໑໒. ຈູຬວິຍູຫສຸຕ຺ຕນິທ຺ເທໂສ

ອຖ ຈູຬວິຍູຫສຸຕ຺ຕນິທ຺ເທສໍ ວກ຺ຂຕິ –

໑໑໓. ສກໍ ສກໍ ທິຏ຺ຐິປຣິພ຺ພສານາ, ວິຄ຺ຄຍ຺ຫ ນານາ ກຸສລາ ວທນ຺ຕິ;

ໂຍ ເອວໍ ຊານາຕິ [ເອວໍ ປຊານາຕິ (ສີ.)] ສ ເວທິ ຘມ຺ມໍ, ອິທໍ ປຏິກ຺ໂກສມເກວລີ ໂສ.

ສກໍ ສກໍ ທິຏ຺ຐິປຣິພ຺ພສານາຕິ. ສນ຺ເຕເກ ສມຓພ຺ຣາຫ຺ມຓາ ທິຏ຺ຐິຄຕິກາ; ເຕ ທ຺ວາສຏ຺ຐິຍາ ທິຏ຺ຐິຄຕານໍ ອຎ຺ຎຕຣຎ຺ຎຕຣໍ ທິຏ຺ຐິຄຕໍ ຄເຫຕ຺ວາ ອຸຄ຺ຄເຫຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາ ສກາຍ ສກາຍ ທິຏ຺ຐິຍາ ວສນ຺ຕິ ສໍວສນ຺ຕິ ອາວສນ຺ຕິ ປຣິວສນ຺ຕິ. ຍຖາ ອຄາຣິກາ ຆເຣສຸ ວສນ຺ຕິ, ສາປຕ຺ຕິກາ ວາ ອາປຕ຺ຕີສຸ ວສນ຺ຕິ, ສກິເລສາ ວາ ກິເລເສສຸ ວສນ຺ຕິ; ເອວເມວ ສນ຺ເຕເກ ສມຓພ຺ຣາຫ຺ມຓາ ທິຏ຺ຐິຄຕິກາ, ເຕ ທ຺ວາສຏ຺ຐິຍາ ທິຏ຺ຐິຄຕານໍ ອຎ຺ຎຕຣຎ຺ຎຕຣໍ ທິຏ຺ຐິຄຕໍ ຄເຫຕ຺ວາ ອຸຄ຺ຄເຫຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາ ສກາຍ ສກາຍ ທິຏ຺ຐິຍາ ວສນ຺ຕິ ສໍວສນ຺ຕິ ອາວສນ຺ຕິ ປຣິວສນ຺ຕີຕິ – ສກໍ ສກໍ ທິຏ຺ຐິປຣິພ຺ພສານາ.

ວິຄ຺ຄຍ຺ຫ ນານາ ກຸສລາ ວທນ຺ຕີຕິ. ວິຄ຺ຄຍ຺ຫາຕິ ຄເຫຕ຺ວາ ອຸຄ຺ຄເຫຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາ ນານາ ວທນ຺ຕິ ວິວິຘໍ ວທນ຺ຕິ ອຎ຺ໂຎຎ຺ຎໍ ວທນ຺ຕິ ປຸຖຸ [ປຸຖຸໍ (ສີ.)] ວທນ຺ຕິ, ນ ເອກໍ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ກຸສລາຕິ ກຸສລວາທາ ປຓ຺ຑິຕວາທາ ຖິຣວາທາ ຎາຍວາທາ ເຫຕຸວາທາ ລກ຺ຂຓວາທາ ກາຣຓວາທາ ຐານວາທາ ສກາຍ ລທ຺ຘິຍາຕິ – ວິຄ຺ຄຍ຺ຫ ນານາ ກຸສລາ ວທນ຺ຕິ.

ໂຍ ເອວໍ ຊານາຕິ ສ ເວທິ ຘມ຺ມນ຺ຕິ. ໂຍ ອິມໍ [ອິທໍ (ສີ. ກ.)] ຘມ຺ມໍ ທິຏ຺ຐິໍ ປຏິປທໍ ມຄ຺ຄໍ ຊານາຕິ ໂສ ຘມ຺ມໍ ເວທິ ອຎ຺ຎາສິ ອປສ຺ສິ ປຏິວິຊ຺ຌີຕິ – ໂຍ ເອວໍ ຊານາຕິ ສ ເວທິ ຘມ຺ມໍ.

ອິທໍ ປຏິກ຺ໂກສມເກວລີ ໂສຕິ. ໂຍ ອິມໍ ຘມ຺ມໍ ທິຏ຺ຐິໍ ປຏິປທໍ ມຄ຺ຄໍ ປຏິກ຺ໂກສຕິ, ອເກວລີ ໂສ ອສມຕ຺ໂຕ ໂສ ອປຣິປຸຓ຺ໂຓ ໂສ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕຕິ – ອິທໍ ປຏິກ຺ໂກສມເກວລີ ໂສ.

ເຕນາຫ ໂສ ນິມ຺ມິໂຕ –

‘‘ສກໍ ສກໍ ທິຏ຺ຐິປຣິພ຺ພສານາ, ວິຄ຺ຄຍ຺ຫ ນານາ ກຸສລາ ວທນ຺ຕິ;

ໂຍ ເອວໍ ຊານາຕິ ສ ເວທິ ຘມ຺ມໍ, ອິທໍ ປຏິກ຺ໂກສມເກວລີ ໂສ’’ຕິ.

໑໑໔. ເອວມ຺ປິ ວິຄ຺ຄຍ຺ຫ ວິວາທຍນ຺ຕິ, ພາໂລ ປໂຣ ອກ຺ກຸສໂລຕິ ຈາຫຸ;

ສຈ຺ໂຈ ນຸ ວາໂທ ກຕໂມ ອິເມສໍ, ສພ຺ເພວ ຫີເມ ກຸສລາວທານາ.

ເອວມ຺ປິ ວິຄ຺ຄຍ຺ຫ ວິວາທຍນ຺ຕີຕິ. ເອວໍ ຄເຫຕ຺ວາ ອຸຄ຺ຄເຫຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາ ວິວາທຍນ຺ຕິ, ກລຫໍ ກໂຣນ຺ຕິ, ຠຓ຺ຑນໍ ກໂຣນ຺ຕິ, ວິຄ຺ຄຫໍ ກໂຣນ຺ຕິ, ວິວາທໍ ກໂຣນ຺ຕິ, ເມຘຄໍ ກໂຣນ຺ຕິ – ‘‘ນ ຕ຺ວໍ ອິມໍ ຘມ຺ມວິນຍໍ ອາຊານາສິ…ເປ… ນິພ຺ເພເຐຫິ ວາ ສເຈ ປໂຫສີ’’ຕິ – ເອວມ຺ປິ ວິຄ຺ຄຍ຺ຫ ວິວາທຍນ຺ຕິ.

ພາໂລ ປໂຣ ອກ຺ກຸສໂລຕິ ຈາຫູຕິ. ປໂຣ ພາໂລ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕ ອກຸສໂລ ອວິທ຺ວາ ອວິຊ຺ຊາຄໂຕ ອຎ຺ຎາຓີ ອວິຠາວີ ທຸປ຺ປຎ຺ໂຎຕິ, ເອວມາຫໍສຸ ເອວໍ ກເຖນ຺ຕິ ເອວໍ ຠຓນ຺ຕິ ເອວໍ ທີປຍນ຺ຕິ ເອວໍ ໂວຫຣນ຺ຕີຕິ – ພາໂລ ປໂຣ ອກ຺ກຸສໂລຕິ ຈາຫຸ.

ສຈ຺ໂຈ ນຸ ວາໂທ ກຕໂມ ອິເມສນ຺ຕິ. ອິເມສໍ ສມຓພ຺ຣາຫ຺ມຓານໍ ວາໂທ ກຕໂມ ສຈ຺ໂຈ ຕຈ຺ໂຉ ຕໂຖ ຠູໂຕ ຍາຖາໂວ ອວິປຣີໂຕຕິ – ສຈ຺ໂຈ ນຸ ວາໂທ ກຕໂມ ອິເມສໍ.

ສພ຺ເພວ ຫີເມ ກຸສລາວທານາຕິ. ສພ຺ເພວິເມ ສມຓພ຺ຣາຫ຺ມຓາ ກຸສລວາທາ ປຓ຺ຑິຕວາທາ ຖິຣວາທາ ຎາຍວາທາ ເຫຕຸວາທາ ລກ຺ຂຓວາທາ ກາຣຓວາທາ ຐານວາທາ ສກາຍ ລທ຺ຘິຍາຕິ – ສພ຺ເພວ ຫີເມ ກຸສລາວທານາ.

ເຕນາຫ ໂສ ນິມ຺ມິໂຕ –

‘‘ເອວມ຺ປິ ວິຄ຺ຄຍ຺ຫ ວິວາທຍນ຺ຕິ, ພາໂລ ປໂຣ ອກ຺ກຸສໂລຕິ ຈາຫຸ;

ສຈ຺ໂຈ ນຸ ວາໂທ ກຕໂມ ອິເມສໍ, ສພ຺ເພວ ຫີເມ ກຸສລາວທານາ’’ຕິ.

໑໑໕. ປຣສ຺ສ ເຈ ຘມ຺ມມນານຸຊານໍ, ພາໂລມໂກ ໂຫຕິ ນິຫີນປຎ຺ໂຎ;

ສພ຺ເພວ ພາລາ ສຸນິຫີນປຎ຺ຎາ, ສພ຺ເພວິເມ ທິຏ຺ຐິປຣິພ຺ພສານາ.

