໑. ກາມສຸຕ຺ຕນິທ຺ເທໂສ

໑. ກາມໍ ກາມຍມານສ຺ສ, ຕສ຺ສ ເຈ ຕໍ ສມິຊ຺ຌຕິ;

ອທ຺ຘາ ປີຕິມໂນ ໂຫຕິ, ລທ຺ຘາ ມຈ຺ໂຈ ຍທິຈ຺ຉຕິ.

ກາມໍ ກາມຍມານສ຺ສາຕິ ກາມາຕິ ອຸທ຺ທານໂຕ ທ຺ເວ ກາມາ – ວຕ຺ຖຸກາມາ ຈ ກິເລສກາມາ ຈ. ກຕເມ ວຕ຺ຖຸກາມາ? ມນາປິກາ ຣູປາ ມນາປິກາ ສທ຺ທາ ມນາປິກາ ຄນ຺ຘາ ມນາປິກາ ຣສາ ມນາປິກາ ໂຜຏ຺ຐພ຺ພາ; ອຕ຺ຖຣຓາ ປາວຸຣຓາ [ປາປຸຣຓາ (ສີ. ສ຺ຍາ.)] ທາສິທາສາ ອເຊຬກາ ກຸກ຺ກຸຏສູກຣາ ຫຕ຺ຖິຄວາສ຺ສວຬວາ ເຂຕ຺ຕໍ ວຕ຺ຖຸ ຫິຣຎ຺ຎໍ ສຸວຓ຺ຓໍ ຄາມນິຄມຣາຊຘານິໂຍ ຣຏ຺ຐຎ຺ຈ ຊນປໂທ ຈ ໂກໂສ ຈ ໂກຏ຺ຐາຄາຣຎ຺ຈ, ຍໍ ກິຎ຺ຈິ ຣຊນີຍໍ ວຕ຺ຖຸ – ວຕ຺ຖຸກາມາ.

ອປິ ຈ ອຕີຕາ ກາມາ ອນາຄຕາ ກາມາ ປຈ຺ຈຸປ຺ປນ຺ນາ ກາມາ; ອຊ຺ຌຕ຺ຕາ ກາມາ ພຫິທ຺ຘາ ກາມາ ອຊ຺ຌຕ຺ຕພຫິທ຺ຘາ ກາມາ; ຫີນາ ກາມາ ມຊ຺ຌິມາ ກາມາ ປຓີຕາ ກາມາ; ອາປາຍິກາ ກາມາ ມານຸສິກາ ກາມາ ທິພ຺ພາ ກາມາ ປຈ຺ຈຸປຏ຺ຐິຕາ ກາມາ; ນິມ຺ມິຕາ ກາມາ ອນິມ຺ມິຕາ ກາມາ ປຣນິມ຺ມິຕາ ກາມາ; ປຣິຄ຺ຄຫິຕາ ກາມາ, ອປຣິຄ຺ຄຫິຕາ ກາມາ, ມມາຍິຕາ ກາມາ, ອມມາຍິຕາ ກາມາ; ສພ຺ເພປິ ກາມາວຈຣາ ຘມ຺ມາ, ສພ຺ເພປິ ຣູປາວຈຣາ ຘມ຺ມາ, ສພ຺ເພປິ ອຣູປາວຈຣາ ຘມ຺ມາ, ຕຓ຺ຫາວຕ຺ຖຸກາ ຕຓ຺ຫາຣມ຺ມຓາ ກາມນີຍຏ຺ເຐນ ຣຊນີຍຏ຺ເຐນ ມທນີຍຏ຺ເຐນ ກາມາ – ອິເມ ວຸຈ຺ຈນ຺ຕິ ວຕ຺ຖຸກາມາ.

ກຕເມ ກິເລສກາມາ? ຉນ຺ໂທ ກາໂມ ຣາໂຄ ກາໂມ ຉນ຺ທຣາໂຄ ກາໂມ; ສງ຺ກປ຺ໂປ ກາໂມ ຣາໂຄ ກາໂມ ສງ຺ກປ຺ປຣາໂຄ ກາໂມ; ໂຍ ກາເມສຸ ກາມຈ຺ຉນ຺ໂທ ກາມຣາໂຄ ກາມນນ຺ທີ ກາມຕຓ຺ຫາ ກາມສ຺ເນໂຫ ກາມປຣິຬາໂຫ ກາມມຸຈ຺ຉາ ກາມຊ຺ໂຌສານໍ ກາໂມໂຆ ກາມໂຍໂຄ ກາມຸປາທານໍ ກາມຈ຺ຉນ຺ທນີວຣຓໍ.

‘‘ອທ຺ທສໍ ກາມ ເຕ ມູລໍ, ສງ຺ກປ຺ປາ ກາມ ຊາຍສິ;

ນ ຕໍ ສງ຺ກປ຺ປຍິສ຺ສາມິ, ເອວໍ ກາມ ນ ໂຫຫິສີ’’ຕິ [ນ ເຫຫິສີຕິ (ສ຺ຍາ.)]. –

ອິເມ ວຸຈ຺ຈນ຺ຕິ ກິເລສກາມາ. ກາມຍມານສ຺ສາຕິ ກາມຍມານສ຺ສ ອິຈ຺ຉມານສ຺ສ ສາທິຍມານສ຺ສ ປຕ຺ຖຍມານສ຺ສ ປິຫຍມານສ຺ສ ອຠິຊປ຺ປມານສ຺ສາຕິ – ກາມໍ ກາມຍມານສ຺ສ.

ຕສ຺ສ ເຈ ຕໍ ສມິຊ຺ຌຕີຕິ. ຕສ຺ສ ເຈຕິ ຕສ຺ສ ຂຕ຺ຕິຍສ຺ສ ວາ ພ຺ຣາຫ຺ມຓສ຺ສ ວາ ເວສ຺ສສ຺ສ ວາ ສຸທ຺ທສ຺ສ ວາ ຄຫຏ຺ຐສ຺ສ ວາ ປພ຺ພຊິຕສ຺ສ ວາ ເທວສ຺ສ ວາ ມນຸສ຺ສສ຺ສ ວາ. ຕນ຺ຕິ ວຕ຺ຖຸກາມາ ວຸຈ຺ຈນ຺ຕິ – ມນາປິກາ ຣູປາ ມນາປິກາ ສທ຺ທາ ມນາປິກາ ຄນ຺ຘາ ມນາປິກາ ຣສາ ມນາປິກາ ໂຜຏ຺ຐພ຺ພາ. ສມິຊ຺ຌຕີຕິ ອິຊ຺ຌຕິ ສມິຊ຺ຌຕິ ລຠຕິ ປຏິລຠຕິ ອຘິຄຈ຺ຉຕິ ວິນ຺ທຕີຕິ – ຕສ຺ສ ເຈ ຕໍ ສມິຊ຺ຌຕິ.

ອທ຺ຘາ ປີຕິມໂນ ໂຫຕີຕິ. ອທ຺ຘາຕິ ເອກໍສວຈນໍ ນິສ຺ສໍສຍວຈນໍ ນິກ຺ກງ຺ຂາວຈນໍ ອທ຺ເວຊ຺ຌວຈນໍ ອທ຺ເວຬ຺ຫກວຈນໍ ນິໂຍຄວຈນໍ ອປຓ຺ຓກວຈນໍ ອວຕ຺ຖາປນວຈນເມຕໍ – ອທ຺ຘາຕິ. ປີຕີຕິ ຍາ ປຎ຺ຈກາມຄຸຓປຏິສຎ຺ຎຸຕ຺ຕາ ປີຕິ ປາມຸຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ຕຸຏ຺ຐິ ໂອທຄ຺ຍໍ ອຕ຺ຕມນຕາ ອຠິຜຣຓຕາ ຈິຕ຺ຕສ຺ສ. ມໂນຕິ ຍໍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາ ມໂນວິຎ຺ຎາຓຘາຕຸ, ອຍໍ ວຸຈ຺ຈຕິ ມໂນ. ອຍໍ ມໂນ ອິມາຍ ປີຕິຍາ ສຫຄໂຕ ໂຫຕິ ສຫຊາໂຕ ສໍສຏ຺ໂຐ ສມ຺ປຍຸຕ຺ໂຕ ເອກຸປ຺ປາໂທ ເອກນິໂຣໂຘ ເອກວຕ຺ຖຸໂກ ເອກາຣມ຺ມໂຓ. ປີຕິມໂນ ໂຫຕີຕິ ປີຕິມໂນ ໂຫຕິ ຕຸຏ຺ຐມໂນ ຫຏ຺ຐມໂນ ປຫຏ຺ຐມໂນ ອຕ຺ຕມໂນ ອຸທຄ຺ຄມໂນ ມຸທິຕມໂນ ປໂມທິຕມໂນ ໂຫຕີຕິ – ອທ຺ຘາ ປີຕິມໂນ ໂຫຕິ.

ລທ຺ຘາ ມຈ຺ໂຈ ຍທິຈ຺ຉຕີຕິ. ລທ຺ຘາຕິ ລຠິຕ຺ວາ ປຏິລຠິຕ຺ວາ ອຘິຄນ຺ຕ຺ວາ ວິນ຺ທິຕ຺ວາ. ມຈ຺ໂຈຕິ ສຕ຺ໂຕ ນໂຣ ມານໂວ ໂປໂສ ປຸຄ຺ຄໂລ ຊີໂວ ຊາຄຸ [ຊາຕຸ (ສ຺ຍາ.), ຊຄຸ (ກ.)] ຊນ຺ຕຸ ອິນ຺ທຄຸ [ຫິນ຺ທຄູ (ສີ. ສ຺ຍາ.)] ມນຸໂຊ. ຍທິຈ຺ຉຕີຕິ ຍໍ ອິຈ຺ຉຕິ ຍໍ ສາທິຍຕິ ຍໍ ປຕ຺ເຖຕິ ຍໍ ປິເຫຕິ ຍໍ ອຠິຊປ຺ປຕິ, ຣູປໍ ວາ ສທ຺ທໍ ວາ ຄນ຺ຘໍ ວາ ຣສໍ ວາ ໂຜຏ຺ຐພ຺ພໍ ວາຕິ, ລທ຺ຘາ ມຈ຺ໂຈ ຍທິຈ຺ຉຕິ.

ເຕນາຫ ຠຄວາ –

‘‘ກາມໍ ກາມຍມານສ຺ສ, ຕສ຺ສ ເຈ ຕໍ ສມິຊ຺ຌຕິ;

ອທ຺ຘາ ປີຕິມໂນ ໂຫຕິ, ລທ຺ຘາ ມຈ຺ໂຈ ຍທິຈ຺ຉຕີ’’ຕິ.

໒. ຕສ຺ສ ເຈ ກາມຍານສ຺ສ, ຉນ຺ທຊາຕສ຺ສ ຊນ຺ຕຸໂນ;

ເຕ ກາມາ ປຣິຫາຍນ຺ຕິ, ສລ຺ລວິທ຺ໂຘວ ຣຸປ຺ປຕິ.

ຕສ຺ສ ເຈ ກາມຍານສ຺ສາຕິ. ຕສ຺ສ ເຈຕິ ຕສ຺ສ ຂຕ຺ຕິຍສ຺ສ ວາ ພ຺ຣາຫ຺ມຓສ຺ສ ວາ ເວສ຺ສສ຺ສ ວາ ສຸທ຺ທສ຺ສ ວາ ຄຫຏ຺ຐສ຺ສ ວາ ປພ຺ພຊິຕສ຺ສ ວາ ເທວສ຺ສ ວາ ມນຸສ຺ສສ຺ສ ວາ. ກາມຍານສ຺ສາຕິ ກາເມ ອິຈ຺ຉມານສ຺ສ ສາທິຍມານສ຺ສ ປຕ຺ຖຍມານສ຺ສ ປິຫຍມານສ຺ສ ອຠິຊປ຺ປມານສ຺ສ. ອຖ ວາ ກາມຕຓ຺ຫາຍ ຍາຍຕິ ນິຍ຺ຍຕິ ວຸຍ຺ຫຕິ ສໍຫຣີຍຕິ. ຍຖາ ຫຕ຺ຖິຍາເນນ ວາ ອສ຺ສຍາເນນ ວາ ໂຄຍາເນນ ວາ ອຊຍາເນນ ວາ ເມຓ຺ຑຍາເນນ ວາ ໂອຏ຺ຐຍາເນນ ວາ ຂຣຍາເນນ ວາ ຍາຍຕິ ນິຍ຺ຍຕິ ວຸຍ຺ຫຕິ ສໍຫຣີຍຕິ; ເອວເມວໍ ກາມຕຓ຺ຫາຍ ຍາຍຕິ ນິຍ຺ຍຕິ ວຸຍ຺ຫຕິ ສໍຫຣີຍຕີຕິ – ຕສ຺ສ ເຈ ກາມຍານສ຺ສ.

