໙. ມຄ຺ຄກຖາ

໒໓໗. ມຄ຺ໂຄຕິ ເກນຏ຺ເຐນ ມຄ຺ໂຄ? ໂສຕາປຕ຺ຕິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ ມິຈ຺ຉາທິຏ຺ຐິຍາ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ, ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ [ອຸຕ຺ຕຣິໍ ປຏິເວຘາຍ (ສ຺ຍາ.)] ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ອຠິນິໂຣປນຏ຺ເຐນ ສມ຺ມາສງ຺ກປ຺ໂປ ມິຈ຺ຉາສງ຺ກປ຺ປສ຺ສ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ, ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ປຣິຄ຺ຄຫຏ຺ເຐນ ສມ຺ມາວາຈາ ມິຈ຺ຉາວາຈາຍ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ, ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ສມຸຏ຺ຐານຏ຺ເຐນ ສມ຺ມາກມ຺ມນ຺ໂຕ ມິຈ຺ຉາກມ຺ມນ຺ຕສ຺ສ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ໂວທານຏ຺ເຐນ ສມ຺ມາອາຊີໂວ ມິຈ຺ຉາອາຊີວສ຺ສ ປຫານາຍ ມຄ຺ໂຄ ເຈວ ເຫຕຸ ຈ…ເປ… ປຄ຺ຄຫຏ຺ເຐນ ສມ຺ມາວາຍາໂມ ມິຈ຺ຉາວາຍາມສ຺ສ ປຫານາຍ ມຄ຺ໂຄ ເຈວ ເຫຕຸ ຈ…ເປ… ອຸປຏ຺ຐານຏ຺ເຐນ ສມ຺ມາສຕິ ມິຈ຺ຉາສຕິຍາ ປຫານາຍ ມຄ຺ໂຄ ເຈວ ເຫຕຸ ຈ…ເປ… ອວິກ຺ເຂປຏ຺ເຐນ ສມ຺ມາສມາຘິ ມິຈ຺ຉາສມາຘິສ຺ສ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ, ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ສກທາຄາມິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ໂອຬາຣິກສ຺ສ ກາມຣາຄສຎ຺ໂຎຊນສ຺ສ ປຏິຆສຎ຺ໂຎຊນສ຺ສ ໂອຬາຣິກສ຺ສ ກາມຣາຄານຸສຍສ຺ສ ປຏິຆານຸສຍສ຺ສ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ, ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ອນາຄາມິມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ອນຸສຫຄຕສ຺ສ ກາມຣາຄສຎ຺ໂຎຊນສ຺ສ ປຏິຆສຎ຺ໂຎຊນສ຺ສ, ອນຸສຫຄຕສ຺ສ ກາມຣາຄານຸສຍສ຺ສ ປຏິຆານຸສຍສ຺ສ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ, ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ອຣຫຕ຺ຕມຄ຺ຄກ຺ຂເຓ ທສ຺ສນຏ຺ເຐນ ສມ຺ມາທິຏ຺ຐິ…ເປ… ອວິກ຺ເຂປຏ຺ເຐນ ສມ຺ມາສມາຘິ ຣູປຣາຄສ຺ສ ອຣູປຣາຄສ຺ສ ມານສ຺ສ ອຸທ຺ຘຈ຺ຈສ຺ສ ອວິຊ຺ຊາຍ, ມານານຸສຍສ຺ສ ຠວຣາຄານຸສຍສ຺ສ ອວິຊ຺ຊານຸສຍສ຺ສ ປຫານາຍ ມຄ຺ໂຄ ເຈວ ເຫຕຸ ຈ, ສຫຊາຕານໍ ຘມ຺ມານໍ ອຸປຕ຺ຖມ຺ຠນາຍ ມຄ຺ໂຄ ເຈວ ເຫຕຸ ຈ, ກິເລສານໍ ປຣິຍາທານາຍ ມຄ຺ໂຄ ເຈວ ເຫຕຸ ຈ, ປຏິເວຘາທິວິໂສຘນາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ ອຘິຏ຺ຐານາຍ ມຄ຺ໂຄ ເຈວ ເຫຕຸ ຈ, ຈິຕ຺ຕສ຺ສ, ໂວທານາຍ ມຄ຺ໂຄ ເຈວ ເຫຕຸ ຈ, ວິເສສາຘິຄມາຍ ມຄ຺ໂຄ ເຈວ ເຫຕຸ ຈ, ອຸຕ຺ຕຣິ ປຏິເວຘາຍ ມຄ຺ໂຄ ເຈວ ເຫຕຸ ຈ, ສຈ຺ຈາຠິສມຍາຍ ມຄ຺ໂຄ ເຈວ, ເຫຕຸ ຈ, ນິໂຣເຘ ປຕິຏ຺ຐາປນາຍ ມຄ຺ໂຄ ເຈວ ເຫຕຸ ຈ.