ປຣສ຺ສ ເຈ ຘມ຺ມມນານຸຊານນ຺ຕິ. ປຣສ຺ສ ຘມ຺ມໍ ທິຏ຺ຐິໍ ປຏິປທໍ ມຄ຺ຄໍ ອນານຸຊານນ຺ໂຕ ອນານຸປສ຺ສນ຺ໂຕ ອນານຸມນນ຺ໂຕ ອນານຸມຎ຺ຎນ຺ໂຕ ອນານຸໂມທນ຺ໂຕຕິ – ປຣສ຺ສ ເຈ ຘມ຺ມມນານຸຊານໍ.

ພາໂລມໂກ ໂຫຕິ ນິຫີນປຎ຺ໂຎຕິ. ປໂຣ ພາໂລ ໂຫຕິ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕ, ຫີນປຎ຺ໂຎ ນິຫີນປຎ຺ໂຎ ໂອມກປຎ຺ໂຎ ລາມກປຎ຺ໂຎ ຉຕຸກ຺ກປຎ຺ໂຎ ປຣິຕ຺ຕປຎ຺ໂຎຕິ – ພາໂລມໂກ ໂຫຕິ ນິຫີນປຎ຺ໂຎ.

ສພ຺ເພວ ພາລາ ສຸນິຫີນປຎ຺ຎາຕິ. ສພ຺ເພວິເມ ສມຓພ຺ຣາຫ຺ມຓາ ພາລາ ຫີນາ ນິຫີນາ ໂອມກາ ລາມກາ ຉຕຸກ຺ກາ ປຣິຕ຺ຕາ, ສພ຺ເພວ ຫີນປຎ຺ຎາ ນິຫີນປຎ຺ຎາ ໂອມກປຎ຺ຎາ ລາມກປຎ຺ຎາ ຉຕຸກ຺ກປຎ຺ຎາ ປຣິຕ຺ຕປຎ຺ຎາຕິ – ສພ຺ເພວ ພາລາ ສຸນິຫີນປຎ຺ຎາ.

ສພ຺ເພວິເມ ທິຏ຺ຐິປຣິພ຺ພສານາຕິ. ສພ຺ເພວິເມ ສມຓພ຺ຣາຫ຺ມຓາ ທິຏ຺ຐິຄຕິກາ; ເຕ ທ຺ວາສຏ຺ຐິຍາ ທິຏ຺ຐິຄຕານໍ ອຎ຺ຎຕຣຎ຺ຎຕຣໍ ທິຏ຺ຐິຄຕໍ ຄເຫຕ຺ວາ ອຸຄ຺ຄເຫຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາ ສກາຍ ສກາຍ ທິຏ຺ຐິຍາ ວສນ຺ຕິ ສໍວສນ຺ຕິ ອາວສນ຺ຕິ ປຣິວສນ຺ຕິ. ຍຖາ ອຄາຣິກາ ວາ ຆເຣສຸ ວສນ຺ຕິ, ສາປຕ຺ຕິກາ ວາ ອາປຕ຺ຕີສຸ ວສນ຺ຕິ, ສກິເລສາ ວາ ກິເລເສສຸ ວສນ຺ຕິ; ເອວເມວ ສພ຺ເພວິເມ ສມຓພ຺ຣາຫ຺ມຓາ ທິຏ຺ຐິຄຕິກາ…ເປ… ປຣິວສນ຺ຕີຕິ – ສພ຺ເພວິເມ ທິຏ຺ຐິປຣິພ຺ພສານາ.

ເຕນາຫ ຠຄວາ –

‘‘ປຣສ຺ສ ເຈ ຘມ຺ມມນານຸຊານໍ, ພາໂລມໂກ ໂຫຕິ ນິຫີນປຎ຺ໂຎ;

ສພ຺ເພວ ພາລາ ສຸນິຫີນປຎ຺ຎາ, ສພ຺ເພວິເມ ທິຏ຺ຐິປຣິພ຺ພສານາ’’ຕິ.

໑໑໖. ສນ຺ທິຏ຺ຐິຍາ ເຈວ ນວີວທາຕາ, [ເຈວນເວວທາຕາ (ສີ.), ເຈ ປນ ວິວທາຕາ (ສ຺ຍາ.)] ສໍສຸທ຺ຘປຎ຺ຎາ ກຸສລາ ມຸຕີມາ;

ນ ເຕສໍ ໂກຈິ ປຣິຫີນປຎ຺ໂຎ, ທິຏ຺ຐີ ຫິ ເຕສມ຺ປິ ຕຖາ ສມຕ຺ຕາ.

ສນ຺ທິຏ຺ຐິຍາ ເຈວ ນວີວທາຕາຕິ. ສກາຍ ທິຏ຺ຐິຍາ ສກາຍ ຂນ຺ຕິຍາ ສກາຍ ຣຸຈິຍາ ສກາຍ ລທ຺ຘິຍາ ອນວີວທາຕາ ອໂວທາຕາ ອປຣິໂຍທາຕາ ສໍກິລິຏ຺ຐາ ສໍກິເລສິກາຕິ – ສນ຺ທິຏ຺ຐິຍາ ເຈວ ນວີວທາຕາ.

ສໍສຸທ຺ຘປຎ຺ຎາ ກຸສລາ ມຸຕີມາຕິ. ສຸທ຺ຘປຎ຺ຎາ ວິສຸທ຺ຘປຎ຺ຎາ ປຣິສຸທ຺ຘປຎ຺ຎາ ໂວທາຕປຎ຺ຎາ ປຣິໂຍທາຕປຎ຺ຎາ. ອຖ ວາ ສຸທ຺ຘທສ຺ສນາ ວິສຸທ຺ຘທສ຺ສນາ ປຣິສຸທ຺ຘທສ຺ສນາ ໂວທາຕທສ຺ສນາ ປຣິໂຍທາຕທສ຺ສນາຕິ – ສໍສຸທ຺ຘປຎ຺ຎາ. ກຸສລາຕິ ກຸສລາ ປຓ຺ຑິຕາ ປຎ຺ຎວນ຺ໂຕ ອິທ຺ຘິມນ຺ໂຕ ຎາຓິໂນ ວິຠາວິໂນ ເມຘາວິໂນຕິ – ສໍສຸທ຺ຘປຎ຺ຎາ ກຸສລາ. ມຸຕີມາຕິ ມຸຕິມາ ປຓ຺ຑິຕາ ປຎ຺ຎວນ຺ໂຕ ອິທ຺ຘິມນ຺ໂຕ ຎາຓິໂນ ວິຠາວິໂນ ເມຘາວິໂນຕິ – ສໍສຸທ຺ຘປຎ຺ຎາ ກຸສລາ ມຸຕີມາ.

ເຕສໍ ນ ໂກຈິ ປຣິຫີນປຎ຺ໂຎຕິ. ເຕສໍ ສມຓພ຺ຣາຫ຺ມຓານໍ ນ ໂກຈິ ຫີນປຎ຺ໂຎ ນິຫີນປຎ຺ໂຎ ໂອມກປຎ຺ໂຎ ລາມກປຎ຺ໂຎ ຉຕຸກ຺ກປຎ຺ໂຎ ປຣິຕ຺ຕປຎ຺ໂຎ ອຕ຺ຖິ. ສພ຺ເພວ ເສຏ຺ຐປຎ຺ຎາ ວິສິຏ຺ຐປຎ຺ຎາ ປາໂມກ຺ຂປຎ຺ຎາ ອຸຕ຺ຕມປຎ຺ຎາ ປວຣປຎ຺ຎາຕິ – ເຕສໍ ນ ໂກຈິ ປຣິຫີນປຎ຺ໂຎ.

ທິຏ຺ຐີ ຫິ ເຕສມ຺ປິ ຕຖາ ສມຕ຺ຕາຕິ. ເຕສໍ ສມຓພ຺ຣາຫ຺ມຓານໍ ທິຏ຺ຐິ ຕຖາ ສມຕ຺ຕາ ສມາທິນ຺ນາ ຄຫິຕາ ປຣາມຏ຺ຐາ ອຠິນິວິຏ຺ຐາ ອຊ຺ໂຌສິຕາ ອຘິມຸຕ຺ຕາຕິ – ທິຏ຺ຐີ ຫິ ເຕສມ຺ປິ ຕຖາ ສມຕ຺ຕາ.

ເຕນາຫ ຠຄວາ –

‘‘ສນ຺ທິຏ຺ຐິຍາ ເຈວ ນວີວທາຕາ, ສໍສຸທ຺ຘປຎ຺ຎາ ກຸສລາ ມຸຕີມາ;

ເຕສໍ ນ ໂກຈິ ປຣິຫີນປຎ຺ໂຎ, ທິຏ຺ຐີ ຫິ ເຕສມ຺ປິ ຕຖາ ສມຕ຺ຕາ’’ຕິ.

໑໑໗. ນ ວາຫເມຕໍ ຕຖິຍນ຺ຕິ [ຕຖິວນ຺ຕິ (ສ຺ຍາ.)] ພ຺ຣູມິ, ຍມາຫຸ ພາລາ ມິຖຸ ອຎ຺ຎມຎ຺ຎໍ;

ສກໍ ສກໍ ທິຏ຺ຐິມກໍສຸ ສຈ຺ຈໍ, ຕສ຺ມາ ຫິ ພາໂລຕິ ປຣໍ ທຫນ຺ຕິ.

ນ ວາຫເມຕໍ ຕຖິຍນ຺ຕິ ພ຺ຣູມີຕິ. ນາຕິ ປຏິກ຺ເຂໂປ. ເອຕນ຺ຕິ ‘‘ທ຺ວາສຏ຺ຐິທິຏ຺ຐິຄຕານິ ນາຫໍ ເອຕໍ ຕຈ຺ຉໍ ຕຖໍ ຠູຕໍ ຍາຖາວໍ ອວິປຣີຕ’’ນ຺ຕິ ພ຺ຣູມິ ອາຈິກ຺ຂາມິ ເທເສມິ ປຎ຺ຎເປມິ ປຏ຺ຐເປມິ ວິວຣາມິ ວິຠຊາມິ ອຸຕ຺ຕານີກໂຣມິ ປກາເສມີຕິ – ນ ວາຫເມຕໍ ຕຖິຍນ຺ຕິ ພ຺ຣູມິ.

