໖. ຊຣາສຸຕ຺ຕນິທ຺ເທໂສ

ອຖ ຊຣາສຸຕ຺ຕນິທ຺ເທສໍ ວກ຺ຂຕິ –

໓໙. ອປ຺ປໍ ວຕ ຊີວິຕໍ ອິທໍ, ໂອຣໍ ວສ຺ສສຕາປິ ມິຍ຺ຍຕິ [ມີຍຕິ (ສີ.)] ;

ໂຍ ເຈປິ ອຕິຈ຺ຈ ຊີວຕິ, ອຖ ໂຂ ໂສ ຊຣສາປິ ມິຍ຺ຍຕິ.

ອປ຺ປໍ ວຕ ຊີວິຕໍ ອິທນ຺ຕິ. ຊີວິຕນ຺ຕິ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ. ອປິ ຈ, ທ຺ວີຫິ ກາຣເຓຫິ ອປ຺ປກໍ ຊີວິຕໍ ໂຖກໍ ຊີວິຕໍ – ຐິຕິປຣິຕ຺ຕຕາຍ ວາ ອປ຺ປກໍ ຊີວິຕໍ, ສຣສປຣິຕ຺ຕຕາຍ ວາ ອປ຺ປກໍ ຊີວິຕໍ. ກຖໍ ຐິຕິປຣິຕ຺ຕຕາຍ ວາ ອປ຺ປກໍ ຊີວິຕໍ? ອຕີເຕ ຈິຕ຺ຕກ຺ຂເຓ ຊີວິຕ຺ຖ, ນ ຊີວຕິ ນ ຊີວິສ຺ສຕິ; ອນາຄເຕ ຈິຕ຺ຕກ຺ຂເຓ ຊີວິສ຺ສຕິ, ນ ຊີວຕິ ນ ຊີວິຕ຺ຖ; ປຈ຺ຈຸປ຺ປນ຺ເນ ຈິຕ຺ຕກ຺ຂເຓ ຊີວຕິ, ນ ຊີວິຕ຺ຖ ນ ຊີວິສ຺ສຕິ.

‘‘ຊີວິຕໍ ອຕ຺ຕຠາໂວ ຈ, ສຸຂທຸກ຺ຂາ ຈ ເກວລາ;

ເອກຈິຕ຺ຕສມາຍຸຕ຺ຕາ, ລຫຸໂສ ວຕ຺ຕເຕ ຂໂຓ.

‘‘ຈຸລ຺ລາສີຕິສຫສ຺ສານິ, ກປ຺ປາ ຕິຏ຺ຐນ຺ຕິ ເຍ ມຣູ;

ນ ຕ຺ເວວ ເຕປິ ຊີວນ຺ຕິ, ທ຺ວີຫິ ຈິຕ຺ເຕຫິ ສໍຍຸຕາ [ສໂມຫິຕາ (ສີ. ສ຺ຍາ. ກ.)].

‘‘ເຍ ນິຣຸທ຺ຘາ ມຣນ຺ຕສ຺ສ, ຕິຏ຺ຐມານສ຺ສ ວາ ອິຘ;

ສພ຺ເພປິ ສທິສາ ຂນ຺ຘາ, ຄຕາ ອປ຺ປຏິສນ຺ຘິກາ.

‘‘ອນນ຺ຕຣາ ຈ ເຍ ຠຄ຺ຄາ, ເຍ ຈ ຠຄ຺ຄາ ອນາຄຕາ;

ຕທນ຺ຕເຣ ນິຣຸທ຺ຘານໍ, ເວສມໍ ນຕ຺ຖິ ລກ຺ຂເຓ.

‘‘ອນິພ຺ພຕ຺ເຕນ ນ ຊາໂຕ, ປຈ຺ຈຸປ຺ປນ຺ເນນ ຊີວຕິ;

ຈິຕ຺ຕຠຄ຺ຄາ ມໂຕ ໂລໂກ, ປຎ຺ຎຕ຺ຕິ ປຣມຕ຺ຖິຍາ.

‘‘ຍຖາ ນິນ຺ນາ ປວຕ຺ຕນ຺ຕິ, ຉນ຺ເທນ ປຣິຓາມິຕາ;

ອຈ຺ຉິນ຺ນຘາຣາ ວຕ຺ຕນ຺ຕິ, ສຬາຍຕນປຈ຺ຈຍາ.

‘‘ອນິຘານຄຕາ ຠຄ຺ຄາ, ປຸຎ຺ໂຊ ນຕ຺ຖິ ອນາຄເຕ;

ນິພ຺ພຕ຺ຕາ ເຍ ຈ ຕິຏ຺ຐນ຺ຕິ, ອາຣຄ຺ເຄ ສາສປູປມາ.

‘‘ນິພ຺ພຕ຺ຕານຎ຺ຈ ຘມ຺ມານໍ, ຠງ຺ໂຄ ເນສໍ ປຸຣກ຺ຂໂຕ;

ປໂລກຘມ຺ມາ ຕິຏ຺ຐນ຺ຕິ, ປຸຣາເຓຫິ ອມິສ຺ສິຕາ.

‘‘ອທສ຺ສນໂຕ ອາຍນ຺ຕິ, ຠງ຺ຄາ ຄຈ຺ຉນ຺ຕິ ທສ຺ສນໍ;

ວິຊ຺ຊຸປ຺ປາໂທວ ອາກາເສ, ອຸປ຺ປຊ຺ຊນ຺ຕິ ວຍນ຺ຕິ ຈາ’’ຕິ.

ເອວໍ ຐິຕິປຣິຕ຺ຕຕາຍ ອປ຺ປກໍ ຊີວິຕໍ.

ກຖໍ ສຣສປຣິຕ຺ຕຕາຍ ອປ຺ປກໍ ຊີວິຕໍ? ອສ຺ສາສູປນິພທ຺ຘໍ [ອສ຺ສາສູປນິພນ຺ຘໍ (ກ.)] ຊີວິຕໍ, ປສ຺ສາສູປນິພທ຺ຘໍ ຊີວິຕໍ, ອສ຺ສາສປສ຺ສາສູປນິພທ຺ຘໍ ຊີວິຕໍ, ມຫາຠູຕູປນິພທ຺ຘໍ ຊີວິຕໍ, ກພຬີກາຣາຫາຣູປນິພທ຺ຘໍ ຊີວິຕໍ, ອຸສ຺ມູປນິພທ຺ຘໍ ຊີວິຕໍ, ວິຎ຺ຎາຓູປນິພທ຺ຘໍ ຊີວິຕໍ. ມູລມ຺ປິ ອິເມສໍ ທຸພ຺ພລໍ, ປຸພ຺ພເຫຕູປິ ອິເມສໍ ທຸພ຺ພລາ, ເຍ ປຈ຺ຈຍາ ເຕປິ ທຸພ຺ພລາ, ເຍປິ ປຠາວິກາ ເຕປິ ທຸພ຺ພລາ, ສຫຠູປິ ອິເມສໍ ທຸພ຺ພລາ, ສມ຺ປໂຍຄາປິ ອິເມສໍ ທຸພ຺ພລາ, ສຫຊາປິ ອິເມສໍ ທຸພ຺ພລາ, ຍາປິ ປໂຍຊິກາ ສາປິ ທຸພ຺ພລາ. ອຎ຺ຎມຎ຺ຎໍ ອິເມ ນິຈ຺ຈທຸພ຺ພລາ, ອຎ຺ຎມຎ຺ຎໍ ອນວຏ຺ຐິຕາ ອິເມ. ອຎ຺ຎມຎ຺ຎໍ ປຣິປາຕຍນ຺ຕິ ອິເມ, ອຎ຺ຎມຎ຺ຎສ຺ສ ຫິ ນຕ຺ຖິ ຕາຍິຕາ, ນ ຈາປິ ຐເປນ຺ຕິ ອຎ຺ຎມຎ຺ຎໍ ອິເມ. ໂຍປິ ນິພ຺ພຕ຺ຕໂກ ໂສ ນ ວິຊ຺ຊຕິ.

‘‘ນ ຈ ເກນຈິ ໂກຈິ ຫາຍຕິ, ຄນ຺ຘພ຺ພາ ຈ ອິເມ ຫິ ສພ຺ພໂສ;

ປຸຣິເມຫິ ປຠາວິກາ ອິເມ, ເຍປິ ປຠາວິກາ ເຕ ປຸເຣ ມຕາ;

ປຸຣິມາປິ ຈ ປຈ຺ຉິມາປິ ຈ, ອຎ຺ຎມຎ຺ຎໍ ນ ກທາຈິ ມທ຺ທສໍສູ’’ຕິ.

ເອວໍ ສຣສປຣິຕ຺ຕຕາຍ ອປ຺ປກໍ ຊີວິຕໍ.

ອປິ ຈ, ຈາຕຸມຫາຣາຊິການໍ [ຈາຕຸມ຺ມຫາຣາຊິການໍ (ສີ. ສ຺ຍາ.)] ເທວານໍ ຊີວິຕໍ ອຸປາທາຍ ມນຸສ຺ສານໍ ອປ຺ປກໍ ຊີວິຕໍ ປຣິຕ຺ຕໍ ຊີວິຕໍ ໂຖກໍ ຊີວິຕໍ ຂຓິກໍ ຊີວິຕໍ ລຫຸກໍ ຊີວິຕໍ ອິຕ຺ຕຣໍ ຊີວິຕໍ ອນທ຺ຘນີຍໍ ຊີວິຕໍ ນຈິຣຏ຺ຐິຕິກໍ ຊີວິຕໍ. ຕາວຕິໍສານໍ ເທວານໍ…ເປ… ຍາມານໍ ເທວານໍ… ຕຸສິຕານໍ ເທວານໍ… ນິມ຺ມານຣຕີນໍ ເທວານໍ… ປຣນິມ຺ມິຕວສວຕ຺ຕີນໍ ເທວານໍ… ພ຺ຣຫ຺ມກາຍິການໍ ເທວານໍ ຊີວິຕໍ ອຸປາທາຍ ມນຸສ຺ສານໍ ອປ຺ປກໍ ຊີວິຕໍ ປຣິຕ຺ຕໍ ຊີວິຕໍ ໂຖກໍ ຊີວິຕໍ ຂຓິກໍ ຊີວິຕໍ ລຫຸກໍ ຊີວິຕໍ ອິຕ຺ຕຣໍ ຊີວິຕໍ ອນທ຺ຘນີຍໍ ຊີວິຕໍ ນຈິຣຏ຺ຐິຕິກໍ ຊີວິຕໍ. ວຸຕ຺ຕຎ຺ເຫຕໍ ຠຄວຕາ – ‘‘ອປ຺ປມິທໍ, ຠິກ຺ຂເວ, ມນຸສ຺ສານໍ ອາຍຸ, ຄມນິໂຍ ສມ຺ປຣາໂຍ, ມນ຺ຕາຍ ໂພທ຺ຘພ຺ພໍ, ກຕ຺ຕພ຺ພໍ ກຸສລໍ, ຈຣິຕພ຺ພໍ ພ຺ຣຫ຺ມຈຣິຍໍ, ນຕ຺ຖິ ຊາຕສ຺ສ ອມຣຓໍ. ໂຍ, ຠິກ຺ຂເວ, ຈິຣໍ ຊີວຕິ, ໂສ ວສ຺ສສຕໍ ອປ຺ປໍ ວາ ຠິຍ຺ໂຍ.

‘‘ອປ຺ປມາຍຸ ມນຸສ຺ສານໍ, ຫີເຬຍ຺ຍ ນໍ ສຸໂປຣິໂສ;

ຈເຣຍ຺ຍາທິຕ຺ຕສີໂສວ ນຕ຺ຖິ ມຈ຺ຈຸສ຺ສນາຄໂມ.

‘‘ອຈ຺ຈຍນ຺ຕິ ອໂຫຣຕ຺ຕາ, ຊີວິຕໍ ອຸປຣຸຊ຺ຌຕິ;

ອາຍຸ ຂິຍ຺ຍຕິ ມຈ຺ຈານໍ, ກຸນ຺ນທີນໍວ ໂອທກ’’ນ຺ຕິ.

ອປ຺ປໍ ວຕ ຊີວິຕໍ ອິທໍ.

ໂອຣໍ ວສ຺ສສຕາປິ ມິຍ຺ຍຕີຕິ. ກລລກາເລປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ອພ຺ພຸທກາເລປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ເປສິກາເລປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ຆນກາເລປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ປສາຂກາເລປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ຊາຕມຕ຺ໂຕປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ສູຕິຆເຣປິ [ປສູຕິຆເຣ (ສ຺ຍາ.), ສູຕິກຆເຣ (ກ.)] ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ອທ຺ຘມາສິໂກປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ມາສິໂກປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ທ຺ເວມາສິໂກປິ…ເປ… ເຕມາສິໂກປິ… ຈຕຸມາສິໂກປິ… ປຎ຺ຈມາສິໂກປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ຉມາສິໂກປິ… ສຕ຺ຕມາສິໂກປິ… ອຏ຺ຐມາສິໂກປິ… ນວມາສິໂກປິ… ທສມາສິໂກປິ… ສໍວຈ຺ຉຣິໂກປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ທ຺ເວວສ຺ສິໂກປິ… ຕິວສ຺ສິໂກປິ… ຈຕຸວສ຺ສິໂກປິ… ປຎ຺ຈວສ຺ສິໂກປິ … ຉວສ຺ສິໂກປິ… ສຕ຺ຕວສ຺ສິໂກປິ… ອຏ຺ຐວສ຺ສິໂກປິ… ນວວສ຺ສິໂກປິ… ທສວສ຺ສິໂກປິ… ວີສຕິວສ຺ສິໂກປິ… ຕິໍສວສ຺ສິໂກປິ… ຈຕ຺ຕາຣີສວສ຺ສິໂກປິ… ປຎ຺ຎາສວສ຺ສິໂກປິ… ສຏ຺ຐິວສ຺ສິໂກປິ… ສຕ຺ຕຕິວສ຺ສິໂກປິ… ອສີຕິວສ຺ສິໂກປິ… ນວຸຕິວສ຺ສິໂກປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕີຕິ – ໂອຣໍ ວສ຺ສສຕາປິ ມິຍ຺ຍຕິ.

ໂຍ ເຈປິ ອຕິຈ຺ຈ ຊີວຕີຕິ. ໂຍ ວສ຺ສສຕໍ ອຕິກ຺ກມິຕ຺ວາ ຊີວຕິ ໂສ ເອກໍ ວາ ວສ຺ສໍ ຊີວຕິ, ທ຺ເວ ວາ ວສ຺ສານິ ຊີວຕິ, ຕີຓິ ວາ ວສ຺ສານິ ຊີວຕິ, ຈຕ຺ຕາຣິ ວາ ວສ຺ສານິ ຊີວຕິ, ປຎ຺ຈ ວາ ວສ຺ສານິ ຊີວຕິ…ເປ… ທສ ວາ ວສ຺ສານິ ຊີວຕິ, ວີສຕິ ວາ ວສ຺ສານິ ຊີວຕິ, ຕິໍສໍ ວາ ວສ຺ສານິ ຊີວຕິ, ຈຕ຺ຕາຣີສໍ ວາ ວສ຺ສານິ ຊີວຕີຕິ – ໂຍ ເຈປິ ອຕິຈ຺ຈ ຊີວຕິ. ອຖ ໂຂ ໂສ ຊຣສາປິ ມິຍ຺ຍຕີຕິ. ຍທາ ຊິຓ຺ໂຓ ໂຫຕິ ວຸທ຺ໂຘ ມຫລ຺ລໂກ ອທ຺ຘຄໂຕ ວໂຍອນຸປ຺ປຕ຺ໂຕ ຂຓ຺ຑທນ຺ໂຕ ປລິຕເກໂສ ວິລູນໍ ຂລິຕສິໂຣ [ຂລິຕໍ ສິໂຣ (ສີ.)] ວລິນໍ ຕິລກາຫຕຄຕ຺ໂຕ ວງ຺ໂກ ໂຠຄ຺ໂຄ ທຓ຺ຑປຣາຍໂນ, ໂສ ຊຣາຍປິ ຈວຕິ ມຣຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ນຕ຺ຖິ ມຣຓມ຺ຫາ ໂມກ຺ໂຂ.

‘‘ຜລານມິວ ປກ຺ການໍ, ປາໂຕ ປຕນໂຕ [ປປຕໂຕ (ສີ.)] ຠຍໍ;

ເອວໍ ຊາຕານ ມຈ຺ຈານໍ, ນິຈ຺ຈໍ ມຣຓໂຕ ຠຍໍ.

‘‘ຍຖາປິ ກຸມ຺ຠກາຣສ຺ສ, ກຕາ ມຕ຺ຕິກຠາຊນາ;

ສພ຺ເພ ເຠທນປຣິຍນ຺ຕາ, ເອວໍ ມຈ຺ຈານ ຊີວິຕໍ.

‘‘ທຫຣາ ຈ ມຫນ຺ຕາ ຈ, ເຍ ພາລາ ເຍ ຈ ປຓ຺ຑິຕາ;

ສພ຺ເພ ມຈ຺ຈຸວສໍ ຍນ຺ຕິ, ສພ຺ເພ ມຈ຺ຈຸປຣາຍນາ.

‘‘ເຕສໍ ມຈ຺ຈຸປເຣຕານໍ, ຄຈ຺ຉຕໍ ປຣໂລກໂຕ;

ນ ປິຕາ ຕາຍເຕ ປຸຕ຺ຕໍ, ຎາຕີ ວາ ປນ ຎາຕເກ.

‘‘ເປກ຺ຂຕຎ຺ເຎວ ຎາຕີນໍ, ປສ຺ສ ລາລປ຺ປຕໍ ປຸຖຸ;

ເອກເມໂກວ ມຈ຺ຈານໍ, ໂຄວຊ຺ໂຌ ວິຍ ນິຍ຺ຍຕິ;

ເອວມພ຺ຠາຫໂຕ ໂລໂກ, ມຈ຺ຈຸນາ ຈ ຊຣາຍ ຈາ’’ຕິ.

ອຖ ໂຂ ໂສ ຊຣສາປິ ມິຍ຺ຍຕິ.

ເຕນາຫ ຠຄວາ –

‘‘ອປ຺ປໍ ວຕ ຊີວິຕໍ ອິທໍ, ໂອຣໍ ວສ຺ສສຕາປິ ມິຍ຺ຍຕິ;

ໂຍ ເຈປິ ອຕິຈ຺ຈ ຊີວຕິ, ອຖ ໂຂ ໂສ ຊຣສາປິ ມິຍ຺ຍຕີ’’ຕິ.

໔໐. ໂສຈນ຺ຕິ ຊນາ ມມາຍິເຕ, ນ ຫິ ສນ຺ຕິ ນິຈ຺ຈາ ປຣິຄ຺ຄຫາ;

ວິນາຠາວໍ ສນ຺ຕເມວິທໍ, ອິຕິ ທິສ຺ວາ ນາຄາຣມາວເສ.

ໂສຈນ຺ຕິ ຊນາ ມມາຍິເຕຕິ. ຊນາຕິ ຂຕ຺ຕິຍາ ຈ ພ຺ຣາຫ຺ມຓາ ຈ ເວສ຺ສາ ຈ ສຸທ຺ທາ ຈ ຄຫຏ຺ຐາ ຈ ປພ຺ພຊິຕາ ຈ ເທວາ ຈ ມນຸສ຺ສາ ຈ. ມມຕ຺ຕາຕິ ທ຺ເວ ມມຕ຺ຕາ – ຕຓ຺ຫາມມຕ຺ຕຎ຺ຈ ທິຏ຺ຐິມມຕ຺ຕຎ຺ຈ…ເປ… ອິທໍ ຕຓ຺ຫາມມຕ຺ຕໍ…ເປ… ອິທໍ ທິຏ຺ຐິມມຕ຺ຕໍ. ມມາຍິຕໍ ວຕ຺ຖຸໍ ອຈ຺ເຉທສງ຺ກິໂນປິ ໂສຈນ຺ຕິ, ອຈ຺ຉິຊ຺ຊນ຺ເຕປິ ໂສຈນ຺ຕິ, ອຈ຺ຉິນ຺ເນປິ ໂສຈນ຺ຕິ. ມມາຍິຕໍ ວຕ຺ຖຸໍ ວິປຣິຓາມສງ຺ກິໂນປິ ໂສຈນ຺ຕິ, ວິປຣິຓາມນ຺ເຕປິ ໂສຈນ຺ຕິ, ວິປຣິຓເຕປິ ໂສຈນ຺ຕິ ກິລມນ຺ຕິ ປຣິເທວນ຺ຕິ ອຸຣຕ຺ຕາຬິໍ ກນ຺ທນ຺ຕິ ສມ຺ໂມຫໍ ອາປຊ຺ຊນ຺ຕີຕິ – ໂສຈນ຺ຕິ ຊນາ ມມາຍິເຕ.

ນ ຫິ ສນ຺ຕິ ນິຈ຺ຈາ ປຣິຄ຺ຄຫາຕິ. ທ຺ເວ ປຣິຄ຺ຄຫາ – ຕຓ຺ຫາປຣິຄ຺ຄໂຫ ຈ ທິຏ຺ຐິປຣິຄ຺ຄໂຫ ຈ…ເປ… ອຍໍ ຕຓ຺ຫາປຣິຄ຺ຄໂຫ…ເປ… ອຍໍ ທິຏ຺ຐິປຣິຄ຺ຄໂຫ. ຕຓ຺ຫາປຣິຄ຺ຄໂຫ ອນິຈ຺ໂຈ ສງ຺ຂໂຕ ປຏິຈ຺ຈສມຸປ຺ປນ຺ໂນ ຂຍຘມ຺ໂມ ວຍຘມ຺ໂມ ວິຣາຄຘມ຺ໂມ ນິໂຣຘຘມ຺ໂມ ວິປຣິຓາມຘມ຺ໂມ. ທິຏ຺ຐິປຣິຄ຺ຄໂຫປິ ອນິຈ຺ໂຈ ສງ຺ຂໂຕ ປຏິຈ຺ຈສມຸປ຺ປນ຺ໂນ ຂຍຘມ຺ໂມ ວຍຘມ຺ໂມ ວິຣາຄຘມ຺ໂມ ນິໂຣຘຘມ຺ໂມ ວິປຣິຓາມຘມ຺ໂມ. ວຸຕ຺ຕຎ຺ເຫຕໍ ຠຄວຕາ – ‘‘ປສ຺ສຖ ໂນ ຕຸມ຺ເຫ, ຠິກ຺ຂເວ, ຕໍ ປຣິຄ຺ຄຫໍ ຍ຺ວາຍໍ ປຣິຄ຺ຄໂຫ ນິຈ຺ໂຈ ຘຸໂວ ສສ຺ສໂຕ ອວິປຣິຓາມຘມ຺ໂມ ສສ຺ສຕິສມໍ ຕເຖວ ຐສ຺ສຕີ’’ຕິ? ‘‘ໂນ ເຫຕໍ, ຠນ຺ເຕ’’. ‘‘ສາຘຸ, ຠິກ຺ຂເວ! ອຫມ຺ປິ ໂຂ ເອຕໍ, ຠິກ຺ຂເວ, ປຣິຄ຺ຄຫໍ ນ ສມນຸປສ຺ສາມິ, ຍ຺ວາຍໍ ປຣິຄ຺ຄໂຫ ນິຈ຺ໂຈ ຘຸໂວ ສສ຺ສໂຕ ອວິປຣິຓາມຘມ຺ໂມ ສສ຺ສຕິສມໍ ຕເຖວ ຐສ຺ສຕີ’’ຕິ. ປຣິຄ຺ຄຫາ ນິຈ຺ຈາ ຘຸວາ ສສ຺ສຕາ ອວິປຣິຓາມຘມ຺ມາ ນຕ຺ຖິ ນ ສນ຺ຕິ ນ ສໍວິຊ຺ຊນ຺ຕິ ນ ລພ຺ຠນ຺ຕີຕິ – ນ ຫິ ສນ຺ຕິ ນິຈ຺ຈາ ປຣິຄ຺ຄຫາ.

ວິນາຠາວໍ ສນ຺ຕເມວິທນ຺ຕິ. ນານາຠາເວ ວິນາຠາເວ ອຎ຺ຎຖາຠາເວ ສນ຺ເຕ ສໍວິຊ຺ຊມາເນ ອຸປລພ຺ຠິຍມາເນ. ວຸຕ຺ຕຎ຺ເຫຕໍ ຠຄວຕາ – ‘‘ອລໍ, ອານນ຺ທ! ມາ ໂສຈິ ມາ ປຣິເທວິ. ນນຸ ເອຕໍ, ອານນ຺ທ, ມຍາ ປຏິກຈ຺ເຈວ [ປຏິຄຈ຺ເຈວ (ສີ.)] ອກ຺ຂາຕໍ – ‘ສພ຺ເພເຫວ ປິເຍຫິ ມນາເປຫິ ນານາຠາໂວ ວິນາຠາໂວ ອຎ຺ຎຖາຠາໂວ. ຕໍ ກຸເຕຕ຺ຖ, ອານນ຺ທ, ລພ຺ຠາ – ຍໍ ຕໍ ຊາຕໍ ຠູຕໍ ສງ຺ຂຕໍ ປໂລກຘມ຺ມໍ ຕໍ ວຕ ມາ ປລຸຊ຺ຊີ’ຕິ! ເນຕໍ ຐານໍ ວິຊ຺ຊຕິ. ປຸຣິມານໍ ປຸຣິມານໍ ຂນ຺ຘານໍ ຘາຕູນໍ ອາຍຕນານໍ ວິປຣິຓາມຎ຺ຎຖາຠາວາ ປຈ຺ຉິມາ ປຈ຺ຉິມາ ຂນ຺ຘາ ຈ ຘາຕຸໂຍ ຈ ອາຍຕນານິ ຈ ປວຕ຺ຕນ຺ຕີ’’ຕິ – ວິນາຠາວໍ ສນ຺ຕເມວິທໍ.