ທສ຺ສນມຄ຺ໂຄ ສມ຺ມາທິຏ຺ຐິ, ອຠິນິໂຣປນມຄ຺ໂຄ ສມ຺ມາສງ຺ກປ຺ໂປ, ປຣິຄ຺ຄຫມຄ຺ໂຄ ສມ຺ມາວາຈາ, ສມຸຏ຺ຐານມຄ຺ໂຄ ສມ຺ມາກມ຺ມນ຺ໂຕ, ໂວທານມຄ຺ໂຄ ສມ຺ມາອາຊີໂວ, ປຄ຺ຄຫມຄ຺ໂຄ ສມ຺ມາວາຍາໂມ, ອຸປຏ຺ຐານມຄ຺ໂຄ ສມ຺ມາສຕິ, ອວິກ຺ເຂປມຄ຺ໂຄ ສມ຺ມາສມາຘິ. ອຸປຏ຺ຐານມຄ຺ໂຄ ສຕິສມ຺ໂພຊ຺ຌງ຺ໂຄ, ປວິຈຍມຄ຺ໂຄ ຘມ຺ມວິຈຍສມ຺ໂພຊ຺ຌງ຺ໂຄ, ປຄ຺ຄຫມຄ຺ໂຄ ວີຣິຍສມ຺ໂພຊ຺ຌງ຺ໂຄ, ຜຣຓມຄ຺ໂຄ ປີຕິສມ຺ໂພຊ຺ຌງ຺ໂຄ, ອຸປສມມຄ຺ໂຄ ປສ຺ສທ຺ຘິສມ຺ໂພຊ຺ຌງ຺ໂຄ, ອວິກ຺ເຂປມຄ຺ໂຄ ສມາຘິສມ຺ໂພຊ຺ຌງ຺ໂຄ, ປຏິສງ຺ຂານມຄ຺ໂຄ ອຸເປກ຺ຂາສມ຺ໂພຊ຺ຌງ຺ໂຄ.

ອສ຺ສທ຺ຘິເຍ ອກມ຺ປິຍມຄ຺ໂຄ ສທ຺ຘາພລໍ, ໂກສຊ຺ເຊ ອກມ຺ປິຍມຄ຺ໂຄ ວີຣິຍພລໍ, ປມາເທ ອກມ຺ປິຍມຄ຺ໂຄ ສຕິພລໍ, ອຸທ຺ຘຈ຺ເຈ ອກມ຺ປິຍມຄ຺ໂຄ ສມາຘິພລໍ, ອວິຊ຺ຊາຍ ອກມ຺ປິຍມຄ຺ໂຄ ປຎ຺ຎາພລໍ. ອຘິໂມກ຺ຂມຄ຺ໂຄ ສທ຺ຘິນ຺ທ຺ຣິຍໍ, ປຄ຺ຄຫມຄ຺ໂຄ ວີຣິຍິນ຺ທ຺ຣິຍໍ, ອຸປຏ຺ຐານມຄ຺ໂຄ ສຕິນ຺ທ຺ຣິຍໍ, ອວິກ຺ເຂປມຄ຺ໂຄ ສມາຘິນ຺ທ຺ຣິຍໍ, ທສ຺ສນມຄ຺ໂຄ ປຎ຺ຎິນ຺ທ຺ຣິຍໍ.