ຍມາຫຸ ພາລາ ມິຖຸ ອຎ຺ຎມຎ຺ຎນ຺ຕິ. ມິຖູຕິ ທ຺ເວ ຊນາ, ທ຺ເວ ກລຫກາຣກາ, ທ຺ເວ ຠຓ຺ຑນກາຣກາ, ທ຺ເວ ຠສ຺ສກາຣກາ, ທ຺ເວ ວິວາທກາຣກາ, ທ຺ເວ ອຘິກຣຓກາຣກາ, ທ຺ເວ ວາທິໂນ, ທ຺ເວ ສລ຺ລປກາ; ເຕ ອຎ຺ຎມຎ຺ຎໍ ພາໂລ [ພາລໂຕ (ສີ. ກ.) ເອວມຎ຺ເຎສຸ ຉປ຺ປເທສຸປິ ໂຕປຈ຺ຈຍນ຺ຕວເສນ] ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕຕິ, ເອວມາຫໍສຸ ເອວໍ ກເຖນ຺ຕິ ເອວໍ ຠຓນ຺ຕິ ເອວໍ ທີປຍນ຺ຕິ ເອວໍ ໂວຫຣນ຺ຕີຕິ – ຍມາຫຸ ພາລາ ມິຖຸ ອຎ຺ຎມຎ຺ຎໍ.

ສກໍ ສກໍ ທິຏ຺ຐິມກໍສຸ ສຈ຺ຈນ຺ຕິ. ‘‘ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ – ສກໍ ສກໍ ທິຏ຺ຐິມກໍສຸ ສຈ຺ຈໍ. ‘‘ອສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ…ເປ… ‘‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ – ສກໍ ສກໍ ທິຏ຺ຐິມກໍສຸ ສຈ຺ຈໍ.

ຕສ຺ມາ ຫິ ພາໂລຕິ ປຣໍ ທຫນ຺ຕີຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາ ປຣໍ ພາໂລ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕຕິ ທຫນ຺ຕິ ປສ຺ສນ຺ຕິ ທກ຺ຂນ຺ຕິ ໂອໂລເກນ຺ຕິ ນິຊ຺ຌາຍນ຺ຕິ ອຸປປຣິກ຺ຂນ຺ຕີຕິ – ຕສ຺ມາ ຫິ ພາໂລຕິ ປຣໍ ທຫນ຺ຕິ.

ເຕນາຫ ຠຄວາ –

‘‘ນ ວາຫເມຕໍ ຕຖິຍນ຺ຕິ ພ຺ຣູມິ, ຍມາຫຸ ພາລາ ມິຖຸ ອຎ຺ຎມຎ຺ຎໍ;

ສກໍ ສກໍ ທິຏ຺ຐິມກໍສຸ ສຈ຺ຈໍ, ຕສ຺ມາ ຫິ ພາໂລຕິ ປຣໍ ທຫນ຺ຕີ’’ຕິ.

໑໑໘. ຍມາຫຸ ສຈ຺ຈໍ ຕຖິຍນ຺ຕິ ເອເກ, ຕມາຫຸ ອຎ຺ເຎປິ [ອຎ຺ເຎ (ສີ. ກ.)] ຕຸຈ຺ຉໍ ມຸສາຕິ;

ເອວມ຺ປິ ວິຄ຺ຄຍ຺ຫ ວິວາທຍນ຺ຕິ, ກສ຺ມາ ນ ເອກໍ ສມຓາ ວທນ຺ຕິ.

ຍມາຫຸ ສຈ຺ຈໍ ຕຖິຍນ຺ຕິ ເອເກຕິ. ຍໍ ຘມ຺ມໍ ທິຏ຺ຐິໍ ປຏິປທໍ ມຄ຺ຄໍ ເອເກ ສມຓພ຺ຣາຫ຺ມຓາ ‘‘ອິທໍ ສຈ຺ຈໍ ຕຈ຺ຉໍ ຕຖໍ ຠູຕໍ ຍາຖາວໍ ອວິປຣີຕ’’ນ຺ຕິ, ເອວມາຫໍສຸ ເອວໍ ກເຖນ຺ຕິ ເອວໍ ຠຓນ຺ຕິ ເອວໍ ທີປຍນ຺ຕິ ເອວໍ ໂວຫຣນ຺ຕີຕິ – ຍມາຫຸ ສຈ຺ຈໍ ຕຖິຍນ຺ຕິ ເອເກ.

ຕມາຫຸ ອຎ຺ເຎປິ ຕຸຈ຺ຉໍ ມຸສາຕີຕິ. ຕເມວ ຘມ຺ມໍ ທິຏ຺ຐິໍ ປຏິປທໍ ມຄ຺ຄໍ ເອເກ ສມຓພ຺ຣາຫ຺ມຓາ ‘‘ຕຸຈ຺ຉໍ ເອຕໍ, ມຸສາ ເອຕໍ, ອຠູຕໍ ເອຕໍ, ອລິກໍ ເອຕໍ, ອຍາຖາວໍ ເອຕ’’ນ຺ຕິ, ເອວມາຫໍສຸ ເອວໍ ກເຖນ຺ຕິ ເອວໍ ຠຓນ຺ຕິ ເອວໍ ທີປຍນ຺ຕິ ເອວໍ ໂວຫຣນ຺ຕີຕິ – ຕມາຫຸ ອຎ຺ເຎປິ ຕຸຈ຺ຉໍ ມຸສາຕິ.

ກສ຺ມາ ນ ເອກໍ ສມຓາ ວທນ຺ຕີຕິ. ກສ຺ມາຕິ ກສ຺ມາ ກິໍກາຣຓາ ກິໍເຫຕຸ ກິໍປຈ຺ຈຍາ ກິໍນິທານາ ກິໍສມຸທຍາ ກິໍຊາຕິກາ ກິໍປຠວາ ນ ເອກໍ ວທນ຺ຕິ ນານາ ວທນ຺ຕິ ວິວິຘໍ ວທນ຺ຕິ ອຎ຺ໂຎຎ຺ຎໍ [ອຎ຺ໂຎຎ຺ເຎ (ກ.)] ວທນ຺ຕິ ປຸຖຸ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕີຕິ – ກສ຺ມາ ນ ເອກໍ ສມຓາ ວທນ຺ຕິ.

ເຕນາຫ ໂສ ນິມ຺ມິໂຕ –

‘‘ຍມາຫຸ ສຈ຺ຈໍ ຕຖິຍນ຺ຕິ ເອເກ, ຕມາຫຸ ອຎ຺ເຎປິ ຕຸຈ຺ຉໍ ມຸສາຕິ;

ເອວມ຺ປິ ວິຄ຺ຄຍ຺ຫ ວິວາທຍນ຺ຕິ, ກສ຺ມາ ນ ເອກໍ ສມຓາ ວທນ຺ຕີ’’ຕິ.

໑໑໙. ເອກຎ຺ຫິ ສຈ຺ຈໍ ນ ທຸຕີຍມຕ຺ຖິ, ຍສ຺ມິໍ ປຊາ ໂນ ວິວເທ ປຊານໍ;

ນານາ ເຕ ສຈ຺ຈານິ ສຍໍ ຖຸນນ຺ຕິ, ຕສ຺ມາ ນ ເອກໍ ສມຓາ ວທນ຺ຕິ.

ເອກຎ຺ຫິ ສຈ຺ຈໍ ນ ທຸຕີຍມຕ຺ຖີຕິ. ເອກໍ ສຈ຺ຈໍ ວຸຈ຺ຈຕິ ທຸກ຺ຂນິໂຣໂຘ ນິພ຺ພານໍ. ໂຍ ໂສ ສພ຺ພສງ຺ຂາຣສມໂຖ ສພ຺ພູປຘິປຏິນິສ຺ສຄ຺ໂຄ ຕຓ຺ຫກ຺ຂໂຍ ວິຣາໂຄ ນິໂຣໂຘ ນິພ຺ພານໍ. ອຖ ວາ ເອກໍ ສຈ຺ຈໍ ວຸຈ຺ຈຕິ – ມຄ຺ຄສຈ຺ຈໍ, ນິຍ຺ຍານສຈ຺ຈໍ, ທຸກ຺ຂນິໂຣຘຄາມິນີ ປຏິປທາ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເສຍ຺ຍຖິທໍ – ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຈາ, ສມ຺ມາກມ຺ມນ຺ໂຕ, ສມ຺ມາອາຊີໂວ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘີຕິ – ເອກຎ຺ຫິ ສຈ຺ຈໍ ນ ທຸຕີຍມຕ຺ຖິ.

ຍສ຺ມິໍ ປຊາ ໂນ ວິວເທ ປຊານນ຺ຕິ. ຍສ຺ມິນ຺ຕິ ຍສ຺ມິໍ ສຈ຺ເຈ. ປຊາຕິ ສຕ຺ຕາຘິວຈນໍ. ປຊານນ຺ຕິ [ປຊານໍ (ສີ. ກ.), ປຊາ (ສ຺ຍາ.)] ຍໍ ສຈ຺ຈໍ ປຊານນ຺ຕາ ອາຊານນ຺ຕາ ວິຊານນ຺ຕາ ປຏິວິຊານນ຺ຕາ ປຏິວິຊ຺ຌນ຺ຕາ ນ ກລຫໍ ກເຣຍ຺ຍຸໍ, ນ ຠຓ຺ຑນໍ ກເຣຍ຺ຍຸໍ, ນ ວິຄ຺ຄຫໍ ກເຣຍ຺ຍຸໍ, ນ ວິວາທໍ ກເຣຍ຺ຍຸໍ, ນ ເມຘຄໍ ກເຣຍ຺ຍຸໍ, ກລຫໍ ຠຓ຺ຑນໍ ວິຄ຺ຄຫໍ ວິວາທໍ ເມຘຄໍ ປຊເຫຍ຺ຍຸໍ, ວິໂນເທຍ຺ຍຸໍ, ພ຺ຍນ຺ຕິໍ ກເຣຍ຺ຍຸໍ [ພ຺ຍນ຺ຕີກເຣຍ຺ຍຸໍ (ສີ. ສ຺ຍາ.)], ອນຠາວໍ ຄເມຍ຺ຍຸນ຺ຕິ – ຍສ຺ມິໍ ປຊາ ໂນ ວິວເທ ປຊານໍ.

