໘. ອນວເສສສິກ຺ຂາປທປຎ຺ໂຫ

໘. ‘‘ຠນ຺ເຕ ນາຄເສນ, ເຍ ເຕ ອເຫສຸໍ ຕິກິຈ຺ຉການໍ ປຸພ຺ພກາ ອາຈຣິຍາ ເສຍ຺ຍຖິທໍ, ນາຣໂທ ຘມ຺ມນ຺ຕຣີ [ຘນ຺ວນ຺ຕຣີ (?)] ອງ຺ຄິຣໂສ ກປິໂລ ກຓ຺ຑຣຄ຺ຄິ ສາໂມ ອຕຸໂລ ປຸພ຺ພກຈ຺ຈາຍໂນ, ສພ຺ເພເປເຕ ອາຈຣິຍາ ສກິໍ ເຍວ ໂຣຄຸປ຺ປຕ຺ຕິຎ຺ຈ ນິທານຎ຺ຈ ສຠາວຎ຺ຈ ສມຸຏ຺ຐານຎ຺ຈ ຕິກິຈ຺ຉຎ຺ຈ ກິຣິຍຎ຺ຈ ສິທ຺ຘາສິທ຺ຘຎ຺ຈ ສພ຺ພໍ ຕໍ [ສນ຺ຕໍ (ກ.)] ນິຣວເສສໍ ຊານິຕ຺ວາ ‘ອິມສ຺ມິໍ ກາເຍ ເອຕ຺ຕກາ ໂຣຄາ ອຸປ຺ປຊ຺ຊິສ຺ສນ຺ຕີ’ຕິ ເອກປ຺ປຫາເຣນ ກລາປຄ຺ຄາຫໍ ກຣິຕ຺ວາ ສຸຕ຺ຕໍ ພນ຺ຘິໍສຸ, ອສພ຺ພຎ຺ຎຸໂນ ເອເຕ ສພ຺ເພ, ກິສ຺ສ ປນ ຕຖາຄໂຕ ສພ຺ພຎ຺ຎູ ສມາໂນ ອນາຄຕໍ ກິຣິຍໍ ພຸທ຺ຘຎາເຓນ ຊານິຕ຺ວາ ‘ເອຕ຺ຕເກ ນາມ ວຕ຺ຖຸສ຺ມິໍ ເອຕ຺ຕກໍ ນາມ ສິກ຺ຂາປທໍ ປຎ຺ຎເປຕພ຺ພໍ ຠວິສ຺ສຕີ’ຕິ ປຣິຈ຺ຉິນ຺ທິຕ຺ວາ ອນວເສສໂຕ ສິກ຺ຂາປທໍ ນ ປຎ຺ຎເປສິ, ອຸປ຺ປນ຺ນຸປ຺ປນ຺ເນ ວຕ຺ຖຸສ຺ມິໍ ອຍເສ ປາກເຏ ໂທເສ ວິຕ຺ຖາຣິເກ ປຸຖຸຄເຕ ອຸຊ຺ຌາຍນ຺ເຕສຸ ມນຸສ຺ເສສຸ ຕສ຺ມິໍ ຕສ຺ມິໍ ກາເລ ສາວການໍ ສິກ຺ຂາປທໍ ປຎ຺ຎເປສີ’’ຕິ?

‘‘ຎາຕເມຕໍ, ມຫາຣາຊ, ຕຖາຄຕສ຺ສ ‘ອິມສ຺ມິໍ ສມເຍ ອິເມສຸ ມນຸສ຺ເສສຸ ສາຘິກໍ ທິຍຑ຺ຒສິກ຺ຂາປທສຕໍ ປຎ຺ຎເປຕພ຺ພໍ ຠວິສ຺ສຕີ’ຕິ, ອປິ ຈ ຕຖາຄຕສ຺ສ ເອວໍ ອໂຫສິ ‘ສເຈ ໂຂ ອຫໍ ສາຘິກໍ ທິຍຑ຺ຒສິກ຺ຂາປທສຕໍ ເອກປ຺ປຫາຣໍ ປຎ຺ຎເປສ຺ສາມິ, ມຫາຊໂນ ສນ຺ຕາສມາປຊ຺ຊິສ຺ສຕິ ‘ພຫຸກໍ ອິຘ ຣກ຺ຂິຕພ຺ພໍ, ທຸກ຺ກຣໍ ວຕ ໂຠ ສມຓສ຺ສ ໂຄຕມສ຺ສ ສາສເນ ປພ຺ພຊິຕຸ’ນ຺ຕິ, ປພ຺ພຊິຕຸກາມາປິ ນ ປພ຺ພຊິສ຺ສນ຺ຕິ, ວຈນຎ຺ຈ ເມ ນ ສທ຺ທຫິສ຺ສນ຺ຕິ, ອສທ຺ທຫນ຺ຕາ ເຕ ມນຸສ຺ສາ ອປາຍຄາມິໂນ ຠວິສ຺ສນ຺ນ-ຕິ ອຸປ຺ປນ຺ນຸປ຺ປນ຺ເນ ວຕ຺ຖຸສ຺ມິໍ ຘມ຺ມເທສນາຍ ວິຎ຺ຎາເປຕ຺ວາ ປາກເຏ ໂທເສ ສິກ຺ຂາປທໍ ປຎ຺ຎເປສ຺ສາມີ’’’ຕິ. ‘‘ອຈ຺ຉຣິຍໍ, ຠນ຺ເຕ ນາຄເສນ, ພຸທ຺ຘານໍ, ອພ຺ຠຸຕໍ, ຠນ຺ເຕ ນາຄເສນ, ພຸທ຺ຘານໍ, ຍາວ ມຫນ຺ຕໍ ຕຖາຄຕສ຺ສ ສພ຺ພຎ຺ຎຸຕຎາຓໍ, ເອວເມຕໍ, ຠນ຺ເຕ ນາຄເສນ, ສຸນິທ຺ທິຏ຺ໂຐ ເອໂສ ອຕ຺ໂຖ ຕຖາຄເຕນ, ‘ພຫຸກໍ ອິຘ ສິກ຺ຂິຕພ຺ພ’ນ຺ຕິ ສຸຕ຺ວາ ສຕ຺ຕານໍ ສນ຺ຕາໂສ ອຸປ຺ປຊ຺ເຊຍ຺ຍ, ເອໂກປິ ຊິນສາສເນ ນ ປພ຺ພເຊຍ຺ຍ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ອນວເສສສິກ຺ຂາປທປຎ຺ໂຫ ອຏ຺ຐໂມ.