຕິ – ຠາວນາພລໍ. ຕຕ຺ຖ ນຕ຺ຖິ ກິຎ຺ຈິ ວຊ຺ຊນ຺ຕິ – ອນວຊ຺ຊພລໍ. ເຕນ ຈິຕ຺ຕໍ ສງ຺ຄຓ຺ຫາຕີຕິ – ສງ຺ຄຫພລໍ. ຕໍ ຕສ຺ສ ຂມຕີຕິ – [ຕໍ ຂມຕີຕິ (ກ.)] ຂນ຺ຕິພລໍ. ເຕນ ຈິຕ຺ຕໍ ປຎ຺ຎເປຕີຕິ – ປຎ຺ຎຕ຺ຕິພລໍ. ເຕນ ຈິຕ຺ຕໍ ນິຊ຺ຌາເປຕີຕິ – ນິຊ຺ຌຕ຺ຕິພລໍ. ເຕນ ຈິຕ຺ຕໍ ວສໍ ວຕ຺ເຕຕີຕິ – ອິສ຺ສຣິຍພລໍ. ເຕນ ຈິຕ຺ຕໍ ອຘິຏ຺ຐາຕີຕິ – ອຘິຏ຺ຐານພລໍ. ເຕນ ຈິຕ຺ຕໍ ເອກຄ຺ຄນ຺ຕິ – ສມຖພລໍ. ຕຕ຺ຖ ຊາເຕ ຘມ຺ເມ ອນຸປສ຺ສຕີຕິ – ວິປສ຺ສນາພລໍ. ຕຕ຺ຖ ສິກ຺ຂຕີຕິ – ເສຂພລໍ. ຕຕ຺ຖ ສິກ຺ຂິຕຕ຺ຕາ – ອເສຂພລໍ. ເຕນ ອາສວາ ຂີຓາຕິ – ຂີຓາສວພລໍ. ຕສ຺ສ ອິຊ຺ຌຕີຕິ – ອິທ຺ຘິພລໍ. ອປ຺ປເມຍ຺ຍຏ຺ເຐນ ຕຖາຄຕພລນ຺ຕິ.

ພລກຖາ ນິຏ຺ຐິຕາ.