ຉນ຺ທຊາຕສ຺ສ ຊນ຺ຕຸໂນຕິ. ຉນ຺ໂທຕິ ໂຍ ກາເມສຸ ກາມຈ຺ຉນ຺ໂທ ກາມຣາໂຄ ກາມນນ຺ທີ ກາມຕຓ຺ຫາ ກາມສ຺ເນໂຫ ກາມປຣິຬາໂຫ ກາມມຸຈ຺ຉາ ກາມຊ຺ໂຌສານໍ ກາໂມໂຆ ກາມໂຍໂຄ ກາມຸປາທານໍ ກາມຈ຺ຉນ຺ທນີວຣຓໍ, ຕສ຺ສ ໂສ ກາມຈ຺ຉນ຺ໂທ ຊາໂຕ ໂຫຕິ ສຎ຺ຊາໂຕ ນິພ຺ພຕ຺ໂຕ ອຠິນິພ຺ພຕ຺ໂຕ ປາຕຸຠູໂຕ. ຊນ຺ຕຸໂນຕິ ສຕ຺ຕສ຺ສ ນຣສ຺ສ ມານວສ຺ສ ໂປສສ຺ສ ປຸຄ຺ຄລສ຺ສ ຊີວສ຺ສ ຊາຄຸສ຺ສ ຊນ຺ຕຸສ຺ສ ອິນ຺ທຄຸສ຺ສ ມນຸຊສ຺ສາຕິ – ຉນ຺ທຊາຕສ຺ສ ຊນ຺ຕຸໂນ.

ເຕ ກາມາ ປຣິຫາຍນ຺ຕີຕິ – ເຕ ວາ ກາມາ ປຣິຫາຍນ຺ຕິ, ໂສ ວາ ກາເມຫິ ປຣິຫາຍຕິ. ກຖໍ ເຕ ກາມາ ປຣິຫາຍນ຺ຕິ? ຕສ຺ສ ຕິຏ຺ຐນ຺ຕສ຺ເສວ ເຕ ໂຠເຄ ຣາຊາໂນ ວາ ຫຣນ຺ຕິ, ໂຈຣາ ວາ ຫຣນ຺ຕິ, ອຄ຺ຄິ ວາ ທຫຕິ, ອຸທກໍ ວາ ວຫຕິ, ອປ຺ປິຍາ ວາ ທາຍາທາ ຫຣນ຺ຕິ, ນິຫິຕໍ ວາ ນາຘິຄຈ຺ຉຕິ, ທຸປ຺ປຍຸຕ຺ຕາ ວາ ກມ຺ມນ຺ຕາ ຠິຊ຺ຊນ຺ຕິ, ກຸເລ ວາ ກຸລງ຺ຄາໂຣ ອຸປ຺ປຊ຺ຊຕິ, ໂຍ ເຕ ໂຠເຄ ວິກິຣຕິ ວິຘມຕິ [ວິຘເມຕິ (ສ຺ຍາ.)] ວິທ຺ຘໍເສຕິ ອນິຈ຺ຈຕາເຍວ ອຏ຺ຐມີ. ເອວໍ ເຕ ກາມາ ຫາຍນ຺ຕິ ປຣິຫາຍນ຺ຕິ ປຣິຘໍເສນ຺ຕິ ປຣິປຕນ຺ຕິ ອນ຺ຕຣຘາຍນ຺ຕິ ວິປ຺ປລຸຊ຺ຊນ຺ຕິ. ກຖໍ ໂສ ກາເມຫິ ປຣິຫາຍຕິ? ຕິຏ຺ຐນ຺ເຕວ ເຕ ໂຠເຄ ໂສ ຈວຕິ ມຣຕິ ວິປ຺ປລຸຊ຺ຊຕິ. ເອວໍ ໂສ ກາເມຫິ ຫາຍຕິ ປຣິຫາຍຕິ ປຣິຘໍເສຕິ ປຣິປຕຕິ ອນ຺ຕຣຘາຍຕິ ວິປ຺ປລຸຊ຺ຊຕິ.

ໂຈຣາ ຫຣນ຺ຕິ ຣາຊາໂນ, ອຄ຺ຄິ ທຫຕິ ນສ຺ສຕິ;

ອຖ ອນ຺ເຕນ ຊຫຕິ [ອໂຖ ອນ຺ເຕນ ເຫຕິ (ສ຺ຍາ.), ອສຫນ຺ເຕນ ທຫຕິ (ກ.)], ສຣີຣໍ ສປຣິຄ຺ຄຫໍ;

ເອຕທຎ຺ຎາຍ ເມຘາວີ, ຠຸຎ຺ເຊຖ ຈ ທເທຖ ຈ.

ທຕ຺ວາ ຈ ຠຸຕ຺ວາ ຈ ຍຖານຸຠາວໍ, ອນິນ຺ທິໂຕ ສຄ຺ຄມຸເປຕິ ຐານນ຺ຕິ, ເຕ ກາມາ ປຣິຫາຍນ຺ຕິ.

ສລ຺ລວິທ຺ໂຘວ ຣຸປ຺ປຕີຕິ. ຍຖາ ອໂຍມເຍນ ວາ ສລ຺ເລນ ວິທ຺ໂຘ, ອຏ຺ຐິມເຍນ ວາ ສລ຺ເລນ ທນ຺ຕມເຍນ ວາ ສລ຺ເລນ ວິສາຓມເຍນ ວາ ສລ຺ເລນ ກຏ຺ຐມເຍນ ວາ ສລ຺ເລນ ວິທ຺ໂຘ ຣຸປ຺ປຕິ ກຸປ຺ປຕິ ຆຏ຺ຏີຍຕິ ປີຬີຍຕິ, ພ຺ຍາຘິໂຕ ໂທມນສ຺ສິໂຕ ໂຫຕິ, ເອວເມວ ວຕ຺ຖຸກາມານໍ ວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ໂສ ກາມສລ຺ເລນ ຈ ໂສກສລ຺ເລນ ຈ ວິທ຺ໂຘ, ຣຸປ຺ປຕິ ກຸປ຺ປຕິ ຆຏ຺ຏີຍຕິ ປີຬີຍຕິ ພ຺ຍາຘິໂຕ ໂທມນສ຺ສິໂຕ ໂຫຕີຕິ – ສລ຺ລວິທ຺ໂຘວ ຣຸປ຺ປຕິ.

ເຕນາຫ ຠຄວາ –

‘‘ຕສ຺ສ ເຈ ກາມຍານສ຺ສ, ຉນ຺ທຊາຕສ຺ສ ຊນ຺ຕຸໂນ;

ເຕ ກາມາ ປຣິຫາຍນ຺ຕິ, ສລ຺ລວິທ຺ໂຘວ ຣຸປ຺ປຕີ’’ຕິ.

໓. ໂຍ ກາເມ ປຣິວຊ຺ເຊຕິ, ສປ຺ປສ຺ເສວ ປທາ ສິໂຣ;

ໂສມໍ ວິສຕ຺ຕິກໍ ໂລເກ, ສໂຕ ສມຕິວຕ຺ຕຕິ.

ໂຍ ກາເມ ປຣິວຊ຺ເຊຕີຕິ. ໂຍຕິ ໂຍ ຍາທິໂສ ຍຖາຍຸຕ຺ໂຕ ຍຖາວິຫິໂຕ ຍຖາປກາໂຣ ຍໍຐານປ຺ປຕ຺ໂຕ ຍໍຘມ຺ມສມນ຺ນາຄໂຕ ຂຕ຺ຕິໂຍ ວາ ພ຺ຣາຫ຺ມໂຓ ວາ ເວສ຺ໂສ ວາ ສຸທ຺ໂທ ວາ ຄຫຏ຺ໂຐ ວາ ປພ຺ພຊິໂຕ ວາ ເທໂວ ວາ ມນຸສ຺ໂສ ວາ. ກາເມ ປຣິວຊ຺ເຊຕີຕິ. ກາມາຕິ ອຸທ຺ທານໂຕ ທ຺ເວ ກາມາ – ວຕ຺ຖຸກາມາ ຈ ກິເລສກາມາ ຈ…ເປ… ອິເມ ວຸຈ຺ຈນ຺ຕິ ວຕ຺ຖຸກາມາ…ເປ… ອິເມ ວຸຈ຺ຈນ຺ຕິ ກິເລສກາມາ. ກາເມ ປຣິວຊ຺ເຊຕີຕິ ທ຺ວີຫິ ກາຣເຓຫິ ກາເມ ປຣິວຊ຺ເຊຕິ – ວິກ຺ຂມ຺ຠນໂຕ ວາ ສມຸຈ຺ເຉທໂຕ ວາ. ກຖໍ ວິກ຺ຂມ຺ຠນໂຕ ກາເມ ປຣິວຊ຺ເຊຕິ? ‘‘ອຏ຺ຐິກງ຺ກລູປມາ ກາມາ ອປ຺ປສ຺ສາທຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ມໍສເປສູປມາ ກາມາ ພຫຸສາຘາຣຓຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ຕິຓຸກ຺ກູປມາ ກາມາ ອນຸທຫນຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ອງ຺ຄາຣກາສູປມາ ກາມາ ມຫາປຣິຬາຫຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ສຸປິນກູປມາ ກາມາ ອິຕ຺ຕຣປຈ຺ຈຸປຏ຺ຐານຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ຍາຈິຕກູປມາ ກາມາ ຕາວກາລິກຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ຣຸກ຺ຂຜລູປມາ ກາມາ ສມ຺ຠຎ຺ຊນປຣິຠຎ຺ຊນຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ອສິສູນູປມາ ກາມາ ອຘິກຸຏ຺ຏນຏ຺ເຐນາ’’ຕິ [ອຘິກນ຺ຕນຏ຺ເຐນາຕິ (ສ຺ຍາ.)] ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ສຕ຺ຕິສູລູປມາ ກາມາ ວິນິວິຊ຺ຌນຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ສປ຺ປສິຣູປມາ ກາມາ ສປ຺ປຏິຠຍຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ‘‘ອຄ຺ຄິກ຺ຂນ຺ຘູປມາ ກາມາ ມຫາຠິຕາປນຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຕິ.

ພຸທ຺ຘານຸສ຺ສຕິໍ ຠາເວນ຺ໂຕປິ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ຘມ຺ມານຸສ຺ສຕິໍ ຠາເວນ຺ໂຕປິ…ເປ… ສງ຺ຆານຸສ຺ສຕິໍ ຠາເວນ຺ໂຕປິ… ສີລານຸສ຺ສຕິໍ ຠາເວນ຺ໂຕປິ… ຈາຄານຸສ຺ສຕິໍ ຠາເວນ຺ໂຕປິ… ເທວຕານຸສ຺ສຕິໍ ຠາເວນ຺ໂຕປິ… ອານາປານສ຺ສຕິໍ [ອານາປານສຕິໍ (ສີ.)] ຠາເວນ຺ໂຕປິ… ມຣຓສ຺ສຕິໍ ຠາເວນ຺ໂຕປິ… ກາຍຄຕາສຕິໍ ຠາເວນ຺ໂຕປິ… ອຸປສມານຸສ຺ສຕິໍ ຠາເວນ຺ໂຕປິ ວິກ຺ຂມ຺ຠນໂຕ ກາເມ ປຣິວຊ຺ເຊຕິ.