ນານາ ເຕ ສຈ຺ຈານິ ສຍໍ ຖຸນນ຺ຕີຕິ. ນານາ ເຕ ສຈ຺ຈານິ ສຍໍ ຖຸນນ຺ຕິ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ‘‘ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ສຍໍ ຖຸນນ຺ຕິ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ‘‘ອສສ຺ສໂຕ ໂລໂກ…ເປ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ສຍໍ ຖຸນນ຺ຕິ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕີຕິ – ນານາ ເຕ ສຈ຺ຈານິ ສຍໍ ຖຸນນ຺ຕິ.

ຕສ຺ມາ ນ ເອກໍ ສມຓາ ວທນ຺ຕີຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາ ນ ເອກໍ ວທນ຺ຕິ ນານາ ວທນ຺ຕິ ວິວິຘໍ ວທນ຺ຕິ ອຎ຺ໂຎຎ຺ຎໍ ວທນ຺ຕິ ປຸຖຸ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕີຕິ – ຕສ຺ມາ ນ ເອກໍ ສມຓາ ວທນ຺ຕິ.

ເຕນາຫ ຠຄວາ –

‘‘ເອກຎ຺ຫິ ສຈ຺ຈໍ ນ ທຸຕີຍມຕ຺ຖິ, ຍສ຺ມິໍ ປຊາ ໂນ ວິວເທ ປຊານໍ;

ນານາ ເຕ ສຈ຺ຈານິ ສຍໍ ຖຸນນ຺ຕິ, ຕສ຺ມາ ນ ເອກໍ ສມຓາ ວທນ຺ຕີ’’ຕິ.

໑໒໐. ກສ຺ມາ ນຸ ສຈ຺ຈານິ ວທນ຺ຕິ ນານາ, ປວາທິຍາເສ ກຸສລາວທານາ;

ສຈ຺ຈານິ ສຸຕານິ ພຫູນິ ນານາ, ອຸທາຫຸ ເຕ ຕກ຺ກມນຸສ຺ສຣນ຺ຕິ.

ກສ຺ມາ ນຸ ສຈ຺ຈານິ ວທນ຺ຕິ ນານາຕິ. ກສ຺ມາຕິ ກສ຺ມາ ກິໍກາຣຓາ ກິໍເຫຕຸ ກິໍປຈ຺ຈຍາ ກິໍນິທານາ ສຈ຺ຈານິ ນານາ [ນານານິ (ກ.)] ວທນ຺ຕິ, ວິວິຘານິ ວທນ຺ຕິ, ອຎ຺ໂຎຎ຺ຎານິ ວທນ຺ຕິ, ປຸຖູນິ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕີຕິ – ກສ຺ມາ ນຸ ສຈ຺ຈານິ ວທນ຺ຕິ ນານາ.

ປວາທິຍາເສ ກຸສລາວທານາຕິ. ປວາທິຍາເສຕິ ວິປ຺ປວທນ຺ຕີຕິປິ ປວາທິຍາເສ. ອຖ ວາ ສກໍ ສກໍ ທິຏ຺ຐິຄຕໍ ປວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ‘‘ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ປວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ‘‘ອສສ຺ສໂຕ ໂລໂກ…ເປ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ປວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ກຸສລາວທານາຕິ ກຸສລວາທາ ປຓ຺ຑິຕວາທາ ຖິຣວາທາ ຎາຍວາທາ ເຫຕຸວາທາ ລກ຺ຂຓວາທາ ກາຣຓວາທາ ຐານວາທາ ສກາຍ ລທ຺ຘິຍາຕິ – ປວາທິຍາເສ ກຸສລາວທານາ.

ສຈ຺ຈານິ ສຸຕານິ ພຫູນິ ນານາຕິ ສຈ຺ຈານິ ສຸຕານິ ພຫຸການິ ນານານິ ວິວິຘານິ ອຎ຺ໂຎຎ຺ຎານິ ປຸຖູນີຕິ – ສຈ຺ຈານິ ສຸຕານິ ພຫູນິ ນານາ.

ອຸທາຫຸ ເຕ ຕກ຺ກມນຸສ຺ສຣນ຺ຕີຕິ ອຸທາຫຸ ຕກ຺ເກນ ສງ຺ກປ຺ເປນ ຍາຍນ຺ຕິ ນີຍນ຺ຕິ ວຸຍ຺ຫນ຺ຕິ ສໍຫຣີຍນ຺ຕີຕິ. ເອວມ຺ປິ ອຸທາຫຸ ເຕ ຕກ຺ກມນຸສ຺ສຣນ຺ຕິ. ອຖ ວາ ຕກ຺ກປຣິຍາຫຕໍ ວີມໍສານຸຈຣິຕໍ ສຍໍ ປຏິຠານໍ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕີຕິ. ເອວມ຺ປິ ອຸທາຫຸ ເຕ ຕກ຺ກມນຸສ຺ສຣນ຺ຕິ.

ເຕນາຫ ໂສ ນິມ຺ມິໂຕ –

‘‘ກສ຺ມາ ນຸ ສຈ຺ຈານິ ວທນ຺ຕິ ນານາ, ປວາທິຍາເສ ກຸສລາວທານາ;

ສຈ຺ຈານິ ສຸຕານິ ພຫູນິ ນານາ, ອຸທາຫຸ ເຕ ຕກ຺ກມນຸສ຺ສຣນ຺ຕີ’’ຕິ.

໑໒໑. ນ ເຫວ ສຈ຺ຈານິ ພຫູນິ ນານາ, ອຎ຺ຎຕ຺ຣ ສຎ຺ຎາຍ ນິຈ຺ຈານິ ໂລເກ;

ຕກ຺ກຎ຺ຈ ທິຏ຺ຐີສຸ ປກປ຺ປຍິຕ຺ວາ, ສຈ຺ຈໍ ມຸສາຕິ ທ຺ວຍຘມ຺ມມາຫຸ.

ນ ເຫວ ສຈ຺ຈານິ ພຫູນິ ນານາຕິ ນ ເຫວ ສຈ຺ຈານິ ພຫຸການິ ນານານິ ວິວິຘານິ ອຎ຺ໂຎຎ຺ຎານິ ປຸຖູນີຕິ – ນ ເຫວ ສຈ຺ຈານິ ພຫູນິ ນານາ.

ອຎ຺ຎຕ຺ຣ ສຎ຺ຎາຍ ນິຈ຺ຈານິ ໂລເກຕິ ອຎ຺ຎຕ຺ຣ ສຎ຺ຎາຍ ນິຈ຺ຈຄ຺ຄາຫາ ເອກຎ຺ເຎວ ສຈ຺ຈໍ ໂລເກ ກຖີຍຕິ ຠຓີຍຕິ ທີປີຍຕິ ໂວຫຣີຍຕິ – ທຸກ຺ຂນິໂຣໂຘ ນິພ຺ພານໍ. ໂຍ ໂສ ສພ຺ພສງ຺ຂາຣສມໂຖ ສພ຺ພູປຘິປຏິນິສ຺ສຄ຺ໂຄ ຕຓ຺ຫກ຺ຂໂຍ ວິຣາໂຄ ນິໂຣໂຘ ນິພ຺ພານໍ. ອຖ ວາ ເອກໍ ສຈ຺ຈໍ ວຸຈ຺ຈຕິ ມຄ຺ຄສຈ຺ຈໍ, ນິຍ຺ຍານສຈ຺ຈໍ, ທຸກ຺ຂນິໂຣຘຄາມິນີ ປຏິປທາ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເສຍ຺ຍຖິທໍ – ສມ຺ມາທິຏ຺ຐິ …ເປ… ສມ຺ມາສມາຘີຕິ – ອຎ຺ຎຕ຺ຣ ສຎ຺ຎາຍ ນິຈ຺ຈານິ ໂລເກ.

ຕກ຺ກຎ຺ຈ ທິຏ຺ຐີສຸ ປກປ຺ປຍິຕ຺ວາ, ສຈ຺ຈໍ ມຸສາຕິ ທ຺ວຍຘມ຺ມມາຫູຕິ. ຕກ຺ກໍ ວິຕກ຺ກໍ ສງ຺ກປ຺ປໍ ຕກ຺ກຍິຕ຺ວາ ວິຕກ຺ກຍິຕ຺ວາ ສງ຺ກປ຺ປຍິຕ຺ວາ ທິຏ຺ຐິຄຕານິ ຊເນນ຺ຕິ ສຎ຺ຊເນນ຺ຕິ ນິພ຺ພຕ຺ເຕນ຺ຕິ ອຠິນິພ຺ພຕ຺ເຕນ຺ຕິ. ທິຏ຺ຐິຄຕານິ ຊເນຕ຺ວາ ສຎ຺ຊເນຕ຺ວາ ນິພ຺ພຕ຺ເຕຕ຺ວາ ອຠິນິພ຺ພຕ຺ເຕຕ຺ວາ ‘‘ມຍ຺ຫໍ ສຈ຺ຈໍ ຕຸຍ຺ຫໍ ມຸສາ’’ຕິ, ເອວມາຫໍສຸ ເອວໍ ກເຖນ຺ຕິ ເອວໍ ຠຓນ຺ຕິ ເອວໍ ທີປຍນ຺ຕິ ເອວໍ ໂວຫຣນ຺ຕີຕິ – ຕກ຺ກຎ຺ຈ ທິຏ຺ຐີສຸ ປກປ຺ປຍິຕ຺ວາ ສຈ຺ຈໍ ມຸສາຕິ ທ຺ວຍຘມ຺ມມາຫຸ.