ອິຕິ ທິສ຺ວາ ນາຄາຣມາວເສຕິ. ອິຕີຕິ ປທສນ຺ຘິ ປທສໍສຄ຺ໂຄ ປທປາຣິປູຣີ ອກ຺ຂຣສມວາໂຍ ພ຺ຍຎ຺ຊນສິລິຏ຺ຐຕາ ປທານຸປຸພ຺ພຕາເປຕໍ. ອິຕີຕິ ອິຕິ ທິສ຺ວາ ປສ຺ສິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ມມຕ຺ເຕສູຕິ – ອິຕິ ທິສ຺ວາ. ນາຄາຣມາວເສຕິ ສພ຺ພໍ ຆຣາວາສປລິໂພຘໍ ຉິນ຺ທິຕ຺ວາ ປຸຕ຺ຕທາຣປລິໂພຘໍ ຉິນ຺ທິຕ຺ວາ ຎາຕິປລິໂພຘໍ ຉິນ຺ທິຕ຺ວາ ມິຕ຺ຕາມຈ຺ຈປລິໂພຘໍ ຉິນ຺ທິຕ຺ວາ ສນ຺ນິຘິປລິໂພຘໍ ຉິນ຺ທິຕ຺ວາ ເກສມສ຺ສຸໍ ໂອຫາເຣຕ຺ວາ ກາສາຍານິ ວຕ຺ຖານິ ອຈ຺ຉາເທຕ຺ວາ ອຄາຣສ຺ມາ ອນຄາຣິຍໍ ປພ຺ພຊິຕ຺ວາ ອກິຎ຺ຈນຠາວໍ ອຸປຄນ຺ຕ຺ວາ ເອໂກ ຈເຣຍ຺ຍ ວິຫເຣຍ຺ຍ ອິຣິເຍຍ຺ຍ ວຕ຺ເຕຍ຺ຍ ປາເລຍ຺ຍ ຍເປຍ຺ຍ ຍາເປຍ຺ຍາຕິ – ອິຕິ ທິສ຺ວາ ນາຄາຣມາວເສ.

ເຕນາຫ ຠຄວາ –

‘‘ໂສຈນ຺ຕິ ຊນາ ມມາຍິເຕ, ນ ຫິ ສນ຺ຕິ ນິຈ຺ຈາ ປຣິຄ຺ຄຫາ;

ວິນາຠາວໍ ສນ຺ຕເມວິທໍ, ອິຕິ ທິສ຺ວາ ນາຄາຣມາວເສ’’ຕິ.

໔໑. ມຣເຓນປິ ຕໍ ປຫີຍຕິ [ປຫິຍ຺ຍຕິ (ກ.)] ຍໍ ປຸຣິໂສ ມມິທນ຺ຕິ ມຎ຺ຎຕິ;

ເອຕມ຺ປິ ວິທິຕ຺ວານ [ເອຕໍ ທິສ຺ວານ (ສີ. ກ.)] ປຓ຺ຑິໂຕ, ນ ມມຕ຺ຕາຍ ນເມຖ ມາມໂກ.

ມຣເຓນປິ ຕໍ ປຫີຍຕີຕິ. ມຣຓນ຺ຕິ ຍາ ເຕສໍ ເຕສໍ ສຕ຺ຕານໍ ຕມ຺ຫາ ຕມ຺ຫາ ສຕ຺ຕນິກາຍາ ຈຸຕິ ຈວນຕາ ເຠໂທ ອນ຺ຕຣຘານໍ ມຈ຺ຈຸມຣຓໍ ກາລໍກິຣິຍາ ຂນ຺ຘານໍ ເຠໂທ ກເຬວຣສ຺ສ ນິກ຺ເຂໂປ ຊີວິຕິນ຺ທ຺ຣິຍສ຺ສຸປຈ຺ເຉໂທ. ຕນ຺ຕິ ຣູປຄຕໍ ເວທນາຄຕໍ ສຎ຺ຎາຄຕໍ ສງ຺ຂາຣຄຕໍ ວິຎ຺ຎາຓຄຕໍ. ປຫີຍຕີຕິ ປຫີຍຕິ ຊຫີຍຕິ ວິຊຫີຍຕິ ອນ຺ຕຣຘາຍຕິ ວິປ຺ປລຸຊ຺ຊຕິ. ຠາສິຕມ຺ປິ ເຫຕໍ –

‘‘ປຸພ຺ເພວ ມຈ຺ຈໍ ວິຊຫນ຺ຕິ ໂຠຄາ, ມຈ຺ໂຈວ ເນ ປຸພ຺ພຕຣໍ ຊຫາຕິ;

ອສສ຺ສຕາ ໂຠຄິໂນ ກາມກາມີ, ຕສ຺ມາ ນ ໂສຈາມຫໍ ໂສກກາເລ.

‘‘ອຸເທຕິ ອາປູຣຕິ ເວຕິ ຈນ຺ໂທ, ອຕ຺ຕໍ ຄເມຕ຺ວານ ປເລຕິ ສູຣິໂຍ;

ວິທິຕາ ມຍາ ສຕ຺ຕຸກ ໂລກຘມ຺ມາ, ຕສ຺ມາ ນ ໂສຈາມຫໍ ໂສກກາເລ’’ຕິ.

ມຣເຓນປິ ຕໍ ປຫີຍຕິ. ຍໍ ປຸຣິໂສ ມມິທນ຺ຕິ ມຎ຺ຎຕີຕິ. ຍນ຺ຕິ ຣູປຄຕໍ ເວທນາຄຕໍ ສຎ຺ຎາຄຕໍ ສງ຺ຂາຣຄຕໍ ວິຎ຺ຎາຓຄຕໍ. ປຸຣິໂສຕິ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ [ໂລກໂວຫາໂຣ (ສ຺ຍາ.)] ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ. ມມິທນ຺ຕິ ມຎ຺ຎຕີຕິ ຕຓ຺ຫາມຎ຺ຎນາຍ ມຎ຺ຎຕິ, ທິຏ຺ຐິມຎ຺ຎນາຍ ມຎ຺ຎຕິ, ມານມຎ຺ຎນາຍ ມຎ຺ຎຕິ, ກິເລສມຎ຺ຎນາຍ ມຎ຺ຎຕິ, ທຸຈ຺ຈຣິຕມຎ຺ຎນາຍ ມຎ຺ຎຕິ, ປໂຍຄມຎ຺ຎນາຍ ມຎ຺ຎຕິ, ວິປາກມຎ຺ຎນາຍ ມຎ຺ຎຕີຕິ – ຍໍ ປຸຣິໂສ ມມິທນ຺ຕິ ມຎ຺ຎຕິ.

ເອຕມ຺ປິ ວິທິຕ຺ວານ ປຓ຺ຑິໂຕຕິ. ເອຕໍ ອາທີນວໍ ຎຕ຺ວາ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ມມຕ຺ເຕສູຕິ, ເອຕມ຺ປິ ວິທິຕ຺ວາ ປຓ຺ຑິໂຕ ຘີໂຣ ປຓ຺ຑິໂຕ ປຎ຺ຎວາ ພຸທ຺ຘິມາ ຎາຓີ ວິຠາວີ ເມຘາວີຕິ – ເອຕມ຺ປິ ວິທິຕ຺ວານ ປຓ຺ຑິໂຕ.

ນ ມມຕ຺ຕາຍ ນເມຖ ມາມໂກຕິ. ມມຕ຺ຕາຕິ ທ຺ເວ ມມຕ຺ຕາ – ຕຓ຺ຫາມມຕ຺ຕຎ຺ຈ ທິຏ຺ຐິມມຕ຺ຕຎ຺ຈ…ເປ… ອິທໍ ຕຓ຺ຫາມມຕ຺ຕໍ…ເປ… ອິທໍ ທິຏ຺ຐິມມຕ຺ຕໍ. ມາມໂກຕິ ພຸທ຺ຘມາມໂກ ຘມ຺ມມາມໂກ ສງ຺ຆມາມໂກ. ໂສ ຠຄວນ຺ຕໍ ມມາຍຕິ, ຠຄວາ ຕໍ ປຸຄ຺ຄລໍ ປຣິຄ຺ຄຓ຺ຫາຕິ. ວຸຕ຺ຕຎ຺ເຫຕໍ ຠຄວຕາ – ‘‘ເຍ ເຕ, ຠິກ຺ຂເວ, ຠິກ຺ຂູ ກຸຫາ ຖທ຺ຘາ [ພທ຺ຘາ (ກ.) ອິຕິວຸ. ໑໐໘] ລປາ ສິງ຺ຄີ ອຸນ຺ນຬາ ອສມາຫິຕາ, ນ ເມ ເຕ, ຠິກ຺ຂເວ, ຠິກ຺ຂູ ມາມກາ; ອປຄຕາ ຈ ເຕ, ຠິກ຺ຂເວ, ຠິກ຺ຂູ ອິມສ຺ມາ ຘມ຺ມວິນຍາ. ນ ຈ ເຕ ອິມສ຺ມິໍ ຘມ຺ມວິນເຍ ວຸທ຺ຘິໍ ວິຣູຬ຺ຫິໍ ເວປຸລ຺ລໍ ອາປຊ຺ຊນ຺ຕິ. ເຍ ຈ ໂຂ ເຕ, ຠິກ຺ຂເວ, ຠິກ຺ຂູ ນິກ຺ກຸຫາ ນິລ຺ລປາ ຘີຣາ ອຕ຺ຖທ຺ຘາ ສຸສມາຫິຕາ, ເຕ ໂຂ ເມ, ຠິກ຺ຂເວ, ຠິກ຺ຂູ ມາມກາ; ອນປຄຕາ ຈ ເຕ, ຠິກ຺ຂເວ, ຠິກ຺ຂູ ອິມສ຺ມາ ຘມ຺ມວິນຍາ. ເຕ ຈ ອິມສ຺ມິໍ ຘມ຺ມວິນເຍ ວຸທ຺ຘິໍ ວິຣູຬ຺ຫິໍ ເວປຸລ຺ລໍ ອາປຊ຺ຊນ຺ຕິ’’.

‘‘ກຸຫາ ຖທ຺ຘາ ລປາ ສິງ຺ຄີ, ອຸນ຺ນຬາ ອສມາຫິຕາ;

ນ ເຕ ຘມ຺ເມ ວິຣູຫນ຺ຕິ, ສມ຺ມາສມ຺ພຸທ຺ຘເທສິເຕ.

‘‘ນິກ຺ກຸຫາ ນິລ຺ລປາ ຘີຣາ, ອຕ຺ຖທ຺ຘາ ສຸສມາຫິຕາ;

ເຕ ເວ ຘມ຺ເມ ວິຣູຫນ຺ຕິ, ສມ຺ມາສມ຺ພຸທ຺ຘເທສິເຕ’’.

ນ ມມຕ຺ຕາຍ ນເມຖ ມາມໂກຕິ. ມາມໂກ ຕຓ຺ຫາມມຕ຺ຕໍ ປຫາຍ ທິຏ຺ຐິມມຕ຺ຕໍ ປຏິນິສ຺ສຊ຺ຊິຕ຺ວາ ມມຕ຺ຕາຍ ນ ນເມຍ຺ຍ ນ ໂອນເມຍ຺ຍ, ນ ຕໍນິນ຺ໂນ ອສ຺ສ ນ ຕປ຺ໂປໂຓ ນ ຕປ຺ປພ຺ຠາໂຣ ນ ຕທຘິມຸຕ຺ໂຕ ນ ຕທຘິປເຕຍ຺ໂຍຕິ – ນ ມມຕ຺ຕາຍ ນເມຖ ມາມໂກ.

ເຕນາຫ ຠຄວາ –

‘‘ມຣເຓນປິ ຕໍ ປຫີຍຕິ, ຍໍ ປຸຣິໂສ ມມິທນ຺ຕິ ມຎ຺ຎຕິ;

ເອຕມ຺ປິ ວິທິຕ຺ວານ ປຓ຺ຑິໂຕ, ນ ມມຕ຺ຕາຍ ນເມຖ ມາມໂກ’’ຕິ.

