໔. ສຸຕ຺ຕວິຈຍຈຕຸຕ຺ຖຠູມິ

໔໐. ຕຕ຺ຖ ກຕໂມ ສຸຕ຺ຕວິຈໂຍ?

ຕຕ຺ຖ ກຸສເລຫິ ຘມ຺ເມຫິ ອກຸສເລຫິ ຘມ຺ເມຫິ ປຸພ຺ພາປຣໂສ ສາຘຸກໍ ອຸປປຣິກ຺ຂິຍຕິ. ກິໍນຸ ໂຂ ອິທໍ ສຸຕ຺ຕໍ ອາຣຠິ…ເປ… ເຕຫິ ສຸຕ຺ເຕຫິ ສຫ ອຘິສນ຺ນຏ຺ເຐຫິ ຍຸຊ຺ຊຕິ ອຸທາຫຸ ນ ຍຸຊ຺ຊຕີຕິ?

ຍຖາ ຠຄວາ ກິເລເສ ອາທິມ຺ຫິ ຕຕ຺ຖ ເທເສຕິ. ກິໍ ເທສິຕໍ? ເຕສໍ ກິເລສານໍ ປຫານໍ ອຸທາຫຸ ໂນ ເທສິຕນ຺ຕິ ອຸປປຣິກ຺ຂິຕພ຺ພໍ. ຍທິ ນ ເທສິຕໍ ຠຄວຕິ ເຕສໍ ກິເລສານໍ ປຫານໍ ກຸສລາ ຘມ຺ມາ ປຣິເຍສິຕພ຺ພາ ຍຕ຺ຖ ເຕ ອກຸສລາ ປຫານໍ ຄຈ຺ຉນ຺ຕິ. ສເຈ ສມນ຺ເນຫມາໂນ ນ ລຠຕິ. ຕຕ຺ຖ ອກຸສລາ ຘມ຺ມາ ອປກຑ຺ຒິຕພ຺ພາ ວີມໍສິຕພ຺ພາ, ສໍກິເລສຠາຄິຍສຸຕ຺ຕໍ, ຍທິ ກິເລສາ ອປກຑ຺ຒິຍນ຺ຕາ. ເຍ ວາ ນ ເທນ຺ຕິ ຕຕ຺ຖ ອຸປປຣິກ຺ຂິຕພ຺ພາ ອຣິຍມຄ຺ຄຘມ຺ມາ ຕາສຸ ຠູມີສຸ ກິເລສາ ປຫານໍ ຄຈ຺ຉນ຺ຕິ, ອຸທາຫຸ ນ ຄຈ຺ຉນ຺ຕີຕິ. ຍຕ຺ຕກາ ປນ ກິເລສາ ເທສິຕາ. ນ ຕຕ຺ຕກາ ອຣິຍຘມ຺ມາ ເທສິຕາ. ຍຕ຺ຖ ກິເລສາ ປຫານໍ ຄຈ຺ຉນ຺ຕິ, ຕຕ຺ຖ ເຍ ກິເລສາ ອຣິຍຘມ຺ມານໍ ປຏິປກ຺ເຂນ ນ ຍຸຊ຺ຊນ຺ຕິ, ເຕ ອປກຑ຺ຒິຕພ຺ພາ, ສເຈ ອປກຑ຺ຒິຍນ຺ຕາ ໂຍຊນໍ ເທຕິ. ຕຕ຺ຖ ເອວໍ ວີມໍສິຕພ຺ພໍ. ທ຺ເວ ຕີຓິ ວາ ຕທຸຕ຺ຕຣິ ວາ ກິເລສາ ເອເກນ ອຣິຍມຄ຺ເຄນ ປຫານໍ ຄຈ຺ຉນ຺ຕີຕິ. ສເຈ ເອວໍ ວີມໍສິຍນ຺ຕາ ໂຍຊນໍ ເທຕິ, ຕຕ຺ຖ ອຸປປຣິກ຺ຂິຕພ຺ພໍ. ປຣມ຺ປຣາຍ ວາ ປິຏກສມ຺ປທາເນນ ວາ ສຸຕ຺ຕສ຺ສ ອຕ຺ໂຖ ຈ ນຕ຺ໂຖ ຈ. ຍໍ ວາ ນ ສກ຺ກາ ສຸຕ຺ຕໍ ນິທ຺ທິສິຕຸໍ ເນວ ສຸຕ຺ຕໍ ວິຈິກິຈ຺ຉິຕພ຺ພໍ. ເອວໍ ຍຖາ ອາທິມ຺ຫິ ກຸສລາ ຘມ຺ມາ ໂຫນ຺ຕິ. ເຍ ກິເລສາ ເຕ ປຫີເນຍ຺ຍາຕິ. ເຕ ອຸປປຣິກ຺ຂິຕພ຺ພາ. ປຸໂຣ ວາ ກຸສໂລ ປຏິປກ຺ເຂນ ວາ ປຸໂຣ ເທສນາ, ອນູນາ ອນຘິກາ ອຸຄ຺ຄເຫຕພ຺ພາ. ຍຖາ ປຐໂມ ອຸຕ຺ຕິໂລ ເຍສມິທານິ ກິເລສານໍ ເຍ ອຣິຍຘມ຺ມາ ເທສິຕາ ອິເມ ກິເລສາ ອິເມຫິ ອຣິຍຘມ຺ເມຫິ ປຫີຍນ຺ຕິ, ອຸທາຫຸ ນປ຺ປຫີຍນ຺ຕີຕິ ວິຈິນິຕພ຺ພາ. ຍທິ ອຸປປຣິກ຺ຂິຍມານາ ຍຸຊ຺ຊນ຺ຕິ, ຄເຫຕພ຺ພາ. ອຖ ນ ຍຸຊ຺ຊນ຺ຕິ, ເຍ ກິເລສາ ອປຏິປກ຺ຂາ ໂຫນ຺ຕິ, ເຕ ກິເລສາ ອປຣິປກ຺ຂິຕພ຺ພາ. ເຍ ຈ ອຣິຍຘມ຺ມາ ປຏິປກ຺ຂາ ໂຫນ຺ຕິ, ເຕ ອຣິຍຘມ຺ມາ ອປກຑ຺ຒິຕພ຺ພາ. ນ ຫິ ອຣິຍຘມ຺ມາ ອນາຄາມິກິເລສປ຺ປຫານໍ ຄຈ຺ຉນ຺ຕິ, ນາປິ ອຣິຍຘມ຺ມາ ສພ຺ພກິເລສານໍ ປຫານາຍ ສໍວຕ຺ຕນ຺ຕິ. ຍຖາ ກຸສລາ ເມຕ຺ຕາ ອກຸສໂລ ຣາໂຄ ນ ຕຸ ກຸສລາ ເມຕ຺ຕາຕິ ກາເຣຕ຺ວາ ອກຸສລສ຺ສ ຣາຄສ຺ສ ປຫານາຍ ສມ຺ຠວຕິ ພ຺ຍາປາໂທ ເມຕ຺ຕາຍ ປຫານໍ ຄຈ຺ຉຕິ. ຕສ຺ມາ ອຸໂຠ ກິເລສາ ອຸປປຣິກ຺ຂິຕພ຺ພາ. ໂຍ ໂຍ ຈ ຘມ຺ໂມ ອຸປທິສິຍຕິ ກຸສໂລ ວາ ອກຸສໂລ ວາ ໂສ ອປກຑ຺ຒິຕພ຺ໂພ. ສເຈ ເຕ ຍຸຊ຺ຊນ຺ຕິ ອປກຑ຺ຒິຍມາໂນ ນຕ຺ຖິ ອຸປປຣິກ຺ຂິຕພ຺ພໍ. ທ຺ເວ ວາ ກິເລສາ ເອເກນ ອຣິຍຘມ຺ເມນ ປຫີເນຍ຺ຍາຕິ ທ຺ວີຫິ ວາ ອຣິຍຘມ຺ເມຫິ ເອໂກ ວາ ກິເລໂສ ປຫີຍຕີຕິ.