ປຐມໍ ຌານໍ ຠາເວນ຺ໂຕປິ ວິກ຺ຂມ຺ຠນໂຕ ກາເມ ປຣິວຊ຺ເຊຕິ, ທຸຕິຍໍ ຌານໍ ຠາເວນ຺ໂຕປິ…ເປ… ຕຕິຍໍ ຌານໍ ຠາເວນ຺ໂຕປິ… ຈຕຸຕ຺ຖໍ ຌານໍ ຠາເວນ຺ໂຕປິ… ອາກາສານຎ຺ຈາຍຕນສມາປຕ຺ຕິໍ ຠາເວນ຺ໂຕປິ… ວິຎ຺ຎາຓຎ຺ຈາຍຕນສມາປຕ຺ຕິໍ ຠາເວນ຺ໂຕປິ… ອາກິຎ຺ຈຎ຺ຎາຍຕນສມາປຕ຺ຕິໍ ຠາເວນ຺ໂຕປິ … ເນວສຎ຺ຎານາສຎ຺ຎາຍຕນສມາປຕ຺ຕິໍ ຠາເວນ຺ໂຕປິ ວິກ຺ຂມ຺ຠນໂຕ ກາເມ ປຣິວຊ຺ເຊຕິ. ເອວໍ ວິກ຺ຂມ຺ຠນໂຕ ກາເມ ປຣິວຊ຺ເຊຕິ.

ກຖໍ ສມຸຈ຺ເຉທໂຕ ກາເມ ປຣິວຊ຺ເຊຕິ? ໂສຕາປຕ຺ຕິມຄ຺ຄໍ ຠາເວນ຺ໂຕປິ ອປາຍຄມນີເຍ ກາເມ ສມຸຈ຺ເຉທໂຕ ປຣິວຊ຺ເຊຕິ, ສກທາຄາມິມຄ຺ຄໍ ຠາເວນ຺ໂຕປິ ໂອຬາຣິເກ ກາເມ ສມຸຈ຺ເຉທໂຕ ປຣິວຊ຺ເຊຕິ, ອນາຄາມິມຄ຺ຄໍ ຠາເວນ຺ໂຕປິ ອນຸສຫຄເຕ ກາເມ ສມຸຈ຺ເຉທໂຕ ປຣິວຊ຺ເຊຕິ, ອຣຫຕ຺ຕມຄ຺ຄໍ ຠາເວນ຺ໂຕປິ ສພ຺ເພນ ສພ຺ພໍ ສພ຺ພຖາ ສພ຺ພໍ ອເສສໍ ນິສ຺ເສສໍ ສມຸຈ຺ເຉທໂຕ ກາເມ ປຣິວຊ຺ເຊຕິ. ເອວໍ ສມຸຈ຺ເຉທໂຕ ກາເມ ປຣິວຊ຺ເຊຕີຕິ – ໂຍ ກາເມ ປຣິວຊ຺ເຊຕິ.

ສປ຺ປສ຺ເສວ ປທາ ສິໂຣຕິ. ສປ຺ໂປ ວຸຈ຺ຈຕິ ອຫິ. ເກນຏ຺ເຐນ ສປ຺ໂປ? ສໍສປ຺ປນ຺ໂຕ ຄຈ຺ຉຕີຕິ ສປ຺ໂປ; ຠຸຊນ຺ໂຕ ຄຈ຺ຉຕີຕິ ຠຸຊໂຄ; ອຸເຣນ ຄຈ຺ຉຕີຕິ ອຸຣໂຄ; ປນ຺ນສິໂຣ ຄຈ຺ຉຕີຕິ ປນ຺ນໂຄ; ສິເຣນ ສຸປຕີຕິ [ສປ຺ປຕີຕິ (ກ.)] ສຣີສໂປ [ສິຣິໍສໂປ (ສີ.)]; ພິເລ ສຍຕີຕິ ພິລາສໂຍ; ຄຸຫາຍໍ ສຍຕີຕິ ຄຸຫາສໂຍ; ທາຐາ ຕສ຺ສ ອາວຸໂຘຕິ ທາຐາວຸໂຘ; ວິສໍ ຕສ຺ສ ໂຆຣນ຺ຕິ ໂຆຣວິໂສ; ຊິວ຺ຫາ ຕສ຺ສ ທຸວິຘາຕິ ທ຺ວິຊິວ຺ໂຫ; ທ຺ວີຫິ ຊິວ຺ຫາຫິ ຣສໍ ສາຍຕີຕິ ທ຺ວິຣສຎ຺ຎູ. ຍຖາ ປຸຣິໂສ ຊີວິຕຸກາໂມ ອມຣິຕຸກາໂມ ສຸຂກາໂມ ທຸກ຺ຂປຏິກ຺ກູໂລ ປາເທນ ສປ຺ປສິຣໍ ວຊ຺ເຊຍ຺ຍ ວິວຊ຺ເຊຍ຺ຍ ປຣິວຊ຺ເຊຍ຺ຍ ອຠິນິວຊ຺ເຊຍ຺ຍ; ເອວເມວ ສຸຂກາໂມ ທຸກ຺ຂປຏິກ຺ກູໂລ ກາເມ ວຊ຺ເຊຍ຺ຍ ວິວຊ຺ເຊຍ຺ຍ ປຣິວຊ຺ເຊຍ຺ຍ ອຠິນິວຊ຺ເຊຍ຺ຍາຕິ – ສປ຺ປສ຺ເສວ ປທາ ສິໂຣ.

ໂສມໍ ວິສຕ຺ຕິກໍ ໂລເກ, ສໂຕ ສມຕິວຕ຺ຕຕີຕິ. ໂສຕິ ໂຍ ກາເມ ປຣິວຊ຺ເຊຕິ. ວິສຕ຺ຕິກາ ວຸຈ຺ຈຕິ ຕຓ຺ຫາ. ໂຍ ຣາໂຄ ສາຣາໂຄ ອນຸນໂຍ ອນຸໂຣໂຘ ນນ຺ທີ ນນ຺ທິຣາໂຄ, ຈິຕ຺ຕສ຺ສ ສາຣາໂຄ ອິຈ຺ຉາ ມຸຈ຺ຉາ ອຊ຺ໂຌສານໍ ເຄໂຘ ປລິເຄໂຘ [ປຬິເຄໂຘ (ສີ.)] ສງ຺ໂຄ ປງ຺ໂກ, ເອຊາ ມາຍາ ຊນິກາ ສຎ຺ຊນນີ ສິພ຺ພິນີ ຊາລິນີ ສຣິຕາ ວິສຕ຺ຕິກາ, ສຸຕ຺ຕໍ ວິສຕາ ອາຍູຫິນີ [ອາຍູຫນີ (ສີ. ສ຺ຍາ.)] ທຸຕິຍາ ປຓິຘິ ຠວເນຕ຺ຕິ, ວນໍ ວນໂຖ ສນ຺ຘໂວ ສ຺ເນໂຫ ອເປກ຺ຂາ ປຏິພນ຺ຘຸ, ອາສາ ອາສີສນາ ອາສີສິຕຕ຺ຕໍ, ຣູປາສາ ສທ຺ທາສາ ຄນ຺ຘາສາ ຣສາສາ ໂຜຏ຺ຐພ຺ພາສາ, ລາຠາສາ ຊນາສາ ປຸຕ຺ຕາສາ ຊີວິຕາສາ, ຊປ຺ປາ ປຊປ຺ປາ ອຠິຊປ຺ປາ ຊປ຺ປນາ ຊປ຺ປິຕຕ຺ຕໍ ໂລລຸປ຺ປໍ ໂລລຸປ຺ປາຍນາ ໂລລຸປ຺ປາຍິຕຕ຺ຕໍ ປຸຈ຺ຉຎ຺ຊິກຕາ ສາຘຸກມ຺ຍຕາ, ອຘມ຺ມຣາໂຄ ວິສມໂລໂຠ ນິກນ຺ຕິ ນິກາມນາ ປຕ຺ຖນາ ປິຫນາ ສມ຺ປຕ຺ຖນາ, ກາມຕຓ຺ຫາ ຠວຕຓ຺ຫາ ວິຠວຕຓ຺ຫາ, ຣູປຕຓ຺ຫາ ອຣູປຕຓ຺ຫາ ນິໂຣຘຕຓ຺ຫາ, ຣູປຕຓ຺ຫາ ສທ຺ທຕຓ຺ຫາ ຄນ຺ຘຕຓ຺ຫາ ຣສຕຓ຺ຫາ ໂຜຏ຺ຐພ຺ພຕຓ຺ຫາ ຘມ຺ມຕຓ຺ຫາ, ໂອໂຆ ໂຍໂຄ ຄນ຺ໂຖ ອຸປາທານໍ ອາວຣຓໍ ນີວຣຓໍ ຉທນໍ ພນ຺ຘນໍ, ອຸປກ຺ກິເລໂສ ອນຸສໂຍ ປຣິຍຸຏ຺ຐານໍ ລຕາ ເວວິຈ຺ຉໍ, ທຸກ຺ຂມູລໍ ທຸກ຺ຂນິທານໍ ທຸກ຺ຂປ຺ປຠໂວ ມາຣປາໂສ ມາຣພຬິສໍ ມາຣວິສໂຍ, ຕຓ຺ຫານທີ ຕຓ຺ຫາຊາລໍ ຕຓ຺ຫາຄທ຺ທຸລໍ ຕຓ຺ຫາສມຸທ຺ໂທ ອຠິຊ຺ຌາ ໂລໂຠ ອກຸສລມູລໍ.

ວິສຕ຺ຕິກາຕິ. ເກນຏ຺ເຐນ ວິສຕ຺ຕິກາ? ວິສຕາຕິ ວິສຕ຺ຕິກາ; ວິສາລາຕິ ວິສຕ຺ຕິກາ; ວິສຏາຕິ ວິສຕ຺ຕິກາ; ວິສກ຺ກຕີຕິ ວິສຕ຺ຕິກາ; ວິສໍຫຣຕີຕິ ວິສຕ຺ຕິກາ; ວິສໍວາທິກາຕິ ວິສຕ຺ຕິກາ; ວິສມູລາຕິ ວິສຕ຺ຕິກາ; ວິສຜລາຕິ ວິສຕ຺ຕິກາ; ວິສປຣິໂຠໂຄຕິ ວິສຕ຺ຕິກາ; ວິສາລາ ວາ ປນ ສາ ຕຓ຺ຫາ ຣູເປ ສທ຺ເທ ຄນ຺ເຘ ຣເສ ໂຜຏ຺ຐພ຺ເພ, ກຸເລ ຄເຓ ອາວາເສ ລາເຠ ຍເສ, ປສໍສາຍ ສຸເຂ ຈີວເຣ ປິຓ຺ຑປາເຕ ເສນາສເນ ຄິລານປຈ຺ຈຍເຠສຊ຺ຊປຣິກ຺ຂາເຣ, ກາມຘາຕຸຍາ ຣູປຘາຕຸຍາ ອຣູປຘາຕຸຍາ, ກາມຠເວ ຣູປຠເວ ອຣູປຠເວ, ສຎ຺ຎາຠເວ ອສຎ຺ຎາຠເວ ເນວສຎ຺ຎານາສຎ຺ຎາຠເວ, ເອກໂວກາຣຠເວ ຈຕຸໂວກາຣຠເວ ປຎ຺ຈໂວກາຣຠເວ, ອຕີເຕ ອນາຄເຕ ປຈ຺ຈຸປ຺ປນ຺ເນ, ທິຏ຺ຐສຸຕມຸຕວິຎ຺ຎາຕພ຺ເພສຸ ຘມ຺ເມສຸ ວິສຏາ ວິຕ຺ຖຕາຕິ ວິສຕ຺ຕິກາ.

ໂລເກຕິ ອປາຍໂລເກ ມນຸສ຺ສໂລເກ ເທວໂລເກ, ຂນ຺ຘໂລເກ ຘາຕຸໂລເກ ອາຍຕນໂລເກ. ສໂຕຕິ ຈຕູຫິ ກາຣເຓຫິ ສໂຕ – ກາເຍ ກາຍານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ, ເວທນາສຸ…ເປ… ຈິຕ຺ເຕ… ຘມ຺ເມສຸ ຘມ຺ມານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ.

ອປເຣຫິປິ ຈຕູຫິ ກາຣເຓຫິ ສໂຕ – ອສຕິປຣິວຊ຺ຊນາຍ ສໂຕ, ສຕິກຣຓີຍານໍ ຘມ຺ມານໍ ກຕຕ຺ຕາ ສໂຕ, ສຕິປຣິພນ຺ຘານໍ ຘມ຺ມານໍ ຫຕຕ຺ຕາ ສໂຕ, ສຕິນິມິຕ຺ຕານໍ ຘມ຺ມານໍ ອສມ຺ມຸຏ຺ຐຕ຺ຕາ ສໂຕ.

ອປເຣຫິປິ ຈຕູຫິ ກາຣເຓຫິ ສໂຕ – ສຕິຍາ ສມນ຺ນາຄຕຕ຺ຕາ ສໂຕ, ສຕິຍາ ວສິຕຕ຺ຕາ ສໂຕ, ສຕິຍາ ປາຄຸຎ຺ຎຕາຍ ສໂຕ, ສຕິຍາ ອປຈ຺ໂຈໂຣຫຓຕາຍ [ອປຈ຺ໂຈໂຣປນຕາຍ (ສີ.)] ສໂຕ.

ອປເຣຫິປິ ຈຕູຫິ ກາຣເຓຫິ ສໂຕ – ສຕ຺ຕຕ຺ຕາ ສໂຕ, ສນ຺ຕຕ຺ຕາ ສໂຕ, ສມິຕຕ຺ຕາ ສໂຕ, ສນ຺ຕຘມ຺ມສມນ຺ນາຄຕຕ຺ຕາ ສໂຕ. ພຸທ຺ຘານຸສ຺ສຕິຍາ ສໂຕ, ຘມ຺ມານຸສ຺ສຕິຍາ ສໂຕ, ສງ຺ຆານຸສ຺ສຕິຍາ ສໂຕ, ສີລານຸສ຺ສຕິຍາ ສໂຕ, ຈາຄານຸສ຺ສຕິຍາ ສໂຕ, ເທວຕານຸສ຺ສຕິຍາ ສໂຕ, ອານາປານສ຺ສຕິຍາ ສໂຕ, ມຣຓສ຺ສຕິຍາ ສໂຕ, ກາຍຄຕາສຕິຍາ ສໂຕ, ອຸປສມານຸສ຺ສຕິຍາ ສໂຕ. ຍາ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ ສຕິສມ຺ໂພຊ຺ຌງ຺ໂຄ ເອກາຍນມຄ຺ໂຄ, ອຍໍ ວຸຈ຺ຈຕິ ສຕິ. ອິມາຍ ສຕິຍາ ອຸເປໂຕ ໂຫຕິ ສມຸເປໂຕ ອຸປຄໂຕ ສມຸປຄໂຕ ອຸປປນ຺ໂນ ສມຸປປນ຺ໂນ ສມນ຺ນາຄໂຕ, ໂສ ວຸຈ຺ຈຕິ ສໂຕ.

ໂສມໍ ວິສຕ຺ຕິກໍ ໂລເກ, ສໂຕ ສມຕິວຕ຺ຕຕີຕິ. ໂລເກ ວາ ສາ ວິສຕ຺ຕິກາ, ໂລເກ ວາ ຕໍ ວິສຕ຺ຕິກໍ ສໂຕ ຕຣຕິ ອຸຕ຺ຕຣຕິ ປຕຣຕິ ສມຕິກ຺ກມຕິ ວີຕິວຕ຺ຕຕີຕິ – ໂສມໍ ວິສຕ຺ຕິກໍ ໂລເກ, ສໂຕ ສມຕິວຕ຺ຕຕິ.

ເຕນາຫ ຠຄວາ –

‘‘ໂຍ ກາເມ ປຣິວຊ຺ເຊຕິ, ສປ຺ປສ຺ເສວ ປທາ ສິໂຣ;

ໂສມໍ ວິສຕ຺ຕິກໍ ໂລເກ, ສໂຕ ສມຕິວຕ຺ຕຕີ’’ຕິ.

໔. ເຂຕ຺ຕໍ ວຕ຺ຖຸໍ ຫິຣຎ຺ຎໍ ວາ, ຄວາສ຺ສໍ ທາສໂປຣິສໍ;

ຖິໂຍ ພນ຺ຘູ ປຸຖຸ ກາເມ, ໂຍ ນໂຣ ອນຸຄິຊ຺ຌຕິ.

ເຂຕ຺ຕໍ ວຕ຺ຖຸໍ ຫິຣຎ຺ຎໍ ວາຕິ. ເຂຕ຺ຕນ຺ຕິ ສາລິກ຺ເຂຕ຺ຕໍ ວີຫິກ຺ເຂຕ຺ຕໍ ມຸຄ຺ຄກ຺ເຂຕ຺ຕໍ ມາສກ຺ເຂຕ຺ຕໍ ຍວກ຺ເຂຕ຺ຕໍ ໂຄຘຸມກ຺ເຂຕ຺ຕໍ ຕິລກ຺ເຂຕ຺ຕໍ. ວຕ຺ຖຸນ຺ຕິ ຆຣວຕ຺ຖຸໍ ໂກຏ຺ຐກວຕ຺ຖຸໍ ປຸເຣວຕ຺ຖຸໍ ປຈ຺ຉາວຕ຺ຖຸໍ ອາຣາມວຕ຺ຖຸໍ ວິຫາຣວຕ຺ຖຸໍ. ຫິຣຎ຺ຎນ຺ຕິ ຫິຣຎ຺ຎໍ ວຸຈ຺ຈຕິ ກຫາປໂຓຕິ – ເຂຕ຺ຕໍ ວຕ຺ຖຸໍ ຫິຣຎ຺ຎໍ ວາ.

ຄວາສ຺ສໍ ທາສໂປຣິສນ຺ຕິ. ຄວນ຺ຕິ ຄວາ [ຄາໂວ (ກ.)] ວຸຈ຺ຈນ຺ຕິ. ອສ຺ສາຕິ ປສຸກາທໂຍ ວຸຈ຺ຈນ຺ຕິ. ທາສາຕິ ຈຕ຺ຕາໂຣ ທາສາ – ອນ຺ໂຕຊາຕໂກ ທາໂສ, ຘນກ຺ກີຕໂກ ທາໂສ, ສາມໍ ວາ ທາສພ຺ຍໍ ອຸເປຕິ, ອກາມໂກ ວາ ທາສວິສຍໍ ອຸເປຕິ.

‘‘ອາມາຍ ທາສາປິ ຠວນ຺ຕິ ເຫເກ, ຘເນນ ກີຕາປິ ຠວນ຺ຕິ ທາສາ;

ສາມຎ຺ຈ ເອເກ ອຸປຍນ຺ຕິ ທາສ຺ຍໍ, ຠຍາປນຸຓ຺ຓາປິ ຠວນ຺ຕິ ທາສາ’’ຕິ.

ປຸຣິສາຕິ ຕໂຍ ປຸຣິສາ – ຠຕກາ, ກມ຺ມກຣາ, ອຸປຊີວິໂນຕິ – ຄວາສ຺ສໍ ທາສໂປຣິສໍ.

ຖິໂຍ ພນ຺ຘູ ປຸຖຸ ກາເມຕິ. ຖິໂຍຕິ ອິຕ຺ຖິປຣິຄ຺ຄໂຫ ວຸຈ຺ຈຕິ. ພນ຺ຘູຕິ ຈຕ຺ຕາໂຣ ພນ຺ຘູ – ຎາຕິພນ຺ຘວາປິ ພນ຺ຘຸ, ໂຄຕ຺ຕພນ຺ຘວາປິ ພນ຺ຘຸ, ມນ຺ຕພນ຺ຘວາປິ ພນ຺ຘຸ, ສິປ຺ປພນ຺ຘວາປິ ພນ຺ຘຸ. ປຸຖຸ ກາເມຕິ ພຫູ ກາເມ. ເອເຕ ປຸຖຸ ກາມາ ມນາປິກາ ຣູປາ…ເປ… ມນາປິກາ ໂຜຏ຺ຐພ຺ພາຕິ – ຖິໂຍ ພນ຺ຘູ ປຸຖຸ ກາເມ.

ໂຍ ນໂຣ ອນຸຄິຊ຺ຌຕີຕິ. ໂຍຕິ ໂຍ ຍາທິໂສ ຍຖາຍຸຕ຺ໂຕ ຍຖາວິຫິໂຕ ຍຖາປກາໂຣ ຍໍຐານປ຺ປຕ຺ໂຕ ຍໍຘມ຺ມສມນ຺ນາຄໂຕ ຂຕ຺ຕິໂຍ ວາ ພ຺ຣາຫ຺ມໂຓ ວາ ເວສ຺ໂສ ວາ ສຸທ຺ໂທ ວາ ຄຫຏ຺ໂຐ ວາ ປພ຺ພຊິໂຕ ວາ ເທໂວ ວາ ມນຸສ຺ໂສ ວາ. ນໂຣຕິ ສຕ຺ໂຕ ນໂຣ ມານໂວ ໂປໂສ ປຸຄ຺ຄໂລ ຊີໂວ ຊາຄຸ ຊນ຺ຕຸ ອິນ຺ທຄຸ ມນຸໂຊ. ອນຸຄິຊ຺ຌຕີຕິ ກິເລສກາເມນ ວຕ຺ຖຸກາເມສຸ ຄິຊ຺ຌຕິ ອນຸຄິຊ຺ຌຕິ ປລິຄິຊ຺ຌຕິ ປລິພຊ຺ຌຕີຕິ – ໂຍ ນໂຣ ອນຸຄິຊ຺ຌຕິ.

ເຕນາຫ ຠຄວາ –

‘‘ເຂຕ຺ຕໍ ວຕ຺ຖຸໍ ຫິຣຎ຺ຎໍ ວາ, ຄວາສ຺ສໍ ທາສໂປຣິສໍ;

ຖິໂຍ ພນ຺ຘູ ປຸຖຸ ກາເມ, ໂຍ ນໂຣ ອນຸຄິຊ຺ຌຕີ’’ຕິ.

໕. ອພລາ ນໍ ພລີຍນ຺ຕິ, ມທ຺ທນ຺ເຕ ນໍ ປຣິສ຺ສຍາ;

ຕໂຕ ນໍ ທຸກ຺ຂມນ຺ເວຕິ, ນາວໍ ຠິນ຺ນມິໂວທກໍ.

ອພລາ ນໍ ພລີຍນ຺ຕີຕິ. ອພລາຕິ ອພລາ ກິເລສາ ທຸພ຺ພລາ ອປ຺ປພລາ ອປ຺ປຖາມກາ ຫີນາ ນິຫີນາ ( ) [(ປຣິຫີນາ) (ສີ. ສ຺ຍາ.)] ໂອມກາ ລາມກາ ຉຕຸກ຺ກາ ປຣິຕ຺ຕາ. ເຕ ກິເລສາ ຕໍ ປຸຄ຺ຄລໍ ສຫນ຺ຕິ ປຣິສຫນ຺ຕິ ອຠິຠວນ຺ຕິ ອຊ຺ໂຌຕ຺ຖຣນ຺ຕິ ປຣິຍາທິຍນ຺ຕິ ມທ຺ທນ຺ຕີຕິ, ເອວມ຺ປິ ອພລາ ນໍ ພລີຍນ຺ຕິ. ອຖ ວາ, ອພລໍ ປຸຄ຺ຄລໍ ທຸພ຺ພລໍ ອປ຺ປພລໍ ອປ຺ປຖາມກໍ ຫີນໍ ນິຫີນໍ ໂອມກໍ ລາມກໍ ຉຕຸກ຺ກໍ ປຣິຕ຺ຕໍ, ຍສ຺ສ ນຕ຺ຖິ ສທ຺ຘາພລໍ ວີຣິຍພລໍ ສຕິພລໍ ສມາຘິພລໍ ປຎ຺ຎາພລໍ ຫິຣິພລໍ ໂອຕ຺ຕປ຺ປພລໍ. ເຕ ກິເລສາ ຕໍ ປຸຄ຺ຄລໍ ສຫນ຺ຕິ ປຣິສຫນ຺ຕິ ອຠິຠວນ຺ຕິ ອຊ຺ໂຌຕ຺ຖຣນ຺ຕິ ປຣິຍາທິຍນ຺ຕິ ມທ຺ທນ຺ຕີຕິ – ເອວມ຺ປິ ອພລາ ນໍ ພລີຍນ຺ຕີຕິ.