໔໒. ສຸປິເນນ ຍຖາປິ ສງ຺ຄຕໍ, ປຏິພຸທ຺ໂຘ ປຸຣິໂສ ນ ປສ຺ສຕິ;

ເອວມ຺ປິ ປິຍາຍິຕໍ ຊນໍ, ເປຕໍ ກາລງ຺ກຕໍ [ກາລກຕໍ (ສີ. ສ຺ຍາ.)] ນ ປສ຺ສຕິ.

ສຸປິເນນ ຍຖາປິ ສງ຺ຄຕນ຺ຕິ. ສງ຺ຄຕໍ ສມາຄຕໍ ສມາຫິຕໍ ສນ຺ນິປຕິຕນ຺ຕິ – ສຸປິເນນ ຍຖາປິ ສງ຺ຄຕໍ. ປຏິພຸທ຺ໂຘ ປຸຣິໂສ ນ ປສ຺ສຕີຕິ ຍຖາ ປຸຣິໂສ ສຸປິນຄໂຕ ຈນ຺ທໍ ປສ຺ສຕິ, ສູຣິຍໍ ປສ຺ສຕິ, ມຫາສມຸທ຺ທໍ ປສ຺ສຕິ, ສິເນຣຸໍ ປພ຺ພຕຣາຊານໍ ປສ຺ສຕິ, ຫຕ຺ຖິໍ ປສ຺ສຕິ, ອສ຺ສໍ ປສ຺ສຕິ, ຣຖໍ ປສ຺ສຕິ, ປຕ຺ຕິໍ ປສ຺ສຕິ, ເສນາພ຺ຍູຫໍ ປສ຺ສຕິ, ອາຣາມຣາມເຓຍ຺ຍກໍ ປສ຺ສຕິ, ວນຣາມເຓຍ຺ຍກໍ…ເປ… ຠູມິຣາມເຓຍ຺ຍກໍ… ໂປກ຺ຂຣຓີຣາມເຓຍ຺ຍກໍ ປສ຺ສຕິ; ປຏິພຸທ຺ໂຘ ນ ກິຎ຺ຈິ ປສ຺ສຕີຕິ – ປຏິພຸທ຺ໂຘ ປຸຣິໂສ ນ ປສ຺ສຕິ.

ເອວມ຺ປິ ປິຍາຍິຕໍ ຊນນ຺ຕິ. ເອວນ຺ຕິ ໂອປມ຺ມສມ຺ປຏິປາທນໍ. ປິຍາຍິຕໍ ຊນນ຺ຕິ ມມາຍິຕໍ ຊນໍ ມາຕຣໍ ວາ ປິຕຣໍ ວາ ຠາຕຣໍ ວາ ຠຄິນິໍ ວາ ປຸຕ຺ຕໍ ວາ ຘີຕຣໍ ວາ ມິຕ຺ຕໍ ວາ ອມຈ຺ຈໍ ວາ ຎາຕິໍ ວາ ສາໂລຫິຕໍ ວາຕິ – ເອວມ຺ປິ ປິຍາຍິຕໍ ຊນໍ.

ເປຕໍ ກາລງ຺ກຕໍ ນ ປສ຺ສຕີຕິ. ເປໂຕ ວຸຈ຺ຈຕິ ມໂຕ. ກາລງ຺ກຕໍ ນ ປສ຺ສຕິ ນ ທກ຺ຂຕິ ນາຘິຄຈ຺ຉຕິ ນ ວິນ຺ທຕິ ນ ປຏິລຠຕີຕິ – ເປຕໍ ກາລງ຺ກຕໍ ນ ປສ຺ສຕິ.

ເຕນາຫ ຠຄວາ –

‘‘ສຸປິເນນ ຍຖາປິ ສງ຺ຄຕໍ, ປຏິພຸທ຺ໂຘ ປຸຣິໂສ ນ ປສ຺ສຕິ;

ເອວມ຺ປິ ປິຍາຍິຕໍ ຊນໍ, ເປຕໍ ກາລງ຺ກຕໍ ນ ປສ຺ສຕີ’’ຕິ.

໔໓. ທິຏ຺ຐາປິ ສຸຕາປິ ເຕ ຊນາ, ເຍສໍ ນາມມິທໍ ປວຸຈ຺ຈຕິ;

ນາມໍເຍວາວສິສ຺ສຕິ, [ນາມເມວາ’ວສິສ຺ສຕິ (ສີ. ສ຺ຍາ.)] ອກ຺ເຂຍ຺ຍໍ ເປຕສ຺ສ ຊນ຺ຕຸໂນ.

ທິຏ຺ຐາປິ ສຸຕາປິ ເຕ ຊນາຕິ. ທິຏ຺ຐາຕິ ເຍ ຈກ຺ຂຸວິຎ຺ຎາຓາຠິສມ຺ຠູຕາ. ສຸຕາຕິ ເຍ ໂສຕວິຎ຺ຎາຓາຠິສມ຺ຠູຕາ. ເຕ ຊນາຕິ ຂຕ຺ຕິຍາ ຈ ພ຺ຣາຫ຺ມຓາ ຈ ເວສ຺ສາ ຈ ສຸທ຺ທາ ຈ ຄຫຏ຺ຐາ ຈ ປພ຺ພຊິຕາ ຈ ເທວາ ຈ ມນຸສ຺ສາ ຈາຕິ – ທິຏ຺ຐາປິ ສຸຕາປິ ເຕ ຊນາ.

ເຍສໍ ນາມມິທໍ ປວຸຈ຺ຈຕີຕິ. ເຍສນ຺ຕິ ເຍສໍ ຂຕ຺ຕິຍານໍ ພ຺ຣາຫ຺ມຓານໍ ເວສ຺ສານໍ ສຸທ຺ທານໍ ຄຫຏ຺ຐານໍ ປພ຺ພຊິຕານໍ ເທວານໍ ມນຸສ຺ສານໍ. ນາມນ຺ຕິ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ. ປວຸຈ຺ຈຕີຕິ ວຸຈ຺ຈຕິ ປວຸຈ຺ຈຕິ ກຖີຍຕິ ຠຓີຍຕິ ທີປີຍຕິ ໂວຫຣີຍຕີຕິ – ເຍສໍ ນາມມິທໍ ປວຸຈ຺ຈຕິ.

ນາມໍເຍວາວສິສ຺ສຕິ ອກ຺ເຂຍ຺ຍນ຺ຕິ. ຣູປຄຕໍ ເວທນາຄຕໍ ສຎ຺ຎາຄຕໍ ສງ຺ຂາຣຄຕໍ ວິຎ຺ຎາຓຄຕໍ ປຫີຍຕິ ຊຫີຍຕິ ວິຊຫີຍຕິ ອນ຺ຕຣຘາຍຕິ ວິປ຺ປລຸຊ຺ຊຕິ, ນາມໍເຍວາວສິສ຺ສຕິ. ອກ຺ເຂຍ຺ຍນ຺ຕິ. ອກ຺ຂາຕຸໍ ກເຖຕຸໍ ຠຓິຕຸໍ ທີປຍິຕຸໍ ໂວຫຣິຕຸນ຺ຕິ – ນາມໍ ເອວາວສິສ຺ສຕິ ອກ຺ເຂຍ຺ຍໍ. ເປຕສ຺ສ ຊນ຺ຕຸໂນຕິ. ເປຕສ຺ສາຕິ ມຕສ຺ສ ກາລງ຺ກຕສ຺ສ. ຊນ຺ຕຸໂນຕິ ສຕ຺ຕສ຺ສ ນຣສ຺ສ ມານວສ຺ສ ໂປສສ຺ສ ປຸຄ຺ຄລສ຺ສ ຊີວສ຺ສ ຊາຄຸສ຺ສ ຊນ຺ຕຸສ຺ສ ອິນ຺ທຄຸສ຺ສ ມນຸຊສ຺ສາຕິ – ເປຕສ຺ສ ຊນ຺ຕຸໂນ.

ເຕນາຫ ຠຄວາ –

‘‘ທິຏ຺ຐາປິ ສຸຕາປິ ເຕ ຊນາ, ເຍສໍ ນາມມິທໍ ປວຸຈ຺ຈຕິ;

ນາມໍເຍວາວສິສ຺ສຕິ, ອກ຺ເຂຍ຺ຍໍ ເປຕສ຺ສ ຊນ຺ຕຸໂນ’’ຕິ.

໔໔. ໂສກປ຺ປຣິເທວມຈ຺ຉຣໍ, ນ ປຊຫນ຺ຕິ ຄິທ຺ຘາ ມມາຍິເຕ;

ຕສ຺ມາ ມຸນໂຍ ປຣິຄ຺ຄຫໍ, ຫິຕ຺ວາ ອຈຣິໍສຸ ເຂມທສ຺ສິໂນ.

ໂສກປ຺ປຣິເທວມຈ຺ຉຣໍ ນ ປຊຫນ຺ຕິ ຄິທ຺ຘາ ມມາຍິເຕຕິ. ໂສໂກຕິ ຎາຕິພ຺ຍສເນນ ວາ ຜຸຏ຺ຐສ຺ສ ໂຠຄພ຺ຍສເນນ ວາ ຜຸຏ຺ຐສ຺ສ ໂຣຄພ຺ຍສເນນ ວາ ຜຸຏ຺ຐສ຺ສ ສີລພ຺ຍສເນນ ວາ ຜຸຏ຺ຐສ຺ສ ທິຏ຺ຐິພ຺ຍສເນນ ວາ ຜຸຏ຺ຐສ຺ສ ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ໂສໂກ ໂສຈນາ ໂສຈິຕຕ຺ຕໍ ອນ຺ໂຕໂສໂກ ອນ຺ໂຕປຣິໂສໂກ ອນ຺ໂຕທາໂຫ ອນ຺ໂຕປຣິທາໂຫ [ອນ຺ໂຕຑາໂຫ ອນ຺ໂຕປຣິຑາໂຫ (ສ຺ຍາ.)] ເຈຕໂສ ປຣິຊ຺ຌາຍນາ ໂທມນສ຺ສໍ ໂສກສລ຺ລໍ. ປຣິເທໂວຕິ ຎາຕິພ຺ຍສເນນ ວາ ຜຸຏ຺ຐສ຺ສ…ເປ… ທິຏ຺ຐິພ຺ຍສເນນ ວາ ຜຸຏ຺ຐສ຺ສ ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ອາເທໂວ ປຣິເທໂວ ອາເທວນາ ປຣິເທວນາ ອາເທວິຕຕ຺ຕໍ ປຣິເທວິຕຕ຺ຕໍ ວາຈາ ປລາໂປ ວິປ຺ປລາໂປ ລາລປ຺ໂປ ລາລປ຺ປາຍນາ ລາລປ຺ປາຍິຕຕ຺ຕໍ. ມຈ຺ຉຣິຍນ຺ຕິ ປຎ຺ຈ ມຈ຺ຉຣິຍານິ – ອາວາສມຈ຺ຉຣິຍໍ, ກຸລມຈ຺ຉຣິຍໍ, ລາຠມຈ຺ຉຣິຍໍ, ວຓ຺ຓມຈ຺ຉຣິຍໍ, ຘມ຺ມມຈ຺ຉຣິຍໍ. ຍໍ ເອວຣູປໍ ມຈ຺ຉຣິຍໍ ມຈ຺ຉຣາຍນາ ມຈ຺ຉຣາຍິຕຕ຺ຕໍ ເວວິຈ຺ຉໍ ກທຣິຍໍ ກຏຸກຎ຺ຈຸກຕາ ອຄ຺ຄຫິຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ມຈ຺ຉຣິຍໍ. ອປິ ຈ ຂນ຺ຘມຈ຺ຉຣິຍມ຺ປິ ມຈ຺ຉຣິຍໍ, ຘາຕຸມຈ຺ຉຣິຍມ຺ປິ ມຈ຺ຉຣິຍໍ, ອາຍຕນມຈ຺ຉຣິຍມ຺ປິ ມຈ຺ຉຣິຍໍ ຄາໂຫ – ອິທໍ ວຸຈ຺ຈຕິ ມຈ຺ຉຣິຍໍ. ເຄໂຘ ວຸຈ຺ຈຕິ ຕຓ຺ຫາ. ໂຍ ຣາໂຄ ສາຣາໂຄ…ເປ… ອຠິຊ຺ຌາ ໂລໂຠ ອກຸສລມູລໍ. ມມຕ຺ຕາຕິ ທ຺ເວ ມມຕ຺ຕາ – ຕຓ຺ຫາມມຕ຺ຕຎ຺ຈ ທິຏ຺ຐິມມຕ຺ຕຎ຺ຈ …ເປ… ອິທໍ ຕຓ຺ຫາມມຕ຺ຕໍ…ເປ… ອິທໍ ທິຏ຺ຐິມມຕ຺ຕໍ. ມມາຍິຕໍ ວຕ຺ຖຸໍ ອຈ຺ເຉທສງ຺ກິໂນປິ ໂສຈນ຺ຕິ, ອຈ຺ຉິຊ຺ຊນ຺ເຕປິ ໂສຈນ຺ຕິ, ອຈ຺ຉິນ຺ເນປິ ໂສຈນ຺ຕິ, ມມາຍິຕໍ ວຕ຺ຖຸໍ ວິປຣິຓາມສງ຺ກິໂນປິ ໂສຈນ຺ຕິ, ວິປຣິຓາມນ຺ເຕປິ ໂສຈນ຺ຕິ, ວິປຣິຓເຕປິ ໂສຈນ຺ຕິ, ມມາຍິຕໍ ວຕ຺ຖຸໍ ອຈ຺ເຉທສງ຺ກິໂນປິ ປຣິເທວນ຺ຕິ, ອຈ຺ຉິຊ຺ຊນ຺ເຕປິ ປຣິເທວນ຺ຕິ, ອຈ຺ຉິນ຺ເນປິ ປຣິເທວນ຺ຕິ. ມມາຍິຕໍ ວຕ຺ຖຸໍ ວິປຣິຓາມສງ຺ກິໂນປິ ປຣິເທວນ຺ຕິ, ວິປຣິຓາມນ຺ເຕປິ ປຣິເທວນ຺ຕິ, ວິປຣິຓເຕປິ ປຣິເທວນ຺ຕິ. ມມາຍິຕໍ ວຕ຺ຖຸໍ ຣກ຺ຂນ຺ຕິ ໂຄເປນ຺ຕິ ປຣິຄ຺ຄຓ຺ຫນ຺ຕິ ມມາຍນ຺ຕິ ມຈ຺ຉຣາຍນ຺ຕິ; ມມາຍິຕສ຺ມິໍ ວຕ຺ຖຸສ຺ມິໍ ໂສກໍ ນ ຊຫນ຺ຕິ, ປຣິເທວໍ ນ ຊຫນ຺ຕິ, ມຈ຺ຉຣິຍໍ ນ ຊຫນ຺ຕິ, ເຄຘໍ ນ ຊຫນ຺ຕິ ນປ຺ປຊຫນ຺ຕິ ນ ວິໂນເທນ຺ຕິ ນ ພ຺ຍນ຺ຕິໍ ກໂຣນ຺ຕິ ນ ອນຠາວໍ ຄເມນ຺ຕີຕິ – ໂສກປ຺ປຣິເທວມຈ຺ຉຣໍ ນປ຺ປຊຫນ຺ຕິ ຄິທ຺ຘາ ມມາຍິເຕ.

