໔. ສຸທ຺ຘຏ຺ຐກສຸຕ຺ຕນິທ຺ເທໂສ

ອຖ ສຸທ຺ຘຏ຺ຐກສຸຕ຺ຕນິທ຺ເທສໍ ວກ຺ຂຕິ –

໒໓. ປສ຺ສາມິ ສຸທ຺ຘໍ ປຣມໍ ອໂຣຄໍ,ທິຏ຺ເຐນ ສໍສຸທ຺ຘິ ນຣສ຺ສ ໂຫຕິ;

ເອວາຠິຊານໍ ປຣມນ຺ຕິ ຎຕ຺ວາ, ສຸທ຺ຘານຸປສ຺ສີຕິ ປຈ຺ເຈຕິ ຎາຓໍ.

ປສ຺ສາມິ ສຸທ຺ຘໍ ປຣມໍ ອໂຣຄນ຺ຕິ. ປສ຺ສາມິ ສຸທ຺ຘນ຺ຕິ ປສ຺ສາມິ ສຸທ຺ຘໍ, ທກ຺ຂາມິ ສຸທ຺ຘໍ, ໂອໂລເກມິ ສຸທ຺ຘໍ, ນິຊ຺ຌາຍາມິ ສຸທ຺ຘໍ, ອຸປປຣິກ຺ຂາມິ ສຸທ຺ຘໍ. ປຣມໍ ອໂຣຄນ຺ຕິ ປຣມໍ ອາໂຣຄ຺ຍປ຺ປຕ຺ຕໍ ຕາຓປ຺ປຕ຺ຕໍ ເລຓປ຺ປຕ຺ຕໍ ສຣຓປ຺ປຕ຺ຕໍ ອຠຍປ຺ປຕ຺ຕໍ ອຈ຺ຈຸຕປ຺ປຕ຺ຕໍ ອມຕປ຺ປຕ຺ຕໍ ນິພ຺ພານປ຺ປຕ຺ຕນ຺ຕິ – ປສ຺ສາມິ ສຸທ຺ຘໍ ປຣມໍ ອໂຣຄໍ.

ທິຏ຺ເຐນ ສໍສຸທ຺ຘິ ນຣສ຺ສ ໂຫຕີຕິ. ຈກ຺ຂຸວິຎ຺ຎາຓໍ [ຈກ຺ຂຸວິຎ຺ຎາເຓນ (ສີ. ສ຺ຍາ.)] ຣູປທສ຺ສເນນ ນຣສ຺ສ ສຸທ຺ຘິ ວິສຸທ຺ຘິ ປຣິສຸທ຺ຘິ, ມຸຕ຺ຕິ ວິມຸຕ຺ຕິ ປຣິມຸຕ຺ຕິ ໂຫຕິ, ນໂຣ ສຸຊ຺ຌຕິ ວິສຸຊ຺ຌຕິ ປຣິສຸຊ຺ຌຕິ, ມຸຈ຺ຈຕິ ວິມຸຈ຺ຈຕິ ປຣິມຸຈ຺ຈຕີຕິ – ທິຏ຺ເຐນ ສໍສຸທ຺ຘິ ນຣສ຺ສ ໂຫຕິ.

ເອວາຠິຊານໍ ປຣມນ຺ຕິ ຎຕ຺ວາຕິ. ເອວໍ ອຠິຊານນ຺ໂຕ ອາຊານນ຺ໂຕ ວິຊານນ຺ໂຕ ປຏິວິຊານນ຺ໂຕ ປຏິວິຊ຺ຌນ຺ໂຕ. ‘‘ອິທໍ ປຣມໍ ອຄ຺ຄໍ ເສຏ຺ຐໍ ວິສິຏ຺ຐໍ ປາໂມກ຺ຂໍ ອຸຕ຺ຕມໍ ປວຣ’’ນ຺ຕິ ຎຕ຺ວາ ຊານິຕ຺ວາ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາຕິ – ເອວາຠິຊານໍ ປຣມນ຺ຕິ ຎຕ຺ວາ.

ສຸທ຺ຘານຸປສ຺ສີຕິ ປຈ຺ເຈຕິ ຎາຓນ຺ຕິ. ໂຍ ສຸທ຺ຘໍ ປສ຺ສຕິ, ໂສ ສຸທ຺ຘານຸປສ຺ສີ, ປຈ຺ເຈຕິຎາຓນ຺ຕິ ຈກ຺ຂຸວິຎ຺ຎາຓໍ ຣູປທສ຺ສເນນ ຎາຓນ຺ຕິ ປຈ຺ເຈຕິ, ມຄ຺ໂຄຕິ ປຈ຺ເຈຕິ, ປໂຖຕິ ປຈ຺ເຈຕິ, ນິຍ຺ຍານນ຺ຕິ ປຈ຺ເຈຕີຕິ – ສຸທ຺ຘານຸປສ຺ສີ ປຈ຺ເຈຕິ ຎາຓໍ.

ເຕນາຫ ຠຄວາ –

‘‘ປສ຺ສາມິ ສຸທ຺ຘໍ ປຣມໍ ອໂຣຄໍ, ທິຏ຺ເຐນ ສໍສຸທ຺ຘິ ນຣສ຺ສ ໂຫຕິ;

ເອວາຠິຊານໍ ປຣມນ຺ຕິ ຎຕ຺ວາ, ສຸທ຺ຘານຸປສ຺ສີຕິ ປຈ຺ເຈຕິ ຎາຓ’’ນ຺ຕິ.

໒໔. ທິຏ຺ເຐນ ເຈ ສຸທ຺ຘິ ນຣສ຺ສ ໂຫຕິ,ຎາເຓນ ວາ ໂສ ປຊຫາຕິ ທຸກ຺ຂໍ;

ອຎ຺ເຎນ ໂສ ສຸຊ຺ຌຕິ ໂສປຘີໂກ, ທິຏ຺ຐີ ຫິ ນໍ ປາວ ຕຖາ ວທານໍ.

ທິຏ຺ເຐນ ເຈ ສຸທ຺ຘິ ນຣສ຺ສ ໂຫຕີຕິ. ຈກ຺ຂຸວິຎ຺ຎາຓໍ ຣູປທສ຺ສເນນ ເຈ ນຣສ຺ສ ສຸທ຺ຘິ ວິສຸທ຺ຘິ ປຣິສຸທ຺ຘິ, ມຸຕ຺ຕິ ວິມຸຕ຺ຕິ ປຣິມຸຕ຺ຕິ ໂຫຕິ, ນໂຣ ສຸຊ຺ຌຕິ ວິສຸຊ຺ຌຕິ ປຣິສຸຊ຺ຌຕິ, ມຸຈ຺ຈຕິ ວິມຸຈ຺ຈຕິ ປຣິມຸຈ຺ຈຕີຕິ – ທິຏ຺ເຐນ ເຈ ສຸທ຺ຘິ ນຣສ຺ສ ໂຫຕິ.

ຎາເຓນ ວາ ໂສ ປຊຫາຕິ ທຸກ຺ຂນ຺ຕິ ຈກ຺ຂຸວິຎ຺ຎາຓໍ ຣູປທສ຺ສເນນ ເຈ ນໂຣ ຊາຕິທຸກ຺ຂໍ ປຊຫຕິ, ຊຣາທຸກ຺ຂໍ ປຊຫຕິ, ພ຺ຍາຘິທຸກ຺ຂໍ ປຊຫຕິ, ມຣຓທຸກ຺ຂໍ ປຊຫຕິ, ໂສກປຣິເທວທຸກ຺ຂໂທມນສ຺ສຸປາຍາສທຸກ຺ຂໍ ປຊຫຕີຕິ – ຎາເຓນ ວາ ໂສ ປຊຫາຕິ ທຸກ຺ຂໍ.

ອຎ຺ເຎນ ໂສ ສຸຊ຺ຌຕິ ໂສປຘີໂກຕິ. ອຎ຺ເຎນ ອສຸທ຺ຘິມຄ຺ເຄນ ມິຈ຺ຉາປຏິປທາຍ ອນິຍ຺ຍານິກປເຖນ ອຎ຺ຎຕ຺ຣ ສຕິປຏ຺ຐາເນຫິ ອຎ຺ຎຕ຺ຣ ສມ຺ມປ຺ປຘາເນຫິ ອຎ຺ຎຕ຺ຣ ອິທ຺ຘິປາເທຫິ ອຎ຺ຎຕ຺ຣ ອິນ຺ທ຺ຣິເຍຫິ ອຎ຺ຎຕ຺ຣ ພເລຫິ ອຎ຺ຎຕ຺ຣ ໂພຊ຺ຌງ຺ເຄຫິ ອຎ຺ຎຕ຺ຣ ອຣິຍາ ອຏ຺ຐງ຺ຄິກາ ມຄ຺ຄາ ນໂຣ ສຸຊ຺ຌຕິ ວິສຸຊ຺ຌຕິ ປຣິສຸຊ຺ຌຕິ, ມຸຈ຺ຈຕິ ວິມຸຈ຺ຈຕິ ປຣິມຸຈ຺ຈຕິ. ໂສປຘີໂກຕິ ສຣາໂຄ ສໂທໂສ ສໂມໂຫ ສມາໂນ ສຕຓ຺ໂຫ ສທິຏ຺ຐິ ສກິເລໂສ ສອຸປາທາໂນຕິ – ອຎ຺ເຎນ ໂສ ສຸຊ຺ຌຕິ ໂສປຘີໂກ.

ທິຏ຺ຐີ ຫິ ນໍ ປາວ ຕຖາ ວທານນ຺ຕິ. ສາວ ທິຏ຺ຐິ ຕໍ ປຸຄ຺ຄລໍ ປາວທຕິ – ອິຕິ ວາຍໍ ປຸຄ຺ຄໂລ ມິຈ຺ຉາທິຏ຺ຐິໂກ ວິປຣີຕທສ຺ສໂນ. ຕຖາ ວທານນ຺ຕິ ຕຖາ ວທນ຺ຕໍ ກເຖນ຺ຕໍ ຠຓນ຺ຕໍ ທີປຍນ຺ຕໍ ໂວຫຣນ຺ຕໍ. ‘‘ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ຕຖາ ວທນ຺ຕໍ ກເຖນ຺ຕໍ ຠຓນ຺ຕໍ ທີປຍນ຺ຕໍ ໂວຫຣນ຺ຕໍ. ‘‘ອສສ຺ສໂຕ ໂລໂກ…ເປ… ອນ຺ຕວາ ໂລໂກ… ອນນ຺ຕວາ ໂລໂກ… ຕໍ ຊີວໍ ຕໍ ສຣີຣໍ… ອຎ຺ຎໍ ຊີວໍ ອຎ຺ຎໍ ສຣີຣໍ… ໂຫຕິ ຕຖາຄໂຕ ປຣໍ ມຣຓາ… ນ ໂຫຕິ ຕຖາຄໂຕ ປຣໍ ມຣຓາ… ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ຕຖາ ວທນ຺ຕໍ ກເຖນ຺ຕໍ ຠຓນ຺ຕໍ ທີປຍນ຺ຕໍ ໂວຫຣນ຺ຕນ຺ຕິ – ທິຏ຺ຐີ ຫິ ນໍ ປາວ ຕຖາ ວທານໍ.

