໑໘. ປາຣາຍນານຸຄີຕິຄາຖາ

໑໕໖. ‘‘ປາຣາຍນມນຸຄາຍິສ຺ສໍ, [ອິຈ຺ຈາຍສ຺ມາ ປິງ຺ຄິໂຍ]

ຍຖາທ຺ທກ຺ຂິ ຕຖາກ຺ຂາສິ, ວິມໂລ ຠູຣິເມຘໂສ;

ນິກ຺ກາໂມ ນິພ຺ພໂນ [ນິພ຺ພຸໂຕ (ສ຺ຍາ.)] ນາໂຄ, ກິສ຺ສ ເຫຕຸ ມຸສາ ຠເຓ.

໑໕໗. ‘‘ປຫີນມລໂມຫສ຺ສ, ມານມກ຺ຂປ຺ປຫາຍິໂນ;

ຫນ຺ທາຫໍ ກິຕ຺ຕຍິສ຺ສາມິ, ຄິຣໍ ວຓ຺ຓູປສຎ຺ຫິຕໍ.

໑໕໘. ‘‘ຕໂມນຸໂທ ພຸທ຺ໂຘ ສມນ຺ຕຈກ຺ຂຸ, ໂລກນ຺ຕຄູ ສພ຺ພຠວາຕິວຕ຺ໂຕ;

ອນາສໂວ ສພ຺ພທຸກ຺ຂປ຺ປຫີໂນ, ສຈ຺ຈວ຺ຫໂຍ ພ຺ຣຫ຺ເມ ອຸປາສິໂຕ ເມ.

໑໕໙. ‘‘ທິໂຊ ຍຖາ ກຸພ຺ພນກໍ ປຫາຍ, ພຫຸປ຺ຜລໍ ການນມາວເສຍ຺ຍ;

ເອວມ຺ປຫໍ ອປ຺ປທສ຺ເສ ປຫາຍ, ມໂຫທຘິໍ ຫໍໂສຣິວ ອຊ຺ຌປຕ຺ໂຕ.

໑໖໐. ‘‘ເຍເມ ປຸພ຺ເພ ວິຍາກໍສຸ, ຫຸຣໍ ໂຄຕມສາສນາ;

ອິຈ຺ຈາສິ ອິຕິ ຠວິສ຺ສຕິ;

ສພ຺ພໍ ຕໍ ອິຕິຫີຕິຫໍ, ສພ຺ພໍ ຕໍ ຕກ຺ກວຑ຺ຒນໍ.

໑໖໑. ‘‘ເອໂກ ຕມນຸທາສິໂນ, ຊຸຕິມາ ໂສ ປຠງ຺ກໂຣ;

ໂຄຕໂມ ຠູຣິປຎ຺ຎາໂຓ, ໂຄຕໂມ ຠູຣິເມຘໂສ.

໑໖໒. ‘‘ໂຍ ເມ ຘມ຺ມມເທເສສິ, ສນ຺ທິຏ຺ຐິກມກາລິກໍ;

ຕຓ຺ຫກ຺ຂຍມນີຕິກໍ, ຍສ຺ສ ນຕ຺ຖິ ອຸປມາ ກ຺ວຈິ’’.

໑໖໓. ‘‘ກິໍ ນຸ ຕມ຺ຫາ ວິປ຺ປວສສິ, ມຸຫຸຕ຺ຕມປິ ປິງ຺ຄິຍ;

ໂຄຕມາ ຠູຣິປຎ຺ຎາຓາ, ໂຄຕມາ ຠູຣິເມຘສາ.

໑໖໔. ‘‘ໂຍ ເຕ ຘມ຺ມມເທເສສິ, ສນ຺ທິຏ຺ຐິກມກາລິກໍ;

ຕຓ຺ຫກ຺ຂຍມນີຕິກໍ, ຍສ຺ສ ນຕ຺ຖິ ອຸປມາ ກ຺ວຈິ’’.

໑໖໕. ‘‘ນາຫໍ ຕມ຺ຫາ ວິປ຺ປວສາມິ, ມຸຫຸຕ຺ຕມປິ ພ຺ຣາຫ຺ມຓ;

ໂຄຕມາ ຠູຣິປຎ຺ຎາຓາ, ໂຄຕມາ ຠູຣິເມຘສາ.

