໑໔. ອຘິຏ຺ຐານຫາຣສມ຺ປາໂຕ

໗໖. ຕຕ຺ຖ ກຕໂມ ອຘິຏ຺ຐາໂນ ຫາຣສມ຺ປາໂຕ?

ຕສ຺ມາ ຣກ຺ຂິຕຈິຕ຺ຕສ຺ສ, ສມ຺ມາສງ຺ກປ຺ປໂຄຈໂຣຕິ ຄາຖາ. ຕສ຺ມາ ຣກ຺ຂິຕຈິຕ຺ຕສ຺ສາຕິ ເອກຕ຺ຕຕາ. ຈິຕ຺ຕໍ ມໂນ ວິຎ຺ຎາຓໍ, ອຍໍ ເວມຕ຺ຕຕາ. ສມ຺ມາສງ຺ກປ຺ປໂຄຈໂຣຕິ ເອກຕ຺ຕຕາ. ເນກ຺ຂມ຺ມສງ຺ກປ຺ໂປ ອພ຺ຍາປາທສງ຺ກປ຺ໂປ ອວິຫິໍສາສງ຺ກປ຺ໂປ ອຍໍ ເວມຕ຺ຕຕາ. ສມ຺ມາທິຏ຺ຐິປຸເຣກ຺ຂາໂຣຕິ ເອກຕ຺ຕຕາ. ສມ຺ມາທິຏ຺ຐິ ນາມ ຍໍ ທຸກ຺ເຂ ຎາຓໍ ທຸກ຺ຂສມຸທເຍ ຎາຓໍ ທຸກ຺ຂນິໂຣເຘ ຎາຓໍ ທຸກ຺ຂນິໂຣຘຄາມິນິຍາ ປຏິປທາຍ ຎາຓໍ ມຄ຺ເຄ ຎາຓໍ ເຫຕຸມ຺ຫິ ຎາຓໍ ເຫຕຸສມຸປ຺ປນ຺ເນສຸ ຘມ຺ເມສຸ ຎາຓໍ ປຈ຺ຈເຍ ຎາຓໍ ປຈ຺ຈຍສມຸປ຺ປນ຺ເນສຸ ຘມ຺ເມສຸ ຎາຓໍ, ຍໍ ຕຕ຺ຖ ຕຕ຺ຖ ຍຖາຠູຕໍ ຎາຓທສ຺ສນໍ ອຠິສມໂຍ ສມ຺ປຏິເວໂຘ ສຈ຺ຈາຄມນໍ, ອຍໍ ເວມຕ຺ຕຕາ. ຎຕ຺ວານ ອຸທຍພ຺ພຍນ຺ຕິ ເອກຕ຺ຕຕາ, ອຸທເຍນ ອວິຊ຺ຊາປຈ຺ຈຍາ ສງ຺ຂາຣາ, ສງ຺ຂາຣປຈ຺ຈຍາ ວິຎ຺ຎາຓໍ, ເອວໍ ສພ຺ພໍ ສມຸທໂຍ ຠວຕິ. ວເຍນ ອວິຊ຺ຊານິໂຣຘາ ສງ຺ຂາຣນິໂຣໂຘ, ເອວໍ ສພ຺ພໍ ນິໂຣໂຘ ໂຫຕິ, ອຍໍ ເວມຕ຺ຕຕາ. ຖິນມິທ຺ຘາຠິຠູ ຠິກ຺ຂູຕິ ເອກຕ຺ຕຕາ, ຖິນໍ ນາມ ຍາ ຈິຕ຺ຕສ຺ສ ອກລ຺ລຕາ ອກມ຺ມນິຍຕາ, ມິທ຺ຘໍ ນາມ ຍໍ ກາຍສ຺ສ ລີນຕ຺ຕໍ, ອຍໍ ເວມຕ຺ຕຕາ. ສພ຺ພາ ທຸຄ຺ຄຕິໂຍ ຊເຫຕິ ເອກຕ຺ຕຕາ, ເທວມນຸສ຺ເສ ວາ ອຸປນິຘາຍ ອປາຍາ ທຸຄ຺ຄຕິ, ນິພ຺ພານໍ ວາ ອຸປນິຘາຍ ສພ຺ພາ ອຸປປຕ຺ຕິໂຍ ທຸຄ຺ຄຕິ, ອຍໍ ເວມຕ຺ຕຕາ.

ນິຍຸຕ຺ໂຕ ອຘິຏ຺ຐາໂນ ຫາຣສມ຺ປາໂຕ.