ເຕນາຫ ຠຄວາ –

‘‘ທິຏ຺ເຐນ ເຈ ສຸທ຺ຘິ ນຣສ຺ສ ໂຫຕິ, ຎາເຓນ ວາ ໂສ ປຊຫາຕິ ທຸກ຺ຂໍ;

ອຎ຺ເຎນ ໂສ ສຸຊ຺ຌຕິ ໂສປຘີໂກ, ທິຏ຺ຐີ ຫິ ນໍ ປາວ ຕຖາ ວທານ’’ນ຺ຕິ.

໒໕. ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫ,ທິຏ຺ເຐ ສຸເຕ ສີລວເຕ ມຸເຕ ວາ;

ປຸຎ຺ເຎ ຈ ປາເປ ຈ ອນູປລິຕ຺ໂຕ, ອຕ຺ຕຎ຺ຊໂຫ ນຍິຘ ປກຸພ຺ພມາໂນ.

ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫ ທິຏ຺ເຐ ສຸເຕ ສີລວເຕ ມຸເຕ ວາຕິ. ນາຕິ ປຏິກ຺ເຂໂປ. ພ຺ຣາຫ຺ມໂຓຕິ ສຕ຺ຕນ຺ນໍ ຘມ຺ມານໍ ພາຫິຕຕ຺ຕາ ພ຺ຣາຫ຺ມໂຓ – ສກ຺ກາຍທິຏ຺ຐິ ພາຫິຕາ ໂຫຕິ, ວິຈິກິຈ຺ຉາ ພາຫິຕາ ໂຫຕິ, ສີລພ຺ພຕປຣາມາໂສ ພາຫິໂຕ ໂຫຕິ, ຣາໂຄ ພາຫິໂຕ ໂຫຕິ, ໂທໂສ ພາຫິໂຕ ໂຫຕິ, ໂມໂຫ ພາຫິໂຕ ໂຫຕິ, ມາໂນ ພາຫິໂຕ ໂຫຕິ. ພາຫິຕາສ຺ສ ໂຫນ຺ຕິ ປາປກາ ອກຸສລາ ຘມ຺ມາ ສໍກິເລສິກາ ໂປໂນຠວິກາ ສທຣາ ທຸກ຺ຂວິປາກາ ອາຍຕິໍ ຊາຕິຊຣາມຣຓິຍາ.

ພາຫິຕ຺ວາ ສພ຺ພປາປການິ, [ສຠິຍາຕິ ຠຄວາ]

ວິມໂລ ສາຘຸສມາຫິໂຕ ຐິຕຕ຺ໂຕ;

ສໍສາຣມຕິຈ຺ຈ ເກວລີ ໂສ, ອສິໂຕ [ອນິສ຺ສິໂຕ (ສ຺ຍາ.)] ຕາທິ ປວຸຈ຺ຈເຕ ສ ພ຺ຣຫ຺ມາ.

ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫາຕິ. ພ຺ຣາຫ຺ມໂຓ ອຎ຺ເຎນ ອສຸທ຺ຘິມຄ຺ເຄນ ມິຈ຺ຉາປຏິປທາຍ ອນິຍ຺ຍານິກປເຖນ ອຎ຺ຎຕ຺ຣ ສຕິປຏ຺ຐາເນຫິ ອຎ຺ຎຕ຺ຣ ສມ຺ມປ຺ປຘາເນຫິ ອຎ຺ຎຕ຺ຣ ອິທ຺ຘິປາເທຫິ ອຎ຺ຎຕ຺ຣ ອິນ຺ທ຺ຣິເຍຫິ ອຎ຺ຎຕ຺ຣ ພເລຫິ ອຎ຺ຎຕ຺ຣ ໂພຊ຺ຌງ຺ເຄຫິ ອຎ຺ຎຕ຺ຣ ອຣິເຍນ ອຏ຺ຐງ຺ຄິເກນ ມຄ຺ເຄນ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ, ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ, ນາຫ ນ ກເຖຕິ ນ ຠຓຕິ ນ ທີປຍຕິ ນ ໂວຫຣຕີຕິ – ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫ.

ທິຏ຺ເຐ ສຸເຕ ສີລວເຕ ມຸເຕ ວາຕິ. ສນ຺ເຕເກ ສມຓພ຺ຣາຫ຺ມຓາ ທິຏ຺ຐິສຸທ຺ຘິກາ. ເຕ ເອກຈ຺ຈານໍ ຣູປານໍ ທສ຺ສນໍ ມງ຺ຄລໍ ປຈ຺ເຈນ຺ຕິ, ເອກຈ຺ຈານໍ ຣູປານໍ ທສ຺ສນໍ ອມງ຺ຄລໍ ປຈ຺ເຈນ຺ຕິ. ກຕເມສໍ ຣູປານໍ ທສ຺ສນໍ ມງ຺ຄລໍ ປຈ຺ເຈນ຺ຕິ? ເຕ ກາລໂຕ ວຸຏ຺ຐຫິຕ຺ວາ ອຠິມງ຺ຄລຄຕານິ ຣູປານິ ປສ຺ສນ຺ຕິ – ຈາຏກສກຸຓໍ [ວາຕສກຸຓໍ (ສ຺ຍາ.), ຈາປສກຸຓໍ (ກ.)] ປສ຺ສນ຺ຕິ, ຜຸສ຺ສເວຬຸວລຏ຺ຐິໍ ປສ຺ສນ຺ຕິ, ຄພ຺ຠິນິຕ຺ຖິໍ ປສ຺ສນ຺ຕິ, ກຸມາຣກໍ ຂນ຺ເຘ ອາໂຣເປຕ຺ວາ ຄຈ຺ຉນ຺ຕໍ ປສ຺ສນ຺ຕິ, ປຸຓ຺ຓຆຏໍ ປສ຺ສນ຺ຕິ, ໂຣຫິຕມຈ຺ຉໍ ປສ຺ສນ຺ຕິ, ອາຊຎ຺ຎໍ ປສ຺ສນ຺ຕິ, ອາຊຎ຺ຎຣຖໍ ປສ຺ສນ຺ຕິ, ອຸສຠໍ ປສ຺ສນ຺ຕິ, ໂຄກປິລໍ ປສ຺ສນ຺ຕິ. ເອວຣູປານໍ ຣູປານໍ ທສ຺ສນໍ ມງ຺ຄລໍ ປຈ຺ເຈນ຺ຕິ. ກຕເມສໍ ຣູປານໍ ທສ຺ສນໍ ອມງ຺ຄລໍ ປຈ຺ເຈນ຺ຕິ? ປລາລປຸຎ຺ຊໍ ປສ຺ສນ຺ຕິ, ຕກ຺ກຆຏໍ ປສ຺ສນ຺ຕິ, ຣິຕ຺ຕຆຏໍ ປສ຺ສນ຺ຕິ, ນຏໍ ປສ຺ສນ຺ຕິ, ນຄ຺ຄສມຓກໍ ປສ຺ສນ຺ຕິ, ຂຣໍ ປສ຺ສນ຺ຕິ, ຂຣຍານໍ ປສ຺ສນ຺ຕິ, ເອກຍຸຕ຺ຕຍານໍ ປສ຺ສນ຺ຕິ, ກາຓໍ ປສ຺ສນ຺ຕິ, ກຸຓິໍ ປສ຺ສນ຺ຕິ, ຂຎ຺ຊໍ ປສ຺ສນ຺ຕິ, ປກ຺ຂຫຕໍ [ປກ຺ຂປາທໍ (ກ.)] ປສ຺ສນ຺ຕິ, ຊິຓ຺ຓກໍ ປສ຺ສນ຺ຕິ, ພ຺ຍາຘິກໍ [ພ຺ຍາຘິຕໍ (ສີ.)] ປສ຺ສນ຺ຕິ. ເອວຣູປານໍ ຣູປານໍ ທສ຺ສນໍ ອມງ຺ຄລໍ ປຈ຺ເຈນ຺ຕິ. ອິເມ ເຕ ສມຓພ຺ຣາຫ຺ມຓາ ທິຏ຺ຐິສຸທ຺ຘິກາ. ເຕ ທິຏ຺ເຐນ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ປຈ຺ເຈນ຺ຕິ.

ສນ຺ເຕເກ ສມຓພ຺ຣາຫ຺ມຓາ ສຸຕສຸທ຺ຘິກາ. ເຕ ເອກຈ຺ຈານໍ ສທ຺ທານໍ ສວນໍ ມງ຺ຄລໍ ປຈ຺ເຈນ຺ຕິ, ເອກຈ຺ຈານໍ ສທ຺ທານໍ ສວນໍ ອມງ຺ຄລໍ ປຈ຺ເຈນ຺ຕິ. ກຕເມສໍ ສທ຺ທານໍ ສວນໍ ມງ຺ຄລໍ ປຈ຺ເຈນ຺ຕິ? ເຕ ກາລໂຕ ວຸຏ຺ຐຫິຕ຺ວາ ອຠິມງ຺ຄລຄຕານິ ສທ຺ທານິ ສຸຓນ຺ຕິ – ວຑ຺ຒາຕິ ວາ ວຑ຺ຒມານາຕິ ວາ ປຸຓ຺ຓາຕິ ວາ ຜຸສ຺ສາຕິ ວາ ອໂສກາຕິ ວາ ສຸມນາຕິ ວາ ສຸນກ຺ຂຕ຺ຕາຕິ ວາ ສຸມງ຺ຄລາຕິ ວາ ສິຣີຕິ ວາ ສິຣີວຑ຺ຒາຕິ ວາ. ເອວຣູປານໍ ສທ຺ທານໍ ສວນໍ ມງ຺ຄລໍ ປຈ຺ເຈນ຺ຕິ. ກຕເມສໍ ສທ຺ທານໍ ສວນໍ ອມງ຺ຄລໍ ປຈ຺ເຈນ຺ຕິ? ກາໂຓຕິ ວາ ກຸຓີຕິ ວາ ຂຎ຺ໂຊຕິ ວາ ປກ຺ຂຫໂຕຕິ ວາ ຊິຓ຺ຓໂກຕິ ວາ ພ຺ຍາຘິໂກຕິ ວາ ມໂຕຕິ ວາ ຉິນ຺ທນ຺ຕິ ວາ ຠິນ຺ທນ຺ຕິ ວາ ທຑ຺ຒນ຺ຕິ ວາ ນຏ຺ຐນ຺ຕິ ວາ ນຕ຺ຖີຕິ ວາ. ເອວຣູປານໍ ສທ຺ທານໍ ສວນໍ ອມງ຺ຄລໍ ປຈ຺ເຈນ຺ຕິ. ອິເມ ເຕ ສມຓພ຺ຣາຫ຺ມຓາ ສຸຕສຸທ຺ຘິກາ. ເຕ ສຸເຕນ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ປຈ຺ເຈນ຺ຕິ.