ມທ຺ທນ຺ເຕ ນໍ ປຣິສ຺ສຍາຕິ. ທ຺ເວ ປຣິສ຺ສຍາ – ປາກຏປຣິສ຺ສຍາ ຈ ປຏິຈ຺ຉນ຺ນປຣິສ຺ສຍາ ຈ. ກຕເມ ປາກຏປຣິສ຺ສຍາ? ສີຫາ ພ຺ຍຄ຺ຆາ ທີປີ ອຈ຺ຉາ ຕຣຈ຺ຉາ ໂກກາ ມຫິໍສາ [ມຫິສາ (ສີ. ສ຺ຍາ.)] ຫຕ຺ຖີ ອຫິວິຈ຺ຉິກາ ສຕປທີ, ໂຈຣາ ວາ ອສ຺ສຸ ມານວາ ວາ ກຕກມ຺ມາ ວາ ອກຕກມ຺ມາ ວາ, ຈກ຺ຂຸໂຣໂຄ ໂສຕໂຣໂຄ ຆານໂຣໂຄ ຊິວ຺ຫາໂຣໂຄ ກາຍໂຣໂຄ ສີສໂຣໂຄ ກຓ຺ຓໂຣໂຄ ມຸຂໂຣໂຄ ທນ຺ຕໂຣໂຄ, ກາໂສ ສາໂສ ປິນາໂສ ຑາໂຫ ຊໂຣ, ກຸຈ຺ຉິໂຣໂຄ ມຸຈ຺ຉາ ປກ຺ຂນ຺ທິກາ ສູລາ ວິສູຈິກາ, ກຸຏ຺ຐໍ ຄຓ຺ໂຑ ກິລາໂສ ໂສໂສ ອປມາໂຣ, ທທ຺ທຸ ກຓ຺ຑຸ ກຈ຺ຉຸ ຣຂສາ [ຣກ຺ຂສາ (ກ.)] ວິຕຈ຺ຉິກາ ໂລຫິຕປິຕ຺ຕໍ, ມຘຸເມໂຫ ອໍສາ ປິຬກາ ຠຄນ຺ທລາ, ປິຕ຺ຕສມຸຏ຺ຐານາ ອາພາຘາ ເສມ຺ຫສມຸຏ຺ຐານາ ອາພາຘາ ວາຕສມຸຏ຺ຐານາ ອາພາຘາ ສນ຺ນິປາຕິກາ ອາພາຘາ ອຸຕຸປຣິຓາມຊາ ອາພາຘາ ວິສມປຣິຫາຣຊາ ອາພາຘາ, ໂອປກ຺ກມິກາ ອາພາຘາ ກມ຺ມວິປາກຊາ ອາພາຘາ, ສີຕໍ ອຸຓ຺ຫໍ ຊິຆຈ຺ຉາ ປິປາສາ ອຸຈ຺ຈາໂຣ ປສ຺ສາໂວ ຑໍສມກສວາຕາຕປສຣີສປສມ຺ຜສ຺ສາ ອິຕິ ວາ – ອິເມ ວຸຈ຺ຈນ຺ຕິ ປາກຏປຣິສ຺ສຍາ.

ກຕເມ ປຏິຈ຺ຉນ຺ນປຣິສ຺ສຍາ? ກາຍທຸຈ຺ຈຣິຕໍ ວຈີທຸຈ຺ຈຣິຕໍ ມໂນທຸຈ຺ຈຣິຕໍ, ກາມຈ຺ຉນ຺ທນີວຣຓໍ ພ຺ຍາປາທນີວຣຓໍ ຖິນມິທ຺ຘນີວຣຓໍ ອຸທ຺ຘຈ຺ຈກຸກ຺ກຸຈ຺ຈນີວຣຓໍ ວິຈິກິຈ຺ຉານີວຣຓໍ, ຣາໂຄ ໂທໂສ ໂມໂຫ ໂກໂຘ ອຸປນາໂຫ ມກ຺ໂຂ ປຬາໂສ ອິສ຺ສາ ມຈ຺ຉຣິຍໍ, ມາຍາ ສາເຐຍ຺ຍໍ ຖມ຺ໂຠ ສາຣມ຺ໂຠ ມາໂນ ອຕິມາໂນ ມໂທ ປມາໂທ, ສພ຺ເພ ກິເລສາ ສພ຺ເພ ທຸຈ຺ຈຣິຕາ ສພ຺ເພ ທຣຖາ ສພ຺ເພ ປຣິຬາຫາ ສພ຺ເພ ສນ຺ຕາປາ ສພ຺ພາກຸສລາຠິສງ຺ຂາຣາ – ອິເມ ວຸຈ຺ຈນ຺ຕິ ປຏິຈ຺ຉນ຺ນປຣິສ຺ສຍາ.

ປຣິສ຺ສຍາຕິ ເກນຏ຺ເຐນ ປຣິສ຺ສຍາ? ປຣິສຫນ຺ຕີຕິ ປຣິສ຺ສຍາ, ປຣິຫານາຍ ສໍວຕ຺ຕນ຺ຕີຕິ ປຣິສ຺ສຍາ, ຕຕ຺ຣາສຍາຕິ ປຣິສ຺ສຍາ. ກຖໍ ປຣິສຫນ຺ຕີຕິ ປຣິສ຺ສຍາ? ເຕ ປຣິສ຺ສຍາ ຕໍ ປຸຄ຺ຄລໍ ສຫນ຺ຕິ ປຣິສຫນ຺ຕິ ອຠິຠວນ຺ຕິ ອຊ຺ໂຌຕ຺ຖຣນ຺ຕິ ປຣິຍາທິຍນ຺ຕິ ມທ຺ທນ຺ຕິ. ເອວໍ ປຣິສຫນ຺ຕີຕິ ປຣິສ຺ສຍາ. ກຖໍ ປຣິຫານາຍ ສໍວຕ຺ຕນ຺ຕີຕິ ປຣິສ຺ສຍາ? ເຕ ປຣິສ຺ສຍາ ກຸສລານໍ ຘມ຺ມານໍ ອນ຺ຕຣາຍາຍ ປຣິຫານາຍ ສໍວຕ຺ຕນ຺ຕິ. ກຕເມສໍ ກຸສລານໍ ຘມ຺ມານໍ? ສມ຺ມາປຏິປທາຍ ອນຸໂລມປຏິປທາຍ ອປຈ຺ຈນີກປຏິປທາຍ ອວິຣຸທ຺ຘປຏິປທາຍ ອນ຺ວຕ຺ຖປຏິປທາຍ ຘມ຺ມານຸຘມ຺ມປຏິປທາຍ, ສີເລສຸ ປຣິປູຣິກາຣິຕາຍ ອິນ຺ທ຺ຣິເຍສຸ ຄຸຕ຺ຕທ຺ວາຣຕາຍ ໂຠຊເນ ມຕ຺ຕຎ຺ຎຸຕາຍ, ຊາຄຣິຍານຸໂຍຄສ຺ສ ສຕິສມ຺ປຊຎ຺ຎສ຺ສ, ຈຕຸນ຺ນໍ ສຕິປຏ຺ຐານານໍ ຠາວນານຸໂຍຄສ຺ສ ຈຕຸນ຺ນໍ ສມ຺ມປ຺ປຘານານໍ ຠາວນານຸໂຍຄສ຺ສ ຈຕຸນ຺ນໍ ອິທ຺ຘິປາທານໍ ຠາວນານຸໂຍຄສ຺ສ, ປຎ຺ຈນ຺ນໍ ອິນ຺ທ຺ຣິຍານໍ ຠາວນານຸໂຍຄສ຺ສ ປຎ຺ຈນ຺ນໍ ພລານໍ ຠາວນານຸໂຍຄສ຺ສ, ສຕ຺ຕນ຺ນໍ ໂພຊ຺ຌງ຺ຄານໍ ຠາວນານຸໂຍຄສ຺ສ ອຣິຍສ຺ສ ອຏ຺ຐງ຺ຄິກສ຺ສ ມຄ຺ຄສ຺ສ ຠາວນານຸໂຍຄສ຺ສ – ອິເມສໍ ກຸສລານໍ ຘມ຺ມານໍ ອນ຺ຕຣາຍາຍ ປຣິຫານາຍ ສໍວຕ຺ຕນ຺ຕິ. ເອວໍ ປຣິຫານາຍ ສໍວຕ຺ຕນ຺ຕີຕິ – ປຣິສ຺ສຍາ.

ກຖໍ ຕຕ຺ຣາສຍາຕິ ປຣິສ຺ສຍາ? ຕຕ຺ເຖເຕ ປາປກາ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຕ຺ຕຠາວສນ຺ນິສ຺ສຍາ. ຍຖາ ພິເລ ພິລາສຍາ ປາຓາ ສຍນ຺ຕິ, ທເກ ທກາສຍາ ປາຓາ ສຍນ຺ຕິ, ວເນ ວນາສຍາ ປາຓາ ສຍນ຺ຕິ, ຣຸກ຺ເຂ ຣຸກ຺ຂາສຍາ ປາຓາ ສຍນ຺ຕິ, ເອວເມວ ຕຕ຺ເຖເຕ ປາປກາ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຕ຺ຕຠາວສນ຺ນິສ຺ສຍາ. ເອວມ຺ປິ ຕຕ຺ຣາສຍາຕິ – ປຣິສ຺ສຍາ.

ວຸຕ຺ຕຎ຺ເຫຕໍ ຠຄວຕາ –

‘‘ສານ຺ເຕວາສິໂກ, ຠິກ຺ຂເວ, ຠິກ຺ຂຸ ສາຈຣິຍໂກ ທຸກ຺ຂໍ ນ ຜາສຸ ວິຫຣຕິ. ກຖຎ຺ຈ, ຠິກ຺ຂເວ, ຠິກ຺ຂຸ ສານ຺ເຕວາສິໂກ ສາຈຣິຍໂກ ທຸກ຺ຂໍ ນ ຜາສຸ ວິຫຣຕິ? ອິຘ, ຠິກ຺ຂເວ, ຠິກ຺ຂຸໂນ ຈກ຺ຂຸນາ ຣູປໍ ທິສ຺ວາ ອຸປ຺ປຊ຺ຊນ຺ຕິ ເຍ ປາປກາ ອກຸສລາ ຘມ຺ມາ ສຣສງ຺ກປ຺ປາ ສຎ຺ໂຎຊນິຍາ, ຕ຺ຍສ຺ສ ອນ຺ໂຕ ວສນ຺ຕິ ອນ຺ວາສວນ຺ຕິ ປາປກາ ອກຸສລາ ຘມ຺ມາຕິ – ຕສ຺ມາ ສານ຺ເຕວາສິໂກຕິ ວຸຈ຺ຈຕິ. ເຕ ນໍ ສມຸທາຈຣນ຺ຕິ. ສມຸທາຈຣນ຺ຕິ ນໍ ປາປກາ ອກຸສລາ ຘມ຺ມາຕິ – ຕສ຺ມາ ສາຈຣິຍໂກຕິ ວຸຈ຺ຈຕິ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸໂນ ໂສເຕນ ສທ຺ທໍ ສຸຕ຺ວາ, ຆາເນນ ຄນ຺ຘໍ ຆາຍິຕ຺ວາ, ຊິວ຺ຫາຍ ຣສໍ ສາຍິຕ຺ວາ, ກາເຍນ ໂຜຏ຺ຐພ຺ພໍ ຜຸສິຕ຺ວາ, ມນສາ ຘມ຺ມໍ ວິຎ຺ຎາຍ ອຸປ຺ປຊ຺ຊນ຺ຕິ ເຍ ປາປກາ ອກຸສລາ ຘມ຺ມາ ສຣສງ຺ກປ຺ປາ ສຎ຺ໂຎຊນິຍາ, ຕ຺ຍສ຺ສ ອນ຺ໂຕ ວສນ຺ຕິ ອນ຺ວາສວນ຺ຕິ ປາປກາ ອກຸສລາ ຘມ຺ມາຕິ – ຕສ຺ມາ ສານ຺ເຕວາສິໂກຕິ ວຸຈ຺ຈຕິ. ເຕ ນໍ ສມຸທາຈຣນ຺ຕິ. ສມຸທາຈຣນ຺ຕິ ນໍ ປາປກາ ອກຸສລາ ຘມ຺ມາຕິ – ຕສ຺ມາ ສາຈຣິຍໂກຕິ ວຸຈ຺ຈຕິ. ເອວໍ ໂຂ, ຠິກ຺ຂເວ, ຠິກ຺ຂຸ ສານ຺ເຕວາສິໂກ ສາຈຣິຍໂກ ທຸກ຺ຂໍ ນ ຜາສຸ ວິຫຣຕີ’’ຕິ. ເອວມ຺ປິ ຕຕ຺ຣາສຍາຕິ – ປຣິສ຺ສຍາ.