ຕສ຺ມາ ມຸນໂຍ ປຣິຄ຺ຄຫໍ, ຫິຕ຺ວາ ອຈຣິໍສຸ ເຂມທສ຺ສິໂນຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາ ເອຕໍ ອາທີນວໍ ສມ຺ປສ຺ສມານາ ມມຕ຺ເຕສູຕິ – ຕສ຺ມາ. ມຸນໂຍຕິ ໂມນໍ ວຸຈ຺ຈຕິ ຎາຓໍ. ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ. ເຕນ ຎາເຓນ ສມນ຺ນາຄຕາ ມຸນໂຍ ໂມນປ຺ປຕ຺ຕາ. ຕີຓິ ໂມເນຍ຺ຍານິ – ກາຍໂມເນຍ຺ຍໍ, ວຈີໂມເນຍ຺ຍໍ, ມໂນໂມເນຍ຺ຍໍ…ເປ… ສງ຺ຄຊາລມຕິຈ຺ຈ ໂສ ມຸນິ. ປຣິຄ຺ຄໂຫຕິ ທ຺ເວ ປຣິຄ຺ຄຫາ – ຕຓ຺ຫາປຣິຄ຺ຄໂຫ ຈ ທິຏ຺ຐິປຣິຄ຺ຄໂຫ ຈ…ເປ… ອຍໍ ຕຓ຺ຫາປຣິຄ຺ຄໂຫ…ເປ… ອຍໍ ທິຏ຺ຐິປຣິຄ຺ຄໂຫ. ມຸນໂຍ ຕຓ຺ຫາປຣິຄ຺ຄຫໍ ປຣິຈ຺ຈຊິຕ຺ວາ ທິຏ຺ຐິປຣິຄ຺ຄຫໍ ປຏິນິສ຺ສຊ຺ຊິຕ຺ວາ ຈຊິຕ຺ວາ ປຊຫິຕ຺ວາ ວິໂນເທຕ຺ວາ ພ຺ຍນ຺ຕິໍ ກຣິຕ຺ວາ ອນຠາວໍ ຄເມຕ຺ວາ ອຈຣິໍສຸ ວິຫຣິໍສຸ ອິຣິຍິໍສຸ ວຕ຺ຕິໍສຸ ປາລິໍສຸ ຍປິໍສຸ ຍາປິໍສຸ. ເຂມທສ຺ສິໂນຕິ ເຂມໍ ວຸຈ຺ຈຕິ ອມຕໍ ນິພ຺ພານໍ. ໂຍ ໂສ ສພ຺ພສງ຺ຂາຣສມໂຖ ສພ຺ພູປຘິປຏິນິສ຺ສຄ຺ໂຄ ຕຓ຺ຫກ຺ຂໂຍ ວິຣາໂຄ ນິໂຣໂຘ ນິພ຺ພານໍ. ເຂມທສ຺ສິໂນຕິ ເຂມທສ຺ສິໂນ ຕາຓທສ຺ສິໂນ ເລຓທສ຺ສິໂນ ສຣຓທສ຺ສິໂນ ອຠຍທສ຺ສິໂນ ອຈ຺ຈຸຕທສ຺ສິໂນ ອມຕທສ຺ສິໂນ ນິພ຺ພານທສ຺ສິໂນຕິ – ຕສ຺ມາ ມຸນໂຍ ປຣິຄ຺ຄຫໍ ຫິຕ຺ວາ ອຈຣິໍສຸ ເຂມທສ຺ສິໂນ.

ເຕນາຫ ຠຄວາ –

‘‘ໂສກປ຺ປຣິເທວມຈ຺ຉຣໍ, ນ ຊຫນ຺ຕິ ຄິທ຺ຘາ ມມາຍິເຕ;

ຕສ຺ມາ ມຸນໂຍ ປຣິຄ຺ຄຫໍ, ຫິຕ຺ວາ ອຈຣິໍສຸ ເຂມທສ຺ສິໂນ’’ຕິ.

໔໕. ປຕິລີນຈຣສ຺ສ ຠິກ຺ຂຸໂນ, ຠຊມານສ຺ສ ວິວິຕ຺ຕມາສນໍ;

ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍ.

ປຕິລີນຈຣສ຺ສ ຠິກ຺ຂຸໂນຕິ. ປຕິລີນຈຣາ ວຸຈ຺ຈນ຺ຕິ ສຕ຺ຕ ເສກ຺ຂາ [ເສຂາ (ສີ. ສ຺ຍາ.)]. ອຣຫາ ປຕິລີໂນ. ກິໍກາຣຓາ ປຕິລີນຈຣາ ວຸຈ຺ຈນ຺ຕິ ສຕ຺ຕ ເສກ຺ຂາ? ເຕ ຕໂຕ ຕໂຕ ຈິຕ຺ຕໍ ປຕິລີເນນ຺ຕາ ປຕິກຸເຏນ຺ຕາ ປຕິວຏ຺ເຏນ຺ຕາ ສນ຺ນິຣຸທ຺ຘນ຺ຕາ [ສນ຺ນິຣຸມ຺ເຠນ຺ຕາ (ສີ.)] ສນ຺ນິຄ຺ຄຓ຺ຫນ຺ຕາ ສນ຺ນິວາເຣນ຺ຕາ ຣກ຺ຂນ຺ຕາ ໂຄເປນ຺ຕາ ຈຣນ຺ຕິ ວິຈຣນ຺ຕິ ວິຫຣນ຺ຕິ ອິຣິຍນ຺ຕິ ວຕ຺ເຕນ຺ຕິ ປາເລນ຺ຕິ ຍເປນ຺ຕິ ຍາເປນ຺ຕິ, ຈກ຺ຂຸທ຺ວາເຣ ຈິຕ຺ຕໍ ປຕິລີເນນ຺ຕາ ປຕິກຸເຏນ຺ຕາ ປຕິວຏ຺ເຏນ຺ຕາ ສນ຺ນິຣຸທ຺ຘນ຺ຕາ ສນ຺ນິຄ຺ຄຓ຺ຫນ຺ຕາ ສນ຺ນິວາເຣນ຺ຕາ ຣກ຺ຂນ຺ຕາ ໂຄເປນ຺ຕາ ຈຣນ຺ຕິ ວິຈຣນ຺ຕິ ວິຫຣນ຺ຕິ ອິຣິຍນ຺ຕິ ວຕ຺ເຕນ຺ຕິ ປາເລນ຺ຕິ ຍເປນ຺ຕິ ຍາເປນ຺ຕິ, ໂສຕທ຺ວາເຣ ຈິຕ຺ຕໍ…ເປ… ຆານທ຺ວາເຣ ຈິຕ຺ຕໍ… ຊິວ຺ຫາທ຺ວາເຣ ຈິຕ຺ຕໍ… ກາຍທ຺ວາເຣ ຈິຕ຺ຕໍ… ມໂນທ຺ວາເຣ ຈິຕ຺ຕໍ ປຕິລີເນນ຺ຕາ ປຕິກຸເຏນ຺ຕາ ປຕິວຏ຺ເຏນ຺ຕາ ສນ຺ນິຣຸທ຺ຘນ຺ຕາ ສນ຺ນິຄ຺ຄຓ຺ຫນ຺ຕາ ສນ຺ນິວາເຣນ຺ຕາ ຣກ຺ຂນ຺ຕາ ໂຄເປນ຺ຕາ ຈຣນ຺ຕິ ວິຈຣນ຺ຕິ ວິຫຣນ຺ຕິ ອິຣິຍນ຺ຕິ ວຕ຺ເຕນ຺ຕິ ປາເລນ຺ຕິ ຍເປນ຺ຕິ ຍາເປນ຺ຕິ. ຍຖາ ກຸກ຺ກຸຏປຕ຺ຕໍ ວາ ນ຺ຫາຣຸທທ຺ທຸລໍ ວາ ອຄ຺ຄິມ຺ຫິ ປກ຺ຂິຕ຺ຕໍ ປຕິລີຍຕິ ປຕິກຸຏຕິ ປຕິວຏ຺ຏຕິ ນ ສມ຺ປສາຣິຍຕິ; ເອວເມວ ຕໂຕ ຕໂຕ ຈິຕ຺ຕໍ ປຕິລີເນນ຺ຕາ ປຕິກຸເຏນ຺ຕາ ປຕິວຏ຺ເຏນ຺ຕາ ສນ຺ນິຣຸທ຺ຘນ຺ຕາ ສນ຺ນິຄ຺ຄຓ຺ຫນ຺ຕາ ສນ຺ນິວາເຣນ຺ຕາ ຣກ຺ຂນ຺ຕາ ໂຄເປນ຺ຕາ ຈຣນ຺ຕິ ວິຈຣນ຺ຕິ ວິຫຣນ຺ຕິ ອິຣິຍນ຺ຕິ ວຕ຺ເຕນ຺ຕິ ປາເລນ຺ຕິ ຍເປນ຺ຕິ ຍາເປນ຺ຕິ, ຈກ຺ຂຸທ຺ວາເຣ ຈິຕ຺ຕໍ…ເປ… ໂສຕທ຺ວາເຣ ຈິຕ຺ຕໍ… ຆານທ຺ວາເຣ ຈິຕ຺ຕໍ… ຊິວ຺ຫາທ຺ວາເຣ ຈິຕ຺ຕໍ… ກາຍທ຺ວາເຣ ຈິຕ຺ຕໍ… ມໂນທ຺ວາເຣ ຈິຕ຺ຕໍ ປຕິລີເນນ຺ຕາ ປຕິກຸເຏນ຺ຕາ ປຕິວຏ຺ເຏນ຺ຕາ ສນ຺ນິຣຸທ຺ຘນ຺ຕາ ສນ຺ນິຄ຺ຄຓ຺ຫນ຺ຕາ ສນ຺ນິວາເຣນ຺ຕາ ຣກ຺ຂນ຺ຕາ ໂຄເປນ຺ຕາ ຈຣນ຺ຕິ ວິຈຣນ຺ຕິ ວິຫຣນ຺ຕິ ອິຣິຍນ຺ຕິ ວຕ຺ເຕນ຺ຕິ ປາເລນ຺ຕິ ຍເປນ຺ຕິ ຍາເປນ຺ຕິ. ຕໍກາຣຓາ ປຕິລີນຈຣາ ວຸຈ຺ຈນ຺ຕິ ສຕ຺ຕ ເສກ຺ຂາ. ຠິກ຺ຂຸໂນຕິ ປຸຖຸຊ຺ຊນກລ຺ຍາຓກສ຺ສ ວາ ຠິກ຺ຂຸໂນ ເສກ຺ຂສ຺ສ ວາ ຠິກ຺ຂຸໂນຕິ – ປຕິລີນຈຣສ຺ສ ຠິກ຺ຂຸໂນ.