ສນ຺ເຕເກ ສມຓພ຺ຣາຫ຺ມຓາ ສີລສຸທ຺ຘິກາ. ເຕ ສີລມຕ຺ເຕນ ສໍຍມມຕ຺ເຕນ ສໍວຣມຕ຺ເຕນ ອວີຕິກ຺ກມມຕ຺ເຕນ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ປຈ຺ເຈນ຺ຕິ. ສມໂຓມຸຓ຺ຑິກາປຸຕ຺ໂຕ [ສມໂຓ ມຓ຺ຑິກາປຸຕ຺ໂຕ (ສີ.), ສມຓມຸຓ຺ຑິກາປຸຕ຺ໂຕ (ສ຺ຍາ.)] ເອວມາຫ – ‘‘ຈຕູຫິ ໂຂ ອຫໍ, ຄຫປຕິ [ຖປຕິ (ສີ. ສ຺ຍາ.) ເອວມຸປຣິປິ], ຘມ຺ເມຫິ ສມນ຺ນາຄຕໍ ປຸຣິສປຸຄ຺ຄລໍ ປຎ຺ຎາເປມິ ສມ຺ປນ຺ນກຸສລໍ ປຣມກຸສລໍ ອຸຕ຺ຕມປຕ຺ຕິປ຺ປຕ຺ຕໍ ສມຓໍ ອໂຍຊ຺ຊໍ. ກຕເມຫິ ຈຕູຫິ? ອິຘ, ຄຫປຕິ, ນ ກາເຍນ ປາປກໍ ກມ຺ມໍ ກໂຣຕິ, ນ ປາປກໍ ວາຈໍ ຠາສຕິ, ນ ປາປກໍ ສງ຺ກປ຺ປໍ ສງ຺ກປ຺ປຕິ, ນ ປາປກໍ ອາຊີວໍ ອາຊີວຕິ. ອິເມຫິ ໂຂ ອຫໍ, ຄຫປຕິ, ຈຕູຫິ ຘມ຺ເມຫິ ສມນ຺ນາຄຕໍ ປຸຣິສປຸຄ຺ຄລໍ ປຎ຺ຎາເປມິ ສມ຺ປນ຺ນກຸສລໍ ປຣມກຸສລໍ ອຸຕ຺ຕມປຕ຺ຕິປ຺ປຕ຺ຕໍ ສມຓໍ ອໂຍຊ຺ຊໍ’’. ເອວເມວ ສນ຺ເຕເກ ສມຓພ຺ຣາຫ຺ມຓາ ສີລສຸທ຺ຘິກາ, ເຕ ສີລມຕ຺ເຕນ ສໍຍມມຕ຺ເຕນ ສໍວຣມຕ຺ເຕນ ອວີຕິກ຺ກມມຕ຺ເຕນ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ປຈ຺ເຈນ຺ຕິ.

ສນ຺ເຕເກ ສມຓພ຺ຣາຫ຺ມຓາ ວຕສຸທ຺ຘິກາ. ເຕ ຫຕ຺ຖິວຕິກາ ວາ ໂຫນ຺ຕິ, ອສ຺ສວຕິກາ ວາ ໂຫນ຺ຕິ, ໂຄວຕິກາ ວາ ໂຫນ຺ຕິ, ກຸກ຺ກຸຣວຕິກາ ວາ ໂຫນ຺ຕິ, ກາກວຕິກາ ວາ ໂຫນ຺ຕິ, ວາສຸເທວວຕິກາ ວາ ໂຫນ຺ຕິ, ພລເທວວຕິກາ ວາ ໂຫນ຺ຕິ, ປຸຓ຺ຓຠທ຺ທວຕິກາ ວາ ໂຫນ຺ຕິ, ມຓິຠທ຺ທວຕິກາ ວາ ໂຫນ຺ຕິ, ອຄ຺ຄິວຕິກາ ວາ ໂຫນ຺ຕິ, ນາຄວຕິກາ ວາ ໂຫນ຺ຕິ, ສຸປຓ຺ຓວຕິກາ ວາ ໂຫນ຺ຕິ, ຍກ຺ຂວຕິກາ ວາ ໂຫນ຺ຕິ, ອສຸຣວຕິກາ ວາ ໂຫນ຺ຕິ, ຄນ຺ຘພ຺ພວຕິກາ ວາ ໂຫນ຺ຕິ, ມຫາຣາຊວຕິກາ ວາ ໂຫນ຺ຕິ, ຈນ຺ທວຕິກາ ວາ ໂຫນ຺ຕິ, ສູຣິຍວຕິກາ ວາ ໂຫນ຺ຕິ, ອິນ຺ທວຕິກາ ວາ ໂຫນ຺ຕິ, ພ຺ຣຫ຺ມວຕິກາ ວາ ໂຫນ຺ຕິ, ເທວວຕິກາ ວາ ໂຫນ຺ຕິ, ທິສາວຕິກາ ວາ ໂຫນ຺ຕິ. ອິເມ ເຕ ສມຓພ຺ຣາຫ຺ມຓາ ວຕສຸທ຺ຘິກາ. ເຕ ວເຕນ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ປຈ຺ເຈນ຺ຕິ.

ສນ຺ເຕເກ ສມຓພ຺ຣາຫ຺ມຓາ ມຸຕສຸທ຺ຘິກາ. ເຕ ກາລໂຕ ອຸຏ຺ຐຫິຕ຺ວາ ປຖວິໍ ອາມສນ຺ຕິ, ຫຣິຕໍ ອາມສນ຺ຕິ, ໂຄມຍໍ ອາມສນ຺ຕິ, ກຈ຺ຉປໍ ອາມສນ຺ຕິ, ຜາລໍ ອກ຺ກມນ຺ຕິ, ຕິລວາຫໍ ອາມສນ຺ຕິ, ຜຸສ຺ສຕິລໍ ຂາທນ຺ຕິ, ຜຸສ຺ສເຕລໍ ມກ຺ເຂນ຺ຕິ, ຜຸສ຺ສທນ຺ຕກຏ຺ຐໍ ຂາທນ຺ຕິ, ຜຸສ຺ສມຕ຺ຕິກາຍ ນ຺ຫາຍນ຺ຕິ, ຜຸສ຺ສສາຏກໍ ນິວາເສນ຺ຕິ, ຜຸສ຺ສເວຐນໍ ເວເຐນ຺ຕິ. ອິເມ ເຕ ສມຓພ຺ຣາຫ຺ມຓາ ມຸຕສຸທ຺ຘິກາ. ເຕ ມຸເຕນ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ປຈ຺ເຈນ຺ຕິ. ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫ.

ທິຏ຺ເຐ ສຸເຕ ສີລວເຕ ມຸເຕ ວາຕິ. ພ຺ຣາຫ຺ມໂຓ ທິຏ຺ຐສຸທ຺ຘິຍາປິ ສຸທ຺ຘິໍ ນາຫ, ສຸຕສຸທ຺ຘິຍາປິ ສຸທ຺ຘິໍ ນາຫ, ສີລສຸທ຺ຘິຍາປິ ສຸທ຺ຘິໍ ນາຫ, ວຕສຸທ຺ຘິຍາປິ ສຸທ຺ຘິໍ ນາຫ, ມຸຕສຸທ຺ຘິຍາປິ ສຸທ຺ຘິໍ ນາຫ ນ ກເຖຕິ ນ ຠຓຕິ ນ ທີປຍຕິ ນ ໂວຫຣຕີຕິ – ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫ ທິຏ຺ເຐ ສຸເຕ ສີລວເຕ ມຸເຕ ວາ.

ປຸຎ຺ເຎ ຈ ປາເປ ຈ ອນູປລິຕ຺ໂຕຕິ. ປຸຎ຺ຎໍ ວຸຈ຺ຈຕິ ຍໍ ກິຎ຺ຈິ ເຕຘາຕຸກໍ ກຸສລາຠິສງ຺ຂາຣໍ, ອປຸຎ຺ຎໍ ວຸຈ຺ຈຕິ ສພ຺ພໍ ອກຸສລໍ. ຍໂຕ ປຸຎ຺ຎາຠິສງ຺ຂາໂຣ ຈ ອປຸຎ຺ຎາຠິສງ຺ຂາໂຣ ຈ ອາເນຎ຺ຊາຠິສງ຺ຂາໂຣ ຈ ປຫີນາ ໂຫນ຺ຕິ ອຸຈ຺ຉິນ຺ນມູລາ ຕາລາວຕ຺ຖຸກຕາ ອນຠາວໍກຕາ ອາຍຕິໍ ອນຸປ຺ປາທຘມ຺ມາ; ເອຕ຺ຕາວຕາ ປຸຎ຺ເຎ ຈ ປາເປ ຈ ນ ລິມ຺ປຕິ ນ ປລິມ຺ປຕິ ນ ອຸປລິມ຺ປຕິ ອລິຕ຺ໂຕ ອປລິຕ຺ໂຕ ອນູປລິຕ຺ໂຕ ນິກ຺ຂນ຺ໂຕ ນິສ຺ສໂຏ ວິປ຺ປມຸຕ຺ໂຕ ວິສຎ຺ຎຸຕ຺ໂຕ ວິມຣິຍາທິກເຕນ ເຈຕສາ ວິຫຣຕີຕິ – ປຸຎ຺ເຎ ຈ ປາເປ ຈ ອນູປລິຕ຺ໂຕ.

ອຕ຺ຕຎ຺ຊໂຫ ນຍິຘ ປກຸພ຺ພມາໂນຕິ. ອຕ຺ຕຎ຺ຊໂຫຕິ ອຕ຺ຕທິຏ຺ຐິຊໂຫ. ອຕ຺ຕຎ຺ຊໂຫຕິ ຄາຫໍ ຊໂຫ [ຄາຫຊໂຫ (ສີ. ສ຺ຍາ.), ອຕ຺ຕຄາຫໍ ຊໂຫ (ກ.)]. ອຕ຺ຕຎ຺ຊໂຫຕິ ຕຓ຺ຫາວເສນ ທິຏ຺ຐິວເສນ ຄຫິຕໍ ປຣາມຏ຺ຐໍ ອຠິນິວິຏ຺ຐໍ ອຊ຺ໂຌສິຕໍ ອຘິມຸຕ຺ຕໍ, ສພ຺ພໍ ຕໍ ຈຕ຺ຕໍ ໂຫຕິ ວນ຺ຕໍ ມຸຕ຺ຕໍ ປຫີນໍ ປຏິນິສ຺ສຏ຺ຐໍ. ນຍິຘ ປກຸພ຺ພມາໂນຕິ ປຸຎ຺ຎາຠິສງ຺ຂາຣໍ ວາ ອປຸຎ຺ຎາຠິສງ຺ຂາຣໍ ວາ ອາເນຎ຺ຊາຠິສງ຺ຂາຣໍ ວາ ອປກຸພ຺ພມາໂນ ອຊນຍມາໂນ ອສຎ຺ຊນຍມາໂນ ອນິພ຺ພຕ຺ຕຍມາໂນ ອນຠິນິພ຺ພຕ຺ຕຍມາໂນຕິ – ອຕ຺ຕຎ຺ຊໂຫ ນຍິຘ ປກຸພ຺ພມາໂນ.