ວຸຕ຺ຕຎ຺ເຫຕໍ ຠຄວຕາ –

‘‘ຕໂຍເມ, ຠິກ຺ຂເວ, ອນ຺ຕຣາມລາ – ອນ຺ຕຣາອມິຕ຺ຕາ ອນ຺ຕຣາສປຕ຺ຕາ ອນ຺ຕຣາວຘກາ ອນ຺ຕຣາປຈ຺ຈຕ຺ຖິກາ. ກຕເມ ຕໂຍ? ໂລໂຠ, ຠິກ຺ຂເວ, ອນ຺ຕຣາມລໍ [ອນ຺ຕຣາມໂລ (ສ຺ຍາ.)] ອນ຺ຕຣາອມິຕ຺ໂຕ ອນ຺ຕຣາສປຕ຺ໂຕ ອນ຺ຕຣາວຘໂກ ອນ຺ຕຣາປຈ຺ຈຕ຺ຖິໂກ. ໂທໂສ…ເປ… ໂມໂຫ, ຠິກ຺ຂເວ, ອນ຺ຕຣາມລໍ ອນ຺ຕຣາອມິຕ຺ໂຕ ອນ຺ຕຣາສປຕ຺ໂຕ ອນ຺ຕຣາວຘໂກ ອນ຺ຕຣາປຈ຺ຈຕ຺ຖິໂກ. ອິເມ ໂຂ, ຠິກ຺ຂເວ, ຕໂຍ ອນ຺ຕຣາມລາ – ອນ຺ຕຣາອມິຕ຺ຕາ ອນ຺ຕຣາສປຕ຺ຕາ ອນ຺ຕຣາວຘກາ ອນ຺ຕຣາປຈ຺ຈຕ຺ຖິກາ.

‘‘ອນຕ຺ຖຊນໂນ ໂລໂຠ, ໂລໂຠ ຈິຕ຺ຕປ຺ປໂກປໂນ;

ຠຍມນ຺ຕຣໂຕ ຊາຕໍ, ຕໍ ຊໂນ ນາວພຸຊ຺ຌຕິ.

‘‘ລຸທ຺ໂຘ ອຕ຺ຖໍ ນ ຊານາຕິ, ລຸທ຺ໂຘ ຘມ຺ມໍ ນ ປສ຺ສຕິ;

ອນ຺ຘນ຺ຕມໍ [ອນ຺ຘຕມໍ (ສ຺ຍາ. ກ.)] ຕທາ ໂຫຕິ, ຍໍ ໂລໂຠ ສຫເຕ ນຣໍ.

‘‘ອນຕ຺ຖຊນໂນ ໂທໂສ, ໂທໂສ ຈິຕ຺ຕປ຺ປໂກປໂນ;

ຠຍມນ຺ຕຣໂຕ ຊາຕໍ, ຕໍ ຊໂນ ນາວພຸຊ຺ຌຕິ.

‘‘ກຸທ຺ໂຘ ອຕ຺ຖໍ ນ ຊານາຕິ, ກຸທ຺ໂຘ ຘມ຺ມໍ ນ ປສ຺ສຕິ;

ອນ຺ຘນ຺ຕມໍ ຕທາ ໂຫຕິ, ຍໍ ໂທໂສ ສຫເຕ ນຣໍ.

‘‘ອນຕ຺ຖຊນໂນ ໂມໂຫ, ໂມໂຫ ຈິຕ຺ຕປ຺ປໂກປໂນ;

ຠຍມນ຺ຕຣໂຕ ຊາຕໍ, ຕໍ ຊໂນ ນາວພຸຊ຺ຌຕິ.

‘‘ມູຬ຺ໂຫ ອຕ຺ຖໍ ນ ຊານາຕິ, ມູຬ຺ໂຫ ຘມ຺ມໍ ນ ປສ຺ສຕິ;

ອນ຺ຘນ຺ຕມໍ ຕທາ ໂຫຕິ, ຍໍ ໂມໂຫ ສຫເຕ ນຣ’’ນ຺ຕິ.

ເອວມ຺ປິ ຕຕ຺ຣາສຍາຕິ – ປຣິສ຺ສຍາ.

ວຸຕ຺ຕມ຺ປິ ເຫຕໍ ຠຄວຕາ – ‘‘ຕໂຍ ໂຂ, ມຫາຣາຊ, ປຸຣິສສ຺ສ ຘມ຺ມາ ອຊ຺ຌຕ຺ຕໍ ອຸປ຺ປຊ຺ຊມານາ ອຸປ຺ປຊ຺ຊນ຺ຕິ, ອຫິຕາຍ ທຸກ຺ຂາຍ ອຜາສຸວິຫາຣາຍ. ກຕເມ ຕໂຍ? ໂລໂຠ ໂຂ, ມຫາຣາຊ, ປຸຣິສສ຺ສ ຘມ຺ໂມ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ, ອຫິຕາຍ ທຸກ຺ຂາຍ ອຜາສຸວິຫາຣາຍ. ໂທໂສ ໂຂ, ມຫາຣາຊ…ເປ… ໂມໂຫ ໂຂ, ມຫາຣາຊ, ປຸຣິສສ຺ສ ຘມ຺ໂມ ອຊ຺ຌຕ຺ຕໍ ອຸປ຺ປຊ຺ຊມາໂນ ອຸປ຺ປຊ຺ຊຕິ, ອຫິຕາຍ ທຸກ຺ຂາຍ ອຜາສຸວິຫາຣາຍ. ອິເມ ໂຂ, ມຫາຣາຊ, ຕໂຍ ປຸຣິສສ຺ສ ຘມ຺ມາ ອຊ຺ຌຕ຺ຕໍ ອຸປ຺ປຊ຺ຊມານາ ອຸປ຺ປຊ຺ຊນ຺ຕິ, ອຫິຕາຍ ທຸກ຺ຂາຍ ອຜາສຸວິຫາຣາຍ.

‘‘ໂລໂຠ ໂທໂສ ຈ ໂມໂຫ ຈ, ປຸຣິສໍ ປາປເຈຕສໍ;

ຫິໍສນ຺ຕິ ອຕ຺ຕສມ຺ຠູຕາ, ຕຈສາຣໍວ ສມ຺ຜລ’’ນ຺ຕິ.

ເອວມ຺ປິ ຕຕ຺ຣາສຍາຕິ – ປຣິສ຺ສຍາ.

ວຸຕ຺ຕມ຺ປິ ເຈຕໍ ຠຄວຕາ –

‘‘ຣາໂຄ ຈ ໂທໂສ ຈ ອິໂຕນິທານາ, ອຣຕິ ຣຕິ ໂລມຫໍໂສ ອິໂຕຊາ;

ອິໂຕ ສມຸຏ຺ຐາຍ ມໂນວິຕກ຺ກາ, ກຸມາຣກາ ຘງ຺ກມິໂວສ຺ສຊນ຺ຕີ’’ຕິ [ຘງ຺ກມິໂວສ຺ສຊ຺ຊນ຺ຕິ (ສ຺ຍາ.)].

ເອວມ຺ປິ ຕຕ຺ຣາສຍາຕິ – ປຣິສ຺ສຍາ. ມທ຺ທນ຺ເຕ ນໍ ປຣິສ຺ສຍາຕິ. ເຕ ປຣິສ຺ສຍາ ຕໍ ປຸຄ຺ຄລໍ ສຫນ຺ຕິ ປຣິສຫນ຺ຕິ ອຠິຠວນ຺ຕິ ອຊ຺ໂຌຕ຺ຖຣນ຺ຕິ ປຣິຍາທິຍນ຺ຕິ ມທ຺ທນ຺ຕີຕິ – ມທ຺ທນ຺ເຕ ນໍ ປຣິສ຺ສຍາ.

ຕໂຕ ນໍ ທຸກ຺ຂມນ຺ເວຕີຕິ. ຕໂຕຕິ ຕໂຕ ຕໂຕ ປຣິສ຺ສຍໂຕ ຕໍ ປຸຄ຺ຄລໍ ທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ຊາຕິທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ຊຣາທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ພ຺ຍາຘິທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ມຣຓທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ໂສກປຣິເທວທຸກ຺ຂໂທມນສ຺ສຸປາຍາສທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ເນຣຍິກໍ ທຸກ຺ຂໍ, ຕິຣຈ຺ຉານໂຍນິກໍ ທຸກ຺ຂໍ, ເປຕ຺ຕິວິສຍິກໍ ທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ມານຸສິກໍ ທຸກ຺ຂໍ… ຄພ຺ໂຠກ຺ກນ຺ຕິມູລກໍ ທຸກ຺ຂໍ… ຄພ຺ເຠ ຐິຕິມູລກໍ ທຸກ຺ຂໍ… ຄພ຺ຠາ ວຸຏ຺ຐານມູລກໍ ທຸກ຺ຂໍ… ຊາຕສ຺ສູປນິພນ຺ຘກໍ ທຸກ຺ຂໍ… ຊາຕສ຺ສ ປຣາເຘຍ຺ຍກໍ ທຸກ຺ຂໍ… ອຕ຺ຕູປກ຺ກມໍ ທຸກ຺ຂໍ… ປຣູປກ຺ກມໍ ທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ທຸກ຺ຂທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ສງ຺ຂາຣທຸກ຺ຂໍ… ວິປຣິຓາມທຸກ຺ຂໍ … ຈກ຺ຂຸໂຣໂຄ ໂສຕໂຣໂຄ ຆານໂຣໂຄ ຊິວ຺ຫາໂຣໂຄ ກາຍໂຣໂຄ ສີສໂຣໂຄ ກຓ຺ຓໂຣໂຄ ມຸຂໂຣໂຄ ທນ຺ຕໂຣໂຄ, ກາໂສ ສາໂສ ປິນາໂສ ຑາໂຫ ຊໂຣ, ກຸຈ຺ຉິໂຣໂຄ ມຸຈ຺ຉາ ປກ຺ຂນ຺ທິກາ ສູລາ ວິສູຈິກາ, ກຸຏ຺ຐໍ ຄຓ຺ໂຑ ກິລາໂສ ໂສໂສ ອປມາໂຣ, ທທ຺ທຸ ກຓ຺ຑຸ ກຈ຺ຉຸ ຣຂສາ ວິຕຈ຺ຉິກາ ໂລຫິຕປິຕ຺ຕໍ, ມຘຸເມໂຫ ອໍສາ ປິຬກາ ຠຄນ຺ທລາ ປິຕ຺ຕສມຸຏ຺ຐານາ ອາພາຘາ ເສມ຺ຫສມຸຏ຺ຐານາ ອາພາຘາ ວາຕສມຸຏ຺ຐານາ ອາພາຘາ ສນ຺ນິປາຕິກາ ອາພາຘາ ອຸຕຸປຣິຓາມຊາ ອາພາຘາ ວິສມປຣິຫາຣຊາ ອາພາຘາ, ໂອປກ຺ກມິກາ ອາພາຘາ ກມ຺ມວິປາກຊາ ອາພາຘາ, ສີຕໍ ອຸຓ຺ຫໍ ຊິຆຈ຺ຉາ ປິປາສາ ອຸຈ຺ຈາໂຣ ປສ຺ສາໂວ ຑໍສມກສວາຕາຕປສຣີສປສມ຺ຜສ຺ສທຸກ຺ຂໍ… ມາຕຸມຣຓໍ ທຸກ຺ຂໍ… ປິຕຸມຣຓໍ ທຸກ຺ຂໍ… ຠາຕຸມຣຓໍ ທຸກ຺ຂໍ… ຠຄິນິມຣຓໍ ທຸກ຺ຂໍ… ປຸຕ຺ຕມຣຓໍ ທຸກ຺ຂໍ… ຘີຕຸມຣຓໍ ທຸກ຺ຂໍ … ຎາຕິພ຺ຍສນໍ ທຸກ຺ຂໍ… ໂຠຄພ຺ຍສນໍ ທຸກ຺ຂໍ… ໂຣຄພ຺ຍສນໍ ທຸກ຺ຂໍ… ສີລພ຺ຍສນໍ ທຸກ຺ຂໍ… ທິຏ຺ຐິພ຺ຍສນໍ ທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕີຕິ – ຕໂຕ ນໍ ທຸກ຺ຂມນ຺ເວຕິ.

