໕. ໂຘຕກມາຓວປຸຈ຺ຉາ

໘໖. ‘‘ປຸຈ຺ຉາມິ ຕໍ ຠຄວາ ພ຺ຣູຫິ ເມຕໍ, [ອິຈ຺ຈາຍສ຺ມາ ໂຘຕໂກ]

ວາຈາຠິກງ຺ຂາມິ ມເຫສິ ຕຸຍ຺ຫໍ;

ຕວ ສຸຕ຺ວານ ນິຄ຺ໂຆສໍ, ສິກ຺ເຂ ນິພ຺ພານມຕ຺ຕໂນ’’.

໘໗. ‘‘ເຕນຫາຕປ຺ປໍ ກໂຣຫິ, [ໂຘຕກາຕິ ຠຄວາ]

ອິເຘວ ນິປໂກ ສໂຕ;

ອິໂຕ ສຸຕ຺ວານ ນິຄ຺ໂຆສໍ, ສິກ຺ເຂ ນິພ຺ພານມຕ຺ຕໂນ’’.

໘໘. ‘‘ປສ຺ສາມຫໍ ເທວມນຸສ຺ສໂລເກ, ອກິຎ຺ຈນໍ ພ຺ຣາຫ຺ມຓມິຣິຍມານໍ;

ຕໍ ຕໍ ນມສ຺ສາມິ ສມນ຺ຕຈກ຺ຂຸ, ປມຸຎ຺ຈ ມໍ ສກ຺ກ ກຖໍກຖາຫິ’’.

໘໙. ‘‘ນາຫໍ ສຫິສ຺ສາມິ ປໂມຈນາຍ, ກຖໍກຖິໍ ໂຘຕກ ກຎ຺ຈິ ໂລເກ;

ຘມ຺ມຎ຺ຈ ເສຏ຺ຐໍ ອຠິຊານມາໂນ [ອາຊານມາໂນ (ສີ. ສ຺ຍາ. ປີ.)], ເອວໍ ຕຸວໍ ໂອຆມິມໍ ຕເຣສິ’’.

໙໐. ‘‘ອນຸສາສ ພ຺ຣຫ຺ເມ ກຣຸຓາຍມາໂນ, ວິເວກຘມ຺ມໍ ຍມຫໍ ວິຊຎ຺ຎໍ;

ຍຖາຫໍ ອາກາໂສວ ອພ຺ຍາປຊ຺ຊມາໂນ, ອິເຘວ ສນ຺ໂຕ ອສິໂຕ ຈເຣຍ຺ຍໍ’’.

໙໑. ‘‘ກິຕ຺ຕຍິສ຺ສາມິ ເຕ ສນ຺ຕິໍ, [ໂຘຕກາຕິ ຠຄວາ]

ທິຏ຺ເຐ ຘມ຺ເມ ອນີຕິຫໍ;

ຍໍ ວິທິຕ຺ວາ ສໂຕ ຈຣໍ, ຕເຣ ໂລເກ ວິສຕ຺ຕິກໍ’’.

໙໒. ‘‘ຕຎ຺ຈາຫໍ ອຠິນນ຺ທາມິ, ມເຫສິ ສນ຺ຕິມຸຕ຺ຕມໍ;

ຍໍ ວິທິຕ຺ວາ ສໂຕ ຈຣໍ, ຕເຣ ໂລເກ ວິສຕ຺ຕິກໍ’’.

໙໓. ‘‘ຍໍ ກິຎ຺ຈິ ສມ຺ປຊານາສິ, [ໂຘຕກາຕິ ຠຄວາ]

ອຸທ຺ຘໍ ອໂຘ ຕິຣິຍຎ຺ຈາປິ ມຊ຺ເຌ;

ເອຕໍ ວິທິຕ຺ວາ ສງ຺ໂຄຕິ ໂລເກ, ຠວາຠວາຍ ມາກາສິ ຕຓ຺ຫ’’ນ຺ຕິ.

ໂຘຕກມາຓວປຸຈ຺ຉາ ປຎ຺ຈມີ.