ເຕນາຫ ຠຄວາ –

‘‘ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫ, ທິຏ຺ເຐ ສຸເຕ ສີລວເຕ ມຸເຕ ວາ;

ປຸຎ຺ເຎ ຈ ປາເປ ຈ ອນູປລິຕ຺ໂຕ, ອຕ຺ຕຎ຺ຊໂຫ ນຍິຘ ປກຸພ຺ພມາໂນ’’ຕິ.

໒໖. ປຸຣິມໍ ປຫາຍ ອປຣໍ ສິຕາເສ,ເອຊານຸຄາ ເຕ ນ ຕຣນ຺ຕິ ສງ຺ຄໍ;

ເຕ ອຸຄ຺ຄຫາຍນ຺ຕິ ນິຣສ຺ສຊນ຺ຕິ, ກປີວ ສາຂໍ ປມຸຎ຺ຈໍ [ປມຸຂໍ (ສີ. ສ຺ຍາ.)] ຄຫາຍ.

ປຸຣິມໍ ປຫາຍ ອປຣໍ ສິຕາເສຕິ. ປຸຣິມໍ ສຕ຺ຖາຣໍ ປຫາຍ ປຣໍ ສຕ຺ຖາຣໍ ນິສ຺ສິຕາ; ປຸຣິມໍ ຘມ຺ມກ຺ຂານໍ ປຫາຍ ອປຣໍ ຘມ຺ມກ຺ຂານໍ ນິສ຺ສິຕາ; ປຸຣິມໍ ຄຓໍ ປຫາຍ ອປຣໍ ຄຓໍ ນິສ຺ສິຕາ; ປຸຣິມໍ ທິຏ຺ຐິໍ ປຫາຍ ອປຣໍ ທິຏ຺ຐິໍ ນິສ຺ສິຕາ; ປຸຣິມໍ ປຏິປທໍ ປຫາຍ ອປຣໍ ປຏິປທໍ ນິສ຺ສິຕາ; ປຸຣິມໍ ມຄ຺ຄໍ ປຫາຍ ອປຣໍ ມຄ຺ຄໍ ນິສ຺ສິຕາ ສນ຺ນິສ຺ສິຕາ ອລ຺ລີນາ ອຸປຄຕາ ອຊ຺ໂຌສິຕາ ອຘິມຸຕ຺ຕາຕິ – ປຸຣິມໍ ປຫາຍ ອປຣໍ ສິຕາເສ.

ເອຊານຸຄາ ເຕ ນ ຕຣນ຺ຕິ ສງ຺ຄນ຺ຕິ. ເອຊາ ວຸຈ຺ຈຕິ ຕຓ຺ຫາ. ໂຍ ຣາໂຄ ສາຣາໂຄ…ເປ… ອຠິຊ຺ຌາ ໂລໂຠ ອກຸສລມູລໍ. ເອຊານຸຄາຕິ ເອຊານຸຄາ ເອຊານຸຄຕາ ເອຊານຸສຏາ ເອຊາຍ ປນ຺ນາ ປຕິຕາ ອຠິຠູຕາ ປຣິຍາທິນ຺ນຈິຕ຺ຕາ. ເຕ ນ ຕຣນ຺ຕິ ສງ຺ຄນ຺ຕິ ຣາຄສງ຺ຄໍ ໂທສສງ຺ຄໍ ໂມຫສງ຺ຄໍ ມານສງ຺ຄໍ ທິຏ຺ຐິສງ຺ຄໍ ກິເລສສງ຺ຄໍ ທຸຈ຺ຈຣິຕສງ຺ຄໍ ນ ຕຣນ຺ຕິ ນ ອຸຕ຺ຕຣນ຺ຕິ ນ ປຕຣນ຺ຕິ ນ ສມຕິກ຺ກມນ຺ຕິ ນ ວີຕິວຕ຺ຕນ຺ຕີຕິ – ເອຊານຸຄາ ເຕ ນ ຕຣນ຺ຕິ ສງ຺ຄໍ.

ເຕ ອຸຄ຺ຄຫາຍນ຺ຕິ ນິຣສ຺ສຊນ຺ຕີຕິ ສຕ຺ຖາຣໍ ຄຓ຺ຫນ຺ຕິ, ຕໍ ມຸຎ຺ຈິຕ຺ວາ ອຎ຺ຎໍ ສຕ຺ຖາຣໍ ຄຓ຺ຫນ຺ຕິ; ຘມ຺ມກ຺ຂານໍ ຄຓ຺ຫນ຺ຕິ, ຕໍ ມຸຎ຺ຈິຕ຺ວາ ອຎ຺ຎໍ ຘມ຺ມກ຺ຂານໍ ຄຓ຺ຫນ຺ຕິ; ຄຓໍ ຄຓ຺ຫນ຺ຕິ, ຕໍ ມຸຎ຺ຈິຕ຺ວາ ອຎ຺ຎໍ ຄຓໍ ຄຓ຺ຫນ຺ຕິ; ທິຏ຺ຐິໍ ຄຓ຺ຫນ຺ຕິ, ຕໍ ມຸຎ຺ຈິຕ຺ວາ ອຎ຺ຎໍ ທິຏ຺ຐິໍ ຄຓ຺ຫນ຺ຕິ; ປຏິປທໍ ຄຓ຺ຫນ຺ຕິ, ຕໍ ມຸຎ຺ຈິຕ຺ວາ ອຎ຺ຎໍ ປຏິປທໍ ຄຓ຺ຫນ຺ຕິ; ມຄ຺ຄໍ ຄຓ຺ຫນ຺ຕິ, ຕໍ ມຸຎ຺ຈິຕ຺ວາ ອຎ຺ຎໍ ມຄ຺ຄໍ ຄຓ຺ຫນ຺ຕິ; ຄຓ຺ຫນ຺ຕິ ຈ ມຸຎ຺ຈນ຺ຕິ ຈ ອາທິຍນ຺ຕິ ຈ ນິຣສ຺ສຊນ຺ຕິ ຈາຕິ – ເຕ ອຸຄ຺ຄຫາຍນ຺ຕິ ນິຣສ຺ສຊນ຺ຕິ.

ກປີວ ສາຂໍ ປມຸຎ຺ຈໍ ຄຫາຍາຕິ. ຍຖາ ມກ຺ກໂຏ ອຣຎ຺ເຎ ປວເນ ຈຣມາໂນ ສາຂໍ ຄຓ຺ຫາຕິ, ຕໍ ມຸຎ຺ຈິຕ຺ວາ ອຎ຺ຎໍ ສາຂໍ ຄຓ຺ຫາຕິ. ເອວເມວ ປຸຖຸສມຓພ຺ຣາຫ຺ມຓາ ປຸຖຸທິຏ຺ຐິຄຕານິ ຄຓ຺ຫນ຺ຕິ ຈ ມຸຎ຺ຈນ຺ຕິ ຈ ອາທິຍນ຺ຕິ ຈ ນິຣສ຺ສຊນ຺ຕິ ຈາຕິ – ກປີວ ສາຂໍ ປມຸຎ຺ຈໍ ຄຫາຍ.

ເຕນາຫ ຠຄວາ –

‘‘ປຸຣິມໍ ປຫາຍ ອປຣໍ ສິຕາເສ, ເອຊານຸຄາ ເຕ ນ ຕຣນ຺ຕິ ສງ຺ຄໍ;

ເຕ ອຸຄ຺ຄຫາຍນ຺ຕິ ນິຣສ຺ສຊນ຺ຕິ, ກປີວ ສາຂໍ ປມຸຎ຺ຈໍ ຄຫາຍາ’’ຕິ.

໒໗. ສຍໍ ສມາທາຍ ວຕານິ ຊນ຺ຕຸ, ອຸຈ຺ຈາວຈໍ ຄຈ຺ຉຕິ ສຎ຺ຎສຕ຺ໂຕ;

ວິທ຺ວາ ຈ ເວເທຫິ ສເມຈ຺ຈ ຘມ຺ມໍ, ນ ອຸຈ຺ຈາວຈໍ ຄຈ຺ຉຕິ ຠູຣິປຎ຺ໂຎ.

ສຍໍ ສມາທາຍ ວຕານິ ຊນ຺ຕູຕິ. ສຍໍ ສມາທາຍາຕິ ສາມໍ ສມາທາຍ. ວຕານີຕິ ຫຕ຺ຖິວຕໍ ວາ ອສ຺ສວຕໍ ວາ ໂຄວຕໍ ວາ ກຸກ຺ກູຣວຕໍ ວາ ກາກວຕໍ ວາ ວາສຸເທວວຕໍ ວາ ພລເທວວຕໍ ວາ ປຸຓ຺ຓຠທ຺ທວຕໍ ວາ ມຓິຠທ຺ທວຕໍ ວາ ອຄ຺ຄິວຕໍ ວາ ນາຄວຕໍ ວາ ສຸປຓ຺ຓວຕໍ ວາ ຍກ຺ຂວຕໍ ວາ ອສຸຣວຕໍ ວາ…ເປ… ທິສາວຕໍ ວາ ອາທາຍ ສມາທາຍ ອາທິຍິຕ຺ວາ ສມາທິຍິຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາ. ຊນ຺ຕູຕິ ສຕ຺ໂຕ ນໂຣ …ເປ… ມນຸໂຊຕິ – ສຍໍ ສມາທາຍ ວຕານິ ຊນ຺ຕຸ.

ອຸຈ຺ຈາວຈໍ ຄຈ຺ຉຕິ ສຎ຺ຎສຕ຺ໂຕຕິ ສຕ຺ຖາຣໂຕ ສຕ຺ຖາຣໍ ຄຈ຺ຉຕິ; ຘມ຺ມກ຺ຂານໂຕ ຘມ຺ມກ຺ຂານໍ ຄຈ຺ຉຕິ; ຄຓໂຕ ຄຓໍ ຄຈ຺ຉຕິ; ທິຏ຺ຐິຍາ ທິຏ຺ຐິໍ ຄຈ຺ຉຕິ; ປຏິປທາຍ ປຏິປທໍ ຄຈ຺ຉຕິ; ມຄ຺ຄໂຕ ມຄ຺ຄໍ ຄຈ຺ຉຕິ. ສຎ຺ຎສຕ຺ໂຕຕິ ກາມສຎ຺ຎາຍ ພ຺ຍາປາທສຎ຺ຎາຍ ວິຫິໍສາສຎ຺ຎາຍ ທິຏ຺ຐິສຎ຺ຎາຍ ສຕ຺ໂຕ ວິສຕ຺ໂຕ ອາສຕ຺ໂຕ ລຄ຺ໂຄ ລຄ຺ຄິໂຕ ປລິພຸທ຺ໂຘ. ຍຖາ ຠິຕ຺ຕິຂິເລ ວາ ນາຄທນ຺ເຕ ວາ ຠຓ຺ຑໍ ສຕ຺ຕໍ ວິສຕ຺ຕໍ ອາສຕ຺ຕໍ ລຄ຺ຄໍ ລຄ຺ຄິຕໍ ປລິພຸທ຺ຘໍ, ເອວເມວ ກາມສຎ຺ຎາຍ ພ຺ຍາປາທສຎ຺ຎາຍ ວິຫິໍສາສຎ຺ຎາຍ ທິຏ຺ຐິສຎ຺ຎາຍ ສຕ຺ໂຕ ວິສຕ຺ໂຕ ອາສຕ຺ໂຕ ລຄ຺ໂຄ ລຄ຺ຄິໂຕ ປລິພຸທ຺ໂຘຕິ – ອຸຈ຺ຈາວຈໍ ຄຈ຺ຉຕິ ສຎ຺ຎສຕ຺ໂຕ.