ຠຊມານສ຺ສ ວິວິຕ຺ຕມາສນນ຺ຕິ ອາສນໍ ວຸຈ຺ຈຕິ ຍຕ຺ຖ ນິສີທນ຺ຕິ – ມຎ຺ໂຈ ປີຐໍ ຠິສິ ຕຏ຺ຏິກາ ຈມ຺ມຂຓ຺ໂຑ ຕິຓສນ຺ຖາໂຣ ປຓ຺ຓສນ຺ຖາໂຣ ປລາລສນ຺ຖາໂຣ. ຕໍ ອາສນໍ ອສປ຺ປາຍຣູປທສ຺ສເນນ ຣິຕ຺ຕໍ ວິວິຕ຺ຕໍ ປວິວິຕ຺ຕໍ, ອສປ຺ປາຍສທ຺ທສ຺ສວເນນ ຣິຕ຺ຕໍ ວິວິຕ຺ຕໍ ປວິວິຕ຺ຕໍ, ອສປ຺ປາຍຄນ຺ຘຆາຍເນນ… ອສປ຺ປາຍຣສສາຍເນນ… ອສປ຺ປາຍໂຜຏ຺ຐພ຺ພຜຸສເນນ… ອສປ຺ປາເຍຫິ ປຎ຺ຈຫິ ກາມຄຸເຓຫິ ຣິຕ຺ຕໍ ວິວິຕ຺ຕໍ ປວິວິຕ຺ຕໍ. ຕໍ ວິວິຕ຺ຕໍ ອາສນໍ ຠຊໂຕ ສມ຺ຠຊໂຕ ເສວໂຕ ນິເສວໂຕ ສໍເສວໂຕ ປຏິເສວໂຕຕິ – ຠຊມານສ຺ສ ວິວິຕ຺ຕມາສນໍ.

ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍຕິ. ສາມຄ຺ຄິໂຍຕິ ຕິສ຺ໂສ ສາມຄ຺ຄິໂຍ – ຄຓສາມຄ຺ຄີ, ຘມ຺ມສາມຄ຺ຄີ, ອນຠິນິພ຺ພຕ຺ຕິສາມຄ຺ຄີ. ກຕມາ ຄຓສາມຄ຺ຄີ? ພຫຸ ເຈປິ ຠິກ຺ຂູ ສມຄ຺ຄາ ສມ຺ໂມທມານາ ອວິວທມານາ ຂີໂຣທກີຠູຕາ ອຎ຺ຎມຎ຺ຎໍ ປິຍຈກ຺ຂູຫິ ສມ຺ປສ຺ສນ຺ຕາ ວິຫຣນ຺ຕິ – ອຍໍ ຄຓສາມຄ຺ຄີ. ກຕມາ ຘມ຺ມສາມຄ຺ຄີ? ຈຕ຺ຕາໂຣ ສຕິປຏ຺ຐານາ, ຈຕ຺ຕາໂຣ ສມ຺ມປ຺ປຘານາ, ຈຕ຺ຕາໂຣ ອິທ຺ຘິປາທາ, ປຎ຺ຈິນ຺ທ຺ຣິຍານິ, ປຎ຺ຈ ພລານິ, ສຕ຺ຕ ໂພຊ຺ຌງ຺ຄາ, ອຣິໂຍ ອຏ຺ຐງ຺ຄິໂກ ມຄ຺ໂຄ. ເຕ ເອກໂຕ ປກ຺ຂນ຺ທນ຺ຕິ ປສີທນ຺ຕິ ສມ຺ປຕິຏ຺ຐນ຺ຕິ ວິມຸຈ຺ຈນ຺ຕິ; ນ ເຕສໍ ຘມ຺ມານໍ ວິວາໂທ ປວິວາໂທ ອຕ຺ຖິ – ອຍໍ ຘມ຺ມສາມຄ຺ຄີ. ກຕມາ ອນຠິນິພ຺ພຕ຺ຕິສາມຄ຺ຄີ? ພຫຸ ເຈປິ ຠິກ຺ຂູ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພາຍນ຺ຕິ; ນ ເຕສໍ ນິພ຺ພານຘາຕຸຍາ [ເຕນ (ສີ.)] ອູນຕ຺ຕໍ ວາ ປຸຓ຺ຓຕ຺ຕໍ ວາ ປຎ຺ຎາຍຕິ – ອຍໍ ອນຠິນິພ຺ພຕ຺ຕິສາມຄ຺ຄີ. ຠວເນຕິ ເນຣຍິການໍ ນິຣໂຍ ຠວນໍ, ຕິຣຈ຺ຉານໂຍນິການໍ ຕິຣຈ຺ຉານໂຍນິ ຠວນໍ, ເປຕ຺ຕິວິສຍິການໍ ເປຕ຺ຕິວິສໂຍ ຠວນໍ, ມນຸສ຺ສານໍ ມນຸສ຺ສໂລໂກ ຠວນໍ, ເທວານໍ ເທວໂລໂກ ຠວນນ຺ຕິ. ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍຕິ. ຕສ຺ເສສາ ສາມຄ຺ຄີ ເອຕໍ ຉນ຺ນໍ ເອຕໍ ປຕິຣູປໍ ເອຕໍ ອນຸຈ຺ຉວິກໍ ເອຕໍ ອນຸໂລມໍ, ໂຍ ເອວໍ ປຏິຈ຺ຉນ຺ເນ ນິຣເຍ ອຕ຺ຕານໍ ນ ທສ຺ເສຍ຺ຍ, ຕິຣຈ຺ຉານໂຍນິຍໍ ອຕ຺ຕານໍ ນ ທສ຺ເສຍ຺ຍ, ເປຕ຺ຕິວິສເຍ ອຕ຺ຕານໍ ນ ທສ຺ເສຍ຺ຍ, ມນຸສ຺ສໂລເກ ອຕ຺ຕານໍ ນ ທສ຺ເສຍ຺ຍ, ເທວໂລເກ ອຕ຺ຕານໍ ນ ທສ຺ເສຍ຺ຍາຕິ ເອວມາຫໍສຸ ເອວໍ ກເຖນ຺ຕິ ເອວໍ ຠຓນ຺ຕິ ເອວໍ ທີປຍນ຺ຕິ ເອວໍ ໂວຫຣນ຺ຕີຕິ – ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍ.

ເຕນາຫ ຠຄວາ –

‘‘ປຕິລີນຈຣສ຺ສ ຠິກ຺ຂຸໂນ, ຠຊມານສ຺ສ ວິວິຕ຺ຕມາສນໍ;

ສາມຄ຺ຄິຍມາຫຸ ຕສ຺ສ ຕໍ, ໂຍ ອຕ຺ຕານໍ ຠວເນ ນ ທສ຺ສເຍ’’ຕິ.

໔໖. ສພ຺ພຕ຺ຖ ມຸນີ ອນິສ຺ສິໂຕ, ນ ປິຍໍ ກຸພ຺ພຕິ ໂນປິ ອປ຺ປິຍໍ;

ຕສ຺ມິໍ ປຣິເທວມຈ຺ຉຣໍ, ປຓ຺ເຓ ວາຣິ ຍຖາ ນ ລິມ຺ປຕິ.

ສພ຺ພຕ຺ຖ ມຸນີ ອນິສ຺ສິໂຕຕິ. ສພ຺ພໍ ວຸຈ຺ຈຕິ ທ຺ວາທສາຍຕນານິ – ຈກ຺ຂຸຎ຺ເຈວ ຣູປາ ຈ, ໂສຕຎ຺ຈ ສທ຺ທາ ຈ, ຆານຎ຺ຈ ຄນ຺ຘາ ຈ, ຊິວ຺ຫາ ຈ ຣສາ ຈ, ກາໂຍ ຈ ໂຜຏ຺ຐພ຺ພາ ຈ, ມໂນ ຈ ຘມ຺ມາ ຈ. ມຸນີຕິ. ໂມນໍ ວຸຈ຺ຈຕິ ຎາຓໍ…ເປ… ສງ຺ຄຊາລມຕິຈ຺ຈ ໂສ ມຸນິ. ອນິສ຺ສິໂຕຕິ. ທ຺ເວ ນິສ຺ສຍາ – ຕຓ຺ຫານິສ຺ສໂຍ ຈ ທິຏ຺ຐິນິສ຺ສໂຍ ຈ…ເປ… ອຍໍ ຕຓ຺ຫານິສ຺ສໂຍ…ເປ… ອຍໍ ທິຏ຺ຐິນິສ຺ສໂຍ. ມຸນິ ຕຓ຺ຫານິສ຺ສຍໍ ປຫາຍ ທິຏ຺ຐິນິສ຺ສຍໍ ປຏິນິສ຺ສຊ຺ຊິຕ຺ວາ ຈກ຺ຂຸໍ ອນິສ຺ສິໂຕ ໂສຕໍ ອນິສ຺ສິໂຕ ຆານໍ ອນິສ຺ສິໂຕ ຊິວ຺ຫໍ ອນິສ຺ສິໂຕ ກາຍໍ ອນິສ຺ສິໂຕ ມນໍ ອນິສ຺ສິໂຕ ຣູເປ… ສທ຺ເທ… ຄນ຺ເຘ… ຣເສ… ໂຜຏ຺ຐພ຺ເພ… ຘມ຺ເມ… ກຸລໍ… ຄຓໍ… ອາວາສໍ… ລາຠໍ… ຍສໍ… ປສໍສໍ… ສຸຂໍ… ຈີວຣໍ… ປິຓ຺ຑປາຕໍ… ເສນາສນໍ… ຄິລານປຈ຺ຈຍເຠສຊ຺ຊປຣິກ຺ຂາຣໍ… ກາມຘາຕຸໍ… ຣູປຘາຕຸໍ… ອຣູປຘາຕຸໍ… ກາມຠວໍ… ຣູປຠວໍ… ອຣູປຠວໍ… ສຎ຺ຎາຠວໍ… ອສຎ຺ຎາຠວໍ … ເນວສຎ຺ຎານາສຎ຺ຎາຠວໍ… ເອກໂວກາຣຠວໍ… ຈຕຸໂວກາຣຠວໍ… ປຎ຺ຈໂວກາຣຠວໍ… ອຕີຕໍ… ອນາຄຕໍ… ປຈ຺ຈຸປ຺ປນ຺ນໍ… ທິຏ຺ຐໍ… ສຸຕໍ… ມຸຕໍ… ວິຎ຺ຎາຕໍ… ສພ຺ເພ ຘມ຺ເມ ອນິສ຺ສິໂຕ ອນລ຺ລີໂນ ອນຸປຄໂຕ ອນຊ຺ໂຌສິໂຕ ອນຘິມຸຕ຺ໂຕ ນິກ຺ຂນ຺ໂຕ ນິສ຺ສໂຏ ວິປ຺ປມຸຕ຺ໂຕ ວິສຎ຺ຎຸຕ຺ໂຕ ວິມຣິຍາທິກເຕນ ເຈຕສາ ວິຫຣຕີຕິ – ສພ຺ພຕ຺ຖ ມຸນິ ອນິສ຺ສິໂຕ.

