໓. ສມາຘິຠາວນາມຍຎາຓນິທ຺ເທໂສ

໔໓. ກຖໍ ສໍວຣິຕ຺ວາ ສມາທຫເນ ປຎ຺ຎາ ສມາຘິຠາວນາມເຍ ຎາຓໍ? ເອໂກ ສມາຘິ – ຈິຕ຺ຕສ຺ສ ເອກຄ຺ຄຕາ. ທ຺ເວ ສມາຘີ – ໂລກິໂຍ ສມາຘິ, ໂລກຸຕ຺ຕໂຣ ສມາຘິ. ຕໂຍ ສມາຘີ – ສວິຕກ຺ກສວິຈາໂຣ ສມາຘິ, ອວິຕກ຺ກວິຈາຣມຕ຺ໂຕ ສມາຘິ, ອວິຕກ຺ກອວິຈາໂຣ ສມາຘິ. ຈຕ຺ຕາໂຣ ສມາຘີ – ຫານຠາຄິໂຍ ສມາຘິ, ຐິຕິຠາຄິໂຍ ສມາຘິ, ວິເສສຠາຄິໂຍ ສມາຘິ, ນິພ຺ເພຘຠາຄິໂຍ ສມາຘິ. ປຎ຺ຈ ສມາຘີ – ປີຕິຜຣຓຕາ, ສຸຂຜຣຓຕາ, ເຈໂຕຜຣຓຕາ, ອາໂລກຜຣຓຕາ, ປຈ຺ຈເວກ຺ຂຓານິມິຕ຺ຕໍ [ປຈ຺ຈເວກ຺ຂນານິມິຕ຺ຕໍ (ກ.)].

ຉ ສມາຘີ – ພຸທ຺ຘານຸສ຺ສຕິວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ຘມ຺ມານຸສ຺ສຕິວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ສງ຺ຆານຸສ຺ສຕິວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ສີລານຸສ຺ສຕິວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ຈາຄານຸສ຺ສຕິວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ເທວຕານຸສ຺ສຕິວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ. ສຕ຺ຕ ສມາຘີ – ສມາຘິກຸສລຕາ, ສມາຘິສ຺ສ ສມາປຕ຺ຕິກຸສລຕາ, ສມາຘິສ຺ສ ຐິຕິກຸສລຕາ, ສມາຘິສ຺ສ ວຸຏ຺ຐານກຸສລຕາ, ສມາຘິສ຺ສ ກລ຺ລຕາກຸສລຕາ [ກລ຺ລິຕກຸສລຕາ (ສ຺ຍາ. ກ.)], ສມາຘິສ຺ສ ໂຄຈຣກຸສລຕາ, ສມາຘິສ຺ສ ອຠິນີຫາຣກຸສລຕາ. ອຏ຺ຐ ສມາຘີ – ປຖວີກສິຓວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ອາໂປກສິຓວເສນ…ເປ… ເຕໂຊກສິຓວເສນ… ວາໂຍກສິຓວເສນ… ນີລກສິຓວເສນ… ປີຕກສິຓວເສນ… ໂລຫິຕກສິຓວເສນ… ໂອທາຕກສິຓວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ. ນວ ສມາຘີ – ຣູປາວຈໂຣ ສມາຘິ ອຕ຺ຖິ ຫີໂນ, ອຕ຺ຖິ ມຊ຺ໂຌໂມ, ອຕ຺ຖິ ປຓີໂຕ; ອຣູປາວຈໂຣ ສມາຘິ ອຕ຺ຖິ ຫີໂນ, ອຕ຺ຖິ ມຊ຺ໂຌໂມ, ອຕ຺ຖິ ປຓີໂຕ; ສຸຎ຺ຎໂຕ ສມາຘິ, ອນິມິຕ຺ໂຕ ສມາຘິ, ອປ຺ປຓິຫິໂຕ ສມາຘິ. ທສ ສມາຘີ – ອຸທ຺ຘຸມາຕກສຎ຺ຎາວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ, ວິນີລກສຎ຺ຎາວເສນ…ເປ… ວິປຸພ຺ພກສຎ຺ຎາວເສນ… ວິຈ຺ຉິທ຺ທກສຎ຺ຎາວເສນ… ວິກ຺ຂາຍິຕກສຎ຺ຎາວເສນ… ວິກ຺ຂິຕ຺ຕກສຎ຺ຎາວເສນ… ຫຕວິກ຺ຂິຕ຺ຕກສຎ຺ຎາວເສນ… ໂລຫິຕກສຎ຺ຎາວເສນ… ປຸຬວກສຎ຺ຎາວເສນ [ປຸຬຸວກ ສຎ຺ຎາວເສນ (ກ.)] … ອຏ຺ຐິກສຎ຺ຎາວເສນ ຈິຕ຺ຕສ຺ສ ເອກຄ຺ຄຕາ ອວິກ຺ເຂໂປ ສມາຘິ. ອິເມ ປຎ຺ຈປຎ຺ຎາສ ສມາຘິ.