ອຖ ວາ ເອວມ຺ປິ ອຸປປຣິກ຺ຂິຍມານໍ ຍຸຊ຺ຊຕິ, ຕຕ຺ຖ ວີມໍສິຕພ຺ພໍ ວາ ຍຖາ ຍຸຊ຺ຊຕິ ຕຕ຺ຖ ວີມໍສິຕພ຺ພໍ ວາ, ຍຖາ ນນຸ ສກ຺ກາ ສຸຕ຺ຕໍ ນິທ຺ທິສິຕຸໍ, ນ ຫິ ສຸຕ຺ເຕ ວິຈິກິຈ຺ຉິຕພ຺ພໍ. ກິເລໂສ ມໍ ອຣິຍຘມ຺ເມສຸ ເທສິເຕສຸ ອຸຠຍໂຕ ອຸປປຣິກ຺ຂິຕພ຺ພໍ. ກິຣ ເຍ ວາ ອິເມ ກິເລສາ ເທສິຕາ ເຍ ຈ ອຣິຍຘມ຺ມາ ເທສິຕາ ຄາຖາຍ ວາ ພ຺ຍາກຣເຓນ ວາ, ກິໍ ນຸ ໂຂ ອິເມ ກິເລສາ ອິເມຫິ ອຣິຍຘມ຺ເມຫິ ປຫີຍນ຺ຕິ, ອຸທາຫຸ ນປ຺ປຫີຍນ຺ຕິ? ອິເມ ວາ ອຣິຍຘມ຺ມາ ອິເມສໍ ກິເລສານໍ ປຫານາຍ ສໍວຕ຺ຕນ຺ຕີຕິ. ກິຎ຺ຈາປິ ກຸສເລຫິ ຘມ຺ເມຫິ ອກຸສລາ ຘມ຺ມາ ປຫານໍ ຄຈ຺ຉນ຺ຕິ. ນ ຕຸ ສພ຺ເພຫິ ອຣິຍຘມ຺ເມຫິ ສພ຺ພາກຸສລາ ປຫານໍ ຄຈ຺ຉນ຺ຕິ. ຍຖາ ເມຕ຺ຕາ ກຸສໂລ ອກຸສໂລ ຈ ຣາໂຄ ນ ຕຸ ກຸສລາ ເມຕ຺ຕາ ອກຸສໂລ ຣາໂຄຕິ ກາເຣຕ຺ວາ ເມຕ຺ຕາຍ ຣາໂຄ ປຫານໍ, ພ຺ຍາປາໂທ ເມຕ຺ຕາຍ ປຫານໍ ຄຈ຺ຉນ຺ຕິ. ເອວໍ ກິເລໂສຕິ ກາເຣຕ຺ວາ ສຸຕ຺ເຕນ ປຫານໍ ຄຈ຺ຉຕິ. ນ ສຸຕ຺ໂຕ ຘມ຺ໂມຕິ ກາເຣຕ຺ວາ ສພ຺ພໍ ກິເລສສ຺ສ ປຫານາຍ ສໍວຕ຺ຕຕິ. ຍໍ ຕຸ ສຸຕ຺ຕສ຺ສ ອຣິຍຘມ຺ໂມ ສໍກິເລສປຏິປກ຺ໂຂ, ໂສ ເຕນ ປຫານໍ ຄຈ຺ຉຕີຕິ.

