໑໖. ສມາໂຣປນຫາຣສມ຺ປາໂຕ

໗໘. ຕຕ຺ຖ ກຕໂມ ສມາໂຣປໂນ ຫາຣສມ຺ປາໂຕ?

‘‘ຕສ຺ມາ ຣກ຺ຂິຕຈິຕ຺ຕສ຺ສ, ສມ຺ມາສງ຺ກປ຺ປໂຄຈໂຣ;

ສມ຺ມາທິຏ຺ຐິປຸເຣກ຺ຂາໂຣ, ຎຕ຺ວານ ອຸທຍພ຺ພຍໍ;

ຖິນມິທ຺ຘາຠິຠູ ຠິກ຺ຂຸ, ສພ຺ພາ ທຸຄ຺ຄຕິໂຍ ຊເຫ’’ຕິ.

ຕສ຺ມາ ຣກ຺ຂິຕຈິຕ຺ຕສ຺ສາຕິ ຕິຓ຺ຓໍ ສຸຈຣິຕານໍ ປທຏ຺ຐານໍ, ຈິຕ຺ເຕ ຣກ຺ຂິເຕ ຕໍ ຣກ຺ຂິຕໍ ຠວຕິ ກາຍກມ຺ມໍ ວຈີກມ຺ມໍ ມໂນກມ຺ມໍ. ສມ຺ມາທິຏ຺ຐິປຸເຣກ຺ຂາໂຣຕິ ສມ຺ມາທິຏ຺ຐິຍາ ຠາວິຕາຍ ຠາວິໂຕ ຠວຕິ ອຣິໂຍ ອຏ຺ຐງ຺ຄິໂກ ມຄ຺ໂຄ. ເກນ ກາຣເຓນ? ສມ຺ມາທິຏ຺ຐິໂຕ ຫິ ສມ຺ມາສງ຺ກປ຺ໂປ ປຠວຕິ, ສມ຺ມາສງ຺ກປ຺ປໂຕ ສມ຺ມາວາຈາ ປຠວຕິ, ສມ຺ມາວາຈາໂຕ ສມ຺ມາກມ຺ມນ຺ໂຕ ປຠວຕິ, ສມ຺ມາກມ຺ມນ຺ຕໂຕ ສມ຺ມາອາຊີໂວ ປຠວຕິ, ສມ຺ມາອາຊີວໂຕ ສມ຺ມາວາຍາໂມ ປຠວຕິ, ສມ຺ມາວາຍາມໂຕ ສມ຺ມາສຕິ ປຠວຕິ, ສມ຺ມາສຕິໂຕ ສມ຺ມາສມາຘິ ປຠວຕິ, ສມ຺ມາສມາຘິໂຕ ສມ຺ມາວິມຸຕ຺ຕິ ປຠວຕິ, ສມ຺ມາວິມຸຕ຺ຕິໂຕ ສມ຺ມາວິມຸຕ຺ຕິຎາຓທສ຺ສນໍ ປຠວຕິ. ອຍໍ ອນຸປາທິເສໂສ ປຸຄ຺ຄໂລ ອນຸປາທິເສສາ ຈ ນິພ຺ພານຘາຕຸ.

ນິຍຸຕ຺ໂຕ ສມາໂຣປໂນ ຫາຣສມ຺ປາໂຕ.

ເຕນາຫ ອາຍສ຺ມາ ມຫາກຈ຺ຈາຍໂນ –

‘‘ໂສຬສ ຫາຣາ ປຐມໍ, ທິສໂລຈນໂຕ ທິສາ ວິໂລເກຕ຺ວາ;

ສງ຺ຂິປິຍ ອງ຺ກຸເສນ ຫິ, ນເຍຫິ ຕີຫິ ນິທ຺ທິເສ ສຸຕ຺ຕ’’ນ຺ຕິ.

ນິຍຸຕ຺ໂຕ ຫາຣສມ຺ປາໂຕ.