ນາວໍ ຠິນ຺ນມິໂວທກນ຺ຕິ. ຍຖາ ຠິນ຺ນໍ ນາວໍ ທກເມສິໍ [ອຸທກທາຍິໂຕ (ສີ.), ອຸທກໍ ອນ຺ວາຍິກໍ (ສ຺ຍາ.)] ຕໂຕ ຕໂຕ ອຸທກໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ປຸຣໂຕປິ ອຸທກໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ປຈ຺ຉໂຕປິ… ເຫຏ຺ຐໂຕປິ… ປສ຺ສໂຕປິ ອຸທກໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ; ເອວເມວ ຕໂຕ ຕໂຕ ປຣິສ຺ສຍໂຕ ຕໍ ປຸຄ຺ຄລໍ ທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ, ຊາຕິທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕິ…ເປ… ທິຏ຺ຐິພ຺ຍສນໍ ທຸກ຺ຂໍ ອນ຺ເວຕິ ອນຸຄຈ຺ຉຕິ ອນ຺ວາຍິກໍ ໂຫຕີຕິ – ນາວໍ ຠິນ຺ນມິໂວທກໍ.

ເຕນາຫ ຠຄວາ –

‘‘ອພລາ ນໍ ພລີຍນ຺ຕິ, ມທ຺ທນ຺ເຕ ນໍ ປຣິສ຺ສຍາ;

ຕໂຕ ນໍ ທຸກ຺ຂມນ຺ເວຕິ, ນາວໍ ຠິນ຺ນມິໂວທກ’’ນ຺ຕິ.

໖. ຕສ຺ມາ ຊນ຺ຕຸ ສທາ ສໂຕ, ກາມານິ ປຣິວຊ຺ຊເຍ;

ເຕ ປຫາຍ ຕເຣ ໂອຆໍ, ນາວໍ ສິຕ຺ວາວ ປາຣຄູ.

ຕສ຺ມາ ຊນ຺ຕຸ ສທາ ສໂຕຕິ. ຕສ຺ມາຕິ ຕສ຺ມາ ຕໍກາຣຓາ ຕໍເຫຕຸ ຕປ຺ປຈ຺ຈຍາ ຕໍນິທານາ ເອຕໍ ອາທີນວໍ ສມ຺ປສ຺ສມາໂນ ກາເມສູຕິ – ຕສ຺ມາ. ຊນ຺ຕູຕິ ສຕ຺ໂຕ ນໂຣ ມານໂວ ໂປໂສ ປຸຄ຺ຄໂລ ຊີໂວ ຊາຄຸ ຊນ຺ຕຸ ອິນ຺ທຄຸ ມນຸໂຊ. ສທາຕິ ສທາ ສພ຺ພທາ ສພ຺ພກາລໍ ນິຈ຺ຈກາລໍ ຘຸວກາລໍ ສຕຕໍ ສມິຕໍ ອພ຺ໂພກິຓ຺ຓໍ ໂປງ຺ຂານຸໂປງ຺ຂໍ ອຸທກູມິກຊາຕໍ ອວີຈິ ສນ຺ຕຕິ ສຫິຕໍ ຜສ຺ສິຕໍ [ຜຸສິຕໍ (ສີ. ສ຺ຍາ.)], ປຸເຣຠຕ຺ຕໍ ປຈ຺ຉາຠຕ຺ຕໍ ປຸຣິມຍາມໍ ມຊ຺ຌິມຍາມໍ ປຈ຺ຉິມຍາມໍ, ກາເຬ ຊຸຓ຺ເຫ ວສ຺ເສ ເຫມນ຺ເຕ ຄິມ຺ເຫ, ປຸຣິເມ ວໂຍຂນ຺ເຘ ມຊ຺ຌິເມ ວໂຍຂນ຺ເຘ ປຈ຺ຉິເມ ວໂຍຂນ຺ເຘ. ສໂຕຕິ ຈຕູຫິ ກາຣເຓຫິ ສໂຕ – ກາເຍ ກາຍານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ, ເວທນາສຸ… ຈິຕ຺ເຕ… ຘມ຺ເມສຸ ຘມ຺ມານຸປສ຺ສນາສຕິປຏ຺ຐານໍ ຠາເວນ຺ໂຕ ສໂຕ. ອປເຣຫິ ຈຕູຫິ ກາຣເຓຫິ ສໂຕ…ເປ… ໂສ ວຸຈ຺ຈຕິ ສໂຕຕິ – ຕສ຺ມາ ຊນ຺ຕຸ ສທາ ສໂຕ.

ກາມານິ ປຣິວຊ຺ຊເຍຕິ. ກາມາຕິ ອຸທ຺ທານໂຕ ທ຺ເວ ກາມາ – ວຕ຺ຖຸກາມາ ຈ ກິເລສກາມາ ຈ…ເປ… ອິເມ ວຸຈ຺ຈນ຺ຕິ ວຕ຺ຖຸກາມາ…ເປ… ອິເມ ວຸຈ຺ຈນ຺ຕິ ກິເລສກາມາ. ກາມານິ ປຣິວຊ຺ຊເຍຕິ ທ຺ວີຫິ ກາຣເຓຫິ ກາເມ ປຣິວຊ຺ເຊຍ຺ຍ – ວິກ຺ຂມ຺ຠນໂຕ ວາ ສມຸຈ຺ເຉທໂຕ ວາ. ກຖໍ ວິກ຺ຂມ຺ຠນໂຕ ກາເມ ປຣິວຊ຺ເຊຍ຺ຍ? ‘‘ອຏ຺ຐິກງ຺ກລູປມາ ກາມາ ອປ຺ປສ຺ສາທຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຍ຺ຍ, ‘‘ມໍສເປສູປມາ ກາມາ ພຫຸສາຘາຣຓຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຍ຺ຍ, ‘‘ຕິຓຸກ຺ກູປມາ ກາມາ ອນຸທຫນຏ຺ເຐນາ’’ຕິ ປສ຺ສນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຍ຺ຍ…ເປ… ເນວສຎ຺ຎານາສຎ຺ຎາຍຕນສມາປຕ຺ຕິໍ ຠາເວນ຺ໂຕ ວິກ຺ຂມ຺ຠນໂຕ ກາເມ ປຣິວຊ຺ເຊຍ຺ຍ. ເອວໍ ວິກ຺ຂມ຺ຠນໂຕ ກາເມ ປຣິວຊ຺ເຊຍ຺ຍ…ເປ… ເອວໍ ສມຸຈ຺ເຉທໂຕ ກາເມ ປຣິວຊ຺ເຊຍ຺ຍາຕິ – ກາມານິ ປຣິວຊ຺ຊເຍ.

ເຕ ປຫາຍ ຕເຣ ໂອຆນ຺ຕິ. ເຕຕິ ວຕ຺ຖຸກາເມ ປຣິຊານິຕ຺ວາ ກິເລສກາເມ ປຫາຍ ປຊຫິຕ຺ວາ ວິໂນເທຕ຺ວາ ພ຺ຍນ຺ຕິໍ ກຣິຕ຺ວາ ອນຠາວໍ ຄມິຕ຺ວາ; ກາມຈ຺ຉນ຺ທນີວຣຓໍ ປຫາຍ ປຊຫິຕ຺ວາ ວິໂນເທຕ຺ວາ ພ຺ຍນ຺ຕິໍ ກຣິຕ຺ວາ ອນຠາວໍ ຄມິຕ຺ວາ; ພ຺ຍາປາທນີວຣຓໍ…ເປ… ຖິນມິທ຺ຘນີວຣຓໍ… ອຸທ຺ຘຈ຺ຈກຸກ຺ກຸຈ຺ຈນີວຣຓໍ… ວິຈິກິຈ຺ຉານີວຣຓໍ ປຫາຍ ປຊຫິຕ຺ວາ ວິໂນເທຕ຺ວາ ພ຺ຍນ຺ຕິໍ ກຣິຕ຺ວາ ອນຠາວໍ ຄມິຕ຺ວາ ກາໂມຆໍ ຠໂວຆໍ ທິຏ຺ໂຐຆໍ ອວິຊ຺ໂຊຆໍ ຕເຣຍ຺ຍ ອຸຕ຺ຕເຣຍ຺ຍ ປຕເຣຍ຺ຍ ສມຕິກ຺ກເມຍ຺ຍ ວີຕິວຕ຺ເຕຍ຺ຍາຕິ – ເຕ ປຫາຍ ຕເຣ ໂອຆໍ.

ນາວໍ ສິຕ຺ວາວ ປາຣຄູຕິ. ຍຖາ ຄຣຸກໍ ນາວໍ ຠາຣິກໍ ອຸທກໍ ສິຕ຺ວາ [ສິຎ຺ຈິຕ຺ວາ (ສີ. ສ຺ຍາ.)] ໂອສິຎ຺ຈິຕ຺ວາ ຉຑ຺ເຑຕ຺ວາ ລຫຸກາຍ ນາວາຍ ຂິປ຺ປໍ ລຫຸໍ ອປ຺ປກສິເຣເນວ ປາຣໍ ຄຈ຺ເຉຍ຺ຍ; ເອວເມວ ວຕ຺ຖຸກາເມ ປຣິຊານິຕ຺ວາ ກິເລສກາເມ ປຫາຍ ປຊຫິຕ຺ວາ ວິໂນເທຕ຺ວາ ພ຺ຍນ຺ຕິໍ ກຣິຕ຺ວາ ອນຠາວໍ ຄມິຕ຺ວາ; ກາມຈ຺ຉນ຺ທນີວຣຓໍ… ພ຺ຍາປາທນີວຣຓໍ… ຖິນມິທ຺ຘນີວຣຓໍ… ອຸທ຺ຘຈ຺ຈກຸກ຺ກຸຈ຺ຈນີວຣຓໍ… ວິຈິກິຈ຺ຉານີວຣຓໍ ປຫາຍ ປຊຫິຕ຺ວາ ວິໂນເທຕ຺ວາ ພ຺ຍນ຺ຕິໍ ກຣິຕ຺ວາ ອນຠາວໍ ຄມິຕ຺ວາ ຂິປ຺ປໍ ລຫຸໍ ອປ຺ປກສິເຣເນວ ປາຣໍ ຄຈ຺ເຉຍ຺ຍ. ປາຣໍ ວຸຈ຺ຈຕິ ອມຕໍ ນິພ຺ພານໍ. ໂຍ ໂສ ສພ຺ພສງ຺ຂາຣສມໂຖ ສພ຺ພູປຘິປຏິນິສ຺ສຄ຺ໂຄ ຕຓ຺ຫກ຺ຂໂຍ ວິຣາໂຄ ນິໂຣໂຘ ນິພ຺ພານໍ. ປາຣໍ ຄຈ຺ເຉຍ຺ຍາຕິ – ປາຣໍ ອຘິຄຈ຺ເຉຍ຺ຍ, ປາຣໍ ຜຸເສຍ຺ຍ, ປາຣໍ ສຈ຺ຉິກເຣຍ຺ຍ. ປາຣຄູຕິ ໂຍປິ ປາຣໍ ຄນ຺ຕຸກາໂມ ໂສປິ ປາຣຄູ; ໂຍປິ ປາຣໍ ຄຈ຺ຉຕິ ໂສປິ ປາຣຄູ; ໂຍປິ ປາຣໍ ຄໂຕ, ໂສປິ ປາຣຄູ.