໔໑. ຕຕ຺ຖ ກຸສເລ ເທສິເຕ ສຸຕ຺ເຕ ພ຺ຍາກຣເຓ ວາ ສໍກິເລສາ ນ ຍຸຊ຺ຊນ຺ຕິ ອຣິຍຘມ຺ມາ ວາ, ເຕ ມຫາປເທເສ ນິທ຺ທິສິຕພ຺ພາວຍເວນ ອປກຑ຺ຒິຕພ຺ພາ. ຕຕ຺ຖ ກິເລເສຫິ ຈ ເທສິເຕຫິ ອຣິຍຘມ຺ເມສຸ ຈ ຍທິປິ ເຕນ ອຣິຍຘມ຺ເມນ ເຕ ກິເລສາ ປຫານໍ ຄຈ຺ຉນ຺ຕິ. ຕຕ຺ຖປິ ອຸຕ຺ຕຣິ ອຸປປຣິກ຺ຂິຕພ຺ພໍ. ເກນ ກາຣເຓນ ເອເຕ ກິເລສາ ປຊຫິຕພ຺ພາ, ເກນ ກາຣເຓນ ອຣິຍຘມ຺ມາ ເທສິຕາຕິ? ເຍນ ເຍນ ວາ ອາກາເຣນ ອຣິຍຘມ຺ມາ ເທສິຕາ, ເຕນ ເຕນ ປກາເຣນ ອຍໍ ກິເລໂສ ຐິໂຕ. ອຕ຺ຖິ ຫິ ເອໂກ ກິເລໂສ, ເຕນ ວາ ອຣິຍຘມ຺ມາ ນ ອຎ຺ຎຖາ ອຎ຺ຎຖາ ປຫາຕພ຺ໂພ, ຍຖາ ທິຏ຺ຐິ ຣາໂຄ ອວິຊ຺ຊາ ຈ ທສ຺ສເນນ ປຫາຕພ຺ພາ. ສາ ເຈ ເອວຎ຺ຈ ອວິຊ຺ຊາ ຠາວນາຍ ຠູມິ ວາ ຘມ຺ມາ ຠາວນາຍ ປຫາຕພ຺ພາ. ສາເຍວ ອຸທ຺ຘໍຠາຄິຍໍ ອສງ຺ຂຕທສ຺ສນາຍ ວິມຸຕ຺ຕິຍາ ອນິມິຕ຺ເຕນ ເຈໂຕສມາຘິນາ ອມນສິກາເຣນ ປຫີຍຕິ. ເອວໍ ສາຕ຺ຖໍ ສພ຺ຍຎ຺ຊນໍ ອຸປປຣິກ຺ຂິຕພ຺ພໍ. ເຍ ທສ຺ສເນນ ປຫາຕພ຺ພາ ກິເລສາ ທສ຺ສນາກາເຣນ ອຣິຍຘມ຺ໂມ ເທສິໂຕ, ຠາວນາຍ ປຫາຕພ຺ພາ ຠາວນາກາເຣນ ອຣິຍຘມ຺ໂມ ເທສິໂຕ, ປຕິເສວນາ ປຫາຕພ຺ພາ ປຕິເສວນາກາເຣນ ອຣິຍຘມ຺ໂມ ເທສິໂຕ, ເອວໍ ວິໂນທນປຫາຕພ຺ພາ ຍາວ ສຕ຺ຕ ອາສວາ ກາຕພ຺ພາ, ຍາວຎ຺ຎຖາ. ອຎ຺ຎຖາ ເຫສ ຘມ຺ໂມ ປຫາຕພ຺ໂພ ອຎ຺ເຎນາກາເຣນ ອຣິຍຘມ຺ໂມ ເທສິໂຕ, ໂສ ອຣິຍຘມ຺ໂມ ອຎ຺ຎຖາ ປຣິເຍສິຕພ຺ໂພ. ຍທິ ອຍໍ ຘມ຺ໂມ ປຣິເຍສໂຕ ໂຍ ຈ ເທເສຕິ ເຍນ ເຍນາກາເຣນ, ໂສ ອຣິຍຘມ຺ໂມ ປຣິເຍສິຕພ຺ໂພ, ເຕນາກາເຣນ ກິເລໂສ ປຫີຍຕິ. ໂສ ຕຕ຺ຖ ອຸປປຣິກ຺ຂິຕພ຺ໂພ. ອຖ ນ ຍຸຊ຺ຊຕິ ຍທິ ຫິ ເຕນ ສຸຕ຺ເຕນ ວິຫິຕໍ ສຸຕ຺ຕໍ ວີມໍສິຕພ຺ພໍ. ຍຖາ ຍຸຊ຺ຊຕິ, ຕຖາ ຄເຫຕພ຺ພໍ. ຍຖາ ນ ຍຸຊ຺ຊຕິ, ຕຖາ ນ ຄເຫຕພ຺ພໍ, ອທ຺ຘາ ເອຕໍ ຠຄວຕາ ນ ຠາສິຕໍ, ອາຍສ຺ມຕາ ວາ ທຸຄ຺ຄຫິຕໍ, ຍຖາ ມຫາປເທເສ ນິທ຺ທິສິຕພ຺ພໍ, ຠຄວຕາ ຍຖາຠູຕໍ ເທສິຕໍ, ໂຍ ຈ ຘມ຺ໂມ ເທສິໂຕ ກຸສໂລ ຈ ອກຸສໂລ ຈ ຕສ຺ສ ຘມ຺ມສ຺ສ ປຈ຺ຈໂຍ ປຣິເຍສິຕພ຺ໂພ. ນ ຫິ ປຈ຺ຈຍາ ວິນາ ຘມ຺ໂມ ອປ຺ປຈ຺ຈໂຍ ອຸປ຺ປຊ຺ຊຕິ. ຕຕ຺ຖ ໂກ ອາກາໂຣ ປຣິເຍສນາຍ?