ເຕນາຫ ຠຄວາ –

‘‘ນ ເຫວ ສຈ຺ຈານິ ພຫູນິ ນານາ, ອຎ຺ຎຕ຺ຣ ສຎ຺ຎາຍ ນິຈ຺ຈານິ ໂລເກ;

ຕກ຺ກຎ຺ຈ ທິຏ຺ຐີສຸ ປກປ຺ປຍິຕ຺ວາ, ສຈ຺ຈໍ ມຸສາຕິ ທ຺ວຍຘມ຺ມມາຫູ’’ຕິ.

໑໒໒. ທິຏ຺ເຐ ສຸເຕ ສີລວເຕ ມຸເຕ ວາ, ເອເຕ ຈ [ເອເຕສຸ (ສີ.)] ນິສ຺ສາຍ ວິມານທສ຺ສີ;

ວິນິຈ຺ຉເຍ ຐຕ຺ວາ ປຫສ຺ສມາໂນ, ພາໂລ ປໂຣ ອກ຺ກຸສໂລຕິ ຈາຫ.

ທິຏ຺ເຐ ສຸເຕ ສີລວເຕ ມຸເຕ ວາ, ເອເຕ ຈ ນິສ຺ສາຍ ວິມານທສ຺ສີຕິ. ທິຏ຺ຐໍ ວາ ທິຏ຺ຐສຸທ຺ຘິໍ ວາ, ສຸຕໍ ວາ ສຸຕສຸທ຺ຘິໍ ວາ, ສີລໍ ວາ ສີລສຸທ຺ຘິໍ ວາ, ວຕໍ ວາ ວຕສຸທ຺ຘິໍ ວາ, ມຸຕໍ ວາ ມຸຕສຸທ຺ຘິໍ ວາ ນິສ຺ສາຍ ອຸປນິສ຺ສາຍ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາຕິ – ທິຏ຺ເຐ ສຸເຕ ສີລວເຕ ມຸເຕ ວາ. ເອເຕ ຈ ນິສ຺ສາຍ ວິມານທສ຺ສີຕິ. ນ ສມ຺ມາເນຕີຕິປິ ວິມານທສ຺ສີ. ອຖ ວາ ໂທມນສ຺ສໍ ຊເນຕີຕິປິ ວິມານທສ຺ສີຕິ – ທິຏ຺ເຐ ສຸເຕ ສີລວເຕ ມຸເຕ ວາ ເອເຕ ຈ ນິສ຺ສາຍ ວິມານທສ຺ສີ.

ວິນິຈ຺ຉເຍ ຐຕ຺ວາ ປຫສ຺ສມາໂນຕິ. ວິນິຈ຺ຉຍາ ວຸຈ຺ຈນ຺ຕິ ທ຺ວາສຏ຺ຐິ ທິຏ຺ຐິຄຕານິ. ທິຏ຺ຐິວິນິຈ຺ຉເຍ ວິນິຈ຺ຉຍທິຏ຺ຐິຍາ ຐຕ຺ວາ ປຕິຏ຺ຐຫິຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາຕິ – ວິນິຈ຺ຉເຍ ຐຕ຺ວາ. ປຫສ຺ສມາໂນຕິ ຕຸຏ຺ໂຐ ໂຫຕິ ຫຏ຺ໂຐ ປຫຏ຺ໂຐ ອຕ຺ຕມໂນ ປຣິປຸຓ຺ຓສງ຺ກປ຺ໂປ. ອຖ ວາ ທນ຺ຕວິທໍສກໍ ປຫສ຺ສມາໂນຕິ – ວິນິຈ຺ຉເຍ ຐຕ຺ວາ ປຫສ຺ສມາໂນ.

ພາໂລ ປໂຣ ອກ຺ກຸສໂລຕິ ຈາຫາຕິ. ປໂຣ ພາໂລ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕ ອກຸສໂລ ອວິທ຺ວາ ອວິຊ຺ຊາຄໂຕ ອຎ຺ຎາຓີ ອວິຠາວີ ອເມຘາວີ ທຸປ຺ປຎ຺ໂຎຕິ, ເອວມາຫ ເອວໍ ກເຖຕິ ເອວໍ ຠຓຕິ ເອວໍ ທີປຍຕິ ເອວໍ ໂວຫຣຕີຕິ – ພາໂລ ປໂຣ ອກ຺ກຸສໂລຕິ ຈາຫ.

ເຕນາຫ ຠຄວາ –

‘‘ທິຏ຺ເຐ ສຸເຕ ສີລວເຕ ມຸເຕ ວາ, ເອເຕ ຈ ນິສ຺ສາຍ ວິມານທສ຺ສີ;

ວິນິຈ຺ຉເຍ ຐຕ຺ວາ ປຫສ຺ສມາໂນ, ພາໂລ ປໂຣ ອກ຺ກຸສໂລຕິ ຈາຫາ’’ຕິ.

໑໒໓. ເຍເນວ ພາໂລຕິ ປຣໍ ທຫາຕິ, ເຕນາຕຸມານໍ ກຸສໂລຕິ ຈາຫ;

ສຍມຕ຺ຕນາ ໂສ ກຸສລາວທາໂນ, ອຎ຺ຎໍ ວິມາເນຕິ ຕເທວ ປາວ.

ເຍເນວ ພາໂລຕິ ປຣໍ ທຫາຕີຕິ. ເຍເນວ ເຫຕຸນາ ເຍນ ປຈ຺ຈເຍນ ເຍນ ກາຣເຓນ ເຍນ ປຠເວນ ປຣໍ ພາລໂຕ ຫີນໂຕ ນິຫີນໂຕ ໂອມກໂຕ ລາມກໂຕ ຉຕຸກ຺ກໂຕ ປຣິຕ຺ຕໂຕ ທຫຕິ ປສ຺ສຕິ ທກ຺ຂຕິ ໂອໂລເກຕິ ນິຊ຺ຌາຍຕິ ອຸປປຣິກ຺ຂຕີຕິ – ເຍເນວ ພາໂລຕິ ປຣໍ ທຫາຕິ.

ເຕນາຕຸມານໍ ກຸສໂລຕິ ຈາຫາຕິ. ອາຕຸມາໂນ ວຸຈ຺ຈຕິ ອຕ຺ຕາ. ໂສປິ ເຕເນວ ເຫຕຸນາ ເຕນ ປຈ຺ຈເຍນ ເຕນ ກາຣເຓນ ເຕນ ປຠເວນ ອຕ຺ຕານໍ ອຫມສ຺ມິ ກຸສໂລ ປຓ຺ຑິໂຕ ປຎ຺ຎວາ ພຸທ຺ຘິມາ ຎາຓີ ວິຠາວີ ເມຘາວີຕິ – ເຕນາຕຸມານໍ ກຸສໂລຕິ ຈາຫ.

ສຍມຕ຺ຕນາ ໂສ ກຸສລາວທາໂນຕິ. ສຍເມວ ອຕ຺ຕານໍ ກຸສລວາໂທ ປຓ຺ຑິຕວາໂທ ຖິຣວາໂທ ຎາຍວາໂທ ເຫຕຸວາໂທ ລກ຺ຂຓວາໂທ ກາຣຓວາໂທ ຐານວາໂທ ສກາຍ ລທ຺ຘິຍາຕິ – ສຍມຕ຺ຕນາ ໂສ ກຸສລາວທາໂນ.

ອຎ຺ຎໍ ວິມາເນຕິ ຕເທວ ປາວາຕິ. ນ ສມ຺ມາເນຕີຕິປິ ອຎ຺ຎໍ ວິມາເນຕິ. ອຖ ວາ ໂທມນສ຺ສໍ ຊເນຕີຕິປິ ອຎ຺ຎໍ ວິມາເນຕິ. ຕເທວ ປາວາຕິ ຕເທວ ຕໍ ທິຏ຺ຐິຄຕໍ ປາວທຕິ ‘‘ອິຕິປາຍໍ ປຸຄ຺ຄໂລ ມິຈ຺ຉາທິຏ຺ຐິໂກ ວິປຣີຕທສ຺ສໂນ’’ຕິ – ອຎ຺ຎໍ ວິມາເນຕິ ຕເທວ ປາວທ.

ເຕນາຫ ຠຄວາ –

‘‘ເຍເນວ ພາໂລຕິ ປຣໍ ທຫາຕິ, ເຕນາຕຸມານໍ ກຸສໂລຕິ ຈາຫ;

ສຍມຕ຺ຕນາ ໂສ ກຸສລາວທາໂນ, ອຎ຺ຎໍ ວິມາເນຕິ ຕເທວ ປາວາ’’ຕິ.

໑໒໔. ອຕິສາຣທິຏ຺ຐິຍາ ໂສ ສມຕ຺ໂຕ, ມາເນນ ມຕ຺ໂຕ ປຣິປຸຓ຺ຓມານີ;

ສຍເມວ ສາມໍ ມນສາຠິສິຕ຺ໂຕ, ທິຏ຺ຐີ ຫິ ສາ ຕສ຺ສ ຕຖາ ສມຕ຺ຕາ.