ວິທ຺ວາ ຈ ເວເທຫິ ສເມຈ຺ຈ ຘມ຺ມນ຺ຕິ. ວິທ຺ວາຕິ ວິທ຺ວາ ວິຊ຺ຊາຄໂຕ ຎາຓີ ວິຠາວີ ເມຘາວີ. ເວເທຫີຕິ ເວທາ ວຸຈ຺ຈນ຺ຕິ ຈຕູສຸ ມຄ຺ເຄສຸ ຎາຓໍ ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ຘມ຺ມວິຈຍສມ຺ໂພຊ຺ຌງ຺ໂຄ ວີມໍສາ ວິປສ຺ສນາ ສມ຺ມາທິຏ຺ຐິ. ເຕຫິ ເວເທຫິ ຊາຕິຊຣາມຣຓສ຺ສ ອນ຺ຕຄໂຕ ອນ຺ຕປ຺ປຕ຺ໂຕ, ໂກຏິຄໂຕ ໂກຏິປ຺ປຕ຺ໂຕ, ປຣິຍນ຺ຕຄໂຕ ປຣິຍນ຺ຕປ຺ປຕ຺ໂຕ, ໂວສານຄໂຕ ໂວສານປ຺ປຕ຺ໂຕ, ຕາຓຄໂຕ ຕາຓປ຺ປຕ຺ໂຕ, ເລຓຄໂຕ ເລຓປ຺ປຕ຺ໂຕ, ສຣຓຄໂຕ ສຣຓປ຺ປຕ຺ໂຕ, ອຠຍຄໂຕ ອຠຍປ຺ປຕ຺ໂຕ, ອຈ຺ຈຸຕຄໂຕ ອຈ຺ຈຸຕປ຺ປຕ຺ໂຕ, ອມຕຄໂຕ ອມຕປ຺ປຕ຺ໂຕ, ນິພ຺ພານຄໂຕ ນິພ຺ພານປ຺ປຕ຺ໂຕ. ເວທານໍ ວາ ອນ຺ຕຄໂຕຕິ ເວທຄູ, ເວເທຫິ ວາ ອນ຺ຕຄໂຕຕິ ເວທຄູ, ສຕ຺ຕນ຺ນໍ ວາ ຘມ຺ມານໍ ວິທິຕຕ຺ຕາ ເວທຄູ. ສກ຺ກາຍທິຏ຺ຐິ ວິທິຕາ ໂຫຕິ, ວິຈິກິຈ຺ຉາ ວິທິຕາ ໂຫຕິ, ສີລພ຺ພຕປຣາມາໂສ ວິທິໂຕ ໂຫຕິ, ຣາໂຄ ວິທິໂຕ ໂຫຕິ, ໂທໂສ ວິທິໂຕ ໂຫຕິ, ໂມໂຫ ວິທິໂຕ ໂຫຕິ, ມາໂນ ວິທິໂຕ ໂຫຕິ, ວິທິຕາສ຺ສ ໂຫນ຺ຕິ ປາປກາ ອກຸສລາ ຘມ຺ມາ ສໍກິເລສິກາ ໂປໂນຠວິກາ ສທຣາ ທຸກ຺ຂວິປາກາ ອາຍຕິໍ ຊາຕິຊຣາມຣຓິຍາ.

ເວທານິ ວິເຈຍ຺ຍ ເກວລານິ, [ສຠິຍາຕິ ຠຄວາ]

ສມຓານໍ ຍານີຘຕ຺ຖິ [ຍານິປຕ຺ຖິ (ສີ. ສ຺ຍາ.) ສຸ. ນິ. ໕໓໔] ພ຺ຣາຫ຺ມຓານໍ;

ສພ຺ພເວທນາສຸ ວີຕຣາໂຄ, ສພ຺ພໍ ເວທມຕິຈ຺ຈ ເວທຄູ ໂສຕິ.

ວິທ຺ວາ ຈ ເວເທຫິ ສເມຈ຺ຈ ຘມ຺ມນ຺ຕິ. ສເມຈ຺ຈ ອຠິສເມຈ຺ຈ ຘມ຺ມໍ. ສພ຺ເພ ສງ຺ຂາຣາ ອນິຈ຺ຈາຕິ ສເມຈ຺ຈ ອຠິສເມຈ຺ຈ ຘມ຺ມໍ; ສພ຺ເພ ສງ຺ຂາຣາ ທຸກ຺ຂາຕິ ສເມຈ຺ຈ ອຠິສເມຈ຺ຈ ຘມ຺ມໍ; ສພ຺ເພ ຘມ຺ມາ ອນຕ຺ຕາຕິ ສເມຈ຺ຈ ອຠິສເມຈ຺ຈ ຘມ຺ມໍ; ອວິຊ຺ຊາປຈ຺ຈຍາ ສງ຺ຂາຣາຕິ ສເມຈ຺ຈ ອຠິສເມຈ຺ຈ ຘມ຺ມໍ; ສງ຺ຂາຣປຈ຺ຈຍາ ວິຎ຺ຎາຓນ຺ຕິ ສເມຈ຺ຈ ອຠິສເມຈ຺ຈ ຘມ຺ມໍ; ວິຎ຺ຎາຓປຈ຺ຈຍາ ນາມຣູປນ຺ຕິ…ເປ… ນາມຣູປປຈ຺ຈຍາ ສຬາຍຕນນ຺ຕິ… ສຬາຍຕນປຈ຺ຈຍາ ຜສ຺ໂສຕິ… ຜສ຺ສປຈ຺ຈຍາ ເວທນາຕິ… ເວທນາປຈ຺ຈຍາ ຕຓ຺ຫາຕິ… ຕຓ຺ຫາປຈ຺ຈຍາ ອຸປາທານນ຺ຕິ… ອຸປາທານປຈ຺ຈຍາ ຠໂວຕິ… ຠວປຈ຺ຈຍາ ຊາຕີຕິ… ຊາຕິປຈ຺ຈຍາ ຊຣາມຣຓນ຺ຕິ ສເມຈ຺ຈ ອຠິສເມຈ຺ຈ ຘມ຺ມໍ; ອວິຊ຺ຊານິໂຣຘາ ສງ຺ຂາຣນິໂຣໂຘຕິ ສເມຈ຺ຈ ອຠິສເມຈ຺ຈ ຘມ຺ມໍ; ສງ຺ຂາຣນິໂຣຘາ ວິຎ຺ຎາຓນິໂຣໂຘຕິ ສເມຈ຺ຈ ອຠິສເມຈ຺ຈ ຘມ຺ມໍ; ວິຎ຺ຎາຓນິໂຣຘາ ນາມຣູປນິໂຣໂຘຕິ… ນາມຣູປນິໂຣຘາ ສຬາຍຕນນິໂຣໂຘຕິ… ສຬາຍຕນນິໂຣຘາ ຜສ຺ສນິໂຣໂຘຕິ… ຜສ຺ສນິໂຣຘາ ເວທນານິໂຣໂຘຕິ… ເວທນານິໂຣຘາ ຕຓ຺ຫານິໂຣໂຘຕິ… ຕຓ຺ຫານິໂຣຘາ ອຸປາທານນິໂຣໂຘຕິ… ອຸປາທານນິໂຣຘາ ຠວນິໂຣໂຘຕິ… ຠວນິໂຣຘາ ຊາຕິນິໂຣໂຘຕິ… ຊາຕິນິໂຣຘາ ຊຣາມຣຓນິໂຣໂຘຕິ ສເມຈ຺ຈ ອຠິສເມຈ຺ຈ ຘມ຺ມໍ; ອິທໍ ທຸກ຺ຂນ຺ຕິ ສເມຈ຺ຈ ອຠິສເມຈ຺ຈ ຘມ຺ມໍ; ອຍໍ ທຸກ຺ຂສມຸທໂຍຕິ… ອຍໍ ທຸກ຺ຂນິໂຣໂຘຕິ… ອຍໍ ທຸກ຺ຂນິໂຣຘຄາມິນີ ປຏິປທາຕິ ສເມຈ຺ຈ ອຠິສເມຈ຺ຈ ຘມ຺ມໍ; ອິເມ ອາສວາຕິ ສເມຈ຺ຈ ອຠິສເມຈ຺ຈ ຘມ຺ມໍ; ອຍໍ ອາສວສມຸທໂຍຕິ… ອຍໍ ອາສວນິໂຣໂຘຕິ… ອຍໍ ອາສວນິໂຣຘຄາມິນີ ປຏິປທາຕິ ສເມຈ຺ຈ ອຠິສເມຈ຺ຈ ຘມ຺ມໍ; ອິເມ ຘມ຺ມາ ອຠິຎ຺ເຎຍ຺ຍາຕິ ສເມຈ຺ຈ ອຠິສເມຈ຺ຈ ຘມ຺ມໍ; ອິເມ ຘມ຺ມາ ປຣິຎ຺ເຎຍ຺ຍາຕິ… ອິເມ ຘມ຺ມາ ປຫາຕພ຺ພາຕິ… ອິເມ ຘມ຺ມາ ຠາເວຕພ຺ພາຕິ … ອິເມ ຘມ຺ມາ ສຈ຺ຉິກາຕພ຺ພາຕິ ສເມຈ຺ຈ ອຠິສເມຈ຺ຈ ຘມ຺ມໍ. ຉນ຺ນໍ ຜສ຺ສາຍຕນານໍ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ສເມຈ຺ຈ ອຠິສເມຈ຺ຈ ຘມ຺ມໍ. ປຎ຺ຈນ຺ນໍ ອຸປາທານກ຺ຂນ຺ຘານໍ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ສເມຈ຺ຈ ອຠິສເມຈ຺ຈ ຘມ຺ມໍ. ຈຕຸນ຺ນໍ ມຫາຠູຕານໍ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ສເມຈ຺ຈ ອຠິສເມຈ຺ຈ ຘມ຺ມໍ. ຍໍ ກິຎ຺ຈິ ສມຸທຍຘມ຺ມໍ ສພ຺ພໍ ຕໍ ນິໂຣຘຘມ຺ມນ຺ຕິ ສເມຈ຺ຈ ອຠິສເມຈ຺ຈ ຘມ຺ມນ຺ຕິ – ວິທ຺ວາ ຈ ເວເທຫິ ສເມຈ຺ຈ ຘມ຺ມໍ.