ຕຕ຺ຖ ຕຖາຣູປໍ ສເຫຕຸ ສປ຺ປຈ຺ຈຍໍ ໂສຍໍ ຘມ຺ໂມ ວຸຕ຺ໂຕຕິ ອິທໍ ວີມໍສິຕພ຺ພໍ. ໂສ ຈ ປຈ຺ຈໂຍ ຕິວິໂຘ – ມຸທຸ ມຊ຺ໂຌ ອຘິມຕ຺ໂຕ. ຕຕ຺ຖ ມຸທຸມ຺ຫິ ປຈ຺ຈເຍ ມຸທຸຘມ຺ໂມ ຄເຫຕພ຺ໂພ, ເອວໍ ສຕ຺ເຍສ ປຈ຺ຈໂຍ ທຸວິໂຘ ປຣໍປຣາປຈ຺ຈໂຍ ຈ ສມນນ຺ຕຣປຈ຺ຈໂຍ ຈ. ໂສ ປຈ຺ຈໂຍ ມຸທຸເຕນ ພ຺ຍາຘິມຕ຺ຕໍ ປຣິເຍສິຕພ຺ພໍ. ກິໍ ກາຣຓໍ? ອຎ຺ຎຕໂຣປິ ປຈ຺ຈໂຍ ອຎ຺ເຎຫິ ປຈ຺ຈເຍຫິ ປຣິຍຕ຺ຕິໍ ວາ ປາຣິປູຣິໍ ວາ ຄຈ຺ຉຕິ. ຕຕ຺ຖ ໂຍ ຘມ຺ໂມ ເທສິໂຕ, ຕສ຺ສ ຘມ຺ມສ຺ສ ເອເຕນ ວາ ກາຣເຓນ ວາ ເຫຕຸ ປຣິເຍສິຕພ຺ໂພ. ຍຖາ ປຈ຺ຈໂຍ ເຫຕຸນາ ປຈ຺ຈເຍນ ຈ, ໂສ ຕສ຺ສ ຘມ຺ມສ຺ສ ນິສ຺ສນ຺ໂທ ປຣິເຍສິຕພ຺ໂພ. ຍຖາ ນິທ຺ທິຏ຺ໂຐ ອຘິຏ຺ຐາເນ ປຘານໍ ປຣິເຍສຕິ, ໂສ ປຈ຺ຈໂຍ ປຣິເຍສິຕພ຺ໂພ. ນ ຫິ ມຸທຸສ຺ສ ຘມ຺ມສ຺ສ ອຘິມຕ຺ໂຕ ນິສ຺ສນ຺ໂທ ອຘິມຕ຺ຕສ຺ສ ວາ ນິສ຺ສນ຺ທສ຺ສ ມຸທຸຘມ຺ໂມ, ອຖ ມຸທຸສ຺ສ ມຸທຸ ມຊ຺ຌາຍ ມຊ຺ໂຌ ອຘິມຕ຺ຕສ຺ສ ອຘິມຕ຺ໂຕ ຍຸຊ຺ຊຕິ, ຕໍ ຄເຫຕພ຺ພໍ, ອຖ ນ ຍຸຊ຺ຊຕິ ນ ຄເຫຕພ຺ພໍ. ຍຎ຺ຈ ຠຄວາ ອາຣຠຕິ ຘມ຺ມໍ ເທເສຕຸໍ, ຕໍເຍວ ຘມ຺ມໍ ມຊ຺ຌນ຺ຕປຣິໂຍສານໍ ເທເສຕິ, ຍຖາ ສຸຕ຺ຕາຘິຏ຺ຐາເນ ຘມ຺ມາ ອາທິມ຺ຫິ ນິທ຺ທິສຕິ, ຕໍເຍວ ພຫຸ ຕສ຺ສ ສຸຕ຺ຕສ຺ສ ປຣິໂຍສານໍ. ຕສ຺ສ ຫິ ຘມ຺ມສ຺ສ ວເສນ ຕໍ ສຸຕ຺ຕໍ ໂຫຕິ ຄາຖາ ວາ ພ຺ຍາກຣຓໍ ຂຸທ຺ທກໍ ມຫນ຺ຕໍ ວາ, ຍຖາ ປນ ທຸວິຘາ ອນຸຣູປນ຺ຕິ ວາ ຖປນາ ຈ ເທສນາຖປນາ. ຣູປນ຺ຕິປິ ຘມ຺ມສ຺ສ ປຣິເຍສິຕພ຺ພາ. ຍຖາ ຈ ຠຄວຕາ ປຎ຺ຈນ຺ນໍ ອິນ຺ທ຺ຣິຍານໍ ສໍວຣຓໍ ເທສິຕໍ ຕຓ຺ຫາຍ ນິຄ຺ຄຫຓຕ຺ຖໍ ອິຈ຺ຉາວ ໂຫຕິ. ເທເສຕິ ຍຖາ ໂຄປາລໂກປເມ ສຸຕ຺ເຕ ອຎ຺ເຎຫິປິ ສຸຕ຺ເຕຫິ ຠຄວາ ຠາສຕິ ອິຈ຺ຉາວ ໂຫຕິ ມຊ຺ຌິມນິກາເຍ ວິຕກ຺ໂກ ອຍໍ ຠຄວໂຕ ເທສນານຸຣູປນ຺ຕິ ອິຕິ ໂສ ຘມ຺ໂມ ອຎ຺ເຎສຸປິ ເວຍ຺ຍາກຣເຓສຸ ປຣິເຍສິຕພ຺ໂພ. ນ ຫິ ເອກໍ ຫິ ສຸຕ຺ເຕ ທຏ຺ຐພ຺ໂພ. ຍຸຊ຺ຊນໍ ຕໍ ຄເຫຕພ຺ພໍ.