໔໔. ອປິ ຈ, ປຎ຺ຈວີສຕິ ສມາຘິສ຺ສ ສມາຘິຏ຺ຐາ – ປຣິຄ຺ຄຫຏ຺ເຐນ ສມາຘິ, ປຣິວາຣຏ຺ເຐນ ສມາຘິ, ປຣິປູຣຏ຺ເຐນ ສມາຘິ, ເອກຄ຺ຄຏ຺ເຐນ ສມາຘິ, ອວິກ຺ເຂປຏ຺ເຐນ ສມາຘິ, ອວິສາຣຏ຺ເຐນ ສມາຘິ, ອນາວິລຏ຺ເຐນ ສມາຘິ, ອນິຎ຺ຊນຏ຺ເຐນ ສມາຘິ, ວິມຸຕ຺ຕຏ຺ເຐນ ສມາຘິ, ເອກຕ຺ຕຸປຏ຺ຐານວເສນ ຈິຕ຺ຕສ຺ສ ຐິຕຕ຺ຕາ ສມາຘິ, ສມໍ ເອສຕີຕິ ສມາຘິ, ວິສມໍ ເນສຕີຕິ ສມາຘິ, ສມໍ ເອສິຕຕ຺ຕາ ສມາຘິ, ວິສມໍ ເນສິຕຕ຺ຕາ ສມາຘິ, ສມໍ ອາທິຍຕີຕິ ສມາຘິ, ວິສມໍ ນາທິຍຕີຕິ ສມາຘິ, ສມໍ ອາທິນ຺ນຕ຺ຕາ ສມາຘິ, ວິສມໍ ອນາທິນ຺ນຕ຺ຕາ ສມາຘິ, ສມໍ ປຏິປຊ຺ຊຕີຕິ ສມາຘິ, ວິສມໍ ນປ຺ປຏິປຊ຺ຊຕີຕິ ສມາຘິ, ສມໍ ປຏິປນ຺ນຕ຺ຕາ ສມາຘິ, ວິສມໍ ນປ຺ປຏິປນ຺ນຕ຺ຕາ ສມາຘິ, ສມໍ ຌາຍຕີຕິ ສມາຘິ, ວິສມໍ ຌາເປຕີຕິ ສມາຘິ, ສມໍ ຌາຕຕ຺ຕາ ສມາຘິ, ວິສມໍ ຌາປິຕຕ຺ຕາ ສມາຘິ, ສໂມ ຈ ຫິໂຕ ຈ ສຸໂຂ ຈາຕິ ສມາຘິ. ອິເມ ປຎ຺ຈວີສຕິ ສມາຘິສ຺ສ ສມາຘິຏ຺ຐາ. ຕໍ ຎາຕຏ຺ເຐນ ຎາຓໍ, ປຊານນຏ຺ເຐນ ປຎ຺ຎາ. ເຕນ ວຸຈ຺ຈຕິ – ‘‘ສໍວຣິຕ຺ວາ ສມາທຫເນ ປຎ຺ຎາ ສມາຘິຠາວນາມເຍ ຎາຓໍ’’.

ສມາຘິຠາວນາມຍຎາຓນິທ຺ເທໂສ ຕຕິໂຍ.