ນ ອຸຈ຺ຈາວຈໍ ຄຈ຺ຉຕິ ຠູຣິປຎ຺ໂຎຕິ ນ ສຕ຺ຖາຣໂຕ ສຕ຺ຖາຣໍ ຄຈ຺ຉຕິ, ນ ຘມ຺ມກ຺ຂານໂຕ ຘມ຺ມກ຺ຂານໍ ຄຈ຺ຉຕິ, ນ ຄຓໂຕ ຄຓໍ ຄຈ຺ຉຕິ, ນ ທິຏ຺ຐິຍາ ທິຏ຺ຐິໍ ຄຈ຺ຉຕິ, ນ ປຏິປທາຍ ປຏິປທໍ ຄຈ຺ຉຕິ, ນ ມຄ຺ຄໂຕ ມຄ຺ຄໍ ຄຈ຺ຉຕິ. ຠູຣິປຎ຺ໂຎຕິ ຠູຣິປຎ຺ໂຎ ມຫາປຎ຺ໂຎ ປຸຖຸປຎ຺ໂຎ ຫາສປຎ຺ໂຎ ຊວນປຎ຺ໂຎ ຕິກ຺ຂປຎ຺ໂຎ ນິພ຺ເພຘິກປຎ຺ໂຎ. ຠູຣິ ວຸຈ຺ຈຕິ ປຖວີ. ຕາຍ ປຖວິສມາຍ ປຎ຺ຎາຍ ວິປຸລາຍ ວິຕ຺ຖຕາຍ ສມນ຺ນາຄໂຕຕິ – ນ ອຸຈ຺ຈາວຈໍ ຄຈ຺ຉຕິ ຠູຣິປຎ຺ໂຎ.

ເຕນາຫ ຠຄວາ –

‘‘ສຍໍ ສມາທາຍ ວຕານິ ຊນ຺ຕຸ, ອຸຈ຺ຈາວຈໍ ຄຈ຺ຉຕິ ສຎ຺ຎສຕ຺ໂຕ;

ວິທ຺ວາ ຈ ເວເທຫິ ສເມຈ຺ຈ ຘມ຺ມໍ, ນ ອຸຈ຺ຈາວຈໍ ຄຈ຺ຉຕິ ຠູຣິປຎ຺ໂຎ’’ຕິ.

໒໘. ສ ສພ຺ພຘມ຺ເມສຸ ວິເສນິຠູໂຕ,ຍໍ ກິຎ຺ຈິ ທິຏ຺ຐໍ ວ ສຸຕໍ ມຸຕໍ ວາ;

ຕເມວ ທສ຺ສິໍ ວິວຏໍ ຈຣນ຺ຕໍ, ເກນີຘ ໂລກສ຺ມິ ວິກປ຺ປເຍຍ຺ຍ.

ສ ສພ຺ພຘມ຺ເມສຸ ວິເສນິຠູໂຕ ຍໍ ກິຎ຺ຈິ ທິຏ຺ຐໍ ວ ສຸຕໍ ມຸຕໍ ວາຕິ. ເສນາ ວຸຈ຺ຈຕິ ມາຣເສນາ. ກາຍທຸຈ຺ຈຣິຕໍ ມາຣເສນາ, ວຈີທຸຈ຺ຈຣິຕໍ ມາຣເສນາ, ມໂນທຸຈ຺ຈຣິຕໍ ມາຣເສນາ, ຣາໂຄ ມາຣເສນາ, ໂທໂສ ມາຣເສນາ, ໂມໂຫ ມາຣເສນາ, ໂກໂຘ ມາຣເສນາ, ອຸປນາໂຫ…ເປ… ສພ຺ພາກຸສລາຠິສງ຺ຂາຣາ ມາຣເສນາ.

ວຸຕ຺ຕຎ຺ເຫຕໍ ຠຄວຕາ –

‘‘ກາມາ ເຕ ປຐມາ ເສນາ, ທຸຕິຍາ ອຣຕິ ວຸຈ຺ຈຕິ;

ຕຕິຍາ ຂຸປ຺ປິປາສາ ເຕ, ຈຕຸຕ຺ຖີ ຕຓ຺ຫາ ວຸຈ຺ຈຕິ.

‘‘ປຎ຺ຈມີ ຖິນມິທ຺ຘໍ ເຕ, ຉຏ຺ຐາ ຠີຣູ ປວຸຈ຺ຈຕິ;

ສຕ຺ຕມີ ວິຈິກິຈ຺ຉາ ເຕ, ມກ຺ໂຂ ຖມ຺ໂຠ ເຕ ອຏ຺ຐໂມ.

‘‘ລາໂຠ ສິໂລໂກ ສກ຺ກາໂຣ, ມິຈ຺ຉາລທ຺ໂຘ ຈ ໂຍ ຍໂສ;

ໂຍ ຈຕ຺ຕານໍ ສມຸກ຺ກໍເສ, ປເຣ ຈ ອວຊານຕິ.

‘‘ເອສາ ນມຸຈິ ເຕ ເສນາ, ກຓ຺ຫສ຺ສາຠິປ຺ປຫາຣິນີ;

ນ ນໍ ອສຸໂຣ ຊິນາຕິ, ເຊຕ຺ວາວ ລຠເຕ ສຸຂ’’ນ຺ຕິ.

ຍໂຕ ຈຕູຫິ ອຣິຍມຄ຺ເຄຫິ ສພ຺ພາ ຈ ມາຣເສນາ ສພ຺ເພ ຈ ປຏິເສນິກຣາ ກິເລສາ ຊິຕາ ຈ ປຣາຊິຕາ ຈ ຠຄ຺ຄາ ວິປ຺ປລຸຄ຺ຄາ ປຣມ຺ມຸຂາ, ໂສ ວຸຈ຺ຈຕິ ວິເສນິຠູໂຕ. ໂສ ທິຏ຺ເຐ ວິເສນິຠູໂຕ, ສຸເຕ ວິເສນິຠູໂຕ, ມຸເຕ ວິເສນິຠູໂຕ, ວິຎ຺ຎາເຕ ວິເສນິຠູໂຕຕິ – ສ ສພ຺ພຘມ຺ເມສຸ ວິເສນິຠູໂຕ ຍໍ ກິຎ຺ຈິ ທິຏ຺ຐໍ ວ ສຸຕໍ ມຸຕໍ ວາ.

ຕເມວ ທສ຺ສິໍ ວິວຏໍ ຈຣນ຺ຕນ຺ຕິ. ຕເມວ ສຸທ຺ຘທສ຺ສິໍ ວິສຸທ຺ຘທສ຺ສິໍ ປຣິສຸທ຺ຘທສ຺ສິໍ ໂວທາຕທສ຺ສິໍ ປຣິໂຍທາຕທສ຺ສິໍ. ອຖ ວາ, ສຸທ຺ຘທສ຺ສນໍ ວິສຸທ຺ຘທສ຺ສນໍ ປຣິສຸທ຺ຘທສ຺ສນໍ ໂວທາຕທສ຺ສນໍ ປຣິໂຍທາຕທສ຺ສນໍ. ວິວຏນ຺ຕິ ຕຓ຺ຫາຉທນໍ ທິຏ຺ຐິຉທນໍ ກິເລສຉທນໍ ທຸຈ຺ຈຣິຕຉທນໍ ອວິຊ຺ຊາຉທນໍ. ຕານິ ຉທນານິ ວິວຏານິ ໂຫນ຺ຕິ ວິທ຺ຘໍສິຕານິ ອຸຄ຺ຆາຏິຕານິ ສມຸຄ຺ຆາຏິຕານິ ປຫີນານິ ສມຸຈ຺ຉິນ຺ນານິ ວູປສນ຺ຕານິ ປຏິປສ຺ສທ຺ຘານິ ອຠພ຺ພຸປ຺ປຕ຺ຕິການິ ຎາຓຄ຺ຄິນາ ທຑ຺ຒານິ. ຈຣນ຺ຕນ຺ຕິ ຈຣນ຺ຕໍ ວິຈຣນ຺ຕໍ ວິຫຣນ຺ຕໍ ອິຣິຍນ຺ຕໍ ວຕ຺ເຕນ຺ຕໍ ປາເລນ຺ຕໍ ຍເປນ຺ຕໍ ຍາເປນ຺ຕນ຺ຕິ – ຕເມວ ທສ຺ສິໍ ວິວຏໍ ຈຣນ຺ຕໍ.

ເກນີຘ ໂລກສ຺ມິ ວິກປ຺ປເຍຍ຺ຍາຕິ. ກປ຺ປາຕິ ທ຺ເວ ກປ຺ປາ – ຕຓ຺ຫາກປ຺ໂປ ຈ ທິຏ຺ຐິກປ຺ໂປ ຈ…ເປ… ອຍໍ ຕຓ຺ຫາກປ຺ໂປ…ເປ… ອຍໍ ທິຏ຺ຐິກປ຺ໂປ. ຕສ຺ສ ຕຓ຺ຫາກປ຺ໂປ ປຫີໂນ, ທິຏ຺ຐິກປ຺ໂປ ປຏິນິສ຺ສຏ຺ໂຐ. ຕຓ຺ຫາກປ຺ປສ຺ສ ປຫີນຕ຺ຕາ ທິຏ຺ຐິກປ຺ປສ຺ສ ປຏິນິສ຺ສຏ຺ຐຕ຺ຕາ ເກນ ຣາເຄນ ກປ຺ເປຍ຺ຍ, ເກນ ໂທເສນ ກປ຺ເປຍ຺ຍ, ເກນ ໂມເຫນ ກປ຺ເປຍ຺ຍ, ເກນ ມາເນນ ກປ຺ເປຍ຺ຍ, ກາຍ ທິຏ຺ຐິຍາ ກປ຺ເປຍ຺ຍ, ເກນ ອຸທ຺ຘຈ຺ເຈນ ກປ຺ເປຍ຺ຍ, ກາຍ ວິຈິກິຈ຺ຉາຍ ກປ຺ເປຍ຺ຍ, ເກຫິ ອນຸສເຍຫິ ກປ຺ເປຍ຺ຍ – ຣຕ຺ໂຕຕິ ວາ ທຸຏ຺ໂຐຕິ ວາ ມູຬ຺ໂຫຕິ ວາ ວິນິພທ຺ໂຘຕິ ວາ ປຣາມຏ຺ໂຐຕິ ວາ ວິກ຺ເຂປຄໂຕຕິ ວາ ອນິຏ຺ຐງ຺ຄໂຕຕິ ວາ ຖາມຄໂຕຕິ ວາ. ເຕ ອຠິສງ຺ຂາຣາ ປຫີນາ. ອຠິສງ຺ຂາຣານໍ ປຫີນຕ຺ຕາ ຄຕິໂຍ ເກນ ກປ຺ເປຍ຺ຍ – ເນຣຍິໂກຕິ ວາ ຕິຣຈ຺ຉານໂຍນິໂກຕິ ວາ ເປຕ຺ຕິວິສຍິໂກຕິ ວາ ມນຸສ຺ໂສຕິ ວາ ເທໂວຕິ ວາ ຣູປີຕິ ວາ ອຣູປີຕິ ວາ ສຎ຺ຎີຕິ ວາ ອສຎ຺ຎີຕິ ວາ ເນວສຎ຺ຎີນາສຎ຺ຎີຕິ ວາ. ໂສ ເຫຕຸ ນຕ຺ຖິ, ປຈ຺ຈໂຍ ນຕ຺ຖິ, ກາຣຓໍ ນຕ຺ຖິ, ເຍນ ກປ຺ເປຍ຺ຍ ວິກປ຺ເປຍ຺ຍ ວິກປ຺ປໍ ອາປຊ຺ເຊຍ຺ຍ. ໂລກສ຺ມິນ຺ຕິ ອປາຍໂລເກ ມນຸສ຺ສໂລເກ ເທວໂລເກ ຂນ຺ຘໂລເກ ຘາຕຸໂລເກ ອາຍຕນໂລເກຕິ – ເກນີຘ ໂລກສ຺ມິໍ ວິກປ຺ປເຍຍ຺ຍ.