ອຕິສາຣທິຏ຺ຐິຍາ ໂສ ສມຕ຺ໂຕຕິ. ອຕິສາຣທິຏ຺ຐິໂຍ ວຸຈ຺ຈນ຺ຕິ ທ຺ວາສຏ຺ຐິ ທິຏ຺ຐິຄຕານິ. ກິໍກາຣຓາ ອຕິສາຣທິຏ຺ຐິໂຍ ວຸຈ຺ຈນ຺ຕິ ທ຺ວາສຏ຺ຐິ ທິຏ຺ຐິຄຕານິ? ສພ຺ພາ ຕາ ທິຏ຺ຐິໂຍ ກາຣຓາຕິກ຺ກນ຺ຕາ ລກ຺ຂຓາຕິກ຺ກນ຺ຕາ ຐານາຕິກ຺ກນ຺ຕາ, ຕໍກາຣຓາ ອຕິສາຣທິຏ຺ຐິໂຍ ວຸຈ຺ຈນ຺ຕິ ທ຺ວາສຏ຺ຐິ ທິຏ຺ຐິຄຕານິ. ສພ຺ພາປິ ທິຏ຺ຐິໂຍ ອຕິສາຣທິຏ຺ຐິໂຍ [ສພ຺ເພປິ ຕິຕ຺ຖິຍາ ອຕິສາຣທິຏ຺ຐິຍາ (ສ຺ຍາ.)]. ກິໍກາຣຓາ ສພ຺ພາປິ ທິຏ຺ຐິໂຍ ວຸຈ຺ຈນ຺ຕິ ອຕິສາຣທິຏ຺ຐິໂຍ? ເຕ [ຕາ (ກ.)] ອຎ຺ຎມຎ຺ຎໍ ອຕິກ຺ກມິຕ຺ວາ ສມຕິກ຺ກມິຕ຺ວາ ວີຕິວຕ຺ຕິຕ຺ວາ ທິຏ຺ຐິຄຕານິ ຊເນນ຺ຕິ ສຎ຺ຊເນນ຺ຕິ ນິພ຺ພຕ຺ເຕນ຺ຕິ ອຠິນິພ຺ພຕ຺ເຕນ຺ຕິ, ຕໍກາຣຓາ ສພ຺ພາປິ ທິຏ຺ຐິໂຍ ວຸຈ຺ຈນ຺ຕິ ອຕິສາຣທິຏ຺ຐິໂຍ. ອຕິສາຣທິຏ຺ຐິຍາ ໂສ ສມຕ຺ໂຕຕິ. ອຕິສາຣທິຏ຺ຐິຍາ ສມຕ຺ໂຕ ປຣິປຸຓ຺ໂຓ ອໂນໂມຕິ – ອຕິສາຣທິຏ຺ຐິຍາ ໂສ ສມຕ຺ໂຕ.

ມາເນນ ມຕ຺ໂຕ ປຣິປຸຓ຺ຓມານີຕິ. ສກາຍ ທິຏ຺ຐິຍາ ທິຏ຺ຐິມາເນນ ມຕ຺ໂຕ ປມຕ຺ໂຕ ອຸມ຺ມຕ຺ໂຕ ອຕິມຕ຺ໂຕຕິ – ມາເນນ ມຕ຺ໂຕ. ປຣິປຸຓ຺ຓມານີຕິ ປຣິປຸຓ຺ຓມານີ ສມຕ຺ຕມານີ ອໂນມມານີຕິ – ມາເນນ ມຕ຺ໂຕ ປຣິປຸຓ຺ຓມານີ.

ສຍເມວ ສາມໍ ມນສາຠິສິຕ຺ໂຕຕິ. ສຍເມວ ອຕ຺ຕານໍ ຈິຕ຺ເຕນ ອຠິສິຎ຺ຈຕິ ‘‘ອຫມສ຺ມິ ກຸສໂລ ປຓ຺ຑິໂຕ ປຎ຺ຎວາ ພຸທ຺ຘິມາ ຎາຓີ ວິຠາວີ ເມຘາວີ’’ຕິ – ສຍເມວ ສາມໍ ມນສາຠິສິຕ຺ໂຕ.

ທິຏ຺ຐີ ຫິ ສາ ຕສ຺ສ ຕຖາ ສມຕ຺ຕາຕິ. ຕສ຺ສ ສາ ທິຏ຺ຐິ ຕຖາ ສມຕ຺ຕາ ສມາທິນ຺ນາ ຄຫິຕາ ປຣາມຏ຺ຐາ ອຠິນິວິຏ຺ຐາ ອຊ຺ໂຌສິຕາ ອຘິມຸຕ຺ຕາຕິ – ທິຏ຺ຐີ ຫິ ສາ ຕສ຺ສ ຕຖາ ສມຕ຺ຕາ.

ເຕນາຫ ຠຄວາ –

‘‘ອຕິສາຣທິຏ຺ຐິຍາ ໂສ ສມຕ຺ໂຕ, ມາເນນ ມຕ຺ໂຕ ປຣິປຸຓ຺ຓມານີ;

ສຍເມວ ສາມໍ ມນສາຠິສິຕ຺ໂຕ, ທິຏ຺ຐີ ຫິ ສາ ຕສ຺ສ ຕຖາ ສມຕ຺ຕາ’’ຕິ.

໑໒໕. ປຣສ຺ສ ເຈ ຫິ ວຈສາ ນິຫີໂນ, ຕຸໂມ ສຫາ ໂຫຕິ ນິຫີນປຎ຺ໂຎ;

ອຖ ເຈ ສຍໍ ເວທຄູ ໂຫຕິ ຘີໂຣ, ນ ໂກຈິ ພາໂລ ສມເຓສຸ ອຕ຺ຖິ.

ປຣສ຺ສ ເຈ ຫິ ວຈສາ ນິຫີໂນຕິ ປຣສ຺ສ ເຈ ວາຈາຍ ວຈເນນ ນິນ຺ທິຕກາຣຓາ ຄຣຫິຕກາຣຓາ ອຸປວທິຕກາຣຓາ ປໂຣ ພາໂລ ໂຫຕິ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕຕິ – ປຣສ຺ສ ເຈ ຫິ ວຈສາ ນິຫີໂນ. ຕຸໂມ ສຫາ ໂຫຕິ ນິຫີນປຎ຺ໂຎຕິ. ໂສປິ ເຕເນວ ສຫາ ໂຫຕິ ຫີນປຎ຺ໂຎ ນິຫີນປຎ຺ໂຎ ໂອມກປຎ຺ໂຎ ລາມກປຎ຺ໂຎ ຉຕຸກ຺ກປຎ຺ໂຎ ປຣິຕ຺ຕປຎ຺ໂຎຕິ – ຕຸໂມ ສຫາ ໂຫຕິ ນິຫີນປຎ຺ໂຎ.

ອຖ ເຈ ສຍໍ ເວທຄູ ໂຫຕິ ຘີໂຣຕິ ອຖ ເຈ ສຍໍ ເວທຄູ ໂຫຕິ ຘີໂຣ ປຓ຺ຑິໂຕ ປຎ຺ຎວາ ພຸທ຺ຘິມາ ຎາຓີ ວິຠາວີ ເມຘາວີຕິ – ອຖ ເຈ ສຍໍ ເວທຄູ ໂຫຕິ ຘີໂຣ.

ນ ໂກຈິ ພາໂລ ສມເຓສຸ ອຕ຺ຖີຕິ. ສມເຓສຸ ນ ໂກຈິ ພາໂລ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕ ອຕ຺ຖິ, ສພ຺ເພວ ເສຏ຺ຐປຎ຺ຎາ [ອຄ຺ຄປຎ຺ຎາ ເສຏ຺ຐປຎ຺ຎາ (ສ຺ຍາ.)] ວິສິຏ຺ຐປຎ຺ຎາ ປາໂມກ຺ຂປຎ຺ຎາ ອຸຕ຺ຕມປຎ຺ຎາ ປວຣປຎ຺ຎາຕິ – ນ ໂກຈິ ພາໂລ ສມເຓສຸ ອຕ຺ຖິ.

ເຕນາຫ ຠຄວາ –

‘‘ປຣສ຺ສ ເຈ ຫິ ວຈສາ ນິຫີໂນ, ຕຸໂມ ສຫາ ໂຫຕິ ນິຫີນປຎ຺ໂຎ;

ອຖ ເຈ ສຍໍ ເວທຄູ ໂຫຕິ ຘີໂຣ, ນ ໂກຈິ ພາໂລ ສມເຓສຸ ອຕ຺ຖີ’’ຕິ.

໑໒໖. ອຎ຺ຎໍ ອິໂຕ ຍາຠິວທນ຺ຕິ ຘມ຺ມໍ, ອປຣທ຺ຘາ ສຸທ຺ຘິມເກວລີ ເຕ;

ເອວມ຺ປິ ຕິຕ຺ຖ຺ຍາ ປຸຖຸໂສ ວທນ຺ຕິ, ສນ຺ທິຏ຺ຐິຣາເຄນ ຫິ ເຕຠິຣຕ຺ຕາ.

ອຎ຺ຎໍ ອິໂຕ ຍາຠິວທນ຺ຕິ ຘມ຺ມໍ, ອປຣທ຺ຘາ ສຸທ຺ຘິມເກວລີ ເຕຕິ. ອິໂຕ ອຎ຺ຎໍ ຘມ຺ມໍ ທິຏ຺ຐິໍ ປຏິປທໍ ມຄ຺ຄໍ ເຍ ອຠິວທນ຺ຕິ, ເຕ ສຸທ຺ຘິມຄ຺ຄໍ ວິສຸທ຺ຘິມຄ຺ຄໍ ປຣິສຸທ຺ຘິມຄ຺ຄໍ ໂວທາຕມຄ຺ຄໍ ປຣິໂຍທາຕມຄ຺ຄໍ ວິຣທ຺ຘາ ອປຣທ຺ຘາ ຂລິຕາ ຄລິຕາ ອຎ຺ຎາຍ ອປຣທ຺ຘາ ອເກວລີ ເຕ, ອສມຕ຺ຕາ ເຕ, ອປຣິປຸຓ຺ຓາ ເຕ, ຫີນາ ນິຫີນາ ໂອມກາ ລາມກາ ຉຕຸກ຺ກາ ປຣິຕ຺ຕາຕິ – ອຎ຺ຎໍ ອິໂຕ ຍາຠິວທນ຺ຕິ ຘມ຺ມໍ, ອປຣທ຺ຘາ ສຸທ຺ຘິມເກວລີ ເຕ.