ນ ປິຍໍ ກຸພ຺ພຕິ ໂນປິ ອປ຺ປິຍນ຺ຕິ. ປິຍາຕິ ທ຺ເວ ປິຍາ – ສຕ຺ຕາ ວາ ສງ຺ຂາຣາ ວາ. ກຕເມ ສຕ຺ຕາ ປິຍາ? ອິຘ ຍສ຺ສ ເຕ ໂຫນ຺ຕິ ອຕ຺ຖກາມາ ຫິຕກາມາ ຜາສຸກາມາ ໂຍຄກ຺ເຂມກາມາ ມາຕາ ວາ ປິຕາ ວາ ຠາຕາ ວາ ຠຄິນີ ວາ ປຸຕ຺ຕາ ວາ ຘີຕຣາ ວາ ມິຕ຺ຕາ ວາ ອມຈ຺ຈາ ວາ ຎາຕີ ວາ ສາໂລຫິຕາ ວາ – ອິເມ ສຕ຺ຕາ ປິຍາ. ກຕເມ ສງ຺ຂາຣາ ປິຍາ? ມນາປິກາ ຣູປາ ມນາປິກາ ສທ຺ທາ ມນາປິກາ ຄນ຺ຘາ ມນາປິກາ ຣສາ ມນາປິກາ ໂຜຏ຺ຐພ຺ພາ – ອິເມ ສງ຺ຂາຣາ ປິຍາ. ອປ຺ປິຍາຕິ ທ຺ເວ ອປ຺ປິຍາ – ສຕ຺ຕາ ວາ ສງ຺ຂາຣາ ວາ. ກຕເມ ສຕ຺ຕາ ອປ຺ປິຍາ? ອິຘ ຍສ຺ສ ເຕ ໂຫນ຺ຕິ ອນຕ຺ຖກາມາ ອຫິຕກາມາ ອຜາສຸກາມາ ອໂຍຄກ຺ເຂມກາມາ ຊີວິຕາ ໂວໂຣເປຕຸກາມາ – ອິເມ ສຕ຺ຕາ ອປ຺ປິຍາ. ກຕເມ ສງ຺ຂາຣາ ອປ຺ປິຍາ? ອມນາປິກາ ຣູປາ ອມນາປິກາ ສທ຺ທາ ອມນາປິກາ ຄນ຺ຘາ ອມນາປິກາ ຣສາ ອມນາປິກາ ໂຜຏ຺ຐພ຺ພາ – ອິເມ ສງ຺ຂາຣາ ອປ຺ປິຍາ. ນ ປິຍໍ ກຸພ຺ພຕິ ໂນປິ ອປ຺ປິຍນ຺ຕິ. ‘‘ອຍໍ ເມ ສຕ຺ໂຕ ປິໂຍ, ອິເມ ຈ ສງ຺ຂາຣາ ມນາປາ’’ຕິ ຣາຄວເສນ ປິຍໍ ນ ກໂຣຕິ; ‘‘ອຍໍ ເມ ສຕ຺ໂຕ ອປ຺ປິໂຍ, ອິເມ ຈ ສງ຺ຂາຣາ ອມນາປາ’’ຕິ ປຏິຆວເສນ ອປ຺ປິຍໍ ນ ກໂຣຕິ ນ ຊເນຕິ ນ ສຎ຺ຊເນຕິ ນ ນິພ຺ພຕ຺ເຕຕິ ນາຠິນິພ຺ພຕ຺ເຕຕີຕິ – ນ ປິຍໍ ກຸພ຺ພຕິ ໂນປິ ອປ຺ປິຍໍ.

ຕສ຺ມິໍ ປຣິເທວມຈ຺ຉຣໍ ປຓ຺ເຓ ວາຣິ ຍຖາ ນ ລິມ຺ປຕີຕິ. ຕສ຺ມິນ຺ຕິ ຕສ຺ມິໍ ປຸຄ຺ຄເລ ອຣຫນ຺ເຕ ຂີຓາສເວ. ປຣິເທໂວຕິ ຎາຕິພ຺ຍສເນນ ວາ ຜຸຏ຺ຐສ຺ສ ໂຠຄພ຺ຍສເນນ ວາ ຜຸຏ຺ຐສ຺ສ ໂຣຄພ຺ຍສເນນ ວາ ຜຸຏ຺ຐສ຺ສ ສີລພ຺ຍສເນນ ວາ ຜຸຏ຺ຐສ຺ສ ທິຏ຺ຐິພ຺ຍສເນນ ວາ ຜຸຏ຺ຐສ຺ສ ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ອາເທໂວ ປຣິເທໂວ ອາເທວນາ ປຣິເທວນາ ອາເທວິຕຕ຺ຕໍ ປຣິເທວິຕຕ຺ຕໍ ວາຈາ ປລາໂປ ວິປ຺ປລາໂປ ລາລປ຺ໂປ ລາລປ຺ປາຍນາ ລາລປ຺ປາຍິຕຕ຺ຕໍ. ມຈ຺ຉຣິຍນ຺ຕິ ປຎ຺ຈ ມຈ຺ຉຣິຍານິ – ອາວາສມຈ຺ຉຣິຍໍ, ກຸລມຈ຺ຉຣິຍໍ, ລາຠມຈ຺ຉຣິຍໍ, ວຓ຺ຓມຈ຺ຉຣິຍໍ, ຘມ຺ມມຈ຺ຉຣິຍໍ. ຍໍ ເອວຣູປໍ ມຈ຺ຉຣິຍໍ ມຈ຺ຉຣາຍນາ ມຈ຺ຉຣາຍິຕຕ຺ຕໍ ເວວິຈ຺ຉໍ ກທຣິຍໍ ກຏຸກຎ຺ຈຸກຕາ ອຄ຺ຄຫິຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ມຈ຺ຉຣິຍໍ. ອປິ ຈ ຂນ຺ຘມຈ຺ຉຣິຍມ຺ປິ ມຈ຺ຉຣິຍໍ, ຘາຕຸມຈ຺ຉຣິຍມ຺ປິ ມຈ຺ຉຣິຍໍ, ອາຍຕນມຈ຺ຉຣິຍມ຺ປິ ມຈ຺ຉຣິຍໍ ຄາໂຫ – ອິທໍ ວຸຈ຺ຈຕິ ມຈ຺ຉຣິຍໍ.

ປຓ຺ເຓ ວາຣິ ຍຖາ ນ ລິມ຺ປຕີຕິ. ປຓ຺ຓໍ ວຸຈ຺ຈຕິ ປທຸມປຕ຺ຕໍ. ວາຣິ ວຸຈ຺ຈຕິ ອຸທກໍ. ຍຖາ ວາຣິ ປທຸມປຕ຺ຕໍ ນ ລິມ຺ປຕິ ນ ປລິມ຺ປຕິ ນ ອຸປລິມ຺ປຕິ ອລິຕ຺ຕໍ ອປລິຕ຺ຕໍ ອນຸປລິຕ຺ຕໍ, ເອວເມວ ຕສ຺ມິໍ ປຸຄ຺ຄເລ ອຣຫນ຺ເຕ ຂີຓາສເວ ປຣິເທໂວ ມຈ຺ຉຣິຍຎ຺ຈ ນ ລິມ຺ປຕິ ນ ປລິມ຺ປຕິ ນ ອຸປລິມ຺ປຕິ ອລິຕ຺ຕາ ອປລິຕ຺ຕາ ອນຸປລິຕ຺ຕາ. ໂສ ຈ ປຸຄ຺ຄໂລ ອຣຫນ຺ໂຕ ເຕຫິ ກິເລເສຫິ ນ ລິມ຺ປຕິ ນ ປລິມ຺ປຕິ ນ ອຸປລິມ຺ປຕິ ອລິຕ຺ໂຕ ອປລິຕ຺ໂຕ ອນຸປລິຕ຺ໂຕ ນິກ຺ຂນ຺ໂຕ ນິສ຺ສໂຏ ວິປ຺ປມຸຕ຺ໂຕ ວິສຎ຺ຎຸຕ຺ໂຕ ວິມຣິຍາທິກເຕນ ເຈຕສາ ວິຫຣຕີຕິ – ຕສ຺ມິໍ ປຣິເທວມຈ຺ຉຣໍ ປຓ຺ເຓ ວາຣິ ຍຖາ ນ ລິມ຺ປຕິ.

ເຕນາຫ ຠຄວາ –

‘‘ສພ຺ພຕ຺ຖ ມຸນີ ອນິສ຺ສິໂຕ, ນ ປິຍໍ ກຸພ຺ພຕິ ໂນປິ ອປ຺ປິຍໍ;

ຕສ຺ມິໍ ປຣິເທວມຈ຺ຉຣໍ, ປຓ຺ເຓ ວາຣິ ຍຖາ ນ ລິມ຺ປຕີ’’ຕິ.

໔໗. ອຸທພິນ຺ທຸ ຍຖາປິ ໂປກ຺ຂເຣ, ປທຸເມ ວາຣິ ຍຖາ ນ ລິມ຺ປຕິ;

ເອວໍ ມຸນິ ໂນປລິມ຺ປຕິ, ຍທິທໍ ທິຏ຺ຐສຸຕມຸເຕສຸ [ທິຏ຺ຐສຸເຕ ມຸເຕສຸ (ສີ.), ທິຏ຺ຐສຸຕໍ ມຸເຕສຸ (ສ຺ຍາ. ກ.)] ວາ.

ອຸທພິນ຺ທຸ ຍຖາປິ ໂປກ຺ຂເຣຕິ. ອຸທພິນ຺ທຸ ວຸຈ຺ຈຕິ ອຸທກເຖໂວ. ໂປກ຺ຂຣໍ ວຸຈ຺ຈຕິ ປທຸມປຕ຺ຕໍ. ຍຖາ ອຸທພິນ຺ທຸ ປທຸມປຕ຺ເຕ ນ ລິມ຺ປຕິ ນ ປລິມ຺ປຕິ ນ ອຸປລິມ຺ປຕິ ອລິຕ຺ຕໍ ອປລິຕ຺ຕໍ ອນຸປລິຕ຺ຕນ຺ຕິ – ອຸທພິນ຺ທຸ ຍຖາປິ ໂປກ຺ຂເຣ. ປທຸເມ ວາຣິ ຍຖາ ນ ລິມ຺ປຕີຕິ. ປທຸມໍ ວຸຈ຺ຈຕິ ປທຸມປຸປ຺ຜໍ. ວາຣິ ວຸຈ຺ຈຕິ ອຸທກໍ. ຍຖາ ວາຣິ ປທຸມປຸປ຺ຜໍ ນ ລິມ຺ປຕິ ນ ປລິມ຺ປຕິ ນ ອຸປລິມ຺ປຕິ ອລິຕ຺ຕໍ ອປລິຕ຺ຕໍ ອນຸປລິຕ຺ຕນ຺ຕິ – ປທຸເມ ວາຣິ ຍຖາ ນ ລິມ຺ປຕິ.

ເອວໍ ມຸນິ ໂນປລິມ຺ປຕິ, ຍທິທໍ ທິຏ຺ຐສຸຕມຸເຕສຸ ວາຕິ. ເອວນ຺ຕິ ໂອປມ຺ມສມ຺ປຏິປາທນໍ. ມຸນີຕິ. ໂມນໍ ວຸຈ຺ຈຕິ ຎາຓໍ…ເປ… ສງ຺ຄຊາລມຕິຈ຺ຈ ໂສ ມຸນິ. ເລປາຕິ ທ຺ເວ ເລປາ – ຕຓ຺ຫາເລໂປ ຈ ທິຏ຺ຐິເລໂປ ຈ…ເປ… ອຍໍ ຕຓ຺ຫາເລໂປ…ເປ… ອຍໍ ທິຏ຺ຐິເລໂປ. ມຸນິ ຕຓ຺ຫາເລປໍ ປຫາຍ ທິຏ຺ຐິເລປໍ ປຏິນິສ຺ສຊ຺ຊິຕ຺ວາ ທິຏ຺ເຐ ນ ລິມ຺ປຕິ, ສຸເຕ ນ ລິມ຺ປຕິ, ມຸເຕ ນ ລິມ຺ປຕິ, ວິຎ຺ຎາເຕ ນ ລິມ຺ປຕິ ນ ປລິມ຺ປຕິ ນ ອຸປລິມ຺ປຕິ ອລິຕ຺ໂຕ ອປລິຕ຺ໂຕ ອນຸປລິຕ຺ໂຕ ນິກ຺ຂນ຺ໂຕ ນິສ຺ສໂຏ ວິປ຺ປມຸຕ຺ໂຕ ວິສຎ຺ຎຸຕ຺ໂຕ ວິມຣິຍາທິກເຕນ ເຈຕສາ ວິຫຣຕີຕິ – ເອວໍ ມຸນິ ໂນປລິມ຺ປຕິ, ຍທິທໍ ທິຏ຺ຐສຸຕມຸເຕສຸ ວາ.

ເຕນາຫ ຠຄວາ –

‘‘ອຸທພິນ຺ທຸ ຍຖາປິ ໂປກ຺ຂເຣ, ປທຸເມ ວາຣິ ຍຖາ ນ ລິມ຺ປຕິ;

ເອວໍ ມຸນິ ໂນປລິມ຺ປຕິ, ຍທິທໍ ທິຏ຺ຐສຸຕມຸເຕສຸ ວາ’’ຕິ.