໔໒. ຕຕ຺ຖ ກຕມໍ ອນຸຎ຺ຎາຕໍ? ຍໍ ກິຎ຺ຈິ ສຸຕ຺ຕໍ ຠຄວຕາ ນ ຠາສິຕໍ ຕຎ຺ຈ ສຸຕ຺ເຕສຸເຍວ ນ຺ທິສ຺ສຕິ, ເອວເມຕໍ ຘາເຣຕພ຺ພໍ. ຍຖາ ອສຸເກນ ຠາສິຕນ຺ຕິ, ຕໍ ສຸຕ຺ຕໍ ວີມໍສິຕພ຺ພໍ. ກິໍ ນຸ ໂຂ ອິມໍ ສຸຕ຺ຕໍ ອນຸຎ຺ຎາຕໍ ຂມໍ ຠຄວໂຕ ອຸທາຫຸ ນານຸຎ຺ຎາຕໍ ຂມໍ, ກິຎ຺ຈິ ຣູປຎ຺ຈ ສຸຕ຺ຕໍ ຠຄວໂຕ ອນຸຎ຺ຎາຕໍ ຂມໍ ກິຎ຺ຈິ ຣູປຎ຺ຈ ນານຸຎ຺ຎາຕໍ ຂມໍ? ຍໍ ສພ຺ພໂສ ອໂນຕາເຣຕ຺ວາ ທສພໂລ ໂຄຈຣໍ ເທເສຕິ, ຕໍ ສພ຺ພໍ ສຸຕ຺ຕໍ ຠຄວໂຕ ນານຸຎ຺ຎາຕໍ ຂມໍ. ອຕ຺ຖິປິ ໂສ ສາວໂກ ທສພລານໍ ໂຄຈຣໍ ຊານາຕິ ໂອຘິໂສ ອໂນຘິໂສ, ຕໍ ປນ ພລໍ ສພ຺ພໂສ ນ ຊານາຕິ ອຎ຺ຎຖາ ນາມ ສວເນນ, ຍຖາ ອາຍສ຺ມຕາ ສາຣິປຸຕ຺ເຕນ ເຍນ ພ຺ຣາຫ຺ມໂຓ ໂອວທິໂຕ, ຕສ຺ສ ອາຍສ຺ມໂຕ ນຕ຺ຖິ ອິນ຺ທ຺ຣິຍພລເວມຕ຺ຕຎາຓໍ, ເຕນ ປຸຄ຺ຄລປໂຣ [ປຸຄ຺ຄໂລ ປໂຣປຣຎ຺ຈ (ປີ.)] ປຣຎ຺ຈ ຕໍ ອຊານນ຺ໂຕ ສຕິ ອຸຕ຺ຕຣິກຣຓີເຍ ອຸປ຺ປາທິໂຕ, ໂສ ຠຄວຕາ ອປສາທິໂຕ. ຍຖາວ ອາຍສ຺ມາ ມຫາກສ຺ສໂປ ຠາຄິເນຍ຺ຍໍ ໂອວທຕິ ອນນ຺ຕຣິຍສມນ຺ນາຄໂຕ ອິທ຺ຘິປາຏິຫີເຣນ ອງ຺ຄຸລິໂຍ ອທີເປຕ຺ວາ ຍໍ ສພ຺ເພສໍ ຘມ຺ມານໍ ກມ຺ມສມາທານານໍ ເຫຕຸໂສ ຐານໂສ ຍຖາຠູຕໍ ຎາຓໍ, ຕສ຺ສ ອາຍສ຺ມໂຕ ສໍວິຊ຺ຊເຕ, ເຕນ ນໍ ໂອວທຕິ, ຕໍ ຠຄວາ ກໂຣຕິ.