ເຕນາຫ ຠຄວາ –

‘‘ສ ສພ຺ພຘມ຺ເມສຸ ວິເສນິຠູໂຕ, ຍໍ ກິຎ຺ຈິ ທິຏ຺ຐໍ ວ ສຸຕໍ ມຸຕໍ ວາ;

ຕເມວ ທສ຺ສິໍ ວິວຏໍ ຈຣນ຺ຕໍ, ເກນີຘ ໂລກສ຺ມິ ວິກປ຺ປເຍຍ຺ຍາ’’ຕິ.

໒໙. ນ ກປ຺ປຍນ຺ຕິ ນ ປຸເຣກ຺ຂໂຣນ຺ຕິ, ອຈ຺ຈນ຺ຕສຸທ຺ຘີຕິ ນ ເຕ ວທນ຺ຕິ;

ອາທານຄນ຺ຖໍ ຄຖິຕໍ ວິສຊ຺ຊ, ອາສໍ ນ ກຸພ຺ພນ຺ຕິ ກຸຫິຎ຺ຈິ ໂລເກ.

ນ ກປ຺ປຍນ຺ຕິ ນ ປຸເຣກ຺ຂໂຣນ຺ຕີຕິ. ກປ຺ປາຕິ ທ຺ເວ ກປ຺ປາ – ຕຓ຺ຫາກປ຺ໂປ ຈ ທິຏ຺ຐິກປ຺ໂປ ຈ…ເປ… ອຍໍ ຕຓ຺ຫາກປ຺ໂປ…ເປ… ອຍໍ ທິຏ຺ຐິກປ຺ໂປ. ເຕສໍ ຕຓ຺ຫາກປ຺ໂປ ປຫີໂນ, ທິຏ຺ຐິກປ຺ໂປ ປຏິນິສ຺ສຏ຺ໂຐ. ຕຓ຺ຫາກປ຺ປສ຺ສ ປຫີນຕ຺ຕາ, ທິຏ຺ຐິກປ຺ປສ຺ສ ປຏິນິສ຺ສຏ຺ຐຕ຺ຕາ ຕຓ຺ຫາກປ຺ປໍ ວາ ທິຏ຺ຐິກປ຺ປໍ ວາ ນ ກປ຺ເປນ຺ຕິ ນ ຊເນນ຺ຕິ ນ ສຎ຺ຊເນນ຺ຕິ ນ ນິພ຺ພຕ຺ເຕນ຺ຕິ ນາຠິນິພ຺ພຕ຺ເຕນ຺ຕີຕິ – ນ ກປ຺ປຍນ຺ຕິ. ນ ປຸເຣກ຺ຂໂຣນ຺ຕີຕິ. ປຸເຣກ຺ຂາຣາຕິ ທ຺ເວ ປຸເຣກ຺ຂາຣາ – ຕຓ຺ຫາປຸເຣກ຺ຂາໂຣ ຈ ທິຏ຺ຐິປຸເຣກ຺ຂາໂຣ ຈ…ເປ… ອຍໍ ຕຓ຺ຫາປຸເຣກ຺ຂາໂຣ…ເປ… ອຍໍ ທິຏ຺ຐິປຸເຣກ຺ຂາໂຣ. ເຕສໍ ຕຓ຺ຫາປຸເຣກ຺ຂາໂຣ ປຫີໂນ, ທິຏ຺ຐິປຸເຣກ຺ຂາໂຣ ປຏິນິສ຺ສຏ຺ໂຐ. ຕຓ຺ຫາປຸເຣກ຺ຂາຣສ຺ສ ປຫີນຕ຺ຕາ, ທິຏ຺ຐິປຸເຣກ຺ຂາຣສ຺ສ ປຏິນິສ຺ສຏ຺ຐຕ຺ຕາ ນ ຕຓ຺ຫໍ ວາ ນ ທິຏ຺ຐິໍ ວາ ປຸຣໂຕ ກຕ຺ວາ ຈຣນ຺ຕິ, ນ ຕຓ຺ຫາຘຊາ ນ ຕຓ຺ຫາເກຕູ ນ ຕຓ຺ຫາຘິປເຕຍ຺ຍາ, ນ ທິຏ຺ຐິຘຊາ ນ ທິຏ຺ຐິເກຕູ ນ ທິຏ຺ຐາຘິປເຕຍ຺ຍາ, ນ ຕຓ຺ຫາຍ ວາ ນ ທິຏ຺ຐິຍາ ວາ ປຣິວາຣິຕາ ຈຣນ຺ຕີຕິ – ນ ກປ຺ປຍນ຺ຕິ ນ ປຸເຣກ຺ຂໂຣນ຺ຕິ.

ອຈ຺ຈນ຺ຕສຸທ຺ຘີຕິ ນ ເຕ ວທນ຺ຕີຕິ ອຈ຺ຈນ຺ຕສຸທ຺ຘິໍ ສໍສາຣສຸທ຺ຘິໍ ອກິຣິຍທິຏ຺ຐິໍ ສສ຺ສຕວາທໍ ນ ວທນ຺ຕິ ນ ກເຖນ຺ຕິ ນ ຠຓນ຺ຕິ ນ ທີປຍນ຺ຕິ ນ ໂວຫຣນ຺ຕີຕິ – ອຈ຺ຈນ຺ຕສຸທ຺ຘີຕິ ນ ເຕ ວທນ຺ຕິ.

ອາທານຄນ຺ຖໍ ຄຖິຕໍ ວິສຊ຺ຊາຕິ. ຄນ຺ຖາຕິ ຈຕ຺ຕາໂຣ ຄນ຺ຖາ – ອຠິຊ຺ຌາ ກາຍຄນ຺ໂຖ, ພ຺ຍາປາໂທ ກາຍຄນ຺ໂຖ, ສີລພ຺ພຕປຣາມາໂສ ກາຍຄນ຺ໂຖ, ອິທໍສຈ຺ຈາຠິນິເວໂສ ກາຍຄນ຺ໂຖ. ອຕ຺ຕໂນ ທິຏ຺ຐິຍາ ຣາໂຄ ອຠິຊ຺ຌາ ກາຍຄນ຺ໂຖ; ປຣວາເທສຸ ອາຆາໂຕ ອປ຺ປຈ຺ຈໂຍ ພ຺ຍາປາໂທ ກາຍຄນ຺ໂຖ; ອຕ຺ຕໂນ ສີລໍ ວາ ວຕໍ ວາ ສີລວຕໍ ວາ ປຣາມສນ຺ຕີຕິ ສີລພ຺ພຕປຣາມາໂສ ກາຍຄນ຺ໂຖ, ອຕ຺ຕໂນ ທິຏ຺ຐິ ອິທໍສຈ຺ຈາຠິນິເວໂສ ກາຍຄນ຺ໂຖ. ກິໍກາຣຓາ ວຸຈ຺ຈຕິ ອາທານຄນ຺ໂຖ? ເຕຫິ ຄນ຺ເຖຫິ ຣູປໍ ອາທິຍນ຺ຕິ ອຸປາທິຍນ຺ຕິ ຄຓ຺ຫນ຺ຕິ ປຣາມສນ຺ຕິ ອຠິນິວິສນ຺ຕິ; ເວທນໍ…ເປ… ສຎ຺ຎໍ… ສງ຺ຂາເຣ… ວິຎ຺ຎາຓໍ… ຄຕິໍ … ອຸປປຕ຺ຕິໍ… ປຏິສນ຺ຘິໍ… ຠວໍ… ສໍສາຣວຏ຺ຏໍ ອາທິຍນ຺ຕິ ອຸປາທິຍນ຺ຕິ ຄຓ຺ຫນ຺ຕິ ປຣາມສນ຺ຕິ ອຠິນິວິສນ຺ຕິ. ຕໍກາຣຓາ ວຸຈ຺ຈຕິ ອາທານຄນ຺ໂຖ. ວິສຊ຺ຊາຕິ ຄນ຺ເຖ ໂວສຊ຺ຊິຕ຺ວາ ວາ – ວິສຊ຺ຊ. ອຖ ວາ ຄນ຺ເຖ ຄຘິເຕ ຄນ຺ຖິເຕ ພນ຺ເຘ ວິພນ຺ເຘ ອາພນ຺ເຘ ລຄ຺ເຄ ລຄ຺ຄິເຕ ປລິພຸທ຺ເຘ ພນ຺ຘເນ ໂປຏຍິຕ຺ວາ – [ໂຜຏຍິຕ຺ວາ (ສ຺ຍາ.)] ວິສຊ຺ຊ. ຍຖາ ວຍ຺ຫໍ ວາ ຣຖໍ ວາ ສກຏໍ ວາ ສນ຺ທມານິກໍ ວາ ສຊ຺ຊໍ ວິສຊ຺ຊໍ ກໂຣນ຺ຕິ ວິໂກເປນ຺ຕິ; ເອວເມວ ຄນ຺ເຖ ໂວສຊ຺ຊິຕ຺ວາ – ວິສຊ຺ຊ. ອຖ ວາ ຄນ຺ເຖ ຄຘິເຕ ຄນ຺ຖິເຕ ພນ຺ເຘ ວິພນ຺ເຘ ອາພນ຺ເຘ ລຄ຺ເຄ ລຄ຺ຄິເຕ ປລິພຸທ຺ເຘ ພນ຺ຘເນ ໂປຏຍິຕ຺ວາ ວິສຊ຺ຊາຕິ – ອາທານຄນ຺ຖໍ ຄຖິຕໍ ວິສຊ຺ຊ.

ອາສໍ ນ ກຸພ຺ພນ຺ຕິ ກຸຫິຎ຺ຈິ ໂລເກຕິ. ອາສາ ວຸຈ຺ຈຕິ ຕຓ຺ຫາ ໂຍ ຣາໂຄ ສາຣາໂຄ…ເປ… ອຠິຊ຺ຌາ ໂລໂຠ ອກຸສລມູລໍ. ອາສໍ ນ ກຸພ຺ພນ຺ຕີຕິ ອາສໍ ນ ກຸພ຺ພນ຺ຕິ ນ ຊເນນ຺ຕິ ນ ສຎ຺ຊເນນ຺ຕິ ນ ນິພ຺ພຕ຺ເຕນ຺ຕິ ນ ອຠິນິພ຺ພຕ຺ເຕນ຺ຕິ. ກຸຫິຎ຺ຈີຕິ ກຸຫິຎ຺ຈິ ກິມ຺ຫິຈິ ກຕ຺ຖຈິ ອຊ຺ຌຕ຺ຕໍ ວາ ພຫິທ຺ຘາ ວາ ອຊ຺ຌຕ຺ຕພຫິທ຺ຘາ ວາ. ໂລເກຕິ ອປາຍໂລເກ…ເປ… ອາຍຕນໂລເກຕິ – ອາສໍ ນ ກຸພ຺ພນ຺ຕິ ກຸຫິຎ຺ຈິ ໂລເກ.