໔໘. ໂຘໂນ ນ ຫິ ເຕນ ມຎ຺ຎຕິ, ຍທິທໍ ທິຏ຺ຐສຸຕມຸເຕສຸ ວາ;

ນາຎ຺ເຎນ ວິສຸທ຺ຘິມິຈ຺ຉຕິ, ນ ຫິ ໂສ ຣຊ຺ຊຕິ ໂນ ວິຣຊ຺ຊຕິ.

ໂຘໂນ ນ ຫິ ເຕນ ມຎ຺ຎຕິ, ຍທິທໍ ທິຏ຺ຐສຸຕມຸເຕສຸ ວາຕິ. ໂຘໂນຕິ ໂຘນາ ວຸຈ຺ຈຕິ ປຎ຺ຎາ. ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ. ກິໍກາຣຓາ ໂຘນາ ວຸຈ຺ຈຕິ ປຎ຺ຎາ? ຕາຍ ປຎ຺ຎາຍ ກາຍທຸຈ຺ຈຣິຕໍ ຘຸຕຎ຺ຈ ໂຘຕ ຈ ສນ຺ໂຘຕຎ຺ຈ ນິທ຺ໂຘຕຎ຺ຈ, ວຈີທຸຈ຺ຈຣິຕໍ…ເປ… ມໂນທຸຈ຺ຈຣິຕໍ ຘຸຕຎ຺ຈ ໂຘຕຎ຺ຈ ສນ຺ໂຘຕຎ຺ຈ ນິທ຺ໂຘຕຎ຺ຈ, ຣາໂຄ ຘຸໂຕ ຈ ໂຘໂຕ ຈ ສນ຺ໂຘໂຕ ຈ ນິທ຺ໂຘໂຕ ຈ, ໂທໂສ… ໂມໂຫ… ໂກໂຘ… ອຸປນາໂຫ… ມກ຺ໂຂ… ປຬາໂສ… ອິສ຺ສາ… ມຈ຺ຉຣິຍໍ… ມາຍາ… ສາເຐຍ຺ຍໍ… ຖມ຺ໂຠ… ສາຣມ຺ໂຠ… ມາໂນ… ອຕິມາໂນ… ມໂທ… ປມາໂທ… ສພ຺ເພ ກິເລສາ… ສພ຺ເພ ທຸຈ຺ຈຣິຕາ… ສພ຺ເພ ທຣຖາ… ສພ຺ເພ ປຣິຬາຫາ… ສພ຺ເພ ສນ຺ຕາປາ… ສພ຺ພາກຸສລາຠິສງ຺ຂາຣາ ຘຸຕາ ຈ ໂຘຕາ ຈ ສນ຺ໂຘຕາ ຈ ນິທ຺ໂຘຕາ ຈ. ຕໍກາຣຓາ ໂຘນາ ວຸຈ຺ຈຕິ ປຎ຺ຎາ.

ອຖ ວາ ສມ຺ມາທິຏ຺ຐິຍາ ມິຈ຺ຉາທິຏ຺ຐິ ຘຸຕາ ຈ ໂຘຕາ ຈ ສນ຺ໂຘຕາ ຈ ນິທ຺ໂຘຕາ ຈ, ສມ຺ມາສງ຺ກປ຺ເປນ ມິຈ຺ຉາສງ຺ກປ຺ໂປ ຘຸໂຕ ຈ ໂຘໂຕ ຈ ສນ຺ໂຘໂຕ ຈ ນິທ຺ໂຘໂຕ ຈ, ສມ຺ມາວາຈາຍ ມິຈ຺ຉາວາຈາ ຘຸຕາ ຈ… ສມ຺ມາກມ຺ມນ຺ເຕນ ມິຈ຺ຉາກມ຺ມນ຺ໂຕ ຘຸໂຕ ຈ… ສມ຺ມາອາຊີເວນ ມິຈ຺ຉາອາຊີໂວ ຘຸໂຕ ຈ… ສມ຺ມາວາຍາເມນ ມິຈ຺ຉາວາຍາໂມ ຘຸໂຕ ຈ… ສມ຺ມາສຕິຍາ ມິຈ຺ຉາສຕິ ຘຸຕາ ຈ… ສມ຺ມາສມາຘິນາ ມິຈ຺ຉາສມາຘິ ຘຸໂຕ ຈ… ສມ຺ມາຎາເຓນ ມິຈ຺ຉາຎາຓໍ ຘຸຕຎ຺ຈ… ສມ຺ມາວິມຸຕ຺ຕິຍາ ມິຈ຺ຉາວິມຸຕ຺ຕິ ຘຸຕາ ຈ ໂຘຕາ ຈ ສນ຺ໂຘຕາ ຈ ນິທ຺ໂຘຕາ ຈ.

ອຖ ວາ ອຣິເຍນ ອຏ຺ຐງ຺ຄິເກນ ມຄ຺ເຄນ ສພ຺ເພ ກິເລສາ… ສພ຺ເພ ທຸຈ຺ຈຣິຕາ… ສພ຺ເພ ທຣຖາ… ສພ຺ເພ ປຣິຬາຫາ… ສພ຺ເພ ສນ຺ຕາປາ… ສພ຺ພາກຸສລາຠິສງ຺ຂາຣາ ຘຸຕາ ຈ ໂຘຕາ ຈ ສນ຺ໂຘຕາ ຈ ນິທ຺ໂຘຕາ ຈ. ອຣຫາ ອິເມຫິ ໂຘເນຫິ ຘມ຺ເມຫິ ອຸເປໂຕ ສມຸເປໂຕ ອຸປຄໂຕ ສມຸປຄໂຕ ອຸປປນ຺ໂນ ສມຸປປນ຺ໂນ ສມນ຺ນາຄໂຕ. ຕສ຺ມາ ອຣຫາ ໂຘໂນ. ໂສ ຘຸຕຣາໂຄ ຘຸຕປາໂປ ຘຸຕກິເລໂສ ຘຸຕປຣິຬາໂຫຕິ – ໂຘໂນ.

ໂຘໂນ ນ ຫິ ເຕນ ມຎ຺ຎຕິ, ຍທິທໍ ທິຏ຺ຐສຸຕມຸເຕສຸ ວາຕິ. ໂຘໂນ ທິຏ຺ຐໍ ນ ມຎ຺ຎຕິ, ທິຏ຺ຐສ຺ມິໍ ນ ມຎ຺ຎຕິ, ທິຏ຺ຐໂຕ ນ ມຎ຺ຎຕິ, ທິຏ຺ຐາ ເມຕິ ນ ມຎ຺ຎຕິ; ສຸຕໍ ນ ມຎ຺ຎຕິ, ສຸຕສ຺ມິໍ ນ ມຎ຺ຎຕິ, ສຸຕໂຕ ນ ມຎ຺ຎຕິ, ສຸຕໍ ເມຕິ ນ ມຎ຺ຎຕິ; ມຸຕໍ ນ ມຎ຺ຎຕິ, ມຸຕສ຺ມິໍ ນ ມຎ຺ຎຕິ, ມຸຕໂຕ ນ ມຎ຺ຎຕິ, ມຸຕໍ ເມຕິ ນ ມຎ຺ຎຕິ; ວິຎ຺ຎາຕໍ ນ ມຎ຺ຎຕິ, ວິຎ຺ຎາຕສ຺ມິໍ ນ ມຎ຺ຎຕິ, ວິຎ຺ຎາຕໂຕ ນ ມຎ຺ຎຕິ, ວິຎ຺ຎາຕໍ ເມຕິ ນ ມຎ຺ຎຕິ. ວຸຕ຺ຕມ຺ປິ ເຫຕໍ ຠຄວຕາ – ‘‘ອສ຺ມີຕິ, ຠິກ຺ຂເວ, ມຎ຺ຎິຕເມຕໍ, ອຍມຫມສ຺ມີຕິ ມຎ຺ຎິຕເມຕໍ, ຠວິສ຺ສນ຺ຕິ ມຎ຺ຎິຕເມຕໍ, ນ ຠວິສ຺ສນ຺ຕິ ມຎ຺ຎິຕເມຕໍ, ຣູປີ ຠວິສ຺ສນ຺ຕິ ມຎ຺ຎິຕເມຕໍ, ອຣູປີ ຠວິສ຺ສນ຺ຕິ ມຎ຺ຎິຕເມຕໍ, ສຎ຺ຎີ ຠວິສ຺ສນ຺ຕິ ມຎ຺ຎິຕເມຕໍ, ອສຎ຺ຎີ ຠວິສ຺ສນ຺ຕິ ມຎ຺ຎິຕເມຕໍ, ເນວສຎ຺ຎີນາສຎ຺ຎີ ຠວິສ຺ສນ຺ຕິ ມຎ຺ຎິຕເມຕໍ. ມຎ຺ຎິຕໍ [ມຎ຺ຎິຕໍ ຫິ (ສີ.)], ຠິກ຺ຂເວ, ໂຣໂຄ, ມຎ຺ຎິຕໍ ຄຓ຺ໂຑ, ມຎ຺ຎິຕໍ ສລ຺ລໍ, ມຎ຺ຎິຕໍ ອຸປທ຺ທໂວ. ຕສ຺ມາຕິຫ, ຠິກ຺ຂເວ, ອມຎ຺ຎມາເນນ ເຈຕສາ ວິຫຣິສ຺ສາມາຕິ, ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ – ໂຘໂນ ນ ຫິ ເຕນ ມຎ຺ຎຕິ ຍທິທໍ ທິຏ຺ຐສຸຕມຸເຕສຸ ວາ.

ນາຎ຺ເຎນ ວິສຸທ຺ຘິມິຈ຺ຉຕີຕິ. ໂຘໂນ ອຎ຺ເຎນ ອສຸທ຺ຘິມຄ຺ເຄນ ມິຈ຺ຉາປຏິປທາຍ ອນິຍ຺ຍານິກປເຖນ ອຎ຺ຎຕ຺ຣ ສຕິປຏ຺ຐາເນຫິ ອຎ຺ຎຕ຺ຣ ສມ຺ມປ຺ປຘາເນຫິ ອຎ຺ຎຕ຺ຣ ອິທ຺ຘິປາເທຫິ ອຎ຺ຎຕ຺ຣ ອິນ຺ທ຺ຣິເຍຫິ ອຎ຺ຎຕ຺ຣ ພເລຫິ ອຎ຺ຎຕ຺ຣ ໂພຊ຺ຌງ຺ເຄຫິ ອຎ຺ຎຕ຺ຣ ອຣິຍາ ອຏ຺ຐງ຺ຄິກາ ມຄ຺ຄາ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ນ ອິຈ຺ຉຕິ ນ ສາທິຍຕິ ນ ປຕ຺ເຖຕິ ນ ປິເຫຕິ ນາຠິຊປ຺ປຕີຕິ – ນາຎ຺ເຎນ ວິສຸທ຺ຘິມິຈ຺ຉຕິ.

ນ ຫິ ໂສ ຣຊ຺ຊຕິ ໂນ ວິຣຊ຺ຊຕີຕິ. ສພ຺ເພ ພາລປຸຖຸຊ຺ຊນາ ຣຊ຺ຊນ຺ຕິ, ປຸຖຸຊ຺ຊນກລ຺ຍາຓກໍ ອຸປາທາຍ ສຕ຺ຕ ເສກ຺ຂາ ວິຣຊ຺ຊນ຺ຕິ; ອຣຫາ ເນວ ຣຊ຺ຊຕິ ໂນ ວິຣຊ຺ຊຕິ. ວິຣຕ຺ໂຕ ໂສ ຂຍາ ຣາຄສ຺ສ ວີຕຣາຄຕ຺ຕາ, ຂຍາ ໂທສສ຺ສ ວີຕໂທສຕ຺ຕາ, ຂຍາ ໂມຫສ຺ສ ວີຕໂມຫຕ຺ຕາ. ໂສ ວຸຏ຺ຐວາໂສ ຈິຓ຺ຓຈຣໂຓ…ເປ… ຊາຕິຊຣາມຣຓສໍສາໂຣ, ນຕ຺ຖິ ຕສ຺ສ ປຸນພ຺ຠໂວຕິ – ນ ຫິ ໂສ ຣຊ຺ຊຕິ ໂນ ວິຣຊ຺ຊຕິ.

ເຕນາຫ ຠຄວາ –

‘‘ໂຘໂນ ນ ຫິ ເຕນ ມຎ຺ຎຕິ, ຍທິທໍ ທິຏ຺ຐສຸຕມຸເຕສຸ ວາ;

ນາຎ຺ເຎນ ວິສຸທ຺ຘິມິຈ຺ຉຕິ, ນ ຫິ ໂສ ຣຊ຺ຊຕິ ໂນ ວິຣຊ຺ຊຕີ’’ຕິ.

ຊຣາສຸຕ຺ຕນິທ຺ເທໂສ ຉຏ຺ໂຐ.