ເອວມ຺ປິ ຕິຕ຺ຖ຺ຍາ ປຸຖຸໂສ ວທນ຺ຕີຕິ. ຕິຕ຺ຖໍ ວຸຈ຺ຈຕິ ທິຏ຺ຐິຄຕໍ. ຕິຕ຺ຖິຍາ ວຸຈ຺ຈນ຺ຕິ ທິຏ຺ຐິຄຕິກາ. ປຸຖຸທິຏ຺ຐິຍາ ປຸຖຸທິຏ຺ຐິຄຕານິ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕີຕິ – ເອວມ຺ປິ ຕິຕ຺ຖ຺ຍາ ປຸຖຸໂສ ວທນ຺ຕິ.

ສນ຺ທິຏ຺ຐິຣາເຄນ ຫິ ເຕຠິຣຕ຺ຕາຕິ. ສກາຍ ທິຏ຺ຐິຍາ ທິຏ຺ຐິຣາເຄນ ຣຕ຺ຕາ ອຠິຣຕ຺ຕາຕິ – ສນ຺ທິຏ຺ຐິຣາເຄນ ຫິ ເຕຠິຣຕ຺ຕາ.

ເຕນາຫ ຠຄວາ –

‘‘ອຎ຺ຎໍ ອິໂຕ ຍາຠິວທນ຺ຕິ ຘມ຺ມໍ, ອປຣທ຺ຘາ ສຸທ຺ຘິມເກວລີ ເຕ;

ເອວມ຺ປິ ຕິຕ຺ຖ຺ຍາ ປຸຖຸໂສ ວທນ຺ຕິ, ສນ຺ທິຏ຺ຐິຣາເຄນ ຫິ ເຕຠິຣຕ຺ຕາ’’ຕິ.

໑໒໗. ອິເຘວ ສຸທ຺ຘິໍ ອິຕິ ວາທຍນ຺ຕິ, ນາຎ຺ເຎສຸ ຘມ຺ເມສຸ ວິສຸທ຺ຘິມາຫຸ;

ເອວມ຺ປິ ຕິຕ຺ຖ຺ຍາ ປຸຖຸໂສ ນິວິຏ຺ຐາ, ສກາຍເນ ຕຕ຺ຖ ທຬ຺ຫໍ ວທານາ.

ອິເຘວ ສຸທ຺ຘິໍ ອິຕິ ວາທຍນ຺ຕີຕິ. ອິຘ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ, ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ‘‘ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ອິຘ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ, ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕິ. ‘‘ອສສ຺ສໂຕ ໂລໂກ…ເປ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ອິຘ ສຸທ຺ຘິໍ ວິສຸທ຺ຘິໍ ປຣິສຸທ຺ຘິໍ ມຸຕ຺ຕິໍ ວິມຸຕ຺ຕິໍ ປຣິມຸຕ຺ຕິໍ ວທນ຺ຕິ ກເຖນ຺ຕິ ຠຓນ຺ຕິ ທີປຍນ຺ຕິ ໂວຫຣນ຺ຕີຕິ – ອິເຘວ ສຸທ຺ຘິໍ ອິຕິ ວາທຍນ຺ຕິ.

ນາຎ຺ເຎສຸ ຘມ຺ເມສຸ ວິສຸທ຺ຘິມາຫູຕິ. ອຕ຺ຕໂນ ສຕ຺ຖາຣໍ ຘມ຺ມກ຺ຂານໍ ຄຓໍ ທິຏ຺ຐິໍ ປຏິປທໍ ມຄ຺ຄໍ ຐເປຕ຺ວາ ສພ຺ເພ ປຣວາເທ ຂິປນ຺ຕິ ອຸກ຺ຂິປນ຺ຕິ ປຣິກ຺ຂິປນ຺ຕິ. ‘‘ໂສ ສຕ຺ຖາ ນ ສພ຺ພຎ຺ຎູ, ຘມ຺ໂມ ນ ສ຺ວາກ຺ຂາໂຕ, ຄໂຓ ນ ສຸປ຺ປຏິປນ຺ໂນ, ທິຏ຺ຐິ ນ ຠທ຺ທິກາ, ປຏິປທາ ນ ສຸປຎ຺ຎຕ຺ຕາ, ມຄ຺ໂຄ ນ ນິຍ຺ຍານິໂກ, ນຕ຺ເຖຕ຺ຖ ສຸທ຺ຘິ ວາ ວິສຸທ຺ຘິ ວາ ປຣິສຸທ຺ຘິ ວາ, ມຸຕ຺ຕິ ວາ ວິມຸຕ຺ຕິ ວາ ປຣິມຸຕ຺ຕິ ວາ, ນຕ຺ເຖຕ຺ຖ ສຸຊ຺ຌນ຺ຕິ ວາ ວິສຸຊ຺ຌນ຺ຕິ ວາ ປຣິສຸຊ຺ຌນ຺ຕິ ວາ, ມຸຈ຺ຈນ຺ຕິ ວາ ວິມຸຈ຺ຈນ຺ຕິ ວາ ປຣິມຸຈ຺ຈນ຺ຕິ ວາ ຫີນາ ນິຫີນາ ໂອມກາ ລາມກາ ຉຕຸກ຺ກາ ປຣິຕ຺ຕາ’’ຕິ, ເອວມາຫໍສຸ ເອວໍ ກເຖນ຺ຕິ ເອວໍ ຠຓນ຺ຕິ ເອວໍ ທີປຍນ຺ຕິ ເອວໍ ໂວຫຣນ຺ຕີຕິ – ນາຎ຺ເຎສຸ ຘມ຺ເມສຸ ວິສຸທ຺ຘິມາຫຸ.

ເອວມ຺ປິ ຕິຕ຺ຖ຺ຍາ ປຸຖຸໂສ ນິວິຏ຺ຐາຕິ. ຕິຕ຺ຖໍ ວຸຈ຺ຈຕິ ທິຏ຺ຐິຄຕໍ. ຕິຕ຺ຖິຍາ ວຸຈ຺ຈນ຺ຕິ ທິຏ຺ຐິຄຕິກາ. ປຸຖຸທິຏ຺ຐິຍາ [ປຸຖຸຕິຕ຺ຖິຍາ (ສີ. ກ.) ປຸຣິມຄາຖາຍ ປາຐເຠໂທ ນຕ຺ຖິ] ປຸຖຸທິຏ຺ຐິຄເຕສຸ ນິວິຏ຺ຐາ ປຕິຏ຺ຐິຕາ ອລ຺ລີນາ ອຸປຄຕາ ອຊ຺ໂຌສິຕາ ອຘິມຸຕ຺ຕາຕິ – ເອວມ຺ປິ ຕິຕ຺ຖ຺ຍາ ປຸຖຸໂສ ນິວິຏ຺ຐາ.

ສກາຍເນ ຕຕ຺ຖ ທຬ຺ຫໍ ວທານາຕິ. ຘມ຺ໂມ ສກາຍນໍ, ທິຏ຺ຐິ ສກາຍນໍ, ປຏິປທາ ສກາຍນໍ, ມຄ຺ໂຄ ສກາຍນໍ, ສກາຍເນ ທຬ຺ຫວາທາ ຖິຣວາທາ ພລິກວາທາ ອວຏ຺ຐິຕວາທາຕິ – ສກາຍເນ ຕຕ຺ຖ ທຬ຺ຫໍ ວທານາ.

ເຕນາຫ ຠຄວາ –

‘‘ອິເຘວ ສຸທ຺ຘິໍ ອິຕິ ວາທຍນ຺ຕິ, ນາຎ຺ເຎສຸ ຘມ຺ເມສຸ ວິສຸທ຺ຘິມາຫຸ;

ເອວມ຺ປິ ຕິຕ຺ຖ຺ຍາ ປຸຖຸໂສ ນິວິຏ຺ຐາ, ສກາຍເນ ຕຕ຺ຖ ທຬ຺ຫໍ ວທານາ’’ຕິ.

໑໒໘. ສກາຍເນ ວາປິ ທຬ຺ຫໍ ວທາໂນ, ກເມຕ຺ຖ [ກໍ ຕຕ຺ຖ (ສີ. ກ.)] ພາໂລຕິ ປຣໍ ທເຫຍ຺ຍ;

ສຍໍວ [ສຍເມວ (ສ຺ຍາ.)] ໂສ ເມຘຄມາວເຫຍ຺ຍ, ປຣໍ ວທໍ ພາລມສຸທ຺ຘິຘມ຺ມໍ.

ສກາຍເນ ວາປິ ທຬ຺ຫໍ ວທາໂນຕິ. ຘມ຺ໂມ ສກາຍນໍ, ທິຏ຺ຐິ ສກາຍນໍ, ປຏິປທາ ສກາຍນໍ, ມຄ຺ໂຄ ສກາຍນໍ, ສກາຍເນ ທຬ຺ຫວາໂທ ຖິຣວາໂທ ພລິກວາໂທ ອວຏ຺ຐິຕວາໂທຕິ – ສກາຍເນ ວາປິ ທຬ຺ຫໍ ວທາໂນ.

ກເມຕ຺ຖ ພາໂລຕິ ປຣໍ ທເຫຍ຺ຍາຕິ. ເອຕ຺ຖາຕິ ສກາຍ ທິຏ຺ຐິຍາ ສກາຍ ຂນ຺ຕິຍາ ສກາຍ ຣຸຈິຍາ ສກາຍ ລທ຺ຘິຍາ ປຣໍ ພາລໂຕ ຫີນໂຕ ນິຫີນໂຕ ໂອມກໂຕ ລາມກໂຕ ຉຕຸກ຺ກໂຕ ປຣິຕ຺ຕໂຕ ກໍ ທເຫຍ຺ຍ ກໍ ປສ຺ເສຍ຺ຍ ກໍ ທກ຺ເຂຍ຺ຍ ກໍ ໂອໂລເກຍ຺ຍ ກໍ ນິຊ຺ຌາເຍຍ຺ຍ ກໍ ອຸປປຣິກ຺ເຂຍ຺ຍາຕິ – ກເມຕ຺ຖ ພາໂລຕິ ປຣໍ ທເຫຍ຺ຍ.