ວຸຕ຺ຕມ຺ປິ ເຫຕໍ ຠຄວຕາ –

ຕິຓ຺ໂຓ ປາຣງ຺ຄໂຕ ຖເລ ຕິຏ຺ຐຕິ ພ຺ຣາຫ຺ມໂຓຕິ. ພ຺ຣາຫ຺ມໂຓຕິ ໂຂ, ຠິກ຺ຂເວ, ອຣຫໂຕ ເອຕໍ ອຘິວຈນໍ. ໂສ ອຠິຎ຺ຎາປາຣຄູ ປຣິຎ຺ຎາປາຣຄູ ປຫານປາຣຄູ ຠາວນາປາຣຄູ ສຈ຺ຉິກິຣິຍາປາຣຄູ ສມາປຕ຺ຕິປາຣຄູ. ອຠິຎ຺ຎາປາຣຄູ ສພ຺ພຘມ຺ມານໍ, ປຣິຎ຺ຎາປາຣຄູ ສພ຺ພທຸກ຺ຂານໍ, ປຫານປາຣຄູ ສພ຺ພກິເລສານໍ, ຠາວນາປາຣຄູ ຈຕຸນ຺ນໍ ອຣິຍມຄ຺ຄານໍ, ສຈ຺ຉິກິຣິຍາປາຣຄູ ນິໂຣຘສ຺ສ, ສມາປຕ຺ຕິປາຣຄູ ສພ຺ພສມາປຕ຺ຕີນໍ. ໂສ ວສິປ຺ປຕ຺ໂຕ ປາຣມິປ຺ປຕ຺ໂຕ ອຣິຍສ຺ມິໍ ສີລສ຺ມິໍ, ວສິປ຺ປຕ຺ໂຕ ປາຣມິປ຺ປຕ຺ໂຕ ອຣິຍສ຺ມິໍ ສມາຘິສ຺ມິໍ, ວສິປ຺ປຕ຺ໂຕ ປາຣມິປ຺ປຕ຺ໂຕ ອຣິຍາຍ ປຎ຺ຎາຍ, ວສິປ຺ປຕ຺ໂຕ ປາຣມິປ຺ປຕ຺ໂຕ ອຣິຍາຍ ວິມຸຕ຺ຕິຍາ. ໂສ ປາຣໍ ຄໂຕ ປາຣປ຺ປຕ຺ໂຕ ອນ຺ຕຄໂຕ ອນ຺ຕປ຺ປຕ຺ໂຕ ໂກຏິຄໂຕ ໂກຏິປ຺ປຕ຺ໂຕ ປຣິຍນ຺ຕຄໂຕ ປຣິຍນ຺ຕປ຺ປຕ຺ໂຕ ໂວສານຄໂຕ ໂວສານປ຺ປຕ຺ໂຕ ຕາຓຄໂຕ ຕາຓປ຺ປຕ຺ໂຕ ເລຓຄໂຕ ເລຓປ຺ປຕ຺ໂຕ ສຣຓຄໂຕ ສຣຓປ຺ປຕ຺ໂຕ ອຠຍຄໂຕ ອຠຍປ຺ປຕ຺ໂຕ ອຈ຺ຈຸຕຄໂຕ ອຈ຺ຈຸຕປ຺ປຕ຺ໂຕ ອມຕຄໂຕ ອມຕປ຺ປຕ຺ໂຕ ນິພ຺ພານຄໂຕ ນິພ຺ພານປ຺ປຕ຺ໂຕ. ໂສ ວຸຏ຺ຐວາໂສ ຈິຓ຺ຓຈຣໂຓ ຄຕທ຺ໂຘ ຄຕທິໂສ ຄຕໂກຏິໂກ ປາລິຕພ຺ຣຫ຺ມຈຣິໂຍ ອຸຕ຺ຕມທິຏ຺ຐິປ຺ປຕ຺ໂຕ ຠາວິຕມຄ຺ໂຄ ປຫີນກິເລໂສ ປຏິວິທ຺ຘາກຸປ຺ໂປ ສຈ຺ຉິກຕນິໂຣໂຘ, ທຸກ຺ຂໍ ຕສ຺ສ ປຣິຎ຺ຎາຕໍ, ສມຸທໂຍ ປຫີໂນ, ມຄ຺ໂຄ ຠາວິໂຕ, ນິໂຣໂຘ ສຈ຺ຉິກໂຕ, ອຠິຎ຺ເຎຍ຺ຍໍ ອຠິຎ຺ຎາຕໍ, ປຣິຎ຺ເຎຍ຺ຍໍ ປຣິຎ຺ຎາຕໍ, ປຫາຕພ຺ພໍ ປຫີນໍ, ຠາເວຕພ຺ພໍ ຠາວິຕໍ, ສຈ຺ຉິກາຕພ຺ພໍ ສຈ຺ຉິກຕໍ.

ໂສ ອຸກ຺ຂິຕ຺ຕປລິໂຆ ສໍກິຓ຺ຓປຣິກ຺ໂຂ ອພ຺ພຸຬ຺ເຫສິໂກ ນິຣຄ຺ຄໂຬ ອຣິໂຍ ປນ຺ນທ຺ຘໂຊ ປນ຺ນຠາໂຣ ວິສຎ຺ຎຸຕ຺ໂຕ ປຎ຺ຈງ຺ຄວິປ຺ປຫີໂນ ຉຬງ຺ຄສມນ຺ນາຄໂຕ ເອກາຣກ຺ໂຂ ຈຕຸຣາປສ຺ເສໂນ ປນຸຓ຺ຓປຈ຺ເຈກສຈ຺ໂຈ ສມວຍສຏ຺ເຐສໂນ ອນາວິລສງ຺ກປ຺ໂປ ປສ຺ສທ຺ຘກາຍສງ຺ຂາໂຣ ສຸວິມຸຕ຺ຕຈິຕ຺ໂຕ ສຸວິມຸຕ຺ຕປຎ຺ໂຎ ເກວລີ ວຸສິຕວາ ອຸຕ຺ຕມປຸຣິໂສ ປຣມປຸຣິໂສ ປຣມປຕ຺ຕິປ຺ປຕ຺ໂຕ. ໂສ ເນວາຈິນຕິ [ເນວ ອາຈິນາຕິ (ສີ. ສ຺ຍາ.)] ນາປຈິນຕິ, ອປຈິນິຕ຺ວາ ຐິໂຕ. ເນວ ປຊຫຕິ ນ ອຸປາທິຍຕິ, ປຊຫິຕ຺ວາ ຐິໂຕ. ເນວ ສໍສິພ຺ພຕິ [ເນວ ສິເນຕິ (ສີ.), ເນວ ວິສີເນຕິ (ສ຺ຍາ.)] ນ ອຸສ຺ສິເນຕິ, ວິສິນິຕ຺ວາ ຐິໂຕ. ເນວ ວິຘູເປຕິ ນ ສນ຺ຘູເປຕິ, ວິຘູເປຕ຺ວາ ຐິໂຕ. ອເສກ຺ເຂນ ສີລກ຺ຂນ຺ເຘນ ສມນ຺ນາຄຕຕ຺ຕາ ຐິໂຕ. ອເສກ຺ເຂນ ສມາຘິກ຺ຂນ຺ເຘນ… ອເສກ຺ເຂນ ປຎ຺ຎາກ຺ຂນ຺ເຘນ… ອເສກ຺ເຂນ ວິມຸຕ຺ຕິກ຺ຂນ຺ເຘນ… ອເສກ຺ເຂນ ວິມຸຕ຺ຕິຎາຓທສ຺ສນກ຺ຂນ຺ເຘນ ສມນ຺ນາຄຕຕ຺ຕາ ຐິໂຕ. ສຈ຺ຈໍ ສມ຺ປຏິປາທິຍິຕ຺ວາ ຐິໂຕ. ເອຊໍ ສມຕິກ຺ກມິຕ຺ວາ ຐິໂຕ. ກິເລສຄ຺ຄິໍ ປຣິຍາທິຍິຕ຺ວາ ຐິໂຕ, ອປຣິຄມນຕາຍ ຐິໂຕ, ກຏໍ ສມາທາຍ ຐິໂຕ, ມຸຕ຺ຕິປຏິເສວນຕາຍ ຐິໂຕ, ເມຕ຺ຕາຍ ປາຣິສຸທ຺ຘິຍາ ຐິໂຕ, ກຣຸຓາຍ… ມຸທິຕາຍ… ອຸເປກ຺ຂາຍ ປາຣິສຸທ຺ຘິຍາ ຐິໂຕ, ອຈ຺ຈນ຺ຕປາຣິສຸທ຺ຘິຍາ ຐິໂຕ, ອກມ຺ມຍຕາຍ [ອຕມ຺ມຍຕາຍ (ສີ.), ອກມ຺ມຎ຺ຎຕາຍ (ສ຺ຍາ.)] ປາຣິສຸທ຺ຘິຍາ ຐິໂຕ, ວິມຸຕ຺ຕຕ຺ຕາ ຐິໂຕ, ສນ຺ຕຸສ຺ສິຕຕ຺ຕາ ຐິໂຕ, ຂນ຺ຘປຣິຍນ຺ເຕ ຐິໂຕ, ຘາຕຸປຣິຍນ຺ເຕ ຐິໂຕ, ອາຍຕນປຣິຍນ຺ເຕ ຐິໂຕ, ຄຕິປຣິຍນ຺ເຕ ຐິໂຕ, ອຸປປຕ຺ຕິປຣິຍນ຺ເຕ ຐິໂຕ, ປຏິສນ຺ຘິປຣິຍນ຺ເຕ ຐິໂຕ, (ຠວປຣິຍນ຺ເຕ ຐິໂຕ, ສໍສາຣປຣິຍນ຺ເຕ ຐິໂຕ ວຏ຺ຏປຣິຍນ຺ເຕ ຐິໂຕ, ອນ຺ຕິເມ ຠເວ ຐິໂຕ,) [( ) ນຕ຺ຖິ ສີຫຬໂປຕ຺ຖເກ] ອນ຺ຕິເມ ສມຸສ຺ສເຍ ຐິໂຕ, ອນ຺ຕິມເທຫຘໂຣ ອຣຫາ.

‘‘ຕສ຺ສາຍໍ ປຈ຺ຉິມໂກ ຠໂວ, ຈຣິໂມຍໍ ສມຸສ຺ສໂຍ;

ຊາຕິມຣຓສໍສາໂຣ, ນຕ຺ຖິ ຕສ຺ສ ປຸນພ຺ຠໂວ’’ຕິ.

ນາວໍ ສິຕ຺ວາວ ປາຣຄູຕິ. ເຕນາຫ ຠຄວາ –

‘‘ຕສ຺ມາ ຊນ຺ຕຸ ສທາ ສໂຕ, ກາມານິ ປຣິວຊ຺ຊເຍ;

ເຕ ປຫາຍ ຕເຣ ໂອຆໍ, ນາວໍ ສິຕ຺ວາວ ປາຣຄູ’’ຕິ.

ກາມສຸຕ຺ຕນິທ຺ເທໂສ ປຐໂມ.