ອາຘິປເຕຍ຺ຍຏ຺ເຐນ ອິນ຺ທ຺ຣິຍາ ມຄ຺ໂຄ, ອກມ຺ປິຍຏ຺ເຐນ ພລາ ມຄ຺ໂຄ, ນິຍ຺ຍານຏ຺ເຐນ ໂພຊ຺ຌງ຺ຄາ ມຄ຺ໂຄ, ເຫຕຸຏ຺ເຐນ ມຄ຺ຄງ຺ຄາ ມຄ຺ໂຄ, ອຸປຏ຺ຐານຏ຺ເຐນ ສຕິປຏ຺ຐານາ ມຄ຺ໂຄ, ປທຫນຏ຺ເຐນ ສມ຺ມປ຺ປຘານາ ມຄ຺ໂຄ, ອິຊ຺ຌນຏ຺ເຐນ ອິທ຺ຘິປາທາ ມຄ຺ໂຄ, ຕຖຏ຺ເຐນ ສຈ຺ຈານິ ມຄ຺ໂຄ, ອວິກ຺ເຂປຏ຺ເຐນ ສມໂຖ ມຄ຺ໂຄ, ອນຸປສ຺ສນຏ຺ເຐນ ວິປສ຺ສນາ ມຄ຺ໂຄ, ເອກຣສຏ຺ເຐນ ສມຖວິປສ຺ສນາ ມຄ຺ໂຄ, ອນຕິວຕ຺ຕນຏ຺ເຐນ ຍຸຄນທ຺ຘາ ມຄ຺ໂຄ, ສໍວຣຏ຺ເຐນ ສີລວິສຸທ຺ຘິ ມຄ຺ໂຄ, ອວິກ຺ເຂປຏ຺ເຐນ ຈິຕ຺ຕວິສຸທ຺ຘິ ມຄ຺ໂຄ, ທສ຺ສນຏ຺ເຐນ ທິຏ຺ຐິວິສຸທ຺ຘິ ມຄ຺ໂຄ, ມຸຕ຺ຕຏ຺ເຐນ ວິໂມກ຺ໂຂ ມຄ຺ໂຄ, ປຏິເວຘຏ຺ເຐນ ວິຊ຺ຊາ ມຄ຺ໂຄ, ປຣິຈ຺ຈາຄຏ຺ເຐນ ວິມຸຕ຺ຕິ ມຄ຺ໂຄ, ສມຸຈ຺ເຉທຏ຺ເຐນ ຂເຍ ຎາຓໍ ມຄ຺ໂຄ, ຉນ຺ໂທ ມູລຏ຺ເຐນ ມຄ຺ໂຄ, ມນສິກາໂຣ ສມຸຏ຺ຐານຏ຺ເຐນ ມຄ຺ໂຄ, ຜສ຺ໂສ ສໂມຘານຏ຺ເຐນ ມຄ຺ໂຄ, ເວທນາ ສໂມສຣຓຏ຺ເຐນ ມຄ຺ໂຄ, ສມາຘິ ປມຸຂຏ຺ເຐນ ມຄ຺ໂຄ, ສຕິ ອາຘິປເຕຍ຺ຍຏ຺ເຐນ ມຄ຺ໂຄ, ປຎ຺ຎາ ຕຕຸຕ຺ຕຣຏ຺ເຐນ ມຄ຺ໂຄ, ວິມຸຕ຺ຕິ ສາຣຏ຺ເຐນ ມຄ຺ໂຄ, ອມໂຕຄຘໍ ນິພ຺ພານໍ ປຣິໂຍສານຏ຺ເຐນ ມຄ຺ໂຄຕິ.

ມຄ຺ຄກຖາ ນິຏ຺ຐິຕາ.