‘‘ສເຈປິ ທສ ປຊ຺ໂຊເຕ, ຘາຣຍິສ຺ສສິ ກສ຺ສປ;

ເນວ ທກ຺ຂຕິ ຣູປານິ, ຈກ຺ຂຸ ຕສ຺ສ ນ ວິຊ຺ຊຕີ’’ຕິ.

ອປິ ຈ ໂຂ ຍຖາ ທູໂຕ ຣາຊວຈເນນ ສຕ຺ຕມນຸສາສຕິ, ເອວໍ ເສສານຸໂຄ ອຎ຺ຎາຕກໍ ໂຆສໍ ປເຣສໍ ເທເສຕິ. ອນຸຎ຺ຎາຕຂມສຸຕ຺ຕໍ ຄເຫຕພ຺ພໍ. ອນນຸຎ຺ຎາຕຂມໍ ນ ຄເຫຕພ຺ພໍ.

ຕຕ຺ຖ ກຕໂມ ສຸຕ຺ຕສງ຺ກໂຣ? ປຎ຺ຈວິຘໍ ສຸຕ຺ຕໍ, ສໍກິເລສຠາຄິຍໍ ວາສນາຠາຄິຍໍ ທສ຺ສນຠາຄິຍໍ ຠາວນາຠາຄິຍໍ ອເສກ຺ຂຠາຄິຍໍ. ອຎ຺ຎໍ ອາຣາເຘຍ຺ຍ ອຎ຺ຎໍ ເທເສຕິ ອຎ຺ຎສ຺ສ ຈ ສຸຕ຺ຕສ຺ສ ອຕ຺ຖໍ ອຎ຺ຎມ຺ຫິ ສຸຕ຺ເຕ ນິທ຺ທິສຕິ. ສຸຕ຺ຕສ຺ສ ວາ ຫິ ອເນກາກາຣໍ ອຕ຺ຖໍ ນິທ຺ທິສຕິ. ອຣິຍຘມ຺ມສາຘເນ ອຕ຺ຖໍ ວິວຣຕິ. ວາສນາຠາຄິຍສ຺ສ ອຕ຺ຖໍ ທສ຺ສນຠາຄິເຍສຸ ນິທ຺ທິສຕິ. ໂອຣມ຺ຠາຄິຍານໍ ສໍໂຍຊນານໍ ອຕ຺ຖໍ ອຸທ຺ຘໍຠາຄິເຍສຸ ນິທ຺ທິສຕິ. ມຸທຸມຊ຺ຌານໍ ອິນ຺ທ຺ຣິຍານໍ ອຘິມຕ຺ເຕສຸ ສຸຕ຺ເຕສຸ ນິທ຺ທິສຕິ. ອິຕິ ອຍໍ ສຸຕ຺ຕໍ ສມ຺ເຠທໍ ເຫຕຸນາ ຈ ນິສ຺ສນ຺ເທນ ຈ ຜເລນ ຈ ນິທ຺ເທເສນ ຈ ມຸທຸມຊ຺ຌາຘິມຕ຺ຕຕາຍປິ ຈ ອຕ຺ເຖນ ຈ ພ຺ຍຎ຺ຊເນນ ຈ ໂຍ ສມ຺ເຠໂທ, ອຍໍ ວຸຈ຺ຈຕິ ສຸຕ຺ຕສງ຺ກໂຣ. ໂຍ ອສມ຺ເຠໂທ, ອຍໍ ວຸຈ຺ຈຕິ ສຸຕ຺ຕວິຈໂຍ.

ຕຕ຺ຖາຍໍ ອຸທ຺ທານຄາຖາ

ປຸຣິມານໍ ອກ຺ຂຓ຺ຑໍ, ຍຖາຠູຕສ຺ສ ປຈ຺ຈໂຍ;

ນິສ຺ສນ຺ໂທ ວາສນາສທ຺ຘິ, ອນຸຎ຺ຎາ ສຸຕ຺ຕສງ຺ກໂຣ.

ເຖຣສ຺ສ ມຫາກຈ຺ຈາຍນສ຺ສ

ສຸຕ຺ຕວິຈໂຍ ນາມ ຈຕຸຕ຺ຖຠູມິ.