ສຍໍວ ໂສ ເມຘຄມາວເຫຍ຺ຍ, ປຣໍ ວທໍ ພາລມສຸທ຺ຘິຘມ຺ມນ຺ຕິ. ປໂຣ ພາໂລ ຫີໂນ ນິຫີໂນ ໂອມໂກ ລາມໂກ ຉຕຸກ຺ໂກ ປຣິຕ຺ໂຕ ອສຸທ຺ຘິຘມ຺ໂມ ອວິສຸທ຺ຘິຘມ຺ໂມ ອປຣິສຸທ຺ຘິຘມ຺ໂມ ອໂວທາຕຘມ຺ໂມຕິ – ເອວໍ ວທນ຺ໂຕ ເອວໍ ກເຖນ຺ໂຕ ເອວໍ ຠຓນ຺ໂຕ ເອວໍ ທີປຍນ຺ໂຕ ເອວໍ ໂວຫຣນ຺ໂຕ ສຍເມວ ກລຫໍ ຠຓ຺ຑນໍ ວິຄ຺ຄຫໍ ວິວາທໍ ເມຘຄໍ ອາວເຫຍ຺ຍ ສມາວເຫຍ຺ຍ ອາຫເຣຍ຺ຍ ສມາຫເຣຍ຺ຍ ອາກຑ຺ເຒຍ຺ຍ ສມາກຑ຺ເຒຍ຺ຍ ຄຓ຺ເຫຍ຺ຍ ປຣາມເສຍ຺ຍ ອຠິນິວິເສຍ຺ຍາຕິ – ສຍໍວ ໂສ ເມຘຄມາວເຫຍ຺ຍ ປຣໍ ວທໍ ພາລມສຸທ຺ຘິຘມ຺ມໍ.

ເຕນາຫ ຠຄວາ –

‘‘ສກາຍເນ ວາປິ ທຬ຺ຫໍ ວທາໂນ, ກເມຕ຺ຖ ພາໂລຕິ ປຣໍ ທເຫຍ຺ຍ;

ສຍໍວ ໂສ ເມຘຄມາວເຫຍ຺ຍ, ປຣໍ ວທໍ ພາລມສຸທ຺ຘິຘມ຺ມ’’ນ຺ຕິ.

໑໒໙. ວິນິຈ຺ຉເຍ ຐຕ຺ວາ ສຍໍ ປມາຍ, ອຸທ຺ຘໍສ [ອຸທ຺ຘໍ ໂສ (ສ຺ຍາ.)] ໂລກສ຺ມິໍ ວິວາທເມຕິ;

ຫິຕ຺ວານ ສພ຺ພານິ ວິນິຈ຺ຉຍານິ, ນ ເມຘຄໍ ກຸພ຺ພຕິ ຊນ຺ຕຸ ໂລເກ.

ວິນິຈ຺ຉເຍ ຐຕ຺ວາ ສຍໍ ປມາຍາຕິ. ວິນິຈ຺ຉຍາ ວຸຈ຺ຈນ຺ຕິ ທ຺ວາສຏ຺ຐິ ທິຏ຺ຐິຄຕານິ. ວິນິຈ຺ຉຍທິຏ຺ຐິຍາ ຐຕ຺ວາ ປຕິຏ຺ຐຫິຕ຺ວາ ຄຓ຺ຫິຕ຺ວາ ປຣາມສິຕ຺ວາ ອຠິນິວິສິຕ຺ວາ ວິນິຈ຺ຉເຍ ຐຕ຺ວາ. ສຍໍ ປມາຍາຕິ ສຍໍ ປມາຍ ປມິນິຕ຺ວາ. ‘‘ອຍໍ ສຕ຺ຖາ ສພ຺ພຎ຺ຎູ’’ຕິ ສຍໍ ປມາຍ ປມິນິຕ຺ວາ, ‘‘ອຍໍ ຘມ຺ໂມ ສ຺ວາກ຺ຂາໂຕ… ອຍໍ ຄໂຓ ສຸປ຺ປຏິປນ຺ໂນ… ອຍໍ ທິຏ຺ຐິ ຠທ຺ທິກາ… ອຍໍ ປຏິປທາ ສຸປຎ຺ຎຕ຺ຕາ… ອຍໍ ມຄ຺ໂຄ ນິຍ຺ຍານິໂກ’’ຕິ ສຍໍ ປມາຍ ປມິນິຕ຺ວາຕິ – ວິນິຈ຺ຉເຍ ຐຕ຺ວາ ສຍໍ ປມາຍ.

ອຸທ຺ຘໍສ ໂລກສ຺ມິໍ ວິວາທເມຕີຕິ. ອຸທ຺ຘໍໂສ ວຸຈ຺ຈຕິ ອນາຄຕໍ. ອຕ຺ຕໂນ ວາທໍ ອຸທ຺ຘໍ ຐເປຕ຺ວາ ສຍເມວ ກລຫໍ ຠຓ຺ຑນໍ ວິຄ຺ຄຫໍ ວິວາທໍ ເມຘຄໍ ເອຕິ ອຸເປຕິ ອຸປຄຈ຺ຉຕິ ຄຓ຺ຫາຕິ ປຣາມສຕິ ອຠິນິວິສຕີຕິ. ເອວມ຺ປິ ອຸທ຺ຘໍສ ໂລກສ຺ມິໍ ວິວາທເມຕິ. ອຖ ວາ ອຎ຺ເຎນ ອຸທ຺ຘໍ ວາເທນ ສທ຺ຘິໍ ກລຫໍ ກໂຣຕິ ຠຓ຺ຑນໍ ກໂຣຕິ ວິຄ຺ຄຫໍ ກໂຣຕິ ວິວາທໍ ກໂຣຕິ ເມຘຄໍ ກໂຣຕິ – ‘‘ນ ຕ຺ວໍ ອິມໍ ຘມ຺ມວິນຍໍ ອາຊານາສິ…ເປ… ນິພ຺ເພເຐຫິ ວາ ສເຈ ປໂຫສີ’’ຕິ. ເອວມ຺ປິ ອຸທ຺ຘໍສ ໂລກສ຺ມິໍ ວິວາທເມຕິ.

ຫິຕ຺ວານ ສພ຺ພານິ ວິນິຈ຺ຉຍານີຕິ. ວິນິຈ຺ຉຍາ ວຸຈ຺ຈນ຺ຕິ ທ຺ວາສຏ຺ຐິ ທິຏ຺ຐິຄຕານິ. ທິຏ຺ຐິວິນິຈ຺ຉຍາ ສພ຺ເພ ວິນິຈ຺ຉເຍ [ສພ຺ພາ ວິນິຈ຺ຉິຕທິຏ຺ຐິໂຍ (ສ຺ຍາ.), ສພ຺ພາ ວິນິຈ຺ຉຍທິຏ຺ຐິໂຍ (ກ.)] ຫິຕ຺ວາ ຈຊິຕ຺ວາ ປຣິຈ຺ຈຊິຕ຺ວາ ຊຫິຕ຺ວາ ປຊຫິຕ຺ວາ ວິໂນເທຕ຺ວາ ພ຺ຍນ຺ຕິໍ ກຣິຕ຺ວາ ອນຠາວໍ ຄເມຕ຺ວາຕິ – ຫິຕ຺ວານ ສພ຺ພານິ ວິນິຈ຺ຉຍານິ.

ນ ເມຘຄໍ ກຸພ຺ພຕິ ຊນ຺ຕຸ ໂລເກຕິ. ນ ກລຫໍ ກໂຣຕິ, ນ ຠຓ຺ຑນໍ ກໂຣຕິ, ນ ວິຄ຺ຄຫໍ ກໂຣຕິ, ນ ວິວາທໍ ກໂຣຕິ, ນ ເມຘຄໍ ກໂຣຕິ. ວຸຕ຺ຕຎ຺ເຫຕໍ ຠຄວຕາ – ‘‘ເອວໍ ວິມຸຕ຺ຕຈິຕ຺ໂຕ ໂຂ, ອຄ຺ຄິເວສ຺ສນ, ຠິກ຺ຂຸ ນ ເກນຈິ ສໍວທຕິ, ນ ເກນຈິ ວິວທຕິ, ຍຎ຺ຈ ໂລເກ ວຸຕ຺ຕໍ ເຕນ ຈ ໂວຫຣຕິ ອປຣາມສ’’ນ຺ຕິ. ຊນ຺ຕູຕິ ສຕ຺ໂຕ ນໂຣ ມານໂວ ໂປໂສ ປຸຄ຺ຄໂລ ຊີໂວ ຊາຄຸ ຊນ຺ຕຸ ອິນ຺ທຄຸ ມນຸໂຊ. ໂລເກຕິ ອປາຍໂລເກ…ເປ… ອາຍຕນໂລເກຕິ – ນ ເມຘຄໍ ກຸພ຺ພຕິ ຊນ຺ຕຸ ໂລເກຕິ.

ເຕນາຫ ຠຄວາ –

‘‘ວິນິຈ຺ຉເຍ ຐຕ຺ວາ ສຍໍ ປມາຍ, ອຸທ຺ຘໍສ ໂລກສ຺ມິໍ ວິວາທເມຕິ;

ຫິຕ຺ວານ ສພ຺ພານິ ວິນິຈ຺ຉຍານິ, ນ ເມຘຄໍ ກຸພ຺ພຕິ ຊນ຺ຕຸ ໂລເກ’’ຕິ.