ເຕນາຫ ຠຄວາ –

‘‘ນ ກປ຺ປຍນ຺ຕິ ນ ປຸເຣກ຺ຂໂຣນ຺ຕິ, ອຈ຺ຈນ຺ຕສຸທ຺ຘີຕິ ນ ເຕ ວທນ຺ຕິ;

ອາທານຄນ຺ຖໍ ຄຖິຕໍ ວິສຊ຺ຊ, ອາສໍ ນ ກຸພ຺ພນ຺ຕິ ກຸຫິຎ຺ຈິ ໂລເກ’’ຕິ.

໓໐. ສີມາຕິໂຄ ພ຺ຣາຫ຺ມໂຓ ຕສ຺ສ ນຕ຺ຖິ, ຎຕ຺ວາ ຈ ທິສ຺ວາ ຈ ສມຸຄ຺ຄຫີຕໍ;

ນ ຣາຄຣາຄີ ນ ວິຣາຄຣຕ຺ໂຕ, ຕສ຺ສີຘ ນຕ຺ຖິ ປຣມຸຄ຺ຄຫີຕໍ.

ສີມາຕິໂຄ ພ຺ຣາຫ຺ມໂຓ ຕສ຺ສ ນຕ຺ຖິ, ຎຕ຺ວາ ຈ ທິສ຺ວາ ຈ ສມຸຄ຺ຄຫີຕນ຺ຕິ. ສີມາຕິ ຈຕສ຺ໂສ ສີມາໂຍ – ສກ຺ກາຍທິຏ຺ຐິ, ວິຈິກິຈ຺ຉາ, ສີລພ຺ພຕປຣາມາໂສ, ທິຏ຺ຐານຸສໂຍ, ວິຈິກິຈ຺ຉານຸສໂຍ, ຕເທກຏ຺ຐາ ຈ ກິເລສາ – ອຍໍ ປຐມາ ສີມາ. ໂອຬາຣິກໍ ກາມຣາຄສຎ຺ໂຎຊນໍ, ປຏິຆສຎ຺ໂຎຊນໍ, ໂອຬາຣິໂກ ກາມຣາຄານຸສໂຍ, ປຏິຆານຸສໂຍ, ຕເທກຏ຺ຐາ ຈ ກິເລສາ – ອຍໍ ທຸຕິຍາ ສີມາ. ອນຸສຫຄຕໍ ກາມຣາຄສຎ຺ໂຎຊນໍ, ປຏິຆສຎ຺ໂຎຊນໍ, ອນຸສຫຄໂຕ ກາມຣາຄານຸສໂຍ, ປຏິຆານຸສໂຍ, ຕເທກຏ຺ຐາ ຈ ກິເລສາ – ອຍໍ ຕຕິຍາ ສີມາ. ຣູປຣາໂຄ ອຣູປຣາໂຄ ມາໂນ ອຸທ຺ຘຈ຺ຈໍ ອວິຊ຺ຊາ, ມານານຸສໂຍ ຠວຣາຄານຸສໂຍ ອວິຊ຺ຊານຸສໂຍ, ຕເທກຏ຺ຐາ ຈ ກິເລສາ – ອຍໍ ຈຕຸຕ຺ຖາ ສີມາ. ຍໂຕ ຈ ຈຕູຫິ ອຣິຍມຄ຺ເຄຫິ ອິມາ ຈຕສ຺ໂສ ສີມາໂຍ ອຕິກ຺ກນ຺ໂຕ ໂຫຕິ ສມຕິກ຺ກນ຺ໂຕ ວີຕິວຕ຺ໂຕ, ໂສ ວຸຈ຺ຈຕິ ສີມາຕິໂຄ. ພ຺ຣາຫ຺ມໂຓຕິ ສຕ຺ຕນ຺ນໍ ຘມ຺ມານໍ ພາຫິຕຕ຺ຕາ ພ຺ຣາຫ຺ມໂຓ – ສກ຺ກາຍທິຏ຺ຐິ ພາຫິຕາ ໂຫຕິ, ວິຈິກິຈ຺ຉາ ພາຫິຕາ ໂຫຕິ, ສີລພ຺ພຕປຣາມາໂສ ພາຫິໂຕ ໂຫຕິ…ເປ… ອສິໂຕ ຕາທິ ປວຸຈ຺ຈເຕ ສ ພ຺ຣຫ຺ມາ. ຕສ຺ສາຕິ ອຣຫໂຕ ຂີຓາສວສ຺ສ.

ຎຕ຺ວາຕິ ປຣຈິຕ຺ຕຎາເຓນ ວາ ຎຕ຺ວາ ປຸພ຺ເພນິວາສານຸສ຺ສຕິຎາເຓນ ວາ ຎຕ຺ວາ. ທິສ຺ວາຕິ ມໍສຈກ຺ຂຸນາ ວາ ທິສ຺ວາ ທິພ຺ພຈກ຺ຂຸນາ ວາ ທິສ຺ວາ. ສີມາຕິໂຄ ພ຺ຣາຫ຺ມໂຓ ຕສ຺ສ ນຕ຺ຖິ, ຎຕ຺ວາ ຈ ທິສ຺ວາ ຈ ສມຸຄ຺ຄຫີຕນ຺ຕິ. ຕສ຺ສ ອິທໍ ປຣມໍ ອຄ຺ຄໍ ເສຏ຺ຐໍ ວິສິຏ຺ຐໍ [ວິເສຏ຺ຐໍ (ສີ. ສ຺ຍາ.)] ປາໂມກ຺ຂໍ ອຸຕ຺ຕມໍ ປວຣນ຺ຕິ ຄຫິຕໍ ປຣາມຏ຺ຐໍ ອຠິນິວິຏ຺ຐໍ ອຊ຺ໂຌສິຕໍ ອຘິມຸຕ຺ຕໍ ນຕ຺ຖິ ນ ສນ຺ຕິ ນ ສໍວິຊ຺ຊຕິ ນຸປລພ຺ຠຕິ, ປຫີນໍ ສມຸຈ຺ຉິນ຺ນໍ ວູປສນ຺ຕໍ ປຏິປສ຺ສທ຺ຘໍ ອຠພ຺ພຸປ຺ປຕ຺ຕິກໍ ຎາຓຄ຺ຄິນາ ທຑ຺ຒນ຺ຕິ – ສີມາຕິໂຄ ພ຺ຣາຫ຺ມໂຓ ຕສ຺ສ ນຕ຺ຖິ ຎຕ຺ວາ ຈ ທິສ຺ວາ ຈ ສມຸຄ຺ຄຫີຕໍ.

ນ ຣາຄຣາຄີ ນ ວິຣາຄຣຕ຺ໂຕຕິ. ຣາຄຣຕ຺ຕາ ວຸຈ຺ຈນ຺ຕິ ເຍ ປຎ຺ຈສຸ ກາມຄຸເຓສຸ ຣຕ຺ຕາ ຄິທ຺ຘາ ຄຘິຕາ ມຸຈ຺ຉິຕາ ອຊ຺ໂຌສນ຺ນາ ລຄ຺ຄາ ລຄ຺ຄິຕາ ປລິພຸທ຺ຘາ. ວິຣາຄຣຕ຺ຕາ ວຸຈ຺ຈນ຺ຕິ ເຍ ຣູປາວຈຣອຣູປາວຈຣສມາປຕ຺ຕີສຸ ຣຕ຺ຕາ ຄິທ຺ຘາ ຄຘິຕາ ມຸຈ຺ຉິຕາ ອຊ຺ໂຌສນ຺ນາ ລຄ຺ຄາ ລຄ຺ຄິຕາ ປລິພຸທ຺ຘາ. ນ ຣາຄຣາຄີ ນ ວິຣາຄຣຕ຺ໂຕຕິ ຍໂຕ ກາມຣາໂຄ ຈ ຣູປຣາໂຄ ຈ ອຣູປຣາໂຄ ຈ ປຫີນາ ໂຫນ຺ຕິ ອຸຈ຺ຉິນ຺ນມູລາ ຕາລາວຕ຺ຖຸກຕາ ອນຠາວໍກຕາ [ອນຠາວກຕາ (ສີ.), ອນຠາວໍຄຕາ (ສ຺ຍາ.)] ອາຍຕິໍ ອນຸປ຺ປາທຘມ຺ມາ. ເອຕ຺ຕາວຕາ ນ ຣາຄຣາຄີ ນ ວິຣາຄຣຕ຺ໂຕ.

ຕສ຺ສີຘ ນຕ຺ຖິ ປຣມຸຄ຺ຄຫີຕນ຺ຕິ. ຕສ຺ສາຕິ ອຣຫໂຕ ຂີຓາສວສ຺ສ. ຕສ຺ສ ອິທໍ ປຣມໍ ອຄ຺ຄໍ ເສຏ຺ຐໍ ວິສິຏ຺ຐໍ ປາໂມກ຺ຂໍ ອຸຕ຺ຕມໍ ປວຣນ຺ຕິ ຄຫິຕໍ ປຣາມຏ຺ຐໍ ອຠິນິວິຏ຺ຐໍ ອຊ຺ໂຌສິຕໍ ອຘິມຸຕ຺ຕໍ ນຕ຺ຖິ ນ ສນ຺ຕິ ນ ສໍວິຊ຺ຊຕິ ນຸປລພ຺ຠຕິ, ປຫີນໍ ສມຸຈ຺ຉິນ຺ນໍ ວູປສນ຺ຕໍ ປຏິປສ຺ສທ຺ຘໍ ອຠພ຺ພຸປ຺ປຕ຺ຕິກໍ ຎາຓຄ຺ຄິນາ ທຑ຺ຒນ຺ຕິ – ຕສ຺ສີຘ ນຕ຺ຖິ ປຣມຸຄ຺ຄຫີຕໍ.

ເຕນາຫ ຠຄວາ –

‘‘ສີມາຕິໂຄ ພ຺ຣາຫ຺ມໂຓ ຕສ຺ສ ນຕ຺ຖິ, ຎຕ຺ວາ ຈ ທິສ຺ວາ ຈ ສມຸຄ຺ຄຫີຕໍ;

ນ ຣາຄຣາຄີ ນ ວິຣາຄຣຕ຺ໂຕ, ຕສ຺ສີຘ ນຕ຺ຖິ ປຣມຸຄ຺ຄຫີຕ’’ນ຺ຕິ.

ສຸທ຺ຘຏ຺ຐກສຸຕ຺ຕນິທ຺ເທໂສ ຈຕຸຕ຺ໂຖ.