໑໖໖. ‘‘ໂຍ ເມ ຘມ຺ມມເທເສສິ, ສນ຺ທິຏ຺ຐິກມກາລິກໍ;

ຕຓ຺ຫກ຺ຂຍມນີຕິກໍ, ຍສ຺ສ ນຕ຺ຖິ ອຸປມາ ກ຺ວຈິ.

໑໖໗. ‘‘ປສ຺ສາມິ ນໍ ມນສາ ຈກ຺ຂຸນາວ, ຣຕ຺ຕິນ຺ທິວໍ ພ຺ຣາຫ຺ມຓ ອປ຺ປມຕ຺ໂຕ.

ນມສ຺ສມາໂນ ວິວເສມິ ຣຕ຺ຕິໍ, ເຕເນວ ມຎ຺ຎາມິ ອວິປ຺ປວາສໍ.

໑໖໘. ‘‘ສທ຺ຘາ ຈ ປີຕິ ຈ ມໂນ ສຕິ ຈ,

ນາເປນ຺ຕິເມ ໂຄຕມສາສນມ຺ຫາ;

ຍໍ ຍໍ ທິສໍ ວຊຕິ ຠູຣິປຎ຺ໂຎ, ສ ເຕນ ເຕເນວ ນໂຕຫມສ຺ມິ.

໑໖໙. ‘‘ຊິຓ຺ຓສ຺ສ ເມ ທຸພ຺ພລຖາມກສ຺ສ, ເຕເນວ ກາໂຍ ນ ປເລຕິ ຕຕ຺ຖ;

ສງ຺ກປ຺ປຍນ຺ຕາຍ [ສໍກປ຺ປຍຕ຺ຕາຍ (ສີ.)] ວຊາມິ ນິຈ຺ຈໍ, ມໂນ ຫິ ເມ ພ຺ຣາຫ຺ມຓ ເຕນ ຍຸຕ຺ໂຕ.

໑໗໐. ‘‘ປງ຺ເກ ສຍາໂນ ປຣິຜນ຺ທມາໂນ, ທີປາ ທີປໍ ອຸປລ຺ລວິໍ;

ອຖທ຺ທສາສິໍ ສມ຺ພຸທ຺ຘໍ, ໂອຆຕິຓ຺ຓມນາສວໍ.

໑໗໑. ‘‘ຍຖາ ອຫູ ວກ຺ກລິ ມຸຕ຺ຕສທ຺ໂຘ, ຠທ຺ຣາວຸໂຘ ອາຬວິໂຄຕໂມ ຈ;

ເອວເມວ ຕ຺ວມ຺ປິ ປມຸຎ຺ຈສ຺ສຸ ສທ຺ຘໍ, ຄມິສ຺ສສິ ຕ຺ວໍ ປິງ຺ຄິຍ ມຈ຺ຈຸເຘຍ຺ຍສ຺ສ ປາຣໍ’’ [ມຈ຺ຈຸເຘຍ຺ຍປາຣໍ (ສີ.)].

໑໗໒. ‘‘ເອສ ຠິຍ຺ໂຍ ປສີທາມິ, ສຸຕ຺ວານ ມຸນິໂນ ວໂຈ;

ວິວຏ຺ຏຈ຺ຉໂທ ສມ຺ພຸທ຺ໂຘ, ອຂິໂລ ປຏິຠານວາ.

໑໗໓. ‘‘ອຘິເທເວ ອຠິຎ຺ຎາຍ, ສພ຺ພໍ ເວທິ ປໂຣປຣໍ;

ປຎ຺ຫານນ຺ຕກໂຣ ສຕ຺ຖາ, ກງ຺ຂີນໍ ປຏິຊານຕໍ.

໑໗໔. ‘‘ອສໍຫີຣໍ ອສໍກຸປ຺ປໍ, ຍສ຺ສ ນຕ຺ຖິ ອຸປມາ ກ຺ວຈິ;

ອທ຺ຘາ ຄມິສ຺ສາມິ ນ ເມຕ຺ຖ ກງ຺ຂາ, ເອວໍ ມໍ ຘາເຣຫິ ອຘິມຸຕ຺ຕຈິຕ຺ຕ’’ນ຺ຕິ [ອຊິຕມາຓວປຸຈ຺ຉາຍ ປຏ຺ຐາຍ ຍາວປາຣາຍນານຸຄີຕິຄາຕາປຣິໂຍສານາ ສ຺ຍາ. … ໂປຕ຺ຖເກ ນຕ຺ຖິ].

ປາຣາຍນານຸຄີຕິຄາຖາ ນິຏ຺ຐິຕາ.